चेतनाथ दाहाल
१.
जोगाएकी छु सयपत्री मखमली,मास्न मन लाग्दैन
सजिए पनि फूलहरुले बगैंचा, हास्न मन लाग्दैन
परदेशमै रह्यौ यो तिहारमा पनि प्यारा माइती राजा
तिमी छैनौ त्यसैले त मलाई माला गास्न मन लाग्दैन ।
२.
बिदेशी संस्कृतिको जातोमा, तिहार पनि पिसिन थालेको छ
पहिले सेलरोटी पकाउने चुलो अचेल् चिसिन थालेको छ
मजाले रामायण् भट्याईन्थ्यो देउसिरे खेल्दा रातैभरी
अबत बुझिसक्नु हुन छोड्यो नयाँ शैली मिसिन थालेको छ।
३.
चेली र माइतीको सम्बन्ध,खास भईरहोस
सबैको घरभित्र लक्ष्मीको बास भईरहोस
धर्मको रक्षासंगै सम्मान् होस् पशुपक्षीको
उदण्ड दानवीय प्रबृत्ति नास भईरहोस ।
कानेपोखरी २ मोरङ्ग
खुशी कला
१.
दसैँ गयो झिलिमिली तिहार आयो आँगनमा
दिदी र भाइको चाड खुसी छायो आँगनमा
मखमली र सयपत्री ढकमक्क फुलेको छ,
लक्ष्मीलाई स्वागत गर्ने द्वार सजायो आँगनमा ।
२.
स्वदेशको सयपत्रि र मखमली सम्झेर
देउसी भैलोको रमाइलो खलबली सम्झेर
रोजीरोटीको सवालमा दौडनु छ विदेशमा ,
विरक्त परदेशी तिहार झलझली सम्झेर ।
३.
मखमली र सयपत्री पाखाभरी फुलिरहँदा
गैरि खेतमा धानबाला लहलह झुलिरहँदा
याद आयो भाइ मन विरक्त भो तिहारमा पनि,
विदेशमा रोजी रोटीको लागि म डुलिरहँदा। ।
४.
सडक बालबालिकालाई दसैँ, तिहार थिएन
चाडपर्वहरू प्रति अनाथलाई प्यार थिएन
बचपनमै बाबुआमा गुमाउनुको पीडा छ ताजा ,
गरिबको खुसी फर्काउने कुनै उपचार थिएन ।
५.
तिहार आयो आउन पाइन सबै रमाउँदा नरूनु
तस्बिर समाइ टिका माला लगाउँदा नरूनु
बाचा गत साल गरेकै हो तिहारमा आउछु भनी,
देश विदेश कोरोनाको कहर छ हर्ष हराउँदा नरूनु ।
पाेखरा हाल युराेप
मकवानपुर । हेटाैडामा मकवानपुरकाका साहित्यकार तुल्सी थापा सम्मानित भएका छन् । साहित्य संगम मकवानपुरले शनिबार हेटौंडामा आयोजना गरेको विशेष साहित्यक कार्यक्रममा साहित्यकार थापालाई सम्मान गरिएको हो ।
साहित्यका विभिन्न पाटामा कलम चलाउँदै आएका थापालाई साहित्य क्षेत्रमा पुर्याएको योगदानको कदर गर्दै साहित्य संगमले ३ सय १२ औं साहित्य सन्ध्याको अवसरमा आयोजित विशेष साहित्यिक कार्यक्रममा नगद ५१ हजार राशी सहित सम्मान गरेको हाे । कविता, कथा, नाटक, दाना कवितालगायतका क्षेत्रमा कलम चलाउँदै साहित्य क्षेत्रकाे याेगदान अनवरत रुपमा लागि रहेका थापालाई संगमका संस्थापक तथा साहित्यकार नवराज शर्माले सम्मानपत्र प्रदान गरेका थिए । हाल अमेरिका निवासी मकवानपुरका गौरव थपलियाले उपलब्ध गराएकाे नगद सहितकाे सम्मान सगमले थापालाइ प्रदान गरेकाे हाे ।
सम्मानित साहित्यकार थापाको व्यक्तित्व र कृतित्वका बारेमा साहित्यकार निमेष निखिलले भनाइ राखेका थिए । थापाको दाना कविता, नाटकका विषयमा साहित्यकार केशव तौजले, सुवास खनाल र उज्वल भण्डारीले बाेलेका थिए । संगमकी अध्यक्ष अनिता न्यौपानेको सभाध्यक्षतामा भएको साहित्य सन्ध्या तथा सम्मान कार्यक्रममा साहित्यकारहरुले रचना वाचन गरेका थिए ।

- रामजी चौलागाईं
उनलाई सार्वजनिक भेलामा जान हतार भइसकेको थियोे । प्राकृतिक शरीरमा कृत्रिम रङ भर्न भ्याएनन् उनले । साधारण पहिरनमा आँगनमा निस्किए । श्रीमतीको नजर उनको शिरदेखि पाउसम्म पर्यो ।
क्वारक्वार्ती आँखा डुलाउँदै भनिन्,”सधैं मान्छेका अगाडि तिनै एकै खाले कपडा कति लगाएर जानुहुन्छ । यसो कहिलेकाहीँ त अर्को जोर फेरेर लगाए पनि त हुने नि ।” श्रीमानले हल्का रूपमा लिँदै भने,”कपडामा यति धेरै चिन्ता नलेऊ न । यत्तिका कपडाले चलिहाल्छ नि ।” श्रीमतीको मन बुझेन ।
उनले भनिन् ,”अहिले त्यही ठाउँमा अरू मान्छे सुट ,टाई र मयलपोसमा सजिएर आउँछन्। तपाईं भने….। मान्छेले खाएको देख्दैन, लाएको देख्छ । मान्छेको इज्जत राख्ने नै कपडा हो । बुझ्नु भो ?” लगाउने कपडाको बारेमा श्रीमतीसँग भएको बहसलाई उनले खै कसरी बुझे। उनी एकछिन टोलाए । एकछिन झोक्राए अनि फिस्स हाँस्दै उनले भने ,”कहिल्यै बाघको छोरो स्याल र स्यालको छोरो बाघ हुन सक्छ ? मान्छेको हुर्मत कपडाले राख्छ कि व्यवहारले, प्रिय ?”
भीमेश्वर नगरपालिका ४, दोलखा
गीताश्री शर्मा
यो मन !
उड्छ बादल छुने दाउमा
कहिले एक्लै घुम्दछ नभमा
चुम्छ कहिले आकाश
पाताल रूङ्छ कहिले
घुम्छ अन्तरीक्षमा
उसको, न साँझ न बिहान !
घुम्दै फिर्दै रुम्झाटार भनेजस्तै
थपक्क बस्छ ! नि:शब्द ऊ
बोकेर अनन्त चाहन ।
मन , मन हो !
रातका तारासँग घुम्छ कहिले
निशङ्कोच नभमा !
टहटह जूनको टहकमा पनि
भावनासँग हाँसेर ऊ
हातेमालो गरेर झुम्छ कहिले
न कसैको डर छ, न केही बाधा ,
न कसैले प्रश्न गर्छ त्यहाँ,
न हुन्छ वचनको तगारो नै
न अल्झन्, न अड्चन
निस्फिक्री घुम्छ संसार
गर्छ विश्व परिक्रमा एक्लै
उसलाई न त पासपोट, न चाहिन्छ भिसा
न त खर्चको आवश्यकता छ, न कुनै निसा
न कुनै दिशा, न ठाउँ न ठहर र ठेगाना
निर्धक्क छ ऊ एक्लो
यसैले आनन्दले रमाउँछ ऊ
साथमा बोकेर उग्र चाहना।
आखिर मनै हो!
न देशले रोक्छ कतै
न कुनै भौगोलिक परिवेशले
साध न सीमाना कतै
न परदेशी भनेर छेकिन्छ कतै
बन्दैन सिकार जातीयताको
नस्लभेदले पार्दैन असर
रमाउँछ एक्लै आतिथ्यमा
न जमाउछ कतै काव्यिक माहोल
एक्लै फकिर सन्त बनेर घुम्छ
पुग्छ कसैको झोपडीमा
कहिले महल कुटीमा,
कसैको बार्दली! कसैको फूलबारीमा !
अनि !
कसैको मनको ढुकढुकीमा
आतिथ्यमा रमाएर आफैं आफैँ
निर्ढुक्क हाँस्छ, बोल्छ, खेल्छ एक्लै
एकोहोरो बग्छ
अनि
भावुकतामा कम्लाउंँछ कतै
रसाउँछन् परेली पनि
अनायसै खिन्न बन्छ ऊ
रन्थनिएर घुम्दै, पुछेर अश्रुजल
घर फर्की आउंँछ
भिजेको मुसा भएर ।
तर किञ्चित सुस्ताउँदैन त्यो
मन भित्रको दह्रो भावना।
न हार्छ हिम्मत ऊ
न रोकिन्छ कतै
नठोकिन्छ कतै
नरोक्छ बेग उसले
निर्धक्क घुम्छ ऊ !
चन्द्र-सूर्य छुन्छ उसले
सफल,असफल वास्तै नगरी
कतै दौडिन्छ, कतै पौडिन्छ
चुपचाप मौन बस्छ अनि
रून्छ ऊ, छोड्छ डाको
भावविह्वल भएर तड्पिन्छ ऊ
घिट घिटो छउन्जेल
एक घुट्की पिएर पानी
पुनः जुर्मुराउँछ रमाउँन।
उषा, मध्यान्ह , सन्ध्या
चिसो, ऊष्ण, शुष्क बतासमा पनि
घुम्ने चाहना हुन्छ साथमा
गर्दछ ऊ एक्लै
निस्फिक्री निडर
ब्रह्माण्डको परिक्रमामा
बोकेर अझ अनन्त चाहाना।
गान्तोक, सिक्किम