‘१० औँ राष्ट्रिय औद्योगिक व्यापार महोत्सव २०७९’ समापन
Tags: No Comments
मकवानपुर । हेटौंडामा गत ११ माघबाट सुरु भएको ‘१० औँ राष्ट्रिय औद्योगिक व्यापार महोत्सव २०७९’ सोमबार समापन गरिएको छ । मकवानपुर उद्योग वाणिज्य संघको आयोजनामा १३ दिनसम्म चलेको महोत्सवमा करिब दश करोड बराबरको कारोबार भएको संघले जनाएको छ ।
महोत्सवमा करिब एक लाख दर्शकहरुले महोत्सवको अवलोकन गरेको अनुमान आयोजकको रहेको छ ।महोत्सवमा कृषि, व्यापार, उद्योग, सूचना प्रविधि, पर्यटन, अटो, होटल लगाएत विभिन्न ३ सय ३७ वटा स्टलहरु राखिएको थियो ।
सोमबार युवा पुस्तामा चर्चित रहेकी गायिका रचना रिमालले आफ्नो सांगीतिक प्रस्तुती प्रस्तुत गरेकी थिइन् । उनले फोटो फिरेममा…, उनको प्रिती पहिले होकी मेरो प्रिती पहिले…, सम्झिनी पानी छम्किनी…लगायतका चर्चित गीतहरु प्रस्तुत गरेकी थिइन् । त्यस्तै गायक तथा संगीतकार चेतन सापकोटाले पनि आफ्नो सांगीतिक प्रस्तुती दिदैं दर्शक नचाएका थिए ।
महोत्सवका संयोजक एंव संघका अध्यक्ष कृष्ण कुमार गुप्ताको सभाध्यक्षता तथा बागमती प्रदेश सभामा सभामुख भुवन कुमार पाठकको प्रमुख आतिथ्यतामा महोत्सवको समापन गरिएको थियो । समापन कार्यक्रममा महोत्सवलाई प्रायोजक, सहप्रायोजक, महोत्सवलाई सफल बनाउने सबै सहयोगी हातहरु सम्पूर्ण संघसंस्थाहरुलाई कदरपत्र प्रदान गरिएको थियो ।
समापन कार्यक्रममा नेपाल उद्योग वाणिज्य महासंघका केन्द्रीय सदस्य अरुणराज सुमार्गी, संघका पूर्व अध्यक्ष केशव श्रेष्ठ, भुवनलाल श्रेष्ठ, उत्तम शर्मा ढकाल, निर्वतमान अध्यक्ष कृष्ण कटुवाल, मकवानपुरका विभिन्न गाउँपालिकाका अध्यक्ष तथा उपाध्यक्ष, हेटौंडा उपमहानगरपालिका प्रवक्ता एंव वडाध्यक्ष सविन न्यौपाने, वडा १० वडाध्यक्ष फुर्वा दोर्जे लामा, संघका सल्लाहकारहरु तथा विभिन्न संघ संस्थाहरुका अध्यक्ष तथा प्रतिनिधिहरुको उपस्थिति रहेको थियो ।
मकवानपुर उद्योग वाणिज्य संघले पहिलो पटक २०४२ सालमा औद्योगिक व्यापा मेला गरेको थियो । त्यसपछि संघले २०४३, २०५३, २०५५, २०५६ सालमा मेला गरेको थियो भने २०६६ सालमा मध्यमाञ्चल औद्योगिक व्यापार मेला गरेको थियो । यस्तै २०६८, २०७०, २०७२ र २०७५ सालमा राष्ट्रिय औद्योगिक व्यापार मेला आयोजना गरेको संघले ४ वर्ष पछि १० औँ राष्ट्रिय औद्योगिक व्यापार महोत्सव २०७९’ आयोजना गरेको हो ।
मकवानपुर । मकवानपुरमा जारी १० औं राष्ट्रिय औद्योगिक व्यापार महोत्सव आइतबार ६ हजार जनाले अवलोकन गरेको अनुमान गरिएको छ । महोत्सवको बाह्रौं दिन आइतबार करिब ४० लाख बराबरको कारोबार भएको अनुमान आयोजक मकवानपुर उद्योग संगले गरेको छ ।
मकवानपुर उद्योग वाणिज्य संघको मुख्य आयोजनामा हेटौंडा १० टिसिएन चौरमा माघ ११ गतेबाट सुरु भएको महोत्सवमा आइतबार युवा पुस्ता माझ चर्चित गायिका शान्तिश्री परियारले आफ्नो सांगीतिक प्रस्तुती दिदैं हेटौंडेली दर्शकहरुलाई नचाएकी थिइन् । उनले बोल माया…, लाउन्न दाजै पिरती…, भीर मौरी भीरैमा…, गलबन्दी च्यातियो…, ए फुलमाया यता आइजो…, हिमाल फुल हिउँमै सरेको…, सोल्टी बजारमा…, नयाँ नयाँ लुगा फेरे लगायत थुप्रै गीतहरु प्रस्तुत गरेकी थिइन् । त्यस्तै आजै गायक सुजील कर्माचार्यले भुमो भुमा…, मानिलेउ संसारकै तिमी राम्री लगायतका गीतहरु प्रस्तुत गरेका थिए ।
महोत्सवको अन्तिम दिन भोली सोमबार चर्चित गायिका रचना रिमालले आफ्नो सांगीतिक प्रस्तुती दिने महोत्सवका कलाकार मनोञ्जन समितिका संयोजक एवम् संघका उपाध्यक्ष उज्वल चौलागाईले बताए । महोत्सवमा हेटौंडा आइडल गायन प्रतियोगिता र हेटौंडा डान्सिङ स्टार प्रतियोगिता पनि भएको छ । हेटौंडा आइडल र हेटौंडा डान्सिङ स्टारमा मकवानपुरका विभिन्न नवप्रतिभाहरुले प्रतिस्पर्धा गरिरहेका छन् । हेटौंडा आइडलको आफ्ना मनपर्ने प्रतिस्पर्धीलाई एसएमएस र टिकटको अर्थकट्टीबाट भोट हाल्न सकिने व्यवस्था गरिएको आयोजक जनाएको छ । आइतबार आइडलबाट राजेश दर्नाल बाहिरेका छन् भने बाकीँ ५ जना फाइनल प्रवेश गरी आफ्नो सांगीतिक प्रस्तुती दिएका छन् ।

महोत्सवमा आज आइतबार मकवानपुर सहकारी अस्पतालका विशेषज्ञहरुद्धारा निशुल्क स्वास्थ्य परिक्षण गरिएको थियो । महोत्सवलाई हेटौंडाको उत्पादन शिवम सिमेन्टले प्रायोजन गरेको छ भने सह—प्रायोजकमा युनिलिभर नेपाल लिमिटेड, नेपाल ब्रुअरिज र लक्ष्मी ग्रुप (हुण्डाई) रहेको महोत्सवका मुल संयोजक एवम् मउवा संघका अध्यक्ष कृष्ण कुमार गुप्ताले बताए ।
मेला सम्पन्न गर्न जिल्ला समन्वय समिति मकवानपुर र हेटौंडा उपमहानगरपालिका प्रवर्धक रहेका छन् भने महोत्सवको सह—आयोजकमा बागमती प्रदेश सरकारको उद्योग वाणिज्य तथा आपूर्ति मन्त्रालय, संस्कृति तथा पर्यटन मन्त्रालय र कृषि तथा पशुपन्छी विकास मन्त्रालय रहेको छ ।
महोत्सवको टिकट प्रायोजकमा शौर्य सिमेन्ट, रिद्धिसिद्धी सिमेन्ट रहेको छ । महोत्सवको आधिकारिक विमा कम्पनीको रुपमा एनएलजी विमा कम्पनी रहनुका साथै लोगो प्रायोजकमा राष्ट्रिय वाणिज्य बैंक र नेपाल ईकरात रहेको मुख्य आयोजक मकवानपुर उद्योग वाणिज्य संघले जनाएको छ ।
१० औं राष्ट्रिय औद्योगिक व्यापार महोत्सवमा हेटौंडा आइडल डान्सिङ स्टार, जुम्लाको मार्सी चामल, केराको परिकार, मकवानपुरगढीको रैथाने बाली कोदोको पिठो बाट कोदोको विष्कुट, निमकिन, पोखराको खुवा, नेपाल टेलिकमको फ्री सिमकार्ड, हिमाली भीरमौरीको मह, भोजपुरे खुकुरी, प्राचीन हस्तकलाको झ्याल, ढोका, पुस्तक प्रदर्शनी, आइसगोला र मकवानपुरे आइसक्रिम, ल्यापटप एवम् मोवाइलको फ्रि सर्भिससिङ, मोडुलर किचेन, टाटा, सिजीका विभिन्न किसिमका इलेक्ट्रिक गाडीहरु, बालबालिकाको लागि फन पार्क, स्थानीय एवम् राष्ट्रिय कलाकारहरुको दैनिक प्रस्तुती, हेटौंडा र अन्य अस्पतालका डाक्टरहरुबाट निःशुल्क स्वास्थ्य शिविर, क्यारियर काउन्सिलिङ र दैनिक उपभोग्य वस्तुहरुसमेत विक्री वितरण भइरहेको संघका महासचिव दीपक उप्रेतीले बताए ।
मकवानपुर । बागमती प्रदेशसभाले कार्यव्यवस्था परामर्श समिति गठन गरेको छ । आज दिउँसो बसेको प्रदेश सभा बैठकले कार्यव्यवस्था परामर्श समितिको गठन गरेको हो ।
प्रदेश सभा नियमावली (पहिलो संशोधन) २०७४ को नियम १३ बमोजिम कार्यव्यवस्था परामर्श समितिमा सांसदहरुलाई मनोनयन गरिएको छ ।
प्रदेश सभा सचिवालयका अनुसार सांसदहरू ओमकुमारी श्रेष्ठ, आन्दकुमार श्रेष्ठ, कुन्दनराज काफ्ले, छिरिङ दोर्जे लामा, मधुसुदन पौडेल, भारती पाठक, रत्नप्रसाद ढकाल, राधिका तामाङ, रामकृष्ण चित्रकार, शैलेन्द्रमान ब्रर्जाचार्य, सुरेन्द्रराज गोसाईँ, र हरिप्रभा श्रेष्ठलाई कार्यव्यवस्था परामर्श समितिमा मनोनयन गरिएको छ ।
बैठकमा मुख्यमन्त्री शालिकराम जम्मकट्टेलले मुख्य न्यायधिवक्ताको कार्यालयको वार्षिक प्रतिवेदन सभामा पेश गरेका थिए। बैठक अब भोलि (सोमबार) दिउँसो १२ बजे बस्ने गरी स्थगित छ।
मकवानपुर । ठेकदारले काम जिम्मा लिएपछि सुरु गर्न कति समय लाग्ला, एक दुई हप्ता वा महिना ? तर हैन मकवानपुरको हेटौंडा उपमहानगरपालिकाको मुटुमै रहेको एउटा पुल निर्माण गर्न ठेक्का दिएको म्याद अबको ४ महिनामा सकिदैछ । तर काम भने ४ प्रतिशत पनि भएको छैन ।
उपमहनगरपालिकाको वडा न १ मा वर्षौदेखि महाकालको रुपमा रहेको तुइन विस्थापित गरेर पक्कि पुल निर्माण गर्न २ वर्ष अघि दिइएको ठेक्का अन्तरगत हालसम्म एउटा खाल्डो खन्नु बाहेक काम भएको छैन । पुल निर्माण गर्ने भनेपछि तुइन त विस्थापित गरियो तर पुल बनेन । अहिले स्थानीयहरु समस्या झेल्दै आएका छन् ।
हेटौंडा उपमहानगरपालिकाको लालझाडी र चौकीटोल जोड्ने पक्की पुल निर्माणमा ढीलाइ हुँदा स्थानीयहरुले दबाब सुरु गरेका छन् । उपमहानगरपालिका १ स्थित लालकाडी र चौकीटोल जोड़ने पक्की पुल निर्माणका लागि बागमती प्रदेश सरकार भौतिक पूर्वाधार विकास मन्त्रालय अन्तर्गत भौतिक पूर्वाधार विकास कार्यालय, भरतपुर चितवनले निर्माण व्यवसायी शिवशक्ति,सिद्धार्थ शिवम जे भी मकवानपुरसंग ठेक्का सम्झौता गरेको थियो ।
२०८० जेठ १७ मा कार्य सम्पन्न गर्ने गरी २०७३ जेठ १८ गते भएको सम्झौता अनुसार काम नहुदा स्थानीयहरु मारमा परेका छन् । पुल निर्माणका लागि ८ करोड ४७ लाखमा भएको सम्झौता भएको थियो । ठेकेदार कम्पनीले सम्झौता अनुसारको झण्डै ४० लाख बजेट बुझिसकेको छ तर काम अघि बढ्न सकेको छैन ।
२० महिना बितिसक्दा हालसम्म कामको सुरुवातको नाममा एउटा खाल्डो खनिएको छ । पुल निर्माण हुने भएपछि स्थानीयहरुले छोड्नु पर्ने जमिन छाडिसकेका छन् । “यहाँ छेउमा भएको घर, घट्ट हामीले हटाइसक्यौ, पुलमा जोडिने बाटो १५ मिटर क्लियर गर्न कुनै समस्या भएन” वडा अध्यक्ष सविन न्यौपानेले भने “सबै स्थानीयहरुले सहज वातावरणमा घर सारे, रोजिरोटी चल्दै आएका घट्ट झिके, बाटो विस्तार गर्न बिना मुअब्जा जग्गा छोडिदिएका छन्, यही पुल बन्न सकेन ।”
पूर्व मुख्यमन्त्री डोरमणी पौडेल, उपमहानगरप्रमुख हरिबहादुर महत र भौतिक पूर्वाधार मन्त्रालयका सचिवहरु कै रोहवरमा निर्माण चाँडो गर्ने लिखित सहमतिको चाँङमात्रै लागेको तर काम नभएको न्यौपानेले बताए । “कागजी प्रक्रिया र सारा फलोअप भयो, अब हामी सडकमा जाने र उहाँलाई सडकमै बोलाउने बाहेकको काम बाँकी छैन” न्यौपानेले भने ।
स्थानीय रुपमा आइपर्ने समस्याहरुमा समेत पूर्णरुपमा सहयोग र सहकार्य गर्ने प्रतिवद्धतासहित भइसकेको बेला ठकेदारले काम नगर्दा स्थानीयहरु आवतजावतमा समस्या भएको उनले बताए । खोलामा जोखिपूर्ण काठको पुल छ, कुनै पनि समय बालबालिका घटनामा पर्न सक्छन् स्थानीय संघर्ष समिति अध्यक्ष विनोद पौडेलले भने ।
कानुनतः सम्झौता गरेर जिम्मेवारी दिएको कार्यसमेत नगरी नेपाल सरकारको कानुनलाई समेत मिचिएको मनोमानी ढंगले कामप्रति हेलचक्रयाइ गरेको उनले बताए ।
यो पुल निर्माण नहुँदा यहाँबाट लालझाडी, मैनाटार, नकौली, लामीडाडा बांझोडाँडा र घ्याङसिङटार क्षेत्र सडक सञ्जाल राजमार्गसंग नजोडिदा स्थानीयवासीहरु आजित भएको टोल विकास संस्थामा अध्यक्ष रामप्रसाद तिमल्सिनाले बताए ।
देशमै तुइन विस्थापन गर्ने सरकारको नीतिबमोजिम तुइन विस्थापन भइली र सोही स्थानमा बन्न लागेको पुल समयमा सम्पन्न नहुँदा दैनिक आवतजावत गर्न अप्ठ्यरो परेको अध्यक्ष तिमल्सिनाले बताए ।

यो पुल बन्दा ३० हजार भन्दा बढी जनताहरु प्रत्यक्ष लाभ लिन सक्नेछन् । यसक्षेत्रमा उत्पादन भएको कृषि उपज बजार ल्याउन असहज पुल अभावकै कारण समस्या भएको वडा अध्यक्ष न्यौपानेले बताए । आफूहरुले पटक पटक ठेकदार कम्पनीलाई झकझक्याउँदा २ पटक सम्म “अब काममा रफ्तार बढाउने” लिखित सहमति भएको, तर त्यो दस्तावेज मन्त्रालयमा थन्किने र काम अघि नबढ्ने समस्या भएको न्यौपानेले बताए ।
“८ करोडको पुल निर्माण गर्न एउटा मिसेन ल्याएर यस्सो हल्लाउँदै हाम्रो आँखामा छारो हाल्ने काम भैरहेको छ, २० महिनामा एउटा खाल्डो पनि पुरा भएको छैन, यस्तो कम्पनीले कसरी काम गर्छ” तिमल्सिनाले भने ।
अबको एक सातासम्म पनि काम सुचारु नगरिए मन्त्रालय घेराउ तथा राजमार्गमा चक्काजाम गर्नेसम्मको चरणवद्ध आन्दोलन गर्न चेतावनी स्थानीयवासीले दिएका छन् । विगतमा यहाँको राप्तिखोला तुइनबाट पार गर्दा पटक पटक मानवीय क्षति भएको थियो ।
यसबारे प्रश्न गर्दा ठेकदार कम्पनीका फिल्ड इञ्चार्ज विष्ण्ु अर्यालले निर्माण अवधि थप गर्न माग गर्ने र अबको समयसिमा भित्र कुनै पनि हालमा काम सक्ने प्रतिक्रिया दिए । “हामीले यस अघि पुन निर्माणको काम गरेका थिएनौ, एक हिसाबले हामीलाई मिसिनरी पार्टपुर्जाको पनि समस्या भयो, र केही आइडियाको पनि कमी भयो” उनले भने “हेटौंडामा उपलब्ध भाडाका सामान ल्याएर काम थालियो तर, प्राविधिक काम भनेजस्तो सहज छैन, अब चाँडौ कामले रफ्तार लिने छ ।”
मकवानपुर । मकवानपुरको हेटौंडामा बाल कला साहित्य महोत्सव आयोजना हुने भएको छ । महोत्सवमा बाल कला र साहित्य बारे भारत र पाकिस्तानका साहित्यकारहरूसंग प्रत्यक्ष अन्तरक्रिया हुनेछ । नवोदय शिशु सदन विद्यालय हेटौंडा, हेटौंडा स्कूल अफ म्यानेजमेन्ट एण्ड सोसियल साईन्सेज र काठमाडौं पब्लिकेशनको आयोजनामा माघ २७ र २८ गते हुने महोत्सव हुने भएको हो ।
बाल कला साहित्य महोत्सव सम्बन्धी जानकारी दिन पत्रकारसंग भेटघाट कार्यक्रम गर्दै आयोजक नवोदय शिशु सदन विद्यालयका शिक्षक तथा कार्यक्रम संयोजक सीएम रिमालले सिर्जनात्मक पठन सस्कृतिको विकास गर्ने उद्धेश्यका साथ महोत्सव आयोजना गर्न लागिएको बताए ।
दुईदिने कार्यशालामा ६ हजारभन्दा बढी विद्यार्थी, शिक्षक तथा अभिभावकसहित सरोकारवालाको सहभागिता रहने अपेक्षा गरिएको छ । महोत्सवमा कलाकार मदनकृष्ण श्रेष्ठ, नाटककार अशेष मल्ललगायतका राष्ट्रिय व्यक्तित्वहरु उपस्थित हुने नबोदयका निर्देशक दिपेश जोशीले बताए । महोत्सवमा मुख्य आकर्षकको रूपमा भारत र पाकिस्तानमा बाल साहित्य प्रबर्द्धनको अभ्यास र नेपालको अभ्यास अध्ययन र सिकाई सहयोग बारे अन्यरकृय हुने छ ।
महोत्सवमा भारतीय लेखक तथा वृतचित्र निर्देशक समिना मिश्र र पाकिस्तानी शिक्षाविद् रुमना हुसेनको पनि सहभागिता रहने रिमालले जानकारी दिए । महोत्सवका नियमित सहभागी नेपाली लेखक अनुराधाको समन्वयमा मिश्र र हुसेन हेटौंडा आउने भएका हुन ।
‘विद्यार्थीमा पठन संस्कृतिको विकास गर्ने मूल उद्देश्य महोत्सवको हो’ विद्यालयका निर्देशक जोशीले भने ‘सहभागी हुने विद्यार्थीमा कला–साहित्यको सीप तथा सिर्जनात्मक क्षमता अभिवृद्धि हुने, स्थानीय कला–साहित्य, बाजागाजा र संस्कृतिको पहिचान गराउँदै त्यसप्रति रुचि जगाउन मद्दत गर्छ ।’ नवसर्जक र स्थापित सर्जकबीच अन्तरक्रियाको अवसर सिर्जनाका साथै वौद्धिक जनशक्ति निर्माण गर्ने समेत महोत्सवको उद्देश्य रहेको निर्देशक जोशीले बताए ।
हेटौंडा–४, कमलडाँडास्थित नवोदय शिशु सदन मावि परिसरमा आयोजना हुने महोत्सवको पहिलो दिन १२ वटा विविध विषयमा फरक फरक व्यक्तित्वले सहजीकरण गर्ने गरी कार्यशाला हुने महोत्सवका संयोजक सिएम रिमालले जानकारी दिए । करिब १५ लाख रुपैयाँ लागत अनुमान गरिएको महोत्सवमा विद्यार्थीले आफ्नो कला प्रस्तुतीकरण समेत गर्नेछन् ।
समसामयिक विषयमा संघसस्था, साहित्यकार, पत्रकार, विद्यार्थी र शिक्षक सम्मिलित प्यानल डिस्कसन गर्ने, पञ्चे बाजा, माझी बाजा, धिमे, खैजडीजस्ता परम्परागत बाजागाजा र नृत्यहरु समेत गर्ने कार्यक्रम रहेको छ । महोत्सवमा खानाका स्टलहरु राखिने छन् भने पुस्तक पर्दशनी, चित्र प्रर्दशनी, आत्मकथा वाचन लगाएका कार्यक्रम तय भएको छ ।
यसअघि पनि विद्यालयले २ पटक बाल साहित्य महोत्सव आयोजना गरिसकेको छ । हेटौंडा उपमहानगरपालिका, प्याब्सन मकवानपुर, सर्जक सञ्जाल मकवानपुर, बुक ल्याण्ड, नेपाल बाल साहित्य समाजलगायतका संघसस्थाको सहकार्यमा महोत्सव आयोजना हुने भएको कार्यक्रममा बताइएको छ ।
