मकवानपुर । निर्वाचन आयोगले २३ मंसिरबाट मतदाता नामावलीमा नाम दर्ता गर्ने काम सुरु गर्ने भएकाे छ । देशभरका सबै प्रदेश तथा जिल्ला निर्वाचन कार्यायलयबाट मतदाता नामावली सुरु गर्ने आयोगले निर्णय गरेकाे हाे ।
आयोगकी प्रवक्ता नीता पोखरेल अर्यालद्वारा जारी विज्ञप्ति २३ मंसिरबाट मतदाता नामावली दर्ताको काम सुरु हुने उल्लेख छ । यसअघि गत १६ मंसिरमा सम्पन्न उपनिर्वाचन प्रयोजनका लागि मतदाता नामावली दर्ता गर्ने काम स्थगित गरिएको थियो ।
निर्वाचन सम्पन्न भइ परिणाम समेत प्राप्त भएकाले नियमित नामावली दर्ता तथा अद्यावधिक कार्य २३ मंसिरबाट सुचारु गरिने आयोगले जनाएको छ ।

