मकवानपुर । बागमती प्रदेश प्रहरी कार्यालयले बागमती प्रदेश अन्तर्गतका मातहत जिल्ला प्रहरी कार्यालय तथा जिल्ला ट्राफिक प्रहरी कार्यालयलाई ब्यारिकेट वितरण गरेकाे छ । बढ्दो सवारी दुर्घटना न्युनिकरणका निमित्त ट्राफिक व्यवस्थापन एवम् सुरक्षा चेकजाँचलाई प्रभावकारीता दिन ब्यारिकेट वितरण गरिएको हाे ।
सवारी साधनको प्रयोग गरी दुर्घटना तथा विभिन्न अपराधिक घटना घटाई अपराधी फरार हुने हुँदा भरपर्दो सुरक्षा चेकजाँचका लागि बागमती प्रदेश अन्तर्गतका विभिन्न प्रहरी ईकाईहरुलाई १२ थान ब्यारिकेट वितरण गरिएको प्रदेश प्रहरी प्रवक्ता प्रहरी उपरीक्षक नवराज अधिकारीले जानकारी दिए ।
प्रहरीलाई साधनस्रोत सम्पन्न गराई समाजमा शान्ति सुरक्षा कायम गर्न तथा अपराध न्युनिकरणका लागि समुदाय प्रहरी साझेदारी कार्यक्रम अन्तर्गत प्रदेश प्रहरी कार्यालयको पहलमा उक्त ब्यारिकेट वितरण गरी प्रयोगमा ल्याईएको अधिकारीले बताए ।
मकवानपुर । हास्य कलाकार मनोज गजुरेलले बिबाह गरेका छन् । गजुरेल र मञ्जु पोखरेल बीच सोमबार बिबाह गरेका हुन् । मनोजको यो दोस्रो बिहे हो । उनकले चार वर्षअघि मिना ढकालसँग सम्बन्ध विच्छेद गरेका थिए । पोखरेल नेपाल सरकारको न्याय सेवाककाे अधिकृत हुन् ।
कलाकार गजुरेल र पोखरेलले भक्तपुरको डोलेश्वर महादेव मन्दिरमा बिहे गरेका हुन् । मन्दिरमा बिहे गरेपछि कौशलटारस्थित मानव सेवाआश्रममा रहेका वृद्धवृद्धालाई उनीहरूले खाना खुवाएका थिए । आफ्ना सन्तानको सहमति र सुझावका आधारमा दोस्रो बिहे गरेको उनले बताएका छन् । फेुसबुकमा गजुरेलले बिबाहकाे जानकारी सहित फाेटाे राख्दै आफ्नो बिबाहका विषयमा नकारात्मक कमेन्ट नगरिदिन आग्रह गरेका छन् ।
मनाेज गजुरेलकाे फेसबुक स्टाटस:
आफन्त, साथी तथा शुभचिन्तकहरुमा सुखद जानकारी !
जीवन सधैँ सरल रेखामा नहिंड्ने रहेछ । मेरो लामो वैवाहिक जीवन ४ बर्षपहिलेकानुनीरुपमा टुंगिएको कुरा यहाँहरुलाई विदितै छ । त्यसयता म मेरा छोरा र छोरीको एकल अभिभावक भएर बसिरहेको जानकारी पनि जगजाहेर नैतिकताको छ ।
जीवनयात्राको दौरानमा आत्मीय साथको आवश्यकता महशुस हुनु स्वाभाविकै हो । त्यसैगरी मेरा बाबु-नानीको शिक्षा, स्वास्थ्य र भविष्यको बारेमा संवेदनशिल हुनुपनि जरुरी थियो । यी दुबै अवस्थामा साथदिने सहयात्रीको अभाव समयक्रममा खड्किँदै आयो । बाबुनानीको आग्रह पनि यस्तै आउन थाल्यो । यसै क्रममा नेपाल सरकारको न्याय सेवाकी अधिकृत मन्जु पोखरेलजीसँग मेरो चिनजान हुनपुग्यो । बिस्तारै हाम्रो घनिष्टता बढ्न थाल्यो । एकैखालको परिबेश र उस्तै खालको भोगाईबाट गुज्रिएका हामी अन्ततः सहयात्रा गर्ने निर्णयमा पुग्यौं ।
एकअर्काका जिम्मेवारीलाई साझा जिम्मेवारी मानेर पूरा गर्ने बाचा गर्याैं । अगाडि आईपर्ने सु:ख/दु:खलाई मिलेर स्वीकार र प्रतिकार गर्ने संकल्प लियाैं । हामीलाई यो निर्णयमा पुग्न हाम्रा बाबुनानीहरुको सुझाव र सहमतीले पनि ठूलो मद्धत गर्यो ।सम्पुर्ण मिडियाकर्मी साथीहरुलाई सादर अनुरोध छ- कृपया मेरो व्यक्तिगत जीवनका बारेमा काल्पनिक समाचार नलेखिदिनुहोला । मन्जुजीको इज्जत र प्रतिष्ठामा आँच आउने अमर्यादित कथा नकथिदिनुहोला । हाम्रा सन्तानको सुख र शान्तीकालागि परपीडक ट्रोल र भिडियो नबनाईदिनु होला !
कसैको निजी जीवनका बारेमा कपोकल्पित समाचार बनाउने, असम्बन्धित मान्छेसँग नाम जाेड्ने, हाम्रो विगतको जीवन, वर्तमानको विवाह तथा भविस्यको योजनाका बारेमा अनुमानकारिता नगर्नुहुन पनि अनुरोध गर्दछु । त्यसैगरी हाम्रो नितान्त व्यक्तिगत मामिलाका बारेमा अनाबश्यक सामग्री बनाउने कानुनी, व्यवहारिक र सामाजिक अनुमति कसैलाई नभएको कुरापनि जोडदार रुपमा जाहेर गर्दछु । बिगतका अराजक अन्तर्वार्ता, असामाजिक क्रियाकलाप तथा अभद्र व्यवहारका कारण म र मेरा छोराछोरीले ठूलो आघातबाट गुज्रनु परेको छ । त्यस्ता क्रियाकलापलाई स्थान दिने, उचाल्ने र गिजोल्ने युट्युब, अनलाइन समाचार, टिकटक लगायत संजालका प्रयोगकर्ताहरुलाई पनि भद्र सुझाव छ- कृपया एउटा जिम्मेवार अभिभावक भएर बोल्ने र लेख्ने गर्नुहोला ।

सामाजिक सन्जालको चरम दुरुपयोगले आफू र आफ्ना सन्तानलाई पार्न सक्ने गंभिर असरलाई पनि महशुस गर्नुहोला ।अन्त्यमा, पुनः सम्पुर्णं आफन्त, साथी तथा शुभचिन्तकहरुलाई यो सुखद जानकारी गराउछौँ कि हामीले आज मिति २०७८ साल असोज २५ गते सोमबार बिहान डोलेश्वर महादेवकाे दर्शन गर्यौँ । त्यसपछि परिवारको उपस्थितिमा त्यहीँ विवाह सम्पन्न गर्यौँ ।
अनि, सपरिवार मानवसेवा आश्रम (कौशलटार)मा रहेका बुवाआमालाई खाना खुवाएर/खाएर विवाह सम्पन्न गरेकाछौँ । परिस्थिति सिर्जित हाम्रो यो नयाँ अध्यायलाई शुभकामना र आशिर्वाद प्रदान गर्ने सबैलाई धन्यवाद । नवदुर्गा भवानीले सबैको रक्षा गरुन् । बडादशैँकाे हार्दिक शुभकामना ।
मकवानपुर /बागमती प्रदेशको मुख्यमन्त्री अष्टलक्ष्मी शाक्यले प्रदेशको नवौं अधिवेशनमा विश्वासको मतको प्रस्ताव पेश गरेकी छिन् । मुख्यमन्त्री शाक्यको विश्वासको मतको लागि आगामी ४ कात्तिकका प्रदेश सभा बैठक बस्ने भएको छ ।
प्रदेश सरकारले २४ असोजमा बोलाएको प्रदेश सभाको नवौं अधिवेशन मुख्यमन्त्री शाक्यले विश्वासको मतको प्रस्ताव पेश गरेपछि सदन ४ कात्तिक दिउँसो १ बजेसम्मको लागि बैठक स्थागित गरिएको सभामुख सानुकुमार श्रेष्ठले बताए । प्रदेशसभाको बैठकमा मुख्यमन्त्री शाक्यले आजै विश्वासको मत लिने सम्भावना प्रवल रहेको चर्चा हुदै गर्दा सदन स्थागित भएको थियो ।
एमाले विभाजन भएसँगै बागमती प्रदेशकी मुख्यमन्त्री अष्टलक्ष्मी शाक्य अल्पमतमा परेकी छन् । एमालेका १३ सांसदले विभाजनपछि नेकपा एकीकृत समाजवादी पार्टी रोजेपछि शाक्यले विश्वासको मत दिन लागेकी हुन् ।
बागमती प्रदेशसभा कुल ११० सदस्यहरु मध्ये हाल १०९ सांसदहरु रहेका छन् । जसमा एमालेमा ४३, कांग्रेसमा २२, माओवादीमा २३, समाजवादीमा १३, विवेकशील साझामा ३, नेमकिपामा २, राप्रपामा २ र स्वतन्त्र सांसद एक जना छन् ।
नेपालको संविधानको धारा १८८ (२) अनुसार शाक्यले विश्वासको मतको लागि सदनमा प्रस्ताव पेश गरेकी हुन् । २४ असोजमा बसेको प्रदेश सभाको दास्रो बैठक मुख्यमन्त्री शाक्यले विश्वासको मतको लागि प्रस्ताव पेश गरेपछि ७ मिनेटमै स्थागित गरिएको थियो ।
मकवानपुर / बागमती प्रदेशकी मुख्यमन्त्री अष्टलक्ष्मी शाक्यसहित नेवार समुदायका मन्त्रीहरु सम्मानित भएका छन् । नेवाः गुठी खलः मकवानपुरद्वारा शनिबार हेटौंडामा आयोजित विजया दशमीको शुभकामना आदनप्रदान तथा चियापान कार्यक्रममा बधाई तथा सम्मान गरिएको हो ।
कार्यक्रममा मुख्यमन्त्री शाक्यसहित आन्तरिक मामिला तथा कानून मन्त्री डा. अजयक्रान्ति शाक्य, उद्योग, पर्यटन, वन तथा वातावरण राज्यमन्त्री सरस्वती बाटी, सामाजिक विकास राज्यमन्त्री जुनेलीमाया श्रेष्ठलाई सम्मानित गरेको थियो । कार्यक्रममा मुख्यमन्त्री शाक्यको प्रमुख आतिथ्य तथा बागमती प्रदेशसभाका सभामुख सानुकुमार श्रेष्ठको विशेष आतिथ्य रहेको थियो ।
नेवाः गुठी खलः मकवानपुरका अध्यक्ष अनिल खड्गेको अध्यक्षतामा भएको कार्यक्रममा नेपाली कांग्रेस मकवानपुरका सल्लाहकार अशोक शाक्य, नेकपा माओवादी केन्द्रका बागमती प्रदेश समिति सदस्य ललित घलान, नेवाः साँस्कृतिक पुचः मकवानपुरका अध्यक्ष विष्णुगोपाल श्रेष्ठ, नेवाः गुठी खलःका उपाध्यक्ष यज्ञबहादुर श्रेष्ठले मन्तव्य व्यक्त गरेका थिए । नेपाल बुद्धिचाल संघका अध्यक्ष एकालाल श्रेष्ठ, शिक्षाविद् देवप्रसाद श्रेष्ठ, मकवानपुर जिल्ला भलिबल संघका अध्यक्ष विन्द्रलाल श्रेष्ठ लगायतको आतिथ्य रहेको कार्यक्रममा नेवाः गुठी खलःका महासचिव देवकुमार श्रेष्ठले सहजिकरण गरेका थिए ।
मकवानपुर । बागमती प्रदेशका मुख्यमन्त्री अष्टलक्ष्मी शाक्यले आज असेाज २४ गते आइतबार विश्वासको मत लिँदैछिन् । सत्तारुढ दल एमाले विभाजनसँगै बागमती प्रदेशसभामा एमालेका १३ जना प्रदेशसभा सदस्यले माधवकुमार नेपाल नेतृत्वको नेकपा (एकीकृत समाजवादी) रोजेपछि शाक्य नेतृत्वको सरकार अल्पमतमा परेको हाे ।
अल्पमतमा परेपछि शाक्य नेतृत्वको सरकारले प्रदेशसभाबाट विश्वासको मत लिनुपर्ने अवस्था आएको हो । आइतबार दिउँसो ३ बजे बस्ने प्रदेशसभा बैठकमा शाक्यले विश्वासको मत लिन लागेकी हुन् । नेकपा एमाले पार्टीभित्रको विवादमा माधव नेपालाई साथ दिँदै आएकी शाक्यलाई पार्टी विभाजन हुँदा नेपाल पक्षकाे साथ टुटाउन एमाले अध्यक्ष केपी ओली खेमाले हतारमा मुख्यन्त्री नियुक्त गरेको थियो । बागमती प्रदेशका मुख्यमन्त्री डाेरमणि पाैडेललाई राजिनामा गर्न लगाएर गत भदाै २ गते राती मुख्यमन्त्रीकाे सपथ लिएका शाक्यले भने पार्टी जाेगाउन मुख्यमन्त्री स्वीकार गरेकाे बताउँदै आएकी छिन् ।
बागमती प्रदेशमा कुल १ सय १० जना सांसदमध्ये एक सिट रिक्त छ । कोरोनाका कारण दोलखाबाट निर्वाचित प्रदेशसभा सदस्य पशुपति चौलागाईको निधनपछि एक सिट खाली भएको हो । हाल बागमती प्रदेशसभामा १ सय ९ जना सांसद छन् । बागमती प्रदेशसभामा बहुमतका लागि कम्तीमा पनि ५५ जना सांसद आवश्यक हुन्छ । प्रदेशसभामा एमालेका सभामुखसहित हाल ४३ जनामात्रै सांसद छन् । त्यसैले मुख्यमन्त्री शाक्यले प्रदेशसभाबाट विश्वासको मत पाउने अवस्था देखिदैन ।
शेर बहादुर देउवा नेतृत्वकाे गठबन्धनले बागमती प्रदेश र प्रदेश १ मा नेकपा एस लाई मुख्यमन्त्री दिने सहमती गरेर संघीय सरकार विस्तार गरेकाे छ । अहिलेकाे गठवन्धनले शाक्य नेतृत्वको बागमती प्रदेश सरकारकाे विकल्पमा एकीकृत समाजवादीका संसदीय दलका नेता राजेन्द्र पाण्डे नेतृत्वमा नयाँ सरकार गठन गर्ने तयारी अघि बढाएका छन् । एकीकृत समाजवादीका पाण्डेलाई सत्तारुढ गठबन्धले मुख्यमन्त्री बनाउने सहमती गरि सकेकाेले राजनीतिक उथलपुथल नभएमा बागमती प्रदेशमा पाण्डे तेस्राे मुख्यमन्त्री बन्नेछन् ।