मकवानपुर । भेटेरिनरी अस्पताल तथा पशु सेवा विज्ञ केन्द्र, मकवानपुर दशौं राष्ट्रिय पोल्ट्री दिवस साप्ताहव्यापि रुपमा मनाएको छ ।
सप्ताहव्यापि कार्यक्रम अन्तरगत विज्ञ केन्द्रले पहिलो दिन पत्रकार सम्मेलन गरेको थियो । त्यसपछि लगातार नियमित कार्यक्रम गरिएको केन्द्रले जनाएका छ ।
दिवसको अवसरमा प्रजा आधारभुत विद्यालय मनहरीमा अण्डा र मासु सेवनको महत्वको विषयमा स्कुल शिक्षासँगै २१ क्रेड अण्डा खुवाएको थियो ।
यसैगरी बकैया गाउँपालिकाको आपचौरमा रहेका गर्भवती महिला, कुपोषण र पुड्कोपना भएका बालबालिकाहरुलाई ७० क्रेट अण्डा वितरण गरिएको कार्यालयका पशुप्राविधि प्रदीप सापकोटाले बताए ।
पोल्ट्री कृषकहरुलाई पोल्ट्री व्यवसाय सम्बन्धी सचेतना कार्यक्रम अन्तर्गत हेटौडा ६ , ७ १६ र १८ मा रहेका १४ वटा लेयर्स फर्महरुमा स्वास्थ्य परिक्षण तथा बर्ड फ्लु रोग तथा जैविक सूरक्षा सम्बन्धी सचेतना कार्यक्रम गरिएको थियो ।

यसैगरी पोल्ट्री दिवसको अवसरमा हेटोंडाको बुद्ध चोक स्थित श्रमिक बजारमा श्रमिकहरुलाई अण्डाको वितरण गरिएको थियो । साप्ताहव्यापि कार्यक्रम मार्फत कृषि अर्थतन्त्रमा उल्लेख्य योगदान पुर्याउने पोल्ट्री क्षेत्रको बारेमा सबै सरोकारवालाहरुको ध्यानाकर्षण हुने अपेक्षा गरिएको कार्यालय प्रमुख ब्रजकिशोर ठाकुरले बताए ।
“पोल्ट्रीजन्य उत्पादनको उपभोगको आवश्यकताका बारेमा प्रचारप्रसार हुने,पोल्ट्रीजन्य उत्पादनको उपभोग प्रवर्द्धन हुने अपेक्षाका साथ कार्यक्रम गरिएको हो” प्रमुख ठाकुरले भने ।
आर्थिक वर्ष २०७८ /७९ को अनुसार बागमती प्रदेशको कुल मासु उत्पादनः १ लाख ६३ हजार ९३९ मेट्रिक टन योगदान गरेको छ । जसमा कुखुरा तथा हाँसको मासु १ लाख १३ हजार ४३२ मेट्रिक टन उत्पादन भएको कार्यालयले जनाएको छ । यसैगरी उक्त आवमा बागमती प्रदेशमा कुल ८९९३५३ हजार गोटा अण्डा उत्पादन भएको थियो ।
बागमती प्रदेशको कुल मासु उत्पादनमा पोल्ट्रीको योगदान ६९ प्रतिशत रराष्ट्रिय अण्डा उत्पादनमा बागमती प्रदेशको योगदान करिब ६० प्रतिशत रहेको छ ।
२०१७ साल पौष १७ गते बाराको परवानीपुरमा सरकारी स्तरबाट स्थापना भएको सेन्ट्रल ह्याचरी उद्घाटन भएको दिनको स्मरणमा यो दिवस मनाउँदै आइएको छ । मकवानपुर कुखुरा व्यवसायि संघसंगको सहकार्यमा कार्यक्रम गरिएको हो ।
मकवानपुर / बागमती प्रदेशसभाको ११ औँ अधिवेशन भोलि पुस १८ गते दिनको १ बजे बस्ने भएको छ ।
प्रदेशसभा सचिवालयमा भोलि बिहान ८ बजे सर्वदलीय बैठक बसेर दिउँसोको प्रदेशसभा बैठकमा प्रस्तुत हुने कार्यसूची तयार गरीने प्रदेशसभा सचिवालयका प्रमुख सचिव कृष्णहरि खड्काले बताए । प्रदेशसभा सदस्यको लागि दोस्रो कार्यकालको ११ औँ बैठक सुरु हुन लागेको हो ।
बागमतीको प्रदेशसभामा नेपाली कांग्रेस, नेकपा एमाले, नेकपा माओवादी केन्द्र, नेकपा एकीकृत समाजवादी पार्टी, राप्रपा, नेमकिपा, हाम्रो नेपाली पार्टी समेत गरी ७ दलका ११० जना प्रदेशसभा सदस्य रहेका छन् ।
मकवानपुर । नेपाल राष्ट्र बैंकबाट जारी चालु पुँजीकर्जा मार्ग दर्शन २०७९ विरुद्ध ज्ञापन पत्र बुझाइएको छ ।
२०७२ सालको भूकम्पपछि धरासायी बनेको उद्योग व्यवसाय क्षेत्र कोरोना महामारी र रुस यूक्रेन युद्धबाट सिर्जित समस्याले झनै धरासायी भएको अवस्थामा मुल्य वृद्धिले अझै असर बढाएको भन्दै मकवानपुरका व्यवसायीहरुले मुल्य वृद्धिको विरोध गरेका छन् ।
उद्योग संघ मकवानपुर, नारायणी व्यवसायी संघ, निर्माण व्यवसायी संघ, होटल एशोसिएश्चत मकवादपुर,वस्तुगत समन्वय समिति लगायतले सयुक्त रुपमा मुल्य वृद्धिको विरोध गरेका हुन् ।
व्यवसायीहरुको घट्दो मनोबल बढाउने तर्फ सरकारले ध्यान दिनुपर्ने माग गरीएको छ । उद्योगी व्यवसायीका मागमा आएको उच्च संकुचन, उच्च बैंक व्याजदर, लगानी योग्य पूँजीका अभाव भएको प्रति उद्योगिहरुले ध्यानकर्षण गराएको उद्योग वाणिज्य संघ मकवानपुरका अध्यक्ष कृष्ण गुप्ता अग्रवालले बताए ।
उनीहरुले मकवानपुरका प्रमुख जिल्ला अधिकारी मार्फत संघीय सरकारका अर्थमन्त्री र नेपाल राष्ट्र बैंकका गभर्नरलाई संयुक्त रुपमा ध्यानाकर्षण पत्र बुझाएका हुन् । असहज परिस्थानमा उद्योगी चुनौतीपूर्ण अवस्थामा रहेको अर्थतन्त्रलाई पुनर्जिवित गर्ने नीति तत्काल व्यवसायीको घटेको मनोबल उकास्न माग उद्योग संघका अध्यक्ष स्वागतराज प्याकुरेलले बताए ।
बैंकको व्याजदर नियन्त्रण गरी एकल अकंको हुनुपर्ने, अर्थतन्त्र सामान्य अवस्थामा नपुगुन्जेल चालू पुँजी कर्जा सम्बन्धी मार्गदर्शन, २०७९ कार्यान्वयनमा ल्याउन नहुने, पूजीगत खर्च बढाई बजारमा तरलता प्रवाह गर्नुपर्ने माग गरिएको छ ।
उद्योग व्यवसाय क्षेत्र रुग्ण हुन गएमा त्यसको बहुआयामिक दुष्प्रभाव राष्ट्रको समग्र आर्थिक सामाजिक विकासमा पर्न जाने भन्दै सरकारले यस्ता मागहरुको सुनुवाई गरि विद्यमान आर्थिक संकटको समाधानकालागि पहल गर्न माग गरिएको छ । आफूहरुको माग सम्बोधन नभए उद्योगी व्यवसायीहरुले विरोध कार्यक्रमलाई निरन्तरता दिने बताएका छन् ।
मकवानपुर । बागमती प्रदेशमा नेकपा (माओवादी केन्द्र) संसदीय दलको नेतामा शालिकराम जमकट्टेल चयन भएका छन् ।
माओवादी केन्द्रले सर्वसम्मत नेता चयन गर्न शुक्रबारबाट पहल थालेको थियो । शुक्रबार सहमति नभएपछि संसदीय दलको आज शनिबार बसेको बैठकले जमकट्टेललाई सर्वसम्मत नेता चयन गरेको हो। बैठकले सर्वसम्मत रुपमा जमकट्टेललाई नेता चयन गरेको भने पनि पार्टीको प्रदेश अध्यक्ष सरल सहयात्री पौडेलले असन्तुष्टी जनाएका छन् ।
संसदीय दलको नेतामा माओवादीबाट पूर्व सामाजिक विकास मन्त्री युवराज दुलाल र पार्टी प्रदेश अध्यक्ष सरल सहयात्री पौडेलको पनि दाबी रहेको थियो। संसदीय दलको बैठकले पूर्व आन्तरिक मामिला तथा कानून मन्त्री र हाल आर्थिक मामिला मन्त्री समेत रहेका जमकट्टेललाई संसदीय दलको नेता चयन गरेको हो।
संसदीय दलको नेतामा जमरकटेलको नाम प्रस्तुत भएपछि सरल सहयात्री बैठक कक्ष छोडेर बाहिरिएका थिए ।
संसदीय दलको नेता बनाउन चुनाव नगर्ने, सर्वसहमतिबाट टुङ्गो लगाउन पार्टी अध्यक्ष पुष्पकमल दाहाल प्रचण्डले निर्देशन दिएका थिए । प्रचण्डको निर्देशन पछि सहमति जुटाउनका लागि माओवादी नेताहरू हितमान शाक्य, नारायण दाहाल लगायत खटिएका थिए ।
सहमति भनिएको नाममा पौडेलले अहमति जनाएका छन्। संसदीय दलको नेताका लागि चुनाव हुनुपर्ने उनको माग थियो। उनले सामाजिक सन्जाल मार्फत असन्तुष्टि प्रकट गरेका हुन् । बागमतीमा तेस्रो पार्टी बनेको माओवादी केन्द्रका २१ सांसद छन् ।

बागमती प्रदेशको सत्ता समीकरणमा राप्रपा निर्णायक शक्तिको रूपमा देखिएको छ। प्रदेशमा सरकार गठनका लागि आफू निर्णायक बनेपछि प्रदेश संरचना खारेजीको माग गर्दै आएको राप्रपाले मुख्यमन्त्रीमा दाबी गरेको छ।
प्रदेश संरचना खारेजीको विषयलाई चुनावी मुद्दा समेत बनाएको राप्रपाले बागमती प्रदेशको सत्ताको चावी आफ्नो पोल्टामा आएसँगै मुख्यमन्त्रीमा दाबी गरेको हो। केन्द्रमा एमालेको नेतृत्वमा नयाँ गठबन्धन बनेसँगै बागमती प्रदेशमा सत्ताको चावी राप्रपाको पोल्टामा पुगेको छ।
प्रदेशमा सरकार गठन गर्न आफू निर्णायक भएकाले पनि सरकारको नेतृत्वमा आफूहरूको दाबी स्वाभाविक रहेको राप्रपा बागमती प्रदेशका संसदीय दलका नेता उद्धव थापा बताउँछन्। १३ जना प्रदेशसभा सदस्य रहेको राप्रपाको हैसियत देखाउनका लागि सरकारको नेतृत्व गर्न आवश्यक रहेको थापाको भनाइ छ।
उनले प्रदेश सरकारको नेतृत्व गर्दै यसबाट जनतालाई सुशासन दिने र पाँच वर्षमा संघीयता खारेज गर्ने दावी गरे।
प्रस्तुत छ, यसै सेरोफेरोमा केन्द्रित रहेर राप्रपा बागमती प्रदेशका संसदीय दलका नेता उद्धव थापासँग श्रीजना नेपालले गरेको कुराकानी :
बागमती प्रदेश सरकारको नेतृत्वमा तपाईंहरूले दाबी गर्नुभएको हो ?
परिस्थितिजन्य कुरालाई कसैले रोक्न सक्दो रहेनछ। अहिले केन्द्रदेखि प्रदेशसम्म हेर्दा त्यसै खालको परिस्थिति सिर्जना भएको छ। राप्रपा पनि सक्षम छ, यसले देश र जनताको पक्षमा काम गर्न सक्छ। राप्रपाले पनि अलग पहिचान सहित जनताको सरोकारसँग सम्बन्ध राख्दै जनताको मर्म बुझ्न सक्छ र सेवा दिन सक्छ भन्ने उदाहरण दिन बागमती प्रदेश सरकारको नेतृत्वमा हाम्रो दावी रहेको हो।
हिजोको दिनमा त्यही संसद्मा प्रदेश संरचना खारेजीको माग गर्नुभयो। त्यही नाराले चुनाव जित्नुभयो। अहिले प्रदेश सरकारको नेतृत्वमा दाबी गर्न सुहाउँछ ?
राप्रपाको अलग दृष्टिकोणबारे अब नेपाली जनतालाई बुझाइराख्न आवश्यक भए जस्तो लाग्दैन। राजसंस्था, हिन्दु राष्ट्र र संघीयता खारेजीका ३ वटा मुद्दामा हामी अरू पार्टीभन्दा फरक छौँ। तैपनि यिनीहरूले यो कुरा उठाएको मात्रै हो। यिनीहरू यहाँ आउनै सक्दैनन्, राप्रपाको हैसियतै छैन‚ त्यसैले विरोध मात्रै गरेको हो भन्ने खालका कुराको जवाफ दिन हामीले प्रदेश सरकारमा दाबी गरेका हौँ। हामी यस्तो गर्न सक्छौँ भनेर आफ्नो हैसियत देखाउन प्रदेश सरकारमा जान चाहन्छौँ।
हामी सुशासन भनेको के हो ? भ्रष्टाचारमुक्त बनेर सत्ता सञ्चालन कसरी गर्ने भनेर देखाउने र त्यहीँभित्रै बसेर संघीयता खारेज गर्ने काम गर्छौं। यही कुरा उठाउँदै हामी संसद्सम्म आइपुगेका छौँ, अब सरकारसम्म पुग्छौँ। प्रदेश सरकारमा रहेर हामी पाँच वर्षभित्र प्रदेश संरचना खारेज गरेर देखाउँछौँ। अहिले आमनागरिकले प्रदेश संरचना काम छैन भन्ने अवस्था राप्रपाले नै सिर्जना गरेको हो।
प्रदेशले पहिलो कार्यकालमा राम्रो काम गर्न नसकेको भएर यसको औचित्यमाथि प्रश्न उठेको हो। तपाईंहरू प्रदेश सरकारमा गएरै पाँच वर्षमै संरचना नै खारेज गर्छु भन्नुहुन्छ। भनेपछि प्रदेशमा गएर अझ नराम्रो काम गर्छौं, प्रदेशलाई अझ कमजोर पार्छौं भन्न खोज्नु भएको हो ?
त्यस्तो होइन। हामी जतिन्जेल काम गर्छौं, राम्रो गर्छौं। प्रदेश सरकारबाट हामी राप्रपाको उपस्थितिलाई राम्रो देखाउँछौँ। हामीले सञ्चालन गरेको सरकार कस्तो हुन्छ भनेर देखाउँछौँ। भ्रष्टाचारीलाई कारबाही गर्ने काम पनि हामी गर्छौं। नीति नियमअनुसार काम गर्दै प्रदेश आवश्यक छैन भनेर खारेजीको मार्गमा पनि जान्छौँ। त्यसैले प्रदेश सरकारबाट राप्रपा कस्तो हो भनेर देखाउँदै यसलाई खारेज गर्छौं।
प्रदेशमा सुशासन कायम गर्छौं, राम्रो काम गर्छौं भन्नुहुन्छ। प्रदेशले राम्रो काम गर्न सक्ने भए खारेज चाहिँ किन?
प्रदेशबाट हामीले हाम्रो काम गर्ने तरिका देखाउने चाहिँ हो तर प्रदेशलाई खारेज गर्ने नै हो। प्रदेश संरचना यही पाँच वर्षभित्रै खारेज हुन्छ। राप्रपाले मुलुकमा संघीयता खारेज गरेरै छोड्छ।
यो त रूखको टुप्पोमा बसेर हामी फेद काट्छौँ भन्या जस्तो भएन ?
राजनीति र यो रूखको टुप्पोको कुरा मिल्दैन। सरल अंकगणितमा २ र २ जोड्दा ४ हुन्छ तर राजनीतिमा कहिलेकाहीँ २ र २ जोड्दा ५ पनि हुन्छ कहिलेकाहीँ २ र २ जोड्दा ३ पनि हुन्छ। त्यसैले यो राजनीतिक कुरा हो। त्यही अनुसार बुझेर हामीले प्रदेश खारेजीको कुरा गरेको हो।
प्रदेश सरकारमा दाबी गर्ने नै हो भने कि प्रदेश संरचना स्विकार्नुस् कि सत्ताको लोभ नगर्नुस्, हुँदैन?
यो विषयमा हामी पार्टी अध्यक्ष राजेन्द्र लिङदेनसँग छलफलमा छौँ। हामी पार्टीको निर्देशन मान्छौँ। अहिले तपाईंहरू त्यहाँ जाने कुरा छैन, अहिले सरकार बनाउन नसके नसकोस् तपाईंहरू बाहिरै बस्नुस् भन्ने आदेश आयो भने हामी सत्ता बाहिर बस्छौँ। होइन त्यहाँको स्रोत र साधन चाहिँ अर्कोले चलाउने, त्यसको शक्तिको प्रयोग चाहिँ अर्कोले गर्ने हामी चाहिँ खाली मुकदर्शक बन्ने मात्रै नगरौँ।
संसद्मा आफ्नै राम्रो उपस्थिति हुँदा अगाडि बढेर जनतालाई राप्रपाले के गर्न सक्छ भनेर देखाउने अवसरलाई उपयोग गर्दै प्रदेशलाई खारेज गर्नेतर्फ जानु भन्ने खालको कुरा पार्टीमा बनेको छ। अब अरू पार्टीको साथीहरूले हामीलाई त्यही खालको महसुस गर्छन् भने हामी उहाँहरूसँग वार्तामा बस्छौँ। उहाँहरूले हाम्रो उपस्थितिलाई महसुस गर्नुहुँदैन भने हामी सरकारमा जाँदैनौँ।
मुख्यमन्त्री नपाए प्रदेशमा सरकार गठन गर्न समर्थन गर्दैनौँ भन्न खोज्नु भएको हो ?
हामी सत्तामा नजान पनि सक्छौँ। त्यो कारण मात्रै होइन अरू कारणले पनि हामी सत्तामा नजान पनि सक्छौँ। हाम्रो उपस्थिति दलहरूले महसुस गरे भने हाम्रो समर्थन रहन्छ नत्र हामी बाहिरै बस्छौँ।
प्रदेश संरचना खारेजीको माग गर्ने तपाईंहरूले प्रदेश सरकारमा गएर कुशल काम गर्नुहुन्छ भनेर कसरी विश्वास गर्ने ?
यो कुरा हामीले चुनाव जाँदाखेरी भनेका थियौँ। भ्रष्टाचार गर्नु भनेको आमाको रगत खानुसरह हो। अहिले यो मुलुकको सबैभन्दा ठूलो समस्या भनेकै भ्रष्टाचार हो। यसलाई नियन्त्रण गर्नु नै सबैभन्दा ठूलो उपलब्धि हो। हामी बेइमानी गर्दैनौँ। सबभन्दा ठूलो कुरा भनेकै हामी भ्रष्टाचार गर्दैनौँ। हामी बेथिति र अनियमिततालाई खोतलेर राम्रोसँग काम गर्छौं। thahakhabar.com बाट