मकवानपुर हर्नमाडीको गीत सार्वजनिक (म्युजिक भिडियो सहित)
Tags: No Comments
मकवानपुर । मकवानपुरकाे हर्नमाडीको ऐतिहासिकता समेटिएकाे हर्नामाडी मकवानपुर बाेलकाे गीत र म्युजिक भिडियो सार्वजनिक भएकाे छ । हाल हेटौडा १८ हर्नामाडी (तत्कालिन हर्नामाडी गाविस) तथा यस स्थानसँग जोडिएका ऐतिहासिक महत्व गीतमा समेटिएको छ ।
हर्नामाडीका स्थायी बासिन्दा समेत रहेका ओकिलराज बानियाको युवट्युव च्यानल मार्फत सार्वजनिक गीत मकवानपुरकाे ऐतिहासिक गढी दरबार, राजदेवी मन्दिर, हर्नामाडी फाँट, गुम्बाडाडा लगायतका स्थानमा छायाङ्कन गरिएको छ । गीतको शब्द रचना ओकिलराज बानियाँले गरेका हुन भने स्वर गीतकार बानियाँ र अस्मिता थापाको रहेको छ ।
गीतमा सुमन तामाङ नेटिभ स्टुडियोले संगीत भरेका छन भने गीतको म्युजिक भिडियोमा नृत्य निर्देशक प्रनिश घिमिरे रहेका छन । गीतकार बानियाँले निर्देशन गरेको भिडियोमा क्यामरा तथा सम्पादन मनोज दाहालले गरेका छन ।
मकवानपुर गढिदरबार राजदेवी मन्दिर गुफास्थान हर्नाफाँट लगाएतका क्षेत्रको महत्व दर्शाइएको भाव रहेको गीतको भिडियोमा बानियाँसहित अस्मिता भट्टराई, मनिशा क्षेत्री, सबिना खतिवडा, लक्ष्मी घलान, प्रमिश अधिकारी, स्वस्तिका बानियाँ, आशिष बिक, सुस्मिता अधिकारी लगायतका कलाकारले अभिनय गरेका छन ।
गीतकार बानियाँका अनुसार सेन वंशीय राजाले राज्य गरेकाे हर्नामाडी लगायतकाे क्षेत्रकाे ऐतिहासिक महत्व नयाँपुस्तालाई बुझाउन तथा प्रचार प्रसारकाे लागि गीतले सहयाेग पुग्नेछ ।
मकवानपुर । दोस्रो संस्करणको बागमती प्रदेश खेलकुद प्रतियोगिता आइतबारबाट सुरु भएको छ । हेटौंडा–५ स्थित पिप्ले–क्याम्पा रंगशालामा प्रतियोगिताकाे दोस्राे संस्करणको जेठ ७ गते आइतबार साँझ बागमती प्रदेशका मुख्यमन्त्री शालिकराम जमकट्टेलले उद्घाटन गरेसंगै प्रतियोगिता सुरु भएको हो ।
उद्घाटन समारोहमा नेपाली सेना, सशस्त्र प्रहरी र नेपाल प्रहरीबाट मार्चपास, प्रदेशका जिल्लाका सांस्कृतिक झाँकी प्रदर्शनी, ड्रिल प्रदर्शन, विभिन्न सांस्कृतिक कार्यक्रम र आतिसबाजी सहित सांङ्गीतिक प्रस्तुती भएको थियो ।
प्रदेश खेलकुद विकास परिषद्को आयोजनामा सुरु भएकाे प्रतियोगितामा १३ खेल समावेश गरिएकाे छ भने २ सय १९ स्वर्ण, २ सय १९ रजत र ३ सय ५६ कास्य गरी ७ सय ९४ पदका लागि प्रतिस्पर्धा हुने बताइएकाे छ । प्रतियोगितामा फुटबल, भलिबल, एथलेटिक्स, तेक्वान्दो, कराते, बक्सिङ, रग्बी, ब्याडमिन्टन र आइटिएफ तेक्वान्दो हेटौँडाका विभिन्न खेल मैदानमा खेलाइने प्रदेश खेलकुद विकास परिषद्को सदस्य सचिव सूर्यलाल भण्डारीले जानकारी दिए ।

सार्वजनिक खेल तालिका अनुसार प्रतियोगिताको पुरुष फुटबल र एथ्लेटिक्स् हेटौंडा–५ स्थित पिप्ले क्याम्पा रंगशालामा हुनेछ भने महिला फुटबल हेटौडाकाे गौरीटार रंगशालामा हुनेछ । हेटौंडा–४ स्थित हुप्रचौरमा भलिबल, रग्वी, कराँते, तेक्वान्दो, आईटीटीफ र तेक्वान्दोको खेल हुनेछ ।
त्यस्तै बक्सिङ्ग महिला र पुरुष खेल हेटौंडा–४ स्थित कर्भड हलमा हुनेछ भने व्याटमिन्टन महिला र पुरुष हेटौंडा–११ थानाभ¥याङ्गस्थित कर्भड हलमा हुनेछ । जुडो काठमाडौं, उसु त्रिपुरेश्वर, क्रिकेट चितवन, पौडी सादोबाटो ललितपुरमा हुने तय भएको भएको सदस्य सचिव भण्डारीले जानकारी दिए ।
प्रतियोगितामा स्वर्ण, रजत र कास्य पदक विजेता खेलाडीले क्रमशः ५ हजार, ४ हजार र ३ हजार रुपैयाँसहित प्रमाणपत्र, शिल्ड तथा मेडल प्राप्त गर्नेछन् । प्रतियोगिता सञ्चालनमा ९ करोड ४२ लाख रुपैयाँ खर्च हुने आयोजकको अनुमान छ ।

प्रतियोगितामा १ हजार ७५ महिला र १ हजार ४ सय २७ पुरुष खेलाडी सहभागी हुँदैछन् । यस्तै १ सय ७३ प्रशिक्षक, १ सय ४२ व्यवस्थापक, २ सय ७६ निर्णायकलगायत प्रतियोगितामा सहभागी हुने आयोजकले जनाएको छ ।
दोस्राे संस्करणकाे प्रतियोगिता जेठ १३ गते शनिबार समापन हुने कार्यतालिका रहेकाे छ । स्वास्थ्यका लागि खेलकुद राष्ट्रका लागि खेलकुद भन्ने नारा सहित बामगती प्रदेश खेलकुद बिकास परिषदले देशमै पहिलो पटक प्रदेश स्तरको खेलकुद प्रतियोगिता गत बर्ष आयोजना गरेको थियो । प्रतियोगिताको पहिलो संस्करणमा गत वर्ष ८ वटा विधामा खेल खेलाइएको मा दोस्रो संस्करणमा ५ खेल थप गर्दै १३ बिधामा प्रतियोगिता हुने भएको हो ।
प्रदेशका खेल प्रतिभाको खोजी, प्रदेश समुह तयार र खेलाडीलाई नियमित अभ्यास एवम् प्रशिक्षणको उद्देश्यका साथ दोस्रो वर्ष पनि प्रतियोगिता सुरु गरिएको प्रदेश खेलकुद परिषद्ले जनाएको छ ।
यस्तै दोस्रो बागमती प्रदेश खेलकुद प्रतियोगिताको मस्कटको रुपमा लोपन्मुख सालकलाई प्रयोग गरिएको छ । मकवानपुरको शानको रुपमा मान्ने गरिएको सालकलाई मस्कटको रुपमा प्रयोग गरिएको हो ।
‘किसानको साथी’ को रुपमा हेर्ने गरिएको सालक संरक्षणको पहल स्वरुप मस्कटको रुपमा प्रयोग गरिएको बागमती प्रदेश खेलकुद परिषद कार्यालयले जनाएको छ ।

सामाजिक विकास मन्त्री कुमारी मोक्तानको सभाध्यक्षतामा भएको उद्घाटन समारोहमा प्रदेश सरकारका मन्त्रीहरु, प्रदेश सभा सदस्यहरु, स्थानीय तहका प्रमुखहरु, ओलम्पियन खेलाडी, प्रमुख जिल्ला अधिकारी, सुरक्षा निकायका प्रमुख लगायतको उपस्थिति रहेको थियो ।

मकवानपुर । चाहाना गरियाे भने संभावनाकाे बाटाहरु प्रसस्तै छन् । सबै प्रकारका श्रमको सम्मान गर्नुपर्ने बहस बेलाबेलामा चल्ने गरेको छ । प्रकृतिअनुसार काम कष्टकर वा सहज हुन सक्छ तर काम सानो ठूलो भन्ने हुँदैन । यस्ता बहसमा कमै स्मरण गरिने र कमै उदाहरणमा जोडिने काम हो आरनको काम । कुनै समय हेंलाको पेसा मानिने आरनमा समयानुकूल प्रविधिको प्रयोगपछि गज्जबले रोजीरोटी चलेको छ ।
फलाम पिटेर त्यसलाई साइज दिनु चानचुने काम हैन । मानवीय जीवनको धेरै जसो काममा फालाम आवश्यक हुन्छ । कृषि कर्ममा त झनै नभई नहुने वस्तु हो फलाम । फलामलाई उच्चतापक्रममा तताएर, पिटेर साइजमा ल्याएर, धार दिनु र कृषि औजार बनाउनु सहज काम पक्कै हैन । जसका लागि श्रमसँगै सिप र कौशलताको अनिवार्यता हुन्छ । परम्परागत आरनको पेसा शारीरिकरूपमा कष्टकर पेसा हो ।
यही पेसामा आफूलाई आधुनिकताको खोजी गरिरहेका छन् मकवानपुर जिल्ला हेटौंडा उपमहानगरपालिका वडा नम्बर–१५ फारलाइनका खिलबहादुर विश्वकर्मा ।
उनी ५० वर्ष अघिदेखि यही आरन व्यावसाय सञ्चालन गरिरहेका छन् । यो आरन व्यावसायमा उनको ३ पुस्ता भिज्यो । ५० वर्ष पहिले परम्परागत पेसाका रूपमा यो आरन चल्थ्यो । सामग्री बनाएपछि तत्काल ज्याला पाइँदैनथ्यो । वर्षमा एकपटक आफ्ना सेवाग्राही (विष्ट)बाट रासन संकलन गरिन्थ्यो । सामान्य छाक टार्ने निर्वाहमुखी व्यावसायका रूपमा आरनबाट सामान बनाउने गरिएको उनी बताउँछन् । तर, अब समय र परिवेश फेरिएको छ । त्यही आरन अब राम्रो आम्दानी गर्ने व्यवसाय बनेको छ । अहिले कृषि औजार कारखानाका रूपमा दर्ता गरेर यो व्यावसाय सञ्चालन थालिएको छ ।
५० वर्ष अगाडि हातले खलाती तानेर आगो फुकेर फलामका सामान बनाउनुपर्ने बाध्यता भोग्दै आएका बृद्ध खिलबहादुर विश्वकर्मा अहिले भने आधुनिक प्रविधिको प्रयोगमा सहज तरिकाले विगतभन्दा बढी आर्थिक उपार्जन गर्छन् । जंगल डुलेर दाउरा बटुलेर, आगो बालेको भुँग्रोमा रापिँदै फलाम तताउनु पर्दैन अहिले उनलाई । बिजुलीका माध्यमले आगोमा फलाम तताउँछन् र बनाउँछन् कृषिऔजार ।
उनीभन्दा अघिको पुस्तादेखि यो आरन व्यावसाय सुरु गरिए पनि आफ्नै पहलमा प्रविधिको माध्यमले कृषिऔजारका सामान बनाएर उनले काम गर्दै आए । उनको यो आधुनिक आरनमा हसिया, कचिया, कुटो, कोदालो, कोदाली, कैंची, चुप्पी, चुलेसीलगायतका सामग्री बनाइँदै आएको छ । विगतमा पनि बनाउने सामग्री तिनै थियो, तर दुःख धेरै आम्दानी कम थियो । अब उनी सहज श्रममा राम्रो आय गर्छन् ।
आरन व्यावसायलाई निर्वाहमुखीबाट रोजगारी सिर्सना गर्ने गतिलो माध्यम समेत बनाए उनले । उनको कृषिऔजार कारखानामा अहिले ६ जनाले रोजगारी पाएका छन् । यहाँ कृषिऔजार बनाउने काम गर्न पाउँदा अर्काको मुलुकमा कठिन काम गर्नुपर्ने बाध्यताबाट छुटकारा पाएको कृषिऔजार कारखानामा कार्यरत उमेश विश्वकर्मा बताउँछन् । ‘जहाँ गए पनि बगाउने पसिना हो, आफ्नो ठाउँमा बसेर, रोजगार भएको छु’ उनले भने, ‘विदेश जाने रहर छैन, यहाँ पैसा छ ।’
उमेश मात्र होइन, यस कारखानामा कार्यरत अरू पनि वैदेशिक रोजगारको मोहमा छैनन् । पहिले सबै काम हातले गरिन्थ्यो । तर, अहिले भने ग्रेडर मेसिन, ओल्डिङ गर्ने मेसिन समेतको प्रयोग गरेर काम गरिँदै आएको छ । यही आरनमा हजुरबुबादेखि नातिसम्मले काम गर्दै आएका छन् । हजुरबुबा र अरू पाँच जनाले सामान बनाउने काम गर्दै आए पनि नाति दिनेश विश्वकर्माले भने बनाइएका कृषि औजार देशैभरि बिक्री गर्दै आएका छन् ।
यहाँ तयार गरिएका सामान मकवानपुर, चितवन, काठमाडौं, धादिङ, सिन्धुपाल्चोक, सिन्धुलीलगायतका जिल्लामा बिक्री गर्दै आएको आरनका सञ्चालक दिनेश विश्वकर्मा बताउँछन् ।
करिब ५ लाख रुपैयाँ लगानीमा यो आरन व्यावाय सुरु गरिएको थियो । यसबाट ६ जनाको परिवारको रोजीरोटी चलेको छ । आम्दानी राम्रै भएपछि तीन पुस्ता अघिदेखि सञ्चालन गरिएको व्यावसाय नातिले पनि गर्दै आएका छन् ।
यस व्यावसाय सञ्चालन गर्न बाग्मती प्रदेशको युवा परिषद्ले ५० हजार रुपैयाँ अनुदान पनि दिएको थियो । यो अनुदान रकमबाट ग्रेडर र ओल्डिङ मेसिन खरिद गरेर परम्परागत कामलाई प्रविधिसँग जोडिएको दिनेशले बताए ।
युवालाई उद्यमसँग जोड्नका लागि पम्परागत आरन व्यावसायलाई अहिलेको प्रविधिसँग जोड्न सहयोग गरिएको प्रदेश युवा परिषद्का कार्यकारी उपाध्यक्ष सन्तोष चौलागाईले बताए । कृषि औजारका सामान चाहिने हुनाले पहिलेकै अवस्थामा आरनलाई राख्नु हुन्न र प्रविधिसँग जोडेपछि अहिलेका युवापुस्ताले पनि पहिले पुस्तांैदेखि गर्दै आएको कामलाई निरन्रता दिनका लागि सहज हुने चौलागाईले बताए ।
‘पहिलो यही पेसालाई हेलाको दृष्टिले हेरिन्थ्यो, छुवाछुत कति भोगियो, अब केही छैन, काम सहज छ, पैसा राम्रै छ’ ५० वर्षीय खिलबहादुर विश्वकर्माले भने, ‘मेरो पालामा यस्तै चल्यो, नातिको पालासम्म आइपुग्दा हामी दंग छाैं ।’
मकवानपुर । बागमती प्रदेशका मुख्यमन्त्री शालिकराम जम्कट्टेलले सरकार बनाएको झण्डै २ महिनापछि (५८ दिनमा ) मन्त्रिपरिषद्लाई पूर्णता दिएका छन् ।
नवनियुक्त ६ जना मन्त्रीहरूलाई आइतबार प्रदेश प्रमुख यादबचन्द्र शर्माले पद तथा गोपनियताको सपथ गराएका छन् ।
मुख्यमन्त्री शालिकराम जम्मकट्टेलले नियुक्त गरेका छ जना मन्त्रिहरुलाई प्रदेश प्रमुखले सपथग्रहण गराएका हुन् ।
शर्माले १ जना बिना विभागियसहित ६ मन्त्रीलाई सपथग्रहण गराएका हुन् । कांग्रेसका रामकृष्ण चित्रकारलाई बिना विभागीय मन्त्रीका रुपमा सपथग्रहण गरिएको छ । यस्तै उत्तम जोशीलाई स्वास्थ्य मन्त्रालय, पुकार महर्जनलाई पर्यटन, उद्योग तथा सहकारी मन्त्रालय र मसिना खड्कालाई वन तथा वातावरण मन्त्रालयको जिम्मेवारी दिइएको छ ।
त्यस्तै एकीकृत समाजवादीका लक्ष्मण लम्साललाई श्रम, रोजगार तथा यातायात मन्त्रालय र डा राजेन्द्रमान श्रेष्ठलाई कृषि तथा पशुपन्छी विकास मन्त्रालयको जिम्मेवारी दिइएको छ ।

मकवानपुर । हेटौंडा उपमहानगरपालिका वडा नम्वर –१४ मा रहेको भृकुटी माध्यमिक विद्यालय व्यवस्थापन समितिको अध्यक्षमा राजकुमार मोक्तान सर्वसम्मत चयन भएका छन् ।
उनी दोस्रो कार्यकालको लागि चयन भएका हुन् । व्यवस्थापन समिति सदस्यहरुमा वडा प्रतिनिधिबाट १४ नम्वर वडा सदस्य विना थिङ , विद्यालय प्रतिनिधिबाट विद्यालयका प्रधानध्यापक अच्युत कृष्ण रिजाल, निशा गुरुङ, जगत बहादुर सिन्तान, राम बहादुर भ्लोन, पार्वती लोप्चन, सुनामाया पाख्रिन सर्वसम्मत चयन भएका छन् ।
त्यसैगरी, विद्यालय व्यवस्थापन समितिको सल्लाहकारहरुमा रामबहादुर रुम्बा र विजयी थिङ् चयन भएका छन् ।
वि.स २०७७ सालमा अध्यक्ष भएका अध्यक्ष मोक्तानले दोश्रो कार्यकालसम्म जिल्लाकै उत्कृष्ट सामुदायिक विद्यालय बनाउन र विद्यालयलाई देशकै उत्कृष्ट विद्यालय बनाउने अभियानमा लागि पर्ने प्रतिवद्धता ब्यक्त गरे । अध्यक्ष मोक्तानले यसअघिको पहिलो कार्यकालमा कोभिडका कारणले गर्न नपाएका कामहरु दोश्रो कार्यकालमा गर्ने समेत बताए । कक्षा १० सम्म पठनपाठन हुने यस विद्यालयमा ३ सय ३० भन्दा बढि विद्यार्थीहरु अध्ययनरत रहेका छन् ।
