मकवानपुर । मकवानपुरकाे अग्रणी संस्था साहित्य संगम मकवानपुरले २०८१ सालमा प्रकाशित कृतिका स्रष्टालाई सम्मानित गरेकाे छ । संगमले शनिबार हेटौंडामा एक कार्यक्रमका बिच मकवानपुर १२ जना स्रष्टालाई सम्मान गरेको हो ।
२०८१ सालमा मकवानपुर जिल्लाका साहित्यकारले ४ वटा मुक्तक संग्रह, २ वटा गजल संग्रह, अनुसंस्करण संग्रह, कथा संग्रह, कविता संग्रह, नियात्रा संग्रह, गीत संग्रह र संस्मरण संग्रह एक/एक वटा प्रकाशन गरेकाेमा लेखन कार्यलाई प्रोत्साहन गर्ने उद्देश्यले साहित्य संगमले स्रष्टा सम्मान कार्यक्रम गरेको हो ।
शनिबारकाे ३५४ औं नियमित साहित्य सन्ध्याको अवसरमा साहित्य संगमले ‘अनुभूतिका आँखाहरु’ अनुसंस्मरणका स्रष्टा ऋषिराम उपाध्याय पोखरेल, ‘घामका फूलहरु’ गजल संग्रहका स्रष्टा तुलसी घिमिरे गजल संग्रह ‘तृप्ति’ का स्रष्टा राम कार्की, ‘संयात्राको संयोग’ नियात्रा संग्रहका स्रष्टा रमेशमोहन अधिकारीलाई सम्मान गरिएकाे संगम सचिव मनोज पाेखरेलले बताए ।
यसैगरी ‘बहिष्कृत आवाज’ कविता संग्रहका स्रष्टा यश लामा, ‘आउँछ यादहरु’ गीत संग्रहका स्रष्टा महेश सी आरोही, ‘उज्यालोका बाछिटा’ मुक्तक संग्रहका स्रष्टा डीबी बर्तौला, ‘सम्झूँ कि बिर्सुँ’ संस्मरण संग्रहका स्रष्टा निर्मोही व्यास, ‘गल्छेडाका धुनहरु’ मुक्तक संग्रहका स्रष्ट्रा राजबाबु पहाडी, ‘अन्तरध्वनि’ मुक्तक संग्रहका स्रष्टा किशन पौडेल, ‘बन्द ढोकाको चित्कार’ मुक्तक संग्रहका स्रष्टा दिनेश शर्मा र ‘कठै’ कथा संग्रहका स्रष्टा श्यामप्रसाद श्रेष्ठलाई सम्मानित गरिएको पोखरेलले जानकारी दिए ।
स्रष्टा श्रेष्ठले ‘कठै’ कथा संग्रह ६ वटा साहित्य संगम मकवानपुरद्वारा संचालित पुष्पलाल पुस्तकालयलाई हस्तान्तरण गरेका छन् । साहित्य संगम मकवानपुरका अध्यक्ष डीबी बर्तौलाको अध्यक्षता, साहित्यकार तुलसी घिमिरेको प्रमुख आतिथ्यमा तथा हेटौंडा उपमहानगरपालिका वडा नम्बर ४ का वडाध्यक्ष नविन सिग्देलकाे विशेष आतिथ्यतामा भएकाे नियमित साहित्य सन्ध्या एवम् सम्मान कार्यक्रममा रामप्रसाद आचार्य, राजकुमार चौधरी, सानुभाइ बिश्वकर्मा, सुवास सजल, जनार्दन खनाल, अनिल कोइराला, पुरुषोत्तम आचार्य, मनोज मधुर, देवराज तिवारी, उमेश तिमल्सिना, शान्ति प्रियवन्दना लगायतले रचना वाचन गरेका थिए ।
यसैबीच विधान संसोधनकाे लागि शनिबार नै संगमकाे विशेष साधारण सभा भएकाे छ । अधिवेशनले संगमकाे विधानमा भएका केही प्रावधानलाई संसोधन तथा केही व्यवस्था थप समेतको निर्णय गरेको छ ।
विशेष अधिवेशनले विधानमा रहेको २ वर्षे कार्यकाललाई बढाएर ३ वर्ष बनाउने, प्रगतिवादी शब्दलाई प्रगतिशील बनाउने, आजिवन, मानार्थ र सस्थागत सदस्यताको व्यवस्था गर्ने, सदस्य भएको व्यक्तीमात्रै पदाधिकारीमा चयन हुन पाउने, अध्यक्ष हुन पधाधिकारी भएका ब्यक्तिबाटै चयन हुने व्यवस्था गर्ने निर्णय पारित गरेको छ ।
यसैगरी जुनसुकै उमेर समुहका समेत सदस्य हुन पाउने तर मताधिकार भने १८ वर्ष उमेर पूरा भए पछि मात्रै पाउने व्यवस्था र संगम कार्यालय हेटौंडा ४ स्थित आफ्नै भवनमा रहने गरि संसोधनको निर्णय भएको अध्यक्ष डीबी बर्तौलाले जानकारी दिए ।
कपिलवस्तु । कपिलवस्तुमा रहेकाे साहित्य तीर्थ कपिलधाममा प्रा.डा. विष्णुराज आत्रेय (लाटोसाथी), पं. रश्मिराज अर्ज्याल तथा हिमलाल ज्ञवालीको प्रतिमा अनावरण गरिएकाे छ ।
नेपालका दर्जनौं साहित्यकारहरूको प्रतिमा राखिएको बाणगंगा नगरपालिका वडा नम्बर ९ कपिलधाममा नेपाली संस्कृत एवम् अवधि वाङ्मयका विद्वान प्राज्ञ प्रा.डा. विष्णुराज आत्रेय तथा साहित्यकार एवम् समाजसेवी हिमलाल ज्ञवाली र विद्वद्वर पण्डित रश्मिराज अर्ज्यालको प्रतिमा शनिबार अनावरण गरिएकाे हाे । नेपाल सरकारका पूर्व परराष्ट मन्त्री तथा साहित्यकार प्रदिपकुमार ज्ञवाली (शीतविन्दु) र लुम्बिनी प्रदेशका मुख्यमन्त्री चेतनारायण आचार्यले संयुक्त रुपमा प्रतिमा अनावरण गरेका हुन् ।
कार्यक्रमका प्रमुख अतिथि ज्ञवाली, विशिष्ट अतिथि मुख्यमन्त्री आचार्य, प्राज्ञ मधुसुदन गिरी, प्राज्ञ बाबा बस्नेत, ऋषि आजाद, पोमनारायण पौडेल, विष्णु भण्डारी, पार्वती शर्मा, अलका आत्रेय चूडाल र सिर्जना ज्ञवाली लगायतले विष्णुराज आत्रेय र हिमलाल ज्ञवालीको व्यक्तित्व, कृतित्वकाे चर्चा गरेका थिए ।
साेही अवसरमा बमबहादुर थारु, दुर्गा थापा मगरलाई स्रष्टा सम्मान अर्पण गरिएको थियो । यस्तै टङ्कप्रसाद पराजुलीलाई “पाणिनीय व्याकरणे विष्णुराज आत्रेयस्य योगदानम्” शीर्षकको आचार्यस्तरको शोधपत्रका लागि प्रा.डा. विष्णुराज आत्रेय (लाटो साथी) अध्ययन-अनुसन्धान पुरस्कार प्रदान गरिएको थियो ।
कार्यक्रममा आज्ञा आत्रेय न्यौपानेको कविता सङ्ग्रह ‘लेखनी’ प्रीति आत्रेय ज्ञवालीको स्मृतिकाव्य ‘लाटो साथी’ तथा डा. अलङ्कार आत्रेयद्वारा लिखित लघुकथा सङ्ग्रह ‘अनवरत प्रेम’ तथा कपिलधामको संक्षिप्त परिचय पुस्तिकाको पनि लोकार्पण गरिएको थियो । न्यौपाने र ज्ञवाली दिदीबहिनी र अलंकार भाइ हुन् ।
कार्यक्रम प्रा. डा. विष्णुराज आत्रेय (लाटो साथी) स्मृति प्रतिष्ठान तथा हिमलाल ज्ञवाली स्मृति प्रतिष्ठानको संयुक्त आयोजना कार्यक्रम भएको हाे ।
मकवानपुर । मकवानपुरकाे हेटौंडामा खुला वक्तृत्वकला प्रतियोगिता हुने भएकाे छ ।
पारिजातको स्मृति दिवसको अवसरमा आँचल साहित्य कला पुञ्ज मकवानपुरले वक्तृत्वकला प्रतियोगिता आयोजना गर्ने भएकाे हाे । हेटौंडा उपमहानगरपालिका १० नम्बर वडा कार्यालयको सहयोग रहने उक्त कार्यक्रम ५ वैशाख २०८२ मा आयोजना गरिने आँचलकी अध्यक्ष भावना सापकोटाले बताइन् ।
‘सामाजिक रूपान्तरणमा राजनैतिक आन्दोलन’ विषयमा खुला वक्तृत्वकला प्रतियोगिता हुने उनले जानकारी दिइन् । पारिजानकाे स्मृति दिवसमा आँचलले हरेक वर्ष विभिन्न कार्यक्रम संचालन गर्दै आएको उनले बताइन् ।प्रतियोगितामा सहभागी हुने प्रतियोगीहरुकाे छनोट भर्चुअल माध्यमबाट हुने बताइएको छ ।
कार्यक्रममा सहभागी हुन २ वैशाख साँझ ५ बजेसम्म आफ्नो नाम र आवश्यक विवरण टिपाइसक्नु पर्ने उनले जानकारी दिइन् । प्रतियोगीतामा प्रथम, द्वितीय, तृतीय र सान्त्वना हुनेलाई क्रमशः १० हजार, ७ हजार, ४ हजार र १ हजार रुपैयाँ प्रदान गरिने छ ।
मकवानपुर । मकवानपुरकाे हेटौंडामा एकै मञ्चमा ३ जना स्रष्ट्राका ३ मुक्तक संग्रह विमोचन गरिएकाे छ । मुक्तक मञ्च मकवानपुरकाे २४ औँ नियमित मुक्तक वाचन श्रृङ्खलाकाे अवसरमा ३ जना स्रष्ट्राका मुक्तक संग्रह विमोचन गरिएकाे हाे ।
शनिबार मकवानपुरे मुक्तककारहरु किशन पौडेल, राजबाबु पहाडी र दिनेश शर्माका मुक्तक संग्रहहरु विमाेचन गरिएकाे हाे । पौडेलकाे अन्तर्ध्वनी, पहाडीकाे गल्छेडाका धुनहरु र शर्माकाे बन्द ढोकाकाे चित्कार मुक्तक संग्रह विमाेचन गरिएकाे थियाे । मञ्च अध्यक्ष सागर तिमल्सिना, मुक्तककार हरिकृष्ण काफ्ले, अग्रज साहित्यकार तुलसी घिमिरे, कवि शान्ति प्रियवन्दना, साहित्य संगम मकवानपुर अध्यक्ष डीबी बर्तौला, साहित्यकार दिपक गौतम र मुक्तककारत्रयबाट विमोचन गरिएकाे थियाे ।
विमोचन भएका मुक्तक संग्रह अन्तर्ध्वनीमाथि डीबी बर्तौला, गल्छेडाका धुनमाथि शान्ति प्रीयवन्दना र बन्द काेठाकाे चित्कारमाथि दिपक गौतमले समिक्षात्मक टिप्पणी समेत गरेका थिए । समिक्षात्मक टिप्पणी गर्दै वक्ताहरुले मुक्तक सक्षिप्तमा लेखिने गहन कविता भएकाेले मुक्तक संग्रह भित्र थोरै सृगारिङ, मातृभाव, बिकृत राजनिती, बिसङती, नयाँ पुस्ताको लागि सन्देश, मन भित्रको पीडा,अन्तर ह्रदयको आवाज, आध्यात्मिक चिन्तन, प्रकृति प्रेम, देश भित्रकाे युवा आवाज, प्रगतिशीलता, वैदेशिक रोजगारको पीडा, बा आमाको चिन्ता, परिस्थितिको चिन्तन रहेकाे बताए ।
मुक्तककारहरु समयाबोधी भएकाे बताउँदै वक्तात्रयले मुक्तक संग्रहहरुमा केही मुक्तकहरु मुक्तककाे संरचनामा नभएकाे, तुक नमिलेकाे साथै सम्पादन र शुद्धाशुद्धीमा ध्यान नदिएकाे लगाएका प्रतिक्रिया दिएका थिए । विमोचन भएका संग्रहबाट केही मुक्तक समेत वाचन गरिएका थिए ।
मञ्च अध्यक्ष सागर तिमल्सिनाकाे सभाध्यक्षता, मुक्तककार हरिकृष्ण काफ्लेकाे प्रमुख आतिथ्यता तथा तुलसी घिमिरेकाे विशिष्ठ आतिथ्यतामा भएकाे कार्यक्रममा मकवानपुरका साहित्यकारहरुकाे उपस्थिति रहेकाे थियाे । कार्यक्रमकाे सहजिकरण मञ्च सचिव सुबास सजलले गरेका थिए ।
मकवानपुर । मुक्तक मञ्च मकवानपुरले २ जना स्रष्टालाई सम्मानित गरेकाे छ । मञ्चले २४ औँ नियमित मुक्तक वाचन श्रृङ्खलाकाे अवसरमा शनिबार २ जनालाई मुक्तक सम्मानबाट सम्मानित गरेकाे हाे ।
मञ्चले तारा स्मृति मुक्तक सम्मानबाट चितवनका मुक्तककार बिमला अधिकारी देवकाेटा तथा हरिकृष्ण काफ्ले मुक्तक सम्मानबाट रुपन्देहीका मुक्तककार रमेश समर्थनलाई सम्मानित गरेकाे छ । देवकाेटालाई ७ हजार ५०० रुपैंया राशीकाे तारा स्मृति मुक्तक सम्मानबाट सम्मानित गरिएकाे हाे । मकवानपुरका साहित्यकार तथा मुक्तक मञ्चका मकवानपुरका संस्थापक उपाध्यक्ष किसन पौडेलद्वारा पिता तारा प्रसाद पौडेलको सम्झनामा उक्त सम्मान स्थापना गरेका हुन् ।
सम्मानको राशि स्थापनाको समयमा ५ हजार ५५५ रहेकाेमा २०८० देखि बढाएर ७ हजार ५०० बनाइएको हाे। बिमलाकाे मनकाे किनारा मुक्तक संग्रह २०७५ सालमा प्रकाशित छ । उक्त सम्मानबाट २०७९ सालमा देवराज खरेल मकवानपुर तथा २०८० सालमा हरिकृष्ण काफ्ले रौतहट सम्मानित भइसकेका छन् ।
यसैगरी समर्थनलाई १० हजार रुपैंया राशीकाे हरिकृष्ण काफ्ले मुक्तक सम्मानबाट सम्मानित गरिएकाे हाे । मकवानपुरका हास्यव्यङ्ग्यकार आरसी रिजाले अग्रज मुक्तककार हरिकृष्ण काफ्लेकाे सम्मान गर्दै उक्त सम्मान स्थापना गरेका हुन् । मुक्तक विधामा प्रदान गरिने यो सम्मान मञ्चले पहिलो पटक प्रदान गरेकाे हाे । समर्थनकाे ब्रम्हलुट मुक्तक संग्रह २०५३ सालमा प्रकाशित छ ।
नेपाली साहित्य क्षेत्रको मुक्तक विधामा दिइएको योगदानकाे कदर गर्दै मञ्चले देवकाेटा र समर्थनलाई सम्मानित गरिएकाे अध्यक्ष सागर तिमल्सिनाले जनाकारी दिए । मञ्च अध्यक्ष तिमल्सिनाकाे सभाध्यक्षता, मुक्तककार हरिकृष्ण काफ्लेकाे प्रमुख आतिथ्यता तथा तुलसी घिमिरेकाे विशिष्ठ आतिथ्यतामा कार्यक्रम भएकाे हाे ।