मकवानपुर । मकवानपुरका दुग्ध उत्पादक किसानले बक्यौता रकम आगामी असार मसान्त सम्म पाउने भएका छन् । किसानसँग उघारोमा दुध खरिद गरेर भुक्तानी नदिएका निजी डेरी उद्योगलाई असार मसान्त भित्र रकम भुक्तानी गर्न जिल्ला प्रशासन कार्यालय मकवानपुरले निर्देशन दिएकाे छ ।
दुग्ध उत्पादक किसानको भुक्तानी नदिएका मकवानपुरका ११ वटा डेरी उद्योग सहित किसानका प्रतिनिधी समेत जिल्ला प्रशासन कार्यालय मकवानपुरमा भएकाे छलफल पछि किसानकाे बक्यौता रकम असार सम्म तिर्ने प्रतिबद्धता जनाएका छन् । सोमबार प्रशासनको सभाहलमा प्रमुख जिल्ला अधिकारी बसन्त अधिकारी, सुरक्षा निकायका प्रमुख, जिल्ला दुग्ध उत्पादक सहकारी संघका अध्यक्ष हरि कँडेल, जिल्ला सहकारी संघ लिमिटेडका अध्यक्ष नारायणप्रसाद देवकोटा, डेरी उद्योगका सञ्चालक एवम् व्यवस्थापकसंग छलफल गरिएको हो ।
प्रजिअ बसन्त अधिकारीले डेरी उद्योग सञ्चालकहरुलाई संघसँग भएको सहमति अनुसार नै भुक्तानी दिन निर्देशन दिए । किसानले लामो समयदेखि उधारोमा बिक्री गरेको दुधको मुल्य नपाएको गुनासो गरेपछि जिल्ला प्रशासन कार्यालय मकवानपुरले सर्बपक्षीय छलफल राखेको हो ।
मकवानपुरमा संचालित ११ उद्योग वटा डेरी उद्योगबाट किसानले २०७८ सालदेखि १४ करोड ३५ लाख ६३ हजार भुक्तानी पाउन बाँकी छ । यसअघि जिल्ला दुग्ध उत्पादक सहकारी संघले पनि किसानको भुक्तानी रोक्ने डेरी उद्योगहरुसँग छलफल गरेको थियो । बक्यौता रकम प्रत्येक महिना जम्मा गर्दै जाने र ६५ प्रतिशत बक्यौता यहि असार मसान्त सम्म भुक्तानी गर्ने भएकाे छ । बाँकी रहेको रकम असोज मसान्त सम्ममा पूर्ण रुपमा भुक्तानी गरि सक्ने प्रतिवद्धता उद्योगले जनाएका थिए ।
हेटौंडा ९ मा रहेको शुभ डेरीले सबैभन्दा धेरै ६ करोड ७० लाख भुक्तानी दिन बाँकी छ भने गायत्री डेरीले ४ करोड ४९ लाख भुक्तान दिन बाँकी छ । त्यसैगरी भुटनदेवी डेरी फर्मले २२ लाख ३३ हजार, अनुश्री सप्लायर्सले १९ लाख ७५ हजार, कविता डेरीले १२ लाख ४२ हजार, पवित्र मिल्कले ४ करोड ६ लाख, स्यार्सेकालिका डेरीले १ करोड ६ लाख, पिज्जा कटरले ७ लाख २३ हजार, नारायणी मिल्कले १० लाख ३२ हजार, एस।के।डेरीले २५ लाख २८ हजार र कल्पवृक्ष डेरीले ६५ लाख ५७ हजार भुक्तानी गर्न बाँकी छ । जिल्ला उत्पादक सहकारी संघसंग मकवानपुरमा ११ हजार किसान आबद्ध छन् भने ४२ डेरी उद्योगसँग जिल्ला संघले कारोबार गर्दै आएको छ ।
उद्योगीहरुलाई प्रबर्धन गर्न सरकार तयार रहेको बताउँदै प्रजिअ अधिकारीले किसानहरुको समस्सामा गम्भीर बनिदिन उद्योगीहरुलाई आग्रह गरे । छलफलको क्रममा उद्योगीहरुले बटर चिज लगायतका दुग्धजन्य पदार्थ लामो समयसम्म स्टकमै रहने र यसको बजारीकरणमा देखिएको समस्याको कारण भुक्तानीमा कठिनाई भएको गुनासो गरेका थिए ।
मकवानपुर । उत्कृष्ट खेलाडी उत्पादन गर्ने उद्देश्यले पृतनापति ट्रफी- २०८३ को विभिन्न प्रतियोगिताहरु सोमबारबाट सुरु भएको छ । उद्घाटन दिनको पहिलो खेल फुटबलमा श्री गोरख बहादुर गण र श्री भैरव गण बीच खेल भएको छ । आज भएको फुटबल खेलमा श्री गोरख बहादुर गणले २–१ गोलको अग्रता हासिल गर्दै श्री भैरव गण माथि विजय हासिल गरेको छ ।
विक्रम संवत २०६५ सालदेखि प्रधान सेनापति ट्रफी सञ्चालन हुँदै आएको सन्दर्भमा यस वर्ष पनि पृतनापति ट्रपी २०८३ सुरु गरिएको हो । श्री नं. ७ बाहिनी अड्डा अन्तर्गत श्री गोरख बहादुर गणमा संचालन भएको पृतनापति ट्रफी–२०८३ को मध्य पृतना हेडक्वाटरका पृतनापति उपरथी विष्णु कुमार खड्काले खेलकुद प्रतियोगिताको उद्घाटन गर्नुभयो । उहाँले रेफ्रीलाई बल हस्तान्तरण गरि फुटबल खेलको आभारम्भ गर्नु भएको थियो ।
यसै गरि भोली मंगलबार दिउँसो ४ बजे श्री शेर गण र श्री नयाँ सबुज गण बीच खेल हुने गणपति प्रमुख सेनानी रविन्द्र कुमार श्रेष्ठले बताउनु भयो । यस वर्ष प्रतियोगिताको चापलाइ मध्यनजगर गरेर धादीङ, नुवाकोट, चितवन जिल्लामा समेत खेत खेलाइरहेको श्रष्ठले जानकारी दिनुभयो । खेलको उद्घाटनको दिन आज मार्चपाससँगै शेर गण, नयाँ सुबज गण भैरव गणलगायतले झाँकी प्रदर्शन गरेका थिए ।
यस वर्षको पृतनापति ट्रफी २०८३ वैशाख १४ गतेदेखि २८ गतेसम्म सञ्चालन हुने तय भएको छ। प्रतियोगितामा सामूहिक र व्यक्तिगत दुबै विधाका खेलहरू समावेश गरिएका छन । सामूहिक खेलहरू अन्तरगत भलिबल, फुटबल र बास्केटबल प्रतियोगिता हुनेछ । यसैगरी व्यक्तिगत खेलहरूतर्फ एथलेटिक्स, जुडो, तेक्वान्दो, बक्सिङ र स्विमिङ खेल हुनेछ ।
प्रतियोगितालाई विभिन्न युनिटहरूमा विकेन्द्रीकृत गरी सञ्चालन गरिनेछ । जस अन्तरगत मध्य पृतना हेडक्वार्टरमा स्विमिङ र बक्सिङ खेल हुने छ । श्री नम्बर ६ बाहिनी अड्डा (नुवाकोट, श्री शरगण) मा बास्केटबल, श्री भैरवनाथ गण (धादिङ)मा भलिबल, श्री नम्बर ७ बाहिनी अड्डा (मकवानपुर, श्री गोरखबहादुर गण) मा फुटबल र एथलेटिक्स र श्री नयाँ सबुज गण (चितवन) मा तेक्वान्दो र जुडो प्रतियोगिता हुनेछ ।
यसरी विभिन्न स्थानमा खेलहरू सञ्चालन गर्दा सम्बन्धित क्षेत्रमा खेल पूर्वाधार तथा भौतिक संरचनाहरूको निर्माण हुनुका साथै प्रदेश, जिल्ला र स्थानीय तहका खेलकुद निकायहरूसँगको समन्वय र सहकार्य बढ्ने विश्वास लिइएको छ। यसले नागरिक र सैनिक बीचको सम्बन्धलाई थप सुदृढ बनाउने र आर्थिक दृष्टिकोणले पनि मितव्ययी हुने अपेक्षा गरिएको महासेनानी सुशील कुमार थापाले बताउनु भयो ।
प्रतियोगिताको समापन पश्चात प्रतिभाशाली खेलाडीहरूलाई थप प्रशिक्षित गरी आगामी प्रधान सेनापति प्रतियोगिता झनै उत्कृष्ट हुने उपेक्षा रहेको थापाले बताउनु भयो ।
देशलाई खेलकुद क्षेत्रमा सक्षम खेलाडी उत्पादन गर्ने मुख्य लक्ष्यका साथ मध्य पृतना हेडक्वार्टर अन्तर्गतका विभिन्न बाहिनी र गणहरूबाट छनोट गरिएका उत्कृष्ट खेलाडीहरूलाई यस प्रतियोगितामा सहभागी गराइनेछ ।
बैसाख २८ सम्म संचालन हुने प्रतियोगिताका विजयी खेलाडीलाई प्रधान सेनापति ट्रफी प्रतियोगिताका लागि क्लोज क्याम्प संचालन गरिने जनाएको छ । पृतनापति ट्रफी प्रतियोगितामा ६ र ७ नम्वर बाहिनीको साथै शेर गण, भैरवबहादुर गण र नयाँ सुवज गणका खेलाडी सहभागी छन् ।
प्रतियोगितामा भलिबल, फुटबल, बास्केट वल र एथ्लेटिक्सलगायत ८ खेलमा प्रतिस्पर्धा हुने छ । विभिन्न विधाको प्रतियोगिता विभिन्न गण र बाहिनीमा संचालन गरिने छ । समापनको दिन सुपारेटार व्यारेकको खेल मैदानमा फुटबलको फाइनल खेल हुने जनाएको छ । ४७१ वटा मेडल रहेको उक्त प्रतियोगितामा १ सय २५ महिला खेलाडीसहित ५ सय ५० खेलाडी सहभागी हुने छन् । मध्य पृतना हेटौंडाले प्रधान सेनापति ट्रफी प्रतियोगितामा पाँच पटक प्रथम हुन सफल भएको छ ।
मकवानपुर । भैरव अर्याल स्मृति साहित्य सम्मान २०८२ साहित्यकार प्रोल्लास सिन्धुलीयलाई प्रदान गरिएको छ । हेटौंडा पुष्पलाल स्मृति पुस्तकालयमा आयोजित कार्यक्रममा सिन्धुलीका साहित्यकार सिन्धुलीयलाई २१ हजार १ सय ११ रुपैयाँ नगदसहित भैरव अर्याल स्मृति सम्मान प्रदान गरिएको हो ।
हरेक वर्ष साहित्य सङ्गम मकवानपुर र सिस्नुपानी नेपाल मकवानपुरले संयुक्तरुपमा उक्त सम्मान प्रदान गर्दै आइएको छ । भैरव अर्यालकै जीवनीमा आधारित उपन्यास ‘भग्न भैरव’ लेखन तथा नेपाली साहित्यको वाङ्मयमा पुर्याएको योगदानको कदर गर्दै सिन्धुलीयलाई उक्त पुरस्कार प्रदान गरिएको आयोजकले जनाएको छ ।
पिता उमानाथ शास्त्री सिन्धुलीय र माता लालित्यलक्ष्मी शर्माबाट २०३२ साल बैशाख ७ गरे सिन्धुली जिल्लाको गैयाटारमा जन्मिएका सिन्धुलीयले निरन्तररुपमा नेपाली साहित्य लेखन, सम्पादनलगायतका क्षेत्रमा योगदान पुर्याउँदै आएका छन् । उनको बाहिर एक मुठ्ठी तुसारो छ, शब्दहरुको नेपथ्य, चुपचापको अन्त्यलगायतका कविता संग्रह प्रकाशित छ । कविताबाहेक कथा, लघुकथा, उपन्यास, निबन्ध, यात्रा संस्मरणका दर्जनौँ कृतिहरु प्रकाशित छन् ।
‘कथालिका’, ‘सेतो कागज’लगायतका साहित्यिक पत्रिकाका सम्पादकीय भूमिकामा रहेर काम गरिसकेका सिन्धुलीय हाल ‘नयाँ पत्रिका’ दैनिकको उपसम्पादकको रुपमा कार्यरत छन् । साहित्य सङ्गम मकवानपुर र सिस्नुपानी नेपाल मकवानपुरको संयुक्त आयोजनामा भएको कार्यक्रममा साहित्यकारहरु स्नेह सायमी तथा लक्ष्मी मालीले आफ्ना कृतिहरु पुष्पलाल स्मृति पुस्तकालयलाई उपलब्ध गराएका थिए ।
मकवानपुर। हेटौंडा क्याम्पस स्वतन्त्र विद्यार्थी युनियन (स्ववियु) ले विद्यार्थीहरुलाई सार्वजनिक यातायातको भाडामा दिइदै आएको ४५ प्रतिशत छुट पूर्ण रूपमा कार्यान्वयन गर्न माग गरेको छ।
स्ववियुले शुक्रबार प्रमुख जिल्ला अधिकारीलाई ध्यानाकर्षण पत्र बुझाउँदै नेपाल सरकारद्वारा व्यवस्था गरिएको उक्त सुविधा प्रभावकारी रूपमा कार्यान्वयन हुन नसकेको जनाएको हो।
स्ववियुका अनुसार जिल्लाभित्र सञ्चालनमा रहेका कतिपय सार्वजनिक सवारी साधनहरूले विद्यार्थीलाई ४५ प्रतिशत छुट नदिने, मनोमानी भाडा असुल गर्ने तथा विद्यार्थीहरूमाथि दुर्व्यवहार गर्ने जस्ता गुनासाहरू निरन्तर प्राप्त भइरहेका छन् । यातायातमा तोकिएको प्रतिशतमा पूर्ण छुट नहुदा विद्यार्थीलाई आर्थिक भार थपिएको साथै शैक्षिक गतिविधिमा प्रत्यक्ष असर पारिरहेको बताइएको छ।
ध्यानाकर्षण पत्रमा जिल्लाभित्र सञ्चालनमा रहेका सम्पूर्ण सार्वजनिक यातायातका साधनहरूमा नेपाल सरकारको नीतिअनुसार विद्यार्थीलाई प्रदान गरिने ४५ प्रतिशत छुटलाई अनिवार्य तथा प्रभावकारी रूपमा कार्यान्वयन गराउन आवश्यक अनुगमन, निर्देशन तथा कारबाही प्रक्रिया अघि बढाउन माग गरिएको छ।
विद्यार्थीहरूमाथि हुने अन्याय, दुर्व्यवहार तथा सेवा अस्वीकृतिलाई तुरुन्त नियन्त्रण गरी विद्यार्थीमैत्री वातावरण सुनिश्चित गर्न प्रशासनसँग आग्रह गरिएको छ। स्ववियु हेटौंडा क्याम्पस काबा अध्यक्ष भरत मोहन देवकोटाले समयमै आवश्यक कदम नचालिए विद्यार्थीहरूको हकहित संरक्षणका लागि थप सशक्त आन्दोलनका कार्यक्रम अघि बढाउन बाध्य हुने चेतावनी दिएका छन्।
स्ववियुले यस विषयलाई गम्भीरतापूर्वक लिई शीघ्र समाधानका लागि आवश्यक पहल गरिदिन प्रमुख जिल्ला अधिकारी समक्ष अनुरोध समेत गरेको छ।
सिन्धुली । बागमती प्रदेश सिन्धुलीको घ्याङलेख गाउँपालिकामा साढे १६ किलोमिटर सडक कालोपत्रे र दुईवटा पक्की पुल निर्माण गरिएकाे छ । बागमती प्रदेश सरकारको करिब ४७ करोड रुपैयाँको लगानीमा १६ किलोमिटर सडक साढे ५ मिटर चौडा कालोपत्रे भएको हो ।
प्रदेश सरकारले मानव विकास सूचकाङ्कमा पछि परेको घ्याङलेखकाे पिपलभञ्ज्याङ–हायूटार–रामपुर सडक २५ किलोमिटर मध्ये साढे १६ किलोमिटर सडक कालोपत्रे गरेकाे हाे । यसैगरी प्रदेशले घ्याङलेखकाे २ नम्बर वडाको ठाडी खोला र ३ नम्बर वडाको तामाजोर खोलामा ४०/४० मिटरकाे दुईवटा पक्की पुल पनि निर्माण सम्पन्न गरेकाे छ ।
बागमती प्रदेशका भौतिक पूर्वाधार विकासमन्त्री डा. दिनेशचन्द्र देवकोटाले उक्त कालोपत्रे सडक र पुलको उद्घाटन गरेका छन् । उद्घाटनपछि मानव विकास सूचकाङ्कमा पछि परेका घ्याङलेखसहित धादिङको रुबी भ्याली र सिन्धुपाल्चोकको पाँचपोखरीमा मन्त्रालयले विशेष प्राथमिकता दिएर काम गरिरहेको बताए । घ्याङलेखको पूर्वाधार विकासका लागि थप ३५ करोड रुपैयाँ बजेटको प्रतिबद्धता जनाउँदै विकासमा दलीय स्वार्थभन्दा माथि उठ्न उनले आग्रह गरे ।
जनताको जीवनस्तरमा आमूल परिर्वतन ल्याउन अन्य मन्त्रालयसंग सहकार्यमा गरेर लक्षित कार्यक्रम घोषणा गरिने मन्त्री डा. देवकोटाले बताए । ‘जबसम्म विकासलाई जनताले आत्मसात् गर्दैनन्, तबसम्म त्यो वास्तविक विकास हुन सक्दैन’ उनले भने ‘हामीले बनाएका यी संरचनाले यहाँको भूगोल र जनताको जीवनस्तरमा आमूल परिवर्तन ल्याउनुपर्छ ।’
प्रदेशका पूर्व आन्तरिक मामिला तथा कानून मन्त्री तथा प्रदेश सांसद गंगानारायण श्रेष्ठले बागमती प्रदेशका ६६ निर्वाचन क्षेत्रमध्ये सबैभन्दा पछि परेको यस क्षेत्रको पूर्वाधार विकासमा प्रदेश सरकारको विशेष ध्यान दिनु पर्ने बताए । प्रदेश सांसद मातृकाप्रसाद भट्टराईले प्रदेश संरचनाकै कारण घ्याङलेख जस्तो विकट ठाउँ राजधानीसँग जोडिन सम्भव भएको बताए । उनले भौतिक विकाससँगै मानवीय चेतनाको विकास हुनु पर्ने जानकारी दिए ।
पूर्वाधार विकास कार्यालय सिन्धुलीका अनुसार, २४ करोड ८८ लाखमा १०.२० कि.मि. र १० करोड ८० लाखमा ६.३० कि.मि. सडक निर्माण भएका हुन् । त्यसैगरी, ११ करोड २८ लाखको लागतमा दुईवटा पक्की पुल निर्माण सम्पन्न भएकाे कार्यालयले जनाएकाे छ । उक्त योजनाहरूको म्याद २०८३ सालसम्म भए तापनि तोकिएको समयअगावै काम सम्पन्न भएकोकाेले निर्माण व्यवसायीहरूलाई सम्मानपत्र प्रदान गरिएको थियो । पुल निर्माणतर्फ सृजना निर्माण सेवा, सिन्धुली तथा सडक कालोपत्रेतर्फ जयबाबा गोरख–सारस–बालकोट जे.भी. र सञ्जीव–सिन्धुली जे.भी.लाई सम्मान गरिएको थियो ।
सडककाे पूर्वाधार बनेपछि सिन्धुलीको ‘कर्णाली’ भनिने घ्याङलेख दुर्गम मात्र रहेन, यो सम्भावनाको केन्द्र बनेको मन्त्रालयका सचिव ईश्वरचन्द्र मरहठ्ठाले बताए । प्रदेश सरकारको निर्णय प्रक्रिया छिटो भएकाले नै घ्याङलेखको सडक समयमै सम्पन्न हुन सकेको उनले जानकारी दिए । यातायात पूर्वाधार निर्देशनालयका प्रमुख नवीन सिंहले नयाँ सडक बनेपछि दुर्घटनाको जोखिम बढ्न सक्ने तर्फ सचेत गराउँदै घर तथा अन्य संरचना निर्माण गर्दा सडकको मापदण्डलाई ध्यान दिन नागरिक र स्थानीय तहलाई आग्रह गरे ।
उक्त प्रादेशिक सडकको करिब ९ किलोमिटर कालोपत्रे र दुईवटा पुल निर्माण गर्न अझै बाँकी रहेकाे छ । यी सबै काम सकिएपछि घ्याङलेख मदन भण्डारी राजमार्ग र बीपी राजमार्गसँग जोडिनेछ । त्यसपछि जिल्ला सदरमुकाम मात्र होइन, प्रदेश र संघीय राजधानीसम्मको पहुँच सहज बन्नेछ ।
पूर्वाधार विकास कार्यालय सिन्धुलीका प्रमुख लक्ष्मीप्रसाद सापकोटाका अनुसार, निर्माण हुन बाँकी दुई पुलमध्ये हाडी खोलाको २० मिटर लामो पुलको ठेक्का सम्झौता भइसकेको छ । ‘मरिण खोलामा पुल बनाउन र सडक कालोपत्रे गर्न बजेट स्वीकृत भएर आएपछि काम सुरु हुन्छ’ उनले भने ।
सिन्धुलीको सबैभन्दा विकट मानिने यस क्षेत्रमा भौतिक पूर्वाधार निर्माण भएसँगै स्थानीयको जीवनस्तर सहज बनेको छ । उद्घाटन कार्यक्रम समारोहमा उपस्थित स्थानीय ७८ वर्षीय विन्द्रे स्याङ्तानले पुरानो दुःख सम्झदै भने ‘पहिला यही बाटोमा नुन–तेल बोकेर दिनभर हिँड्दा पनि सिन्धुली बजारसम्म पुगेर फर्किन मुस्किल थियो । आज गाडी कुदेको देख्दा सपनाजस्तै लागेको छ ।’ नातिनातिनालाई खोलाले बगाउला भन्ने डर समेत हटेकाे उनले बताए ।
विगतमा सडक सञ्जाल नहुँदा सामान्य नुन–तेल किन्न पनि सास्ती खेपेका स्थानीय शिक्षक श्रवणकुमार सुनुवार अब घ्याङलेखबासीहरुको भविष्यप्रति आशावादी छन् । ‘अब हाम्रा किसानले फलाएको तरकारीले बजार पाउनेछ । व्यावसायिक कृषि र माछापालनबाट गाउँको आर्थिक स्तर उकासिनेछ’ उनले भने ।
घ्याङलेख गाउँपालिकाका अध्यक्ष जगतबहादुर भोलनको अध्यक्षतामा भएको उद्घाटन समारोहमा जिल्ला समन्वय समितिका प्रमुख कार्साङ लामा, पालिका उपाध्यक्ष शंकरमान घलान, नेकपा एमालेका जिल्ला इन्चार्ज मनोजजंग थापा, सहरी विकास तथा भवन कार्यालय सिन्धुलीका प्रमुख किरण कार्की लगायत जनप्रतिनिधि, कर्मचारी, राजनीतिक दलका प्रतिनिधि, शिक्षक, स्थानीय बुद्धिजीवी तथा सर्वसाधारण उपस्थित थिए ।