मकवानपुर । मकवानपुर प्रहरीले १ क्विन्टल लागूऔषध गाँजासहित १ जनालाई पक्राउ गरेको छ ।
प्रहरीले हेटौंडा उपमहानगरपालिका वडा नम्वर ४ कर्राबाट लागूऔषध गाँजा १ सय किलो ६ ग्रामसहित गोरखा पालुङटार ३ का ३७ वर्षीय दुर्गा दर्जीलाई पक्राउ गरेको जनाएको छ ।
जिल्ला प्रहरी कार्यालय मकवानपुरका प्रहरी नायव उपरीक्षक टेकबहादुर कार्कीका अनुसार दर्जीलाई अस्थायी प्रहरी पोष्ट थानाभञ्ज्याङ मकवानपुरबाट प्रहरी सहायक निरीक्षक केदार विकको कमाण्डमा खटिएको प्रहरी टोलीले उक्त परिमाणको गाँजासहित पक्राउ गरेको हो ।
हेटौंडाबाट पथलैयातर्फ जाँदै गरेको बागमती प्रदेश ०३–००१ च १६८८ नं. को बोलेरो पिकअप गाडीलाई जाँच गर्दा गाडीको पछाडीको भागमा खाली क्रेटहरुको मुनी बोराभित्र राखेको उक्त परिमाणको गाँजा बरामद गरि दर्जीलाई पक्राउ गरिएको प्रहरी नायव उपरीक्षक कार्कीले बताए ।
पक्राउ परेका उनीमाथि अनुसन्धानका साथै कानूनी प्रकृया अगाडि बढाएको प्रहरीले जनाएको छ ।
मकवानपुर । स्वर सम्राट नारायण गाेपालकाे ‘केही मिठाे बात गर’ गीतकाे म्युजिक भिडियाे सार्वजनिक गरिएकाे छ । नेपाली सांगीतिक क्षेत्रका अमर नक्षत्र एवं स्वरसम्राट स्व.नारायण गोपालको स्वर तथा संगीतको सुमधुर गीतको म्युजिक भिडियो नारायण गाेपाल काेषले सार्वजनिक गरेकाे हाे ।
स्थानीय कलाकार दिपक भट्ट र नेपाली चलचित्रकी नायिका केकी अधिकारीकाे अभिनय रहेकाे म्युजिक भिडियाे काठमाडौंमा आयोजित समारोहमा सार्वजनिक गरिएको हो । आफू अभिनित म्युजिक भिडियाे सार्वजनिक भएपछि कलाकार भट्टले स्वर सम्राटकाे गीतमा अभिनय गर्न पाउँदा गाैरवान्वित भएकाे बताए ।
रहर नभई बाध्यताले विदेशिनु परेकाे भए पनि नेपाल नेपाली र नेपाली गीत सगीतलाई उत्तिकै माया गर्नेछु उनले भने । पारिवारिक कार्यक्रमकाे लागि अमेरिकाबाट छाेटाे समय नेपाल आउँदा गरिएकाे म्युजिक भिडियाेले आउँदा दिनमा अन्य कालजायी गीतहरुकाे प्राेत्साहनकाे लागि समेत काम गर्ने उत्प्रेरणा मिलेकाे उनले बताए ।
कार्यक्रममा नारायण गोपाल संगीत कोषका अध्यक्ष दीपक केसीले स्व.नारायण गोपालको गीतलाई संरक्षण गर्ने काम गरिरहेको बताए । सुव्रतराज आचार्यद्वारा निर्देशित म्युजिक भिडियाे सार्वजनिक कार्यक्रममा कलाकारहरु दिपक भट्ट केही अधिकारी निर्देशक आचार्य नारायण गोपाल संगीत कोषका अध्यक्ष दीपक केसी नेपाली चलचित्रका लेखक अभिमन्यु निरवी लगायतका सहभागिता रहेकाे थियाे ।
मकवानपुर हटिया घर भई हाल अमेरिका बसाेबास गर्दै आएका दिपकले २०५७ सालमा रेडियाे नेपालबाट बज्ने गितिकथा र नाटकबाट कलाकारिता सुरु गरेका हुन् । दिपकले नेपाल छदाँ, सन्ताेष पन्त निर्देशित हिजाे आजका कुराबाट टेलिभिजन अभिनय सुरु गरेका थिए । केही टेलिसियलहरुमा समेत अभिनय गरेका उनले र म्युजिक भिडियाेहरुमा समेत अभिनय गरेका छन् । करिब १९ वर्ष अघि अमेरिका गएका दिपक नेपाल आँउदा केही यस्तै नयाँ गर्ने साेच रहेकाे बताउँछन् ।
मकवानपुर । मकवानपुरको बागमती गाउँपालिकाले ६ जना भूमिहिन सुकुम्बासीलाई जग्गा धनी प्रमाणपत्र लालपुर्जा वितरण गरेको छ ।
गाउँपालिकाले ३ नम्बर वडाका ६ जना भूमिहिन सुकुम्बासीलाई लालपुर्जा प्रदान गरेको हो । लालपुर्जा प्राप्त गर्नेहरुमा वीरबहादुर भोलन, मंगलबहादुर बिक, बुद्धिमान मोक्तान, मंगलीमाया स्याङतान, तेजबहादुर मोक्तान र बलबहादुर भोलन रहेका छन् ।
उनीहरुलाई गाउँपालिका अध्यक्ष सर्केश घलानले लालपुर्जा वितरण गरेका थिए । विकलाई २४० हेक्टर, तेज बहादुरलाई १ हजार २६४ हेक्टर, विरबहादुरलाई २ हजार हेक्टर, मंगलीमायालाई २ हजार हेक्टर, बुद्धिमानलाई २ हजार हेक्टर र बलबहादुरलाई २ हजार हेक्टर जग्गा वितरण गरिएको बागमती वडाअध्यक्ष कमानसिं पाख्रिनले जानकारी दिए ।
बागमती गाउँपालिकाले पुर्जा वितरण गरेको यो तेस्रो पटक हो । यस अघि वडा नं ४ का भुमिहिन दलित ३ जना, भुमिहिन सुकुम्वासी २८ जना र वडा नं ५ का भुमिहिन सुकुमवासी २ जना गरि ३३ जनालाई लालपुर्जा वितरण गरिसकेको छ ।
प्रविधिक समस्या नआएमा गाउँपालिकाको जग्गा डेढ वर्ष भित्र नाप जाँच सकाएर अव्यबस्थित बसोबास गर्नेलाई पुर्जा वितरण गरिने तयारी गरेको जनाएको छ ।
गाउँपालिकाको वडा नं ३, ४ र ५ नापी कार्य सकिएको, वडा नं १,२ र ६ मा नापी कार्य अन्तिम चरणमा रहेको जनाएको छ । यसैगरी वडा नं ७ मा आधा जति नापी भएको र बाँकी वडा नं ८ र ९ मा पनि छिट्टै नापी कार्य अघि बढाउने छ ।
बागमती गाउँपालिकाले २०७६ सालदेखि जग्गा नापी कार्यको सुरुवात गरेको थियो । अहिले राष्ट्रिय भूमि आयोग गठन भइ कार्यविधि समेत निर्माण भएकोले सोही अनुसार नापी कार्य भैरहेको बताइएको छ । गाउँपालिकाले १० औं गाउँसभामा उनीहरुलाई पूर्जा वितरण गरेको हो ।

गाउँसभामा जग्गा दाता २३ जना सम्मानित
यसैबीच गाउँसभामा जग्गा दाता २३ जना सम्मानित भएका छन् । गाउँपालिकाको १०औ गाउँसभामा सरकारी कार्यालय स्थापना गर्न जग्गा दान गर्ने २३ दातालाई सम्मान गरिएको छ । जग्गादाताहरु तुलासा थोकर, डुब्वाङ पाख्रिन, मानकाजी जिम्बा, आइतेसिं पाख्रिन, बिजय जिम्बा, कार्शाङ पाख्रिन, सुवास घिसिङ, तिलकबहादुर माझीलगायत २३ जनालाई गाउँपालिका अध्यक्ष घलानले सम्मान गरेका हुन ।
उनीहरुले गाउँपालिकाका सरकारी संरचना निर्माणका लागि ३ कठ्ठासम्म जग्गा दान गरेका थिए । ती जग्गामा वडा कार्यालय, स्वास्थ्य कार्यालय, स्वास्थ्य केन्द्र निर्माण गरिएको गाउँपालिकाले जनाएको छ ।
मकवानपुर । मकवानपुर जिल्लाको बागमती गाउँपालिकाले आगामी आर्थिक वर्ष २०८०/०८१ को लागि ६८ करोड ३० लाख १० हजार रुपैयाँ बराबरको बजेट ल्याएको छ ।
गाउँपालिकाको १० औ गाउँसभाको दोस्रो बैठकमा अध्यक्ष सर्केश घलानले आगामी आर्थिक वर्षका लागि ६८ करोड ३० लाख १० हजार रुपैयाँको बजेट प्रस्तुत गरेका थिए । अध्यक्ष घलानले गाउँ सभामा पेश गरेको उक्त बजेट सर्वसम्मत पारित भएको छ ।
पालिकालाई संघीय वित्तीय समानीकरण अनुदान १० करोड ४३ लाख, संघीय सशर्त अनुदान २० करोड ८० लाख, समपुरक ८० लाख ,सशर्त अनुदान पुजिगत २ करोड २६ लाख प्राप्त भएको थियो । यसैगरि प्रदेश सरकारको सामनिकरण अनुदान १० करोड ३० लाख ९ हजार , सशर्त अनुदान चालू ३ करोड ८८ लाख ५४ हजार, सशर्त अनुदान पुजिगत ४५ लाख, विशेष अनुदान ५० लाख समपुरक अनुदान १ करोड प्राप्त भएको छ ।
यस्तै संघीय राजस्व बाँडफाँड ११ करोड ४६ लाख ४७ हजार, मालपोत कार्यलय (घर जग्गा रजिट्रेशन दस्तुर ) ५० लाख, राजस्व बाडफाड प्रदेश तर्फको २ करोड ८८ लाख ४५ हजार , बन रोयल्टी ५० लाख, दहत्तर बहत्तरको बिक्रीबाट हुने आय ५ करोड ७० लाख र गाउँपालिकाको आन्तरिक आम्दानी ४ करोड ७५ समेत गरि ६८ करोड ३० लाख १० हजार रुपैयाँ बजेट पारित भएको हो ।
बाग्मती गाउँपालिकाले प्राप्त अनुदान बजेट ३९ करोड ५५ लाख ५६ हजारबाट आर्थिक विकास तर्फ ११.०१% ,सामाजिक विकास तर्फ २४.२७%,पुर्वधार विकास तर्फ २८.१५%,सुशासन तथा अन्तर सम्वन्धित क्षेत्रमा ३.५०%, र कार्य सन्चालन तथा प्रशासनिक क्षेत्र ३३.०६% खर्च गर्ने अनुमान छ।
पालिकाले प्रत्येक वडालाई प्रवर्द्धन गर्न प्रत्येक वडामा एक चिस्यान केन्द्र स्थापन गर्ने लक्ष्य लिएको छ। कृषि र पशु ब्लकको रुपमा विकास गरी अनुदान र साझेदारीमा कृषि र पशुका कार्यक्रम सञ्चालन हुने व्यवस्था बजेटमा मिलाइएको अध्यक्ष घलानले जानकारी दिए ।
बागमती गाउँपालिकाको समृद्धिको आधार कृषि र पुर्वधार भन्ने मुल नारा सहित बागमती गाउँ पालिकाले कृषि क्षेत्रलाई पहिलो प्राथमिकता राखेर बजेट निर्माण गरेको उनले बताए ।
मकवानपुर । महालक्ष्मी साहित्य पुरस्कार वरिष्ठ साहित्यकार डा.गोविन्दराज भट्टराईलाई प्रदान गरिने भएको छ । महालक्ष्मी विकास बैंक र मातृभूमि साहित्य समाज मकवानपुरले संयुक्त रुपमा प्रदान गर्दै आइरहेको उक्त पुरस्कार यस वर्ष भट्टराईलाई प्रदान गर्न लागिएको हो ।
शुक्रबार पत्रकार सम्मेलन गर्दै समाजले प्रदान गर्ने पुरस्कारको जानकारी दिइएको हो । मातृभूमि र महालक्ष्मी बैंकले संयुक्त रुपमा प्रदान गर्दै आएको महालक्ष्मी साहित्य पुरस्कार यो वर्ष २१ औं पुरस्कार रहेको समाजका अध्यक्ष माधव प्रसाद पोखरेलले जानकारी दिए ।
नेपाली साहित्यमा महत्वपूर्ण योगदान पुर्याएबापत भट्टराईलाई ५१ हजार राशीको पुरस्कारद्वारा सम्मान गर्न लागिएको हो । त्रिभुवन विश्वविद्यालयका प्राध्यापक भट्टराई अनुवादक, उपन्यासकार, अनुसन्धानदाता र कवि समेत हुन् ।
त्यस्तै, समाजले यसवर्षको केशवलाल स्मृति मातृभूमि पत्रकारिता पुरस्कारबाट हेटौंडाका पत्रकार सुरेश श्रेष्ठ सम्मानित हुने भएका छन । ईश्वर मैनालीले आफ्नो बुबाको स्मृतिमा स्थापना गरेको उक्त पुरस्कारको राशी ७ हजार पाँच सय रुपैयाँ रहेको छ ।
महालक्ष्मी साहित्य पुरस्कार र केशवलाल स्मृति मातृभूमि पत्रकारिता पुरस्कार साउन ६ गते शनिबार हेटौंडामा विशेष कार्यक्रमकाबीच प्रदान गरिने आयोजकले जनाएको छ ।
वित्तीय क्षेत्रमा काम गरिरहेको संस्थाले साहित्यको श्रीवृद्धिका लागि साहित्य पुरस्कारमा सहकार्य गरेकोमा समाज अध्यक्ष पोखरेलले महालक्ष्मी विकास बैंक प्रती कृतज्ञता प्रकट गरे ।
मातृभूमिद्वारा ५ पुरस्कार प्रदान गर्ने घोषणा
मातृभूमि साहित्य समाजले यसवर्ष प्रदान गरिने ५ पुरस्कार समेत शुक्रबारको पत्रकार सम्मेलन मार्फत सार्वजनिक गरेको छ ।
समाजले १५ हजार राशीको श्याम श्रेष्ठ स्मृति मातृभूमि पुरस्कार मकवानपुरका साहित्यकार आरआर चौलागाईंलाई प्रदान गर्ने भएको छ । यसैगरी ईश्वर स्मृति मातृभूमि पुरस्कारबाट शैलेन्दु प्रकाश नेपाल सम्मानित हुने भएका छन । उक्त पुरस्कारको राशी १५ हजार रुपैयाँ रहेको छ ।
यस्तै १५ हजार राशी रहेको होमनाथ बलदेवी मातृभूमि छन्द पुरस्कार चितवनका साहित्यकार लकाश पौडेललाई प्रदान गरिने समाज अध्यक्ष पोखरेलले जानकारी दिए । शेखर शर्मा रिजाल स्मृति मातृभूमि शैक्षिक सम्मान पुरुषतर्फ हेटौंडाका रामचन्द्र आचार्य फुर्सती र महिलातर्फ मालती उप्रेतीलाई प्रदान गरिने अध्यक्ष पोख्रेलले बताए ।
झलकबहादुर बानियाँ जीवन संघर्ष मातृभूमि सम्मान २०७९ बाट कमला आधारभूत विद्यालय हेटौंडा–१८ का एकजना विद्यार्थीलाई पुरस्कृत गरिने भएको छ । पुरस्कारको राशी ७ हजार ५ सय रहेको छ । समाजले उल्लेखित पुरस्कार श्रावण ५ गते एक कार्यक्रमको आयोजना गरि प्रदान गरिने अध्यक्ष पोख्रेलले जानकारी दिए ।
पत्रकार सम्मेलनमा मातृभूमि साहित्य समाजका पूर्वअध्यक्ष हयग्रीव आचार्य, महालक्ष्मी विकास बैंकका हेटौंडा शाखा प्रबन्धक अनन्तराज धिताल, साहित्यसेवी मुक्तिगोविन्द वैद्य, हेमन्त ढुंगेल, किशन पौडेललगायतको उपस्थिति रहेको थियो ।
