मकवानपुर । मकवानपुर प्रहरीले लागुऔषध जस्तै देखिने पदार्थ सहित हेटाैडाबाट ३ जना पक्राउ गरेकाे छ । पक्राउ पर्नेमा हेटौंडा–५ का ३२ वर्षीय एन्जल मास्के, हेटौंडा–१४ का ३० वर्षीय सरोज डंगोल र हेटौंडा–१ का ३४ वर्षीय शुशिल कुमार लामा रहेको जिल्ला प्रहरी कार्यालय मकवानपुरले जनाएको छ ।
सोमबार जिल्ला प्रहरी कार्यालय मकवानपुरबाट खटिएको टोलीले हेटौंडा–५ मास्केको घरकोठामा चेकजाँच गर्दा निजको साथबाट लागुऔषध खैरो हेरोईन जस्तो देखीने पदार्थ २ सय ५० मिलिग्राम फेला परेको हो ।
डंगोल र लामालाई लागुऔषध जस्तो देखिने पदार्थ खरिद गर्न मास्केको घरमा आएको बोला पक्राउ गरीएको जिल्ला प्रहरी कार्यालय मकवानपुरका प्रवक्ता एवम् डिएसपी जयश्वर रिमालले जानकारी दिए । उनीहरुलाई नियन्त्रणमा लिई थप अनुसन्धान भईरहेको उनले बताए ।
मकवानपुर / हात हातमा मोबाइल, मोबाइलमा इन्टरनेट पहुँच, इन्टरनेट तथा गुगलमा साँघुरीएको विश्व । खोज गर्न चाहेको विषय वस्तु एक क्लिक मै फेला पर्ने प्रविधिसँगै घट्दै आएको छ पुस्तकालय धाउने प्रचलन । पछिल्लो पुस्ताहरु पुस्तकालय धाएर पुस्तक तथा पत्रपत्रिका पढ्ने संस्कृती बारे लगभग अनविज्ञ हुन थालेका छन् ।
इन्टरनेटले साँघुरो बनाएको दुनियाँबाट लोप हुँदै आएको पुस्तकालय शिक्षा प्रणालीलाई मकवानपुरमा भने ब्युँताउने अभियान नै थालिएको छ । लामो समयदेखि बन्द रहेको पुस्तकालयहरु केही युवाहरुको पहलमा मकवानपुर जिल्लामा पुनः सुरु गर्ने र नयाँ खोल्ने अभियान नै थालिएको हो । प्राध्यापक तथा पत्रकार सुरेश श्रेष्ठ पछिल्लो समय प्राध्यापन र पत्रकारीतासँगै पुस्तकालय स्थापना गरी पठन संस्कृतीको विकासमा लागि परेका छन् ।
लोप हुँदै गएका विविध विषयहरुको अध्ययन, अनुसन्धान तथा खोजका लागि सहयोगी बन्न सक्ने पुस्तकालय शिक्षा प्रणाली आफैं मा लोप हुनथालेपछि यस क्षेत्रमा विशेष चासो र चिन्तन राख्नेहरुको लागि आफूहरुको अभियान सहयोगि बन्ने श्रेष्ठले बताए । मकवानपुरमा खोलिएका सामुदायिक तथा संस्थागत पुस्तकालयहरु आर्थिक अभाव तथा मानवीय निक्रियताका कारण पुस्तकालय शिक्षामा रम्नेहरु केही वर्षयता एकाएक घट्दै आएपछि यो अभियान थालिएको हो ।
हेटौंडाको चौघडामा नवजीवन ज्योति क्लबद्वारा सञ्चालित शान्ति पुस्तकालय १५ वर्षपछि अभियान टोलीको सकृयतामा हाल पुनः सुरु गरिएको छ । २० वर्षअघि ठेलामा पत्रपत्रिका र पुस्तकहरु लिएर पाठकहरुलाई ठाउँ ठाउँमा वितरण गर्दै अध्ययनको सेवा पु-याउने पुस्तकालय क्लबको एउटा कोठा मै सिमित थियो । विषेशतः गृहेणी, बालबालिका र सावारी चालकहरुलाई मध्यनजर गरी पुस्तक, पत्रपत्रिकाहरु वितारण गर्ने गरेको थियो ।
सञ्चारको बहुप्रयोगका कारण पुस्तकालय शिक्षामा चासो राख्नेहरु नै कम भएपछि पाठककै अभावमा पुस्तकालयहरु बन्द गर्नुपरेको थियो । पछिल्लो पटक यसवर्ष पुस्तकालय अभियान टोलीको सक्रियतामा पुस्तकालय व्यवस्थित रुपमा सुरु गरिएको छ । यसैगरी हेटौंडा–१, चौकीटोलस्थित नवज्योति पुस्तकालय पुनः सञ्चालनमा आउने भएको छ । पुस्तकालय पुनः सञ्चालनका लागि स्थानीयको भेलाले उत्सव ढुंगानाको संयोजकत्वमा ७ सदस्यीय पुस्तकालय सञ्चालन तथा व्यवस्थापन तदर्थ समिति गठन गरिएको स्थानीय सन्तोष पराजुलीले जानकारी दिए । २०४७ सालमा स्थापना भएको पुस्तकालय २०५७ सालदेखि बन्द भएको थियो ।
पुस्तकालय अभियान समूह मकवानपुरको सहयोगमा विगतमा बन्द रहेका र नयाँ स्थापना गरेर पुस्तकालय सञ्चालमा ल्याउन थालिएको छ । पुस्तकालय पुनः सञ्चालनका लागि पुस्तकालय अभियान समूहले ५० हजार रुपैयाँ बराबरको पुस्तक सहयोग गर्दैै आएको छ । १५ भदौ अर्थात् राष्ट्रिय पुस्तकालय दिवसको अवसरमा पुस्तकालय अभियान समूहले हेटौंडा–१, चौकीटोलस्थित नवज्योति पुस्तकालयसँगै मकवानपुर जिल्लामा ७ स्थानमा ७ वटा पुस्तकालय एकैदिन स्थापना गर्ने तयारी गरिरहेको अभियान समूहका सदस्य रोशन खनालले जानकारी दिए ।
स्थानीय सहकारी तथा टोल समूहहरुले समेत सञ्चालनमा ल्याएका कयौं पुस्तकालयहरु बन्द रहेको बेला मकवानपुरको पुस्तकालय सञ्चालन अभियान टोलीले पठन संस्कृतिको विकासको लागि योगदान गरेको पत्रकार सुरेश श्रेष्ठले बताए । “पठन संस्कृति हराउँदै गयो अनि हामीले यो पहल थालेका हौ” पत्रकार श्रेष्ठले भने ।
हेटौंडामा रहेको पुष्पलाल स्मृति पुस्तकालय धिमा गतिमा सञ्चालित छ । यहाँ पहिले जस्तो पाठकको चाप नभएको तर,बन्द नै गर्नुपर्ने अवस्था पनि नभएको पुस्तकालय व्यवस्थापनले जनाएको छ । पुस्तकालयलाई आर्थिक संकटबाट मुक्त राख्न नै सबै भन्दा मुख्य समस्या हुने गरेको छ ।
यसो त एशियाकै ठूलो पुस्तकालयको दाबी गरिंदै आएको हेटाैंडाको वन विज्ञान अध्ययन संस्थानको पुस्तकालयमा बाह्य पाठकहरुले प्रवेश गर्ने अवसर पाएका छैनन् ।
शहरमा रहने र सञ्चारको पहुँचलाई समात्न सक्ने विद्यार्थीहरु पुस्तकालयभन्दा मोबाइल र इन्टरनेमा रमाउँछन् । समयको सदुपयोग गर्न मोबाइल इन्टरनेट नै सहज भएपनि पुस्तक पढ्नुको मज्जा मोबाइलको इन्टरनेटले दिनै नसक्ने बताउँछन् साहित्यकार तथा प्राध्यायक घनश्याम घिमिरे ।
“व्यस्त जीवन शैलीको कारण पठन संस्कृती पनि विस्तारै लोप हुदैं आएको छ” मकवानपुर बहुमुखि क्याम्पसका उपप्राध्यापक निरा शर्मा गुरागाईले भनिन् “कामको व्यस्तताबाट बचेको समय आराम र मनोरञ्जनमा लगाउने धेरै छन्,फेसबुक टीकटकलगायतको सामाजिक सञ्जालमा समय बिताउनेहरु बढेका छन्,अध्ययन र खोजको लागि त्यति ध्यान जाँदैन अचेल ।”
‘पुस्तकालयमा पसेर पुस्तकहरु खोजिरहने समयमा इन्टरनेटबाट धेरै जानकारी बटुल्न सकिन्छ’ हेटौंडा–५ का रोजिन श्रेष्ठले भने । “पुस्तकहरुमा भन्दा इन्टरनेटमा अपडेट सामग्री पाइने भएकोले पुस्तकालयको पाठक घटेका हुनसक्छन” श्रेष्ठले भने “तर, पुस्तक तथा पत्रपत्रिकाको महत्वलाई कम आँक्न भने हुन्न ।” अभियानकर्मीहरुले स्थानीय स्तरबाट पनि पुस्तक संकलन अभियान समेत सञ्चालन गर्दै आएको छ ।
मकवानपुर जिल्ला बकैया गाउँपालिकामा पुस्तकालय निर्माण अगावै समुदायस्तरबाट सयौं पुस्तकहरु पुस्तकालयको लागि प्राप्त भएको अभियानकर्मी गोबिन्द चौलागाईले बताए ।
आज एकै दिन ५ वटा पुस्तकालय सुरु गरिदै
१४ औं राष्ट्रिय पुस्तकालय दिवसको अवसर पारेर आज मंगलबार पुस्तकालय अभियान समूह मकवानपुरले जिल्लाका ५ स्थानमा पुस्तकालय सुरुवात गर्न लागेको छ ।
हेटौंडा–१ मा चौकिटोलमा नवज्योति पुस्तकालय, हेटौंडा–१८ दोभान चौरमा दोभानचौर सामुदायिक पुस्तकालय, बकैया गाउँपालिका–७, हात्तीचरणमा हात्तीचरण सामुदायिक पुस्तकालय, मकवानपुरगढी गाउँपालिका–५, धादिङमा हाम्रो सामुदायिक पुस्तकालय, भीमफेदी गाउँपालिका–४, निबुवाटारमा ज्ञानज्योति पुस्तकालय आजबाट सुरु गरिदै छ ।
पुस्तकालय अभियान समूहले यसअघि जिल्लाका ५ स्थानीय तहमा ६ वटा र छिमेकी जिल्ला बाराको निजगढ नगरपालिकामा एउटा गरी ७ वटा पुस्तकालय स्थापना गरिसकेको छ ।
मकवानपुर । जिल्ला प्रशासन कार्यलय मकवानपुरबाट प्रदान गरिने सेवा प्रवाह आज भदाै १५ गतेबाट नियमित हुने भएकाे छ ।
मकवानपुर जिल्लामा कोरोना संक्रमणको जोखिम रहेकाे कारण अनावश्यक भिडभाड कम गर्न प्रशासनले पछिल्लाे समय गत साउन २८ गतेबाट सेवा प्रवाहमा अालाेपालाे दिन ताेकेकाे थियाे ।
भदाै १३ गते आइतबार सूचना जारी गर्दै प्रशासन कार्यलय मकवानपुरले भदौ १५ गतेबाट नागरिकता र राहदानी सम्बन्धी सेवामा लगाएको आलोपालो व्यवस्था हटाएको जनाएकाे छ ।
जिल्लामा कोरोना भाइरसको संक्रमण दर बढ्दै गएपछि जिल्ला प्रशासन कार्यालय मकवानपुरले साउन २८ गतेबाट नागरिकता र राहदानी सम्बन्धी सेवाहरु निश्तिच दिनमा मात्रै प्रदान गर्दै आएको थियो ।

मकवानपुर । मकवानपुरका १५ वटा स्वास्थ्य संस्थालाई अक्सिजन कन्सर्नट्रेटर हस्तान्तरण गरिएकाे छ । भदाै १४ गते साेमबार माउन्टेन हार्ट नेपाल र हेटौंडा-६ नम्बर वडा कार्यालयले मकवानपुरका विभिन्न १५ स्वास्थ्य संस्थालाई सोमबार अक्सिजन कन्सर्नट्रेटर एवं स्वास्थ्य सामग्री हस्तान्तरण गरिएको हाे ।
हेटौंडा-६ रामनगरस्थित निर्माणाधिन सिद्धस्थली ग्रामीण सामुदायिक अस्पताल परिसरमा नेपाली कांग्रेसकी केन्द्रीय सदस्य महालक्ष्मी उपाध्याय डिनाको प्रमुख आतिथ्यता एवं हेटौंडा-६ का वडा अध्यक्ष अर्जुनप्रसाद चौलागाईंको अध्यक्षतामा अक्सिजन कन्सर्नट्रेटर एवं स्वास्थ्य सामग्री हस्तान्तरण भएको हो ।
कार्यक्रममा बकैया गाउँपालिका ३, बागमती गाउँपालिका २, मकवानपुरगढी गाउँपालिका ७, भीमफेदी गाउँपालिका ७, हेटौंडा वडा नम्बर ३, ५, ६, ९, १२, १३, १४, १५, १६, १८ र १९ का स्वास्थ्य चौकीलाई ७ लिटरको अक्सिजन कन्सर्नट्रेटर र स्वास्थ्य सामग्री हस्तान्तरण गरिएको छ ।
कार्यक्रममा हेटौंडा-१५ का अध्यक्ष महारत्न लामा, हेटौंडा-१२ का अध्यक्ष ललित घलान, हेटौंडा-३ का अध्यक्ष रामकुमार पुडासैनी, हेटौंडा-१९ का अध्यक्ष नरनाथ सुवेदी, हेटौंडा-१६ का वडा अध्यक्ष रामकृष्ण कोइराला, हेटौंडा-६ का वडा सदस्य राजकुमार बास्तोला, हेटौंडा-५ का वडा सदस्य ज्ञानु थापा, कांग्रेस नगर अध्यक्ष आनन्दराम पराजुलीकाे उपस्थिति थियाे ।
यसै गरी मकवानपुरगढी-७ का अध्यक्ष सूर्यबहादुर रूम्बा, सिद्धस्थली अस्पतालका प्रतिनिधि गोमा गौतम, गौतम समाज बागमती प्रदेश अध्यक्ष होमनाथ गौतम, हेटौंडा अस्पताल संचालन एवं व्यवस्थापन समितिका सदस्य उत्सव चौलागाईं, जनप्रिय प्राविधिक शिक्षालयका अध्यक्ष रमेश खतिवडा, सहयोगी मन नेपालका अध्यक्ष केदार चौलागाईं, सिद्धस्थली अस्पताल संचालक समिति सदस्य विष्णु ढुंगाना लगायतको उपस्थिति रहेको थियो ।
कार्यक्रममा करिब ३७ लाख ५० हजार रूपैयाँ बराबरका सामग्री हस्तान्तरण गरिएको वडा अध्यक्ष चौलागाईंले जानकारी दिए ।
मकवानपुर । मकवानपुरमा ३१ जना काेराेना संक्रमित थपिएका छन् । जिल्लामा पछिल्लो २४ घण्टामा थप ३१ जनामा कोरोना भाइरस संक्रमण पुष्टि भएसँगै संक्रमित संख्या थपिएका हुन् ।
१ सय पीसीआर परीक्षणमा ३० जना र २ सय ७३ जनामा एन्टीजेन परीक्षणमा १ जना गरी थप ३१ जनामा कोरोना पुष्टि भएको स्वास्थ्य कार्यलय मकवानपुरले जनाएको छ । काेराेना पुष्टि हुने ३१ जना हेटौंडा उपमहानगरपालिका भित्रका रहेका छन् । यो संगै जिल्लामा हालसम्म १४ हजार ७ सय ५६ जनामा कोरोना पुष्टि भएकाे छ ।
यसैगरि जिल्लामा पछिल्लो २४ घण्टामा थप १० जनाले कोरोना संक्रमणमुक्त भएका छन् । हाेम अाइसाेलेसनमारहेका ६ जना र संस्थागत आइसोलेसनबाट ४ जना गरी १० जना संक्रमित कोरोना निकाे भएका कार्यलयले जनाएको छ । याे समेत जिल्लामा १४ हजार २ सय ५२ जना कोरोना संक्रमण निकाे भएकाे कार्यलयले जनाएको छ ।
जिल्लामा हालसम्म कोरोनाको कारण १ सय ६१ जनाको मृत्यु भएको छ । जिल्लामा कोरोनाको कारण सबैभन्दा बढी हेटौंडा उपमहानगरपालिका भित्रका १ सय १४ जनाको मृत्यु भएको छ । यसै गरी मनहरी गाउँपालिका भित्रका १३ जना, थाहा नगरपालिका भित्रका ९ जना, भीमफेदी भित्रका ७ जना, मकवानपुरगढी र बकैया भित्रका ५/५ जना,बागमती भित्रका ४ जना,कैलाश र राक्सिराङ गाउँपालिका भित्रका २/२ जना काे मृत्यु भएकाे छ ।
हाल जिल्लामा ३ सय २ जना संक्रिय संक्रमित उपचाररत रहेका छन् । जसमा २ सय ७४ जना आफ्नै घरमा र २८ जना संस्थागत आइसोलेसनमा उपचाररत रहेको स्वास्थ्य कार्यलय मकवानपुरले जनाएको छ ।