मकवानपुर । नेपाली हिन्दु महिलाहरुको महान पर्व हरितालिका तीज सुरु भएको छ । तीजको आइतबार आज पहिलो दिन दर खाएर मनाइदै छ ।
तीज हिन्दू नारीहरूले मनाउने एउटा महत्त्वपूर्ण चाड हो। यो चाड भाद्र शुक्ल द्वितीयादेखि पञ्चमीसम्म ४ दिन मनाइन्छ। तीजमा भगवान शिवको आराधना गरिनुका साथै नाचगान मनोरञ्जन समेत गर्ने गरिन्छ। नेपाली हिन्दू महिलाहरूद्वारा स्वतन्त्र र आनन्दमय रूपमा मनाइने तीज अन्य धर्म र जातजातिका नेपाली महिलाहरूले पनि हर्षोल्लासका साथ मनाउन थालेका छन्।
यो पर्व मुख्यरूपले नेपालभर मनाइन्छ भने भारतका कुनै कुनै क्षेत्रमा पनि मनाइन्छ। आद्य शक्ति भगवान शिवकी अर्धाङ्गीनी हिमालय पुत्री पार्वतीले भगवान शिवको स्वास्थ्य तथा शरीरमा कुनै वाधा उत्पन्न नहोस् भनेर पहिलो ब्रत राखेकी थिइन् । त्यो दिन यही हरितालिका तीजको दिन थियो। त्यसै दिनदेखि आजसम्म हिन्दू नारीहरूले यो पर्व मनाउदै आएका छन् भन्ने विश्वास गरिन्छ
हरितालिका तीजको दोस्रो दिन निराहर व्रत बस्नु पर्ने तथा मन्दिरमा पुजा गरे पछि नाचगान गर्नु पर्ने भएकोले आज राती १२ बजे अघि नै महिलाहरुले दर खाने गर्दछन् । आज राती मिठा मिठा परिकार बनाएर खाने चलन रहेको छ । अझ माइती पुगेकी चेलीलाई आमाबुवा दाजुभाईले खीर, काक्रोसहित फलफूलहरु खुवाउने चलन छ ।
दर के हो?
घ्यूमा पकाएको खाना दर हो। दरको खास अर्थ यही हो। दर तीजको अघिल्लो रात खाने गरिन्छ र दर खाए सँगै तीज सुरु हुन्छ । तीजको दिनभर व्रत बस्नु पर्ने र पानी सम्म नपिउने जसकारण तीजको दिन भोक नलागोस् भनेर अघिल्लो रात १२:०० बजे पूर्व खानेकुरा खाने चलन परापूर्व देखि चली आएको हो । दर शुद्ध शाकाहारी खाद्यान्न खाएर मनाउने चलन छ । दरमा दही, घिउ, खिर, काक्रो, स्याउ, केरा, दूध, आलुको तरकारी, विरौला (सिमीको तरकारी) जस्ता परिकार खाएर मनाउने मान्यता रही आएको छ ।
त्यसपछि भोलिबाट सुरु हुने हरितालिका तीजका लागि निराहर ब्रत बस्ने चलन रहँदै आएको छ ।
धार्मिक महत्व
तीज हरेक वर्ष भाद्र शुक्ल तृतीयाका दिन मनाइन्छ । अघिल्लो रात अर्थात् द्वितीयाका दिन दर खाइन्छ । तीजका दिन व्रत बसिन्छ । चौथीका दिन स्नान गरी व्रतको पारण गरेर खाना खाइन्छ भने तीजको तेस्रो दिन अर्थात् ऋषिपञ्चमीका दिन व्रतालु महिलाहरूले ३६५ वटा दतिवनले दाँत माझेर माटो लेपन गरी स्नान गर्छन् । अपमार्ग लेपनले छालामा हुने एलर्जी हटाउँछ । पञ्चमीका दिन अरुन्धतीसहित कश्यप, अत्रि, भारद्वाज, विश्वामित्र, गौतम, जमदग्नि तथा वशिष्ठ ऋषिको पूजा गरी हलोले नजोतेको अन्नको भात र एक सुइरे भएर उम्रने कर्कलो आदिको तरकारी वा एकदलीय अन्न मात्र खाइन्छ । यो दिन श्रीमान्ले पकाएको भोजन खाए आपसी आत्मीयता एवं सद्भाव बढ्ने विश्वास छ ।
तीजमा प्रयोग हुने गहना र पहिरनको पनि आफ्नै महत्व छ । धार्मिक संस्कारयुक्त तीज सर्वमान्य हुन्छ । तीजका दिन महिलाले लगाउने रातो साडी सुख, समृद्धि एवं साहसको प्रतीक मानिन्छ । रातो रंगले महिलालाई एक किसिमको शक्ति प्रदान गर्ने धार्मिक विश्वास छ । पोतेले शान्ति र आनन्द प्रदान गर्छ भने रातो टीका सौभाग्यको प्रतीक हो । ह्दय स्वच्छ भए मनोकांक्षा पूर्ण हुने धार्मिक विश्वास तीजको व्रतमा अन्तरनिहित छ ।
तीजमा महिलाहरूले निर्जल, निराहार उपवास बस्नुपर्ने धार्मिक मान्यता छ । एक प्रकारले हेर्दा यसले महिलालाई पुरुषको अन्धभक्त बनाउन खोजेजस्तै देखिन्छ । पुरुषभक्त हुन गरिने व्रत तीजमा महिलाले गरेको धार्मिक विधिले श्रीमान्को दीर्घायु, सुस्वास्थ्य, प्रगति हुने मान्यता छ ।
गणेश चौथी
तीजको भोलिपल्ट भाद्र शुक्ल चतुर्थीको दिन पर्ने गणेश चौथी विश्वभरिका हिन्दु धर्मावलम्बीले शिवपुत्र भगवान् गणेशको आराधना गरी मनाउने गर्छन् । यस दिन नेपालको कार्यविनायक, सूर्यविनायक, कमलविनायक लगायतका गणेशका मन्दिरहरूमा भक्तजनहरूको भीड लाग्ने गर्छ ।
कतैकतै यस दिनदेखि अनन्त चतुर्दशीसम्म दश दिन गणेशोत्सव मनाउने चलन पनि रहेको पाइन्छ । नेवार समुदायमा पनि यो पर्व चथाःको नामले प्रसिद्ध छ । स्कन्द पुराणअनुसार यस दिन भगवान् गणेशको जन्म भएको थियो । हिन्दु धर्मावलम्बीहरूले यस दिन आफ्नो जीवनमा कुनै विघ्न नआओस्, र आफूले आँटेको कार्य सिद्ध होस् भनी गणेशको पूजा गर्ने गर्छन् । तर तिथि घटबढको कारन यस वर्ष चौथी र ऋषिपञ्चमी यकै दिन परेको छ ।
ऋषिपञ्चमी
तीजको पर्सिपल्ट अर्थात् पञ्चमीको दिन महिलाहरूले रजस्वलाको समयमा भएका त्रुटि तथा दोषको निवारण गर्न ऋषिहरूको पूजा गर्छन् । ऋषिपञ्चमीको दिनमा अरुन्धतीसहित सप्तर्षि (कश्यप, अत्रि, भरद्वाज, विश्वामित्र, गौतम, जमदग्नि र वसिष्ठ)को पूजा गर्नाले रजस्वलाको समयमा भएका त्रुटिहरू नष्ट हुन्छन् भन्ने शास्त्रीय मान्यता छ ।
यस दिन महिलाहरू नजिकैको नदी तथा पोखरीमा गई ३६५ दत्तिउनले दन्तमञ्जन गर्दछन्, शरीरमा गाईको गोबर र माटो लगाएर स्नान गर्छन् । स्नान गर्दा ३६५ पटक नै नुहाइन्छ । त्यसको लागि गनौती अर्थात् गनिएका जौ, तिल र चामल चाल्नीमा राखेर माथिबाट पानी खन्याई नुहाउने चलन छ । नुहाइसकेपछि महिलाहरू पवित्र भएर ऋषिपूजा गर्छन् ।
ऋषि पञ्चमीका विषयमा यस्तो किंवदन्ती पनि प्रचलित छ :
विदर्भ देशमा बस्ने उत्तङ्ग नामका ब्राह्मणका एक छोरा र एक छोरी थिए । छोरो सानै उमेरमा वेदमा पारङ्गत भयो भने छोरी पूर्वजन्मको पापका कारण सानै उमेरमा विधवा भइन् । एकपटक छोरीको शरीरभरि खटिरा आएर किरा परेछ । यस्तो वज्रपात छोरीमाथि किन प¥यो भनी बुझ्दा अघिल्लो जन्ममा छोरी रजस्वला भएका बेलामा छुवाछुत बार्दिनथिन् र ऋषिपञ्चमी व्रतको पनि अवहेलना गर्थिन्, तर व्रत नलिए पनि पञ्चमी पूजा भने हेर्थिन् । त्यसै पुण्यले उनको जन्म ब्राह्मणको परिवारमा भएको थियो । यस्तो थाहा पाएपछि मातापिताले छोरीलाई पञ्चमीको व्रत बस्न लगाए । अनि उनी पापमुक्त भएर सुखी जीवन बिताउन थालिन् ।
एकातिर ऋषिपञ्चमीका दिन सप्तऋषिको पूजा गर्दा पितृहरू मुक्त हुन्छन् भने अर्कातिर रजस्वला भएको अवस्थामा थाहा नपाएर, जानीजानी, झुक्किएर वा बाध्यतावश गरिएका सबै दोष नाश हुन्छन् भन्ने विश्वास गर्छन् हिन्दु महिला । नारीले घर, सामुदायिक भवन, कुनै सार्वजनिक ठाउँ वा मन्दिरमा भाद्र शुक्ल पञ्चमीका दिन ऋषिपञ्चमीको पूजा गरी तीजका गीत गाउँछन् । ऋषिपञ्चमीको व्रत गर्ने नारीले हलोले जोतेर उत्पादन गरिएको अन्न खाने चलन छैन ।
काठमाडौं । आज देशैभरीका स्वास्थ्य संस्था बन्द हुने भएका छन् । देशभरका स्वास्थ्य संस्थामा आकस्मिकबाहेकका सेवा बन्द हुन लागेको हो ।
मकवानपुरकाे हेटौंडा १ स्थित सञ्चाे हस्पिटलमा कार्यरत २ जान चिकित्सक कुटिएपछि सोको विरोधमा नेपाल चिकित्सक संघले आज देशभरका स्वास्थ्य संस्थामा आकस्मिकबाहेकका सेवा बन्द गर्ने घोषणा गरेको हो । शनिबार जारी गरिएको विज्ञप्ति अनुसार मकवानपुरको हेटौंडास्थित सन्चो अस्पतालमा दुई चिकित्सकमाथि आक्रमण गरिएको विरोधमा चरणवद्ध आन्दोलन थालिएको संघको भनाइ छ ।
संघका अनुसार गत भदौ २७ गते डा विकास थापा र डा. प्रशान्त विडारीमाथि बिरामीको उपचार गरिरहेको अवस्थामा सांघातिक आक्रमण गरिएको संघले स्मरण गराएको छ ।
सो घटनामा संलग्नलाई कानुनी दायरामा ल्याउन सोही दिन संघले ७२ घण्टाको ‘अल्टिमेटम’ दिएको तर दोषी माथि अझै कारबाही नगरिएको भन्दै संघले आजको आकस्मिकबाहेकका सबै स्वास्थ्य सेवा बन्दको कार्यक्रम गरेको हो ।
संघका अनुसार देशभरका स्वास्थ्य संस्थामा अनिवार्य रूपमा स्वास्थ्य संस्था सुरक्षा बलको व्यवस्था गर्नुपर्नेलगायत माग अगाडि सारेको छ ।
मकवानपुर । बागमती प्रदेश सभाको शनिबारकाे बैठक विशेष समयमात्रै बसेकाे छ । सभामुख भुवनकुमार पाठकले सभाकाे सुरुवात मै शुन्य समय नभएकाेले विशेष समय सुरु गरेकाे जानकारी गराएका थिए ।
विशेष समयमा सत्ता पक्ष र प्रतिपक्षका गरी २२ सांसदले आफ्नाे धारणा राखेका थिए । विशेष समयकाे सुरुवातमै नेकपा एमालेका जगन्नाथ थपलियाले समिति बनाएरै मन्त्रालयको टुङ्गो लगाइएकोमा सरकार मन्त्रालय थप्ने तिर लागेको आराेप लगाए । सरकारले गाडी किन्दै रहने र मन्त्री थपरिहने काम गरिरहेकाे तर अन्य पक्ष कमजोर अवस्थामा रहेकोमा विकास निर्माण अलपत्र रहेकाे बताए । ‘ठेकेदारहरुले भुक्तानी पाएका छैनन सरकारको ध्यानाकर्षण गराउँछु’ थपलियाले भने ।
उपचारको क्रममा लापरवाही भएको भन्दै हेटौडामा भएको डाक्टर कुटपिट घटना सरकारलाई थाहा छ की छैन प्रश्न गर्दै थपलियाले भने अस्पलातबाट हुने लापरवाही रोकिनु पर्ने बताए । ‘कानूनी कारवाहीको लागि मार्ग प्रसस्त रहेकाे अवस्थामा सरकार बेखबर जस्तै छ र डाक्टर मौन छन्’ थपलियाले भने ‘स्वास्थ्यकर्मीले काम गर्ने वातावरणकाे लागि प्रदेश सभा घेरेका छन् ।’ कुटपिट गर्नेलाई कानुनको दायरामा कारवाहीमा ल्याउनु पर्ने उनले भने ।
थपलियाले कमसेकम प्रदेशस्तरमा संचालित अस्पतालमा स्वास्थ्य सुविधाकाे वातावरण वनाउन सरकारको ध्यानाकर्षण गराए । ‘प्रदेश सभा अन्तर्गतका समितिहरुको सभापति ९ महिनाको अवधीमा समेत चयन नहुँदा सदनका काम कारवाही संचालनमा समस्या परेको छ’ थपलियाले भने ‘मिनि संसदको रुपमा रहने समितिहरुको सभापति चयन गर्न सभामुखको ध्यानाकर्षण गर्दछु ।’
यसैगरी प्रदेश सभा सदस्य बसन्त मानन्धरले बागमती प्रदेश सरकारले चालु आर्थिक वर्षमा तय गरेको कार्ययोजना कार्यान्वयनका क्रममा विचौलियाका कारण चुनौती रहेको बताए । ‘उपभोक्ताले गर्नुपर्ने कामलाई केही सांसद तथा स्थानीय जनप्रतिनिधिहरुले ठेकेदार मार्फत योजना कार्यान्वयन गर्ने गरेका छन्’ मानन्धरले भने ‘यसले लागत अधिक भई काम कम गुणस्तरको हुन जान्छ।’ उपभोक्ता मार्फत हुने कार्य उपभाेक्तालाई नै गर्न दिनु पर्ने उनले बताए । बागमती प्रदेश सरकारले प्रदेशमा भएका सम्पदा चिन्न नसकेको उनले आराेप समेत लगाएका छन् । सम्पदासँग जोडिएका कामहरुका लागि छुट्टै मुल्य निर्धारण गरिनु पर्छ, यसले हाम्रो सम्पदा संरक्षणमा टेवा पुग्छ उनले भने।
अर्का सांसद कुमार श्रेष्ठले जनता चाडवाड मनाउन ऋण लिने अवस्थामा रहेको अवस्थामा प्रदेशका पदाधिकारीहरुको लागि काठमाडौमा करौडाको संरचना बनाएकोमा आपत्ती जनाए । धादिङबाट काटमाडौ जोड्ने मार्ग निर्माणमा ढिलाइ भएकोमा सरकारको ध्यानाकर्षण समेत उनले गराए । यसैगरी मधुसुदन पौडेलले धार्मिक जातीय अतिवादीहरुले विवादित गतिविधि गरिरहेकाले लोकतन्त्र र गणतन्त्रमा असर पर्ने भन्दै ध्यानाकर्षण गराए । सरकारले फजुल खर्च कम गर्दै सुशासन कायम गर्न सरकार असफल भएकोले यस तर्फ सचेत गरादछु । उनले कालोबजारी रोक्न सरकार सचेत हुनु जरुरी रहेकाे सदनमा जानकारी गराए ।
‘नेपाली उत्पादनले बजार नपाउने तर आयातीत कृषि उपजले उचित बजार पाउने वातावरणले उत्पादन खेर मात्र गइरहेकाे छैन नेपाली किसान समेत मर्कामा परेका छन्’ उनले भने । काठमाडौको ट्राफिक व्यवस्थापन र वातावरण प्रदुषण रोक्ने तर्फ प्रदेश सरकारले ध्यान दिनु पर्ने समेत उनले बताए । मकवानपुरबाट निर्वाचित सदस्य एकालाल श्रेष्ठले हेटौडा अस्पताललाई मदन भण्डारी स्वास्थ्य विज्ञान प्रतिष्ठान मार्फत संचालन हुदै आएकोमा प्रदेश सरकारबाट समेत लगानी भई स्वास्थ्य क्षेत्रमा सुधार हुदै आएको बताए । सञ्चो अस्पतालमा भएको डाक्टर कुटपिट घटनामा समिति बनाई कार्य गर्नुपर्दछ उनले भने ।
त्यस्तै दिनेशचन्द्र देवकोटाले शुन्य समय र विशेष समयमा सांसदले उठाएका कुराको कुनै प्रतिउत्तर सरकारको तर्फबाट नआउने तथा सुनुवाई समेत नहुने भएकाेले यसकाे औचित्यमा समेत प्रश्न उठाए । प्रदेश सभा सदस्यहरु ठाकुर प्रसाद ढकाल, प्रभात तामाङ, मायादेवी शर्मा, शिवराज अधिकारी, रामेश्वर श्रेष्ठ, सुष्मा भुजेल न्यौपाने, निरज बज्राचार्य, टिका थानी, श्रीराम लामिछाने, केशव प्रसाद पोखरेललगायतका २२ जना सदस्यले आफ्नाे धारणा राख्दै सरकारकाे धान्याकर्षण गराए ।
बैठकमा सत्तापक्ष र प्रतिपक्षका अधिकांश सदस्यले हेटौँडामा केही दिनअघि चिकित्सक कुटपिटको घटनालाई प्रहरी प्रशासनले निष्पक्ष ढङ्गबाट अनुसन्धान गरी आक्रमण गर्ने समूहलाई कारबाहीको दायरामा ल्याउन माग गरे । दलगत स्वार्थभन्दा माथि उठेर अपराध गर्नेलाई संरक्षण गर्न नहुने र प्रहरी प्रशासनले दबाबमा परेर मुद्दालाई फितलो बनाउन नहुनेमा प्रदेश सरकारको ध्यानाकर्षण गराएका थिए ।
यसैगरी प्रदेशको निकुञ्ज क्षेत्रभित्र पर्ने जिल्लामा जङ्गली जनावरको आक्रमण गरी मृत्यु भएका परिवारलाई क्षतिपूर्ति दिनुपर्ने र घाइते भएका परिवारलाई राहत उपलब्ध गराउन समेत सदस्यहरुले सभामा सरकार समक्ष माग गरेका थिए ।
बैठकमा काठमाडौँ उपत्यकालगायत विभिन्न जिल्लामा सडकको स्तरोन्नति, खानेपानी र कृषकलाई सिँचाइको व्यवस्था गर्न उनीहरुले प्रदेश सरकारसित आग्रह गरे ।
४ विधेयक सम्बन्धित समितिमा पठाउन स्वीकृत
बागमती प्रदेशसभाको आजको बैठकले ४ वटा विधेयक सम्बन्धित विषयगत समितिमा छलफलका लागि पठाउन स्वीकृत प्रदान गरेको छ । बैठकमा बागमती प्रदेशका सामाजिक विकास मन्त्री कुमारी मोक्तानले विज्ञान, प्रविधि, नवप्रवर्तन तथा विकास कोष सञ्चालन सम्बन्धमा व्यवस्था गर्न बनेको विधेयकलाई दफावार छलफलका लागि स्वास्थ्य तथा कृषि समितिमा पठाइयोस् भनी प्रस्ताव पेस गरेका थिए ।
यसैगरी, उनले आन्तरिक मामिला तथा कानुनमन्त्री गङ्गानारायण श्रेष्ठकातर्फबाट प्रदेश सञ्चारमाध्यम व्यवस्थापन ऐन, २०७५ लाई संशोधन गर्न बनेको विधेयकलाई दफावार छलफलका लागि प्रदेश मामिला समितिमा पठाइयोस् भनी प्रस्ताव टेबुल गरेका थिए । सो बैठकमा प्रदेश स्वास्थ्यमन्त्री उत्तम जोशीले प्रदेश स्वास्थ्य सेवा ऐन, २०७५ लाई संशोधन गर्न बनेको विधेयक, २०८० लाई दफावार छलफलका क्रममा शिक्षा, स्वास्थ्य तथा कृषि समितिमा पठाइयोस् भनी प्रस्ताव प्रस्तुत गरेका थिए ।
यस्तै, उक्त बैठकमा कृषि तथा पशुपन्छी विकास मन्त्री डा राजेन्द्रमान श्रेष्ठले प्रदेश कृषि विकास सम्बन्धमा व्यवस्थापन गर्न बनेको विधेयकलाई दफावार छलफलका लागि शिक्षा, स्वास्थ्य तथा कृषि समितिमा पठाइयोस् भनी प्रस्ताव टेबुल गरेका थिए । सवै प्रस्तावहरु बहुमत सदस्यबाट स्वीकृत भइ सम्बन्धित समितिमा पठाइने भएकाे छ ।
नेम्वाङको निधनमा शोक प्रस्ताव पारित
प्रदेशसभाको शनिबारकाे बैठकले संविधानसभा अध्यक्ष एवं पूर्व सभामुख तथा प्रतिनिधिसभा सांसद सुवासचन्द्र नेम्वाङको निधनमा शोक प्रस्ताव पारित गरेको छ । प्रदेशसभाका सभामुख भुवनकुमार पाठकले उक्त शोक प्रस्ताव पारित गरियोस् भनी बैठकमा प्रस्ताव प्रस्तुत गरेका थिए ।
शोक प्रस्ताव सर्वसम्मतिले पारित गर्दै स्व नेम्वाङको आत्माको चिरशान्तिको कामनाका लागि एक मिनेट मौनधारण समेत गरिएको थियो । साथै बैठकले शोकसन्तप्त परिवारजनप्रति गहिरो समवेदना प्रकट गरेको छ । नेम्वाङको गत भदौ २६ गते हृदयघातका कारण निधन भएको थियो ।
प्रदेशसभाका सभामुख भुवनकुमार पाठकले प्रदेशसभाको अर्को बैठक १५ दिन पछि आगामी असोज १४ गते बिहान ११ बजे बस्ने गरी स्थगित गरेका थिए ।
मकवानपुर । बागमती प्रदेश सभाकाे शनिबारकाे बैठकमा हेटौडामा भएकाे डाक्टर कुटपिट र १ किलाे सुन काण्डले प्रवेश पाएकाे छ । सांसद एकालाल श्रेष्ठले गत भदौ २७ गते हेटौंडाको सञ्चो अस्पतालमा भएको डाक्टरहरुमाथिको हातपातको विषयमा विशेष समिति बनाएर अनुसन्धान गर्नुपर्ने बताए ।
बागमती प्रदेशसभाकाे दाेस्राे अधिवेशनकाे ३१ औं वैठककाे विशेष समयमा बोल्दै सांसद श्रेष्ठले घटनामा दोषि को हो भनेर विशेष समिति बनाएर छानविन गर्नुपर्ने बताए । डाक्टरमाथि आक्रमण हुनुपर्ने अवस्थाको कारण के गरि सृजना भयो भन्ने विषय पनि महत्वपूर्ण रहेको भन्दै उनले गम्भिर अनुसन्धानपछि निचोडमा पुग्नुपर्ने उनले बताए ।
यसैगरी केही दिनअघि जिल्ला प्रहरी परिसर, काठमाडौंले बरामद गरेको करिब एक किलो सुन प्रकरणमा बागमती प्रदेशका मन्त्री समेत संलग्न भएकाेमा नेकपा एमालेले जवाफ माग गरेको छ ।
प्रमुख प्रतिपक्षी दल नेकपा एमाले संसदीय दलका नेता जगन्नाथ थपलियाले बागमती प्रदेशका खानेपानी,ऊर्जा तथा सिँचाइ मन्त्री तीर्थ लामाकाे नाम सुन प्रकरणमा संलग्न भएकाेमा सांसद समक्ष उनले जवाफ दिनुपर्ने माग गरेका हुन् । थपलियाले भने ‘मन्त्रीको नाम उल्लेख गरेर सुन तस्करी भएको सुनिन आएको छ। यस विषयमा सरकारले सदनलाई जानकारी गराउनुपर्दछ ।’
गत मंगलबार प्रहरीले विशेष सूचनाका आधारमा मलद्वारमा लुकाएर दुबईबाट हिमालयन एयरलाइन्समार्फत ल्याएको सुनसहित प्रहरीले काभ्रेको खानीखोला गाउँपालिका–३ का बाबुलाल दोङलाई पक्राउ गरेको थियो । सो प्रकरणमा मन्त्री लामाको नाम मुछिएको भन्दै थपलियाले सरकारले र मन्त्रीले समेत जवाफ दिनुपर्ने बताए ।
यद्यपी मन्त्री लामाले एक किलो सुन प्रकरणमा आफ्नो नामसमेत जोडिएको भन्दै आपत्ति जनाएका छन् । मन्त्री र कांग्रेस जिल्ला समिति काभ्रे सभापतिको हैसियतमा आफ्नो धेरै जनसम्पर्क हुन्छ, अर्कै प्रसंगमा खिचेको तस्वीरका कारण आफ्नो नाम जोड्नु गलत हुने उनले बताए ।
१ किलो सुन प्रकरणमा काभ्रेका तरुण दलका नेता विकास लामा प्रहरीको खोजी सूचीमा परेकाेमा विकाससँग सम्बन्ध रहेको भन्दै आफ्नो नाम जोडिएकामा मन्त्री लामाले आपत्ति जनाएका हुन् । ‘मलाई विवादमा ल्याउन चाहने दुराशयका साथ भएका यस्ता कार्यप्रति म सचेत छु’ उनले भनेका छन् ।
मन्त्री लामाले उक्त घटनाको सत्यतथ्य छानबिन गर्न र दोषीलाई कारबाही गर्न माग गरेका छन् । छानबिनका लागि आफूले पनि सहयोग गर्ने उनले बताए ।
हेर्नुहाेस प्रदेश सभाकाे बैठकः
मकवानपुर । चिकित्सक कुटपिटको घटनामा संलग्नलाई कारबाहीको माग गर्दै बागमती प्रदेश सभा सचिवालयमा धर्ना दिइएको छ।
बुधबार चिकित्सकमाथी आक्रमणको बिरोधमा आकस्मिक बाहेकको स्वास्थ सेवा ठप्प पारेका स्वास्थ्तकर्मीहरूले आज प्रदेश सभा सचिवालयमा धर्ना दिएका हुन् ।
उनीहरुले बागमती प्रदेश सभा सचिवालयको अगाडी उभिएर धर्ना दिएका छन् । हेटौँडाका सरकारी तथा निजी स्वास्थ्य संस्थाहरुमा कार्यरत चिकित्सक एवं स्वास्थ्यकर्मीहरु धर्नामा सहभागी छन् । प्रदेशसभा भवन अगाडि भेला भएका स्वास्थ्यकर्मीले प्लेकार्डसहित प्रर्दशन गर्दै पेशागत सुरक्षाको माग गरेका छन् ।
बुधबार सन्चो अस्पतालमा कार्यरत दुईजना डाक्टरमाथी दश जनाको समूहले चिकित्सकमाथी कुटपिट गरेका थिए । घटनामा संलग्न भएको अभियोगमा प्रहरीले चारजनालाई पक्राउ गरेको छ भने नेपाल चिकित्सक संघले दुई जनाविरुद्ध किटानी जाहेरी दिएको छ ।
पक्राउ पर्नेमा गत साउन २५ गते डेंगु संक्रमणका कारण ज्यान गुमाएका राजेश प्रधानकी श्रीमती रमा प्रधान, छोरी रमिता प्रधान, छोरा रोहित प्रधान र भतिज अनुप प्रधान रहेका छन् ।
हेटौंडा–१२ का प्रधानका आफन्तले अस्पतालभित्रै प्रवेश गरेर डाक्टरको लापरबाहीका कारण बिरामीको मृत्यु भएको भन्दै डा. प्रशान्त बिडारी र डा. विकास थापालाई कुटपिट गरेका थिए ।
घटनमा संलग्न अन्यलाई पनि पक्राउ गरिनुपर्ने माग गर्दै उनीहरु धर्नामा बसेका छन् । हेटौँडा अस्पतालका बरिष्ठ बालरोग विशेषज्ञ हरीबहादुर खड्काले प्रदेशसभाका माननियहरुको ध्यानाकर्षण गर्न सचिवालय अगाडी धर्नामा बसेको बताए । घटनाको बिरोधमा स्वास्थकर्मीहरूले सामूहिक राजिनामा दिएका छन् भने हिजो शुक्रबारबाट सर्वसाधारणले स्वस्थ्य सेवामा समस्या खेप्दै आएका छन् ।
प्रदेश सभाको आजको बैठक केहिबेर अघिमात्र सुरूभएको छ ।
