देवकोटा स्मृति साहित्य सम्मान पोख्रेललाई प्रदान गरिने
Tags: No Comments
मकवानपुर । महाकवि लक्ष्मीप्रसाद देवकोटा स्मृति साहित्य सम्मान–२०८१ माधव पोख्रेललाई प्रदान गरिने भएको छ । साहित्य संगम मकवानपुर र युगप्रकाश क्लबले संयुक्त रुपमा प्रदान गर्ने उक्त पुरस्कार मकवानपरे साहित्यकार पोखरेललाई प्रदान गरिने भएकाे हाे ।
१० हजार रुपैया राशिको सम्मान पोख्रेललाई प्रदान गर्ने निर्णय गरेको संगमले आइतबार विज्ञप्ति प्रकाशित गरी जनाएको छ । संगमका अनुसार १५ कात्तिकमा महाकवि लक्ष्मीप्रसाद देवकोटाको जन्मजयन्तीका अवसरमा पोखरेललाई उक्त सम्मान प्रदान गरिने जनाएको छ ।
नेपाली साहित्यको उन्नयन र श्रीवृद्धिमा उल्लेखनीय योगदान पुर्याउने स्रष्टालाई हरेक वर्ष महाकवि लक्ष्मीप्रसाद देवकोटा स्मृति साहित्य सम्मान प्रदान गर्दै आएको संगमले जनाएकाे छ ।
हेटौँडा–४ निवासी पोख्रेल मातृभूमि साहित्य समाजका पूर्वअध्यक्ष हुन् । उनकाे नाटक ‘आकांक्षाको चिता’ (२०६९), कविता संग्रह ‘रित्तिएको गाउँ’ (२०७०) र नाटक ‘ऐनाभित्रको आकाश’ (२०७९) प्रकाशित छन् ।
मकवानपुर । बागमती प्रदेश लोक सेवा आयोगको अध्यक्षमा महेश्वर श्रेष्ठ नियुक्त भएका छन् । प्रदेश प्रमुख दिपक प्रसाद देवकोटाले आइतबार श्रेष्ठलाई आयोगकाे अध्यक्षमा नियुक्त गरेका हुन् ।
मुख्यमन्त्री बहादुर सिं लामा, सभामुख भुवनकुमार पाठक र विपक्षी दलका नेता शालिकराम जम्मकट्टेलकाे ३ सदस्यीय समितिले २१ असोजमा श्रेष्ठलाई लोक सेवा आयोगको अध्यक्ष नियुक्त गर्न सिफारिस गरिएकाे थियो । प्रदेश लोकसेवा आयोग ऐन २०७६ को दफा ३ को उपदफा (१) अनुसार गठित सिफारिस समितिको सिफारिसमा सोही ऐनकाे दफा ४ को उपदफा (२) बमोजिम श्रेष्ठलाई अध्यक्ष नियुक्त गरिएको प्रदेश प्रमुख कार्यालयले जानकारी दिएकाे हो ।
२ मंसिर २०७६ मा गठित आयोगको अध्यक्ष सुरेशमान श्रेष्ठ उमेर हदका कारण अध्यक्ष ३ चैत २०८० बाट पदमुक्त भएका थिए । पटक–पटक सरकार परिवर्तन र सत्तारुढ दलहरुबीच सहमति हुन नसक्दा ७ महिनादेखि आयोगको अध्यक्ष नियुक्त हुन सकेको थिएन ।
श्रेष्ठलाई आयोगको अध्यक्ष नियुक्त गर्न सिफारिस भएपछि आयोगका सदस्य सुदर्शन ढकालले पदबाट राजीनामा दिएका थिए । कनिष्ट व्यक्तिलाई अध्यक्ष नियुक्त गर्न सिफारिस गरिएकाे भन्दै ढकालले २ कार्तिकमा प्रदेश प्रमुख देवकोटा समक्ष राजीनामा दिएका थिए । ६ माघ २०७६ मा सदस्य नियुक्त भएका ढकालले ४ वर्ष ९ महिना काम गरेर राजीनामा दिएका हुन् ।
लाेक सेवा आयोगकाे अध्यक्षमा नियुक्त श्रेष्ठ नवलपरासी पूर्वको विनयी त्रिवेणी गाउँपालिका वडा नम्बर १ निवासी हुन् । लुम्बिनी प्रदेशको बुटवलस्थित स्वास्थ्य तालिम केन्द्रको निर्देशक पदमा कार्यरत श्रेष्ठ बिहीवार मात्रै सरकारी सेवाबाट अवकाश भएका थिए । उनी ११औं तह सहसचिव हुन् ।
यस अघि उनले तत्कालीन स्वास्थ्य तथा जनसंख्या राज्यमन्त्री उमेश श्रेष्ठको प्राविधिक सल्लाहकार पदमा रही काम गरिसकेका छन् । उनको शपथ कार्यक्रम सोमबार हुने बताइएकाे छ ।
मकवानपुर । हाल देशभर पश्चिमी वायुको प्रभाव रहनुका साथै स्थानीय वायुको पनि केही प्रभाव रहेको छ ।
जसको प्रभावले कोशी, मधेस, बागमती, गण्डकी, कर्णाली र सुदूरपश्चिम प्रदेशका केही भूभागमा आंशिक देखि साधरणतया बदली रही बाँकी भूभागमा आंशिक बदलीदेखि मौसम मुख्यतया सफा रहेको जल तथा मौसम विज्ञान विभागकाे मौसम पूर्वानुमान महाशाखाले जनाएकाे छ ।
हाल कोशी, मधेस, बागमती र कर्णाली प्रदेशको थोरै स्थानहरू तथा गण्डकी र सुदूरपश्चिम प्रदेशको पहाडी भूभागका एक–दुई स्थानमा चट्याङ्गसहित हल्कादेखि मध्यम वर्षाको भइरहेको छ ।
आज दिउँसो कोशी, मधेस, बागमती, गण्डकी र लुम्बिनी प्रदेश लगायत बाँकी प्रदेशको पहाडी भूभागमा आंशिक देखि साधरणतया बदली रही बाँकी भूभागमा आंशिक बदलीदेखि मौसम मुख्यतया सफा रहने छ । कोशी, मधेस, बागमती लगायत बाँकी पहाडी भूभागका थोरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ ।
आज राति कोशी, मधेस, बागमती, गण्डकी र लुम्बिनी प्रदेशका थोरै स्थानहरूमा चट्याङ्गसहित हल्कादेखि मध्यम वर्षाको सम्भावना रहेको छ ।
मकवानपुर । बागमती प्रदेश लोकसेवा आयोगका सदस्य सुदर्शन ढकालले राजीनामा दिएका छन् । प्रदेश प्रमुख दीपकप्रसाद देवकोटा समक्ष शुक्रवार ढकालले राजीनामा बुझाएका हुन् ।
प्रदेश लोकसेवा आयोग ऐन, २०७६ को दफा ६ (क) अनुसार ११ कार्तिकबाट लागू हुने गरी उनले राजीनामा बुझाएका हुन् ।प्रदेश सरकारले आफूभन्दा कनिष्ठलाई अध्यक्ष बनाउने तयारी गरेको भन्दै राजिनामा दिएको उनले बताए । प्रदेश सरकारले सहसचिव स्तरको व्यक्तिलाई प्रदेश लोकसेवा आयोगको अध्यक्ष बनाउन लागेकाे बताइएकाे छ ।
प्रदेशका मुख्यमन्त्री, प्रमुख प्रतिपक्षी दलका नेता र सभामुख सदस्य रहेको ३ सदस्यीय समितिले आयोगको अध्यक्ष नियुक्त गर्ने संवैधानिक प्रावधान रहेकाे छ । प्रदेश स्वास्थ्य निर्देशनालय हेटौंडाका पूर्व निर्देशक महेश्वर श्रेष्ठलाई आयोगको अध्यक्ष बनाउने तयारीमा प्रदेश सरकार रहेकाे बताइएकाे छ ।
मकवानपुर । हेटौंडा भिमफेदी-सिस्नेरी-काठमाडौ तथा हेटौंडा भिमफेदी-फाखेल-काठमाडौ सडक ३ दिन बन्द हुने भएको छ ।
मकवानपुरको ईन्द्रसरोवर गाउँपालिका वडा नम्बर २ सिमखोला स्थित बाटोको मर्मत तथा ह्युम पाइप हाल्ने काम भइ रहेकोले हेटौंडा-सिस्नेरी-काठमाडौ तथा फाखेल-काठमाडौ सडक ३ दिन बन्द हुने भएको हो ।
मर्मत गर्न ३ दिन लाग्ने भएकोले हेटौंडाबाट कुलेखानी फाखेल र सिस्नेरी हुँदै काठमाडौ जाने सडक बन्द हुने जिल्ला।प्रहरी कार्यालय मकवानपुरले जनाएको छ ।
प्रहरीका अनुसार उक्त मार्ग भएर काठमाडौबाट हेटौंडा आउने सवारी भने रोकिने छैन ।
उक्त मार्ग बन्द भएको समयमा हेटौंडा-भैसे-पालुङ हुँदै काठमाडौं र कान्तिलोकपथ राजमार्ग हेटौंडा ठिगन हुँदै काठमाडौ रुट प्रयोग गर्न समेत जिल्ला प्रहरी कार्यालय मकवानपुरले अनुरोध गरेको छ ।