मकवानपुर । मकवानपुरको बकैया गाउँपालिकामा फास्टट्रयाक निर्माणको सामान चोरी भएको छ । बकैया गाउँपालिका–१२ जितपुर भञ्ज्याङमा फास्टट्रयाक निर्माणको लागि राखिएको फलामको सामन चोरी भएको मकवानपुर प्रहरीले जनाएको छ ।
फास्टट्रयाक निर्माणको सामान चोरी गर्ने ४ जनालाई प्रहरीले पक्राउ गरेको छ । पक्राउ पर्नेमा मकवानपुरगढी गाउँपालिका–२ बस्ने ३३ वर्षीय इन्द्र बहादुर बि.क, बकैया गाउँपालिका–१२ कोलखोप बस्ने २२ वर्षीय अबिरल घलान, २४ वर्षीय दिनेश लामा बम्जन र ३२ वर्षीय नारायण बहादुर मोक्तान रहेका छन ।
१२/१३ क्विन्टल बराबरको फलामको सामनहरु ना ५ ख १४४३ नम्बरको बोलेरो गाडिमा चोरी गरि लिएर जाँदै गरेको अवस्थामा अस्थाई प्रहरी पोष्ट जितपुरबाट खटिएको टोलीले नियन्त्रणमा लिएको हो । फलामको सामान बोकेको गाडिलाई बाटो देखाउने बा५५ च ८५०२ नम्बरको मोटरसाईकललाई समेत नियन्त्रणमा लिएको प्रहरीले जनाएको छ ।
प्रहरीले बोलेरो, मोटरसाईकल र मानिसहरुलाई नियन्त्रणमा लिएर आवश्यक कारबाहीको प्रक्रिया अगाडि बढाइएको जनाएको छ ।
मकवानपुर । मकवानपुरमा १ सय ५७ जना कोरोना संक्रमित थपिएका छन । पछिल्लो २४ घण्टामा १ सय ५७ जनामा डेंगु संक्रमण पुष्टि भएको छ । पुष्टि हुनेहरुमा सबैभन्दा धेरै हेटौंडा उपमहानगरपालिकाका १ सय ४८ रहेको स्वास्थ्य कार्यालय मकवानपुरले जनाएको छ ।
यसैगरी, मनहरी र भीमफेदी गाउँपालिकाका दुई/दुई जना, बकैया गाउँपालिकाका ३ जना, राक्सिराङ गाउँपालिकाका एक जना र अन्य जिल्लाका एक जनालाई डेंगु संक्रमण पुष्टि भएको हो । यससँगै जिल्लामा डेंगु संक्रमितको कुल संख्या ४ हजार ५२६ जना पुगेको छ । जसमध्ये २ हजार ५१८ जना पुरुष र २ हजार ८ जना महिला रहेका छन् ।
लामखुट्टेको टोकाईबाट हुने डेंगु देशका ७७ वटै जिल्लामा फैलिएको छ । हालसम्म देशभर ४२ हजार ५०४ जनामा डेंगु पुष्टि भएको छ । डेंगुको कारण हालसम्म ५१ जनाको मृत्यु भएको स्वास्थ्य तथा जनसंख्या मन्त्रालयले जनाएको छ ।
मकवानपुर । आगामी मंसिर ४ गते हुने प्रदेश र प्रतिनिधिसभा निर्वाचनलाई लक्षित गरी लोकतान्त्रिक बाम गठबन्धनले मकवानपुरको क्षेत्र नम्बर १ स्तरीय कार्यकर्ता भेलाको आयोजना गरेको छ ।
हेटौंडामा क्षेत्र नम्बर १ का प्रतिनिधि र प्रदेशसभा सदस्यका उम्मेदवारहरुसहित कार्यकर्ताहरुको भेलामा बोल्ने उम्मेदवार तथा दलका नेताहरुले गठबन्धन बाध्यता नभई आवश्यकता भएको भन्दै गठबन्धनका तर्फबाट उम्मेदवार बनेकाहरुलाई प्रतिवद्ध भई मतदान गर्न आग्रह गरे ।
शान्ति प्रक्रियादेखि गणतन्त्र र संघीयता स्थापना गर्ने दलहरुबीचको गठबन्धन भएको भन्दै गठबन्धनभित्रका दलहरुले एकअर्कालाई विश्वास गर्नुपर्नेमा जोड दिएका थिए ।
कार्यक्रममा गठबन्धन दल नेकपा एकीकृत समाजवादीका तर्फबाट क्षेत्र नम्बर २ का प्रतिनिधिसभा सदस्यका उम्मेदवार विरोध खतिवडा, नेकपा माओवादी केन्द्रकातर्फबाट क्षेत्र नम्बर २ (क) का उम्मेदवार कुमारी मोक्तान, नेपाली कांग्रेसका तर्फबाट उम्मेदवार बनेका क्षेत्र नम्बर २ (ख) का उम्मेदवार ईन्द्रबहादुर बानियाँसहित तीनै दलका नेता कार्यकर्ताको उपस्थितिमा भेला भएको हो ।
नेपाली कांग्रेस मकवानपुर क्षेत्र नम्बर २ का सभापति लोक मुक्तानको अध्यक्षतामा भएको कार्यक्रममा नेकपा एकीकृत समाजवादीका उपाध्यक्ष केदार न्यौपानेको प्रमुख आतिथ्यता रहेको थियो । कार्यक्रममा बोल्दै प्रमुख अतिथि न्यौपानेले गठबन्धनका उम्मेदवारहरुलाई विजयी गराउन सबैले आफ्नो तहबाट भूमिका खेल्न आग्रह गरे ।
गठबन्धनका तर्फबाट क्षेत्र नम्बर २ का उम्मेदवार विरोध खतिवडाले आगामी निर्वाचन प्रतिगामी शक्ति र अग्रगामी शक्तिबीचको लडाईं भएको भन्दै अग्रगामी शक्ति लोकतान्त्रिक बाम गठबन्धनको जीत सुनिश्चित भएको बताए । केपी ओेलीले गठबन्धन तोड्न धेरै तिकडम गरेको तर, असफल त्यो असफल भएपछि मनोवैज्ञानिक रुपमा एमाले खस्किसकेको उनले विश्लेषण थियो ।
क्षेत्र नम्बर २ (क) का प्रदेशसभा सदस्य पदका उम्मेदवार कुमारी मोक्तानले गठबन्धनभित्रका दलहरुले प्रतिवद्ध भएर आफ्ना उम्मेदवार जिताउन लाग्नुपर्ने बताइन् । लामो संघर्षबाट प्राप्त लोकतान्त्रिक व्यवस्था र उपलब्धीलाई दीगो बनाउन गठबन्धनलाई पनि दीगो बनाउनु आवश्यकता रहेको उनको भनाइ थियो ।
मकवानपुर क्षेत्र नम्बर २ (ख) का प्रदेशसभा सदस्य पदका उम्मेदवार ईन्द्रबहादुर बानियाँले लोकतान्त्रिक बाम गठबन्धनको साझा स्वार्थ भनेको गणतन्त्र र संविधानको रक्षा गर्नु भएको भन्दै गठबन्धन लामो समयसम्म टिक्ने दावी गरे । शान्ति प्रकियाको जगमा गठबन्धन भएको भन्दै शान्ति प्रक्रियादेखि गणतन्त्र र संघीयता स्थापना गर्ने दलहरुबीचको गठबन्धनले मात्र मुलुकको दीगो विकास गर्न सक्ने उनको भनाइ थियो ।
मकवानपुर । राजनीतिक दल तथा उम्मेदवारलाई निर्वाचन आचार संहिता कार्यान्वयन गर्न निर्वाचन आयोगले निर्देशन दिएको छ । लाभको पदमा रहेका कतिपय राजनीतिक व्यक्तित्वहरूबाट निर्वाचन प्रचार प्रसार गर्दा निर्वाचन आचार संहिताकाे उलङ्घन भएकाे सूचना प्राप्त भएकोले आयाेगले राजनीतिक दल तथा उम्मेदवारलाई ७ बुदें निर्देशन दिएको छ ।
आयोगले कार्तिक २ गते बुधबार विज्ञप्ति मार्फत उक्त निर्देशन दिएको हाे । ‘सरकारी स्रोत साधन उपयोग गरी निर्वाचन प्रचार प्रसार गर्ने, घरदैलोको कार्यक्रम गर्दा सुरक्षाकर्मीहरूसहित पच्चीस जनाभन्दा बढी संख्याको जुलुस लिई हिँड्ने, राजनीतिक दलहरूले जुलुस, आमसभा, कोणसभा वा भेला आयोजना गर्ने, अनुमति नलिई निर्वाचन प्रचार प्रसारको लागि सवारी साधन प्रयोग गर्ने समेतका गतिविधि भएको भन्ने सूचना विभिन्न माध्यमबाट प्राप्त भएकोले निर्वाचन आयोगले निर्वाचनलाई स्वच्छ, स्वतन्त्र तथा निष्पक्ष ढंगले सम्पादन गर्नको लागि सबै राजनीतिक दल तथा उम्मेदवारलाई आचारसंहिता कार्यान्वयन गर्न लिखित सात बुँदे निर्देशन दिएको छ आयोगबाट प्रकाशित विज्ञप्तिमा भनिएकाे छ ।


मकवानपुर । सरकारले आज कात्तिक २ र भोलि कात्तिक ३ गते पाँच वर्ष मुनिका बालबालिकालाई भिटामिन ‘ए’ र जुकाको औषधि खुवाउदै छ । उक्त कार्यक्रममा आफ्ना बालबालिकालाई भिटामिन ‘ए’ र जुकाको औषधि खुवाउन स्वास्थ्य सेवा विभागले सर्वसाधरणमा अनुरोध गरेको छ ।
आफूलाई पायक पर्ने खोप केन्द्रमा गएर बालबालिकालाई भिटामिन ‘ए’ र जुकाको औषधि खुवाउन सकिने विभागले जनाएकाे छ । स्वास्थ्य सेवा विभाग अन्तर्गत परिवार कल्याण महाशाखाले देशभरका ६ देखि ५९ महिनाका २७ लाख बालबालिकाहरूलाई भिटामिन ए क्याप्सुल खुवाइने जनाएको छ । यसैगरी १ देखि ५ वर्षसम्मका २३ लाख ९३ हजार बालबालिकालाई जुकाको औषधि खुवाइने विभागले जनाएको छ ।
यस्तै मकवानपुरको हेटौडा उपहानगरपालिकामा भिटामिन ए कार्यक्रम अन्तर्गत ९२ जना महिला स्वास्थ्य स्वयं सेवीका र ९२ जना स्वास्थ्य आमा समूहका सदस्यको सहयोगमा भिटामिन ए र जुकाको औषाधि खुवाइने भएको छ । कार्यक्रमको दुवै दिनका लागि ९२/९२ केन्द्र तोकिएको हेटौंडा उपमहानगरपालिकाले जनाएको छ । उपमहानगरमा ६ महिनादेखि ५ वर्षसम्मका करिब १४ हजार बालबालिकाले सेवा लिने अनुमान गरिएको बताइएको छ । उपमहानगरपालिकामा प्रत्यक वडाबाट १ जना र पालिकाबाट १० जना सुपरिवेक्षक अनुगमनको लागि खटाइने छ । कार्यक्रमको सम्पूर्ण तयारी पूरा भएको उपमहानगरले जनाएको छ ।
६ महिनादेखि ५९ महिनासम्मका बालबालिकामा हुनसक्ने स्वास्थ्य जटिलता तथा कुपोषणको जोखिम न्यूनीकरण गर्नका लागि सरकारले २०५० सालबाट भिटामिन ‘ए’ कार्यक्रम सञ्चालन गर्दै आएको छ । यस्तै २०५६ सालबाट जुकाको औषधि खुवाउन थालिएको हो । वर्षमा दुई पटक पहिलो चरणमा कात्तिक २ र ३ गते तथा दोस्रो चरणमा वैशाख ६ र ७ गते बालबालिकालाई भिटामिन ‘ए’ र जुकाको औषधि खुवाउने गरिन्छ ।
