मकवानपुर । बागमती प्रदेश सरकारको लगानीमा हेटौंडामा पाउडर (धुलो) दुध उत्पादन उद्योग स्थापनाकाे कार्य सुरु भएकाे ३ वर्ष भए पनि निर्माण कार्य पुरा भएकाे छैन ।
प्रदेश सरकारले ३ वर्ष अघि हेटौंडा उपमहानगरपालिका वडा नम्बर १० न्यूरेनीस्थित सिसौघारीमा धुलो दुध तथा बटर उद्योग स्थापनाकाे कार्य थालनी गरेकाे थियाे । १ वर्षमा निर्माण कार्य सक्नेगरी प्रदेश सरकारको कृषि तथा पशुपन्छी विकास मन्त्रालय अन्तर्गतको प्रदेश दुग्ध विकास बोर्डको लगानीमा उद्योग निर्माण गरिएको थियो ।
किसानले उत्पादन गरेको दुध विक्री नहुने समस्या वर्षेनी आइरहेकाे वेला प्रदेशको कृषि तथा पशुपन्छी मन्त्रालयले पाउडर प्लान्ट निर्माण कार्य अघि बढाएको थियो । एक वर्षमा निर्माण कार्य सक्नेगरी प्रदेश सरकारको कृषि तथा पशुपन्छी विकास मन्त्रालय अन्तर्गतको प्रदेश दुग्ध विकास बोर्डको लगानीमा उद्योग निर्माणकाे काम सुरु गरिएकाे हाे ।
बागमती प्रदेशसहित काेशी मधेस र गण्डकी गरी ४ प्रदेशका किसानले उत्पादन गरेको दुध खपत गरी पाउडर बनाइने मन्त्रालयले जनाएको छ । उक्त ४ प्रदेशका कृषकले उत्पादन गरेको दुधलाई खपत गरी पाउडर बनाउने याेजना मन्त्रालयसँग छ । तर पाउडर प्लान्ट निर्माणका लागि २०७७ पुस १ गते इजी इन्फा प्रालि काठमाडौंले सम्झौता गरी शिलान्यास गरिएको उक्त उद्योगको निर्माणको काम हालसम्म सकिएकाे छैन । सम्झौता तथा पटक पटककाे म्याद थप अनुसार पाउडर प्लान्ट निर्माणको काम सकेर २०८० साल कार्तिक ३० गतेसम्म दुग्ध विकास बोर्डलाई हस्तान्तरण गर्नु पर्ने हाे । तर, हालसम्म पनि निर्माण कम्पनीले कार्य सपन्न गरेकाे छैन् ।
पाउडर प्लान्ट निर्माण सम्पन्न भएकाे भन्दै १ दिन परीक्षण उत्पादन समेत भएकाे थियाे । संझौता अनुसार दूधबाट पाउडर उत्पादन नभएपछी पुनः मर्मतको काम भइरहेको मन्त्रालयले जनाएकाे छ । बागमती प्रदेश सरकारको कृषि तथा पशुपन्छी मन्त्रालय अन्तरगतको प्रदेश दुग्ध विकास बोर्डको लगानीमा हेटौंडामा पाउडर (धुलो) दुध उत्पादन उद्योग निर्माणका लागि तीन पटक म्याद थप गरिएको भए पनि निर्माण सम्पन्न भएकाे छैन । अब म्याद थप गर्ने कानूनी आधार नभएकाे बताइएकाे छ । तीन पटक म्याद थप गर्दा पनि काम सकेर हस्तान्तरण नगरेकाले निर्माण कम्पनीलाई दश प्रतिशत जरिवाना तिराउनुपर्ने कानूनी व्यवस्था रहेको छ ।
संघीय सरकार मातहतको दुग्ध विकास आयोजनाको पशु आहार उत्पादन उद्योगको २ बिघा क्षेत्रफलमा जग्गामा पाउडर प्लान्ट स्थापना गरिएको हो । भौतिक संरचना निर्माण लगायतको काम करिब सकिए पनि उद्योग परिसरलाई व्यवस्थित गर्ने र चिस्यान केन्द्र (कोल्ड रुम) सञ्चालनको काम बाँकी छ ।
उद्योगको निर्माणको काम अन्तिम चरणमा पुगे बताइरहँदा प्लान्ट निर्माणको चरणमा भारतिय इन्जिनियर सहितका कामदारहरुले प्लान्टमा काम गरिरहेका छन् । प्लान्टबाट पाउडर दूध उत्पादन हुनका लागि अझै केही समय लाग्ने प्राबिधिक बताउँछन् ।
निर्माण कम्पनीलाई अन्तिम रकम भुक्तानी दिनका लागि दुग्ध विकास बोर्डसँग पर्याप्त रकम नभएकाे पाइएकाे छ । करिब ६ करोड रुपैया रकमान्तर गरेर आर्थिक मामिला तथा योजना मन्त्रालयको स्वीकृतिमा रकम भुक्तानी दिने तयारी भइरहेको बोर्डका कर्मचारीले बताए । उद्योग निर्माण कम्पनी इजी इन्फ्रा प्रालिका म्यानेजर उत्तम पौडेलले उद्योगको काम सकिएकाेले अब म्याद थप गर्न आवश्यक नै नरहेकाे बताए । पाैडेलले म्याद थप गरेको अवधिमानै काम सकिएको भने पनि उद्योग परिषर बाँकी निर्माणकाे कार्य भइरहेकाे छ ।
किसानले उत्पादन गरेको दुध नबिकेर ‘मिल्क होलीडे’ गर्नुपर्ने बाध्यता हटाउने उद्देश्यले स्थापना गरिएको उद्योगमा धुलो दुध उत्पादन परीक्षण, हस्तान्तरण र अन्य व्यवस्थापकीय काम गर्न भने बाँकी नै रहेको बोर्डका पदाधिकारीहरु बताउँछन् ।आवश्यक भौतिक निर्माण र उपकरण जडान सकिएसँगै कारखानामा पानीको प्रयोगबाट परीक्षण थालिएको केही दिनमै धुलो दुध उत्पादन परीक्षण गरेर हस्तान्तरण गर्ने पौडेलले बताए ।
मकवानपुर । मकवानपुरकाे राक्सिराङ्ग गाउँपालिकाले अपाङ्गता भएका व्यक्तिलाई निःशुल्क बिमा गराउने भएकाे छ । विश्व अपाङ्गगता दिवसको अवसरमा राक्सिराङ्ग गाउँपालिकामा गरिएको संवाद कार्यक्रममा अध्यक्ष राजकुमार मल्लले अपाङ्गता भएको व्यक्तिहरुलाई पहिलो प्राथमिकतामा राखेर निशुल्क स्वास्थ्य बीमा गराइने बताए ।
उनीहरुलाई आयआर्जनको लागि विभिन्न प्रकारको तालिम गराई आत्मानिर्भर बनाउने समेत उनले बताए । आपाङ्गता भएका व्यक्तिलाई संरक्षण तथा सुरक्षा दिनु पालिकाको दायित्व रहेकोले अपाङग कस्तो प्रकारको छ, उसको आवश्यकता अनुसार पालिकाले आयआर्जन गरि जीवन निर्वाहको लागि पालिकाले सहयोग गर्ने उनले बताए । सहभागीहरुले सीपमुलक तालिमको आवश्यकता, स्वास्थ्य तथा दैनिक जीवन निर्वाहको पाटोमा सहयोग र पालिकाको नीति निर्माण गर्ने बेला सक्रिय सहभागी गराउनु पर्ने लगायतका विषयमा जोड दिएका थिए ।
पालिका स्तरीय अपाङ्गता समन्वय समिति गठन
विश्व अपाङ्गता दिवसको अवसरमा राक्सिराङ्ग गाउँपालिका स्तरीय अपाङ्गता समन्वय समिति गठन गरिएको छ। गाउँ कार्यपालिका सदस्य चन्द्रमान प्रजाको संयोजत्वमा ११ सदस्यीय अपाङ्गता समन्वय समिति गठन गरिएको हाे । समिति सदस्यहरुमा मंगलबहादुर घलान, संचलाल वाइबा, होम बहादुर पाख्रिन, जितन प्रजा, सुरेश घलान, शंखलाल चेपाङ्ग, शरद स्याङ्गतान, फुलमाया स्याङ्गतान, श्रीकृष्ण प्रजा र सदस्य सचिवमा गाउँपालिकाको महिला तथा बालबालिका शाखाको प्रमुख गोमा पन्थी लगायत रहेका छन् ।अब वडा स्तरको अपाङ्गता समिति गठन र संयोजक तोकिने संयोजक चन्द्रमान प्रजाले जानकारी दिए ।
गाउँपालिका अध्यक्ष राजकुमार मल्लको अध्यक्षतामा भएको सम्वाद कार्यक्रममा प्रमुख प्रसशाकीय अधिकृत देवचन्द्र गर्तौला, ठाडेचुरे आधारभूत अस्पतालका मेडिकल अधिकृत डा. गजल पन्त, सामाजिक विकास शाखा प्रमुख गोविन्द अधिकारी, ५ नम्बर वडा अध्यक्ष हरि बहादुर प्रजा, ९ नम्बर वडा अध्यक्ष रामकुमार बाल्पा थिङ्ग, ३ नम्बर वडा अध्यक्ष उत्तम वाइवा लगायतको आतिथ्यता रहेको थियो। राक्सिराङ्ग गाउँपालिकाको आयोजनामा भएको संवाद कार्यक्रमलाई राष्ट्रिय जनवकालत मन्च (नाफान)ले सहजीकरण गरिएको थियो।
मकवानपुर । हेटौंडा उपमहानगरपालिका वडा ५ का अध्यक्ष सुशील घिमिरेले सानोतिनो खर्चकोलागि धितो खोज्नुपर्ने बाध्यताबाट माथि उठ्न टोल विकास संस्था महत्त्वपूर्ण भएको बताएका छन् ।
टोल विकास संस्थाले टोलको हर क्रियाकलापमा सहभागी हुँदै विकास र रचनात्मक कार्यमा अग्रभागमा खटिने गरेकोमा उनले खुसी व्यक्त गरे । हेटौंडा ५ सिंचाइ टोल स्थिति मनकामना पार्क टोल विकास संस्थाको २२ औं बार्षिक साधारण सभामा बोल्दै उनले यस्तो बताएका हुन् ।
सिचाई हुँदै मकवानपुरगढी स्थित मनकामना मन्दिर जाने बाटोका मन्दिरहरूलाई आकर्षक बनाएर विकासलाई अघि बढाउने, खुला ब्यायमशाला तथा खानेपानीको व्यवस्थापन गर्नमा ध्यान केन्द्रिय रहने उनले बताए ।
संस्थाको अध्यक्ष जानुका संजेलको अध्यक्षतामा भएको बार्षिक साधारण सभा प्रभा-अनुज शैक्षिक अक्षय कोषका संरक्षक कृष्णप्रसाद धितालले शैक्षिक प्रगतिमा पनि टोल विकास संस्थासंग सहकार्य गर्न पाएकोमा खुसी व्यक्त गरे । कार्यक्रममा मकवानपुर बहुमुखी क्याम्पस प्रमुख डाक्टर शंकरप्रसाद उपाध्यायले टोल विकास संस्थाले टोलमा आयमुलक कामको सृजना नगरेको प्रति आपत्ति प्रकट गरे । उनले टोलको सरसफाइमा चासो दिनुपर्ने बताए ।
यसैगरी टोल विकास संस्था नगर समन्वय समितिका महासचिव शिबहरी दाहालले टोलमा रहेका ज्येष्ठ नागरिक, बालबालिका, युवाको लागि बिशेष कार्यक्रम गर्नुपर्ने बताए । हेटौंडा उपमहानगरपालिका वडा ५ को वडा टोल विकास समन्वय समिति संयोजक टीकाबहादुर खड्काले विकाससंगै रचनात्मक कार्य गरेर अघि बढ्नुपर्ने बताए । वडाको विकास निर्माणका काममा समन्वय र सहकार्य गरेर उत्कृष्ट टोल बन्नुपर्ने खड्काले बताए ।
वडा सदस्य रामबहादुर राई थोरै थोरै भने पनि बचत र खर्च कटौती गर्नुपर्ने, उद्यमशीलतामा जोड्नुपर्ने, टोललाई पर्यटकीय क्षेत्रको रूपमा अघि बढाउन लागिपर्नु पर्ने सुझाव दिए ।

टोल विकास संस्थाले आफ्नो संस्थाको सदस्य परिवारबाट यसबर्ष एसईई नतिजामा उत्कृष्ट भएका साईरा उपाध्याय, निश्चल दाहाल, सिद्धान्त सुवेदी र शिशिर खराललाई पुरस्कार सहित सम्मान गरिएको संस्थाको सचीव भीमा गुरागाईले बताइन् ।
साधारणसभामा संस्थाका अध्यक्ष संजेलले संस्थागत प्रतिवेदन तथा कोषाध्यक्ष विश्वप्रसाद गौतमले कोषाध्यक्षको प्रतिवेदन प्रस्तुत गरेका थिए । संस्थामा हाल ५८ लाख कारोवार रहेको प्रतिवेदनमा उल्लेख छ । संस्थामा २ सय २१ जना बचतकर्ता रहेको अध्यक्ष संजेलले बताइन् ।
कार्यक्रम मनकामना खानेपानी उपभोक्ता समितिका अध्यक्ष कृष्णप्रसाद देवकोटा, शुभकामना बाल क्लबको सचिब स्वरुपा गुरागाईलगायतको उपस्थिति रहेको थियो ।
मकवानपुर । हरेक वर्ष जस्तै याे वर्ष पनि लैंगिक हिंसा विरुद्धकाे १६ दिने अभियान चलिरहेकाे छ । २५ नाेभेम्बर महिला हिंसा अन्त्य दिवसदेखि १० डिसेम्बर अन्तर्राष्ट्रिय मानवअधिकार दिवससम्म १६ दिनसम्म विश्वभर लैंगिक हिंसा विरूद्धको १६ दिने अभियान सञ्चालन हुँदै आएको छ ।
संयुक्त राष्ट्रसंघको महासभाले प्रत्येक वर्ष २५ नोभेम्बरलाई महिला हिंसा निर्मूल सम्बन्धी अन्तर्राष्ट्रिय दिवसको रूपमा विश्वभर मनाउने निर्णय गरे बमोजिम सन् १९९१ देखि बिश्वब्यापी रुपमा नोभेम्बर २५ देखि डिसेम्बर १० सम्म विश्वभर लैंगिक हिंसा विरूद्धको १६ दिने अभियान सञ्चालन हुँदै आएको छ । नेपालमा बि.सं. २०५४ साल देखी यो अभियान सञ्चालन हुँदै आईरहेकोमा नेपाल सरकारको २०७६ साल जेठ ६ गते वर्ष २०७६ लाई लैंगिक हिंसा बिरुद्धको अभियान बर्ष घोषणा गरेको थियाे ।
याे वर्ष “लैंगिक हिंसा अन्त्यको सुनिश्चितता, महिला र बालबालिकामा लगानीको ऐक्यबद्धता ” भन्ने राष्ट्रिय नाराका साथ लैंगिक हिंसा विरुद्धकाे १६ दिने अभियान मनाइँदैछ । अभियानकाे क्रममा सरकारी कार्यालय, सुरक्षा निकाय, सामुदायिक सेवा केन्द्र, महिला सम्बद्ध संघ संस्थाहरुले अभियानमा विभिन्न कार्यक्रम गरी मनाउँदै आएका छन् ।
हरेक वर्ष लैंगिक हिंसा विरुद्धकाे १६ दिने अभियान मनाइने गरेकाे भए पनि तथ्याङ्कले लैंगिक तथा घरेलु हिंसाकाे घटना बढेकाे देखाउँछ । यस्तै लैंगिक तथा घरेलु हिंसाकाे घटना बढेकाे तथ्याङ्क बागमती प्रदेश प्रहरी कार्यालय हेटौंडाले अभियानकाे अवसरमा गरेकाे अन्तरक्रियमा समेत देखाइएकाे थियाे । तथ्याङ्क अनुसार प्रदेशका १० जिल्लामा आर्थिक वर्ष २०७७/०७८ को तुलनामा गत आर्थिक वर्ष २०७९/०८० मा लैङ्गिक तथा घरेलु हिंसाका घटना १४ प्रतिशतले बढेको छ ।
कार्यालयका अनुसार आर्थिक वर्ष २०७७/०७८ मा बागमती प्रदेशका १० जिल्लामा २ हजार २१९ वटा लैङ्गिक तथा घरेलु हिंसाका घटना भएको थियो भने आर्थिक वर्ष २०७८/०७९ मा २ हजार ५२८ र गत आर्थिक वर्ष २०७९/०८० मा २ हजार ५२० वटा घटना भएको छ । १० जिल्लामा चालु आर्थिक वर्षमा ७८६ वटा लैङ्गिक तथा घरेलु हिंसाका घटना भएको बागमती प्रदेश प्रहरी कार्यालय हेटौंडाका प्रहरी नायव महानिरीक्षक किरण राणाले जानकारी दिइन् ।
गत आवमा चितवनमा सबैभन्दा बढी लैङ्गिक तथा घरेलु हिंसाका घटना भएको तथ्याङ्क छ । चितवनमा गत आवमा ७३९ हिंसाका घटना भएकोमा चाुल आवकाे हालसम्म समेत चितवनमा २ सय ४८ दर्ता भएकाे राणाले बताइन् । यसैगरी , गत आवमा मकवानपुरमा ६ सय ३ तथा चालु आवकाे हालसम्म १ सय ५७ जना, सिन्धुलीमा गत आवमा २ सय ६ तथा चाुल आवकाे हालसम्म ५३, धादिङमा गत आवमा १ सय ७१, चालु आवमा ६०, काभ्रेमा गत आवमा २ सय ९८, चालु आवमा १ सय २२, रामेछापमा गत आवमा ८१, चालु आवमा १७, सिन्धुपाल्चोकमा गत आवमा १ सय ७७, चालु आवमा ५१, दोलखामा गत आवमा ९८, चालु आवकाे हालसम्म २६, नुवाकोटमा गत आवमा १४७ चालु आवमा ४९ र रसुवामा गत आवमा शुन्य चालु आवकाे हालसम्म ३ वटा हिंसाकाे घटना दर्ता भएकाे बागमती प्रदेश प्रहरी कार्यालयकाे तथ्याङ्कले देखाउँछ ।
जिल्लागत रुपमा तथ्याङ्क अनुसार उपत्यकाका ३ जिल्ला बाहेक चालु आवकाे हालसम्म चितवनमा ८१ वटा, काभ्रेमा ६२ वटा, मकवानपुरमा ५५, धादिङमा ३७ वटा, सिन्धुलीमा ३४ वटा नुवाकोटमा ३१ वटा, दोलखामा २० वटा, सिन्धुपाल्चोकमा ३० वटा, रामेछापमा १२ वटा र रसुवामा २ वटा लैङ्गिक हिंसाका घटना भएका छन् । यस्तै चालु आर्थिक वर्षमा प्रदेशका १० जिल्लामा मध्ये चितवनमा १ सय ६७ वटा, काभ्रेमा ६० वटा, मकवानपुरमा १ सय २ वटा, धादिङमा २३ वटा, सिन्धुलीमा १९ वटा, नुवाकोटमा १८ वटा, दोलखामा ६ वटा, सिन्धुपाल्चोकमा २१ वटा, रामेछापमा ५ वटा र रसुवामा १ वटा घरेलु हिंसाका घटना भएका छन् ।
गत आर्थिक वर्ष चितवनमा ८ सय र रसुवामा २७ वटा लैङ्गिक हिंसाका घटना भएका थिए । घरेलु हिंसातर्फ भने मकवानपुरमा १ हजार १ सय ४६ वटा र सबैभन्दा कम रसुवामा ५ वटा घटना भएको तथ्याङ्कमा उल्लेख छ । तथ्याङ्क अनुसार गत आर्थिक वर्षमा प्रदेशका १० जिल्लामा ७ हजार ३ सय २१ वटा लैङ्गिक हिंसाका घटना भएको थियो भने ४ हजार ४६ वटा घरेलु हिंसा भएको थियो ।
गत तीन आर्थिक वर्षमा राजधानी उपत्यकासहित ७ वटै प्रदेशमा ५५ हजार २ सय १४ लैंगिक हिंसा भएकाेमा मधेस प्रदेशमा सबै भन्दा बढी १३ हजार ६ सय ७६ वटा लैंगिक हिंसा भएको तथ्याङ्कमा उल्लेख छ । उक्त अवधीमा सबै भन्दा कम कर्णाली प्रदेशमा ३ हजार ४४ वटा घटना भएकोमा बागमती प्रदेश बढी उपत्यका र लुम्विनी प्रदेश पछि ४ औ स्थानमा रहेको तथ्याङ्क प्रदेश प्रहरी कार्यालयले प्रस्तुत गरेकाे छ ।
लैङ्गिक तथा घरेलु हिंसा न्यूनीकरणका लागि प्रदेश प्रहरी कार्यालय हेटौंडा मार्फत् विभिन्न क्रियाकलाप भएको प्रहरी नायव महानिरीक्षक राणाले बताइन् । उनका अनुसार लैङ्गिक तथा घरेलु हिंसा न्यूनीकरणका लागि प्रदेशका १० जिल्लामा १० वटा जिल्लास्तरीय समिति गठन गरिएको छ भने महानगरस्तरीय एक वटा, नगरपालिकास्तरीय २५ वटा, गाउँपालिकास्तरीय ६१ वटा र वडास्तरीय ७७५ वटा सहित ८७२ वटा लैङ्गिक हिंसा नियन्त्रण सञ्जाल समिति गठन गरिएको उनले बताइन् ।
‘लैङ्गिक हिंसा विरुद्ध एकिकृत सेवा दिन जिल्ला अस्पतालमा एकद्वार संकट व्यवस्थापन केन्द्र स्थापना गरिएको छ’ उनले भनिन् जसले लैगिंक हिंसाका पिडितलाई आश्रय दिने, घाइते भए उपचार गर्ने, सामाजिक मनोविमर्श दिने, कानूनी सल्लाह उपलब्ध गराउने र पूर्नस्थापनाको लागि पहल गर्ने कार्य गरिरहेको छ ।’ उनका अनुसार हालसम्म १ हजार ६ सय १६ जनाले एकद्वार संकट व्यवस्थापन केन्द्र मार्फत सेवा लिएका छन् ।
प्रहरी कार्यालय तथा सामुदायिक सेवा केन्द्र र प्रहरी सेवा केन्द्रद्वार स्थानिय स्तरमा सचेतना अभिबृद्धी गर्ने कार्य गरिदै आएको छ भने लैंगिक हिंसा र घरेलु हिंसामा संलग्न पिडकलाई नियन्त्रण तथा पक्राउ गरी कानुनी दायरामा ल्याउने गरिएको बताइएकाे छ। हिंसा न्युनीकरणमा बागमती प्रदेश प्रहरी कार्यालयले समुदायसँग प्रहरीद्वारा सञ्चालित कार्यक्रमहरुमा सक्रिय सहभागिता, समन्वय र सहकार्य, पिडितलाई परामर्श र सहयोग, पिडतको उद्दार तथा पुनस्थापनामा सहयोग प्रदान गर्न सहयाेगकाे अपेक्षा समेत गरेका राणाले बताइन् ।
‘समाज परिवर्तन गर्न नागरिक सहभागीता अपरिहार्य’
Tags: No Comments
मकवानपुर । जिल्ला प्रहरी कार्यालय मकवानपुरका प्रमुख एसपी सिताराम रिजालले समाज परिवर्तनमा प्रहरी मात्रको एकल प्रयासले सम्भव नहुने तथा यसकाे लागि नागरिकको सहभागीता अपरिहार्य रहेकाे बताएका छन् । सामुदायिक सेवा केन्द्र मकवानपुर तथा सामुदायिक प्रहरी सेवा केन्द्र हेटौंडा पशुपतिनगरको आयोजनामा समुदाय प्रहरी साझेदारी कार्यक्रमको प्रभावकारीता सम्बन्धी अन्तरक्रिया कार्यक्रममा उनले यस्ताे बताएका हुन् ।
अन्तरक्रियामा एसपी रिजालले समाज परिवर्तनमा सामुदायिक सेवा केन्द्रको भूमिकाकाे प्रशंसा समेत गरे । अन्तरक्रियामा उठेका जिज्ञासाहरूको प्रहरी प्रमुखले सम्बोधन गरेका थिए । कार्यक्रममा काठमाडौ –२८ पुरानो बसपार्कका अध्यक्ष एवम् कार्यक्रमका विशिष्ट अतिथि कमरूदिन मियाले हाल केन्द्रले गरेको गतिविधि बारेमा जानकारी गराउनुका साथै सामुदायिक सेवा केन्द्र मकवानपुरलाई काठमाडौ भ्रमणको लागि आमन्त्रण समेत गरे ।
केन्द्रका अध्यक्ष तथा सामुदाय प्रहरी साझेदारीका जिल्ला सदस्य राम बिष्टले केन्द्रको स्थापनादेखि हाल सम्मको महत्वपूर्ण कार्यहरुको चर्चा गरेका थिए । सामुदायिक सेवा केन्द्रको वर्तमान अवस्थामा आइपरेका चुनौती समेत उनले प्रस्तुत गरेका थिए । काठमाडौ महानगरपालिकाको आर्थिक सहयोगमा धार्मिक भ्रमण तथा सामुदायिक अवलोकन गर्नको लागि आउनुभएका १३० जनालाई स्वागत गर्नुका साथै पुरानो बस पार्क सामुदायिक पदाधिकारी,कार्यसमिति सदस्य,पुर्व अध्यक्ष,जेष्ठ नागरिकहरूलाई स्वागत तथा सम्मान गरिएकाे थियो ।
केन्द्रका अध्यक्ष तथा सामुदाय प्रहरी साझेदारीका जिल्ला सदस्य राम बिष्टको सभाअध्यक्षतामा भएको कार्यक्रममा जिल्ला प्रहरी कार्यालय मकवानपुरका प्रमुख तथा समुदाय प्रहरी साझेदारीका जिल्ला सह– संयोजक प्रहरी उपरीक्षक सिताराम रिजालको प्रमुख आतिथ्यता भएकाे कार्यक्रममा जिल्ला प्रहरी कार्यालयका प्रहरी नायब उपरीक्षक लक्ष्मी भण्डारी ,ईलाका प्रहरी कार्यालय पशुपतिनगरका निमित्त प्रमुख सुन्दर कार्की, केन्द्रका पदाधिकारी, कार्यसमिति सदस्य, पुर्व अध्यक्ष, स्वयसेविका, जेष्ठ नागरिकलगायतको उपस्थिति थियो ।