मकवानपुर । साहित्य सङ्गम मकवानपुरले एकै मञ्चमा १४ जना लेखकलाई सम्मान गरेको छ । २०८० साल भित्र पुस्तक प्रकाशन गर्ने मकवानपुरले लेखकलाई सङ्गमले शनिबार एकै मञ्चमा सम्मान गरेको छ ।
सङ्गमको ३ सय ४२ औ साहित्य सन्ध्याका प्रमुख अतिथि नवराज शर्मा तिमल्सिनाले सम्मान गर्दै पुस्तक प्रकाशन गराएका स्रष्टाहरूलाई सम्मान गर्ने परम्पराले अन्य पुस्तक लेखन र प्रकाशनमा हौसला मिल्ने बताए ।
सङ्गमले माटोको मोहका लागि तुलसी घिमिरे, महाकाशका लेखक मुना अर्याल, अकिञ्चनका आर्तहरू- देवराज खरेल, घुम्दै फिर्दै- जनार्दन खनाल,अनुत्तरित प्रश्न- समीर पाख्रिन, जुनेली- पुरूषोत्तम आचार्य, बैङ्किङ क्षेत्रमा बढेका पाइलाहरू- सुदर्शन अधिकारी,अन्तर्दृष्टी- किशन पौडेल,व्यथाभित्रको कथा- श्यामप्रसाद श्रेष्ठ, म कथा भन्छु नि ल- सिएम रिमाललाई सम्मान गरेको हो ।
यस्तै हार्न नसक्ने मान्छे म- गणेशकुमार तिमल्सिना,प्रारम्भिक संस्कृत व्याकरण- उदिम पन्त,पल्लवित पाइला- कृशु अर्याल, मेकिङ इट इजी- आदर्श पौडेललाई सम्मान गरेको छ ।
अनुशुया खनालले बालोरी छन्दको कविता वाचन गरेको सन्ध्यामा राजबहादुर बुढा, राजकुमार चौधरी, एलिजा ढकाल, ऋषिराम पाण्डे, स्वस्तिका दाहालले कविता वाचन गरेका थिए । यसैगरी मसान उपासक, देवराज तिवारी र देवराज खरेलले गजल साथै सुबास सजलले मुक्तक वाचन गरे । सम्मानित स्रष्टाहरूले समेत रचना वाचन गरेका थिए ।
सङ्गमका अध्यक्ष डीबी बर्तौलाले सम्मानित स्रष्टाहरूलाई सम्मान गर्ने अघिल्लो कार्यसमितिदेखिको परम्पराले निरन्तरता पाएको बताए । सम्मान कार्यक्रमलाई हेटौंडा १८ का लक्ष्मण भुजेलबाट सहयोग प्राप्त भएको उनले जानकारी दिए ।
यसैगरि लेखक गणेशकुमार तिमल्सिनाले ५० प्रति पुस्तक सङ्गमलाई सहयोग गरेका छन् । विधान संशोधनका क्रममा रहेको बताउँदै बर्तौलाले सङ्गमबाट भएको सहयोग सङ्कलनमा हालसम्म ४ लाख ५० हजार रुपैयाँ भएको जानकारी दिए ।
- स्वरुपा गुरागाईं
चैत ९ गतेबाट कक्षा ७ को वार्षीक परीक्षा सकिएपछि रिजल्टको प्रतिक्षामा बसेको समयमा रेडक्रसको सेमिनारमा सहभागी हुने मौका पाएँ । चैत २६ र २७ गते बागमती प्रदेश रेडक्रसले आयोजना गरेको ५ औं सेमिनारमा सहभागी भएँ । उक्त सेमिनारमा धेरै कुराहरु सिक्ने अवसर मिल्याे । त्यहाँ रेडक्रससँग सम्बन्धित सिकेका र बुझेका कुरालाई लेख्ने कोशिस गरेको छु । आशा छ प्रतिकृया दिनु हुनेछ ।
अन्तराष्ट्रिय रेडक्रसका संस्थापक जाँ हेनरी ड्युनाको जन्म ८ मे १८२८ का दिन स्वीटजरल्याण्डको जेनेभामा भएको थियो । उनी व्यापारको सिलसिलामा सन् १८५९ जुनमा इटालीको सल्फेरिनो पुगेका बेला इटाली र फ्रान्सका संयुक्त सेना र अष्ट्रिया बीच युद्ध भइरहेको थियो ।
त्यो युद्धमा करिब ६ हजार सैनिकको मृत्यु र ४० हजार भन्दा बढी सैनिकहरु घाइते भएका थिए । यस्तो भयानक दृश्यदेखि ड्युनाले घाइतेहरुलाई तत्कालै सक्दो सेवा पुर्याए । सल्फेरिनोको यस दुखद् दृश्यबाट प्रभावित उनले सन् १८६२ मा फ्रेन्च भाषामा सल्फेरिनोको सम्झना नाममा पुस्तक लेखे । जसमा रणभूमिको यथार्थ वर्णन गर्नुको अतिरिक्त युद्दको समयमा सेनाको चिकित्सा सेवा अपर्याप्त हुने भएकाले घाइतेहरुको उद्दारका लागि हरेक देशमा स्वयमसेवी उद्दार संस्थाको स्थापना र यसका लागि एउटा अन्तराष्ट्रिय सम्झौता हुनु पर्ने सुझाव दिए ।
पुस्तकले धेरै मानिसको मनमा राम्रो प्रभाव पार्यो । उनको विचारसँग सहमत हुने स्वीटजरल्याण्डका अरु सहयोगीहरुसँग मिलेर ड्युनाले सन् १८६३ मा घाइतेहरुको लागि अन्तराष्ट्रिय समिति स्थापना गरे । जसलाई अहिले रेडक्रसको अन्तराष्ट्रिय समिति (ICRC) भनिन्छ । साथसाथै युरोपेली देशहरुबाट राष्ट्रिय रुपमा रेडक्रसका सोसाइटीहरुको स्थापना सुरु भयो । पछि गएर सन् १९१९ मा लिग अफ रेडक्रस सोसाइटी गठन भयो । जसलाई अहिले रेडक्रसको महासंघ भनिन्छ ।
रेडक्रसका ७ आधारभूत सिद्धान्त रहेछन् ।
मानवता
निष्पक्षता
तटस्थता
स्वाधिनता
स्वयम् सेवा
एकता
विश्वव्यापकता
युद्धको समयमा सैनिक चिकित्सा सेवामा आइपर्ने समस्या समाधनको उपाय पत्ता लगाउने उदेश्यले सन् १८६३ मा स्वीजरल्याण्डको जेनेभामा एक अन्तराष्ट्रिय सम्मेलनको आयोजना गरियो । सो सम्मेलनबाट सेतो पृष्ठभूमिमा रातो धनचिन्ह रेडक्रस लाई विशेष चिन्हको रुपमा घाइते सैनिकहरुको राहत कार्यमा संलग्न संस्थाहरुले प्रयोग गर्ने गरी ग्रहण गरियो । सन् १८६४ को प्रथम जेनेभा महासन्धीले रेडक्रस चिन्हलाई विशेष चिन्हको रुपमा आधिकारिक मान्यता दिएको हो ।
नेपाल रेडक्रस सोसाइटी
उल्लेखित सिद्धान्तहरुमा टेकेर वि.सं. २०२० साल भाद्र १९ गते (४ सेप्टेम्बर १९६३) का दिन नेपाल रेडक्रस सोसाइटीको स्थापना भएको रहेछ । नेरेसो गैरनाफामुलक स्वयंसेवी संस्था हो र यसले मानवीय कार्य क्षेत्रमा सरकारको सहयोगी भूमिका खेल्दछ ।
वि.सं. २०२० साल माघ २४ गते तत्कालिन सरकारद्वार जेनेभा महासन्धीहरुमा सम्मिलित भएपछि प्रचलित कानून अनुसार राष्ट्रभरी कार्य गर्ने गरी नेरेसोलाई सरकारबाट मान्यता प्राप्त भएको थियो । नेरेसो अन्तराष्ट्रिय रेडक्रस अभियानको अभिन्न अंग हो । यसलाई वि.सं. २०२१ असोजमा आ.सी.आ.सी. तथा फेडेरेशनले क्रमशः मान्यता र सदस्यता प्रदान गरेका थिए ।
नेपाल रेडक्रस सोसाइटीकफ प्रमुख आधार यसका सदस्य एवम् स्वयंसेवकहरु हुन् । संस्थाको सदस्य हुन चाहने १६ वर्ष उमेर पुगेका हरेक व्यक्तिलाई सदस्यता खुल्ला रहेको हुन्छ । नेरेसो केन्द्र प्रदेश जिल्ला वा उपशाखा कार्यालयमा तोकिएको शुल्क बुझाएर सदस्यता लिन सकिने व्यवस्था रहेको छ ।
नेपाल रेडक्रसकमा स्वयंसेवक भन्नाले मानवीय हितका लागि रेडक्रसका आधारभूत सिद्धान्त अनुरुप संस्थाको कुनै पनि निकायसँग आवद्ध भइ वर्षको कम्तिमा ४० घण्टा जिम्मेवारी स्वेच्छिक रुपमा वहन गर्ने व्यक्तिलाई बुझाउँछ । सदस्यता प्राप्त गर्नु भनेको वैधानिक हैसियत प्राप्त गर्नु हो र स्वयंसेवक हुनु भनेको सेवा कार्यमा संलग्न हुनु हो । हरेक व्यक्ति नेरेसोको स्वयंसेवक वा सदस्य दवै हुन सक्छन् । हाल नेरोसोमा कार्यकारी र कार्यक्रम स्वयंसेवक गरी १ लाख भन्दा बढी स्वयंसेवक क्रियाशील छन् ।
रेडक्रसको उदेश्य र नेपाल जुनियर तथा युवा रेडक्रस सर्कल धर्म वर्ण लिङ्ग वर्ग जाती राष्ट्रियता वा राजनीतिक विचारधाराको आधारमा भेदभाव नगरी मानवीय विपती रोक्न वा कम गर्न प्रयास गर्ने नेपाल रेडक्रस सोसाइटीको उदेश्य हो । म सेवा गर्छु भन्ने मुल मन्त्रका साथ जुनियर तथा युवा रेडक्रसको स्थापना विक्रम सम्बत २०२१ फागुन २२ गतेका दिन भएको हो ।
नेपाल रेडक्रसको अभिन्न अंगको रुपमा रहेको जुनियर तथा युवा रेडक्रस सर्कलमा किशोरकिशोरी तथा युवाहरु स्वयंसेवकको रुपमा नेतृत्वदायी भूमिकामा र लाभान्वितका रुपमा आवद्ध हुदै आएका छन् । कक्षा ८ सम्म पढाइ हुने विद्यालयमा जुनियर रेडक्रस सर्कल गठन गरिने र कक्षा १ देखि १२ सम्म वा ९ देखि १२ सम्म पढाइ हुने विद्यालयमा वा विश्वविद्यालयमा वा समुदायमा युवा रेडक्रस सर्कल गठन गरिन्छ । जुनियर तथा युवा रेडक्रस सर्कलको कार्यसमितिको अवधी २ वर्षको हुन्छ ।अर्काे सिकाइकाे कुरा भयाे रक्तदान बारे । रक्तदान जीवनदान जस्तै रहेछ । हाम्रो शरिरको रातो रक्तकण १२० दिनमा, सेतो रक्तकण केहीघण्टामा र प्लेटलेस केही दिनमा मर्दा रहेछन् र नयाँ उत्पादन हुने रहेछन्। हामीले रक्तदान गर्दा यी कुराको दान गर्छौ, त्यसैले यसलाई मरेर जाने रगत दान गर्नु पनि भनिन्छ । खेर जाने रगत खेर जानु अघि दान गर्दा अरु काेही जाे रगतकाे अभाव छ उसलाई बचाउँन सकिने रहेछ । तीन/तीन महिनाको फरकमा १८ देखि ६५ वर्षसम्मका व्यक्तिहरुले रगत दान गर्न सक्छन् ।
रक्तदान गर्ने हो भने ४५ किलो तौल, होमोग्लोविन न्यूनतम १२ ग्राम, चक्तचाप सामान्य, जटिल रोग नलागेको आदी हुनु पर्छ । त्यसैगरी महिलामा महिनावारी भएको ८ दिनसम्म, गर्भाअवस्थाका महिला, स्तनपान गराइरहेका महिलाहरु, लागूपदार्थ दुर्व्यसनीमा लागेका व्यक्तिहरु आदीले रक्तदान गर्न सक्दैनन । पुरुषले ७६ मलिग्रामसम्म रक्तदान गर्न सक्छन् भने महिलाले ६६ मिलिग्रामसम्म रक्तदान गर्न सक्छन् ।
रक्तदान गर्दा फाइदा पनि रहेछ । रक्तदानले तनाव कम गर्छ, मुटुका लागि राम्रो हुन्छ,होमोग्लोबिनको स्तर ठिक हुन्छ , तौल व्यवस्थापन गर्छ । नेपालमा रगत चाहिएका व्यक्तिले सजिलै प्राप्त गर्ने,रक्तदान कार्यक्रममा सहयोग, स्थानीय तह, सरकारी बैंक संस्था, साना र मझौला उद्योगहरु, सामाजिक कार्यसँग सम्बन्धित संस्था,ब्लड बैंकहरु गरिएका छन् ।
मकवानपुर । बागमती प्रदेशका खानेपानी उर्जा तथा सिंचाइ मन्त्री माननीय एकालाल श्रेष्ठले प्रदेशको खेतीयोग्य जमिनमा सिंचाइको सुबिधा पुर्याउने आफ्नो प्रमुख लक्ष्य भएको बताएका छन् ।
हेटौंडा-७ मा रहेको बनदेवी सिंचाइ तथा वातावरण संरक्षण समितिद्वारा २०५६ सालदेखि संचालित सिंचाइ योजनाको निरिक्षण गर्दै मन्त्री श्रेष्ठले सिंचाइलाई सबै किसानको पहुँचमा पुर्याउने आफ्नो प्रमुख लक्ष्य भएको बताएका हुन् । स्थानीयको सक्रियतामा २०५६ सालमा इनार खनेर पम्पबाट सिंचाइ गरिरहेका नाग्स्वोतीका किसानले उक्त सिंचाइलाई बृहत् सिंचाइको रुपमा लैजान र ७ नम्बर वडाका धेरै खेतीयोग्य जमिनमा सुबिधा पुर्याउने योजना बनाएको समितिका अध्यक्ष भक्त बहादुर केसिले बताए ।
अहिलेको सिंचाइले बनदेबी टोल, ठुलोटार र धापटोलका केही क्षेत्रमा मात्रै सिंचाइको सुबिधा पुगेकोमा यसलाई विस्तार गर्न आवश्यक रहेको बताउदै बजेट उपलब्ध गराउन आग्रह गरे । मन्त्री श्रेष्ठले आफ्नो मन्त्रालयको र आफ्नो लक्ष्य नै सबै किसानको खेतमा सिंचाइको सुबिधा पुर्याउने रहेको भन्दै आगामी बर्षको बजेटमा सम्बोधन गराउने प्रतिवद्दता व्यक्त गरे ।
उक्त सिंचाइलाई नाग्स्वोतीको तल्लो धापटोलसम्म पुर्याई खेतीयोग्य जमिनलाई सिंचाइसङ्ग जोड्न आगामी वर्ष बजेट उपलब्ध गराउने मन्त्री श्रेष्ठले बताए ।
मकवानपुर । पारिजात स्मृति दिवसको सन्दर्भमा आयाेजित वक्तृत्वकला प्रतियाेगितामा आकाङ्क्षा निरौला प्रथम भएकी छिन् । प्रतियाेगिताबाट कृतिका लौडारी द्वितीय, सुनिल न्यौपाने तृतीय, प्रियान्सु पोखरेल सान्त्वना भइन् । यसैगरी युगेश ढकालले नगद राशी ५०० प्रोत्साहन पुरस्कार प्राप्त गरेका थिए । प्रथम, द्वितीय, तृतीय, सान्त्वना स्थान प्राप्त गर्न सफल वक्ताहरूलाई क्रमशः ८ हजार , ६ हजार, ४ हजार, २ हजार नगद सहित प्रमाणपत्र प्रदान गरिएको थियो ।
हेटौँडा उपमहानगरपालिका १० नं वडा कार्यालयको आर्थिक सहयोग तथा आँचल साहित्य कला पुञ्ज मकवानपुरको आयोजनामा ‘नेपालको सामाजिक रूपान्तरणमा राजनीतिक आन्दोलनको भूमिका’ विषयक खुला वक्तृत्वकला प्रतियोगिता गरिएकाे हाे । प्रतियोगितामा १८ जना सहभागी थिए ।
प्रतियोगितामा बागमती प्रदेशका प्रथम मुख्यमन्त्री डोरमणी पौडेलकोले सिकाइ जीवनकाे ज्ञान भएकाे बताए । कार्यक्रममा हेटौँडा उपमहानगरपालिका १० नं वडा अध्यक्ष फुर्वा दोर्जे तामाङ,आँचल साहित्य कला पुञ्जमकवानपुरकी सल्लाहकार पुर्णकला घिमिरे समेतकाे उपस्थिति रहेकाे थियाे ।
कार्यक्रममा घनश्याम घिमिरे, निरा शर्मा र श्रवण बर्तौला निर्णयक रहेकाे आँचलकाे अध्यक्ष भावना सापकाेटाले बताइन् । कार्यक्रममा हेउनपा १० नं वडा सदस्य तथा कार्यपालिका सदस्य साधना श्रेष्ठ, हेउनपा १० नं वडाका जनप्रतिनिधिहरू गोमा सुनुवार, ईश्वर प्रसाद मैनाली, साहित्यसेवी मुक्ति गोविन्द वैद्य, साहित्यकारहरू देवराज खरेल, सुदर्शन अधिकारी, रमेशमोहन अधिकारी, शम्भुप्रसाद बाँसकोटा, जनार्दन खनाल, इन्द्र नेपाल, छवी अनित्य, डिबि बर्तौला, सानु खनाल, मञ्जु खरालको आतिथ्यता रहेको कार्यक्रममा देवराज तिवारी, शान्ति प्रियवन्दना, संप्रस पौडेल, अमृता लामिछाने, जनार्दन खनाल, ऋषिराम पाण्डेयले रचनावाचन गरेकाे आँचलकी भवानी तिमल्सिना न्यौपानेले बताइन् ।
मकवानपुर । मकवानपुरकाे हेटौडामा भएकाे चौथो संस्करणको मेयर कप फुटबल प्रतियोगिताको उपाधी वडा नम्बर ४ काे पोल्टामा परेकाे छ । बुधबार हेटौंडा–५ स्थित पिप्ले क्याम्पा रंगशालामा भएकाे खेलकाे सडनडेथमा वडा नम्बर ४ ले र वडा नम्बर १४ लाई ६–५ गोलले हराउँदै उपाधीमाथि कब्जा जमाएकाे हाे ।
उपाधीसँगै वडा नम्बर ४ ले २ लाख रुपैयाँसहित शिल्ड, मेडल तथा प्रमाणपत्र प्राप्त गर्याे । उपविजेतामा चित्त बुझाएकाे वडा नम्बर १४ ले १ लाख ५० हजार रुपैयाँ प्राप्त गर्याे । प्रतियाेगिताका विजेता तथा उपविजेता टिमलाई नगर प्रमुख मिनाकुमारी लामा र उपप्रमुख राजेश बानियाले पुरस्कार वितरण गरेका थिए ।
फाइनलखेलकाे निर्धारित समयमा दुवै टिमले १/१ गाेलकाे बराबरी खेलेपछि खेल ट्राइबेकरमा धकेलिएकाे थियाे । खेलको ६२ औं मिनेटमा वडा नम्बर ४ का लागि दीपेश भण्डारीले गोल गर्दै अग्रता दिलाए । खेलकाे निर्धारित समयकाे १० मिनेट बाँकी रहँदा उपविजेता टोलीका लागि अनुप राना मगरले गोल गर्दै खेललाई बराबरी गरे । ट्राइब्रेकरमा समेत दुवै टिमबाट बराबर गोल भएपछि सडनडेथबाट उपाधीकाे छिनाेफानाे भएकाे हाे । टाइब्रेकरमा २–२ गोलको बराबरी भएपछि सडनडेथबाट विजेताको टुंगो लागेको हो ।
मंगलबार भएको पहिलो सेमिफाइनल खेलमा प्रतियोगिताको साविक उपविजेता वडा नम्बर १५ लाई टाइब्रेकरमा ४–३ गोल अन्तरले हराउँदै १४ नम्बर वडा फाइनलमा प्रवेश गरेको हो । यस्तै, मंगलबार नै भएको दोस्रो सेमिफाइनल खेलमा वडा नम्बर १३ लाई सडनडेथमा ५–४ गोलले हराउँदै वडा नम्बर ४ फाइनलमा प्रवेश गरेको हो ।
प्रतियोगिताअन्तर्गत् तृतीय स्थानका लागि बुधबार बिहान भएकाे खेलमा बडा नम्बर १५ ले वडा नम्बर १३ लाई हराएकाे थियाे । उपमहानगरपालिकाका १९ वटै वडाकाे सहभागिता रहेकाे खेलकाे उद्घाटन गत २४ गते भएकाे हाे । तृतीयस्थानमा रहेकाे वडा नम्बर १५ ले ५० हजार रुपैया प्राप्त गर्दा चौथोस्थानमा रहेकाे वडा नम्बर १३ ले २५ हजार रुपैया प्राप्त गरेकाे थियाे ।
तेस्राे संस्करणकाे मेयर कपकाे उपाधी ११ नम्बर वडाले हात पारेकाे थियाे । प्रतियोगिताको पहिलो र दोस्रो संस्करणकाे उपाधी १० नम्बर वडाले जितेको थियो । हेटौडा उपमहानगरपालिकाकाे सहयाेग तथा नगर खेलकुद विकास समितिकाे व्यवस्थापनमा प्रतियाेगिता संचालन भएकाे थियाे ।