मकवानपुर । मकवानपुरको भैसेबाट प्रहरीले लागूऔषध चरेस ४५ किलोसहित २ जनालाई नियन्त्रणमा लिएको छ ।
मकवानपुर प्रहरीले थाहा नगरपालिका–८ आग्रा बस्ने ३० वर्षीय बिमल स्याङतान र भिमफेदी गाउँपालिका–१ किटनी बस्ने ३२ वर्षीय नवराज तामाङलाई उक्त परिणामको चरेशसहित नियन्त्रणमा लिएको हो ।
ईलाका प्रहरी कार्यालय भिमफेदी र प्रहरी चौकी भैसे मकवानपुरबाट खटिएको प्रहरी टोलीले पालुङबाट हेटौंडातर्फ आउदै गरेको ना.४ ख ६०९१ नम्बरको बसलाई जाँच गर्ने क्रममा बसमा सवार उनीहरूलाई उक्त परिमाणको लागूऔषधसहित नियन्त्रणमा लिइएको जिल्ला प्रहरी कार्यालय मकवानपुरले जनाएको छ ।
तामाङ र स्याङतानलाई नियन्त्रणमा लिएर मकवानपुर जिल्ला अदालतबाट ८ दिनको म्याद लिई थप अनुसन्धान भईरहेको प्रहरीले जनाएको छ ।
मकवानपुर । मकवानपुरको हेटौंडा उपमहानगरपालिका–९ स्थित सूर्यप्रसाद पौडेलको घरमा गोली प्रहार गरेर रकम माग्ने ३ जनालाई जिल्ला अदालत मकवानपुरले पुर्पक्षका लागि थुनामा पठाएको छ ।
हेटौंडा उपमहानगरपालिका–९ का ३३ वर्षीय निश्चल पौडेल, ३५ वर्षीय गणेश घले र ३० वर्षीय प्रितम क्षेत्रीलाई मकवानपुर जिल्ला अदालतले पुर्पक्षका लागि थुनामा राख्ने आदेश दिएको हो । मंसिर १९ गते राती गोली प्रहार गरी २० गते रकम माग्ने ३ जनालाई नै प्रहरीले पक्राउ गरी ९० दिनसम्म आवश्यक अनुसन्धान गरी अदालत पेश गरेको थियो । जिल्ला अदालतकी माननिय न्यायाधीश मन कुमारी जिएम विकको इजलाशमा अभियुक्तहरुलाई पूर्पक्षका लागि भीमफेदी जेल चलान गरिएको हो ।
गोली प्रहारपछि पक्राउ परेका अभियुक्तहरुले सूर्यप्रसाद पौडेलसँग एक करोड रुपैयाँ माग गरेका थिए । प्रहरीले निश्चलको साथबाट स्वचालित पेस्तोलसहित १९ थान गोली बरामद गरेको थियो । हेटौंडा उपमहानगरपालिका–९ मा घर भएपनि हेटौंडा उपमहानगरपालिका–४ मा पौडेल डेरा लिएर बसेका थिए ।
लागुऔषध समेतको कारोबार गर्ने तीन अभियुक्तको साथबाट प्रहरीले २ वटा मोटरसाइकल, २ ग्राम चार सय मिलीग्राम खैरो हिरोइन, लागुऔषध तौल गर्ने तराजु, ५ थान मोबाइल र ५० हजार रुपैयाँ नगद बरामद गरेको थियो । पक्राउ परेका तीन जनालाई प्रहरीले ज्यान मार्ने उद्योग, लागुऔषध र हातहतियारसम्बन्धी मुद्दा चलाएको छ ।
मकवानपुर । स्थानीय तहहरुमा बालबालिकाकाे सर्वाेत्तम हितकाे लागि कसरी काम गर्न सकिन्छ भन्ने सवाल अझै चुनाैतीपूर्ण रहेकाे पाइएकाे छ । स्थानीय तहहमा रहने बाल संरक्षण संयन्त्र नै आजसम्म अपूर्ण रहेकाे पाइएकाे छ ।
देशकाे ७५३ स्थानीय तहहरुमध्ये हालसम्म ३७३ स्थानीय तहहरुमा मात्रै बाल अधिकार संरक्षण तथा प्रवर्ध्दन सम्बन्धी कार्यविधि रहेकाे पाइएकाे छ । यसैगरी २०९ वटा स्थानीय तहहरुममा मात्रै स्थानीय बाल अधिकार समिति गठन भएका छन् । २९४ स्थानीय तहहरुमा मात्रै बाल कल्याण अधिकारी ताेकिएकाे छ । जुन अनिवार्य सवाल हाे । यसरी ताेकिएका बाल कल्याण अधिकारी पनि नियम अनुसार छुट्टै नियुक्त गर्नु पर्नेमा ९ वटा स्थानीय तहले मात्रै नयाँ नियुक्त गरेका छन् । अरुले भएकै कर्मचारीलाई थप जिम्मेवारी दिइएकाे अवस्था छ । यसरी जिम्मेवारी थप गरिएका कर्मचारीहरु मध्ये अधिकांशलाई याे जिम्मेवारि अन्तरगत के कस्ता काम कर्तव्य हुन् भन्ने जानकारी नै नभएकाे पाइएकाे छ । यस्तै देशभर २४६ वटा स्थानीय तहहरुमा मात्रै बाल काेषकाे स्थापना गरिएकाे छ ।
यसैबीच बागमती प्रदेशकाे सामाजिक विकास मन्त्री कुमारी माेक्तानले बालबालिकाकाे क्षेत्रमा काम गर्न अझै धेरै बाँकी स्वीकार गरेकी छिन् । बालबालिकामा गरिएकाे लगानी झ्वाट्टै नदेखिने भएकाेले उपलब्धी खाेज्न नमिल्ने तर आधारमा लगानी गर्दा मात्रै उपलब्धि हुने उनले बताएकी हुन् । प्रदेश सरकार यसतर्फ सचेत रहेकाे पनि उनले बताइन् ।
सामाजिक विकास मन्त्रालयकाे आयाेजनामा बुधबार हेटाैडामा आयाेजित बागमती प्रदेश-बालबालिकासम्बन्धी नीति २०८० को प्रबोधिकरण कार्यक्रममा उनले यस्ताे बताएकी हुन् । बालबालिकाकाे क्षेत्रमा कार्यरत गैरसरकारी संस्थादेखि सरकारी कार्यालयहरुकाे सहकार्य र समन्वयमा चुस्त रुपमा काम गर्नु पर्ने उनले बताइन् ।
कार्यक्रममा सामाजिक विकास मन्त्रालय बागमती प्रदेशका सचिब डा भीष्म कुमार भुसालले बालबालिकाको पहिचान खुल्ने कागजात निर्माणको लागि स्थानीय पन्जिकाधिकारीले सहजीकरण गर्नुपर्ने बताए । बालमैत्री स्थानीय शासनकाे सवाल चर्चामा रहदै गर्दा बालमैत्री अभिभावककाे सवाल पनि चासाे प्रकट गर्नु पर्ने उनले बताए । विपदमा सबैभन्दा बढी महिला र बालबालिका पीडित हुने गरेकोले स्थानीय तहले तिनै क्षेत्रबढी ध्यान दिनुपर्ने उनले बताए । ऐन कानून दस्तावेज अनुबन्धलाई भन्दा पनि प्रदेश सरकारले बनाएको नीतिमा टेकेर स्थानीय तहले नै काम नगरे सामाजिक न्याय संभव नहुने उनले बताए ।
बाल कल्याण समाज मकवानपुर हेटौंडाको समन्वयमा बागमती प्रदेश-बालबालिकासम्बन्धी नीति २०८० नीतिको प्रबोधिकरण कार्यक्रम हेटौंडामा भएको हाे। उक्त कार्यक्रम वर्ड भिजन इन्टरशनल नेपाल र बाल विकास समाजको सहयोग तथा सामाजिक विकास मन्त्रालय बागमती प्रदेशको आयोजनामा भएको थियो ।
कार्यक्रममा राष्ट्रिय बाल अधिकार परिषदका उपाध्यक्ष बम बहादुर बानीयाँ प्रदेशकाे विभिन्न जिल्लाका विभिन्न स्थानीय तहहरुका उप-प्रमुख, बालबालिका महाशाखा तथा शाखाका कर्मचारी, प्रदेशका विभिन्न मन्त्रालयहरु प्रतिनिधिहरु बालवालिका शाखामा कार्य गर्ने स्थानीय संघसस्था श्रम तथा रोजगार कार्यालयकाे सहभागिता रहेकाे प्रदेश बाल अधिकार समिती सदस्यहरु प्रकाश खतिवडाले बताए ।
कार्यक्रममा जिल्ला समन्वय समिति मकवानपुरका सभापति ललित घलान, राष्ट्रिय बाल अधिकार परिषदको सदस्य सुम्मा पोखरेल, परिषदको उपसमिति सदस्यहरु समाजिक विकास मन्त्रालयको महाशाखा प्रमुख राष्ट्रिय मानव अधिकार आयोग बागमती प्रदेश प्रमुख प्रदेश बाल अधिकार समिती सदस्य शान्ता बराल, झबिन्द्र ज्ञवालीको समेत उपस्थिति थियो ।
मकवानपुर । बुधबारकाे लागि बाेलाइएकाे बागमती प्रदेश सभा बैठक बस्दै नबसी स्थगीत गरिएकाे छ । करिव ५ महिना पछि मंगलबार बसेकाे बागमती प्रदेश सभा बैठक शाेक प्रस्ताव पारित गर्दै आज बुधबारसम्मकाे लागि स्थगित गरिएकाे थियाे ।
बुधबार बिहान साढे ११ बजे बस्ने भनिएको बागमती प्रदेशसभा बैठक दलहरुबिच सहमति जुट्न नसकेपछि सहमतिकाे प्रयासकाे लागि बिहीबार बिहान बस्ने गरी सूचना टाँस गरी स्थगित गरिएको छ ।
पूर्वसहमति अनुसार बजेट बाँडफाँट नभएको भन्दै प्रमुख प्रतिपक्ष दल एमालेसहितका विपक्षी दलले प्रदेशसभा बैठक अवरुद्ध गर्ने चेतावनी दिँदै आएका थिए । सोही विषयमा छलफल गर्न बुधबार आयोजित सर्वदलीय बैठकमा मुख्यमन्त्री शालिकराम जम्कट्टेल अनुपस्थित भएपछि विपक्षीले थप छलफल नै गर्न चाहेनन् । विपक्षी दलहरुले मुख्यमन्त्रीको अनुपस्थितिमा छलफल हुन नसक्ने बताएका हुन् ।
दलहरुबिच सहमति जुट्न नसकेका कारण विहीबार विहान साढे ११ बजे बैठक बस्ने प्रदेशसभा सचिवालयले जनाएको छ । गत असोज २२ गते संसद्को वर्षे (बजेट) अधिवेशन अन्त्य गरिएको करिब ५ महिनापछि हिउँदे अधिवेशन बसेको हो । गत माघ ८ गते बसेको मन्त्रिपरिषद् बैठकले संसद्को हिउँदे अधिवेशन आह्वान गर्ने निर्णयसहित प्रदेश प्रमुख समक्ष सिफारिस गरेकाे थियाे ।

मकवानपुर । बिद्युत पोलले ढलेर लाग्दा घाइते भएका मकवानपुर बकैयाका रामकुमार तितुङको मृत्यु भएको छ ।
४० बर्षीय तितुङ मकवानपुर जिल्ला बकैया गाउँपालिका वडा नं. ७ का वडा सदस्य हुन् ।
मंगलबार दिउँसो १:३० बजे मकवानपुर जिल्ला बकैया गाउंपालिका ७ मानदमार निवासी तितुङलाई आफ्नै घर अगाडी हिडिरहेको अवस्थामा एक्कासी बिजुलीको पोल ढलेर लागेको थियो । पोलमा करेन्ट नभएको प्रहरीले जनाएको छ ।
घाईते भएका उनको हेटौंडाको चुरेहिल अस्पताल पठाएकोमा थप उपचारको लागि चितवन मेडिकल कलेज भरतपुर लगिएको थियो । घटनाबारे थप अनुसन्धान भैरहेको जिल्ला प्रहरी कार्यालय मकवानपुरले जनाएको छ ।