महोत्तरी । सशस्त्र प्रहरी बल, नेपाल नं ९ गण महोत्तरीले चालू आर्थिक वर्षको वैशाख १६ गतेसम्म ५ करोड ७२ लाख ३० हजार रुपैयाँ बराबरका अवैध सामानहरू बरामद गरेको छ ।
गणका गणपति सशस्त्र प्रहरी उपरीक्षक बिनोद केसीका अनुसार नं ९ गण तथा मातहतका कार्यालयहरूबाट साे बराबरकाे अवैध सामग्री बरामद गरेकाे हाे । विभिन्न प्रलोभनमा परी भारततर्फ लैजान लागिएका १६ जना व्यक्तिहरूलाई सीमा इलाकाबाट उद्दार गरेको, ११६ वटा विपदका घटनाहरुमा परिचालित भएको साथै रक्तदान, सरसफाई, प्रतिक्षालय निर्माण र जनचेतनामूलक कार्यक्रमहरु मार्फत सामाजिक उत्तरदायित्व निर्वाह गरेको गणपति सशस्त्र प्रहरी उपरीक्षक केसीले बताए ।
महोत्तरी जिल्लाको शान्ति सुरक्षा, विपद् व्यवस्थापन सीमा व्यवस्थापनलगायतका जिम्मेवारी पाएको सशस्त्र प्रहरी बल, नेपाल नं ९ गण हेडक्वार्टर महोत्तरीले साेमबार १७ औं स्थापना दिवस मनाउन आयाेजना गरिएको कार्यक्रममा यस्ताे जानकारी गराइएकाे हाे ।
२०६४ साल वैशाख १७ गते सीमा सुरक्षा कार्यालय महोत्तरीको नामबाट जलेश्वर नगरपालिकाको खानेपानी कार्यालयमा स्थापना भएको कार्यालय २०६८ सालमा मटिहानी नगरपालिका वडा नं ९ जलसागरस्थित आफनै भवनमा सरेको थियो भने २०७५ सालबाट सशस्त्र प्रहरी बल, नेपाल नं ९ गण हेडक्वार्टर नामाकरण भई महोत्तरी जिल्लाको शान्ति सुरक्षा व्यवस्थापन, विपत व्यवस्थापन , सीमा सुरक्षा, लोकमार्ग सुरक्षा, हूल तथा दंगा व्यवस्थापन, रेलवे सुरक्षा, कारागार सुरक्षालगायतका जिम्मेवारीहरूमा परिचालित हुँदै आइरहेको छ ।
गणले १७ औं स्थापना दिवसको अवसरमा आयोजना गरेको खेलकुद , हाजिरी जवाफ तथा दौडमा प्रथम हुने सशस्त्र प्रहरी कर्मचारीहरुलाई मेडल तथा प्रमाणपत्र वितरण गरेका थिए । कार्यक्रममा डिआईजी दीपेन्द्र शाहले गण तथा मातहत कार्यालयमा उत्कृष्ठ कार्य गर्ने १६ जना सशस्त्र प्रहरी कर्मचारीहरुलाई प्रशंसा पत्र वितरण गरे । यसैगरी सशस्त्र प्रहरीको बोर्डर आउट पोष्ट निर्माणका लागि जग्गा उपलब्ध गराउन सहयोग गर्ने तीन जना व्यक्तिहरूलाई कदर पत्रद्वारा सम्मान गरिएकाे थियो । पूर्व सशस्त्र प्रहरीहरु समेत उपस्थित उक्त कार्यक्रममा यस आर्थिक वर्षमा अनिवार्य अवकास प्राप्त गरेका डिएसपी गणेश कुमार सिंहलाई कदर पत्रद्वारा सम्मान गरिएको थियो । गणमा कार्यरत कर्मचारीहरुले सांकृतिक कार्यक्रमहरु पनि प्रस्तुत गरेका थिए ।
कार्यक्रममा महोत्तरी जिल्लाका प्रमुख जिल्ला अधिकारी शिवराम गेलालले गणको स्थापना दिवसको शुभकामना दिँदै जिल्लाभर खटिएका सशस्त्र प्रहरीले शान्ति सुरक्षा कायम गर्न निर्वाह गरेको भूमिकाको प्रशंशा गरे । उनले केही वर्ष अगाडिसम्म सशस्त्र प्रहरीको युनिट स्थापना गर्न जग्गा नदिने सर्वसाधारणहरुले हाल सुरक्षाको महत्व बुझी ठाउँठाउँमा सशस्त्र प्रहरीको युनिट स्थापना हुनुपर्ने माग गरिरहेको बताए । सीमा इलाकामा हुने तस्करी नियन्त्रणमा अपेक्षित उपलब्धि हाँसिल गर्न जिल्लामा सशस्त्र प्रहरीको संख्या बढाउनुपर्ने पनि गेलालले बताए ।
कार्यक्रममा डिआईजी दीपेन्द्र शाहले गणको स्थापना दिवसको शुभकामना दिँदै नागरिकहरुको मानव अधिकारको सम्मान गर्दै कार्यक्षेत्रमा पूर्ण व्यवसायिक रूपमा परिचालित हुन मातहतका अधिकृत तथा जवानहरुलाई निर्देशन दिए । उनले सशस्त्र प्रहरी बल नं ९ गणलगायत मधेश प्रदेशका अन्य इकाईहरुको मेहनत तथा उच्च स्तरको कार्यसम्पादनका कारण नं २ छिन्नमस्ता बाहिनीलाई यस वर्षको उत्कृष्ट बहिनीको रूपमा प्रधान कार्यालयले पुरस्कृत गरेको बताए ।
सोमवार जलसागर स्थित गणको कार्यालयमा आयोजित बार्षिकोत्सव विशेष कार्यक्रममा गण तथा गण मातहतका कार्यालयमा उत्कृष्ट कार्य गर्ने सशस्त्र प्रहरीहरुलाई पुरस्कार तथा प्रशंसा पत्र प्रदान गरिएको थियो । सशस्त्र प्रहरी बल, नेपाल नं २ छिन्नमस्ता बाहिनी मुख्यालयका बाहिनीपति डिआईजी दीपेन्द्र शाहको प्रमुख आतिथ्यमा सम्पन्न भएको कार्यक्रममा जिल्ला समन्वय समिति महोत्तरीका प्रमुख सुमन लाल कर्ण, जलेश्वर नगरपालिका प्रमुख सुरेश शाह सोनार, मटिहानी नगरपालिकाका प्रमुख हरि प्रसाद मण्डल, महोत्तरीका प्रमुख जिल्ला अधिकारी शिवराम गेलालको समेत उपस्थिति रहेको थियो ।
जिल्लास्थित नेपाली सेना, नेपाल प्रहरी, राष्ट्रिय अनुसन्धान कार्यालय र भन्सार कार्यालयका प्रमुखहरुकाे उपस्थित रहेकाे कार्यक्रममा जलेश्वर उद्योग वाणिज्य संघ र नेपाल पत्रकार महासंघ , महोत्तरीका प्रनिनिधीहरुको पनि उपस्थिति रहेकाे गणका डीएसपी विकास अधिकारीले जानकारी दिए ।
मकवानपुर । ब्रह्मकुमारी राजयाेग सेवा केन्द्र मकवानपुरले स्वच्छ र स्वास्थ्य समाजकाे लागि आध्यात्मिक सशक्तिकरण अभियान सुरु गरेकाे छ । विश्वका १४० राष्ट्रमा शनिबार एकै दिन याे अभियान सुरु गरिएकाे हाे ।
हेटाैंडामा भएकाे क्षेत्रीय शुभारम्भ समाराेहमा बागमती प्रदेश सभा सदस्य प्रेमबहादुर पुलामीले आध्यात्मिक सशक्तिकरणबाट शान्ति संभव रहेकाे बताए । समाजमा हिजो एक अर्कोलाई सहयोग सद्भाव आदनप्रदान हुने तर आज हतियार बोकेर एक अर्कोलाई सिद्याउने प्रचलन बढेकाे सांसद पुलामीले बताए ।
‘चाहे जुनसकै धर्म र आस्थाको कारण लडाइ भएकाे होस्, त्यसले नाश मात्रै गरेको छ, पृथ्वी बचाउनको लागि हर सबैमा एकले अर्कोलाई सम्मान गर्ने आदतकाे अनिवार्यता छ’ पुलामीले भने । जन्म संयोग मात्रै भएकाे तर, समाजको लागि योगदान गर्न पाउनु साैभाग्य भएकाे उनले बताए । कार्यक्रममा हेटाैंडा ११ का वडा अध्यक्ष जुना दाहालले भाैतिक विकासमा मात्रै ध्यान नदिइ आध्यात्मिक सशक्तिकरणमा पनि लगानी आवश्यक भएकाे बताइन् । बालबालिकालाई सही संस्कार सिकाउन जरुरी रहेकोले व्यक्तिले आफू परिवर्तन भएर परिवारलाई सत्मार्गमा ल्याउनतर्फ लाग्नुपर्ने दाहालले बताइन् ।
पछिल्लाे समय मानवमा घमण्ड बढ्दाे र करुणा प्रेम घट्दो अवस्थामा रहेकाे मनकामना दुग्ध उत्पादन सहकारी संस्था अर्जुन दाहालले बताए । ‘सुख र शान्ति भनेकाे समृद्ध, प्रेम र सहकार्यमा छ, सुख पैसामा धनमा हैन, अन्तरमनमा छ’ दाहालले भने ‘आफूलाई बिर्सेर अरुलाई समर्पण गर्दा सुख छ, आनन्द पाइन्छ ।’ प्रेम बाड्न सकियो भने स्वस्थ्य रहन सकिने बताउँदै दाहालले भने ‘जस्ताे आहार उस्तै ब्यावाहार र बिचार हुन्छ, खानपानमा पनि व्यवहार परिवर्तन गरौं ।’

योग ध्यान प्राणायमले पनि शारीरिक र मानसिक स्वस्थ्य संभव भएकाे आयुर्वेद तथा बैकल्पिक चिकित्सालय कविराज निरीक्षक बिनोद शाहले बताए । मानव कल्याणको लागि अभियान सुरु भएकोमा आयुर्वेद तथा बैकल्पिक चिकित्सालय कविराज निरीक्षक शाहले खुसी ब्यक्ति गरे । आध्यात्मिक शक्ति सबै प्रकारको शक्तिको स्रोत भएको ब्रह्मकुमारी राज योग सेवा केन्द्र क्षेत्रीय संयोजक शुसिला दिदीले बताइन् । सबै मानव आत्माहरू आफू सुध्रिएर परिवारलाई सुधार गर्न तर्फ लाग्नुपर्ने उनले बताइन् । सकारात्मक चिन्तन नै विशेष सम्पत्ति भएको उनले बताइन् ।
समाजलाई प्रकृतिलाई योगदान गर्नको लागि याे अभियान शनिबारबाट विश्वभर सुरु भएको उनले बताइन् । सकारात्मक संकल्प राख्न अनुरोध गर्दै भनिन् ‘जे सोच राखेर काम गर्यो,नतिजा उहीँ नै हुन्छ, याे समय भनेकाे संकल्प सुधारको समय हो।’ सबैको राम्रो र भलो होस् भनेर सोच्नेको पनि सधै भलो तथा सकारात्मक नै हुने उनले बताइन् । विश्वको आत्माले नै सकारात्मक संकल्प गर्नुपर्ने र बुझेकाले नै अरुलाई बुझाउन यो अभियान थालिएको उनले बताइन् ।
कार्यक्रममा केन्द्रका प्रशिक्षक ब्रम्हकुमार विजयराजले स्वच्छ र स्वास्थ्य समाजकाे लागि आध्यात्मिक सशक्तिकरण अभियानकाे आवश्यकताबारे जानकारी गराएका थिए । आध्यात्मिक सशक्तिकरण ज्ञानकाे चार्जिङकाे रुपमा उनले प्रस्तुत गरे ।
आध्यात्मिक सशक्तीकरणले आत्मालाई सशक्त बनाउने, १४० राष्ट्रमा अभियान सुरु गरिएको केन्द्रका देवनारायण लामिछाने बताए । यसैगरी सेवा केन्द्रकाे प्रशिक्षक ब्रम्हकुमार मणिले बाहिरी स्वच्छता मात्रै भएर नहुने र यसकाे लागि आन्तरिक रुपले मानसिक स्वस्थ्य आवश्यक भएकाे बताए ।
मकवानपुर । नेपालका पुर्व प्रधानमन्त्री एवम् नेपाल कम्युनिस्ट पार्टी (एकीकृत समाजवादी) का केन्द्रीय अध्यक्ष माधव कुमार नेपालले लुटेरालाई नेता बन्ने छुट नभएको बताएका छन् ।
भ्रष्ट व्यक्ति नेता बन्नै नसक्ने र नेताले भ्रष्टाचार गर्नै नहुने व्याख्या गर्दै पुर्वप्रधानमन्त्री नेपालले यस्तो बताएका हुन् । “जनतालाई ठग्ने, लुट्ने हैन, नेताहरु लुटेरा भन्ने भाष्यलाई गलत सावित गर्न लागि पर्नोस्, समाजमा रावण मात्रै छैनन् राम पनि छन्” उनले भने “असल कार्यकर्ता असल सन्तान जन्माउन लागि परौ ।”
मकवानपुरमा पार्टी जिल्लाको ९ औ जिल्ला अधिवेशनलाई सम्बोधन गर्दै पूर्व प्रधानमन्त्री नेपालले यस्तो बताएका हुन् । एमालेबाट टुक्रेपछि समाजवादीले लिएको उद्देश्यलाई पुरा गर्न जनताको दैलोमा जान र गुनासाहरु सुन्न उनले कार्यकर्ताहरुलाई निर्देशन दिए ।
पार्टी फुटाएर आफूहरु अलग भएपछि विभिन्न आरोप प्रत्यारोप आएको तर आफूहरु कत्ति पनि विचल्लित नभई साँचो अभियानमा लागेकोले वर्तामान माहोल धेरै सकारात्मक भएको उनले बताए । उनले कार्यक्रममा सहभागीहरुलाई समेत आत्मा विश्वासका साथ अघि बढ्न प्रेरित गरे ।
“जनता समु जान, उनीहरुको गुनासा सुन्नमा ढिलाई नगर्नुहोस्, शंकटमा जनतालाई सहयोग सान्वना दिने मान्छे पाइन्न, समाजवादी त्यहा देखिनु पर्छ” उनले जिल्ला कार्यकर्तालाई लक्ष्यित गर्दै भने “चुनाव कसरी जित्ने हैन, प्रतिनिधि, मन्त्री र प्रधानमन्त्री कसरी बनिन्छ भन्ने पनि हैन जनताको सेवामा समर्पित हुने समाजवादीको उद्देश हो,सेवामा लाग्नुस्” उनले भने “राजनीतिमा लुटेरालाई ठाउँ छैन,कम्युनिस्ट भित्र कोहि छ भने ती कलंक हुन्, कारवाही गर्नुपर्छ ।”
आफूहरुले राजनीतिक गन्तव्यमा केही नबिराएको दाबि गर्दै उनले भने “नबिराउनु नडराउनु, हिम्मतका साथ अघि बढ्ने हो, इमानदारीताको साथ कर्तव्य पूरा गर्ने हो ।” उनले कार्यकतालाई पटक पटक जनताको सेवा र उत्थानमा लाग्न आग्रह गरे । नेकपा समाजवादी चुनौती सामना गर्न तयार रहेको बताउँदै उनले भने “सरकारमा जानू ठुलो कुरा हैन, एक वा दुई जना मात्रै गए पनि पुग्छ, चुनौती सामना गरेर, राम्रो काम गरेर उदाहणीय थिती बसाएर छाड्नुस् ।”
सामाजिक रुपमा जरो गडेर रहेको दलितमाथीको अत्याचार, महिला हिंसा, बालश्रम तथा बालविज्याइको विरुद्ध पार्टी उभिएको उनले बताए । यि सवालमा धेरै काम बांकी रहेको र योजनाबद्व रुपमा काम गर्नु आवश्यक भएको नेपालले बताए । सिमित बजेटबाट सन्तुलित विकासमा ध्यान दिनुपर्ने भएकोले सरकारको फेर बदलले आफूहरूलाई चिन्ता नभएको उनले बताए ।
कार्यक्रममा पार्टी उपमहासचिव तथा बागमती प्रदेश इन्चार्ज डा गंगालाल तुलाधरले युवा र महिलाको उपस्थिति रहर लाग्दो रहेकोमा खुसी व्यक्त गरे । समाजवादी संघीय संसदमा १० सिट भए पनि बलियो पार्टी भएको उनले बताए । उनले आगामी निर्वाचन २०८४ सम्म समाजवादी पार्टी एमालेभन्दा ठूलो हुने ठोकुवा गरे ।
कार्यक्रमा पार्टी बागमती प्रदेश सह इन्चार्ज ललितकुमार बस्नेतले एमालेबाट टुक्रेको खरानी भन्नेहरू अहिले समाजवादीको जमात देखेर अत्तालिन थालेको बताए । यसैगरी प्रदेश कमिटी अध्यक्ष साबित्रा भुसालले सत्ता सहकार्यमा रहदा भएको सहमति कार्यान्वयन नभएकोमा आक्रोश व्यक्त गरिन् । “हामी वामएकता चाहन्छौ, त्यसैले गठबन्धनमा गएका हौ, सहमतीको कार्यान्वयन नहुँदा हामी सधैं शान्त भएर रहदैनौं ।” जनजीवनको सवाल सम्बोधन गर्दै आत्मानिर्भर अर्थतन्त्र र समाजवादी ल्याउन पार्टी लागिपरेको उनले बताइन् ।
यसैगरी पार्टी स्थायी कमिटी सदस्य बिरोध खतिवडाले समाजवादी पार्टीले खरायोको गतिमा हैन कछुवाको गतिमा दौड जारी राखेको बताए । समाजवादी सबैभन्दा त्यागी पार्टी भएको उनले बताए । गठबन्धनमा भएको सहमति कार्यान्वयन नभएमा समाजवादीले पनि आÇनो क्षमता देखाउने उनले बताए ।
कार्यक्रममा बागमती प्रदेश संसदीय दलका नेता कृष्णप्रसाद खनालले पार्टी जनताको आधारभुत तहसम्म पुग्नुपर्ने भएकोले यसतर्फ ध्यानाकर्षित हुन आग्रह गरे । कार्यक्रममा पार्टी जिल्ला इन्चार्ज मुनु सिग्देल तथा जिल्ला अध्यक्ष बिष्णु दाहालले समाजवादी पार्टी सामाजिक हितका लागि जनताको साथमा रहेको बताए ।
कार्यक्रममा २०४६ को जनआन्दोलनको घाइतेहरू हेटौंडा ९ निवासी सीता बिडारी, हेटौंडा १७ का रामबहादुर भुजेल, हेटौंडा १७ राजदेबीका बिष्णुप्रसाद ढुंगाना, हेटौंडा १७ का कृष्णप्रसाद नेपाल, कम्युनिष्ट नेताहरु नेता भिम महर्जन तथा हरिप्रसाद सिग्देल र मकवानपुरका विभिन्न सन्चार गृहहरूलाई सम्मान गरिएको थियो ।
कार्यक्रममा नेपाली काँग्रेस, नेकपा माओवादीका नेताहरुले समेत शुभकामना दिएका थिए । भेलाले पार्टी जिल्ला कमिटीकाे नयाँ नेतृत्व चयन गर्नेछ ।
आँचलद्वारा सम्पादक दाहालसहित ९ जना स्रष्ट्रा सम्मानित
Tags: No Comments
मकवानपुर । मकवानपुरको हेटौंडामा रहेकाे महिलाहरुको साहित्यिक सस्था आंचल साहित्य कला पुञ्जले सहीखबरका सम्पादक सरिता दाहालसहित विभिन्न क्षेत्रका ९ जना स्रष्ट्रालाई सम्मानित गरेकाे छ । पुञ्जले शनिबार हेटौंडामा सम्मान बहस रचना वाचन तथा गायन प्रतियाेगिता कार्यक्रम आयाेजना गरी दाहाललगायतलाई सम्मानित गरेकाे हाे ।
ईश्वर लम्साल स्मृति पत्रकारिता सम्मान २०८० बाट सहीखबर डटकमकी सम्पादक मकवानपुरका दाहाल सम्मानित भएकी हुन् । उक्त सम्मानकाे राशी ७ हजार पाँच सय रुपैयाँ रहेकाे छ । दाहाल २ दशकदेखि मकवानपुरमा रहेर पत्रकारितामा क्रियाशील छिन् । आँचल साहित्य कला पुञ्ज मकवानपुरकी संस्थापक उपाध्यक्ष स्वर्गीय अप्सरा तिम्सिना लम्साल तथा प्रकाश लम्सालले आफ्नो ससुराबा/बुबाको नाममा स्थापना गरेका उक्त सम्मान एक लाख अक्षयकोषको व्याजबाट प्रत्येक वर्ष पत्रकारिताको क्षेत्रमा विशेष योगदान पुर्याउने व्यक्तिलाई प्रदान गरिदै आएकाे सापकाेटाले बताईन् ।
ईश्वर लम्साल स्मृति पत्रकारिता सम्मान
२०७५ सालमा कौशल पाण्डे, २०७६ मा नवराज शर्मा, २०७७ मा प्रताप विष्ट, २०७८ मा कृष्णराम परियार, २०७९ मा राममणी दाहाल सम्मानित
यसैगरी हरिवंश भेटवाल र बिजुला भेटवालले स्थापना गरेको बालकुमारी जगन्नाथ भेटवाल स्मृति साहित्य सम्मान २०८० बाट रौतहटकी स्रष्टा रेणुका जीसी सम्मानित भएकी छिन् । उक्त सम्मानको राशी १० हजार रुपैयाँ र सम्मानपत्र रहेको छ । १ लाख २५ हजारको अक्षयकोषबाट सुरु गरिएको यो सम्मान २०७४ सालमा स्थापना भएको हो । साहित्यमा कलम चलाउने नारी साहित्यकार यो सम्मानबाट सम्मानित गरिदै आइएकाे छ । यो सम्मान आँचलमा स्थापना भएको अक्षयकोष सहितको पहिलो सम्मान हो ।
बालकुमारी जगन्नाथ भेटवाल स्मृति साहित्य सम्मान
२०७४ प्रतिमा पाठक, २०७५ रुकु कार्की, २०७६ डा. विन्दु शर्मा, २०७७ ज्ञानु अधिकारी, २०७८ तिर्थदेवी सिलवाल, २०७९ बबि थापा सम्मानित
यसैगरी प्रतिभा धिताल छन्द सम्मान,२०८० बाट नुवाकोटकी साहित्यिक स्रष्टा सुमित्रा सुमी सम्मानित भएकी छिन् । उक्त सम्मानको राशी १० हजार रुपैयाँ रहेको छ । आँचल साहित्य कला पुञ्ज मकवानपुरकी संस्थापक अध्यक्ष मुना अर्यालले आफ्नी दिदी प्रतिभा धितालको नाममा २०७५ सालमा स्थापना गरेकाे उक्त सम्मान एक लाख अक्षयकोषको व्याजबाट प्रत्येक वर्ष छन्दमा कलम चलाउने नारी साहित्यकारलाई प्रदान गरिदै आइएकाे सापकाेटाले जानकारी दिइन् ।
प्रतिभा धिताल छन्द सम्मान
२०७५ मा बुनु लामिछाने, २०७६ मा प्रभा भट्टराई, २०७७ मा कृष्णदेवि शर्मा, २०७८ मा भुषिता वशिष्ठ, २०७९ टीका आत्रेय सम्मानित
टीकादत्त-मायादेवी-कुलकुमारी साहित्यिक सम्मान-२०८० बाट काठमाडौैकी स्रष्टा प्रभा बराल सम्मानित भएकी छिन् । उक्त सम्मानकाे राशी ११ हजार १ सय ११ रहेकाे छ । साहित्यकार रुकु कार्की तथा बहिनी प्रमिला शर्मा, अम्बिका उप्रेती, अन्जु उप्रतीले पिता तथा माताद्धयको नाममा १ लाख ५० हजारको अक्षयकोषसहित सुरुवात गरिएको यो सम्मान २०७६ सालमा स्थापना भएको हो ।
टीकादत्त-मायादेवी-कुलकुमारी साहित्यिक सम्मान
२०७६ मा ललिता दोषी, २०७७ मा निमेष निखिल, २०७८ मा देवराज खरेल, २०७९ मा माधव पोखरेल सम्मानित
यस्तै अप्सरा तिम्सिना लम्साल स्मृति साहित्य सम्मान-२०८० बाट नेत्र एटम (काठमाडौं) लाई सम्मानित गरिएकाे छ । अप्सरा स्मृति सम्मानको राशि १५ हजार एक रुपैयाँ रहेको छ । आँचल साहित्य कला पुञ्ज मकवानपुरकी संस्थापक उपाध्यक्ष स्वर्गीय अप्सरा तिम्सिनाको नाममा उनका मातापिता गजाधर तिम्सिना तथा यशोधरा तिम्सनाले १ लाख ९० हजार रुपैयाँको अक्षयकोषसहित सुरु गरिएकाे उक्त सम्मान साहित्यको क्षेत्रमा विशेष योगदान पुर्याउनु हुने व्यक्तिलाई प्रदान गरिने गरिएकाे हाे ।
अप्सरा तिम्सिना लम्साल स्मृति साहित्य सम्मान
२०७६ मा मकवानपुरका आरसी रिजाल, २०७७ काठमाडौंका लक्ष्मी माली, २०७८ मा चितवनका सरिता तिवारी, २०७९ मा माया ठकुरी सम्मानित
यसैगरी मंगलादेवि श्रेष्ठ बाल प्रतिभा सम्मान-२०८० बाट बालजागृति इङलिस स्कुलकी प्रसिद्धि लामिछाने सम्मानित भएकी छिन् । मकवानपुरका स्रष्टा लामिछानेलाई ३ हजार ५ सय रुपैयाकाे उक्त सम्मान प्रदान गरिने छ । शिक्षा सेवी देवप्रसाद श्रेष्ठले विद्यालय तहमा अध्ययनरत विशेष प्रतिभा भएका विद्यार्थीहरूलाई प्रदान गरिने गरी उक्त सम्मान स्थापना गरेका हुन् ।
मंगलादेवि श्रेष्ठ बाल प्रतिभा सम्मान
२०७७ मा अमर माविमा अध्ययनरत् प्रज्वल ढुंगाना, २०७८ मा बालजागृति इङलिस स्कुलका ऋत्विक केवि, २०७९ मा जीएस निकेतनका समर्पण न्यौपाने सम्मानित
यस्तै मुक्ति-तारा नवप्रतिभा सम्मान-२०८० बाट मकवानपुरकी स्रष्टा स्वस्तिका बाँनिया सम्मानित भइन् । ५ हजार रुपैया राशीकाे उक्त सम्मानकाे स्थापना २०७७ मा मुक्तिगाेविन्द वैद्य र तारादेवी वैद्यले गरेका हुन् ।
मुक्ति-तारा नवप्रतिभा सम्मान
२०७७ मा प्रसिद्धिका लम्साल, २०७८ मा प्रसन्ना चौलागाई, २०७९ मा कृतिका लौडारी सम्मानित
मकवानपुरका स्रष्टा दीपक गौतमलाई सुन्तलीमाया श्रेष्ठ युवा प्रतिभा सम्मान २०८० बाट सम्मानित गरिएकाे छ । १० हजार रुपैया राशी रहेकाे सम्मानकाे संस्थापक चन्द्रकिरण श्रेष्ठ र मेनुका शर्मा हुन् । समाजसेवी श्रेष्ठ र शर्माले २०७७ मा उक्त सम्मान स्थापना गरेकाे हुन् ।
सुन्तलीमाया श्रेष्ठ युवा प्रतिभा सम्मान
२०७७ मा सुवास खनाल, २०७८ मा छवी अनित्य, २०७९ मा बाँसुरी वाधक विष्णु बहादुर विश्वकर्मा सम्मानित
यस्तै आँचल सम्मान २०८० बाट हरिवंश भेटवाल सम्मानित भएका छन् । आँचल साहित्य कला पुञ्ज मकवानपुरले प्रदान गर्ने गरेको आँचल सम्मान २०८० मकवानपुरमा रहेर निरन्तर रुपमा साहित्य श्रीवृद्धिका लागि योगदान गर्ने सामाजिक व्यक्तित्व साहित्यसेवी भेटवाललाई प्रदान गरिएकाे हाे । संस्थाको अक्षयकोक्ष स्थापना गरेर सहयोग गर्नुका साथै आफूलेसमेत अक्षयकोष स्थापना गरेर आँचललाई संस्थागत गर्न सघाउ पुर्याउनु भएकाेमा भेटवालकाे कदर गर्दै उनलाई उक्त सम्मानद्वारा सम्मानित गरिएकाे सापाकाेटाले जानकारी दिइन् ।
पुञ्जले स्थापना गरेको ८ वटा पुरस्कार र एउटा सम्मानबाट विभिन्न क्षेत्रमा याेगदान गरेका ९ जना व्यक्तित्वलाई सम्मानित गरिएकाे पुञ्जकी अध्यक्ष सापकोटाले जानकारी दिइन् । आँचल साहित्य कला पुञ्ज मकवानपुरमा रहेको महिलाहरूको कृयाशील संस्था हो । २०६९ सालमा स्थापना भएको संस्थाले मकवानपुरमा रहेर विभिन्न साहित्यिक गतिविधिहरू सञ्चालन गर्दै आइरहेको छ ।
हरेक महिनाको तेस्रो शनिबार नियमित भेटघाटको कार्यक्रम अन्तर्गत महिलाहरू मात्र जम्मा भएर साहित्यिक गतिविधि सञ्चालन गर्दै आइरहेको यस संस्थाले वर्षमा चारओटा वृहत कार्यक्रम गर्दै आइरहेको छ । यस संस्थाले हरेक वर्ष ९ जना श्रष्टालाई फरक फरक सम्मान तथा पुरस्कार प्रदान गर्ने गरेको सापकाेटा बताउँछिन् ।
मकवानपुर । १४ बैशाख २०८१, मध्यान्ह १ बजेतिर एक जना ज्येष्ठ नागरिक बागमती प्रदेशको स्वास्थ्य मन्त्रालय पुगे । हतार र निराश देखिएका उनले स्वास्थ्य मन्त्री रामेश्वर श्रेष्ठसँग भेट्ने इच्छा प्रकट गरे । जनताका प्रतिनिधि हुन् मन्त्री, भेट्न नमिल्ने कुरै भएन । उनलाई अनुमती प्राप्त भयो, उनी मन्त्रीको कार्यकक्षमा पुगे । मन्त्री श्रेष्ठका सामु आफ्नो गुनासो राखेः “बुढेसकालमा उपचारको लागि सहज होला कि भनेर स्वास्थ्य बिमा गरेँ, बुढौली उमेर स्वास्थ्यमा केही समस्या केही छन्, उपचार सुविधा लिइरहनु पर्छ, तर जहिले पनि अस्पतालमा आयो कि दोस्रो दर्जाको नागरिकको व्यवहार हुन्छ, स्वास्थ्य जाँचदेखि औषधि लिनसम्म ‘बिमावाला’ भनेर हेपिन्छ, कति सहने, कहिलेसम्म सहने ।”
‘दोस्रो दर्जाको नागरिक’ यो शब्दले मन्त्री श्रेष्ठलाई भित्रभित्र बिज्यो, उनी तत्काल अस्पतालको अनुगमनमा निस्के । केही मिनेट भित्रै अस्पताल पुगे, जहाँ २ दिनदेखि फार्मेसीबाट औषधि नपाएर दुख खेपिरहेकाहरुको भीड थियो । मन्त्रीलाई भेटेर उनीहरुले आफ्नो दुखेसो पोखे, “जहिले सिस्टम चलेन भन्ने, बरु बिमा कार्यक्रम खारेजी गर्नुहोस्, हामीलाई ज्यूदै मार्ने काम नगर्नुहोस ।” अस्पतालका कर्मचारीको तिता व्यवहार÷बोलीले आफूहरु आजित भएको उनीहरुले बताए । अस्पतालले पर्याप्त पिउने पानी समेत उपलब्ध नगराएको, २ दिन देखि सिस्टम नचलेको भन्दै बिमाबाट औषधि नपाएको, कर्मचारीले नमिठो व्यवहार गरेको सेवाग्राहीहरुले गुनासो गरे ।
मदन भण्डारी स्वास्थ्य विज्ञान प्रतिष्ठान अन्र्तगतको हेटौंडा अस्पतालमा बागमती प्रदेशका स्वास्थ्य मन्त्री श्रेष्ठले अनुगमनपछि उनै ज्येष्ठ नागरिकले भने जस्तै पाएको प्रतिक्रिया दिए । ‘दोस्रो दर्जाको नागरिक’ बनाएको भन्ने गुनासो सुनेर बुझ्न आएको त्यसमा सत्यता रहेछ” मन्त्री श्रेष्ठले मिडियासँग भने “तत्काल केही सुधारको लागि निर्देशन दिएको छु ।” अस्पतालका निमित्त अस्पताल निर्देशक डा. श्रीधर अर्याललाई मन्त्री श्रेष्ठले स्वास्थ्यकर्मी तथा कर्मचारीको बोली, व्यवहार र अस्पतालको सेवा सुविधामा सुधारको लागि निर्देशन दिए ।
अनुगमन गर्दै मन्त्री श्रेष्ठले बिरामीको स्वास्थ्य अवस्था समेत बुझेका थिए । अस्पतालमा उपचारका क्रममा सर्वसाधारणहरुले राखेका अपेक्षालाई सम्बोधन गर्न मन्त्री श्रेष्ठले निर्देशन दिएका हुन् ।
अस्पतालमा आएका सबैको लागि पर्याप्त पिउने पानी, अपाङ्गामैत्री, महिलामैत्री शौचालयको व्यवस्था गर्न निर्देशन दिएका हुन् । बिरामीको उपचारका लागी ओपीडी बढाएर भए पनि स्वास्थ्य सेवालाई प्रभावकारी बनाउन उनले निर्देशन गरे ।
मन्त्री श्रेष्ठले हेटौंडा अस्पतालको स्तोरोन्नतिका लागी आवश्यक भौतिक संरचना तथा स्वास्थ्य उपकरणको अवस्था बारे जानकारी लिएका थिए । उनले अस्पतालको जनरल वार्ड, ईमरजेन्सी, सर्जिकल वार्ड, प्रसुती वार्ड, अप्रेसन थिएटर, आईसीयू, एचडीयूलगायत विभिन्न कक्षको अनुगमन गरे । हेटौंडा अस्पतालमा ईमरजेन्सी र ओपीडीमा दैनिक औषत एकहजार ३०० जनाले सेवा लिने गरेका छन् ।
“जनताको करबाट तलब खाएका कर्मचारीले उनै जनतालाई सेवामा विभेद गरेको कसरी सहने” मन्त्री श्रेष्ठले निमित्त अस्पताल निर्देशक अर्याललाई भने “अबको ३ देखि ५ दिनभित्र ९० प्रतिशत समस्या सम्बोधन गरेर देखाउनुहोस् ।” बिमाबाट पाइने औषधिबारे बोर्ड नै बनाएर सूचित गर्न मन्त्री श्रेष्ठले निर्देशन दिएका छन् । “फार्मेसीमा औषधिको अभाव भन्ने शब्द सुन्नै चाहन्न”, मन्त्री श्रेष्ठले भने “अभाव हुन किन दिने, व्यवस्थापन त अस्पतालले गर्ने हो बिरामीलाई दुख किन दिने ?”
जनशक्ति अभाव भए थपेर पनि समस्या सम्बोधन गर्न उनले सुझाव दिए । कार्ययोजना बनाएर अस्पताल सुधारमा लाग्न उनले आग्रह गरेका छन् । “अब केही दिनभित्र मन्त्री हैन सेवाग्राही बनेर म आउँछु, अनि हेर्छु अस्पतालको अवस्था” उनले भने । डा अर्यालले आगामी दिनमा बिरामीले उपचारका क्रममा कुनै पनि सास्ति खेप्नु नपर्ने गरी सेवा सञ्चालन गर्ने प्रतिवद्धता व्यक्त गरेका छन् ।