मकवानपुर । मकवानपुरको हेटौंडामा शुक्रबार शैक्षिक मेला तथा सांस्कृतिक कार्यक्रम भएको छ । हेटौंडा उपमहानगरपालिका ४ नम्बर वडा कार्यालयको आयोजना तथा शैक्षिक गुणस्तर सुधार समिति हेटौंडा ४ को संयोजनमा दोस्रो शैक्षिक मेलासहित सास्कृतिक कार्यक्रम भएको हो ।
४ नम्बर वडाका सामुदायिक तथा संस्थागत गरी ८ वटा विद्यालयको मेलामा सहभागिता रहेको थियो । कार्यक्रममा विद्यार्थी, शिक्षक, अभिभावक, विभिन्न संघसंस्थाका प्रतिनिधि तथा सरोकारवालालगायत करिब १० हजार जनाले मेलाको अवलोकन गरेको वडा अध्यक्ष नवीन सिग्देलले बताए ।
मेलामा विज्ञान, गणित र सामाजिक विषयको प्रदर्शनी, नृत्य प्रतियोगिता, गायन प्रतियोगिता गरिएको थियो । जसमध्ये गणित प्रदर्शनीमा भुटन भुटनदेवी मावि प्रथम, श्रमिक मावि द्वितीय र आधुनिक राष्ट्रिय मावि तृतीय भएको छ । सामाजिक शैक्षिक प्रदर्शनी तर्फ आधुनिक राष्ट्रिय मावि प्रथम, ब्रम्हदिम एकेडेमी द्वितीय र श्रमिक मावि तृतीय भएका छन् ।
यसैगरी विज्ञान शैक्षिक प्रदर्शनी तर्फ भुटनदेवी मावि प्रथम, आधुनिक राष्ट्रिय मावि द्वितीय र सत्यम जेभियर्स मावि तृतीय भएको छ । यस्तै गायन तर्फ श्रमिक माविका अमन माझी प्रथम हुँदा ब्रम्हदिक एकेडेमीका दियान्सु बानियाँ द्वितीय र आधुनिक माविकी रञ्जिता सुनार तृतीय भइन । यस्तै सामुहिक नृत्य प्रतियोगिता तर्फ ब्रम्हदिक एकेडेमी प्रथम, श्रमिक मावि द्वितीय र भुटनदेवी मावि तृतीय भएको हो ।
प्रदर्शनी अन्तरगत नृत्य र शैक्षिक समाग्री प्रदर्शनीमा छुट्टाछुट्टै प्रतिस्पर्धा गराइएको थियो । नृत्य र शैक्षिक सामग्री प्रदर्शनीमा प्रथम हुने प्रत्येक समूहलाई १० /१० हजार नगदसहित सम्मानित गरिएको थियो । यसैगरी प्रतिस्पर्धाका विधागत प्रथम हुने सहयाेग शिक्षकलाई समेत ३ हजार नगदले सम्मान गरिएको छ । यसैगरी द्वितीय हुने प्रत्येक समूहले ७/७ हजार तथा द्वितीय हुने सहयाेग शिक्षकलाई २ हजार नगदद्वारा सम्मानित गरिएको आयाेजकले जानकारी दिएकाे छ । यस्तै तृतीय हुने प्रत्येक समूहले ५/५ हजार तथा तृतीय हुने सहयाेग शिक्षकलाई १ हजार नगदद्वारा सम्मानित गरिएको थियो ।
गायन तर्फ प्रथम स्थान प्राप्त गर्नेले ५ हजार, प्रथम सहयाेग शिक्षकलाई ३ हजार द्वितीय हुनेले ४ हजार द्वितीय सहयाेग शिक्षकले २ हजार तथा तृतीय हुनेले ३ हजार र सहयोग शिक्षकले १ नगद सहित प्रमाणपत्र प्राप्त गरेका छन् ।
शैक्षिक गुणस्तर सुधार अभियानमा निरन्तरता दिएपछी धेरै सुधार भएकाे अध्यक्ष सिग्देलले दावी गरे । ‘संस्थागत र सामुदायिक विद्यालयहरुबीच समन्वयन र प्रतिस्पर्धा दुबै हुनुपर्छ’ उनले भने ‘सरोकारवालाहरुले बजेट विनियोजनको पहिलो प्राथमिकता शिक्षालाई दिनुपर्छ ।’ अब वडाले वडा स्तरीय खेलकुद कार्यक्रम, जिल्ला स्तरीय शिक्षक भलिबल कार्यक्रम, इसीडी शैक्षिक सामग्री निर्माण तालिम, शिक्षक, विद्यार्थी तथा अभिभावक सम्मानलगायतका कार्यक्रमहरुको आयोजना गर्ने सिग्देलले जानकारी दिए ।
वडाभित्रका संस्थागत र सामुदायिक विद्यालयहरुबीच अझ बढी भाइचाराको सम्बन्ध स्थापित गर्ने विद्यार्थीकाे प्रतिभाकाे आदान प्रदानकाे उद्देश्यले कार्यक्रम गरिएको श्रमिक माविका प्रध्यानाध्यापक तथा शैक्षिक गुणस्तर सुधार समिति हेटौंडा–४ का अध्यक्ष श्रीराम दाहालले बताए ।
गतबर्ष पनि सामुदायिक तथा संस्थागत विद्यालयबीच प्रतिस्पर्धा, शैक्षिक अध्ययन तथा गुणस्तर सुधार एवम् विद्यार्थीको सिर्जनशील प्रतिभाको उजागर गर्ने उद्देश्यले ४ नम्बर वडा कार्यालयले शैक्षिक मेला आयोजनामा गरेको थियो ।
मकवानपुर । मकवानपुरको हेटौडा उपमहानगरपालिका ३ नम्बर वडा कार्यालयले ज्येष्ठ नागरिक तथा अपाङ्गता भत्ता प्राप्त गर्नेलाई ब्यान्केट बितरणसहित सम्मान गरेको छ ।
शुक्रबार वडा कार्यालयले ६८ देखि ७० वर्षका ज्येष्ठ नागरिक तथा अपाङ्ग भत्ता प्राप्त गर्ने लाभग्राहीलाई १/१ थान न्यानो कपडा ब्लान्केट वितरण गरि सम्मान समेत गरेको हो । आर्थिक वर्ष २०८०/०८१ को बार्षिक कार्यक्रम अन्तर्गत जेष्ठ नागरिक तथा अपाङ्गता भएका व्यक्तिहरुलाई सम्मानसहित ब्लान्केट बितरण गरिएको वडा अध्यक्ष ढलक बहादुर थापाले बताए । ज्येष्ठ तथा अपाङ्गता भएका नागरिकलाई राज्यको अनुभूति गराउदै जाडो मौसममा जीवनयापनको सहजताका लागि ब्लान्केट वितरणसहित सम्मान गरिएको उनले बताए ।
सामाजिक सुरक्षा भत्ता वितरण प्रणालीमा नामावली समाबेश भएका ६८ देखि ७० वर्ष का १ सय १५ जना जेष्ठ नागरिक, १५ जना पूर्ण अपाङ्गता र ३८ जना आंशिक अपाङ्गता भएकाकोमा शुक्रबार १ सय ५ जनालाइ सम्मान सहित ब्लान्केट वितरण गरिएको वडा सचिव महेन्द्र चापागाईंले जानकारी दिए । शुक्रबारको कार्यक्रममा उपस्थित हुन नसेकेका बाकी लाभग्राहीलाई वडा कार्यालयबाट घरघरमा नै गई वितरण गरिने चापागाईंले बताए ।
वडा सदस्य सबिना बिडारीले प्रथम चरणको ज्येष्ठ नागरिक सम्मान कार्यक्रम पश्चात दोश्रो चरणको कार्यक्रममा वडा भित्रका सुत्केरी महिला तथा आर्थिक एवं सामाजिक रुपले बिपन्न, असहाय तथा गरिबलाई समेत ब्लान्केट वितरणको कार्यक्रम रहेको जानकारी गराइन ।
यस्तै वर्तमान युवा पुस्ताले ज्येष्ठ नागरिकको सम्मान गरे मात्र आउँदो पुस्ताले पनि ज्येष्ठ नागरिकको सम्मान गर्ने, ज्येष्ठ नागरिक समाजका अमूल्य निधि र पथप्रदर्शक हुन् भन्ने भुल्न नहुने, अपाङ्गता भएका व्यक्ति समेतको सम्मान गर्नु राज्यको दायित्व भएको हुँदा यस्ता प्रकारका कार्यक्रमको आगामी दिनमा निरन्तरता पाउनु पर्ने धारणा राखेका थिए ।
३ नम्बर वडा अध्यक्ष ढलक बहादुर थापाको अध्यक्षता तथा ज्येष्ठ नागरिक वडा मंच अध्यक्ष माधव प्रसाद ढकालको आतित्थ्यतामा भएको कार्यक्रममा वडा सदस्यहरु, टोल विकास संस्थाका अध्यक्षहरु, वडा कार्यालयका कर्मचारीहरु समेतको उपस्थिति रहेको थियो ।
३ नं. वडा कार्यालयले गत बर्ष ७० बर्ष देखि माथिका २ सय ६० जना ज्येष्ठ नागरिकलाई सम्मान गर्दै ब्लान्केट वितरण गरेको थियो ।
मकवानपुर । नेपाली कांग्रेसका नेता प्रकाशमान सिंहले जनताकाे अधिकार दिलाउन राजनीतिमा लागेकाे बताएका छन् । नेपाली काग्रेस स्थापना दिवसकाे अवसरमा बागमती प्रदेश समितिद्वारा शुक्रबार हेटौंडामा आयोजित कार्यक्रममा सिंहले राजनीतिलाई सेवाको रुपमा लिनुपर्ने बताए ।
कांग्रेस पूर्व महामन्त्री सिंहले राजनीतिमार्फत समाज र राष्ट्रको सेवामा ध्यान दिन सबैमा आग्रह गरेका हुन् । ‘पदमै पुगौला भनेर हामी राजनीतिमा आएका होइनौं ’ सिंहले भने-राजनीतिलाई सेवाको क्षेत्रको रुपमा स्थापित गराउन ध्यान दिनुपर्छ ।’ कांग्रेस पार्टीलाई लोकप्रिय पार्टीको रुपमा आजसम्म स्थापित गर्न आफ्ना पिता गणेशमान र अन्य नेताहरुको भूमिकालाई स्मरण गर्दै सिंहले भने ‘पार्टी र पार्टीबाट प्रतिनिधित्व गरेर बनेका जनप्रतिनिधिहरुले इमान्दारिताका साथ आफ्नो जिम्मेवारी निर्वाह गर्नुपर्छ ।’
सबैले आफ्नो जिम्मेवारी पूरा गरेमा सुशासनलाई अनुभुत गराउन सकिने उनकाे भनाइ थियाे । जनताको इच्छा आकांक्षा पूरा गर्न निस्वार्थ भावले काम गर्नुपर्ने नेता सिंहले बताए । विगतदेखि नै विभिन्न राजनीतिक परिवर्तनमा कांग्रेसले नेतृत्व गरेको भन्दै नेता सिंहले २०७२ को संविधान जारी गर्नसम्म नेतृत्वदायी भूमिका निर्वाह गरेको स्मरण गरे । कांग्रेसकै नेतृत्वमा प्राप्त भएको संविधानको रक्षाको लागि अहिले अन्य दलहरुसँग गठबन्धन गरेर अघि बढिरहेको भन्दै उनले वर्तमान सत्ता गठबन्धनलाई अझै बलियो बनाएर संविधान र लोकतन्त्रको रक्षा गर्नुपर्ने बताए।
नेपाली राष्ट्रिय कांग्रेसको पहिलो अधिवेशन भएको दिनको स्मरणमा स्थापना दिवस मनाउँदै आएको कांग्रेसले जहानियाँ राणा शासनको अन्त्य गर्दै प्रजातन्त्र स्थापनाको नेतृत्व गरेको थियो भने ७ दशकपछि गणतन्त्र स्थापनाको नेतृत्व गर्दै अहिले पनि संसद्को सबैभन्दा ठूलो दलकारुपमा रहेको छ । नेपालमा १०४ वर्षे राणा शासन फ्याँक्ने नेतृत्व गरेको कांग्रेसले ३० वर्षे एकदलीय निरंकुश पञ्चायती शासन व्यवस्थाको अन्त्य र २३८ वर्ष पुरानो शाहवंशीय राजतन्त्रको समेत अन्त्य गर्नेमा नेतृत्वदायी भूमिका निभाएको थियो ।
नेपाली कांग्रेस, बागमती प्रदेश समितिले शुक्रबार हेटौंडामा पार्टीको ७८ औँ स्थापना दिवस मनाएको छ । नेपाली राष्ट्रिय कांग्रेसको पहिलो अधिवेशन भएको २००३ साल माघ १२ लाई आधार मानेर हरेक वर्ष स्थापना दिवस मनाउँदै आएको छ । नेपाली कांग्रेस बागमती प्रदेश सभापति ईन्द्रबहादुर बानियाँको अध्यक्षतामा भएको कार्यक्रममा केन्द्रीय सदस्य राजन केसी, कांग्रेस बागमती प्रदेश संसदीय दलका नेता बहादुरसिंह लामा, नेकपा माओवादी केन्द्रका नेता सरल सहयात्री, कांग्रेस बागमती प्रदेश उपसभापति चन्द्र महर्जन, कांग्रेस मकवानपुर सभापति बुद्ध लामा, बिहीबार मात्रै बागमती प्रदेशमा गठबन्धनबाट राष्ट्रियसभा सदस्य निर्वाचित भएकाहरु जितजंग बस्नेत, विष्णुदेवी पुडासैनी, श्रीकृष्ण अधिकारी, घनश्याम रिजाललगायतले मन्तव्य व्यक्त गरेका थिए ।
मकवानपुर । मकवानपुरकाे हेटौडामा ‘सूचना चलखेल र लोकतन्त्र’ विषयमा हेटौंडामा अन्तरक्रिया गरिएको छ । बागमती प्रदेशकाे राजाधानी हेटौडामा शुक्रबार सेन्टर फर मिडिया रिसर्च नेपालले इन्टरनेशनल रिपब्लिकन इन्स्टिच्युटसँगको सहकार्यमा बागमती प्रदेशमा सूचनाको चलखेल र लोकतन्त्रसम्बन्धी अन्तरक्रिया गरेकाे हाे ।
प्रदेशसभासद, राजनीतिक दललगायत सरोकारवालाहरुबीच गरिएकाे अन्तरक्रियामा इन्टरनेशनल रिपब्लिकन इन्स्टिच्युट प्रमुख युवराज आचार्यले सूचना चलखेल र लोकतन्त्र विषयवस्तु प्रस्तुत गरेका थिए । मिथ्या सूचनाबाट पर्ने असरहरु, सूचनामा अन्यौलका कारण पर्ने असरलगायत बताउदै कानूनी प्रावधान बारे उनले कार्यपत्र प्रस्तुत गरेका थिए ।
मिथ्या सूचनाको घटना, मिथ्या सूचना फैलिनबाट रोक्ने उपाय,मिथ्या सूचना फैलिन नदिन सरोकारवाला पक्षको भूमिका र दायित्व विषयक उपस्थित सरोकारवालाहरु बीच छलफल गरिएको थियो । बागमती प्रदेश संसद सरल सहयात्री पौडेलले समाजमा भएको अन्धविश्वासको कारण पनि मिथ्या सूचनाको असर समाजमा पर्ने गरेको बताए । उपस्थित संसद र स्थानीय प्रतिनिधिहरुले मिथ्या सूचनाको कारण परेको समस्या बताउदैँ सत्य तथ्य सूचना मात्र प्रकाशन र प्रसारण गरिदिन समेत मिडियालाई अनुरोध गरे ।
यसैगरी प्रदेश सभा सदस्य रत्नप्रसाद ढकालले मिथ्या सुचना राज्यकै अंग प्रभाव परेको बताउँदै प्रविधिको विकास सँगै मिथ्या सूचना बढ्दो रहेको बताए । हिजोको पत्रकारको लेखाई र बुझाई र अहिलेको लेखाई फरक छ रहेकाले मिथ्या सूचना नियन्त्रण गरिनुपर्ने बताए । कार्यक्रममा प्रदेश सभा सदस्य रमा आले मगर, माया श्रेष्ठ, गीता गुरुङ, प्रदेश सञ्चार रजिष्ट्रार रेवती प्रसाद सापकोटा, हेटौंडा वडा ८ अध्यक्ष रामकृष्ण थापा, जिल्ला बार एशोसिएसन अध्यक्ष अप्सरा बस्नेतलगायतकाे उपस्थिति थियाे ।
मकवानपुर । मकवानपुरको मनहरी गाउँपालिका हाँडीखोलामा कोल्डस्टोर निर्माण हुने भएको छ । मनहरी गाउँपालिकाकाे ६ करोडभन्दा बढी रकम लगानीमा कोल्डस्टोर निर्माण गर्न लागेको हो ।
तरकारी उत्पादनको लागि पकेट क्षेत्र मानिने हाडिखाेलामा गाउँपालिकाले बुधबार हिमालयन नमोवुद्ध जेभीसँग ६ करोड २८ लाख ४५ हजारमा कोल्डस्टोर निर्माण गर्ने सम्झौता गरेको छ ।
गत जेठ २ गते नै गाउँपालिकाले कोल्ड स्टोर निर्माणका लागि बोलपत्र आह्वान गरेको थियो । गाउँपालिकाको प्राविधिक मुल्याङ्कन अनुरुप कुल ७ करोड ५७ लाख ९६ हजार लागत अनुमान गरिएकोमा हिमालयन नवोवुद्ध जेभीसँग सबैभन्दा कम ६ करोँड २८ लाख ४५ हजारमा ठेक्का सम्झौता भएकाे थियाे । बोलपत्रमा दोस्रो नम्बरमा परेको कम्पनी हिमाल एमएम जेभीलेले ठेक्का सकार्ने कम्पनीविरुद्ध मुद्दा दायर गरेपछि तत्कालीन समयमा सम्झौताको काम हुन सकेको थिएन ।
गत माघ ५ गते अदालतले सो रिट निवेदन खारेज गरेपछि गाउँपालिकाले बुधबार कम्पनीसँग सम्झौता गरेको हो । २ वर्षभित्र काम सक्याउने गरी सम्झौतापत्रमा हस्ताक्षर भएको मनहरी ३ का वडाध्यक्ष अनन्तप्रकाश अर्यालले जानकारी दिए । मुद्दाका कारण सम्झौता नै ढिलाई भएको बताउँदै अर्यालले तोकिएको समयभित्रै काम सम्पन्न गर्न ठेकेदारलाई निर्देशन दिए ।
गाउँपालिका अध्यक्ष रन्जन कालाखेतीले हाँडीखोलामा कोल्ड स्टोर निर्माण गर्ने निर्वाचन अघिकै याेजना रहेकोमा त्यो पूरा हुन लागेको बताए । हाँडीखोलामा उत्पादन हुने तरकारी तथा बालीले उचित मूल्य नपाउँदा किसानहरु मर्कामा पर्ने गरेको बताउँदै अध्यक्ष कालाखेतीले कोल्ड स्टोर निर्माण पछि किसानले तरकारी तथा बाली भण्डारण गरी उचित समयमा बिक्री गरी राम्रो मूल्य पाउन सक्ने बताए ।
कोल्डस्टोर निर्माणको लागि गाउँपालिकाले चालु आर्थिक वर्षमा ३ करोड २० लाख रुपैयाँ बिनियोजन गरेको छ । आगामी वर्ष थप बजेटको व्यवस्था गरी कोल्ड स्टोर निर्माण पूरा गर्ने गाउँपालिकाको योजना छ । मनहरी गाउँपालिका वडा नं ३ हाँडीखोलामा कोल्ड स्टोर निर्माण भएपछि त्यस क्षेत्रमा उत्पादित तरकारीको भण्डारण गर्ने र उचित मूल्य प्राप्त भएपछि मात्रै बिक्री गर्ने सुविधा किसानले पाउनेछन् ।
