मकवानपुर । लागूऔषध अफिमसहित २ जनालाई प्रहरी नियन्त्रणमा लिएको छ ।
शनिबार हेटौंडा १० को एक खाजा घरबाट थाहा नगरपालिका ८ का ५४ वर्षीय तेज बहादुर थिङ र ४३ वर्षीय शरण लामालाई २ किलो अफिमसहित नियन्त्रणमा लिइएको जिल्ला प्रहरी कार्यालय मकवानपुरले जनाएको छ । इलाका प्रहरी कार्यालय पशुपतिनगर र लागूऔषध नियन्त्रण ब्यूरो शाखा कार्यालय पर्साको संयुक्त टोलीले हेटौंडा १० स्थित खाजा घर भित्र बसिरहेका थिङ र हेटौडा २ डेरा गरि बस्ने लामालाई जाच गर्ने क्रममा शरण लामाले बोकेको झोलाबाट अफिम २ किलो फेला परेको प्रहरीले जनाएको छ ।
प्रहरीको अनुसार उक्त परिमाणको अफिमसहित दुबै जनालाई नियन्त्रणमा लिई थप अनुसन्धान भइरहेको छ ।
मकवानपुर । मकवानपुरकाे हेटौंडा ८ कमानेमा रहेकाे निलगिरी बाल समुहले रक्तदान कार्यक्रम आयोजना गरेकाे छ । कालिकामाई टोल विकास सस्थाको सहकार्य रहेकाे कार्यक्रममा ४१ जनाले रक्तदान गरेका छन्।
१८ वर्ष भन्दा कम उमेरको बालबालिकाकाे समूहले आयाेजना गरेकाे कार्यक्रममा ३१ जना पुरुष र १० जना महिलाले रक्तदान गरेका थिए ।
बालबालिकालाई सामाजिक कार्यमा सहभागी गराउने तथा हेटौंडामा रगत अभावको कारण काेहि पनि बिरामी जाेखिममा नपरून भने उदेश्यले रक्तदान कार्यक्रम गरिएकाे बाल समुह अध्यक्ष सिमोन भट्टराई बताए । यस्ता कार्यक्रमले समाजमा सकारात्मक सन्देश फैलने साथै र वडालाई बालमैत्री कायम गर्न सहयाेग पुग्ने उनले बताए ।
कार्यक्रमकाे हेटौंडा उपमहानगरपालिका प्रमुख मिना कुमारी लामा, उपप्रमुख राजेश बानियाँ, ८ नम्बर वडा अध्यक्ष रामकृष्ण थापा, जिल्ला रेडक्रस सोसाइटी मन्त्री सुमित्रा काफ्ले, कालिकामाई टोल विकास अध्यक्ष रामकृष्ण प्रसाद घिमिरे, वडा जनप्रतिनिधि, टोल विकास समन्वय समितिका बिष्णु अर्याल, बालमैत्री सहजकर्ता रोजिता दङ्गाल,टोल बिकास आमा समूह, निलगिरी बाल समूहका अभिभावक भिमसेन घिमिरेलगायतकाकाे कार्यक्रममा उपस्थिति रहेकाे थियाे ।
मकवानपुर । मकवानपुरकाे अग्रणी साहित्य संस्था साहित्य सङ्गम मकवानपुरले एउटै मञ्चमा ७ जनालाई सम्मान गरेको छ ।
सङ्गमद्वारा स्थापित विभिन्न सम्मान तथा पुरस्कार २०८० सालकाे लागि शनिबार उनिहरु सम्मानित भएका हुन् । सङ्गमको ३ सय ४१ औं साहित्य सन्ध्या तथा सम्मान समर्पण कार्यक्रममा प्रमुख अतिथि साहित्यकार निर्मोही ब्यासलगायतले ७ जना सर्जकलाई सम्मानित गरेका हुन्।
तत्कालीन जिल्ला विकास समिति मकवानपुर र साहित्य सङ्गम मकवानपुरद्वारा स्थापित १५ हजार ५ सय ५५ रुपैयाँ राशिको ‘मकवानपुर साहित्यश्री सम्मान २०८०’ बाट ईन्द्रजित शर्मा चौलागाईं सम्मानित भएका छन् । मकवानपुरे साहित्यकार शर्मा हास्य तथा टेलिश्रृङ्खलामा अभिनयमा समेत सक्रिय छन् । गत वर्ष उक्त सम्मानबाट शम्भु बास्काेटा सम्मानित भएका थिए ।
यसै गरी १५ हजार ५ सय ५५ रुपैया राशिको ‘भेषनाथ अधिकारी स्मृति छन्द सम्मान २०८०’ बाट धनकुटाकी स्रष्टा कल्पना काफ्ले सम्मानित भएकी छिन् । उक्त सम्मान मकवानपुरे साहित्य सर्जक विशाल अधिकारी आशुतोषले स्थापना गरेका हुन् । उक्त सम्मानबाट गत वर्ष सुदेश सत्याल सम्मानित भएका थिए ।
यस्तै १० हजार राशिको ‘विनोद-सुनिता सुवेदी साहित्य सम्मान २०८०’ बाट ललितपुरका स्रष्टा श्रीराम पाण्डे सम्मानित भए । उक्त सम्मान बालजागृति इङ्लिस सेकेण्डरी बोर्डिङ स्कुल हेटाैडाका प्रिन्सिपल विनोद सुवेदी तथा शिक्षक सुनिता सुवेदीले स्थापना गरेका हुन् । ‘सुभद्रादेवी-मदन मुडवरी स्मृति सम्मान २०८०’ बाट मकवानपुरका साहित्यकार विश्वनाथ सञ्जेल सम्मानित भएका छन् । १० हजार रुपैया राशिको उक्त सम्मान हेटौंडाका (हाल अमेरिका निवासी) दीपक मुडवरीले स्थापना गरेका हुन् । उक्त सम्मानबाट गत वर्ष पूर्णकला घिमिरे सम्मानित भएकी थिइन् ।
यसैगरी हेटौंडाका शिक्षासेवी देवप्रसाद श्रेष्ठले स्थापना गरेकाे १० हजार रुपैया राशिको ‘मङ्गलादेवी श्रेष्ठ नारी स्मृति सम्मान २०८०’ बाट मकवानपुरकी साहित्यकार भावना सापकोटा सम्मानित भएकी छिन् । सापकाेटा आँचल साहित्य कला पुञ्ज मकवानपुरकी अध्यक्ष हुन् । उक्त सम्मानबाट गत वर्ष साहित्यकार विना थिङ्ग सम्मानित भएकी थिइन् । यस्तै १० हजार राशिको ‘मुक्ति-तारा सम्मान २०८०’ बाट मकवानपुरे स्रष्टा सानुभाइ विश्वकर्मा सम्मानित भए । उक्त सम्मान हेटौंडाका साहित्यसेवी मुक्तिगोविन्द वैद्य र तारादेवी वैद्यले स्थापना गरेका हुन् । गत वर्ष उक्त सम्मानबाट साहित्यकार एसके निधन सम्मानित भएका थिए ।
हेटौंडाका साहित्यिक स्रष्टा, अधिवक्ता ऋषि केबी र शिक्षक पूण्यशिला श्रेष्ठले स्थापना गरेकाे १० हजार राशिको ‘रामहरि-देवु सम्मान २०८०’ बाट मकवानपुरका साहित्यकार किशन पौडेल सम्मानित भएका छन् । पौडेल लघुकथा चौतारी मकवानपुरका अध्यक्ष हुन् । गत वर्ष उक्त सम्मानबाट लेखक संघ मकवानपुरका अध्यक्ष छवि अनित्य सम्मानित भएका थिए ।
सङ्गम अध्यक्ष डीबी बर्तौलाकाे सभाध्यक्षता तथा साहित्यकार निर्मोही ब्यासकाे प्रमुख आथिथ्यतामा भएकाे कार्यक्रममा सम्मानित सातै जना स्रष्ट्राले मन्तव्यसहित आआफ्नाे रचना वाचन गरेका थिए । कार्यक्रमकाे सहजीकरण सङ्गम सचिव मनोज पोखरेलले गरेका थिए ।
२५ हजार राशिको निबन्ध पुरस्कार प्रदान गरिने
साहित्य सङ्गम मकवानपुरका संस्थापक केशव श्रेष्ठ ‘ज्योति’ द्वारा स्थापित साहित्य सङ्गम मकवानपुर कृति सम्मान २०७९ संस्थाको कार्यविधिअनुरुप प्रदान गरिने भएकाे छ । २५ हजार १ रुपैयाँ राशिको सो सम्मानकाेलागि सर्वोत्कृष्ट कृति छनौटकाे दर्ता आह्वान गरिएको संगम अध्यक्ष डीबी बर्तौलाले बताए ।
उक्त सम्मानकाे लागि २०७९ बैशाखदेखि चैत्र मसान्तसम्म प्रकाशन भएको निबन्ध विधाका मौलिक सङ्ग्रह पुरस्कार छनौट समितिलाई उपलब्ध गराउनु पर्ने तथा कृति अन्य कुनै पनि राष्ट्रिय पुरस्कारका लागि छनोट नभएको हुनुपर्ने बर्तौलाले जानकारी दिए । आगमी चैत्र २० गतेभित्र पुस्तक, श्रष्टाको नाम, ठेगाना, सम्पर्क नम्बर, प्रकाशित मिति समेत उल्लेख गरी छनोट समितिसमक्ष उपलब्ध गराउनु पर्ने उनले बताए ।
मकवानपुर । हेटौंडा बजार क्षेत्रमा खानेपानीको उपलब्धता पर्याप्त बन्दै गएको छ । पानी दिवसको अवसरमा हेटौंडा खानेपानी व्यवस्थापन बोर्डले शुक्रबारदेखि हेटौंडा बजार क्षेत्रमा वितरणका लागि दैनिक करिब ६० लाख लिटर खानेपानी थपिएको जनाएको छ ।
विश्व पानी दिवसको सन्दर्भ पारेर बोर्डले हेटौंडा उपमहानगरपालिका र गढीगाउँपालिकाको संगमस्थल सामरी खोला नजिकै निर्माण गरिएकाे हालसम्मकै ठूलो समवेल उद्घाटन गरिए पछि उक्त परिणाममा खानेपानी थपिएकाे हाे । उक्त समवेल निर्माण गरी दैनिक ६० लाख लिटर खानेपानी थप भएकाे बाेर्डले जनाएकाे छ ।
बोर्डले यसअघि हेटौंडामा दैनिक २ करोड ६२ लाख लिटर पानी वितरण गर्दै आएकोमा अब दैनिक ३ करोड २२ लाख लिटर पानी वितरण गर्नेछ ।बोर्डले हेटौंडामा २६ हजार नौसय धारामार्फत् पानी वितरण गरिरहेको छ । खानेपानी व्यवस्थापन बोर्डका अध्यक्ष प्रताप विष्टका अनुसार बोर्डको आफ्नै आन्तरिक आयबाट करिब २५ लाख रुपैयाँ लगानीमा उक्त समवेल निर्माण गरिएको हो । हेटौंडामा जनसंख्या बढ्दो अवस्थामा रहेपछि पिउने पानीको समस्या बढ्दै जांदा बोर्डले अब २४ सै घण्टा धारामा पानी उपलब्ध गराउन सक्ने गरि ठुलो परियोजना सुरु गरेको अध्यक्ष प्रताप विष्टले बताए ।
हेटौंडा उपमहानगरपालिकाकी मेयर मीनाकुमारी लामालगायतले समवेलको उद्घाटन गरेका हुन् । उद्घाटन कार्यक्रममा गढी गाउँपालिकाका प्रमुख दोर्जे लामा, हेटौंडाका उपमेयर राजेश बानियाँ, प्रमुख जिल्ला अधिकारी सूर्यप्रसाद सेढाईंलगायतको उपस्थिति रहेको थियो ।
बारा । जीतपुरसिमरा क्रिकेट कप प्रतियोगिताको उपाधिका लागि आज शनिबार मकवानपुर र पर्सा भिड्ने भएका छन् । समूह ‘बी’ को अन्तिम खेलमा शुक्रवार भैरहवालाई पराजित गर्दै मकवानपुर फाइनलमा प्रवेश गरेको हो ।
पर्सा समूह ‘ए’ को विजेता भइ फाइनल प्रवेश गरेकाे हाे । पर्साले आयोजक जीतपुरसिमरा स्पोर्टस् क्लब ७७ रन र कलैया क्रिकेट क्लबलाई पाँच विकेटले पराजित गरेको थियो । मकवानपुरले समूह चरणको पहिलो खेलमा जनकपुरमाथि ३१ रनको जीत निकालेको थियाे । मकवानपुरले दोस्रो जीत दर्ता गर्ने क्रममा खुकुरी क्रिकेट क्लब भैरहवालाई १५ रनले पराजित गरेको हो ।
टस हारेर व्याटिङको निम्तो पाएको मकवानपुरले निर्धारित २० ओभरमा ८ विकेट गुमाउँदै १४८ रन जोडेको थियो । मकवानपुरका लागि तक्षक सिम्ख्डाले ५४ रन बनाए । उनले २४ बलमा ६ छक्का र एक चौका प्रहार गरे । यसैगरी मकवानपुरका गौरव खड्काले २७, युविन बुढाथोकीले २१, बिशाल फुयालले १९ र सक्षम वस्ताकोटीले ११ रन बनाए । भैरहवाका रोशनलाल गुप्ताले चार ओभर बलिङ गर्दै ३१ रन खर्चिएर तीन विकेट लिए भने अजयकुमार चौहानले दुई र सन्तोष यादवले एक विकेट हात पारे ।
रनरेटका आधारमा फाइनलमा पुग्न मकवानपुरले दिएको १४९ रनको लक्ष्य १४।५ ओभरमै भेट्टाउनुपर्ने बाध्यताका साथ मैदानमा उत्रिएको भैरहवाले १९.३ ओभरमा सम्पूर्ण विकेट गुमाउँदै १३३ मात्र रन जोड्न सफल भयो । भैरहवाका रोशनलाल गुप्ताले २८, प्रज्वल थापाले २१, प्रकाश गिरी र अजय चौहानले समान १९ रन बनाए । मकवानपुरका सुवर्ण भट्टले तीन, पियुश शर्मा र बिशाल फुयालले समान २-२, समिर चौलागाई र अशिम श्रेष्ठले १-१ विकेट हात पारे ।
भैरहवाले १४.५ ओरभमा लक्ष्य प्राप्त गरेको भए रनरेटका आधारमा समूह विजेता बन्दै फाइनलमा प्रवेश गर्ने थियो भने १६ ओभरमा मकवानपुरलाई पराजित गरेको जनकपुर पेस फाउण्डेशन अन्तिम दुईमा प्रवेश गर्ने थियो । समूह ‘बी’ को यसअघिका खेलमा मकवानपुरले जनकपुरलाई ३१ रन र जनकपुरले भैरहवालाई ४८ रनले पराजित गर्दै समान २-२ अंक बटुलेका थिए । समूह ‘बी’ को अन्तिम खेलबाट फाइनल पुग्ने टोलीको टुङ्गो लागेको हो ।
खेलको प्लेयर अफ दि म्याच मकवानपुरका तक्षक सिम्ख्डा घोषित भए । उनलाई जीतपुरसिमरा उपमहानगरपालिकाका नगर उपप्रमुख भोलाप्रसाद अधिकारीले पुरस्कृत गरेका थिए । अभियान नेपालको आयोजना र जीतपुरसिमरा उपमहानगरपालिकाको सहयोगमा आयोजित प्रतियोगिताको प्रतियोगिताको विजेताले एक लाख र उपविजेताले ५० हजार नगद प्राप्त गर्नेछन् ।