काठमाडाै । जनताको अभिमतबाट एमालेले सरकार बनाएको र देश विकासको अभियान चलाएमा विदेशीकाे कारण एमालेको सरकार हटाउने काम गरिएको नेकपा एमाले अध्यक्ष केपी ओलीले बताए । विदेशीका सामु लम्पसार परेर कम्फरटेबल बनिदिन्छौँ भनेर सरकार ढलाइएकाे उनले आराेप लगाएका छन् ।
झुलाघाट–चिवाभञ्ज्याङ समृद्धिको लागि संकल्प यात्राको क्रममा सोमबार साँझ दोलखाको चरिकोटमा आयोजित सभालाई सम्बोधन गर्दै अध्यक्ष ओलीले नेकपा एमालेको लक्ष सरकार जानु नरहेकाे तर वर्तमान सरकार आफ्नै कारणले ढल्ने अवस्थामा पुगेको ओलीले बताए । ‘देशले अहिलेकाे गठबन्धनकाे सरकारको गतिविधि थेग्न सक्दैन अध्यक्ष ओलीले भने ‘यो सरकार कसैले ढाल्ने पर्दैन,आफैँ ढल्ने स्थितिमा पुगेको छ ।’ एकीकृत भइसकेको पार्टी पटक पटक फुटाउने काम गरिएको उनले टिप्पणी समेत गरे । नेपाल कम्युनिष्ट पार्टी अदालतले नभई विखण्डनकारीले फुटाउने काम गरेका ओलीले बताए । त्यसैले विखण्डनकारीको पक्षमा नलाग्न ओलीले आग्रह गरे ।
‘एमाले बाहेक वामपन्थी पार्टीमा कुनै कायकर्ता हुनुहुन्छ भने त्यो गलत बाटोमा नहिँड्नुस्, झिँगाको पछि किन लाग्ने फोहोरको डङ्गुरमा जान’, उनले भने । ओलीले अहिले देश गम्भीर अवस्थामा पुगेको बताउँदै त्यसबाट देशलाई फर्काउनु पर्ने र त्यसकै लागि लागि समृद्धिका लागि संकल्प अभियान चलाएको प्रष्ट पारे । ‘देश अप्ठेरो स्थितिमा छ, गम्भीर रोग लागि सकेको छ देशमा’ ओलीले भने । प्रचण्ड र शेरबहादुर देउवाकै कारण शान्ति प्रक्रिया नटुङ्गिएको समेत उनले बताए । पीडितको न्यायको लागि शान्ति प्रक्रिया टुङ्ग्याउनु पर्छ भन्ने पक्षमा एमाले रहेको उनले बताए ।
‘जनताको समर्थनले एमालेको मनोबल र आत्मविश्वास बढेको छ’ उनले भने ‘यात्राको क्रममा नागरिकले, माया, ममता, स्वागत र आत्मीयपन देखाएका छन् ।’ गौरीशंकरको काखमा रहेको कालिञ्चोक भगवती र दोलखा भीमसेनको आशिर्वाद प्राप्त दोलखा धार्मिक र प्राकृतिक हिसाबले भरपुर रहेको ओलीले बताए । एमालेको यात्राको क्रममा बालबालिकाको प्रयोग गरिएको भनि गरिएको प्रचारको ओलीले कार्यक्रमबाटै आलोचना समेत गरे ।एमालेले सुरु गरेको यो अभियान राष्ट्रिय उत्सवको अभियान भएको कारण त्यसमा बालबालिकाले सहभागिता जनाउनु स्वाभाविक भएको ओलीले बताए । नेकपा एमाले एउटा राष्ट्रिय लक्ष लिएर अघि बढेकोले त्यसमा बालकदेखि वृद्धसम्मको सहभागिता रहेको ओलीले प्रष्ट पारे ।
अहिले युवालाई देशमा अड्याउनै नसक्ने अवस्थामा रहेको उनले बताए । ‘अर्काको दरबार देखेर धनी हाेइदैन् युवालाई देशमा नै राखेर आफ्नो घर राम्रो बनाउने वातावरण बनाउनु पर्छ’ अध्यक्ष ओलीले भने ‘विभिन्न व्यवसाय सञ्चालन गरेर युवाहरू देश निर्माणको अभियानमा लागाउनु जरुरी छ ।’ राजनीतिक पार्टीले अब विकास र सामाजिक सुधारको अभियन्ताको रूपमा काम गर्नुपर्नेमा उनेले जोड दिए । ‘सामाजिक सुधारका अभियान हामीले नै चलाउने हो, अरूले चलाउने होइन’, ओलीले भने ।
मध्यपहाडको आर्थिक, सामाजिक, सांस्कृतिक, धार्मिक अवस्था तथा उद्योग, पर्यटन लगायतको सम्भावना बुझ्न एमाले अध्यक्ष ओलीको नेतृत्वमा वरिष्ठ उपाध्यक्ष ईश्वर पोखरेल, उपाध्यक्षहरू युवराज ज्ञवाली, रामबहादुर थापा, विष्णु पौडेल, सुरेन्द्र पाण्डे, महासचिव शंकर पोखरेल, उपमहासचिव प्रदीप ज्ञवाली, पृथ्वीसुब्बा गुरुङ, सचिवहरू, स्थायी कमिटी, पोलिटब्युरो, केन्द्रीय कमिटी सदस्यहरू, प्रदेश कमिटी लगायतका नेताहरू, प्राविधिक, विज्ञ सम्मिलित टोली सहित समृद्धिको लागि संकल्प यात्रामा छन् । बैतडीको झुलाघाटमबाट मङ्सिर १४ गतेदेखि सुरु भएको यात्रा पुस १ गते पाँचथरको चिवाभञ्ज्याङ पुगेर समापन गरिने छ ।
चितवन । चितवनको माडीमा बोलेरो गाडीले मोटरसाइकललाई ठक्कर दिँदा दुई जनाको मृत्यु भएको छ । शनिबार साँझ माडी नगरपालिका–१ बरुवास्थित चिताई खोलाको पुलमा लु२च २५०८ नम्बरको बालेरोले बागमती प्रदेश०६००१प ४०९३ नम्बरको मोटरसाइकलालाई ठक्कर दिँदा मोटरसाइकल चालक सूर्य अधिकारी र मोटरसाइकल पछाडि सवार बेगबहादुर खत्रीको मृत्यु भएको हो ।
दुर्घटनामा भवानीप्रसाद पौडेल घाइते भएका छन् ।अधिकारी लेखापाल तथा खत्री र पौडेल माडीस्थित सोमेश्वर माध्यमिक विद्यालयमा कार्यरत शिक्षक हुन । बोलेरोको ठक्करबाट गम्भीर घाइते भएका खत्रीको बगौडा अस्पतालमा उपचारका क्रममा मृत्यु भएको हो भने अधिकारीको भरतपुरमा उपचारका क्रममा आइतबार बिहान मृत्यु भएको हो ।
मृतक अधिकारी माडी नगरपालिका–१ निवासी र खत्री सुर्खेतको सिन्ता गाउँपालिका–३ आग्रीगाउँ निवासी हुन् । दुर्घटनामा घाइते स्याङ्जा घर भएका पौडेलको पुरानो मेडिकल कलेज भरतपुरमा उपचार भइरहेको छ । उनको अवस्था मध्यम रहेको इलाका प्रहरी कार्यालय माडीका प्रमुख दीपक रिजालले जानकारी दिए । ठक्कर दिने बोलेरो र चालकलाई इलाका प्रहरी कार्यालय माडीले नियन्त्रणमा लिएको उनले बताए ।
मकवानपुर । बागमती प्रदेशका मुख्यमन्त्री शालिकराम जम्कट्टेलले भ्रष्टाचार संस्कारकाे रुपमा विकास भएकाेले अन्त्य हुनु पर्ने बताएका छन् । भ्रष्टाचार विरुद्दकाे अन्तर्राष्ट्रिय दिवसकाे अवसरमा अख्तियार दुरुपयाेग अनुसन्धान आयाेगकाे कार्यालय हेटौडाले आयाेजना गरेकाे कार्यक्रममा उनले उक्त कुरा बताएका हुन् ।
कार्यक्रममा प्रमुख अतिथि मुख्यमन्त्री जम्कट्टेलले नेपालकाे सन्दर्भमा भ्रष्टाचारको काेणवाट हेर्दा हामी कुन स्थानमा छाै प्रस्ट रहेकाे औल्याउँदै भ्रष्टाचार संस्कारकाे रुपमा विकास हुँदै गएकाे अहिलेकाे समयमा भ्रष्टाचार तथा भष्ट्राचार जन्य कार्यकाे समुल अन्त्य गरिनु पर्ने बताए । राणाकालिन समयदेखि हालसम्म विरासतकाे रुपमा उहीँ परम्परालाइ अगाडि बढाउँदै लगिएकाे देखिन्छ यसकाे मुख्य दाेष राजनीतिक नेतृत्वकाे भएकाे उनले बताए । ‘राजनीतिक नेतृत्वले निष्पक्ष, स्वार्थरहित र पारदर्शी रुपमा काम गर्ने हाे भने भष्ट्राचार नियन्त्रण हुन्छ’ उनले भने ‘खबरदारी सवैभन्दा पहिला राजनीतिक नेतृत्वलाइ गर्नुपर्छ ।’
भ्रष्टाचार भनेकाे सरकारमा रहेकाे वेला हुने र बाहिर भएकाे वेला नहुने भन्ने कुरा हुन्न यसकाे गम्भीर समीक्षा गर्न जरुरी रहेकाे उनले बताए । एककाे विरुद्द अर्काे अख्तियारमा बेनामे निवेदनकाे आधारमा थुपै मुद्दाहरु रहेका छन् मन्त्री जम्कट्टेलले भने ‘अख्तियार पनि निष्पक्ष हुनुपर्छ । वर्षाैसम्म एउटै निवेदनकाे समस्यामा अल्झिरहनु भन्दा अख्तियारले उजुरि दर्ता गर्नुअघि नै हाे हाेइन गम्भिरता पूर्वक लिएर दर्ता गर्नु पर्छ ।’ उजुरीकर्ताले उद्देश्य के लियकाे छ र परिणाम के आउँछ भन्ने कुरा प्रति अख्तियारले ध्यान दिनुपर्ने उनले बताए । भ्रष्टाचार निवारणकाे निम्ति एकले अर्काेलाई दाेषी देख्न नहुने सहयाेगकाे भावले काम गर्नुपर्ने उनले बताए । ‘मुलुकमा यति धेरै परिवर्तन गर्न सकेका छाै भ्रष्टाचार निवारण गर्न नसक्ने भन्ने हुदैन’ उनले भने ।
हरेक वर्ष डिसेम्वर ९ का दिन भ्रष्टाचार विरुद्दकाे अन्तर्राष्ट्रिय दिवस मनाउँदै आइएकाे छ । यसै सन्दर्भमा मुख्यमन्त्री तथा मन्त्रिपरिषदकाे कार्यालय परिसरमा भएकाे कार्यक्रम बागमती प्रदेशका प्रमुख सचिव घनश्याम उपाध्यायकाे सभाध्यक्षता तथा बागमती प्रदेश मुख्यमन्त्री जम्कट्टेलकाे प्रमुख आतिथ्यता भएकाे हाे । आन्तरिक मामिला तथा कानून मन्त्री गंगानारायण श्रेष्ठ, जिल्ला समन्वय समितका प्रमुख ललित घलान अख्तियार हेटौडा कार्यालय तथा प्रदेश र जिल्लास्थित कार्यालयका कर्मचारी लगायतकाे उपस्थितिमा कार्यक्रम भएकाे हाे ।
शनिबारबाट मकवानपुर लिग क्वालिफाइ फुटबल प्रतियोगिता
Tags: No Comments
मकवानपुर । शनिबारबाट हेटौडामा मकवानपुर लिग क्वालिफाइ फुटबल प्रतियोगिता हुने भएकाे छ । मकवानपुर जिल्ला फुटबल संघको आयोजनामा नयाँ क्लबबीचको एन्फा मकवानपुर लिग क्वालिफाइ नक आउट फुटबल प्रतियाेगिता हुन लागेकाे हाे ।
संघले बुधबार प्रतियोगितामा सहभागी भएका क्लबका पदाधिकारीहरुको उपस्थितिमा खेलतालिका सार्वजनिक गरिसकेकाे छ भने शुक्रबार पत्रकार भेटघाट गरी प्रतियाेगिताकाे तयारी सम्बन्धमा जानकारी गराएकाे छ । शनिबारदेखि सुरु हुने प्रतियोगिताको पहिलो खेल बिहान हेटौंडा–१८ स्थित कमलादेवी युवा क्लब र हेटौंडा–१२ पदमपोखरीस्थित पञ्चशील युवा क्लबबीच हुनेछ । प्रतियाेगिताकाे दोस्रो खेलकाे प्रतिष्पर्धा शनिबार नै हुने भएकाे छ । शनिबार दिउँसो हेटौंडा–१९ को जनहित युवा क्लब र हेटौंडा–१३ को पदमपोखरी एकेडेमीबीच प्रतिष्पर्धा हुनेछ ।
हेटौंडा उपमहानगरपालिका–५ को पिप्ले–क्याम्पा रंगशालामा हुने प्रतियोगिताको फाइनल खेल मंसिर ३० गते हुने आयोजकले जानकारी दिएकाे छ । प्रतियोगिताको उपाधि विजेता र उपविजेताले शिल्ड, मेडल र ट्रफी प्राप्त गर्नेछन् । यस्तै, प्रत्येक खेलको म्यान अफ द म्याच र विधागत उत्कृष्ट खेलाडीहरुका लागि पनि पुरस्कारको व्यवस्था गरिएको प्रतियाेगितामा सहकार्य गरेकाे नारायणी कलेजका प्रिन्सिपल रघुनाथ खरालले जानकारी दिए । जिल्लास्तरीय क्लबको मान्यता दिँदै जिल्ला लिग खेल्न पाउने २ वटा क्लब छनोट गर्न प्रतियोगिता आयोजना गर्न लागेको जिल्ला फुटबल संघले जनाएकाे छ ।
प्रतियोगितामा १२ वटा टिमको सहभागिता जनाउने भएका छन् । प्रतियोगितामा प्रथम र द्वितीय हुने दुई टिम जिल्लास्तरीय टिमको रुपमा छनोट भई जिल्ला लिगमा सहभागी हुनेछन् । आगामी लिगमा दुई वटा टिम घटुवामा पर्ने समेत बताइएको छ । करिब ४ लाख ८५ हजार लागत अनुमान गरिएकाे प्रतियाेगितामा बागमती प्रदेश खेलकुद परिषद् र नारायणी कलेज हेटौडाले सहयाेग रहेकाे छ ।
२०७६ सालपछि एन्फा रेलिगेटेड लिग गर्नुपर्ने नियम लागू भएपछि मकवानपुरले लिग सुरु गरेको हाे । शुक्रबारकाे पत्रकार भेटघाटमा प्रतियाेगिताकाे तयारी पुरा भएकाे बताइएकाे छ भने एन्फा मकवानपुर लिग क्वालिफाइ नक आउट फुटबल प्रतियोगिता २०८० प्रतियोगिताकाे नियमावली समेत सार्वजनिक गरिएकाे छ । नियमावली अनुसार प्रतियोगितामा सहभागी हुन मकवानपुर जिल्ला भित्रका आधिकारिक स्थायी बसोबास गर्ने खेलाडी तथा क्लबहरुले मात्र पाउने छन् ।
फिफा नियम अनुसार सन्चालन हुने प्रतियोगिताको फाइनलमा पुगेका दुई टिमका खेलाडिहरुले मकवानपुरको पहिलो रेलिगेटेड जिल्ला लिग फुटबल प्रतियोगितामा सहभागी हुन नपाउने मकवानपुर जिल्ला फुटबल संघका सदस्य तथा प्रतियाेगिता संयाेजक आलोक स्याङ्तानले बताए । उनका अनुसार प्रतियोगितामा गत सिजन नेपालको हाल राष्ट्रिय टिममा रहेका सिनियर खेलाडि र ए डिभिजन लिग खेलेका खेलाडीहरुले सहभागी जनाउन पाउने छैन तर विभिन्न उमेर समुहमा खेलेका मकवानपुरे खेलाडि भने सहभागी हुन पाउने छन् ।
प्रतियाेगितामा १२ टिमले सहभागिता जनाउने भएका छन् । स्याङ्तानका अनुसार हेटौंडा–१२, पदमपोखरीको पञ्चशील युवा क्लब, बकैया गाउँपालिकाको बकैया युथ क्लब, हेटौंडा–१८ को कमलादेवी युवा क्लब र हेटौंडा–१३ को पदमपोखरी एकेडेमी, हेटौंडा–१९ को जनहित युवा क्लब, हेटौंडा–२ को द रिभाइबल युवा क्लब, हेटौंडा–८ को कमाने फुटबल एकेडेमी र हेटौंडा–१६ को अग्रसर युवा क्लब, हेटौंडा–१६ को ज्ञानज्योति युवा क्लब, हेटौंडा–५ को जनप्रवाह युवा क्लब, हेटौंडा–१५ को सहयोगी युवा क्लब र हेटौंडा–१४ को समाज कल्याण युवा क्लबले सहभागिता जनाएका छन् ।

मकवानपुर । नेपाल चलचित्र संघले बागमती प्रदेश सरकारलाई ज्ञापनपत्र बुझाएकाे छ । संघले बागमती प्रदेश सरकारलाई मनोरञ्जन कर समायोजनलगायतका विषयमा ज्ञापनपत्र बुझाएकाे हाे ।
शुक्रबार आन्तरिक मामिला तथा कानून मन्त्री गंगा नारायण श्रेष्ठलाई संघका महासचिव नरेन्द्र महर्जन, निर्माता तथा कलाकार दीपकराज गिरी, नेपाल चलचित्र प्राविधिक संघका अध्यक्ष पुष्कर लामा लगायत चलचित्रकर्मीहरुले मन्त्रालयमै ज्ञापनपत्र बुझाए हुन् । ज्ञापनपत्र बुझाउँदै महासचिव महर्जनले चलचित्र क्षेत्रले संघीय सरकारलाई १५ प्रतिशत चलचित्र विकास शुल्क, प्रदेश सरकारलाई ५ प्रतिशत मनोरञ्जन कर र त्यसपछि १३ प्रतिशत मुल्य अभिवृद्धि कर गरी ३३ प्रतिशत भन्दा बढी करहरु बुझाउनुपर्ने बाध्यता रहेको बताए ।
ज्ञापनपत्र बुझ्दै मन्त्री श्रेष्ठले प्रदेश सरकारसँग त्यति धेरै अधिकार नभएपनि अधिकारभित्र रहेका विषयलाई आवश्यक सम्बोधन गरिने संघका पदाधिकारीलाई जानकारी गराएका थिए । ‘चलचित्र सम्बन्धी कानून तयार गरी कार्यान्वयनमा ल्याउने तयारी भइरहेकाे छ’ मन्त्री श्रेष्ठले भने ‘आगामी आर्थिक वर्ष विधेयक पारित गरी कार्यान्वयनमा ल्याउने छाैं । उनले हल सञ्चालन, नियमन र अनुगमनको क्षेत्राधिकार पनि हामीलाई नै रहेकाले विधेयक निर्माण पछि सहजता हुने बताए । करको समस्या समाधानकाे विषय संसदमा पेश गरी अगाडी बढाउने प्रतिवद्धता उनले व्यक्त गरे ।
कोशी प्रदेशमा पनि प्रदेशको ५ प्रतिशत करमा समायोजन गरी नेपाली चलचित्रको १.५ प्रतिशत र विदेशी चलचित्रको ३ प्रतिशत कायम गरेको कलाकार संघकाे टाेली मन्त्री श्रेष्ठलाई अवगत गराएकाे थियाे । ‘कला संस्कृति जर्गेना गर्ने माध्यम रहेको चलचित्र उद्योगलाई तीनतहकै सरकारको साथ सहयोग आवश्यक रहेको छ’ कलाकार दिपकराज गिरी भने ‘सरकारले चलचित्र उद्योगलाई हेर्ने दृष्टिकोण अन्य उद्याेगलाई भन्दा फरक पाएका छाैं ।
शुक्रबार नै चलचित्रकर्मीकाे टाेलीले बागमती प्रदेश मुख्यमन्त्री तथा मन्त्रिपरिषद् कार्यालयका प्रमुख सचिव घनश्याम उपाध्यायलाई समेत ज्ञापनपत्र बुझाएका छन् । ज्ञापनपत्र बुझ्दै प्रमुख सचिव उपाध्यायले चलचित्र प्रवर्द्धन र समग्र विकासमा प्रदेश सरकारको साथ रहने प्रतिवद्धता व्यक्त गरे ।
ज्ञापनपत्र बुझाउने समूहमा नेपाल चलचित्र संघ महर्जन, कलाकार गिरी, कलाकार एंव निर्देशक दीपाश्री निरौला, प्रदेश सञ्चार रजिष्ट्रार रेवतीप्रसाद सापकोटा, नेपाल चलचित्र प्राविधिक संघ अध्यक्ष पुष्कर लामा, कलाकार निर्मल शर्मा ‘गैंडा’, राज कटुवाल, सुमन गिरी, ध्रुव न्यौपाने, सुशान्त कुमार श्रेष्ठ लगायतको सहभागिता रहेकाे थियो ।