मकवानपुर । बागमती प्रदेशको राजधानी हेटौंडामा मानसिक स्वास्थ्य र मानव अधिकार सम्बन्धी प्रदेश स्तरीय परामर्श बैठक भएको छ ।
विश्वमा २० देखि २५ प्रतिशत मानिस मानसिक समस्याका कारण प्रभावित हुने गरेका छन्, तर उनीहरूको मानसिक स्वस्थ्य र मनोसामाजिक परामर्श बारेमा चासो कम भएको गुनासो गरिएको छ । नेपालमा आव ०७७/०७८ मा ६ हजार ५ सय ३० जनाले मानसिक अस्वस्थ्यता कै कारण आत्महत्या गरेको तथ्यांक बागमती प्रदेशको राजधानी हेटौंडामा सार्वजनिक गरिएको छ ।
बागमती प्रदेशमा यो आवमा १ हजार ३६ जनाले मानसिक अस्वस्थताकै कारण आत्महत्या गरेको प्रदेश प्रहरी कार्यालयले जनाएको छ । चालू आवको हालसम्म ४३० जनाले यही कारण आत्महत्या गरिसकेका छन् ।
नेपालमा मलेरिया, क्यान्सरभन्दा पनि मानसिक स्वास्थको सवाल भयावह हुंदासमेत सरोकारवाला निकायबाट ठोस पहल नपुगेको बताईएको हो । जसले आत्महत्याको दर बढेको भएपनि यो सवाललाई गम्भीरता पुर्वक नलिएको गुनासो अधिकारकर्मीहरुले गरे ।
अधिकार आयोग बागमती प्रदेश कार्यालयको आयोजना तथा राष्ट्रिय मानसिक स्वास्थ्य स्वाबलम्वन संगठनको सहकार्यमा बागमती प्रदेशमा मानसिक स्वास्थ्य मानव अधिकार सम्वन्धी परामर्श बैठक आयोगका सहसचिव यज्ञप्रसाद अधिकारीले मानव अधिकार रक्षाको लागि मानसिक स्वास्थ्यको सवालमा प्रदेश सरकार गम्भीर हुनुपर्ने बताए ।
कार्यक्रममा स्वास्थ्य निर्देशनालय बागमतीका निर्देशक महेश्वर श्रेष्ठले कोरोना १९ को महामारीका कारण मानिसको मानसिक स्वास्थ्यमा धेरै प्रभाव पारेको बताए । विशेषगरि महिलाहरु मानसिक समस्यामा पर्ने गरेको, मानसिक रोग, निशुल्क वितरण सुचिका ओैषधि खरिदमा स्वास्थ्य निर्दैशनालय बागमती प्रदेशले ४९ लाख ५० हजार रकम बजेट विनियोजन गरेको श्रेष्ठले बताए।
मानिसक स्वास्थ्य समस्याको रोगभारको अनुपातमा संचालित कार्यक्रमहरु र विनियोजित हुने बजेट न्यून भएको र लक्षित वर्ग तथा समुदायलाइ पुर्णरुपमा समेट्न नसकेको निर्देशक श्रेष्ठले बताए ।
मदिरा र लागू पदार्थको दुव्र्यसनलाई मानसिक स्वास्थ्यको कोणबाट बुझ्न र बुझाउन कठिन रहेको बताउँदै बागमती प्रदेशका ११९ वटै स्थानिय तहका ५१९ वटा विद्यालयहरूमा विद्यालय नर्स कार्यक्रम मार्फत मानसिक समस्या समाधानको लागि सेवा प्रवाह गरिरहेको उनले बताए ।
कार्यक्रममा कोशिशका निर्देशक मातृका प्रसाद देवकोटाले चिकित्सक भाषामा मानसिक रोग शब्दको उल्लेख गर्ने गरेकोमा सो को सट्टा मानसिक सुस्वास्थ्य हुनुपर्ने बताए । आत्महत्या रोकथामका लागि बहुपक्षिय संयन्त्र गठन हुनुपर्ने देबकोटाले बताए ।
कार्यक्रममा राष्ट्रिय मानव अधिकार आयोग बागमती प्रदेशका प्रमुख यज्ञप्रसाद अधिकारीले मानसिक स्वास्थ्यकै कारण मानव अधिकार प्रत्याभुती पूर्ण रुपमा नभएको औलाउँदै, प्रदेश तथा संघीय सरकारले यो समस्याको सम्बोधन गर्नुपर्ने बताए ।
मकवानपुर । मकवानपुर प्रहरीले १९ वर्षपछि फरार प्रतिवादीलाई पक्राउ गरेकाे छ । १९ वर्षअघि सवारी दुर्घटनाको मुद्दामा प्रतिवादी एक सवारी चालकलाई प्रहरीले पक्राउ गरेकाे हाे ।
पूर्वपश्चिम राजमार्गअन्तर्गत हेटौंडा–३, लेवटमा २०६० साल जेठ २४ गते बस र ट्रक आपसमा ठोक्किएर दुर्घटना हुँदा ३ जनाको ज्यान गएको थियो । ना २ ख २९४६ नम्बरको ट्रक र बा १ ख ८२२० नम्बरको बस आपसमा ठोक्किएर दुर्घटना हुँदा बस चालक देविप्रसाद आचार्यसहित ३ जनाको मृत्यु भएको थियो ।
दुर्घटना पश्चात फरार रहेका ट्रक चालक साविक चुरियामाई गाविस–४, सानोसुकौली घर भई हाल मनहरी गाउँपालिका–९, ज्यामिरे बस्ने ४७ वर्षीय राजु लामालाई मनहरी–९, ज्यामिरेबाटै प्रहरीले माघ १४ गते पक्राउ गरेको जनाएको छ । पक्राउ परेका लामालाई मकवानपुर जिल्ला अदालतबाट ५ दिनको म्याद लिई अनुसन्धान भइरहेकाे जिल्ला प्रहरी कार्यालय मकवानपुरले जनाएको छ ।
मकवानपुर । बागमती प्रदेशकाे राजधानी हेटाैडाबाट प्रशारण भइरहेकाे रेडियो मकवानपुरकाे बार्षिकाेत्सव सुरु भएकाे छ । १०१ दशमलव ३ मेगाहर्जमा प्रशारण हुने रेडियो मकवानपुरकाे १३ औं बार्षिकोत्सव अन्तर्गत सप्ताहव्यापी कार्यक्रम सुरु भएको हाे ।
सप्ताहव्यापी कार्यक्रम अन्तर्गत पहिलो दिन सोमबार सहिद दिवसको अवसरमा ‘सहिदको सपना र आजको नेपाल’ बिषयमा साहित्यकारसंग अन्तरक्रिया तथा रचना वाचन कार्यक्रम भएको हाे । रेडियो मकवानपुरमा भएको कार्यक्रमका सहभागी साहित्यकारले अझै सहिदको सपना पूरा नभएको गुनासो गरेका थिए । सर्जक सञ्जाल मकवानपुर अध्यक्ष निमेष निखिलले मुलुकको परिवर्तनका लागि सयौंले बलिदानी दिएपनि अझै जनताले सुखको अनुभव गर्न नसकेको बताए । ‘संविधान पूर्ण कार्यान्वयन अझै हुन सकेको छैन । जनताले परिवर्तनको प्रत्याभुती गर्न पाएका छैनन्, महंगी, बेरोजगार र भ्रष्टाचार बढ्दो छ’, निखिलले भने, ‘सहिदको सपना पूरा गराउनेतर्फ राजनीतिक दल र राज्य लाग्नु आवश्यक छ ।’
यस्तै समालोचक एवम् साहित्यकार घनश्याम घिमिरेले केही हदसम्म समाज र व्यवस्था परिवर्तन भएपनि सहिदको सपना भने पूरा हुन नसकेको धारणा राखेका छन् । अहिलेकै अवस्थामा सहिदको आत्मासन्तुष्ट हुने अवस्था नरहेको भन्दै उनले जनताको मुहारमा हाँसो नभएको बताए । सहिद को हो भन्ने नै समस्या रहेको स्मरण गर्दै उनले भने ‘राष्ट्र, समाज र परिवर्तनको लागि लडेकाहरु नै सहिद हुन् भन्ने बुझ्न जरुरी छ ।’
श्यामप्रसाद शर्मा स्मृति प्रतिष्ठानका सचिव सुवास खनालले मुलुकको सकारात्मक परिवर्तनका लागि सहिदले बलिदानी दिएको भएपनि त्यसको कदर हुन नसकेको बताए । मुलुकमा विभिन्न नामको तन्त्र आएपनि देशले भने गति प्राप्त गर्न नसकेको उनले बताए । आँचल साहित्य कला पुञ्जका उपाध्यक्ष नीरा शर्माले मुलुकको विकास, समृद्धि एवम् परिवर्तन नै सहिदको सपना भएपनि त्यो पूरा हुन नसकेको बताइन् । अझै नेपालमा गाँस, बास, कपासको लागि आत्मदाह गर्नुपर्ने अवस्था रहेको भन्दै शर्माले दुःख व्यक्त गरिन् ।
यसैगरी प्रगतिशिल लेखक संघ मकवानपुरका पूर्व अध्यक्ष पुरुषोत्तम आचार्यले देश र जनताको लागि ज्यान नै दिनु सामान्य कुरा होइन भन्ने बुझ्न जरुरी रहेको औंल्याए । अब हुने सहिदका कार्यक्रमहरु कतै औपचारिकतामै सिमित हुने त होइन भन्दै उनले प्रश्न गरे । मुलुकमा राजाको छोरा नै राजा हुने प्रथाको अन्त्य भएपनि दुखी गरिबको अवस्था उस्तै रहेको आचार्यको भनाई थियो ।
रेडियो मकवानपुरका प्रबन्ध निर्देशक आशिष दुलालको अध्यक्षतामा भएको कार्यक्रममा साहित्यकारहरुले सहिदसँग सम्बन्धित कविता वाचन समेत गरेका थिए । रेडियाे मकवानपुरले २२ गतेसम्म विविध कार्यक्रमको आयोजना गरी बार्षिकाेत्सव मनाउँदै छ । १७ गरे मंगलबार श्रीमद् भागवत ज्ञान सञ्चार बृद्धाश्रम हेटौंडा १७ मा खाद्यान्न सहयोग, १८ गते रेडियोकै प्राङ्गणमा रक्तदान, १९ गते बालअधिकार विषयक विद्यालयस्तरीय कविता प्रतियोगिता हुनेछ ।
यस्तै माघ २० र २१ गते रेडियो मकवानपुर कप फुट्सल प्रतियोगिता, २१ गते शनिबार मनहरी गाउँपालिका ४ मा बृहत निशुल्क स्वास्थ्य शिविर र २२ गते बार्षिकोत्सव समापन हुने रेडियाे संचालक समितले जनाएकाे छ । समापन समाराेहमा दुईजनालाई सामुदायिक सम्मान र पुरस्कार वितरण कार्यक्रम हुनेछ ।
कविता प्रतियोगिताको विजेता विद्यार्थीले क्रमशः नगद १० हजार, ७ हजार र ५ हजार सहित प्रमाणपत्र प्राप्त गर्नेछन् । यस्तै रेडियो मकवानपुर कप फुट्सलको विजेता र उपविजेतालाई नगदसहित पुरस्कारको व्यवस्था रहेको बताइएको छ । रेडियोले बार्षिकोत्सवको अवसरमा दुईजनालाई जनही नगद १० हजार सहित सामुदायिक सम्मान समेत प्रदान गर्नेछ ।
मकवानपुर । मकवानपुरकाे हेटाैडामा लागूऔषधको लतमा लागेकालाई तालिम सचालन गरिएकाे छ । लागुऔषधकाे लत पछि सुधार केन्द्रमा रहेका युवालाई लक्षित गर्दै हेटौंडामा विद्युत जडान तालिम सुरु भएको हाे ।
हेटौंडा उपमहानगरपालिकाको सहयोगमा व्यवसायीक तथा सीप विकास तालिम केन्द्र र मकवानपुर रिकभरी समूहले सञ्चालन गरेको तालिमको हेटौंडा उपमहानगरपालिकाका नगर प्रमुख मीनाकुमारी लामाले उद्घाटन गरेकी हुन् ।
नगर प्रमुख लामाले बिद्युत जडान तालिममा लागेकालाई रोजगारीको व्यवस्था मिलाउनका लागि उपमहानगरपालिका तयार रहेको बताइन् । रिकभरी समूह अध्यक्ष सुरज बिक्रम राणाको सभाध्यक्षतामा तीन महिने तालिम उद्घाटन कार्यक्रम भएकाे हाे ।
सुधार केन्द्रमा रहेका ३६ जना मध्ये २० जना तालिममा सहभागी छन् । व्यवसायीक तथा सिप विकास तालिम केन्द्रका शम्भु आचार्यले प्रशिक्षण दिनेछन्।
मकवानपुर । बागमती प्रदेश सरकारका मुख्य न्यायाधिवक्ता ज्ञानेन्द्र नेपालले सपथ लिएका छन् । साेमबार उच्च अदालत पाटनका मुख्य न्यायाधीश महेश पुडासैनीले प्रदेश प्रमुख यादवचन्द्र शर्माको उपस्थितिमा मुख्य न्यायधिवक्ता नेपाललाई पद तथा गोपनियताको सपथ गराएका हुन् ।
सोमबार प्रदेश प्रमुखको कार्यालय बागमतीमा आयोजित सपथ समारोहमा मुख्य न्यायाधीश पुडासैनीले नेपाललाई पद तथा गाेपनियताकाे सपथ गराएको प्रदेश प्रमुखको कार्यालय बागमती हेटौंडाले जनाएको छ ।
सिन्धुपाल्चोक चौतारा साँगाचोकगढी नगरपालिका वडा नम्बर १४ स्थायी घर भएका नेपाललाई मुख्यमन्त्री शालिकराम जम्कट्टेलको सिफारिसमा गत माघ १२ गते विहीबार प्रदेश प्रमुख यादवचन्द्र शर्माले नियुक्त गरेका हुन् । नेपाललाई प्रदेश प्रमुख शर्माले नेपालको संविधानको धारा १६० को उपधारा ९२० बमोजिम मुख्य न्यायाधिवक्तामा नियुक्त गरेका थिए ।
मुख्य न्यायाधिवक्ता नेपालकाे सपथ समारोहमा मुख्यमन्त्री जम्कट्टेल र प्रदेशका अन्य मन्त्रीहरुकाे उपस्थिति रहेकाे थियाे ।
