मकवानपुर । मकवानपुरकाे साहित्यिक संस्था झरना साहित्यिक परिवार (झसाप) ले मोरङका मुक्तककार बाबुराम पोखरेललाई सम्मान गरेको छ । झरनाकाे ३ सय २ औं श्रृङ्खलामा शनिबार पोखरेललाई १५ हजार ५ सय ५५ राशीको ‘शिव-सावित्री अधिकारी स्मृति साहित्य सम्मान’द्वारा सम्मानित गरिएकाे हाे ।
यसैगरी झसापले यसअघि सार्वजनिक गरेका उत्कृष्ट १० मुक्तकारमध्ये ज्ञानदीप शिक्षा निकेतन माविकी छात्रा आकाङ्क्षा निरौला सर्वोत्कृष्ट भएकी छिन्हु । उनलाई ५ हजार ५ सय ५५ नगद राशिको ‘शिव-सावित्री मुक्तक पुरस्कार’ द्वारा सम्मानित गरिएकाे छ । दुवै पुरस्कारकाे स्थापना झसापका संस्थापक अध्यक्ष रमेशमोहन अधिकारीले गरेका हुन् ।
यस्तै टिकटमा मुक्तक कार्यक्रमअन्तर्गत डडेल्धुराकी पार्वती भट्ट, स्याङ्जाकी अमृता पोख्रेल, धादिङकी निर्मला स्नेहीका साथमा मकवानपुरका स्रष्टाहरू सानु खनाल र दीपक गौतमले ६/६ वटा मुक्तकहरू वाचन गरेका थिए ।

झसापका संस्थापक अध्यक्ष तथा पुरस्कार संस्थापक अधिकारीले कतिपय लेखकहरूले आर्थिक क्षमताका बाबजुद पनि धेरै स्रोतहरूबाट सङ्कलन गरी निकै दुख र कष्टका साथ पुस्तक प्रकाशन गर्ने गरेकाे बताए । ‘पुस्तक छापिइसकेपछि पुरस्कार दिनुभन्दा पान्डुलिपिमै पुरस्कार दिने परम्परा बसाउन सके पुस्तक प्रकाशन गर्नमा हौसला मिल्न सक्छ’ उनले भने ।
झसाप अध्यक्ष विश्वनाथ सञ्जेलको अध्यक्षतामा भएकाे साहित्य शृङ्खलामा बकैया गाउँपालिका अध्यक्ष धर्मराज लामिछाने प्रमुख आतिथ्यता रहेकाे थियाे । झसाप सचिव मसान उपासकले सहजीकरण गरेकाे कार्यक्रममा भावना सापकोटा, राजकुमार लामिछाने, सागर तिमल्सिना, डिबी बर्तौला, निमेष निखिल, रामकुमार एलन, सुबास सजल, छवि अनित्य, मञ्जु मैनाली, भवानी तिमल्सिना, दिनेश शर्मा लगायतका स्रष्टाकाे उपस्थिति रहेको थियो ।
मकवानपुर । मकवानपुरकाे हेटौंडा उपमहानगरपालिका वडा नम्बर–२ मा रहेको बालजागृति बोडिङ सेकेन्डरी स्कुलको लगानीमा निर्माण गरिएको म्युजिक भिडियो सार्वजनिक गरिएको छ । स्कुलमा अध्ययन गरेका विद्यार्थीले तयार गरेकाे ‘हे ज्ञान कि देवी’ गीतकाे म्यूजिक भिडियो शनिबार सार्वजनिक गरिएको हो ।
हेटौंडा उपमहानगरपालिका २ नम्वर वडाध्यक्ष विष्णुगोपाल महर्जनले उक्त म्यूजिक भिडियो सार्वजनिक गरेका हुन् । म्युजिक भिडियाे सार्वजनिक गर्दै महर्जनले बालजागृति स्कुल नगरभित्रकै पहिलो विद्यालय बनाउन आग्रह गरे । ‘हेटौंडाका १९ वटा वडामा रहेका मध्ये बालजागृति स्कुल अरु संस्थागत विद्यालयभन्दा अगाडि रहेको छ’ उनले भने –‘संस्थागत विद्यालयमा बालजागृति पहिलो बालमैत्री विद्यालय घोषणा भएको छ ।’ शैक्षिक उन्नयनको लागि २ नम्वर वडाले स्कुललाई सहयोग गर्ने प्रतिबद्धता समेत उनले व्यक्त गरे ।
कार्यक्रममा सर्जक सञ्जाल मकवानपुरका अध्यक्ष निमेष निखिलले बालजागृति विद्यालयले गुणस्तरीय शिक्षासँगै अतिरिक्त कार्यलाई पनि जोड दिँदै आइरहेको बताए । विद्यालयका प्रिन्सिपल विनोद सुवेदीले सोच र कलाको विकास गर्ने उद्देश्यले म्युजिक भिडियो सार्वजनिक गरेको बताए । ‘अहिलेका बालबालिका एटम बम हुन् । छोएकी पड्किहाल्छन्’ उनले भने ‘बालबालिकालाई सही दिशातर्फ लैजानको लागि अभिभावकले पनि मार्ग निर्देशन गर्नु पर्दछ ।’ विद्यार्थीको हितमा विद्यालयले नौलो कार्यक्रमहरू सञ्चालन गरिरहेको उनको भनाइ रहेको थियो । विद्यार्थीलाई एकाग्र बनाउने काम म्यूजिक भिडियोले खेल्ने विद्यालयका सहायक प्रिन्सिपल अमूल श्रेष्ठले बताए ।
मकवानपुरका गायिका सुनिता बुर्लाकोटी र गायक कृष्णगोपाल सिंहले गीत गाएर सहभागीलाई मनोरञ्जन प्रदान गरेका थिए । स्कुलका १, २ र ३ कक्षामा अध्ययनरत विद्यार्थीले कार्यक्रममा बालगीत पनि प्रस्तुत गरेका थिए । कार्यक्रममा हेटौंडा उपमहानगरपालिका २ नम्वर वडा सदस्य इन्द्र प्रसाद रिजाल, हेटौंडा उपमहानगरपालिका शिक्षा अधिकृत रमेश बिडारी, पिएम संगीत सेन्टरका सञ्चालक प्रवेन्द्र महर्जन, संगीतकार पूर्णविक्रम अधिकारीलगायतको आतिथ्यता रहेको थियो ।
चितवन । नेपाल पत्रकार महासङ्घ चितवन शाखाले ४३ जना पत्रकारलाई शनिबार सम्मानित गरेकाे छ । २०५६ सालभन्दा अगाडि नेपाल पत्रकार महासंघकाे सदस्यता लिएर क्रियाशील एवं पूर्वअध्यक्ष गरी ३४ जना पत्रकारलाई सम्मानित गरेकाे हाे भने विभिन्न विधामा ९ जना पत्रकारलाई पुरस्कृत गरेकाे हो ।
पत्रकार महासङ्घमा आबद्ध भएर पत्रकारिता क्षेत्रमा पु¥याएको योगदानको कदर गर्दै ३४ जना पत्रकारलाई सम्मानित गरिएकाे पत्रकार महासङ्घ चितवन सचिव दीपेन्द्र अधिकारीले जानकारी दिए । अधिकारीका अनुसार क्रियाशील पत्रकारलाई हौसला प्रदान गर्न १० हजारदेखि ५१ हजार रुपैयासम्मको पत्रकारिता पुरस्कारबाट ९ जना पत्रकारलाई पुरस्कृत गरिएको छ ।
शनिबार भरतपुरमा आयोजना गरिएको कार्यक्रमा भरतपुर महानरपालिका प्रमुख रेनु दाहाल, नेपाल पत्रकार महासङ्घका केन्द्रीय अध्यक्ष विपुल पोखरेललगायतले उनीहरुलाई सम्मानित गरेका हुन् । महासङ्घले स्थापना गरेको ५१ हजार १११ रुपैयाँको मैयादेवी पत्रकारिता पुरस्कार–२०८० बाट सृजना अर्याल, ५० हजार ५१ रुपैयाँको अनन्त गङ्गा पत्रकारिता पुरस्कार–२०८० बाट चाँदनी हमाल पुरस्कृत भएका छन् । त्यस्तै, ११ हजार ३११ रुपैयाँको तिलचन साँखी पत्रकारिता पुरस्कारबाट ३ जना पत्रकारलाई पुरस्कृत गरिएको छ । यो पुरस्कार शालिग्राम नेपाल, विमल खतिवडा र टीकादत्त तिमिल्सिनालाई प्रदान गरिएको अधिकारीले बताए ।
त्यसैगरी, औद्योगिक पत्रकारिता पुरस्कारबाट २ जना पत्रकार पुरस्कृत भएका छन् । ११ हजार १११ रुपैयाँको यस पुरस्कारबाट सन्तकुमार चौधरी र हीरालाल गुरुङ पुरस्कृत भएका उनले जानकारी दिए । त्यस्तै ११ हजार १११ रुपैयाँ राशिको बालकुमारी विष्णुकुमारी अभ्युदय पत्रकारिता पुरस्कारबाट केशु लामिछाने र १० हजार १११ रुपैयाँ राशिको श्रुजश्री मैयादेवी पत्रकारिता पुरस्कारबाट प्रतिमा कुमाल सम्मानित भएका छन् ।
सम्मान एवम् पुरस्कार वितरण कार्यक्रममा भरतपुर महानगरपालिका प्रमुख रेनु दाहालले अग्रज पत्रकारहरुले पु¥याएको योगदानको स्मरण गर्दै उनीहरुलाई सम्मान गर्नु ऐतिहासिक काम भएको बताइन् । दाहालले पत्रकारहरुलाई सत्य र तथ्यमा आधारित खोजमूलक पत्रकारिता गर्न आग्रह गर्दै पत्रकारहरुले गलत हुन नदिन खबरदारी गर्नुपर्ने धारणा राखिन् । पत्रकारहरुबाट महानगरपालिकाका काम कारबाहीप्रति सचेत बनाउने र खबरदारी गर्ने काम भइरहेको भन्दै उनले आफू सधैँ स्वतन्त्र प्रेसको पक्षमा रहेको बताइन् ।
भरतपुर महानगरपालिकाले पत्रकार तथा सम्बद्ध सङ्घसंस्थालाई विभिन्न पक्षबाट सहयोग गर्दै आइरहेको भन्दै पत्रकार सक्षम भएमा देश समृद्ध हुने उनले बताइन् । पछिल्लो समय समाज नकारात्मकतातर्फ उन्मुख भइरहेको भन्दै दाहालले समाजमा केही हुन सकेन भन्ने भाष्य स्थापित गर्न खोजिएको बताइन् । समाजमा भ्रम छर्नेहरुको विरुद्धमा पत्रकारहरुले यथार्थ विषयवस्तु बाहिर ल्याउन मद्दत गर्नुपर्ने दाहालको भनाइ छ ।
नेपाल पत्रकार महासङ्घका केन्द्रीय अध्यक्ष विपुल पोखरेलले पत्रकारिता क्षेत्रको विश्वनियता वृद्धि गर्न पत्रकारहरुनै लाग्नुपर्ने बताए । प्रेस स्वतन्त्रता हननका घटनाहरुमा कमी नआएको भन्दै यसतर्फ राज्य र सम्बद्ध सबै पक्ष सजक हुनुपर्नेमा पोखरेलले ध्यानाकर्षण गराए । नेपालमा विभिन्न समयमा भएका घटनाहरु अध्ययन गर्दा अझै पनि पत्रकारिता क्षेत्रमा खतरा देखिएको पोखरेलको भनाइ छ ।
कार्यक्रममा नेपाल प्रेस युनियनका पूर्व वरिष्ठ केन्द्रीय उपाध्यक्ष दीपक आचार्य, नेपाल पत्रकार महासङ्घ चितवनका पूर्वअध्यक्ष जनक अर्याल, नेपाली कांग्रेस चितवनका सभापति राजेश्वर खनाल, नेकपा (एमाले) चितवनका अध्यक्ष रामप्रसाद न्यौपाने, नेकपा माओवादी केन्द्र चितवनका सचिव द्रोणबाबु सिवाकोटी, राष्ट्रिय स्वतन्त्र पार्टी चितवनका सभापति कृष्ण भुसाल, नेकपा (एकीकृत समाजवादी) पार्टी चितवनका अध्यक्ष कृष्णराज न्यौपाने, नेपाल प्रेस युनियन चितवनका अध्यक्ष अनिल ढकाल, प्रेस चौतारी नेपाल चितवनका अध्यक्ष सुवाष पण्डित, प्रेस सेन्टर चितवनका अध्यक्ष सूर्यप्रसाद पाठक, समाजवादी प्रेस सङ्गठन चितवनका अध्यक्ष टीकादत्त तिमिल्सिनालगायतले मन्तव्य व्यक्त गरेका थिए ।
कार्यक्रममा नेपाल पत्रकार महासङ्घले प्रकाशन गर्दै आएको स्मारिका ‘पत्रकारिता चितवन’ र सम्मानित ३४ जना पत्रकारहरुको जीवनवृत्त (प्रोफाइल) समावेश गरेर प्रकाशन गरिएको ‘योगदान’ पुस्तकसमेत सार्वजनिक गरिएको थियो । नेपाल पत्रकार महासङ्घ चितवनका अध्यक्ष नारायणप्रसाद अधिकारीको अध्यक्षतामा कार्यक्रम भएकाे हाे ।
मकवानपुर । मकवानपुरकाे हेटौंडा उपमहानगरपालिका १९ मा बस्तीपुरमा सात दिने उद्यमशिलता तथा सिप विकास तालिम सुरु भएको छ। प्रदेश युवा परिषद बागमतीको आर्थिक सहयोग र हेडम्वा डेभलवमेन्ट एडभाजर फाउन्डेशनको आयोजनामा शनिबारबाट सुरु भएकाे तालिम ७ दिन सम्म सञ्चालन हुनेछ ।
तालिममा नव उद्यमीहरूका लागि व्यवसायिक योजना, व्यवसाय गर्दा ध्यान दिनुपर्ने क्षेत्रहरू, व्यवसायमा जोखिम तथा जोखिम व्यवस्थापन, व्यवसाय दर्ता प्रक्रिया तथा सरकारी नीतिनियम, र थोरै लगानीमा गर्न सकिने साना व्यवसायहरू जस्तै चटपटे, पानीपुरी, मम र आलुचप लगायतका विषयमा प्रशिक्षण दिने कार्यक्रम रहेको छ। यस तालिममा मनहरी, पदमपोखरी, बस्तीपुर, हाडीखोला र बसामाडीका २० जना युवाहरूको सहभागिता रहेको छ।
प्रदेश युवा परिषद बागमतीका कार्यकारी अध्यक्ष सन्तोष चौलागाईले थोरै लगानी गरेर साना व्यवसाय गर्न खोजिरहेको नव उद्यमीहरुका लागि लक्षित गरि सञ्चालन गरिएकाे बताए । मेहनत गर्ने सोचका साथ उद्यम सुरु गरेमा सफल भइने भन्दै चौलागाईंले मेहनतीकालागि उद्यमको सम्भावना रहेकोले युवालाई उद्यम सुरु गर्न आग्रह गरे । फाउन्डेशनका अध्यक्ष अनन्त कुमार बानियाले यस्ता तालिमले युवाहरूलाई व्यवसायिक जीवनमा प्रवेश गर्न सहज हुने बताए ।
बाँनियाकाे अध्यक्षता तथा चौलागाईंकाे प्रमुख आतिथ्यतामा भएकाे तालिम उद्घाटनमा टोल बिकास सस्था नगर समन्वय समितिका सदस्य अन्जु पण्डित, जनजागरण दुद्य उत्पादन सहकारी संस्थाका अध्यक्ष देवेन्द्र अर्याल, निर्मल बहुमुखी क्याम्पसका स्ववियु सभापती सरोज अर्याल लगायतकाे सहभागिता रहेकाे थियाे ।
मकवानपुर । बागमती प्रदेशकाे चितवन, रसुवा र दोलखा जिल्लामा ४ जनाको मृत्यु भएको छ । ति जिल्लामा पछिल्लो २४ घण्टामा विभिन्न घटनामा परेर ४ जनाको मृत्यु भएको बागमती प्रदेश प्रहरी कार्यालय हेटौडाले जनाएको छ ।
प्रदेश प्रहरी कार्यालयका अनुसार दोलखाको कालिञ्चोक गाउँपालिकामा शुक्रबार भएको सवारी दुर्घटनामा परेर १ जना महिलाको मृत्यु भएको छ ।कालिञ्चोक गाउँपालिकाको पुस्टियाङबाट सिंगटीनर्फ आउँदै गरेको लु ३ त १७१४ नम्बरको ट्रयाक्टर दुर्घटना हुँदा कालिञ्चाेक २ बाबरे बस्ने ३६ वर्षीय सञ्चीमाया थामीको घटनास्थलमै मृत्यु भएको हो भने ४ जना घाइते भएका प्रदेश प्रहरीले जनाएकाे छ । ट्याक्टर चालक अबराम थामीलाई प्रहरीले नियन्त्रणमा लिएको छ ।
त्यस्तै रसुवाको गोसाईकुण्ड गाउँपालिकामा बेहोस अवस्थामा भेटिएका एक विदेशी नागरिकको मृत्यु भएको छ । लाङटाङ घुमेर फर्किने क्रममा बेहोस भएका उनलाई काठमाडौंस्थित मेडिसिटी अस्पतालमा पुर्याएलगत्तै डाक्टरले मृत घोषणा गरेका हुन् । उनको नाम, थर र देश खुलिनसकेको प्रदेश प्रहरी कार्यालयले जानकारी दिएकाे छ ।
यसैगरी चितवनको भरतपुर महानगरपालिका ३ मा १ जना व्यक्तिको मृत्यु भएको छ । सडकमा मागेर खाई हिँड्ने गरेका ती पुरुष बिरामी भएपछि उपचारका लागि भरतपुर अस्पतालमा पुर्याइएको थियो । उपचारकै क्रममा उनको शुक्रबार मृत्यु भएको प्रदेश प्रहरीकाे भनाई छ । प्रहरीका अनुसार उनको शव भरतपुर अस्पतालमै रहेको र नाम, थर र ठेगाना खुलेको छैन । चितवनकै भरतपुर महानगरपालिका १६ स्थित नारायणी नदी किनारमा स्थानीय लिला परियार मृत फेला परेका छन् । मंगलबारदेखि बेपत्ता भएका उनी शुक्रबार नदी किनारमा मृत फेला परेका हुन् । घटनाबारे अनुसन्धान भैरहेको प्रहरीले जनाएको छ ।
शुक्रबार नै मदन भण्डारी राजमार्ग अन्तरगत हेटौडा– सिन्धुली खण्डका भएको सवारी दुर्घटनामा ४ जना घाइते भएका छन् । हेटौंडाबाट सिन्धुलीतर्फ जाँदै गरेको बा १२ च ६४७४ नम्बरको कार र विपरित दिशाबाट आउँदै गरेको स ९ प ३५२१ नम्बरको मोटरसाइकल एकआपसमा ठक्कर खाँदा कार चालक ईश्वर पौडेलसहित ३ जना घाइते भएका हुन् । चालक पौडेललाई उपचारपश्चात प्रहरीले नियन्त्रणमा लिएको छ ।
भरतपुरको जेष्ठ नागरिक चोकमा शुक्रबार भएको सवारी दुर्घटनामा २ जना घाइते भएका छन् । भरतपुर महानगरपालिका १० मा चौबिसकोठीबाट मालपोततर्फ जाँदै गरेको बा १६ च ७०६८ नम्बरको कार र ना ४१ प ६५९२ नम्बरको स्कुटर ठक्कर खाँदा २ जना घाइते भएका हुन् ।