मकवानपुर । हेटौडा उपमहानगरपालिकाको वडा नं. ७ लाई बालमैत्री स्थानीय शासनयुक्त वडा घोषणा हुने भएकाे छ । आगामी १ भाद्र शनिबार औपचारिक रूपमा वडालाई बालमैत्री घोषणा गरिने मंगलबार पत्रकार भेटघाट गरी जानकारी दिइएकाे हाे ।
‘बालबालिकामा लगानी, सुनिश्चित भविष्यको थालनी’ भन्ने मुल नाराको साथ बालमैत्री नगर वडा घोषणाकाे चरणमा रहेकाेले वडालाई बालमैत्री वडा घोषणा गर्न लागिएको हेटौंडा–७ का वडाध्यक्ष दामोदर गौतमले जानकारी दिए ।
बालमैत्री वडा घोषणाकाे लागि वडाध्यक्ष गौतमको संयोजकत्वमा मूल समारोह समिति गठन गरिएको छ । उक्त समितिले घोषणाका लागि आवश्यक सम्पूर्ण तयारी पूरा गरेकाे बताइएकाे छ ।
गौतमका अनुसार, बालमैत्री स्थानीय शासन वडा घोषणा गर्नका लागि पूरा गर्नुपर्ने ५१ वटा सुुचकमध्ये ४६ वटा सुचकहरु पूर्ण रुपमा, १ वटा सुचक ९८ प्रतिशत, १ वटा सुचक ८५ प्रतिशत, १ वटा सुचक ९५ प्रतिशत, १ वटा सुचक ९९ प्रतिशत र १ वटा सुचक ९९.७३ प्रतिशतसम्म हासिल गरेकाे छ ।
वडामा १८ वर्षमुनिका १,८९८ बालबालिका रहेका छन्। १० वटा बाल समूह र एक वडास्तरीय बाल सञ्जाल गठन गरिएको छ । जसमा २५० जना बालबालिका आबद्ध छन्। विभिन्न संरचनागत समितिहरूमा समेत २६२ जना बालबालिकाको प्रत्यक्ष सहभागिता रहेको छ।
वडाले बालबालिकाको विकासका लागि विभिन्न कार्यक्रमहरू सञ्चालन गरेको छ। दुई विद्यालयमा बाल विकास केन्द्र सञ्चालनमा छन् भने विद्यालयहरूमा छात्र-छात्राका लागि अलग-अलग शौचालय, सेनेटरी प्याड वितरण, र खेलकुद सामग्री वितरण गरिएको छ।
वडाध्यक्ष गौतमले बालबालिका भविष्यका कर्णधार मात्र नभई वर्तमानका साझेदारको रूपमा विकास गर्न प्रयत्नशील रहेको बताए। उनले बालमैत्री वडा घोषणापछि पनि यसको दिगोपनाका लागि निरन्तर काम गर्ने प्रतिबद्धता जनाएका छन्।
बालमैत्री वडा घोषणा कार्यक्रम हेटौंडा उपमहानगरपालिकाकी मेयर मीनाकुमारी लामाले गर्ने गौतमले जानकारी दिए । उक्त दिन स्थानीय सामुदायिक एवम् संस्थागत विद्यालयका विद्यार्थीहरु, विभिन्न टोलविकास संस्थाका सदस्यहरु, विभिन्न संघ–संस्थाको प्रतिनिधिहरुको सहभागितामा वडा कार्यालयको प्राङ्गनबाट प्रभातफेरी सहित वडा परिक्रमा गरिने र त्यसपछि औपचारिक कार्यक्रम हुने बताइएकाे बताए ।
हेटौडाकाे ७ नम्बर वडा नगरकाे तेस्रो बालमैत्री स्थानीय शासनयुक्त वडा हुने छ । यसअघि हेटौंडाकाे ८ र २ नम्बर वडालाई बालमैत्री स्थानीय शासनयुक्त वडा घोषणा गरिएकाे छ ।
मकवानपुर । बागमती प्रदेश उद्योग वाणिज्य भूमि तथा प्रशासन मन्त्री शुकमाया तामाङले उद्योग व्यवसायीको हकहितका लागि प्रदेश सरकार सधै सकारात्मक रहेको बताएकी छिन् ।
हेटौंडा उपमहानगरपालिकाले राजस्वमा एक्कसी वृद्धि गरेपछि आन्दोलनरत व्यवसायीसँगको भेटमा मन्त्री तामाङले यस्तो बताएकी हुन् । मंगलवार उद्योग वाणिज्य संघ मकवानपुरकाे ज्ञापनपत्र बुझ्दै मन्त्री तामाङले प्रदेश सरकार व्यवसायीहरुको पक्षमा रहेको बताएकी हुन् ।
मन्त्री तामाङले ब्यवसायीलाई मर्कामा पर्ने कुनै पनि काम नगर्ने समेत प्रतिवद्धता जनाईन् । “व्यवसायीहरुको हकहितका लागि मेरो सँधै समर्थन रहन्छ, व्यवसायीहरुको समस्यालाई समाधान गर्न संघसँग समन्वय गरेर सहजीकरण गर्नेछु” मन्त्री तामाङले भनिन् ।
‘व्यवसायीहरुले व्योहोर्नु परेका झण्झटीलो प्रणालीलाई पनि एकद्वार प्रणालीबाट लैजान प्रयास रहने उनले बताइन् । मन्त्री तामाङले व्यवसायीहरुलाई ढाँड सेक्नेगरी करबृद्धि नगर्न समेत स्थानीय तहलाई समेत आग्रह गरिन् ।
व्यवसायी, उद्यमी चरम मारमा रहेका बेला हेटौंडा उपमहानगरपालिकाले अस्वभाविक रुपमा राजश्वको दर वृद्धि गरेको भन्दै व्यवसायीहरू आन्दोलित छन् । संघको अगुवाईमा मकवानपुरका व्यवसायीले आन्दोलनको घोषणा समेत गरेका छन् । संघले नगर सरकार खोज्दै मैनबत्ति जुलुस, कार्यालयमा धर्नादेखि व्यवसाय नै बन्द गरेर चाँबी बुझाउनेसम्मको आन्दोलनका कार्यक्रम तय गरेको छ ।
असार ७ मा भएको उपमहानगरको १५ औं नगरसभाबाट राजस्व दरमा बृद्धि गर्ने निर्णय भएको थियो । उपमहानगरपालिकाले चालु आर्थिक वर्ष २०८१।०८२ को लागि घरबहालकरदेखि व्यवसाय करमा २० देखि १५० प्रतिशतसम्म राजश्व बृद्धि गरेको हो । व्यवसायीहरुले उपमहानगरपालिको उक्त निर्णयविरुद्ध यसअघि नै ध्यानाकर्षण गराएका थिए ।
उवासंघ मकवानपुरका अध्यक्ष कृष्ण गुप्ता अग्रवालको नेतृत्वमा ज्ञापन पत्र बुझाएको कार्यक्रममा निर्माण व्यवसायी संघ मकवानपुरका अध्यक्ष बाल गोपाल कँडेल , होटल एशोसिएसन मकवानपुरका अध्यक्ष दिलिश गोविन्द जोशी र उद्योग वाणिज्य महासंघ मकवानपुरका उपाध्यक्ष उज्वल चौलागाईं लगायतको उपस्थिती रहेको थियो ।
मकवानपुर । हेटौंडा उपमहानगरपालिकाले गरेको कर वृद्धिकाे विरोध गर्दै मकवानपुर उद्योग वाणिज्य संघले आन्दोलनको कार्यक्रम सार्वजिनक गरेको छ।
मउवासंघले बुधबार व्यवसायिक भेला एवं पत्रकार सम्मेलन गर्दै ५ दिने चरणवद्व आन्दोलनकाे कार्यक्रम सार्वजनिक गरेकाे हाे । संघ अध्यक्ष कृष्ण कुमार गुप्ताले लामो समयदेखि व्यवसाय गर्दै आएका व्यवसायीहरुका कारोवार शिथिलता आएकाे अवस्थामा करको दर बढाएकाेले आन्दाेलनकाे कार्यक्रम सार्वजनिक गरिएकाे बताए ।
व्यावसायमा आएकाे मन्दीका कारण व्यवसायीहरु निरास छन्,कोही व्यवसाय छाडेर पलायन भइसकेका छन् र कोही ऋणमा रहेकाे अवस्थामा करवृद्धि गरिएकाेले संघ आन्दाेलनमा उत्रिन बाध्य भएकाे उनले जानकारी दिए ।
बजारका कवल, सटरहरु खाली देखिन थालेको अवस्था र समग्रमा उद्योग/व्यवसाय धरासायी भएको अवस्थामा उपमहानगरपालिकाले करकाे दर बढाएकाे अवस्थामा भविष्यमा झन ठूलो आर्थिक संकटको सामना गर्नुपर्ने त हैन भन्ने पूर्व संकेतको संशय पैदा भएको उनले बताए ।
‘उपमहानगरपालिकाकाे राजश्व परामर्श समितिमा समेत विद्यमान आर्थिक प्रभावलाई मध्यनजर गरी चालु आर्थिक वर्ष २०८१/८२ मा पालिकाको राजश्व दर बृद्धि नगर्ने निर्णय गरेकाे थियाे’ उनले भने ‘समितिको निर्णयलाई बेवास्ता गर्दै नगरसभाबाट राजश्व दरमा अनाधिकृत रुपमा व्यापक बृद्धि गरि सर्वसाधारण, आम उपभोक्ता, घरधनी, निमार्ण व्यवसायी, होटल व्यवसायी, व्यापारी तथा सहकारीकर्मीहरुलाइ थप पीडित धरासयी बनाउन खोजेको छ ।’
संघकाे विज्ञप्तिमा भनिएकाे छ ‘विद्यमान आर्थिक निरासा र उद्योगी व्यवसायीहरुको पीडालाई मध्यनजर गर्दै हाल गरिएको उल्लेखित १५० प्रतिशतसम्मको अस्वभाविक बृद्धि समय सान्दर्भिक नभएको सवै क्षेत्रमा वडेको कर तत्काल घटाइ यथास्थितीमा कायम गर्न माग गरेको छ।’
हेटौडा उपमहानगरपालिका समक्ष पटक पटक लिखित मौखिक माग गरि एकपक्षीय रुपमा करको दर परिवर्तन नगरी यथास्थितीमा राख्न गरिएको माग सुनुवाइ नभएको कारणले आन्दोलनमा जान वाध्य भएको अध्यक्ष गुप्ताले जानकारी दिए ।
चरणवद्व आन्दोलनको आज पहिलो दिन २८ श्रावणमा बस्तुगत संघका अध्यक्षहरु तथा विभिन्न राजनीतिक दल निकटका व्यापार व्यवसाय संग सम्बन्धित भातृसंगठन, सहकारी संघ संस्थाका प्रतिनिधिहरुसँग आन्दोलनको विषयमा छलफल तथा पत्रकार सम्मेलन मार्फत कार्यक्रमको जानकारी दिएको थियो।
२९ श्रावणमा कर अवज्ञाको विषयमा आम सर्वसाधारणलाइ कर नतिर्नको आव्हान गर्दै माइकिङ्ग गर्ने तथा प्रचार प्रसार गर्ने गराउने र विभिन्न संघ संस्था, प्रदेश सरकार, राजनैतिक दलका प्रतिनिधी, प्रमुख जिल्ला अधिकारी मार्फत संघीय सरकारमा ज्ञापन पत्र बुझाउ तथा विभिन्न क्षेत्र संग अन्तर्कृया गरिने छ ।
३० श्रावणमा बुद्धचोक, मउवासंघ चोक लगायतका स्थानमा हस्ताक्षर संकलन, १ घन्टा हेटौडा उपमहानगरमा शान्तिपूर्ण धर्ना/विरोध स्वरुप विभिन स्थानमा कालो व्यानर राखी नगरले गरेको कर वृद्धिको विरोध गरिने भएकाे छ। यसैगरी श्रावण ३१ गते हेटौडा नगरपालिकामा २ घन्टा शान्तिपूर्ण धर्ना, व्यापार व्यवसायी विरोधी हेटौडा नगर सरकार खोज्दै मैनबत्ती जुलुस गरिने संघले प्रकाशित गरेकाे विज्ञप्तिमा उल्लेख छ।
श्रावण ३२ गते हेटौडा नगरमा विरोध याली सहित आआफ्नो व्यापार व्यवसाय स्व स्फुर्त बन्द गरि हेटौडा उपमहानगरमा चाबी बुझाउदै नगरपालिक परिषरमा कोण सभा गरि पहिलो चरणका कार्यक्रम समापन गरिने भएकाे छ ।
आन्दोलनका कार्यक्रमलाई व्यवस्थित र प्रभावकारी बनाउन हरेक दिन फरक फरक पदाधिकारीलाई संयोजक ताेकिएकाे संघले जनाएकाे छ । उपमहानगरलाई चावी हस्तान्तरण पश्चात नगरले गरेको विभिन्न कर वृद्धिको बिरोधमा सामुहिक मुद्दा दर्ता गराउने समेत बताइएकाे छ।
आइतबार भएको भेटमा बागमती प्रदेशका प्रदेश प्रमुख देवकोटालाई सुदूरपश्चिम प्रदेशका प्रदेश प्रमुख मियाँले बधाइ तथा सफल कार्यकालको शुभकामना दिनु भएको छ । सुदुरपश्चिमका स्थायीवासी देवकोटालाई १४ साउनमा संघीय सरकारको मन्त्री परिषदको बैठकले बागमती प्रदेशका प्रदेश प्रमुखको रुपमा सिफारिस गरेपछि १७ साउनमा राष्ट्रपतिसमक्ष सपथ लिएका थिए ।
सपथ लगतै १८ साउनमा बागमती प्रदेश कार्यालय हेटौंडामा एक समारोहबीच पदबहाली गरेका देवकोटा आइतबार गृहजिल्ला कैलाली पुगेका हुन् । प्रदेश प्रमुख नियुक्त भएपछि पहिलो पटक गृह जिल्ला पुगेका देवकोटालाई सुदुरपश्चिम प्रदेश प्रमुख कार्यालयका कर्मचारी तथा स्थानीयवासीहरुले समेत बधाइ दिएका थिए ।
भदौ ७ गतेबाट जिल्ला लिग फुटबल हुने
Tags: No Comments
मकवानपुर । मकवानपुरको हेटौंडामा आगामी ७ भदौबाट जिल्ला लिग फुटबल प्रतियोगिता हुने भएको छ । मकवानपुर जिल्ला फुटबल संघकाे आयोजनामा हुने प्रतियाेगितामा २८ वटा ए डिभिजन क्लबले सहभागिता जनाउने छन् ।
जिल्ला लिगको लागि जिल्ला फुटबल संघ ए डिभिजन लिग, २०८१ नियमावली सार्वजनिक गरेको छ । प्रतियोगिताको विजेता, उपविजेता टिमले नगद १ लाख र ५० हजारसहित प्राप्त गर्ने संघले जानकारी दिएकाे छ । विजेता टिमले प्रदेश लिग २०८१ को लागि छनौट हुनेछन् । प्रतियोगितामा सहभागी हुन सम्बन्धित क्लवले आर्थिक वर्ष २०७९/८० को करचुक्ता प्रमाणपत्र पेश गर्नुपर्ने संघले जनाएकाे छ ।
यसवर्षबाट जिल्ला लिगमा क्लवहरुको वरियताक्रम छुट्याइने संघले जनाएको छ । जसको लागि लिगमा सहभागी हुने २८ वटै क्लवलाई ४ समूहमा विभाजित गरिनेछ । हरेक समूहको शिर्ष ३ स्थानमा रहने क्लवहरु सिधै जिल्लाको ए डिभिजन क्लवमा छनौट हुनेछन् । हरेक समूहका चौथो र पाचौँ हुने ८ वटा क्लवहरु बी डिभिजन र छैठौ र सातौँ हुने ८ वटा क्लवहरु सी डिभिजन क्लवको सूचिमा पर्नेछन् ।
जिल्ला खुल्ला क्वालिफाइबाट आयका २ वटा क्लवहरुसहित १० वटा क्लवले आगामी जिल्ला लिग सी डिभिजन खेल्नेछन् । प्रतियोगिताको लागि ४ भदौसम्म टिम दर्ता गर्नु पर्ने संघले जनाएको छ । संघकाे आयोजनामा २०८० मा भएकाे जिल्ला लिग क्वालिफाईमा सहभागी खेलाडीले जिल्ला लिग प्रतियाेगितामा सहभागिता जनाउन पाउने छैनन् । यसैगरी २०८०/०८१ मा अन्य जिल्लामा लिग खेलेका मकवानपुरका खेलाडी तथा २०८० मा एन्फा ए,बी,सी लिग खेलेका खेलाडीले समेत प्रतियाेगितामा सहभागी हुन नपाउने नियम रहेकाे छ ।
यसअघि भएको जिल्ला लिगको उपाधि न्यु डाँफे युथ क्लबले जितको थियो भने हटिया स्र्पोटर्स एकेडेमी उपविजेता बनेको थियो। कोरोना संक्रमणको कारण २०७६ सालपछी जिल्ला लिग हुन सकेको थिएन ।
