शुष्मा थापा
मनका कुरा पोख्न मन बाल्नु पर्छ ।
एउटा मैनबत्ती झै मन पगाल्नु पर्छ ।
सल्किनु पर्छ,जल्नु पर्छ प्रकाश दिन
मन बुझ्ने भए मन खोल्न थाल्नु पर्छ ।
तर कहाँ भेटिन्छ र?मन खाने मान्छे
मनका कुरा मन मै छोपी सगाल्नुपर्छ ।
यथार्थ बुझ्ने अब कथा कहानी मै रहे
विचार गरी गरी पाइला चाल्नु पर्छ ।
अन्यथा सोचको बिगी बिगी चौतर्फी
आफैले आफैलाइ जे जसरी सम्हाल्नुपर्छ ।
सोचको खोच बनाउछन् फुर्सदमा सबै
बन्धन पन्छाएर नयाँ मोडमा ढाल्नुपर्छ ।
कसको कसलाइ परवाह यो भीडमा
आफ्नो मनलाइ आफ्नै हातले टाल्नुपर्छ ।
पोखरा

