धादिङ । बागमती प्रदेश प्रमुख दिपक प्रसाद देवकोटाले साहित्य मानव समाजको ऐना भएकोले न्याय, चेतना परिवर्तन र रुपान्तरणको उत्प्रेरणा भएको बताउनुभएको छ ।
शुक्रबार धादिङबेसीमा बागमती प्रदेश स्तरीय पहिलो साहित्य महोत्सबको उद्घाटन गर्दै देवकोटाले साहित्य र कला, खुसी र समृद्ध जीवनको आधार भएको उल्लेख गर्दै मानव मानवबीचका द्वन्दहरु घटाएर प्रेम, मानवता, एकता र सौहार्दताको बीजारोपण गर्ने महत्वपूर्ण विधा भएको बताउनुभएको छ । साहित्य मानव मस्तिष्कको उपजको रुपमा उल्लेख गर्दै प्रदेश प्रमुख देवकोटाले साहित्य लेखनमात्र नभएर भावना, संवेदनासमेत भएको बताउनुभयो । साहित्यले कला, संस्कृति, मूल्य, मान्यता र सभ्यतालाई छर्लङ्ग पार्ने उहाँको भनाइ छ ।
कला र साहित्य मौन रहेर होईन, बोलचाल र प्रस्तुतिमा हुनुपर्ने बताउँदै इतिहासका कालखण्डमा साहित्यको योगदानलाई बिर्सनु नहुने स्पष्ट पार्नुभयो । राणाबिरोधी आन्दोलन, पञ्चायतबिरोधी होस् वा निरंकुशता बिरुद्धका आन्दोलनहरुमा साहित्यिक कलमले चेतना, जागरुकता र आन्दोलनको आँधीबेहरी सृजना गरेको समेत समरण गराउनुभएको छ ।
बागमती प्रदेश सरकार संस्कृति तथा पर्यटन मन्त्रालयको आयोजना र नीलकण्ठ प्रज्ञा प्रतिष्ठान र नीलकण्ठ नगरपालिका सहआयोजक भइ स्थानीय स्तरमा सामाजिक संघसंस्थाहरुको सहजीकरणमा दुई दिने बागमति प्रदेश स्तरीय साहित्य महोत्सबको शुक्रबार धादिङबेसीमा उद्घागन गरिएको हो । बागमती प्रदेश सरकार संस्कृति तथा पर्यटन मन्त्री विमल ठकुरीको अध्यक्षतामा भएको उद्घाटन समारोहमा संघीयसरकारका कृषि तथा पशुपंक्षि विकास मन्त्री रामनाथ अधिकारीले शुभकामना व्यक्त गर्दै साहित्यले सम्राटहरुलाई समेत नाङ्गो पार्ने शक्ति हुने भएकोले सहत्यको संरक्षण र प्रवर्धनमा सघाउने बताउनुभयो ।

बागमती प्रदेश नेपाली काँग्रेस संसदीय दलका नेता गोबिन्द लम्साल, नीलकण्ठ नगरपालिकाका प्रमुख भीमप्रसाद ढुंगाना, प्रमुख जिल्ला अधिकारी सुमन घिमिरे, नेपाल पत्रकार महासंघका अध्यक्ष सीताराम अधिकारी, नीलकण्ठ प्रज्ञा प्रतिष्ठानका अध्यक्ष बद्री दहाल, नीलकण्ठ बालमन्दिर मावि व्यवस्थापन समितिका अध्यक्ष दिपक कोइराला, महोत्सव व्यवस्थापन तथा सहजीकरण समितिका अध्यक्ष विष्णु आचार्य, लगायतले भाषा, साहित्य कला, संस्कृतिको जगेर्ना गर्न प्रदेश सरकारले विधागत रुपमा सघाउनु पर्ने र स्थानीय सरकारले समेत लगानी गरेर पठन र अध्यायन संस्कृतिको विकासमा योगदान गर्नुपर्ने बताउनुभएको छ ।
धादिङबेसी पुछारबजारबाट तामाङ, नेवारलगायतका संस्कृतिक झाँकी सहितको र्यालीले बजार परिक्रमा गरेको थियो ।
मकवानपुर । भीम विराग सङ्गीत साहित्य कला प्रतिष्ठान नेपालले एकै मञ्चमा ११ जना व्यक्तित्वलाई सम्मान गर्ने भएकाे छ । गत वर्ष स्थापना गरेकाे तथा विगत वर्षदेखि नै प्रदान गर्दै आएका समेत गरी विविध विधाका ११ जना व्यक्तित्वलाई हेटौंडामा प्रतिष्ठानले सम्मानित गर्ने भएकाे हाे ।
प्रतिष्ठानले बुधबार हेटौंडामा पत्रकार भेटघाट गरी २०८० सालमा राष्ट्रिय स्तरमा ४ वटा फरकफरक विधामा पुरस्कारहरू स्थापना गरेकोमा उक्त पुरस्कारहरु २०८१ सालबाट प्रदान गर्ने जानकारी दिएकाे हाे । यसैगरी विगत वर्षबाट प्रदान गर्दै आएकाे विविध विधाका ७ वटा पुरस्कार समेत प्रदान गरिने पत्रकार भेटघाटमा प्रतिष्ठान अध्यक्ष केशवलाल श्रेष्ठले जानकारी दिए । ११ वटै विधाका पुरस्कार १७ फागुन शनिबार हेटाैंडामा एक कार्यक्रमकाे आयोजना गरी प्रदान गरिने बताइएकाे छ ।
यस वर्षबाट बाट प्रदान गर्न लागिएकाे भीम विराग राष्ट्रिय साहित्य पुरस्कार, २०८१ बाट साहित्यकार माया ठकुरी (काठमाडौं) सम्मानित हुने भएकी छिन् । यसै गरी भीम विराग राष्ट्रिय सङ्गीत पुरस्कार, २०८१ बाट गायक हेमन्त शर्मा (रुपन्देही), भीम विराग राष्ट्रिय कला पुरस्कार, २०८१ बाट कलाकार भोलाराज सापकोटा (मकवानपुर) र भीम विराग राष्ट्रिय पत्रकारिता पुरस्कार, २०८१ बाट पत्रकार ठाकुर बेल्वासे (काठमाडौं) सम्मानित हुने भएका छन् ।
उल्लेखित पुरस्कारकाे राशी जनही २५/२५ हजार रुपैंया रहेकाे छ । वरिष्ठ कलासाधक भीम विराग सक्रिय रहेकाे साहित्य, सङ्गीत, कला र पत्रकारिता चारवटै क्षेत्रलाई समेटेर हेटौंडा उपमहानगरपालिकाको आर्थिक सहयोगमा प्रतिष्ठानले उल्लेखित पुरस्कार गत वर्ष स्थापना गरेको श्रेष्ठले बताए ।
यस्तै प्रतिष्ठानले विगत वर्षहरूदेखि नै भाषा, कला, सङ्गीत तथा विभिन्न सामाजिक क्षेत्रमा क्रियाशील व्यक्तित्वहरूलाई प्रदान गर्दै आइरहेका विभिन्न ७ वटा पुरस्कार तथा सम्मान समेत शनिबार प्रदान गर्ने भएकाे छ । तुलसीमाया शिवकुमारी सृजनशील नारी पुरस्कार, २०८१ महिला उद्यमी शोभा श्रेष्ठ (मकवानपुर) लाई प्रदान गरिने भएकाे छ । समाजसेवी तथा साहित्यसेवी मुक्तिगोविन्द वैद्यले स्थापना गरेकाे उक्त पुरस्कारकाे राशी १५ हजार रुपैंया रहेकाे छ ।
यसैगरी भीम – मथुरा बाल प्रतिभा पुरस्कार, २०८१ विद्यार्थी रितिका छत्कुली (मकवानपुर) लाई प्रदान गरिने भएकाे छ । विन्दुगोपाल गोर्खालीले स्थापना गरेकाे उक्त पुरस्कारकाे राशी १० हजार रुपैंया रहेकाे छ । शिला नारी पुरस्कार, २०८१ बाट महिला उद्यमी मेनका श्रेष्ठ (मकवानपुर) सम्मानित हुने भएकी छिन् । आशीष श्रेष्ठले स्थापना गरेकाे उक्त पुरस्कारकाे राशी १५ हजार रुपैंया रहेकाे छ ।
यस्तै रामकृष्ण बानियाँ स्मृति लोक सङ्गीत पुरस्कार, २०८१ बाट लाेक दोहाेरी गायक कुलेन्द्र विश्वकर्मा (पर्वत) सम्मानित हुने छन् । चुनु बानियाँले स्थापना गरेकाे उक्त पुरस्कारकाे राशी २० हजार रुपैंया रहेकाे छ । चिनुकुमारी लामा स्मृति साहित्य पुरस्कार, २०८१ बाट साहित्यकार दीपक गौतम मकवानपुर सम्मानित हुने भएका छन् । रामबहादुर पाख्रिनले स्थापना परेकाे उक्त पुरस्कारकाे राशी १५ हजार रुपैंया रहेकाे छ ।
मंगलादेवी स्मृति स्वास्थ्य सेवा पुरस्कार, २०८१ स्वास्थ्यकर्मी निर्मला ब्लोन (मकवानपुर) लाई प्रदान गरिने भएकाे छ । देवप्रसाद श्रेष्ठ र दीपकप्रसाद श्रेष्ठले स्थापना गरेकाे उक्त पुरस्कारकाे राशी १० हजार रुपैंया रहेकाे छ । अजित सेन- कमलेश्वरी गुप्ता भिन्न क्षमता पुरस्कार, २०८१ बाट दृष्टीविहीन मेकानिक सुदर्शन ढकाल (मकवानपुर) सम्मानित हुने भएका छन् । रोशन सेन गुप्ता स्थापना गरेकाे उक्त पुरस्कारकाे राशी १० हजार रुपैंया रहेकाे छ ।
उल्लेखित पुरस्कार तथा सम्मान कार्यक्रमकै दिन शनिबार प्रतिष्ठानको कोष वृद्धिको उद्देश्यले गायक हेमन्त शर्मा तथा लोक दोहोरी गायक कुलेन्द्र विश्वकर्माको विशेष प्रस्तुति सहितको साङ्गीतिक कार्यक्रम समेत रहने प्रतिष्ठान महासचिव छवि अनित्यले जानकारी दिए । वरिष्ठ कलासाधक भीम विरागको बहुआयामिक व्यक्तित्वप्रति सम्मान स्वरुप ७ भाद्र २०५९ भीम विराग सङ्गीत साहित्य कला प्रतिष्ठान नेपाल स्थापना भएकाे हाे ।
नेपाली सङ्गीत, साहित्य र कला क्षेत्रमा देश तथा विदेशमा रही उल्लेखनीय योगदान पुर्याउँदै आइरहेका सर्जक, स्रष्टाहरूलाई सम्मानित एवम् पुरस्कृत गर्दै आएको यो संस्थाले मकवानपुरको माटोबाट वार्षिक रुपमा विभिन्न राष्ट्रिय तथा अन्तर्राष्ट्रिय पुरस्कार तथा सम्मान गर्दै आइरहेको उनले बताए ।
मकवानपुर । मकवानपुरको बकैया गाउँपालिकामा कला साहित्य महोत्सव हुने भएको छ । मकवानपुरको साहित्यिक संस्था झरना साहित्यिक परिवारको आयोजनामा बकैया–कला साहित्य महोत्सव–२०८१ हुने भएको हो ।
झरना साहित्यिक परिवारको ३१३ औँ साहित्य शृङ्खला एवम् ३२ औँ वार्षिकोत्सवका अवसरमा आगामी १६ र १७ फागुनमा बकैया–कला साहित्य महोत्सव–२०८१ आयोजना गरिने शनिबार पत्रकार सम्मेलन मार्फत जानकारी गराइएको हो ।
बकैया–५ स्थित कर्मप्राप्ति माविमा हुने महोत्सवमा पुरस्कार समर्पण, चित्रकला प्रदर्शनी, पत्रिका विमोचन, विभिन्न जातजातिका नृत्यहरू, बकैयाको काव्य महक, समकालीन गजल मुक्तक उत्सव, पालिका अध्यक्षलाई १० प्रश्न, समकालीन काव्य उत्सव, सम्मानित स्रष्टाको रचना वाचन र नवसर्जक रचना वाचन हुने आयोजक सस्थाका सचिव मसान उपासकले जानकारी दिएको छ ।
कर्मप्राप्ति माविको सहकार्यमा हुने महोत्सवमा बकैया गाउँपालिका सहयोग रहने उपासकले बताए ।
११ विद्याका सम्मान प्रदान गरिने
कला महाेत्सवमा विभिन्न ११ विधामा सम्मान प्रदान गरिने भएकाे छ । साहित्यसेवी नुरप्रसाद गौतमले मातापिताको सम्मानमा स्थापना गगरेकाे होमनाथ–टीकामाया प्रतिभा सम्मान भैरहवाका स्रष्टा प्राडा कपिल लामिछानेलाई प्रदान गरिने भएको छ । उक्त सम्मानकाे राशी नगद २१ हजार १ सय २१ रुपैंया रहेकाे छ ।
त्यस्तै साहित्यसेवी रमेशमोहन अधिकारीले मातापिता नाममा स्थापना गरेको शिव–सावित्री अधिकारी स्मृति मुक्तक सम्मान–२०८१ इलामका शिव अधिकारीलाई प्रदान गरिने भएको छ । १५ हजार ५ सय ५५ रुपैंया राशिको उक्त पुरस्कार चैतको चौथो शनिबार हेटौंडामा आयोजना हुने मुक्तक साँझमा प्रदान गरिने आयोजकले जनाएको छ ।
त्यस्तै, साहित्यसेवी विनोद सुवेदीले मातापिताको नाममा स्थापित पुरस्कार नगद रू. १५ हजार ५ सय ५५ राशिसहितको बाबुलाल–भोजमाया स्मृति साहित्य सम्मान–२०८१ मकवानपुरका मुक्तककार देवराज खरेललाई प्रदान गरिने भएको छ ।साहित्यसेवीहरू अर्पण पराजुली र दर्पण पराजुलीले मातापिताको सम्मानमा स्थापित नगद रू ८ हजार ५ सय राशि सहितको खडानन्द–मनमाया प्रतिभा सम्मान–२०८१ मकवानपुरका बिर्खे अञ्जानलाई प्रदान गरिने भएको उपासकले बताए ।
साहित्यसेवी राजन दङ्गालले आफ्नो दिवङ्गत छोरीको स्मृतिमा स्थापना गरेको नगद रू. ७ हजार ७ सय ७७ राशिसहितको सुशीला दङ्गाल स्मृति सिर्जनशील नारी सम्मान–२०८१ गजलकार बबी थापालाई प्रदान गरिने छ । साहित्यसेवी तुलसी गिरीद्वारा स्थापित ७ हजार ७ सय ७७ रुपैंया राशिको सञ्जीवनी बुटि साहित्य सम्मान–२०८१ बाराका नियात्राकार अप्सरा पुडासैनीलाई प्रदान गरिने छ ।

मकवानपुरमा रही यस संस्थाको प्रचारप्रसार गर्न पत्रकारिताका माध्यमबाट सहयोग गरेवापत पत्रकार प्रदान गरिने स्व. गोकर्ण गौतमको परिवारद्धारा स्थापना गरिएको ११ हजार १ सय ११ रुपैंया राशिको गोकर्ण गौतम स्मृति पत्रकारिता सम्मान–२०८१ मकवानपुरका पत्रकार ज्योति न्यौपानेलाई प्रदान गरिने उनले जानकारी दिए ।
बकैयाका नवप्रतिभाको सम्मान गर्ने हेतुले बकैयाका चन्द्रकुमार राईले स्थापना गरेका ५ हजार ५ सय ५५ रुपैयाँ राशिको झरना–बकैया नवप्रतिभा पुरस्कार–२०८१ पुरस्कार सन्तोष विकलाई प्रदान गरिने भएको छ । बकैया गाउँपालिकाका उपाध्यक्ष भक्तबहादुर खत्रीले आफ्ना पिताको नाममा स्थापित ७ हजार ७ सय ७७ रुपैंया राशिकाे खिमबहादुर खत्री स्मृति कलाकारिता सम्मान–२०८१ गरेको पुरस्कार मुर्तिकार ओमभक्त भण्डारीलाई प्रदान गरिने भएको छ ।
साहित्यकार जनार्दन खनालले आफ्ना मातापिताको नाममा स्थापना गरेको ७ हजार ७ सय ७७ रुपैंया राशिकाे ऋषेश्वर–रुक्मिणी–लक्ष्मीदेवी खनाल साहित्य सम्मान–२०८१ ललितपुरका रत्न विरही घिमिरेलाई प्रदान गरिने भएको छ । बकैया गाउँपालिकाभरीका विद्यालयमध्ये उत्कृष्ट शिक्षक सम्मान –२०८१ बुद्ध माविका हरि घिमिरेलाई प्रदान गरिने भएको छ ।
पत्रकार सम्मेलनमा आयोजक संस्थाका अध्यक्ष विश्वनाथ सन्जेल, उपाध्यक्ष चिरञ्जीवी लामिछाने लगायतकाे उपस्थिति रहेको थियो ।
मकवानपुर । मकवानपुरकाे हेटौंडामा दोस्रो राष्ट्रिय नवसर्जक उत्सव–२०८१ सुरु भएको छ । नवसर्जक साहित्य चौतारी नेपालको आयोजनामा शुक्रबारबाट सुरु उत्सव शनिबार (आज) सम्म चल्ने छ ।
देशका सातै प्रदेशबाट नवसर्जक सहभागी उत्सवमा शुक्रबार पहिलो दिन साहित्यका विभिन्न विधामा कार्यशाला गरिएकाे थियाे । उत्सव शुभारम्भकाे दिन नवसर्जकहरुले हेटौंडा उपमहनागरपालिका–११ स्थित शहीद स्मारकको भ्रमण गरेका थिए । उनीहरुले बागमती प्रदेशका पहिलाे मुख्यमन्त्री डोरमणि पौडेलसँग ‘शहीद स्मारककाे परिकल्पना, विकास र भावी याेजना’ विषयमा अन्तरसंवाद समेत गरेका छन् ।
यसैगरी हेटौडा–४ स्थित भुटनदेवी माध्यमिक विद्यालय परिसरमा सहित्यका विभिन्न ९ विधामा कार्यशाला आयोजना गरिएकाे थियाे । गजल लेखन, मुक्तक लेखन, लोकलय कविता लेखन, गद्य कविता लेखन, कथा लेखन, यात्रा संस्मरण, नाटक लेखन, हास्ययव्यङ्ग्य लेखन तथा चित्रकलाकाे कार्यशाला भएकाे आयोजकले जनाएकाे छ ।
गजलमा केशव समर्पण, मुक्तकमा विश्वनाथ सञ्जेल, लोकलय कवितामा पुरुषोत्तम आचार्य, गद्य कवितामा सुवास खनाल, कथामा निमेष निखिल, यात्रा संस्मरणमा रमेशमोहन अधिकारी, नाटकमा माधव पोखरेल, हास्ययव्यङ्ग्यमा राजकुमार लामिछाने र चित्रकलामा सूर्य सन्यासीले सहजीकरण गरेका थिए । उक्त कार्यशालाहरुमा विद्यालय तहका २ सय ७० जना विद्यार्थी सहभागी रहेकाे आयोजकले जनाएकाे छ ।
नजसर्जक उत्सवको दोस्रो दिन आज शनिबार भुटनदेवी माध्यमिक विद्यालय परिसरमै नवसर्जक साहित्य चौतारीको प्रथम केन्द्रीय अधिवेशन हुँदैछ । कार्यक्रममा स्रष्टा सम्मान, राष्ट्रव्यापी गजल प्रतियोगिता, गजल तथा नृत्य, बहत्, मुक्तक, कविता वाचन, पुस्तक प्रदर्शनी हुनेछ ।
यसैगरी नवप्रतिभा प्रवर्द्धनमा विद्यालय र स्थानीय सरकारकाे भूमिका विषयमा बहस कार्यक्रम समेत हुनेछ । बहसमा हेटौंडा उपमहानगरपालिका महिला तथा बालबालिका महाशाखा प्रमुख विष्णु कुमारी लामिछाने,श्रीराम दाहाल प्राध्यापक श्रमिक मावि, विनोद सुवेदी प्रिन्सिपल बालजागृति इंग्लिस स्कुल,पत्रकार सुरेश श्रेष्ठ सहभागी हुनेछन् । कार्यक्रमकाे अभिभावकत्व वडाध्यक्ष सिग्देल तथा सहजिकरण नवसर्जक साहित्य चौतारी नेपालकी सचिव कृतिका लौडारीले गर्नेछिन् ।
शुक्रबार नवसर्जक साहित्य चौतारी नेपालकी अध्यक्ष प्रसन्ना चौलागाईको अध्यक्षता तथा प्रा.डा. चुणामणि बन्धुको प्रमुख आतिथ्यमा उद्घाटन समारोह भएको थियो । कार्यक्रममा ४ नम्बर वडाध्यक्ष नवीन सिग्देललगायतकाे आतिथ्यता थियो ।
मकवानपुर । लोकगायक खेम सेन्चुरी र मेलिना राईको स्वर रहेको लोक दोहोरी गीत नौतुनाको रेल युट्युबमा सार्वजनिक भएको छ । मोडल तथा कलाकार नरेश एमसीले आफ्नो युट्युब च्यानल मार्फत गीतको भिडियो २ फागुनमा सार्वजनिक गरेका हुन् ।
गीतमा नरेशसँगै जुना बिश्वकर्माले अभिनय गरेका छन् । गीतमा उनले भारतीय सेनामा कार्यरत सैनिक अधिकृतको भूमिकामा छन् भने जुनाले गाउँले युवतीको भूमिकामा अभिनय गरेकी छन् । लाहुरे र उनकी प्रेमिका बीचको प्रेम दर्शाउन गीत तयार गरिएको उनले बताए ।
ऋषि खड्काले लेखेको गीतलाई केशव बडुले संगीत संयोजन गरेका छन् । भिडियो अजय रेग्मीले खिचेकाे गीतको भिडियो निर्देशन तथा नृत्य निर्देशन मौसम हिमालीको रहेको छ । एमसी सशस्त्र प्रहरीका कर्मचारी हुन् । पेशागत कर्मसंगै कलाकारितालाई समेत निरन्तरता दिँदै आएका उनले दशैं तिहारको अवसरमा फौजी जीवनलाई प्रतिनिधित्व गर्ने भिडियोहरू सार्वजनिक गर्दै आएका छन् ।
मेरो माया राष्ट्र सेवक, लाहुरेको चिनो, फौजीको बर्दीमा जस्ता गीतहरू बजारमा ल्याएका उनकाे लाहुरे म त सोल्टिनी गीत चर्चित छ । एक वर्ष अघि रिलिज भएकाे गीतकाे भिडियाेलाई युटुब मार्फत सार्वजनिक गरिएकाे हाे । चार दिन अघि युट्युबमा रिलिज गरिएकाे भिडियाेलाई हालसम्म १ करोड आठ लाख बढीले हेरेका छन् ।