मकवानपुर । मकवानपुरको मनहरीमा बसले मोटरसाइकललाई ठक्कर दिँदा १ जनाको मृत्यु भएको छ । मृत्यु हुनेमा मनहरी नयाँबस्ती बस्ने २९ वर्षीय अबिनाश गोले रहेकाे मकवानपुर प्रहरीले जनाएकाे छ ।
सोमबार बिहान पूर्व–पश्चिम राजमार्ग अन्तर्गत मनहरी–६ सुनाचुरीमा काकरभिट्टाबाट काठमाडौं तर्फ जादै गरेको बा ५ ख ७९४३ नम्बरको यात्रुबाहक बसले विपरित दिशाबाट आउँदै गरेको बागमती प्रदेश ०३ ००३ प ४९३१ नम्बरको मोटरसाइकललाई ठक्कर दिँदा मोटरसाइकल चालकको गाेलेकाे घटनास्थलमै मृत्यु भएको जिल्ला प्रहरी कार्यालय मकवानपुरका प्रहरी प्रवक्ता टेकबहादुर कार्कीले जानकारी दिए ।
कार्कीका अनुसार बस र मोटरसाइकल प्रहरीको नियन्त्रणमा रहेको छ भने बस चालक फरार रहेका छन् ।
भोलि चन्द्रग्रहण : भरणी नक्षत्र र मेष राशिलाई कष्ट
Tags: No Comments
मंगलबार (भोलि) ग्रस्तोदित खग्रास चन्द्रग्रहण लाग्ने भएको छ । मंगलबार बेलुकी ५ बजेर ११ मिनेटमा चन्द्रोदय हुँदादेखि नै ग्रहण लाग्नेछ । बेलुकी ५ बजेर १३ मिनेटमा सूर्यास्त भएपछि ग्रहण स्पष्ट रूपमा देखिनेछ ।
नेपाल पञ्चांग निर्णायक विकास समितिले बेलुकी ५ बजेर २७ मिनेटमा ग्रहणको सुरु हुने जनाएको छ । यस्तै, बेलुकी ६ बजेर ३४ मिनेटमा ग्रहण सकिने भएको छ । १ घण्टा २३ मिनेट नेपालबाट ग्रहण देखिनेछ ।
चन्द्रोदय हुँदादेखि नै ग्रहण लागेर उदय हुने भएकाले ग्रस्तोदित चन्द्रग्रहण भनिएको हो । ग्रहणले पूरै चन्द्रमा ढाक्ने भएकाले खग्रास भनिएको हो ।
नेपाल पञ्चांग निर्णायक विकास समितिका अनुसार, मंगलबार लाग्ने ग्रस्तोदित खग्रास चन्द्रग्रहण भरणी नक्षत्र र मेष राशिका व्यक्तिलाई अति कष्टदायक हुने देखिएको छ ।
चन्द्रग्रहण मेष राशिलाई घात, वृष राशिलाई व्यय, मिथुन राशिलाई लाभ, कर्कट राशिलाई सुख, सिंह राशिलाई माननाश, कन्या राशिलाई कष्ट फल दिने योग रहेको समितिले प्रकाशन गरेको ‘राष्ट्रिय पञ्चांग’मा उल्लेख छ । यसैगरी तुला राशिलाई स्त्रीपीडा, वृश्चिक राशिलाई सुख, धनु राशिलाई चिन्ता, मकर राशिलाई व्यथा, कुम्भ राशिलाई श्रीप्राप्ति र मीन राशिलाई क्षतिको फल मिल्ने पनि ‘राष्ट्रिय पञ्चांग’मा उल्लेख छ ।
धर्मशास्त्रविद् प्राडा रामचन्द्र गौतमका अनुसार, चन्द्रग्रहणको ९ घण्टाअघिदेखि सुतक लाग्ने धर्मशास्त्रका ग्रन्थमा उल्लेख छ । जसअनुसार मंगलबार बिहान ८ बजेर ११ देखि बाल, वृद्ध र बिरामीबाहेकलाई भोजन निषेध गरिएको छ । बेलुकी ६ बजेर ३४ मिनेटमा ग्रहण सकिएपछि मात्र भोजन गर्न हुनेछ । ग्रहणका बेला जप, स्नान, ध्यान, पाठलगायत कर्म गर्दा फलदायी हुने शास्त्रीय वचन छ ।
यसअघि ८ कात्तिकमा कृष्ण औंसीका दिन सूर्यग्रहण लागेको थियो । यसरी यो वर्षको कात्तिक महिनाका दुवै पक्षमा ग्रहण लाग्ने समितिले जनाएको छ । औंसीमा सूर्यग्रहण र पूर्णिमामा चन्द्रग्रहण लाग्छ ।
शुक्र अस्तले चतुर्मास व्रत उद्यापन रोकिँदैन : धर्मशास्त्रविद्
उता, धर्मशास्त्रविद्ले शुक्र अस्तमा चतुर्मास व्रत समापन गर्न नहुने भनी गरिएको प्रचारप्रसार शास्त्रीय नभएकामा जोड दिइका छन् ।
आषाढ शुक्ल एकादशी अर्थात् हरिशयनी एकादशीदेखि कात्तिक शुक्ल एकादशीका दिनसम्म घरघरमा विशेषरूपमा तुलसीको पूजा आराधनासहित चतुर्मास व्रत एवं कात्तिक स्नान गर्ने वैदिक सनातन हिन्दू धर्मावलम्बीले कात्तिक शुक्ल द्वादशीदेखि हवन गरेर व्रत समापन गर्ने गर्छन् । यस वर्ष १४ असोजमा अस्त भएको शुक्र ६ मंसिरमा उदय हुने नेपाल पञ्चांग निर्णायक विकास समितिले जनाएको छ ।
यो अवधिमा कुनै कामनाले गरिने कर्म मात्र गर्न नहुने धर्मशास्त्रविद् समितिका सदस्य प्राडा देवमणि भट्टराई बताउँछन् । चतुर्मास व्रत प्रत्येक वर्षको नियमित कर्म भएकाले शुक्र एवं वृहस्पति अस्तले यस्ता कर्म नरोकिने उनले बताए । केही व्यक्तिले सामाजिक सञ्जाललगायतबाट गरेको यससम्बन्धी प्रचारप्रसार गलत रहेको समितिले जनाएको छ ।
धर्मशास्त्रविद् प्राडा रामचन्द्र गौतम शुक्र अस्त भएकाले चतुर्मास व्रत समापन गर्नुहुन्छ कि हुन्न भनी दैनिक धेरैले सम्पर्क गर्ने गरेको बताउँछन् । तिथिअनुसार प्रत्येक वर्ष मनाइने चाडबाड मनाउन र नियमित व्रत समापन गर्न शुक्र एवं वृहस्पति अस्तले फरक नपर्ने उनले बताए । पुराण वाचन, विवाह, व्रतबन्धजस्ता कर्म भने शुक्र एवं वृहस्पति अस्तका बेला गर्नु नहुने शास्त्रीय वचन छ ।
प्रत्येक वर्ष कात्तिक शुक्ल द्वादशीदेखि मार्ग शीर्ष कृष्ण पञ्चमीसम्म तुलसीको विशेष पूजा समापन गर्न गरिने हवनका लागि अग्नि जुराउनुपर्दैन । त्यसपछि भने अग्नि जुरेका दिनमा मात्र चतुर्मास व्रत समापनसहित तुलसीको विशेष पूजा उद्यापन गरिन्छ । राजधानी दैनिकबाट
मकवानपुर । मकवानपुरको बागमती गाउँपालिकामा पहिलाे पटक नमूना मतदान अभ्यास गरिएकाे छ । आगामी मंसिर ४ गते हुने प्रतिनिधि तथा प्रदेशसभा सदस्य निर्वाचन लक्षित नमूना मतदान अभ्यास गरिएकाे प्रदेश निर्वाचन कार्यालयले जनाएकाे छ ।
प्रदेश निर्वाचन कार्यालय हेटौंडाले आगामी मंसिर ४ गते हुने प्रतिनिधि सभा र प्रदेश सभा सदस्य निर्वाचनलाई लक्षित गरी आइतबार गाउँपालिका कार्यालय झुरझुरेमा नमूना मतदानको आयोजना गरेको हो ।
निर्वाचनमा मतदातालाई स्पष्टता दिन तथा मतदान केन्द्रसम्म पुग्ने, मतदान कति ठाउँमा दिने, कसरी मतदान गर्ने, मतपत्र मतपेटिकामा खसाल्नेलगायत जागरुक बनाउन नमुना मतदानको आयोजना गरिएको प्रदेश निर्वाचन कार्यालय बागमतीका निर्वाचन अधिकारी लुम्बनाथ पोखरेलले जानकारी दिए । उनले नमुना मतदानबाट मतदाताहरुलाई मत बदर हुनबाट जोगाउन मद्दत गर्ने समेत बताए ।
नमुना मतदानमा महिला र पुरुष गरी ५३ जना मतदाता सहभागी भएका थिए । नमुना मतदानका क्रममा प्रतिनिधि सभा प्रत्यक्षतर्फको मात्रै मतगणना गरिएको थियो । जसमा खसेको ५३ वटा मतमा ५२ सदर भएको र १ वटा मत बदर भएकाे पोखरेलले बताए । नमुना मतदानकाे अभ्यास साेमबार बकैया गाउँपालिकामा गरिने बताइएकाे छ ।
यसैगरी, मकवानपुरमा मतदाता शिक्षा कार्यक्रम सञ्चालन गरिएकाे छ । गत शुक्रबारबाट मतदाता शिक्षा कार्यक्रम सञ्चालन गरिएकाे निर्वाचन अधिकारी पाेखरेलले जनाएका छन् । आगामी मंसिर ४ गते हुने प्रतिनिधिसभा तथा प्रदेशसभा सदस्य निर्वाचनका लागि प्रदेश निर्वाचन कार्यालयले मकवानपुरको १० वटा स्थानीय तहको १ सय २ वटै वडामा मतदाता शिक्षा कार्यक्रम सुरु भएको हाे ।
मकवानपुरमा मतदाता शिक्षा कार्यक्रमका लागि स्थानीय तहहरुसँगकाे समन्वयमा वडा तहमा कर्मचारी परिचालन गरी मतदाता शिक्षा सुरु गरिएको पोखरेलले जानकारी दिए । वडा–वडामा खटिएका स्वास्थ्य स्वयंसेविकाहरुले मतदान केन्द्रसम्म पुग्ने, मतदान गर्ने, मतपत्र पट्याउने, मतपत्र मतपेटिकामा खसाल्नेलगायतकाे जानकारी मतदातालाई जानकारी दिने छन् ।
यस पटकको निर्वाचनमा ४ प्रकारको मतपत्रकाे प्रयाेग हुने निर्वाचन आयाेगले जनाएको छ । मतदाताले प्रतिनिधिसभाको प्रत्यक्षतर्फ तथा प्रतिनिधिसभाको समानुपातिकतर्फ मतदान पहिले गर्नुपर्नेछ । त्यसपछी प्रदेशसभाको प्रत्यक्षतर्फ र प्रदेशसभाको समानुपातिकतर्फ मतदान गर्नुपर्नेछ । प्रतिनिधि र प्रदेशसभाको प्रत्यक्षतर्फको मतपत्र रातो रंग र समानुपातिकतर्फको मतपत्र कालो रंगको हुनेछ ।
गत स्थानीय तहकाे निर्वाचनमा मतदाता शिक्षा कार्यक्रम सञ्चालन नहुदाँ बदर मतकाे संख्या बढी भएकाेले यस पटक बदर मत कम गर्न मतदाता शिक्षा प्रभावकारी हुने बताइएकाे छ ।
मकवानपुर । मकवानपुरमा भएकाे सवारी दुर्घटनामा घाइते भएका पुरुषको मृत्यु भएको छ । गत चैतमा पूर्वपश्चिम राजमार्ग अन्तर्गत मनहरी गाउँपालिकामा भएको दुर्घटनामा घाइते भएका प्रकाश मोक्तान रहेका छन् ।
गत चैतमा मनहरी–८ सिमपानीमा ज्यामिरेतर्फ जादै गरेको ना १ ह ५६८२ नम्बरको अटोले ना ५१ प २०१९ नम्बरको मोटरसाइकललाई ठक्कर दिएको थियो । उक्त दुर्घटनामा मोटरसाइकलमा सवार मनहरी–९ मगरचोक बस्ने ३२ वर्षीय लाल मोक्तान र राक्सिराङ गाउँपालिका–४ बस्ने ३६ वर्षीय प्रकाश घाइते भएका थिए । उनीहरुको उपचारका लागि भरतपुर पुरानो मेडिकल कलेज लगिएको थियो ।
मकवानपुर प्रहरी प्रवक्ता एवं प्रहरी नायव उपरीक्षक टेक बहादुर कार्कीका अनुसार प्रकाशको उपचार सम्भव नभएपछि घरमा ल्याईएकोमा उनको शनिबार मृत्यु भएको हो । अटो चालक अंगभंग मुद्दामा मुद्दा चलाएपनि धरौटीमा छुटेको कार्कीले बताए ।
सवारी दुर्घटनामा २ जना घाइते
मकवानपुरमा सवारी दुर्घटना २ जना घाइते भएका छन् । शनिबार मकवानपुरकाे मनहरी गाउँपालिका र बकैया गाउँपालिकामा भएकाे सवारी दुर्घटनामा उनीहरु घाइते भएका हुन् ।
पूर्व पश्चिम सडकखण्ड अन्तर्गत मनहरी गाउँपालिका–७ बिजौनामा भारतीय एम्बुलेन्सको ठक्करबाट मोटरसाइलमा सवार एक जना घाइते भएका छन् । शनिबार बिआर–०५ पि २०५७ नम्बरको एम्बुलेन्सले प्रदेश ३–०२–००९ प ४८२६ नम्बरको मोटरसाइकललाई ठक्कर दिंदा पर्सा ठोरी बस्ने २५ वर्षीय दिनेश सापकोटा घाइते भएका हुन् । उनको उपचारको लागि भरतपुर पठाईएको प्रहरीले जनाएको छ ।
यसैगरी मकवानपुरको बकैंया गाउँपालिका–५ मा ना.३ ख.६५५ नम्बरको ट्रकको ब्रकेफेल भएर दुर्घटना हुँदा एक जना घाइते भएका छन् । ट्रक चालक बारा कोल्बी नगरपालिका– १ बस्ने ५१ को शंकर चौधरी घाइते भएका हुन् । प्रहरीका अनुसार घाइते चौधरीको प्राथामिक स्वास्थ्य केन्द्र छतिवनमा उपचार भइरहेको छ । चिउरा/भुसा बोकेको उक्त ट्रकको ब्रेक फेल भएर अनियन्त्रित हुँदा सडकबाट करिब ३० मिटर तल खसेको थियो ।
मकवानपुर । आसन्न प्रतिनिधिसभा निर्वाचनमा मकवानपुर प्रतिनिधि सभा निर्वाचन क्षेत्र नम्बर १ का उम्मेदबार महालक्ष्मी उपाध्याय डिनाले आफ्नो संकल्प सार्वजनिक गरेकी छिन् । आगामी मंसिर ४ गते हुने निर्वाचनका लागि लोकतान्त्रिक–बाम गठबन्धनको तर्फबाट प्रतिनिधिसभा सदस्य पदका उम्मेदवार डिनाले सार्वजनिक गरेकाे संकल्पमा सबल महिला, अवसरमा पहिला भन्दै महिला सशक्तिकरणलाई प्राथमिकतामा राखेकी छिन् ।
नेपाली कांग्रेस केन्द्रीय सहमहामन्त्री समेत रहेकी उनले संकल्पमा युवा रोजगारलाई प्राथमिकता दिएकी छिन् । हेटौंडा उपमहानगरलाई समृद्ध बनाउन औद्योगिकीकरणमा जोड दिएकी छिन् । विद्यार्थी राजनीति हुँदै संविधान निर्माणमा समेत महत्वपूर्ण भूमिका निर्वाह गरेकी उनले संकल्पमा समान अवसर, न्यायपूर्ण समाजको निर्माण र महिलाको सम्मान गर्ने उल्लेख गरेकी छिन् ।
त्यसैगरी उनले शान्ति र समृद्धिको पहिचान, गठबन्धनको सरकार निर्माणमा जोड दिएकी छिन् । डिनाले सम्मानित स्वस्थ जीवन र सुरक्षा, ज्येष्ठ नागरिकको हेरचाहलाई पनि प्राथमिकता दिँदै शिक्षा, स्वास्थ्य, कृषि, सहकारी र उद्योग कलकारखानाबाट रोजगारी दिने आधारहरु प्रस्तुत गरेकी छिन् । सफा, सुन्दर, हरियाली र भौतिक पूर्वाधार सम्पन्न प्रदेश राजधानी बनाउने, विकट भेगमा समेत आवश्यक भौतिक संरचनाको निर्माणमा डिनाले प्रतिबद्धता जनाएकी छिन् । पूर्व राज्यमन्त्री भएर समेत काम गरिसकेकी उनले सुशासन, दिगो विकास र राष्ट्र निर्माणमा आफ्नो योगदान र सरोकार रहने उल्लेख गरेकी छिन् ।
विद्यार्थी र महिला नेतृ हुँदै कुशल सहकारीकर्मीको परिचय समेत बनाइसकेकी उनले शिक्षाको क्षेत्रमा समेत योगदान पु¥याएकी छिन् । संविधानको रक्षा, राजनीतिक स्थिरता, सदाचारी एवम् सक्षम राज्य संयन्त्र, असल शासन र समुन्नत नेपाल निर्माणका लागि नेपाली कांग्रेसको सिफारिसमा सत्तारुढ गठबन्धनले आफूलाई मकवानपुर क्षेत्र नम्बर १ बाट उम्मेदवार बनाएको उनको दाबी रहेकाे छ ।
प्रत्यक्ष जनताको सुखदुःखमा रहेर काम गर्न र महिला नेतृत्वका लागि भन्दै समानुपातिकतर्फको पहिलो नम्बरमा रहेको आफ्नो नाम छोडेर प्रत्यक्षतर्फ चुनावमा आफू होमिएकाे डिना बताउँछिन ।
