मकवानपुर / बागमती प्रदेशको मुख्यमन्त्री बन्ने फेर्ने रस्साकस्सी विस्तारै सेलाउँदै आएकाे छ । केही समय अघिसम्म मुख्यमन्त्री बन्ने पक्कापक्की भएका नेपाली काँग्रेस नेता इन्द्रबहादुर बानियाँ यसपटक मुख्यमन्त्री नबन्ने संभावना देखिएको छ ।
सत्ता गठबन्धनको भागबण्डामा ६/६ महिना मुख्यमन्त्री बनेर सरकारको नेतृत्व गर्ने सहमति तत्काललाई टरेको एक विश्वस्त स्रोतले जनाएको छ । प्रदेशमा सरकारको नेतृत्व छोड्नु पर्ने भएमा गठबन्धनको केन्द्रीय दलहरुको निर्णय र आफ्नो पार्टीको केन्द्रीय नेतृत्वबाटै निर्देशन आउनु पर्ने अडान लिँदै आएका मुख्यमन्त्री राजेन्द्रप्रसाद पाण्डे नै अबको बाँकी समय मुख्यमन्त्री रहने स्रोतको दाबी छ ।
स्रोतका अनुसार नेकपा एकीकृत समाजवादीका संसदीय दलका नेता राजेन्द्र पाण्डे आगामी चुनावसम्म बागमती प्रदेशको मुख्यमन्त्री रहिरहने छन् । उनले आगामी साता मन्त्रिमण्डलमा २ जना राज्यमन्त्री समेत थप गर्ने तयारी भएको छ । मकवानपुर र सिन्धुलीबाट दुई जनालाई राज्यमन्त्री नियुक्त गर्ने आन्तरिक तयारी भएको छ । दुबै राज्यमन्त्री नेकपा एकीकृत समाजवादीबाट हुने छन् ।
गत ११ कात्तिकमा मुख्यमन्त्री हुँदा बागमतीमा कांग्रेस, माओवादी केन्द्र र एकीकृत समाजवादीबीच पाण्डे र कांग्रेस संसदीय दलका नेता इन्द्र बानियाँ आलोपालो मुख्यमन्त्री बन्ने लिखित सहमति भएको थियो । ‘त्यो सहमतिले नै अहिले तनाव सिर्जना गरेको हो,’ माओवादी केन्द्र प्रदेश स्तरका अर्का एक नेताले भने ।
उनका अनुसार ६ महिना बित्दा साथ सरकार फेर्ने कुरा गर्दा नीति तथा कार्यक्रम र बजेट ल्याउन समय माग भएको थियो, सोही अनुसार नेपाली काँग्रेसले समय दियो । अन्तत: नेकपा एकीकृत समाजवादीलाई प्राप्त साथकाे कारण बानियाँ पछि परे । बागमतीमा मुख्यमन्त्रीमा बानियाँ भन्दा पाण्डे रहनुमा नेपाली कांग्रेसकै नेताहरूले आन्तरिक रूपमा साथ दिएको उनले बताए ।
बजेट पास भएपछि मुख्यमन्त्री पाण्डेलाई दबाब दिन कांग्रेस र माओवादी केन्द्रका सांसदहरुको हस्ताक्षर संकलनको तयारी गरेका थिए । यता बानियाँले नै पाण्डे सहमतिमै सरकार छोड्ने तयार रहेको बताउँदै आएका थिए । तर पाण्डेले केन्द्रको निर्देशन चाहिने अडान लिएपछि माहोल फेरिएको हो ।
बागमतीको सरकारमा हेरफेर गर्दा अन्यत्र पनि हेरफेर गर्नु पर्ने नत्र गठबन्धनमा धक्क पुग्ने निष्कर्षसहित अहिले पाण्डे नेतृत्वको सरकारलाई नै यथावत राखिने तयारी भएको माओवादी केन्द्रका ती नेताले भने ।
माओवादी शीर्ष नेतृत्वले त सरकार परिर्वतनको खेलमा नलाग्न प्रदेशका नेताहरुलाई निर्देशन नै दिएको उनले बताए ।
माओवादी सांसद पूर्व तथा समाजिक विकास युवराज दुलालका अनुसार सात प्रदेशका सरकार सकेसम्म नचलाउने कुरा केन्द्रीय गठबन्धनको छ । प्रदेश सरकार संचालन संयन्त्रका संयोजक समेत रहेका दुलाल प्रधानमन्त्रीले चाहँदा मात्र मुख्यमन्त्री हेरफेर हुनसक्ने बताउँछन् ।
अन्य प्रदेशको कुरा जोडेर सहमति तोडेको प्रति कांग्रेस बागमती प्रदेश सभापति एवं संसदीय दलका नेता बानियाँले दुख व्यक्त गरे । ‘सरकार हेरफेर गर्ने नगर्ने सहमति शीर्ष तहमा के भयो मलाई थाहा छैन,’ बानियाँले भने, ‘विगतमा सहमति लिखित नै भएकोले कार्यान्वयन गर्न माग गरेका हौं ।’ सहमति मान्ने वा तोड्ने सवाललाई लिएर गठबन्धनलाई कमजोर बनाउने काममा भने कांग्रेस नरहेको उनले बताए ।
संघीय सरकारमा आगामी चुनावी नेतृत्व गर्न नेकपा एकीकृत समाजवादीलाई दिने हो भने बागमतीमा बानियाँको चान्स भएको नेकपा एकीकृत समाजवादीका एक नेताले बताए । ‘काँग्रेसले संघीय सरकारको नेतृत्व छोड्न नचाहँदा बागमतीमा बानियाँले चान्स गुमाएँ,’ उनले भने ।
मकवानपुर । गणित बिषयलाई जीवन उपयोगी शिक्षाको रुपमा लिनुपर्ने बताइएको छ । हेटौंडाको नबोदय शिशु सदनमा भएको म्याथ क्याम्प फायर कार्यक्रममा निजी तथा आवासिय विद्यालय अर्गनाइजेसन नेपाल (प्याव्सन) मकवानपुरका अध्यक्ष विनोद सुवेदीले गणित विषयलाई जीवन उपयोगी शिक्षाको रुपमा लिनुपर्ने बताएका हुन ।
मङ्गलबार नवोदय गणित समूहले गरेको ‘म्याथ क्याम्प फायर’ कार्यक्रममा अध्यक्ष सुवेदीले हरेक क्षेत्रमा प्रयोग हुने गणितलाई बढी सरल, प्रायोगिक, सिर्जनात्मक बनाउनु पर्ने बताए ।
प्रत्येक पाइलामा प्रयोग गर्न ‘आइडिया’ निकाल्न सक्ने जनशक्ति निर्माण गर्नु गणितको मुख्य उद्देश्य रहेको उनले बताए । ‘गणित कठिन विषय होइन । यसलाई हामी आफैँले कठिनाइ बनाएका हौँ ।’ उनले भने –‘गणितलाई कठिनाइको रुपमा नहेरी सकारात्मक रुपले कार्य पूरा गरेमा नतिजा पनि सकरात्मक आउने छ ।’
नेपाल शिक्षक महासंघ हेटौंडाका अध्यक्ष दीपक अधिकारीले दैनिक जीवनमा गणित विषयको ज्ञान प्रयोग गर्नु पर्ने बताए । नवोदयका विद्यार्थीले प्रस्तुत गरेको सौर्य प्रणाली गणित विषयमा कसरी प्रयोग गर्न सकिन्छ भन्ने प्रस्तुती तारिफ योग्य रहेको उनले बताए ।
नवोदय गणित समूहका अध्यक्ष एल्जीना दङ्गालको सभाध्यक्षतामा भएको नवोदय म्याथ क्याम्प फायर कार्यक्रममा २४ वटा स्टल विद्यालयको प्राड्गणमा राखिएको थियो । जसमा आधुनिक राष्ट्रिय माध्यमिक विद्यालयका विद्यार्थीे हलो, ढिक्की र मादल निर्माण गर्दै गणित विषयको प्रयोगको विषयमा प्रस्तुती गरेका थिए । कमाने एकेडेमी विद्यालयका विद्यार्थीले ‘द म्याथ अफ आवर युनिभर्स’ सम्बन्धी सामग्री स्टलमा राखेका थिए ।
यसैगरी नवोदय विद्यार्थीले सांस्कृतिक कला, व्रम्हाण्ड र प्राकृतिसँग गणित कसरी जोडिएको छ भन्ने सामग्री जस्तै (चरेसको थाल, ग्यालेक्सी, गितार, साराङ्गी, रङ्गोली, हिमालय श्रृङ्खला, ट्याली हाउस) लगायत स्टलमा प्रस्तुत गरेका थिए ।
कार्यक्रमले गणित विषयलाई फरक–फरक दृष्टिकोणबाट हेर्न र सिकाउनका लागि मद्दत मिल्ने भएकोले नवोदय गणित समूहले कार्यक्रम गर्दै आइरहेको छ । म्याथ क्याम्पफायर कार्यक्रमबाट पढाइमा सहयोग मिल्ने र अनुसन्धान गरी वस्तुको अवस्थाको बारेमा जानकारी प्राप्त हुने भएकाले कार्यक्रम बढी प्रभावकारी हुने नवोदयका गणित शिक्षक गोपाल घिमिरेले बताए ।
गणित उपयोगिताबारे हुने कार्यक्रम म्याथ क्याम्पफायर कार्यक्रम नवोदय गणित समूहको चौथो कार्यक्रम भएको शिक्षक सीएम रिमालले जानकारी दिए ।
मकवानपुर । राष्ट्रिय परिचयपत्र विवरण दर्ताको लागि मकवानपुरमा सेवाग्राहीले अनलाइन फाराम भर्नुपर्ने भएको छ ।
जिल्ला प्रशासन कार्यालय मकवानपुरले मंगलबार सूचना जारी गर्दै राष्ट्रिय परिचयपत्र विवरण दर्ताका लागि राष्ट्रिय परिचयपत्र तथा पञ्जीकरण विभागको लिङ्क मार्फत अनलाइन फाराम भर्न भनिएको छ ।
सूचनामा अनलाइन फाराम भरिसकेपछी फारममा दिइएको मितिमा मात्र बायोमेट्रिकको लागि सक्कल कागजात सहित कार्यालयमा उपस्थित हुन उल्लेख गरिएको छ ।
नेपाल सरकारले ई-पासपोर्टका लागि राष्ट्रिय परिचयपत्र नम्बर अनिवार्य गरेसँगै जिल्ला प्रशासन कार्यालयमा एकाबिहानैदेखि लाइन बस्नेहरुको घुइचो लाग्ने गरेको थियो ।
अनलाइन फारम भर्नु पर्ने भए पछि कार्यालयमा हुने भिड कम हुने छ भने सेवाग्राहीले विभिन्न किसिमका सास्ती भोग्नु नपर्ने भएको छ ।

मकवानपुर । नेपालमा थप ९० जनामा कोरोना भाइरस संक्रमण पुष्टि भएको छ । पछिल्लो २४ घण्टामा थप ९० जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ।
मन्त्रालयका अनुसार १ हजार ९ सय ४४ जनाको पीसीआर परीक्षणमा ७३ जना र १ हजार १ सय ६८ जनाको एन्टीजेन परीक्षणमा १७ जना गरी ९० जनामा संक्रमण पुष्टि भएको हो ।
योसँगै नेपालमा कोरोना भाइरसको सक्रिय संक्रमितको संख्या ४ सय १ पुगेको छ । संक्रमित मध्ये ३ सय ९९ जना होम आइसोलेसनमा रहेका छन् । २ जना संस्थागत आइशोलेशन, २ जना आईसीयूमा र १ जनाको भेन्टिलेटरमा राखेर उपचार भइरहेको मन्त्रालयले जनाएको छ ।
यस्तै पछिल्लो २४ घण्टामा २० जना कोरोना संक्रमणमुक्त भएका छन् । मंगलबार थपिका समेत नेपालमा कोरोना संक्रमितको कुल संख्या ११ लाख २० हजार ४ सय ४४ पुगेको छ । यसै गरि हालसम्म कोरोना संक्रमणबाट नेपाल मृत्यु हुनेको संख्या ११ हजार ९ सय ५२ रहेको छ । ९ लाख ६७ हजार ५ सय ५५ जना संक्रमणमुक्त भएका स्वास्थ्य मन्त्रालयले जनाएको छ ।
मकवानपुर । बागमती प्रदेश प्रदेश प्रमुख यादव चन्द्र शर्माले आज मंगलबार दुई वटा विधेयक प्रमाणिकरण गरेका छन् ।
नेपालको संविधानको धारा २०१ को उपाधारा (१) बमोजिम प्रदेश प्रमुख शर्माले ‘‘आर्थिक वर्ष २०७९/०८० को सेवा र कार्यका लागि प्रदेश सञ्चित कोषबाट केही रकम विनियोजन र खर्च गर्ने सम्बन्धमा व्यवस्था गर्न बनेको विधेयक ’’ र ‘‘प्रदेश सरकारको अर्थ सम्बन्धी प्रस्तावलाई कार्यान्वयन गर्न बनेको विधेयक ’’ प्रमाणिकरण गरेका हुन् ।
गते १६ असारमा बसेको बागमती प्रदेशसभाको बैठकबाट पारित भई नेपालको संविधानको धारा २०१ को उपाधारा (२) बमोजिम सभामुखबाट प्रमाणित विधेयकलाई प्रदेश प्रमुख शर्माबाट प्रमाणिकरण भएको प्रदेश प्रमुख कार्यालयका प्रबक्ता समेत रहेका उपसचिव कृष्णप्रसाद आचार्यले बताए ।
आर्थिक वर्ष २०७९/०८० को सेवा र कार्यका लागि प्रदेश सञ्चित कोषबाट केही रकम विनियोजन र खर्च गर्ने सम्बन्धमा व्यवस्था गर्न बनेको विधेयकले प्रदेश सरकारलाई खर्च गर्न र प्रदेश सरकारको अर्थ सम्बन्धी प्रस्तावलाई कार्यान्वयन गर्न बनेको विधेयकले राजश्व संकलनका लागि बाटो खोलेको प्रदेश प्रमुख कार्यालयका कानून अकिृधत प्रकाश चापागाईंले बताए ।
