मकवानपुर । मकवानपुरको बकैया गाउँपालिकामा कोरोना भाइरस संक्रमितको उपचारको लागि अक्सिजन सहितको ३० बेडकाे आइसोलेसन तयार गरिएको छ । बकैया ४ स्थित छतिवन प्राथमिक स्वास्थ्य केन्द्रमा २० बेड र बकैया–३ हात्तिसुँडे सामुदायिक स्वास्थ्य इकाईमा १० बेड आइसोलेसन तयार गरेको हो ।
स्वास्थ्य केन्द्रमा गाउँपालिकाले २० बेड र स्वास्थ्य इकाईमा बकैया–८ का ताराचन्द्र बजगाईले व्यक्तिगत खर्चमा १० बेडको आइसोलेसन तयार गरेका हुन् । बजागाई बुद्ध मावि व्यवस्थापन समितिका अध्यक्ष समेत हुन् । दुबै आइसोलेसनमा संक्रमितको लागि आवश्यक परेको अवस्थामा अक्सिजन सहितको स्वास्थ्य सामग्रीहरुको व्यवस्थापन गरिएको बकैया गाँउपालिका अध्यक्ष दामाेदर खनालले बताए ।
बकैया ३ को हात्तीसँडे स्वास्थ्य ईकाईमा बजागाईले व्यक्तिगत खर्चमा तयार गरेको १० बेडको आइसोलेसन वार्ड साेमबार दिउँसो गाउँपालिकाका अध्यक्ष दामोदर खनाललाई हस्तान्त्रण गरिएको हो । आइसोलेसन संक्रमितको सहजताका लागि व्यक्तिगत खर्चमा तयार गरेकाे बजगाईले बताए । ‘जिल्लामा संक्रमण बढिरेहको छ,संक्रमितहरुले अस्पतालमा बेड नपाईरहेको अवस्थामा संक्रमितलाई उपचारमा सहज होस् भनेर अक्सिजन सहितको बेड व्यवस्थापन गरेको हुँ’ बजगाईले भने । आइसोलेसन तयार गर्नको लागि करिब ३ लाख खर्च भएको छ ।

मकवानपुर जिल्लाका अन्य स्थानीय तहमा जस्तै बकैया गाँउपालिकामा समेत काेराेना संक्रमण बढ्दै गएकोले गाउँपालिका भित्रका संक्रमितको उपचारको लागि गाउँपालिका तयारी अवस्थामा रहेको बकैया गाउँपालिकाका अध्यक्ष दामोदर खनालले बताए । ‘काेराेना संक्रमणबाट बकैया गाउँपालिका पनि अछुतो छैन’ खनालले भने ‘अहिले ४ जनामा संक्रमण देखिएको छ ।’ तयारी स्वरूप आइसोलेन वार्डहरु तयार गरिएकाे, सूचना प्रवाह समेत भइरहेकाे र अक्सिजन सहितको आइसोलेन वार्ड तयार गरिएकाे खनालले बताए ।
मकवानपुर । प्रधानमन्त्री केपी शर्मा ओलीले प्रतिनिधिसभामा विस्वासको मत पाएनन् । प्रम ओलीले प्रतिनिधिसभा समक्ष राखेकाे विस्वासको मतकाे प्रस्तावकाे पक्षमा ९५ मत परेकाेले उनकाे प्रस्ताव अस्वीकृत भएको छ । विश्वासको मत बहुमतबाट अश्विकृत भएसंगै प्रधानमन्त्री ओली स्वतः पदमुक्त भएका छन् । सरकार काम चलाउ भएको छ ।
प्रधानमन्त्रीको आफूप्रति संसदकाे विश्वास छ भन्ने प्रस्ताव पारित हुन हाल प्रतिनिधिसभामा कायम रहेको २ सय ७१ सदस्यको बहुमत आवश्यक पर्ने थियाे ।
हाल प्रतिनिधिसभामा कायम रहेको २ सय ७१ सदस्यको बहुमत पुग्न १ सय ३६ मत गर्न आवश्यक पर्नेमा प्रम ओलीकाे प्रस्तावमा ९३ मत मात्रै प्राप्त भएकोमा उक्त संख्या संसदमा बहुमत नभएकोले सभामुख अग्निप्रसाद सापकोटाले उनको प्रस्ताव अस्वीकृत भएको घोषणा गरेका थिए ।प्रधानमन्त्रीको प्रस्तावको विपक्षमा १ सय २४ मत खसेको छ भने मत दिन्न भन्नेमा १५ मत परेको थियाे ।
संसदमा सोमबार एमालेको माधव नेपाल पक्षका सांसद अनुपस्थित रहेका थिए । त्यस्तै राप्रपा सांसद राजेन्द्र लिङ्देन पनि अनुपस्थित रहेका थिए । हाल विश्वासको मतको मताधिकार एमालेका १ सय २१, माओवादी केन्द्रका ४८, कांग्रेसका ६१, जनता समाजवादी पार्टीका ३२ तथा राष्ट्रिय जनमोर्चा, नेपाल मजदूर किसान पार्टी, राष्ट्रिय प्रजातन्त्र पार्टी र स्वतन्त्र सांसदलाई १/१ मताधिकार रहेको थियो ।
सभामुख सापकोटाले अर्को बैठक बैशाख ३० गते विहीबार दिउँसो साँढे १ बजेको लागि बोलाएका छन् ।
मकवानपुर । यस वर्षकाे एसईई र कक्षा १२ को परीक्षा स्थगित भएकाे छ । राष्ट्रिय परीक्षा बोर्डकाे सोमबार बिहान बैठकले एसइई र कक्षा १२ को परिक्षा अर्को सूचना नभएसम्म स्थगित गर्ने निर्णय गरेकाे हो ।
अहिले कोरोना संक्रमणका कारण परीक्षा हुने अवस्था नरहेको भन्दै बोर्डले परीक्षा स्थगित गरेकाे हाे । बोर्डले यस अघि नै जेठ १३ गतेबाट एसईई र जेठ २६ गतेबाट कक्षा १२ को परीक्षा संचालन गर्ने परीक्षा तालिका प्रकाशित गरेकाे थियो ।
जेठ १३ गतेबाट सञ्चालन हुने एसईईका लागि प्रश्नपत्र छपाइदेखि अन्य तयारी समेत पुरा भएको थियो । हाल ५ लाख १७ हजार विद्यार्थी एसईईको तयारी छन् भने कक्षा १२ मा करिब ४ लाख परीक्षार्थी रहेका छन् । गतवर्ष पनि कोरोना महामारीका कारण एसईईका परीक्षार्थीलाई विद्यालयले गरेको आन्तरिक मूल्याङ्कनका आधारमा नतिजा प्रकाशित गरिएको थियो ।
बोर्ड बैठकले एसईई र कक्षा १२ को परीक्षा सञ्चालनका लागि अध्ययन गर्न ५ सदस्यीय कार्यदल गठन गरेको छ । शिक्षा तथा मानव स्रोत विकास केन्द्रका महानिर्देशक वैकुण्ठ अर्यालको संयोजकत्वमा कार्यदल गठन गरिएको हो । महामारीको अवस्था कायमै रहे भौतिक उपस्थितिमा परीक्षा सञ्चालन गर्ने अवस्था नरहे के कसरी अघि बढ्ने मोडालिटी तय गर्न कार्यदल बनाइएको बोर्डले जनाएको छ ।
यस वर्ष कक्षा १२ को हकमा भने इन्टरनेट सुविधा भएका परीक्षा केन्द्रमा अनलाइनबाट प्रश्नपत्र पठाएर परीक्षा लिने तयारी बोर्डको छ । कोरोना महामारीका कारण गत वर्ष पनि अनलाइनबाटै प्रश्नपत्र पठाएर घरपायक परीक्षा केन्द्रमा परीक्षा सञ्चालन गरिएको थियो ।
मकवानपुर । मकवानपुरकाे ३ स्थानीय तहमा पूर्ण र १ स्थानीय तहमा जारी निषेधाज्ञा कडा गरिने भएकाे छ । हेटौंडा उपमहानगरपालिका, थाहा नगरपालिका र भीमफेदी गाँउपालिका बजार क्षेत्रमा निषेधाज्ञाको लागु हुँदा पनि चहलपहल बढेकाेले जिल्ला प्रशासन कार्यालयले साेमबार बैशाख २७ गतेबाट अझ कडाई गर्ने भएको हो ।
अहिले काेराेना संक्रमणकाे अवस्था गम्भिर बन्दै गएकोमा जनताले प्रशासनलाई साथ नदिए स्थिती झन कडा हुने प्रमुख जिल्ला अधिकारी भरमणी पाण्डेले बताए । निषेधाज्ञा उल्लघन गरी सवारी साधन चलाएकाे पाइएमा सवारी साधन होल्ड गरिने पाण्डेले बताए । उनले अतिआवश्यक नभई घरबाहिर ननिस्कन जिल्लाबासीलाई आग्रह समेत गरेका छन् । आइतबार जिल्ला प्रशासन कार्यलय मकवानपुरले सूचना जारी गरी निषेधाज्ञाका बाबजुद बिहान र बेलुका बाहिर मानिसहरूको भिडभाड देखिएको हुँदा औषधी उपचार र तोकिएको समयमा अत्यावश्यक खाद्य सामग्री खरिद गर्न बाहेक अन्य प्रयोजनका लागि बाहिर हिंडडुल नगर्न, नगराउन भनेकाे छ ।
यसै गरी अत्यावश्यक खाद्य सामग्रीहरू नजिकको स्थानीय पसलमा नै खरिद गर्न, विरामी बोकेका सवारी साधन, जिल्ला प्रशासन कार्यालयबाट अनुमति प्राप्त सवारी साधनहरू एवं तोकिएका सवारी साधनहरू बाहेक अन्य सवारी साधनहरू सञ्चालन नगर्न, नगराउन सबैमा अनुरोध गरेकाे छ ।सूचनाको अवज्ञा गरी अनावश्यक बाहिर हिंडडुल (पैदल वा सवारी साधनमा) गरेको पाइएमा संक्रामक रोग ऐन, २०२० र स्थानीय प्रशासन ऐन, २०२८ बमोजिम कडाभन्दा कडा कारबाही हुने प्रशासनले जनाएकाे छ ।
९० सवारी नियन्त्रणमा
यसै गरी जिल्ला प्रहरी कार्यालय मकवानपुरले आइतबार जिल्लामा निषेधाज्ञा अटेर गरेर चलाएको ९० सवारीलाई नियन्त्रणमा लिएको छ ।
प्रहरी नायव उपरीक्षक समेतको चेकिङ टोलिले जिल्ला प्रशासन कार्यालय मकवानपुरबाट निर्णय भएको निषेधाज्ञा उल्लंघन गर्ने मोटरसाइकल तथा स्कुटर ५६ वटा, अटो १० वटा, ट्रक १५ वटा, कार २ वटा र बस ७ वटा गरी जम्मा ९० वटा सवारी साधनहरुलाई नियन्त्रणमा लिएको छ ।
निषेधाज्ञा अटेर गरी पसल संचालन गर्ने २ जना पसल संचालकलाई नियन्त्रणमा लिई संक्रामक रोग ऐन, २०२० बमोजिम आवश्यरक कारवाहिको लागी जिल्ला प्रशासन कार्यालय मकवानपुरमा पेश गरिएकाे मकवानपुर प्रहरीले जनाएकाे छ ।

मकवानपुर । मकवानपुरगढी गाउँपालिकाका जनप्रतिनिधिले प्रयोग गर्दै आएको सवारी साधन कोरोना संक्रमितलाई बोक्न प्रयोग गरिने भएको छ ।
गाउँपालिकामा जनप्रतिनिधिले प्रयोग गर्दे आएको बा १ झ ९२०४ नंबरको सवारी कोरोना संक्रमित बिमारीलाई अस्पताल लैजाने तथा ल्याउने काममा प्रयोग गरिने गाउँपालिकाका प्रमुख प्रशासकीय अधिकृत रामकुमार पुडासैनले जानकारी दिएका छन् ।
गाउँपालिकाकाले एक सूचना जारी गर्दै जनप्रतिनिधिले प्रयोग गर्ने एउटा सवारी साधन र वडा नंबर २ शिखरकटेरीमा रहेको मकवानपुरगढी स्वास्थ्य चौकीको एम्बुलेन्स समेत कोरोना संक्रमित अस्पताल लैजान तथा ल्याउन प्रयोग गरिने जनाएकाे छ