मकवानपुर । बागमती प्रदेशको राजधानी हेटौंडामा पहिलो पटक प्रदेश स्तरीय महिला उद्यमी सम्मेलन तथा उपज प्रदर्शनी (मेला) हुने भएको छ ।
बागमती प्रदेश सरकार उद्योग वाणिज्य तथा उपभोक्ता हित संरक्षण निर्देशनालयको आयोजना तथा नेपाल घरेलु तथा साना उद्योग महासंघ बागमती प्रदेश समिति तथा प्रदेश महिला उद्यमी समितिको समन्वयमा कार्यक्रम हुने भएको हो ।
आगमी असार १३ र १४ गते हेटौंडाको रोयल पार्टी प्यालेसमा महिलाले उत्पादन गरेको सबै प्रकारको उपजहरुलाई प्रदर्शनीमा राखिने नेपाल घरेलु तथा साना उद्योग महासंघ बागमती प्रदेश समिति कार्यवाहक अध्यक्ष तथा प्रदर्शनी कार्यक्रमका संयोजक तारानाथ चौलागाईले बताए ।
चौलागाईका अनुसार प्रदर्शनीमा कम्तिमा ५० वटा स्टलहरुमा महिलाले उत्पादन गरेको उपजहरु राखिने छ । सम्मेलनमा सहभागीका रुपमा प्रदेशको १३ वटै जिल्लाबाट ७८ जना महिला उद्यामी प्रतिनिधिहरु, ३२ जना प्रदेश समिति तथा स्थानीय महिला उद्यमीहरु र २० जना आमन्त्रित महिला उद्यमीहरु रहने चौलागाईंले बताए ।
यसैगरी १३ जिल्लामा ३९ जना उद्यमीहरु उपज प्रदर्शनीमा सहभागी हुनेछन् । उनीहरुलाई उपज प्रदर्शनीको लागि निशुल्क स्टल उपलब्ध गराइने छ भने बस्ने र खाने व्यवस्था समेत आयोजकले नै व्यहोर्ने छ ।
प्रदर्शनीसँगै व्यवसयीक कार्याशाला समेत हुनेछ । कार्यशालामा विज्ञको कार्यपत्र प्रस्तुती हुनेछ । कार्यपत्रबाट कसरी व्यवसाय गर्ने भन्ने बारे शिक्षा समेत प्राप्त गर्न सकिने आयोजकले जनाएको छ । बिज्ञसंग व्यवसायीक अवसर, चुनौती बारे छलफल र जानकारी हुने, आपसी सम्पर्क बढ्ने हुँदा महिलाको लागि यो अवसर हुने संघको मकवानपुर जिल्ला महासचिव कुमार पौडेलले बताए ।
प्रदर्शनीमा ३० लाख खर्च अनुमान गरिएको संयोजक चौलागाईंले बताए । चादिको सामग्रीदेखि डलकुशनसम्मको प्रदेशनी रहने उनले बताए । प्रदर्शनी आम्दानीभन्दा महिलाहरुलाई प्रोत्साहन गर्ने उद्देश्यले आयोजना गर्न लागिएको निर्देशनालयले जनाएको छ ।
प्रदर्शनीबाट उद्यमी महिलाहरुसँगै सम्बन्धित जिल्लाको पहिचान बढ्ने र उद्यमी महिलाहरुलाई आपसी परिचय र छलफलले व्यवसायमा सफलता हासिल गर्न बल पुग्ने नेपाल घरेलु तथा साना उद्योग संघ मकवानपुर ज़िल्ला महिला उद्यमी समिति सभापति सन्तोषी बानियाँले बताइन् ।
“यो प्रदर्शनीले महिलालाई सहयोग गर्नेछ, दुर्गमका महिलालाई मेला अवसर बन्नेछ” बानियाँले भनिन् “महिलाहरुले घरैमा बसेर बनाएका अचार, दालमोठ, ऊनबाट बनेको मौसमी पोशाकहरु, हस्तकलाको सामानको बजार प्रवद्र्धनमा मेला मौका बन्ने छ ।” महिलाहरुले विभिन्न तालिम लिएर क्षमतावान बनेको भए पनि बिक्री वितरण हुन नसक्दा निराशा हुनु परेको अवस्थाबाट लयस्तो मेलाले माथि उठाउन पहल पुग्ने उनले बताइन् ।
आयोजकले शुक्रबार पत्रकार सम्मेलन गरेर प्रदर्शनीबारे जानकारी गराएको हो ।
मकवानपुर । नेकपा एमाले मकवानपुरले हेटौंडा उपमहानगरपालिकाको एघारौ नगर सभा स्थगित गर्नुको कारण र आफ्नो धारण स्पष्ट पारेको छ । यता नगरपालिकाले पनि पालिकाको धारण स्पष्ट सार्वजनिक गरेको छ ।
नगर प्रमुख मिनाकुमारी लामाले नगरसभा स्थगित गरेको केही बेरमा पत्रकार सम्मेलन गर्दै एमालले आफ्नो धारण सार्वजनिक गरेको हो । हेटौंडामा नगर प्रमुख र उपप्रमुखले हठ र घमण्ड गरि बैठक स्थगित गरेको पार्टीको आरोप छ । यस प्रति एमालेका कार्यपालिका सदस्यहरुको बिरोध जनाएका छन् ।
नेकपा एमाले हेटौँडा उपमहानगरपालिका दलले आफ्ना पार्टीका बहुमत नगरसभा सदस्यहरुलाई कुनै वास्तानै नगरि एकलौटी ढंगले बजेट ल्याएकोमा बिरोध गरेको दाबि गरेको छ । पटक पटकको छलफलमा मेयर र उपमेयरले आफ्ना हठ नत्यागेकाले सहमती जुट्न नसकेको एमालेका कार्यपालिका सदस्यहरुले बताएका छन् ।

एमाले उपमहानगरपालिका दलका नेता तथा वडा अध्यक्ष नवीन सिग्देलले हेटौँडा उपमहानगरपालिकाको यस कार्यकालको प्रथम नगर सभामा नगर प्रमुखले हठ र घमण्ड गरि बैठक स्थगित गरेको प्रति बहुमत कार्यपालिका सदस्यहरुको गम्भीर ध्यानकर्षण भएको बताए ।
मेयर र उपमेयरले एकलौटी ढंगले नीति, कार्यक्रम र बजेट निर्माण गरेको र विषयगत समिति नबनाई, कुनै पनि कार्यपालिका सदस्यहरुलाई सहभागी नगराई बजेटसभामा ल्याएकोमा बिरोध गरिएको सिग्देलले बताए ।
विधि सम्मत छलफल नगर्नु, नगर कार्यपालिका बैठकले पारित गरि नगरसभामा पेश गर्नुपर्नेमा नगर प्रमुख र उपप्रमुखले मनोमानी, एकलौटी र असम्बन्धित व्यक्तिहरुको संलग्नतामा बजेट तयार गरि सिधै नगरसभामा प्रस्तुत गर्ने तयारीलाई सच्चाउनु पर्ने माग राखिएको हेटौंडा–१५ का वडा अध्यक्ष सुनिल मुक्तानले बताए ।
नगरसभालाई सरल र सहज ढंगबाट सञ्चालन गर्नको लागि मकवानपुरमा क्रियाशिल दलहरुका नेताहरु समेत बीचको सहमतिलाई नगर प्रमुखले अटेर गरि नगरसभा स्थगित गर्नु सबैको लागि दुःखद् विषय बनेको र यस्तो गैर जिम्मेवारपूर्ण भएको उनले बताए ।
आवश्यक छलफल र गृहकार्य विना नगरबासीको बृहत्तर हित विपरित निर्वाचन ताका कै गठबन्धनको धङ्धगीबाट मुक्त हुनुपर्ने, नगर प्रमुखले सबैको र साझा चरित्र देखाउन पर्ने, स्थानीय सरकार सञ्चालन ऐनको मर्म र भावना विपरित र बाझिएका निमावली र कार्यविधि संसोधनको लागि नगरसभाका बहुमत सदस्यहरू ५४ जनाको हस्ताक्षरसहित पेश गरेको संसोधन प्रस्तावको दर्ता गर्नुपर्ने र नगर प्रमुख असंबैधानिक, अलोकतान्त्रिक र असहिष्णु प्रवृत्तिबाट मुक्त हुनुपर्ने माग राखिएको हेटौंडा–१९ का वडा अध्यक्ष नरनाथ सुवेदीले बताए ।
नेपाली काँग्रेसका सभापति बुद्व लामा तथा नेकपा एमालेका अध्यक्ष एकालाल श्रेष्ठ तथा अन्य पार्टीका प्रमुखहरूसहित संसोधन प्रस्ताव नगर प्रमुखद्धारा नगरसभामा सम्बोधन गर्ने प्रतिबद्वता व्यक्त गर्ने र अन्य विषय सहमतिको आधारमा अगाडि बढ्ने सर्वदलीय सहमति समेत नगर प्रमुखले अटेर गरि आफूलाई जनताको सेवक नभई निरंकुश शासकको रुपमा प्रस्तुत भई नगरसभा आकस्मात स्थगित गर्नु अनुचित रहेको हेटौंडा–४ का वडा अध्यक्ष समेत रहनु भएका नविन सिग्देलले बताए ।
यता हेटौंडा उपमहानगरपालिकाका प्रवक्ता सबिन न्यौपानेले भने एमालेका कार्यपालिकाका सदस्यहरुको हठका कारण नगरसभा स्थगित गर्नुपरेको बताएका छन् ।
उपमहानगरपालिकामा पत्रकार सम्मेलन गर्दै उनले गणपुरक संख्या नपुग्दा नगरसभा स्थगित गर्नुपरेको बताए । “एमालेमा बहुमतको दम्ब देखियो” उनले भने “जनताको कामै प्रभावित हुने गरी विरोध जनाउनु राम्रो हैन ।”
मकवानपुर । मकवानपुरको थाहा नगरपालिकाले आगामी आर्थिक वर्ष २०७९/०८० को लागि १ अर्ब ८ करोडको बजेट सार्वजनिक गरेको छ ।
शुक्रबार आगामी आर्थिक वर्षको वार्षिक नीति तथा कार्यक्रम र बजेट सर्वसम्मतले पारित गर्दै थाहा नगरले १ अर्ब ८ करोड ८४ लाख ७ हजार रुपैयाँ बराबरको बजेट सार्वजनिक गरेको हो । शुक्रबार नगरसभाको ११ औं अधिवेशनमा उपमेयर भरत गोपालीले पेश गरेको नीति तथा कार्यक्रम र बजेट सर्वसम्मतरुपमा पारित भएको हो ।
थाहाले कुल बजेटमध्ये ९ करोड ९७ लाख ५४ हजार रुपैयाँ चालुतर्फ, ५१ करोड ७२ लाख १३ हजार पुँजीगततर्फ, सशर्ततर्फ ३२ करोड १४ लाख ४० हजार रुपैयाँ र सामाजिक सुरक्षातर्फ १५ करोड रुपैयाँ बजेट विनियोजन गरेको छ ।
खर्च व्यहोर्ने स्रोततर्फ आन्तरिक कर तथा राजस्वबाट १९ करोड ७१ लख ५ हजार, राजस्वबाट बाँडफाँडबाट १९ करोड ६८ लाख ८० हजार रुपैयाँ, संघीय सरकारबाट प्राप्त १९ करोड १६ लाख, प्रदेशबाट प्राप्त ५ करोड ५ लाख ८२ हजार रुपैयाँ र सशर्त अनुदानतर्फ प्राप्त हुने ३२ करोड १४ लाख प्राप्त हुने अनुमान गरेको छ ।
मकवानपुर । हेटौंडा उपमहानगरपालिकाले आगामी आर्थिक बर्षको लागि बजेट ल्याउने तयारी गरे पनि एमालेको बिरोधको कारण स्थगित भएको छ ।
बिहान १० बजेलाई बोलाईएको नगर सभामा एमालेबाट निर्वाचित कार्यपालिका सदस्यहरूले आफ्नो अडान नछोडेको कारण सभा स्थगित गरिएको हो ।
गाँउ नगर जिल्ला सभा सन्चालन ऐन २०७५ को दफा ५ को उपदफा १ बमोजिम गणपुरक संख्या नपुगेकोले उक्त दफाकाे उपदफा २ बमोजिम नगरसभा आगामी बैठक असार १२ गते दिउँसो १ बजेको लागि नगर प्रमुखबाट आव्हान गरिएकाे हो ।
एमाले सदस्यहरुले बैठक सञ्चालन कार्यविधि शंसोधन गर्न माग गरेपछि बैठकमा सहमति हुन सकेको छैन । एमाले सदस्यहरुले राखेको प्रस्तावलाई पेलेर लैजान खोजिएको भन्दै विरोध जनाएका हुन् । उपमहानगरपालिकामा बिजयी एमालेका ५४ जना नगरसभा सदस्यहरु सहितको बैठकले स्थानीय सरकार संचालन ऐन सञ्चालन सम्बन्धी बैठक कार्यबिधि शंसोधनको माग गर्दै आएको छ ।
नगरसभा बारे एमाले केहिबेरमा पत्रकार सम्मेलन गरि पार्टीको धारण स्पस्ट पार्ने जनाएको छ ।
मकवानपुर । हेटौंडा उपमहानगरपालिकाले आगामी आर्थिक बर्षको लागि बजेट ल्याउने तयारी गरेपनि आज कार्यक्रम स्थगित हुने संभावना बढेको छ ।
बिहान १० बजेलाई बोलाईएको नगर सभामा एमालेबाट निर्वाचित कार्यपालिका सदस्यहरूले आफ्नो अडान नछोडेको कारण सभा स्थगित हुने संभावना बढेको हो । निर्धारित समयभन्दा ३ घण्टा ढिलो हुदासम्म आन्तरिक सहमति जुटेको छैन ।
सहमतिको लागि पार्टी कमिटी तहको बैठक चलिरहेको बुझिएको छ । नेपाली काँग्रेसका जिल्ला अध्यक्ष बुद्व लामा, नेकपा एकीकृत समाजवादी जिल्ला अध्यक्ष सुर्यचन्द्र न्यौपानेलगायतको गोप्य बैठक हेटौंडाको होटल एभोकाडोमा बसिरहेको बुझिएको छ । यद्यपि उनीहरूको फोन सम्पर्क भएको छैन ।
सार्वजनिक गर्दै गरिएको बजेट एकलौटी रुपमा तयार गरिएको भन्दै एमालेले बिरोध गरेको हो । ४ दिन अघि नगरको कार्यपालिका बैठक बसेर नीति तथा कार्यक्रम प्रस्ताव गर्ने तयारी भएको थियो । तर कार्यपालिका बैठकमा बहुमत नपुगेपछि नीति तथा कार्यक्रममाथि छलफल नै भएन ।
कार्यपालिकामा एमालेको स्पष्ट बहुमत छ । एमाले सदस्यहरुले बैठक सञ्चालन कार्यविधि शंसोधन गर्न माग गरेपछि बैठकमा सहमति हुन सकेको छैन । एमाले सदस्यहरुले राखेको प्रस्तावलाई पेलेर लैजान खोजिएको भन्दै विरोध जनाएका हुन् । एमालेबाट बिजयी कार्यपालिका सदस्य नगर सभाको हलमै नपसि बाहिर बसेका छन् । हलमा कर्मचारी र पत्रकारहरूको मात्रै चहलपहल छ ।

बजेट सार्वजनिक हुँदै गर्दा बहुमत कार्यपालिका सदस्यसंग छलफल नै नगरिएको भन्दै एमालेले विरोध जनाएको छ । एकलौटी ढंगले बजेट ल्याउन लागेकोमा आफूहरुको विरोध रहेको एमालेले जनाएको छ ।
जनताद्वारा निर्वाचित बहुमत कार्यपालिका सदस्यहरुसंग कुनै पनि छलफल नै नगरिकन एकलौटी ढंगले बजेट ल्याउन लागेको भन्दै असन्तुष्टि ब्यक्त गरिएको हो । कार्यपालिका सदस्यहरुसंग बजेटबारे कुनै पनि छलफल नभएको एमालेबाट वडा अध्यक्ष विजयी भएका कार्यपालिका सदस्यहरुले बताएका छन् ।
कार्यपालिका बैठकले पास नगरिएको, चुनाबका बेलाका गठबन्धनमा रहेका दलका प्रतिबद्धता अनुसार मात्र बजेट हालिएको, बैठक कार्यबिधि संसोधन गर्न मेयर लामाले निवेदन समेत दर्ता गर्न नमानेको लगायतका विषयमा आफूहरुको असन्तुष्टि रहेको वडा अध्यक्ष नवीन सिग्देलले बताए ।
उपमहानगरपालिकामा बिजयी एमालेका ५४ जना नगरसभा सदस्यहरु सहितको बैठकले स्थानीय सरकार संचालन ऐन सञ्चालन सम्बन्धी बैठक कार्यबिधि शंसोधनका लागि दर्ता गराउन निवेदन दिदा दर्ता गर्न अस्वीकार गरिएको सिग्देलले बताए ।
उपमहानगरपालिका वडा अध्यक्षहरुलाई समेत कुनै वास्ता नगरिकन बजेट ल्याउन खोज्नु जनभावना विपरित भएको हेटौंडा १५ का वडा अध्यक्ष सुनिल मुक्तानले बताए ।
