मकवानपुर । हेटौडा उपमहनागरपालिका वडा नम्बर १५ बाट अवैध कपडा, प्रतिबन्धित औषधी ट्रामाडोल र ट्रकसहित १ जना पक्राउ परेका छन् । हेटौंडा औद्योगिक क्षेत्रस्थित सशस्त्र प्रहरी बल १४ नम्बर गणले १४ लाख ४७ हजार बराबरको अवैध कपडा, ७ काटुन प्रतिबन्धित औषधी ट्रामाडोल, म्याद सकिएको मल्टी भिटामिन र ट्रकसहित १ जनालाई पक्राउ गरेको हो ।
सशस्त्र प्रहरी बलकाे १४ नम्बर गणले हेटौंडा–१५, रातोमाटे चेकपोष्टबाट उक्त परिणामकाे कपडा, औषधीसहित ट्रक चालक काभ्रे देउपुर नगरपालिकाका–९, मन्डनका ५० वर्षीय ज्ञानेन्द्र कुमार सापकोटालाई नियन्त्रणमा लिएकाे सशस्त्र प्रहरी बल मकवानपुर १४ नम्बर गणका गणपती प्रहरी उपरीक्षक (एसपी) अनिल कार्कीले जानकारी दिए ।
कार्कीका अनुसार सशस्त्र प्रहरीले बुधबार राती वीरगंजबाट काठमाडौंतर्फ जाँदै गरेको बागमती प्रदेश ०१–००६ ख २६५६ नम्बरको मालबाहक कन्टेनर ट्रक राताेमाटेमा जाँच गर्दा ५ सय १३ थान कुर्था, ३० थान पाइन्ट, २ सय थान टि–र्सट, प्रतिवन्धित औषधि ट्रामाडोल १ लाख ३१ हजार ७ सय ६० ट्याव्लेट र म्याद गुज्रिएको १ सय ५० वटा महरिच मल्टिभिटामिन बरामद गरिएकाे हाे ।
बुधबार बरामद गरिएका ट्रक सहितकाे सामग्री हेटौंडा औद्योगिक क्षेत्रस्थित सशस्त्र प्रहरी बल १४ नम्बर गणकाे प्राङ्गणमा विहीबार सार्वजनिक गरिएकाे हाे । नियन्त्रणमा लिइएका सापकाेटामाथि आवश्यक अनुसन्धानका साथै कानूनी प्रकृया अगाडि बढाइएको प्रहरीले जनाइएको छ ।
मकवानपुर । शारिरीक अशक्त भएर घरमै बसिरहेका मकवानपुर जिल्ला भिमफेदी गाउँपालिका ८ इपाका प्रेम बहादुर कठोयतले गाउँपालिकाको अध्यक्षले घरमै पुगेर सामाजिक सुरक्षा भत्ता दिएपछि खुसीले भावविहल भए ।
“मलाई खोजेर घरैमा आएर हातैमा भत्ता देलान भन्ने कल्पनै गरेको थिइन्” उनले भने “अध्यक्षको लगन देखेर खुसी लाग्यो, साँच्चै जनताको माया गर्ने र विकास प्रेमी रहेछन् ।”
शारिरीक रुपमा कमजोर भएको अवस्थामा आफ्नो प्रतिनिधि आफ्नै घरमा सामाजिक सुरक्षा भत्ता लिएर आएपछि मकवानपुर जिल्ला भीमफेदी गाउँपालिका वडा नम्बर ८ ज्येष्ठ नागरिकहरु खुसी भएका छन् ।
स्थानीय ८३ वर्षीय बद्रीबहादुर दानि स्थानीय सरकार भएको आभाष बल्ल भएको प्रतिक्रिया दिए । गाउँपालिकाले यस आर्थिक वर्षदेखि सामाजिक सुरक्षा भत्ता वितरण कार्यक्रम गाउँमा पुगेर वितरण सुरु गरिएको हो । चालु आर्थिक वर्षको साउन १५ गतेबाट सुरु गरिएको ज्येष्ठ नागरिक सामाजिक सुरक्षा भत्ता वितरण कार्यक्रम अन्तरगत भीमफेदी गाउँपालिका ८ साविक इपा गाविसमो वडा ५,६,७,८, र ९ वडाको लागि वडा कार्यलय इपाबाट वितरण गरिएको हो ।
भीमफेदी गाउँपालिकाको वडा नम्बर ८ को वडा कार्यलयमा गाउँपालिकाको अध्यक्ष हिदम लामा वडा अध्यक्ष विष्णुबहादुर लामा वडा सदस्य नबराज अधिकारी वडा सचिव कृष्ण बहादुर बस्नेतलगायतका साथमा प्रभु बैंकको प्रतिनिधिहरु पुगेर सामाजिक सुरक्षा भत्ता वितरण गरिएको हो ।
अबदेखि गाउँको जेष्ठनागरिक,अपांग लगाएत सामाजिक सुरक्षा भत्ता पाउने लाभग्राहिलाई हेटौंडा, भीमफेदी, काठमाडौ जान नपर्ने भएको छ ।
गाउँपालिका अध्यक्ष लामाले जनताको पक्षमा काम गर्न आफू सधैं तत्पर रहेको बताए । अपाङ्गता भएकाहरु, एकल महिला र दलित बालबालिका सामाकि सुरक्षा भत्ता वितरण गरिएको थियो ।
भीमफेदी गाउँपालिकाको विकट गाउँदेखि हेटौंडा आएर सामाजिक सुरक्षा भत्ता लिनु पर्ने दुखको अन्त्य गरेको वडा अध्यक्ष विष्णुबहादुर लामाले बताए । यसैगरी प्रत्यक तीन महिनामा जनप्रतिनिधिलगयत वडाको कर्मचारीको रोहवरमा बैंकको प्रतिनिधि मार्फत गाउँमा नै आएर भत्ता वितरण गरिने वडा अध्यक्ष लामाले बताए ।
मकवानपुर ।बागमती प्रदेशको सामाजिक विकास मन्त्रालयका सचिब भीष्मकुमार भूसालले अपाङ्गता भएकाहरूको संघर्षमा आफ्नो सधै साथ रहने बताएका छन् ।
अपाङ्गता भएकाहरूको पहिचानलाई स्वीकार गरेर पहुँच विस्तारमा ध्यान दिनु पर्ने भूसालले बताएका हुन ।
अपाङ्गता भएका व्यक्तिद्वारा सञ्चालित संस्थाको सदस्यका लागि स्वास्थ पुनस्थापन समबन्धी क्षमता अभिवृद्धि कार्यक्रममा भूसालले यस्तो बताइएका हुन् ।
कार्यक्रममा स्वास्थ्य निर्देशनालय बागमती प्रदेशका निर्देशक महेश्वरमान श्रेष्ठले अपाङ्ग भएकाहरूको नियमित स्वास्थ उपचारका सवालमा निर्देशनालयले सेवा प्रदान गर्दै आएको बताए ।
दुई दिनसम्म चल्ने कार्यक्रमको उद्घाटनको क्रममा मानवअधिकार आयोग बागमती प्रदेशका प्रमुख यज्ञ अधिकारीले व्यक्तिको सम्मानपुर्वक बाँच्न पाउने अधिकारको उपभोगमा सबैले ध्यान दिनुपर्ने बताए । मानवलाई कुनै जात, वर्ग भाषा धर्म शारिरीक अवस्थाको आधारमा विभेद गर्न र लान्छना लगाउन नपाइने अधिकारीले बताए । चालू आर्थिक बर्षको लागि सरकारले नीति कार्यक्रममा मानवधिकारको विषय समेटीएको पाइएको उनले बताए ।
राष्ट्रिय अपाङ्ग महासंघ बागमती प्रदेश अध्यक्ष अश्विन लम्सालको अध्यक्षतामा कार्यक्रम भएको थियो । अपाङ्गताको सवालमा बहस र पैरवी जारी राखिएको तर,अझै ग्रामिण भेगमा यसबारे समस्या रहेको लम्सालले बताए ।
अपाङ्गता सहायता सामग्री स्वस्थ्यको अत्यावश्यक औषधिको रूपमा राखेर प्रदान गरिनु पर्ने लम्सालले बताए ।
अपाङ्गता सरकारको प्राथामिकतामा नपरेकोमा गुनासो गर्दै उनले भने ” यो क्षेत्रको बजेट घटाउदै लागिएको छ, किन यस्तो भयो त ?”
कार्यक्रममा स्वास्थ्य निर्देशनालयका सतिश बिष्ट, अपाङ्गता भएका विभिन्न संघ संस्थाका प्रतिनिधिहरूको सहभागीता रहेको थियो ।
कार्यक्रममा अश्विन लम्साल, सन्दीप बिक, सीता मल्ल, सुप्रभा अर्याल, पर्वतराज बिष्टलगायतले सहजीकरण गर्नेछन् ।
मकवानपुर । जीवनकाे लागि रुख अनिवार्य छ, पर्यावरिण बचाउनकाे पनि बिरुवा अत्यावश्यक छ । नेकपा एमाले मकवानपुरका अध्यक्ष एकालाल श्रेष्ठले आफ्नाे जन्मदिन बिरुवा राेपेर मनाएका छन् ।
पुर्व मन्त्री समेत रहेका श्रेष्ठले हेटौँडा १३ मा रहेको वनस्पति अनुसन्धान केन्द्र, वृन्दावन वनस्पति उद्यानमा वृक्षारोपण गरेका हुन् ।बागमती प्रदेशसभा सदस्य तथा प्रदेशका पूर्व मन्त्री श्रेष्ठले जन्मदिनमा रुद्राक्षकाे बिरुवा रोपेर हुन् । हरेक व्यक्तिले जन्मदिनमा एउटा वृक्षरोपण गर्ने परिपाटीको विकासको लागि आफूले रुद्राक्षकाे विरुवा राेपेकाे उनले बताए । हरेक नागरिकले आफ्नो जन्मदिवसको अवसरमा एक विरुवा रोपेमात्र पनि पर्यावरण जाेगाउन सकिने, वातावरण स्वच्छ हुने बताउँदै उनले आफूले यस्तो कार्यको थालनी गरेको बताए ।
बुधबार बिहान उद्यानमा पुगेर अध्यक्ष श्रेष्ठले उद्यान क्षेत्रको अवलोकन समेत गरेका थिए । उनले उद्यानलाई थप ब्यवस्थित बनाउन आफ्नो तहबाट हुने सबै प्रकारको सहयोग गर्ने प्रतिवद्धता समेत ब्यक्त गरेका छन् । अनुसन्धान केन्द्रका प्रमुख रघुराम पराजुलीले आफ्नो जन्मदिनमा अवसरमा शुरु गरेको वृक्षा रोपण अभियानलाई वन नियमावली २०७९ मा कानुनी मान्यता पाएको छ बताए । ‘अहिले वृन्दावन वनस्पति उद्यान, हेटौंडा र पर्वतीय वनस्पति उद्यान, दामनमा यो प्रावधान कार्यान्वयनमा आएको छ’ उनले भने ।
एक विरुवा रोपण गरेको २ हजार राजस्व लाग्छ । राजस्वको प्रावधान आएपछि वृन्दावन र दामनमा गरी कूल ४७ वटा विरुवा रोपण भएको छ भने राजस्व प्रावधान लागू नहुॅदैको अवधिको समेत गरी दुवै उद्यानमा गरेर हालसम्म १ सय १० विरुवा रोपण भएको पराजुलीले जानकारी दिए ।
यो अभियान नेपालमै नौलो अभियान हो । अभियानमा सामान्यदेखि विशिष्ट व्यक्तिहरुले विभिन्न दिवसको अवसरमा विरुवा रोप्दै आएका छन् ।
मकवानपुर । नेपाल आयल निगमले पेट्रोलियम पदार्थको मूल्य बढाएको छ । निगमले असार १६ गते मंगलबार राति १२ बजेपछि लागू हुने गरी पेट्रोल र डिजेलको मूल्य बढाएको हो ।
पेट्रोलमा ९ रुपैयाँ, डिजेल र मट्टितेलमा ७ रुपैयाँ बढाएको निगमले सूचना जारी गरी जनाएकाे छ । निगमले एलपी ग्यासको मूल्य भने प्रतिसिलिण्डर १ सय ३० रुपैयाँ घटाएको हो ।
स्वचालित मूल्य प्रणाली लागू गरेको निगमले भारतबाट मूल्य बढेर आएका कारण पेट्रोलियम पदार्थको मूल्य बढाइएको जनाएको छ । अब पेट्रोलको मूल्य प्रतिलिटर पहिलो वर्गमा १ सय ७०, दोस्रो वर्गमा १ सय ७२ र तेस्रो वर्गमा १ सय ७३ रुपैयाँ पुगेको छ । त्यस्तै डिजेल र मट्टितेलको मूल्य पहिलो वर्गमा १ सय ५०, दोस्रोमा १ सय ५२ र तेस्रो वर्गमा १ सय ५३ रुपैयाँ कायम भएको छ ।
मूल्य घटेपछि एलपी ग्यास प्रतिसिलिण्डिर १ हजार ६ सय ६० मा पाइने भएको छ ।

