मकवानपुर । मकवानपुर प्रहरीले लुटपाटमा संलग्न भएको अभियोगमा २ जनालाई पक्राउ गरेको छ । सस्तोमा मोटरसाईकल मिलाईदिन्छु भन्दै एकान्त जंगलमा बोलाएर लुटपाट गरेको अभियोगमा मकवानपुर जिल्लाको कैलाश गाउँपालिका–२, बैकुण्ठ बोटटोलका २५ वर्षीय विशाल मुक्तान र कैलाश गाउँपालिका–२, खारेटोलका ३१ वर्षीय टोकल माईला भन्ने रुद्र मुक्तानलाई प्रहरीले पक्राउ गरेको जनाएको छ ।
विशाल र रुद्रले गत शुक्रबार दिउँसो मकवानपुरको थाहा नगरपालिका–३, भञ्ज्याङडाँडा खाप्चेखोलास्थित जंगलमा झापा जिल्ला भद्रपुर नगरपालिका–३ का नरेन्द्र लिम्बुको साथबाट ३० हजार रुपैयाँ, मोवाइल एक थान लुटपाट गरी फरार भएकोमा उनीहरु विरुद्ध प्रहरीमा उजुरी परेकाे थियाे ।
उक्त उजुरीकाे आधारमा विशाललाई गत आइतबार पक्राउ गरेको हो तथा रुद्रलाई आज सोमबार पक्राउ गरेको मकवानपुर प्रहरीले जनाएकाे छ । प्रहरीले विशाल र रुद्रको साथबाट १४ हजार ५० रुपैयाँ समेत बरामद गरेको जनाएको छ ।
प्रहरीका अनुसार काठमाडौंमा घर बनाउने काम गर्ने क्रममा विशाल र नरेन्द्रबीच चिनजान भएको थियाे । विशाल र रुद्रले हतियार जस्तो कालो बस्तु देखाई नरेन्द्रको साथमा रहेको नगद र मोवाइल लुटपाट गरेको प्रहरीले जनाएको छ ।
मकवानपुर । मकवानपुरको मकवानपुरगढी गाउँपालिका वडा नं.५ खैरहनी लखनटोलमा अटो दुर्घटना हुँदा घाइते भएका चालकको मृत्यु भएको छ ।
स्थानीय ३३ बर्षीय लक्ष्मण स्याङ्तानको पुरानो मेडिकल कलेज भरतपुरमा उपचारको क्रममा आइतबार राती मृत्यु भएको जिल्ला प्रहरी कार्यालय मकवानपुरका प्रहरी नायव उपरीक्षक लक्ष्मी भण्डारीले जानकारी दिए ।
मकवानपुर । मकवानपुरको मनहरी गाउँपालिकामा रुखबाट लडेर १ जनाको मृत्यु भएको छ । मनहरी गाउँपालिका–७, रमौलीकी रिता सुनारी मगरको रुखबाट लडेर मृत्यु भएको जिल्ला प्रहरी कार्यालय मकवानपुरले जनाएको छ ।
सोमबार बिहान घर नजिकैको जंगलमा घाँस काट्न गएकी रिता रुखबाट लडेर घाइते भएकी थिइन् । घाइते उनलाई उपचारको लागि चितवन भरतपुरको चितवन मेडिकल कलेज लगिएकोमा सोमबार बिहान उपचारको क्रममा मृत्यु भएको प्रहरी जनाएको छ ।
मकवानपुर । मकवानपुरको हेटौंडा उपमहानगरपालिकामा मोटरसाइकल दुर्घटना हुँदा १ जनाको मृत्यु भएको छ भने २ जना घाइते भएका छन् ।
आइतबार राती हेटौंडा –११, थानाभर्याङ मोटरसाइकल दुर्घटना हुँदा हेटौंडा ४ का महेन थापा मगरको मृत्यु भएको हो । दुर्घटनामा हेटौंडा २ की बेबिशा खड्की र हेटौंडा ५ कि बिनिता थापा घाइते भएका मकवानपुर प्रहरीले जनाएको छ ।
आइतबार राती हेटौडा बजारबाट थानाभर्याङतर्फ जाँदै गरेको ना ६५ प ७०५५ नम्बरको मोटरसाइकल राप्ती पुल नजिकै दुर्घटना हुँदा मोटरसाइकलमा सवार ३ नै जना घाइते भएका थिए ।
मोटरसाइकल चालक हेटौँडा–४ का १५ वर्षीय महेन थापाको उपचारको क्रममा हेटौँडा अस्पतालमा मृत्यु भएको प्रहरीले जनाएको छ । दुर्घटनामा घाइते बेबिशाको अवस्था गम्भीर रहेको र थप उपचारका लागि भरतपुर रिफर गरिएको प्रहरीले जानकारी दिएको छ ।
यस्तै घाइते विनिताको हेटौडा अस्पताल उपचार पछि डिस्चार्ज भएको प्रहरीले जनाएको छ ।
मकवानपुर । मकवानपुरको हेटौंडामा ११५औँ लक्ष्मी जयन्तीको अवसरमा विद्यालयस्तरीय कविता प्रतियोगिता र स्रष्टा सम्मान कार्यक्रम भएको छ । साहित्य सङ्गम मकवानपुर र युगप्रकाश क्लब हेटौंडा ११ को संयुक्त आयोजनामा कविता प्रतियोगिता र सर्जक सम्मान कार्यक्रम भएको हो ।
विद्यालयस्तरीय कविता प्रतियोगितामा ३७ जना कविका प्राप्त कवितामध्ये १५ कविका कविता छनौट भइ वाचन चरणमा प्रवेश गरेकाे थियाे । वाचनको लागि प्रत्यक्ष उपस्थित हुनु पर्नेमा छनौटमा परेका १५ कवि मध्ये १२ कविले आआफ्ना कविता वाचन गरेका थिए । वाचन चरणबाट निमिषा निरौला, कृष्मा लौडारी र विशप आचार्यको कविता उत्कृष्ट भएका छन् । यसै गरि रीतिका छत्कुली र इभानी रानाभाटको कविता प्रोत्साहनमा परेको थियो । उत्कृष्ट ३ कविका कविताले २ हजार पुरस्कार र प्रोत्साहन हुनेले लागि १ हजार नगद पुरस्कार र प्रमाणपत्र प्राप्त गरेका छन ।
कविता प्रतियाेगितामा उत्कृष्ठ कवि लौडारी हेटौँडा–४ स्थित ब्रह्मदिप एकेडेमीमा कक्षा–८ मा, निरौला हेटौँडा–५ स्थित जिएस निकेतनमा कक्षा–९ मा अध्ययनरत छन् । यसै गरी आचार्य तनहुँ जिल्लास्थित साँस्कृतिक गुरुकुल माध्यमिक विद्यालयमा अध्ययनरत रहेकाे साहित्य संगम उपाध्यक्ष सानु खनालले जानकारी दिए ।
यस्तै प्रतियाेगितामा प्राेत्साहन पुरस्कार प्राप्त गर्ने छत्कुली हेटौँडा–२ स्थित बालजागृति इंग्लिस सेकेण्डरी स्कूलमा अध्ययन छिन् भने रानाभाट ब्रहमदिप एकेडेमीमा अध्ययनरत छिन् ।
महाकवी देवकोटा सम्मान–२०८० खरेललाई
मकवानपुरे अग्रज साहित्य स्रष्टा देवराज खरेललाई सम्मान गरिएको छ । १० हजार राशिको महाकवि लक्ष्मीप्रसाद देवकोटा सम्मान २०८० बाट साहित्य सर्जक खरेललाई देवकोटा जयन्तीको अबसरमा हेटौंडामा सम्मानित गरिएको हो । नेपाली साहित्यमा कविता, निबन्ध तथा साहित्यिक पत्रकारिताको क्षेत्रमा विगत लामो समयदेखि पुर्याएको योगदानको कदर गर्दै खरेललाई महाकवि लक्ष्मीप्रसाद देवकोटा सम्मानबाट सम्मानित गरिएको संगम अध्यक्ष डीबी बर्तौलाले बताए । खरेल हाल हाम्राे मातृभूमि त्रैमासिक साहित्यिक पत्रिकामा आवद्ध रहेका छन् ।
कार्यक्रममा दाना कविताका सर्जक साहित्यिक अगुवा तुल्सी थापालाई मरणोपरान्त युगप्रकाश वरिष्ठ साधक सम्मान–२०८० द्वारा सम्मानित गरिएको छ । थापाले विगत ५ दशक भन्दा लामो समयदेखि साहित्य अख्यान, नाटक तथा कविता र दाना कवितालगायतको क्षेत्रमा पुर्याउनुभएको योगदानको कदर गर्दै युगप्रकाश वरिष्ठ साधक सम्मान–२०८० बाट सम्मानित गरिएकाे युग प्रकाश क्लब अध्यक्ष दीपक सिवाकोटीले बताए ।
सङ्गमका सल्लाहकार सुवास खनालले लक्ष्मीप्रसाद देवकोटाको व्यक्तित्व र कृतित्वको चर्चा गरेको कार्यक्रममा उपाध्यक्ष सानु खनालले सम्मानित व्यक्तित्व खरेलको चर्चा गरेककाे कार्यक्रममा प्रमुख अतिथि तथा सङ्गम सल्लाहकारहरू आरसी रिजाल र निमेष निखिल, सल्लाहकार तथा निर्णायक मण्डल संयोजक श्यामकुमार बानियाँ, सङ्गम अध्यक्ष डीबी बर्तौला, हेटौंडा उपमहानगरपालिका ११ नं. वडा अध्यक्ष जुना दाहाल मन्तव्य राखेका थिए ।
साहित्य सर्जक, साहित्यप्रेमी तथा राजनीतिक, शैक्षिक क्षेत्रका व्यक्तित्वहरूलगायत कार्यक्रममा उपस्थित रहेकाे थियो । कार्यक्रम सुरु हुनु अघि हेटौंडा ११ स्मारक गेटबाट प्रभातफेरि गरि त्रिभुवन माविमा रहेको देवकोटाको प्रतिमामा माल्यार्पण गरिएको थियो । हास्यव्यङ्ग्यकार आरसी रिजालको प्रमुख आतिथ्यता र युगप्रकाश क्लबका अध्यक्ष दीपक सिवाकोटीको अध्यक्षतामा भएकाे कार्यक्रम स्वर्गीय तुल्सी थापाप्रति मौन धारण गरी सुरू गरिएको थियाे भने सङ्गमका सचिव मनोज पोखरेलले सहजीकरण गरेका थिए ।
