मकवानपुर । स्वास्थ्य मन्त्री बिरोध खतिवडाले हेटौंडा अस्पतालको अवलोकन तथा निरीक्षण गरेका छन् । मकवानपुरको १ मात्र सरकारी अस्पताल हेटौंडा अस्पतालको उनले निरीक्षण गरेका हुन् । सोमबार मन्त्री खतिवडाले मदन भण्डारी स्वास्थ्य विज्ञान प्रतिष्ठानद्वारा संचालित हेटौंडा अस्पतालको आइसियू कक्ष, कोभिड–१९ वार्डको समेत स्थलगत निरीक्षण गरेका हुन् ।
मन्त्री खतिवडालाई अस्पतालका प्रमुख मेडिकल सुपरिटेण्डेण्ड डा राचन्द्र सापकोटाले अस्पतालको बिषयमा जानकारी गराएका थिए । निरीक्षण पछी अस्पतालको सुधारका लागि आफुले सहयोग गर्न तयार रहेको मन्त्री खतिवडाले बताए ।
नेकपा एकिकृत समाजवादीकाे चियापान तथा शुभकामना कार्यक्रमकाे लागि गृह जिल्ला मकवानपुर आएका मन्त्री खतिवडाले ‘विगतको पार्टीमा जनताले विश्वास गरेर निर्वाचित गर्दा पनि ठूला भन्नेहरुले पेल्ने र ठेल्ने काम गरेको बताए ।’ जनताको मत र पार्टीको निर्देशनलाई आत्मसाथ गरेर काम गर्ने उनले बताएका छन् ।
यस्तै मन्त्री खतिवडालाई सोमबार हेटौंडामा मकवानपुरका २१ वटा क्रियाशील संस्थाले स्वागत एवम् सम्मान गरेको छ । मकवानपुरको विकासमा महत्वपूर्ण योगदान पु¥यएको भन्दै ती संस्थाहरुले संयुक्त कार्यक्रम आयोजना गर्दै मन्त्री खतिवडालाई स्वागत एवम् सम्मान गरेको हो ।
उक्त कार्यक्रममा मन्त्री खतिवडाले समग्र देशको स्वास्थ्य क्षेत्रको विकास सरकारको प्राथमिकतामा रहेको बताए । उनले मकवानपुर मात्र नभइ देशभरको ७७ वटै जिल्लाको स्वास्थ्य क्षेत्रको विकास आफ्नो जिम्मेवारी भएको बताए । उनले कोरोनाका कारण बालबालिकाहरु निकै नै जोखिम रहेकाले आगामी केही समयमा नै बालबालिकाहरुका लागि कोरोनाविरुद्धको खोपको व्यवस्था गर्ने गरी सरकारले काम गरिहेको जानकारी दिए । उनले बालबालिकाका लागि कोरोना विरुद्धको ४० लाख डोज खोप सम्झौता भइसकेको र थप ६० लाख डोज खोप भित्राउने प्रक्रिया जारी रहेको बताए ।
मकवानपुर /बागमती प्रदेशको मुख्यमन्त्री अष्टलक्ष्मी शाक्यले प्रदेशको नवौं अधिवेशनमा विश्वासको मतको प्रस्ताव पेश गरेकी छिन् । मुख्यमन्त्री शाक्यको विश्वासको मतको लागि आगामी ४ कात्तिकका प्रदेश सभा बैठक बस्ने भएको छ ।
प्रदेश सरकारले २४ असोजमा बोलाएको प्रदेश सभाको नवौं अधिवेशन मुख्यमन्त्री शाक्यले विश्वासको मतको प्रस्ताव पेश गरेपछि सदन ४ कात्तिक दिउँसो १ बजेसम्मको लागि बैठक स्थागित गरिएको सभामुख सानुकुमार श्रेष्ठले बताए । प्रदेशसभाको बैठकमा मुख्यमन्त्री शाक्यले आजै विश्वासको मत लिने सम्भावना प्रवल रहेको चर्चा हुदै गर्दा सदन स्थागित भएको थियो ।
एमाले विभाजन भएसँगै बागमती प्रदेशकी मुख्यमन्त्री अष्टलक्ष्मी शाक्य अल्पमतमा परेकी छन् । एमालेका १३ सांसदले विभाजनपछि नेकपा एकीकृत समाजवादी पार्टी रोजेपछि शाक्यले विश्वासको मत दिन लागेकी हुन् ।
बागमती प्रदेशसभा कुल ११० सदस्यहरु मध्ये हाल १०९ सांसदहरु रहेका छन् । जसमा एमालेमा ४३, कांग्रेसमा २२, माओवादीमा २३, समाजवादीमा १३, विवेकशील साझामा ३, नेमकिपामा २, राप्रपामा २ र स्वतन्त्र सांसद एक जना छन् ।
नेपालको संविधानको धारा १८८ (२) अनुसार शाक्यले विश्वासको मतको लागि सदनमा प्रस्ताव पेश गरेकी हुन् । २४ असोजमा बसेको प्रदेश सभाको दास्रो बैठक मुख्यमन्त्री शाक्यले विश्वासको मतको लागि प्रस्ताव पेश गरेपछि ७ मिनेटमै स्थागित गरिएको थियो ।
मकवानपुर । साहित्य संगम मकवानपुरले शुभकामना आदानप्रदान तथा रचना वाचन कार्यक्रम गरेकाे छ । संगम मकवानपुरले शनिबार हेटौंडा—४ मा रहेको साहित्य संगमकाे भवनमा बडादशै, तिहार तथा छठपर्वको अवसरमा शुभकामना आदानप्रदान तथा रचना वाचन कार्यक्रम गरेको हाे ।
साहित्य संगम मकवानपुरका अध्यक्ष अनिता न्यौपानेको सभाध्यक्षतामा भएकाे कार्यक्रममा सामाजिक विकास राज्यमन्त्री जुनेली श्रेष्ठको प्रमुख अतिथ्यता रहेको थियो । कार्यक्रममा सहभागीहरुले शुभकामना आदानप्रदान गर्नुका साथै मुक्तक, गजल र कविता वाचन गरेका थिए ।
कार्यक्रममा पूर्वअध्यक्ष निमेष निखिल, झरना साहित्यिक परिवार मकवानपुरका अध्यक्ष दीपक गौतम, संगमकै पूर्व अध्यक्ष सुवास खनाल, सिस्नुपानी नेपाल मकवानपुरका अध्यक्ष राजकुमार लामिछाने, गजल मञ्ज मकवानपुरका अध्यक्ष देवराज तिवारी, मुक्तिगोविन्द बैद्य, तुल्सी घिमिरे,जेसीआई हेटौंडा लेडीका अध्यक्ष प्रतिमा श्रेष्ठ, संगमका उपाध्यक्ष सानु खनाल, विश्वनाथ संजेल, सचिव डीबी बर्तौला, मसन उपासक लगायतको उपस्थिति थियो ।
मकवानपुर । ‘स्मृति बिम्बमा श्यामप्रसाद’ पुस्तक लोकार्पण गरिएकाे छ । राजनीतिक, साहित्य र पत्रकारिता क्षेत्रमा योगदान पुर्याउएका मकवानपुरका श्यामप्रसाद शर्माको स्मृतिमा विभिन्न व्यक्तित्वले लेखेकाे रचनाहरुको संगालो ‘स्मृति बिम्बमा श्यामप्रसाद’ पुस्तकको शनिबार लोकार्पण गरिएकाे हाे ।
श्यामप्रसाद शर्मा स्मृति प्रतिष्ठान नेपालले प्रकाशन गरेको पुस्तक बागमती प्रदेश सभाका सभामुख सानुकुमार श्रेष्ठ तथा राजनीतिक एवम् सामाजिक व्यक्तित्वले शनिबार हेटौंडामा लोकार्पण गरेका हुन् ।
श्यामप्रसाद शर्मा स्मृति प्रतिष्ठान नेपालका अध्यक्ष कौशल पाण्डेको अध्यक्षतामा भएको पुस्तक लोकार्पण समारोहमा श्यामप्रसाद शर्माको व्यक्तित्वका विषयमा सर्जक सञ्जाल मकवानपुरका अध्यक्ष निमेष निखिलले जानकारी गराएका थिए । प्राध्यापक घनश्याम घिमिरेले समीक्षात्मक टिप्पणी गरेकाे पुस्तक ६६ जना व्यक्तिका रचना संगालोको रुपमा प्रकाशित भएको छ ।
पुस्तक लोकार्पण कार्यक्रममा राजनीतिकर्मी बद्रिप्रसाद खतिवडा, केदार न्यौपाने, बागमती प्रदेश सभा सदस्य प्रेमबहादुर पुलामी, मुनु सिग्देल, ओमबहादुर ग्लानसहित साहित्यकार, राजनीतिकर्मीको उपस्थिति रहेको थियो ।
बि.सं. १९८६ मा मकवानपुरको मन्थली, सोलीथुममा जन्मनुभएका श्यामप्रसाद शर्माको २०७४ साल बैशाख २४ गते निधन भएको थियो ।
मकवानपुर । बागमती प्रदेश सामाजिक विकास राज्यमन्त्री जुनेली श्रेष्ठले गैर सरकारी संस्थाहरूले सामाजिक सेवाको उद्देश्य राखेर काम गर्दा अवसर प्रर्याप्त भएको बताएकी छन् । पहिले सामाजिक क्षेत्रमा काम गर्दा चुनौती र संघर्ष भए पनि हाल सेवा भावले काम गर्दा अवसर धेरै भएको उनले बताइन् ।
नारी सीप सृजना केन्द्र २५ औं साधारणसभा, ११ औं अधिवेशन तथा सामाजिक परीक्षणमा उनले भनिन् ‘समितिको नेतृत्वमा चयन हुन चाहने तर काममा दुख गर्न नचाहने व्यक्तिले संस्थाको हित गर्न सक्दैन ।’ नारी सिप सिर्जना केन्द्रको गरिमालाई कायम राख्दै संस्थागत विकास र कार्यक्षेत्रमा लागि परिरहन उनले आग्रह गरिन ।
कार्यक्रम केन्द्रको संस्थापक अध्यक्ष तथा राष्ट्रिय समाबेशी आयोग कार्यबाहक अध्यक्ष बिष्णु ओझाले संविधानको मुल मर्म अनुसार समाबेशीता र संघीयतालाई सम्बोधन गर्ने काममा समाबेशी आयोगले काम गर्दै आएको बताउँदै गैससहरूको योगदान पनि यही क्षेत्रमा रहने बताइन् । “सम्पन्न वर्गलाई छोडेर बिपन्न बर्गको लागि हामीले काम गर्नुपर्छ” उनले भनिन् । जात र लिङ्ग मात्रै हैन वर्गको उत्थानमा लाग्नुपर्ने ओझाले बताइन् ।

मनहरी गाउंपालिका उपाध्यक्ष मनिला बिष्ट, हेटौंडा ४ का वडा अध्यक्ष नवीन सिग्देल, हेटौंडा उपमहानगरपालिका योजना शाखा प्रमुख भीमप्रसाद तिमल्सिना, गैसस बागमती प्रदेश उपाध्यक्ष आरती पाठक, माइती नेपाल मकवानपुर प्रमुख माया लामालगायतले सामाजिक विकासको पाटोमा केन्द्रको योगदान रहेको बताएका थिए ।
सामाजिक परिक्षण कार्यक्रममा गैससहरूलाई ठगिखाने निकायको रूपमा लिने गरेको र गैससकर्मीहरूलाई अपमानित व्यवहार गर्ने गरेकोले पीडाबोध भएको गैससकर्मीहरूले गुनासो गरेका थिए । केन्द्रको अध्यक्ष सरस्वती बर्तौलाको अध्यक्षतामा कार्यक्रम भएको थियो ।

कार्यक्रममा अध्यक्ष बर्तौलाले आर्थिक पाटो पारदर्शी गर्दै सामाजिक काम गर्नमा नारी सीप सफल रहेको बताइन् । कोरोना महामारीको कारण संस्थाले अपेक्षित काम गर्ने अझै नसकेको बर्तौलाले बताइन्। कार्यक्रम केन्द्रका कार्यकारी निर्देशक चिरञ्जीवी पौडेलले संस्थागत प्रतिवेदन र कोषाध्यक्ष रेणु गुरुङले आर्थिक प्रतिवेदन प्रस्तुत गरेका थिए ।