मकवानपुर । मकवानपुर प्रहरीले लागूऔषध गाँजा २४२ किलोसहित ५ जनालाई नियन्त्रणमा लिएकाे छ । प्रहरीले ३ दिनकाे अवधीमा मकवानपुरबाट उक्त परिमाणकाे गाँजासहित ५ जनालाई नियन्त्रणमा लिएकाे हाे ।
बुधबार १६० किलो गाँजासहित गोरखा भिमसेन थापा गाउँपालिका–६ का २८ वर्षीय अमीर मियालाई मकवानपुर प्रहरीले नियन्त्रणमा लिएको हाे । मकवानपुरको भीमफेदी गाउँपालिका–२, भैंसेस्थित प्रहरी चेकपोष्टमा पालुङबाट हेटौँडातर्फ आउँदै गरेको प्र. न. ३–०१–०२३ च ८०४७ नम्बरको योद्धा गाडीबाट ३० वटा पोकामा १६० किलो गाँजा बरामद गरी थापालाई नियन्त्रणमा लिएकाे जिल्ला प्रहरी कार्यालय मकवानपुरले जनाएकाे छ ।
यसैगरी सोमबार मकवानपुर प्रहरीले पुर्व पश्चिम लोकमार्ग अन्तर्गत हेटौडा उपमहानगरपालिका वडा नंबर–१९ तिनताप्केबाट ७१ किलो ७०० ग्राम गाँजा सहित राक्सीराङ गाउँपालिका वडा नंबर– ९ बस्ने २० वर्षीय मिलन घलान र सोही गाडीमा सवार सोही स्थानका २६ वर्षीय दावा थिङलाई नियन्त्रणमा लिएकाे थियाे । मनहरीबाट हेटौडातर्फ आउँदै गरेको प्रदेश ३–०१–०२४ च ३०५९ नम्बरको पिकअप गाडीबाट उक्त परिमाणकाे गाँजासहित उनीहरुलाई नियन्त्रणमा लिइएकाे प्रहरीले जनाएकाे छ ।
यस्तै आइतबार मनहरी गाउँपालिकाबाट १० किलो २५० ग्राम गाँजासहित २ जनालाई नियन्त्रणमा लिइएकाे प्रहरीले जनाएकाे छ । मकवानपुरको मनहरी गाउँपालिका-९ भलाद्मीचोकस्थित पुर्व पश्चिम सडकबाट उक्त परिमाणकाे गाँजासहित मनहरी गाउँपालिका- ८ बस्ने २८ वर्षीय रामकुमार परियार र मनहरी ९ बस्ने ३६ वर्षीय रामकुमार स्याङबोलाई प्रहरीले नियन्त्रणमा लिएकाे हाे । मनहरीबाट हेटौडा तर्फ आउदै गरेको ना १ ह ५०३३ नम्बरको अटोमा सवार उनीहरुलाई गाँजा सहित नियन्त्रणमा लिइएकाे मकवानपुर प्रहरीले जनाएकाे छ ।
मकवानपुर । उमेर हदको कारण सेवा निवृत्त भएका प्रदेश प्रमुख कार्यालय बागमतीका लेखा अधिकृत भृगुराज खनाललाई सहकर्मीहरुले सेवाबाट बिदाई तथा सामाजिक काममा फेरी भेटौंला भन्दै शुभकामना दिएका छन् ।
२०५३ सालमा निजामति सेवा प्रवेश गरेका खनाल उमेर हदको कारण सेवा निवृत्त भएका हुन् । सेवामा प्रवेश गरेपछि अवकाश सामान्य प्रकृया भए पनि सेवा प्रतिकाे सम्मानका मुख्य भएकाे भन्दै बिदाइ कार्यक्रम गरिएकाे हाे । विभिन्न राजनीतिक कालखण्डमा विभिन्न चुनौतिहरु सामना गर्नु परेको स्मरण गर्दै बिदाइ कार्यक्रममा लेखा अधिकृत खनालले भने “जागिरे जीवन सहजै अवतरण गरिएला झै लाग्दैन थ्यो, इमान बचाएर काम गर्न धेरै मेहनत गर्नु पर्याे ।” सेवाकालीन समयमा कुनै कुनै कार्यालयमा सरुवा भएर जाँदा, काम सुरु गर्दा व्यर्थ हाजिर हुन आएछु भन्ने अवस्था समेत आएको उनले स्मरण गरे । विशेष गरी द्वन्द्वकालमा धेरै दबाव र धम्किहरु खेप्नु परेको उनले स्मरण गरे । “जति सकियो राज्यका लागि गरियो, आज फर्केर हेर्दा आफ्नो कामप्रति गौरव छ” खनालले भने ।
अवकाश प्राप्त जीवनमा पनि कुनै न कुनै रुपमा राज्यले उहाँको योगदान ग्रहण गरिरहने बिदाइ कार्यक्रममा प्रदेश प्रमुख कार्यालयका उप सचिव इमनाथ कंडेलले अपेक्षा गरे । “आफ्नो ज्ञान र अनुभव, सिपलाई आगामी दिनमा पनि शसक्त रुपमा प्रकट गर्नुहुनेछ, उहाँको सिकाइ, भोगाइबाट समाजले अझै धेरै पाउने छ भन्ने अपेक्षा गरेको छु” कंडेलले भने ।

कार्यरत रहदा कामको शिलशिलामा एक कार्यालयबाट अर्को कार्यालयमा सरुवा हुँदा समेत भावुक हुने मानवीय स्वाभाव रहेको बताउँदै सेवाबाटै निवृत्त हुँदा पनि गौरव गर्नुपर्ने अवस्था बनाउनु सक्नु, त्यो नै सम्पत्तिको रुपमा रहने कार्यलयका प्रवक्ता देवेन्द्र सापकोटाले बताए । “उहाँको अवकाशयुक्त जीवन स्वास्थ्य र सिर्जनशिल रहोस” सापकोटाले भने ।
खनाल अति नै सरल स्वभावको, समभाव, सहकार्यमा अब्बल व्यक्तित्व रहेकोले अवकाशपछिको उहाँको जीवन अझै उत्कृष्ट हुने कानून अधिकृत प्रकाश चपागाईले बताए । सेवा अवधिमा एक पटक पनि कामको क्रममा स्पष्टिकरण दिनु नपरेको र स–सम्मान निवृत हुनु पाउनु गौरवको सवाल रहेको चापागाँइले बताए ।
मकवानपुर । मकवानपुर हेटौंडाका बेलप्रसाद खतिवडाले जन्मदिनकाे अवसरमा पुस्तकालयलाई पुस्तक सहयोग गरेका छन् । हेटौंडा १८ निवासी खतिवडाले आफ्नो जन्मदिनमा पुष्पलाल स्मृति पुस्तकालयलाई ११ वटा पुस्तक सहयोग गरेका हुन् ।
हेटौंडा–५ स्थित पुस्तकालयमै पुगेर खतिवडाले ७ हजार ५ सय रुपैयाँ बराबरको पुस्तक हस्तान्तरण गरे । साहित्य संगम मकवानपुर संगम अध्यक्ष डीबी बर्तौला र सचिव तथा पुस्तकालय व्यवस्थापन समितिका संयोजक मनोज पोखरेललाई खतिवडा दम्पत्तिले पुस्तक हस्तान्तरण गरेका थिए । जन्मदिनलाई अवसरकाे रुपमा सदुपयोग गर्दै पुस्तकालयलाई पुस्तक सहयोग गरिएकाे खतिवडाले बताए । संगम अध्यक्ष बर्तौलाले पुस्तकालयलाई नयाँ पुस्तक भएकाेले पाठकले लाभ लिन सक्ने बताए ।
खतिवडाले सुधीर शर्माको ‘हिमालपारिको हुरी’, भिक्षु, ‘व्यापार र विद्रोह’, भेषबहादुर थापाको ‘राष्ट्र परराष्ट्र’, गोविन्द कुसुमको ‘भृकुटी’, भानु बोखिमको ‘गोधुली गीत’, शैलेन्द्र अधिकारीको ‘अर्हत्’, सागर गैरेको ‘मोहर’, रमेश भुषालको ‘छालबाटो’, रमेश सायनको ‘अन्तर’, डा. श्रीधर खनालको ‘शावर्णी’, घनश्याम खड्काको ‘निर्वाण’ पुस्तकालयलाई हस्तान्तरण गरे ।
हेटौंडा उपमहानगरपालिकाले स्थापना गरी साहित्य संगम मकवानपुरकाे व्यवस्थापनमा सञ्चालन हुँदै आएको पुष्पलाल स्मृति पुस्तकालय दैनिक बिहान १० बजेदेखि साँझ साढे ५ बजेसम्म खुल्ने गरेको छ । पुस्तकालयकाे २ सय भन्दा बढी सदस्य रहेकाे पोखरेलले जानकारी दिए ।
१९ नम्बर वडामा ४४ वटा सूचक सतप्रतिशत
Tags: No Comments
मकवानपुर । मकवानपुरकाे हेटौंडा उपमहानगरपालिकाकाे वडा नम्बर १९ वडाले ४४ वटा सुचक सतप्रतिशत पुरा गर्दै बालमैत्री स्थानीय शासनयुक्त वडा घोषणा हुने भएकाे छ । मंगलबार हेटौंडा १९ वस्तिपुर स्थित वडा कार्यालयमा पत्रकार भेटघाट गरी वडालाई १४ मंसिरमा निकृष्ट बालश्रम मुक्त, वालविवाह मुक्त तथा बालमैत्री स्थानीय शासनयुक्त वडा घाेषणा गरिने जनाकारी दिइएकाे हाे ।
वड़ा अध्यक्ष एवम् बालमैत्री स्थानीय शासनयुक्त वडा घोषणा मुल समारोह समिति संयोजक नरनाथ सुवेदीले “बालबालिकामा लगानी, सुनिश्चित भविष्यको थालनी” भन्ने मुल नाराका साथ आगामी शुक्रबार १४ मंसिरमा वडालाई निकृष्ट बालश्रम मुक्त, बाल विवाह मुक्त तथा बालमैत्री स्थानीय शासनयुक्त वडा घोषणा गरिने जानकारी दिए ।
पत्रकार भेटघाटमा वडा अध्यक्ष सेवेदीले पूर्ण खोपयुक्त, पूर्व साक्षर, खुल्ला दिसामुक्त वडा घोषणा भई सकेको १९ नम्बर वडालाई बालमैत्री स्थानीय शासन घोषणा गर्न आवश्यक ५१ वटा सूचक पुरा भएकाे बताए । ५१ वटा सूचकहरुमध्ये ४४ वटा सूचकहरु १०० प्रतिशत, १ वटा सूचक ९८ प्रतिशत्, ३ वटा सूचक ९५ प्रतिशत र १ वटा सूचक ९० प्रतिशत, १ वटा सूचक ८५ प्रतिशत, १ वटा सूचक ८० प्रतिशतसम्म नतिजा हासिल भएकाेले बालमैत्री स्थानीय शासनयुक्त वडा घोषणा गर्न लागिएकाे अध्यक्ष सुवेदीले जानकारी दिए ।
अधिकांश भागहरु ग्रामिणस्तरका रहेकाे वडामा घरधुरी तथ्याङ्ग संकलन सर्वेक्षण, २०७९ अनुसार १८ वर्ष मुनिका बालबालिकाको जनसंख्या ३,३५० रहेको बताइएकाे छ । बालबालिकाकाे संख्या मध्ये १ हजार ७२७ बालक र १ हजार ६२३ बालिका रहेकाेमा ४८.४४ प्रतिशत बालिका र ५१.५५ प्रतिशत बालक रहेका अध्यक्ष सुवेदीले जानकारी दिए । वडामा सामुदायिक र संस्थागत गरी बाल विकास केन्द्र सहितका १० वटा विद्यालयहरु संचालनमा रहेकाे बताइएकाे छ ।
यसैगरी १८ वटा बालसमूह र एउटा वडा बाल सञ्जालमा ४५० जना बालबालिकाहरु आवद्ध छन् भने विभिन्न संरचनागत समितिहरुमा समेत गरी जम्मा ४९१ जना बालबालिकाहरुको प्रत्यक्ष सहभागिता रहेको उनले बताए । आजका बालबालिका भोलिका कर्णधार हुन् भन्ने भनाईलाई मनन् गर्दै २१ औं शताब्दीका बालबालिकालाई उक्त भनाईमाथि नै परिमार्जित गर्दै बालबालिकालाई आजैका साझेदार बनाउन सोही अनुसारका कामहरुमा सक्रिय बनाउने प्रयास रहेने उनले बताए ।
‘भोलिका कर्णाधार हुन भन्दै गर्दा हामीले उनीहरुलाई सही बाटो देखाएनौ, उचित वातावरण र असल संस्कारयुक्त शिक्षा दिन सकेनौ भने जीवन उपयोगी शिक्षा सहितको सिप सिकाईमा उनीहरुलाई सहभागी गराएनौ भने उनीहरु कसरी भोलिका कर्णाधार बन्न सक्लान? त्यसैले आजका बालबालिकालाई हामी अभिभावक, शिक्षक र जनप्रतिनिधिले उनीहरुलाई नैतिक तथा असल संस्कारयुक्त शिक्षा आर्जन गर्न सक्ने वातावरण बनाई उनीहरुलाई सामाजिक कार्यमा पनि सहभागिता गराउन जरुरी देखिन्छ’ उनले भने । ‘बालबालिकाको सवल भविष्य निर्माणमा घरपरिवारको साथै वडाको ठूलो जिम्मेवारी र दायित्व हुन्छ’ अध्यक्ष सुवेदीले भने ‘भविष्यमा वडा सञ्चालनको महत्वपूर्ण हिस्सा ओगटेको आजको बालबालिकाको क्षेत्रमा वडाले आवश्यक लगानी गर्नै पर्छ ।’
बालबालिकाको बाच्न पाउने अधिकार, संरक्षणको अधिकार, विकासको अधिकार र सहभागिताको अधिकारको विषयमा सबै सरोकारवाला निकाय जिम्मेवार बन्दै गर्दा बालबालिकाले अधिकारको माग सँगै उनीहरुलाई कर्तव्यबोध पनि गराउनु समेत अभिभाकीय दायित्व भएकाे उनले बताए ।अध्यक्ष सुवेदीले १६ मंसिर २०७१ काे निर्णयबाट हेटौडा नगरपालिकालाई उपमहानगरपालिका बनाइएकाे तथा बागमती प्रदेशको राजधानी समेत रहेको उपमहानगरपालिकाको वडा १९ साविकको बसामाडी गाविसको वडा नम्बर १,२,४,६ र ७ मिलेर बनेको जानकारी दिए । ४७,०४ वर्ग किलोमिटर क्षेत्रफलमा फैलिएको वडा क्षेत्रफलको आधारमा सबै भन्दा ठूलो वडाको पूर्व सिमानामा हेटौडाकाे वडा नम्बर १ र ३, पश्चिममा मनहरी गाउँपालिका र राक्सिराङ गाउँपालिका, उत्तरमा कैलाश गाउँपालिका र भिमफेदी गाउँपालिका र दक्षिणमा मनहरी गाउँपालिका रहेकाे उनले बताए ।
कार्यक्रममा सहायक महिला विकास निरिक्षक मिना देवकाेटाले वडाकाे प्रगति विवरण प्रस्तुत गर्दै २०७९ साल भाद्र महिनादेखि बालबालिका सम्बन्धि कार्य गर्दै ५१ वटा सुचक पूरा गरिसकेकाेले बालमैत्री वडा घोषणा गर्न लागिएकाे जानकारी दिए । ‘बालमैत्री वडा घोषणा कार्यक्रम समारोह तथा सम्पूर्ण अभियानमा ऐक्यबद्धता जनाई दिनुहुन सम्पूर्ण वडाबासी, सरोकारवाला निकायलगायतमा वडा कार्यालय हार्दिक अपिल गर्दछौं’ वडाले प्रकाशन गरेकाे विज्ञप्तिमा उल्लेख छ । १९ वडामा बालमैत्री स्थानीय शासन वडा समिति, वडा बालअधिकार समिति, बालसमूहरु, बालसमूह संजाल, टोल विकास संस्थाहरु, युवा क्लब, आमा समूह, वन समिति लगायतका विभिन्न सामुदायिक संस्थाहरु क्रियाशील छन् ।
मंगलबार नै वडा कार्यालयले सार्वजनिक सुनुवाई कार्यक्रम समेत गरेकाे छ । सार्वजनिक सुनुवाई तथा पत्रकार भेटघाट कार्यक्रम वडा अध्यक्ष नरनाथ सुवेदीकाे सभाध्यक्षतामा भएकाे थियाे । कार्यक्रममा वडा सचिव दिपेन्द्र ढकाल, बालमैत्री नगर सहजकर्ता सपना ढुङ्गाना, वडा सदस्य तथा स्थानीय शासनयुक्त वडा घाेषणा कार्यक्रम सम्पर्क व्यक्ति रमा गाेले महिला तथा बालबालिका शाखाका अधिकृत मन्दिरा थापालगायतकाे उपस्थिति रहेकाे थियाे ।
मकवानपुर । नारी सिर्जना केन्द्र नेपालको १२ अधिवेशन तथा २८ औ बार्षिक साधारणसभाले नयाँ नेतृत्व चयन गरेको छ ।
निवर्तामान अध्यक्ष सरस्वती बर्तौलाको अध्यक्षतामा भएको साधारण सभा तथा अधिवशनले नानी माया चापागाईलाई अध्यक्षको जिम्मेवारी दिएको हो । यसैगरी केन्द्रको उपाध्यक्षमा दुर्गा देवि दास, सचिव रेनु गुरुङ, कोषाध्यक्ष ईश्वरी पोखरेल (चालिसे) तथा सदस्यहरूमा सुन्तली माया प्रजा, सर्मिला विश्वकर्मा र दानमाया श्रेष्ठ चयन भएका छन् ।
केन्द्रको संस्थापक अध्यक्ष तथा राष्ट्रिय समावेशी आयोग कार्यवाहक अध्यक्ष विष्णु ओझाको उपस्थितिमा भएको साधारण सभामा केन्द्रका फिल्ड कोर्डिनेटर गिता अर्यालले संस्थागत र कार्यक्रम प्रतिवेदन पेश गरेकी थिइन् । यसैगरी कोषाध्यक्ष रेणु गुरुङले आर्थिक प्रतिवेदन पेश गरेकी थिइन् । संस्थाले आर्थिक बर्ष २०८०।०८१ मा दातृ निकायबाट २ करोड ३१ लाख ७३ हजार ३४९ रुपैया अनुदान प्राप्त गरेको थियो । जसमा बाख्रा पालन, मौरी पालन, बेमौसमी तरकारी खेती तथा सिपमुलक तालिम प्रदान गरिएको प्रतिवेदनमा उल्लेख छ ।
संस्थाले जलवायु परिवर्तनको प्रभाव घटाउन विभिन्न सचेतनामुलक कार्यक्रम गर्दै सहकारीसंग समन्वय गरि बजारीकरणको लागि समेत सहजीकरण गर्दै आएको फिल्ड कोर्डिनेटर अर्यालले बताइन् । कार्यक्रममा केन्द्रको पुर्व कोषाध्यक्ष मुनु सिग्देल, मानव अधिकार संरक्षण तथा मानव बेचविखन विरुद्धको जिल्ला सन्जाल अध्यक्ष आरति पाठक हेटौंडा उपमहानगरपालिकाका भिमप्रसाद तिमल्सिना, सन्जाल सहसंयोजक तथा माइती नेपाल मकवानपुर प्रमुख माया लामा समेतको उपस्थिती रहेको थियो ।