मकवानपुर । निषेधाज्ञा उल्लंघन गरी व्यापार गरेकाे भन्दै जिल्ला प्रशासन कार्यालय मकवानपुरले व्यापारीहरूलाई कारबाही गरेकाे छ । निषेधाज्ञामा व्यापार गरेकाे भन्दै प्रशासनले व्यापारीलाई कारबाही गरेकाे हाे ।
प्रशासन कार्यालका अनुसार हार्डवेयर पसल सञ्चालन गर्ने हेटौडा-४ का दिपेश खड्गी, कपडा पसल सञ्चालन गर्ने हेटौडा-२ का विक्रम चौलागाई र मोबाईल पसल सञ्चालन गर्ने हेटौडा-२ का यसेस रिजाललाई २/२ हजार जरिवाना गरिएको ताेकेकाे छ ।
यसैगरी निषेधाज्ञा उल्लंघन गरी सवारी साधन सञ्चालन गर्ने १ ट्याम्पो सहित २ सवारी साधनलाई ५ हजार जरिवाना गरिएको छ । यसैगरी निषेधाज्ञा उल्लंघन गर्ने १३ वटा सवारी साधनको कागजपत्र नियन्त्रणमा लिइएको प्रशासनले विज्ञप्तिमार्फत जनाएकाे छ।यसैगरी मास्क नलगाई हिंडडुल गर्ने १ जनालाई १ सय जरिवाना गरिएको छ ।
यसै बिच, जिल्ला प्रहरी कार्यालय मकवानपुरले बुधबार बिभिन्न स्थानमा राखेको चेकप्वाईन्टमा निषेधाज्ञा उल्लङ्घन गर्ने मोटरसाइकल, स्कुटर, अटो गरी २१ वटा सवारीसाधन नियन्त्रणमा लिएकाे छ । यस्तै ६४ वटा सवारीको कागजपत्र नियन्त्रणमा लिईएकोमा कोभिड- १९ संकट व्यवस्थापन अध्यादेश, २०७८ बमोजिम २१ वटा सवारी साधनलाई जनही २ हजारदेखी ५ हजारका दरले कारवाही गरिएको प्रहरीले जनाएकाे छ ।

- अर्पण योन्जन (पारिजात)
नौ, महिना गर्भमा राखेर
तिमीले जन्माएपछी
कन्दामुल र भ्याकुरको साहारामा
आफ्नो अस्तित्व बचाएर
तिम्रो लाम्टा परेका छाती चुसाएर
तिम्रो धोती च्यातेर
हिउँदको सिरेटो
र, बर्खाको चिसो छलेर
तिम्रो चाउरी परेको गालाहरुले
ममताको मोइ खादै
पाखा, भित्ता, कन्दरा र जंगलमा
शरिरमा एउटा चोट नलगाइ
राउटेकी राजकुमारी बनाएर
खेल्दै हुर्काएकी मलाइ
आज,
म लुटिएको छु आमा
घानको मकै झै भुटिएको छु
ती अर्कै दुनियाँ को मान्छेबाट
हो आमा
म आज तिनै नरपिसाचहरुबाट
छलछाम र कपट गरेर
बलात्कृत भएको छु,
फुल झै मेरो जोबन
पापीहरुबाट चुटिएको छु
जोड्न नसकिने सिसा झै,
टुक्राटुक्रा भएर चोइटिएको छु ।
हो आमा
ती पापिहरुले नसा पिलाएर
ती अर्कै दुनियाँको मान्छेबाट
म आज बलात्कृत भएको छु ।
हो आमा ।
तिम्रो जस्तो निश्चल
र, तिम्रो जस्तो निस्वार्थ प्रेम
अरुकसैको नहुने रहेछ
किनकी आमा
तिमीले जन्माएर हुर्काएदेखि
बन जंगल र पाखा भित्तामा
नाचेर हुर्किएकी म
बाहिरी दुनियाँ नदेखी
ऐनाले नदेखेको मलाइ
अचनाक म हराएको रात
शहरमा क्यामेराले देखेछ आमा
र, गुडिया बनाएर नचाइ
क्यामेराबाट सुरुभएको
मेरो मुस्कान
आज क्यामेराबाटै अन्त्य भो आमा ।
हो आमा,
ती निस्ठुरी शहरका मान्छेहरुबाट
म आज बलात्कृत भएको छु ।
साँच्चै आमा
यो शहर पापी छ,
दुनियाँको दुनियाँसंङ्ग
बेमतबी छ
दुई बर्से नाबलकदेखि
नब्बे बर्सकी बृद्धसम्म
बलात्कार हुन्छ ।
त्यसैले तिमी शहर न आउनु है आमा
नत्र तिमी पनि बलात्कृत हुनेछौ
साँच्चै आमा
शहरमा देखिएको, झिलिमिली जस्तो
रंगिन मनहरु रहेनछन
यहाँको मान्छेहरुको
र,त आज म
ती अर्कै दुनियाँको मान्छेबाट
शहरका ती नरपशु हरुबट
बलात्कृत भएको छु
अब कहिलै हाँस्न नसक्ने गरी
पटक पटक बलात्कृत भए आमा
हो, पटकपटक
बलात्कृत भए ।।।
२५ जेठ २०७८,
इटहरी–२०, हाल साउदी अरेबिया
मकवानपुर । हिमाल मुटु अस्पताल काठमाडौंले मकवानपुरको राक्सिराङ गाउँपालिकालाई ५ थान अक्सिजन कन्सन्ट्रेटर सहयोग गरेको छ ।
नेपाली कांग्रेसकी केन्द्रिय सदस्य महालक्ष्मी उपाध्याय डिना र नेपाली कांग्रेस बागमती प्रदेश संसदीय दलका नेता एवं कांग्रेस मकवानपुरका सभापति ईन्द्रबहादुर बानियाँको पहलमा अस्पतालले गाउँपालिकालाई ५ थान कन्सन्ट्रेटर बुधबार उपलब्ध गराएको हो ।
हिमाल मुटुको सहयोगमा हेटौंडा उपमहानगरपालिका ६ मा निर्माणाधिन सिद्धस्थली रुलर कम्युनिटि अस्पतालको प्राङगणमा उक्त कन्सन्ट्रेटर नेताद्वय डिना र बानियाँले राक्सिराङ गाउँपालिकाका अध्यक्ष राजकुमार मल्ललाई हस्तान्तरण गरेका हुन् ।
कार्यक्रममा गाउँपालिकाका अध्यक्ष मल्लले अक्सिजन कन्सन्ट्रेटर बुझ्दै मकवानपुरको विकट राक्सिराङमा गरिब तामाङ र लोपोन्मुख चेपाङ, प्रजाको बसोबास रहेकोले कोरोना महामारीमा धेरै नै राहात पुग्ने बताए । उनले सहयोग गर्ने हिमाल मुटु र पहल गरिदिनुहुने नेताद्वयलाई विशेष आभार समेत प्रकट गरेका थिए ।
हेटौंडा ६ का वडा अध्यक्ष अर्जुन चौलागाईको अध्यक्षतामा भएको हस्तान्तरण कार्यक्रममा कांग्रेस हेटौंडा उपमहानगर सभापति आनन्दराम पराजुली, हिमाल मुट अस्पतालकी अध्यक्ष गोमा गौतम, डाक्टर अमन गौतम, सहयोगी मन नेपालका अध्यक्ष केदार चौलागाई, सचिव दीपक तिवारी, कांग्रेसका महाधिबेशन प्रतिनिधि ईश्वर पण्डित, महिला संघ जिल्ला सचिव निलम देवकोटा, दिव्यतारा बहुउद्देश्यीय सहकारीका व्यवस्थापक रमेश कोइराला लगायतको उपस्थिती रहेको थियो ।
मकवानपुर/ सिद्धार्थ शिशुसदन हेटौंडाबाट २०५४ सालमा प्रवेशिका परीक्षा दिएका विद्यार्थीहरुको समूह (पहल) ले कोरोना भाइरसको महामारीमा समस्यामा परेकाहरुलाई सहयोग गरेको छ।
माइती नेपाल मकवानपुरको समन्वयमा पहलले एकल महिला, ज्येष्ठ नागरिक, तथा कमजोर आर्थिक अवस्था भएका २८ घर परिवारलाई दाल, चामललगायत खाद्यान्न सामग्री सहयोग गरेको माइती नेपाल मकवानपुर प्रमुख माया लामाले बताइन् । महामारीको समयमा समस्यामा परेकाहरुलाई केही राहत होस् भनेर आफूहरुले जमर्को गरेको पहलका टिम कोअर्डिनेटर जावेद हुसेनले बताए ।
खाद्यान्न वितरण कार्यक्रममा पहलका सदस्यहरु मनिल श्रेष्ठ, लिलु मगर, आनन्द अग्रवाल, माइती नेपाल मकवानपुरकी मन लामाको समेत सहभागिता रहेको थियो । माइती नेपाल मकवानपुरले महामारीको समयमा समस्यामा परेका वर्गहरुलाई विभिन्न संघसंस्थाहरुको समन्वयमा खाद्यन्न सहयोग गर्दै आएको लामाले बताइन् ।
मकवानपुर । मकवानपुर प्रहरीले हेटाैडाबाट तास खेल्दै गरेका ५ जनालाई मंगलबार पक्राउ गरेको छ । हेटौंडा उपमहानगरपालिका वडा नं.४ बैकरोडस्थित रुस्तम कोईरालाको डेरा कोठामा जुवा खेलिरहेको अवस्थामा नगद २८ हजार सहित ५ जनालाई पक्राउ गरिएको जिल्ला प्रहरी कार्यालय मकवानपुरले जनाएकाे छ ।
पक्राउ पर्नेहरुमा ४० वर्षीय कोईराला सहित डेरामै बस्ने ५४ वर्षीय अमर प्रधान,४० वर्षीय प्रकाश मानान्धर,३३ वर्षीय बिनोद घर्ती र चितवन भरतपुर महानगरपालिका वडा नंबर ६ बस्ने ४४ वर्षीय सुरेश पौडेल रहेको जिल्ला प्रहरी कार्यलय मकवानपुरका प्रवक्ता जयश्वर रिमालले जनाएको छ ।
विशेष सूचनाको आधारमा प्रहरीले जुवा खेलिरहेको अवस्थामा उनिहरुलाई पक्राउ रिमालले बताए । प्रहरीले उनीहरुलाई म्याथ थप गरी कारवाहीको प्रक्रिया अगाडी बढाईएको जनाएको छ।