मकवानपुर । समयमा उचित व्यवस्थापन नहुँदा हेटौंडा उपमहानगर–६ मा रहेको गौरिटार आइसोलेसनमा रहेका कोरोना संक्रमितहरु भोक भोकै बस्नु परेको छ ।
खाना दिन्छौ दिन्छौ भन्दै दिउँसो २ बजेसम्म खाजा र खानेकुरा नदिएको कोरोना संक्रमितहरुले गुनासो गरेका छन् । भोकले छटपटाएको बिरामीले भमिट गर्दा सम्म स्वास्थ्यकर्मीले वास्ता नगरेको आइसोलेशनमा बस्नेहरुले गुनासो गरेका छन् । कर्राको आइसोलेशनबाट बिरामी थपिएपछि स्वास्थ्यकर्मीहरुले झनै बिरामीको ख्याल गर्न नसकेको पाइएको छ ।
रंगशालाको ब्वाईज होस्टेलको रुपमा रहेको स्थानलाई कोरोना संक्रमण भएकाहरुलाई राख्न आइतबार पहिलो चोटि आइसोलेनको रुपमा सञ्चालन गरिएको हो, तर व्यवस्थापनमा कमजोरी हुँदा कोरोनासँग लडिरहेका संक्रमितहरुलाई दिनभर भोकै राखिएको छ । आइसोलेसनमा न्युनतम आधारभूत भौतिक तयारी समेत नगरी संक्रमितहरु राख्न थालेको संक्रमितको गुनासो छ ।
बाहिरी रुपमा आकर्षक भौतिक संरचना भएपनि आन्तरीक व्यवस्थापन नभएको उहाँहरुले बताउनु भयो । “बिहान देखि पानी खाएर बसिरहेका छौं, सोधपुछ गर्दा एकछिनमा आउँछ भनेर टार्ने गरिन्छ” एक जना संक्रमितले भन्नुभयो “२ बजेपछी दुईवटा जेरि र एउटा फुलौरा दिए ।” मदन भण्डारी स्वास्थ्य विज्ञान प्रतिष्ठान (हेटौंडा अस्पताल) अन्तर्गत रहेको आईसोलेसनले गम्भीर लापरबाही गरिरहेको छ ।
आइसोलेसनका व्यवस्थापन हेरिरहेका हेटौंडा अस्पताल विकास समितिका अध्यक्ष प्रकाश पौडेलले भान्छे नपाएर केहि समस्या भएको बताउनु भयो । उहाँले सकेसम्म काम गरिरहेको दाबी गर्दै नयाँ आइसोलेसनका लागि भान्छा र जनशक्ति नभएको तर चाँडै व्यवस्थापन गर्ने बताउनु भयो ।
३५ वटा वेड भएको हेटौंडाको श्रमिक माविमा बेडको अभाव भएपछि आइतबारबाट राष्ट्रिय खेलकुद प्रष्ठिान रङ्गशालामा रहेको हेस्टलमा आइसोलेशन तय गरिएको थियो ।
कोरोना संक्रमित लगातार थपिँदै गएपछि हेटौंडा उपमहानगरपालिका ६ गौरिटारमा रहेको केन्द्रीय खेलकुद प्रतिष्ठान (गौरिटार रंगशाला) क्षेत्रमा रहेको ब्वाइज होस्टललाई कोरोना आइसोलेसन वार्ड बनाइएको हो । व्यवस्थित आइसोलेसन बेडको अभाबका कारण कोरोना संक्रमण पुष्टि भएका बिरामिलाई होम आइसोलसनबाट निकाल्न हेटौंडामा व्यवस्थित आइसोलेसन वार्ड निर्माण गरिएको हो । यहाँ १ सय २० बेड क्षमताको आइसोलेसन वार्ड तयार भएसँगै कर्रामा रहेका र होम आइसोलेसनमा रहेका संक्रमितलाई गौरीटार लगिएको छ ।
३ तल्ले भवनमा सञ्चालनमा ल्याएको आइसोलेसनको तल्लो तल्लामा अस्पतालका कर्मचारी र उपचारको क्रममा खटिएका चिकित्सक सहितको टोली रहने व्यवस्था सहित वार्ड सञ्चालनमा ल्याएको कोबिड अस्पताल गौरीटारका इन्चार्ज डाक्टर सागर काफ्लेले बताउनु भयो । उहाँका अनुसार अहिले व्यवस्थित ढंगबाट काम गरीरहेका छौं, संक्रमितलाई सुबिधा पु¥याउने उद्देश्य सहित व्यवस्थापन मिलाइएको छ । अहिले कर्रामा बेड नभएर होम आइसोलेसनमा रहेका पेन्डिङ बसेका बिरामी र नयाँ थपिएका बिरामीलाई उपचारका लागि ल्याएको उहाँले जानकारी दिनुभयो ।
बेड अभाबका कारण होम आइसोलेसनमा रहेका बिरामीलाई उनीहरुको इच्छा अनुसार ल्याउने तयारी थालिएको छ । आउन चाहनेलाई ल्याउछौं अन्यथा घरमै न्युनतम मापदण्ड पुरा गरेर घरमै रहन चाहनेलाई चिकित्सकको सम्पर्कमा रहने गरी छोडिने डाक्टर काफ्लेले बताउँछन् । कर्राबाट २१ जना र थपिएका १२ जनालाई गौरीटार लगिएको छ । शनिबार लगिएका २१ जना मध्य होम आइसोलेसनमा रहेर उपचार गराइरहेका पनि रहेको उहाँले बताउनु भयो । शनिवार थपिएका २० जना मध्य १२ जना गौरीटार लगिएको छ ।
आइसोलेसन वार्डमा बेडको अभाब भएपछि ६० जना बिरामी घरमा रहेर उपचार गराईरहेका थिए । जिल्लामा १ सय ७५ जना कोरोना संक्रमितको संख्या पुग्दा हेटौंडामा मात्रै १ सय जना रहेका छन् । कर्रामा रहेको ३५ बेड क्षमताको आइसालेसनबाट बिरामी गौरीटार लगिएपछि केहि संख्यामा मात्र कर्रामा रहेको हेटौडा उपमहानगरपालिकाका सिनियर अहेब भोला चौलागाईले बताउनु भयो ।
शिक्षा मन्त्रालयले विद्यालयमा आइसोलेसन वार्ड नराख्न निर्देशन दिएपछि गौरिटार रंगशालाको भवनमा आइसोलेसन वार्ड सारिएको हो । कर्रामा पनि केहि समयमा लागि स्वाब संकलनका लागि आइसोलेसन वार्ड कायम राखिने बताइएको छ । कर्रामा ३५ बेड क्षमताको आइसोलेसन प्रदेश सरकार अन्तर्गत हेटौंडा अस्पतालले सञ्चालन गरेको हो ।
सिन्धुपाल्चोक / सिन्धुपाल्चोक जिल्लाको पहिरो प्रभावित क्षेत्रको बस्ती तत्काल स्थानान्तरण गरिने भएको छ । सिन्धुपाल्चोकका पहिरो पीडितहरुको लागि राहत सामग्री सहित शनिबार त्यहा पुग्नु भएको बागमती प्रदेशका मुख्यमन्त्री डोरमणि पौडेलले बस्ती स्थानान्तरण गरिने बताउनु भएको हो ।
सिन्धुपाल्चोकको जुगल गाउँपालिका–२ लिदिमा भएको पहिरो प्रभावितका लागि स्वास्थ्य सामग्री, राहत सामग्री तथा अत्यावश्यक सामग्री सहित मुख्यमन्त्री पौडेल त्यसतर्फ सिन्धुपाल्चोक पुग्नु भएको हो । स्थलगत निरीक्षणपछि सो क्षेत्रमा खानेपानीका पाइप, अस्थाई शौचालयका सामग्री, दैनिक उपभोग्य खाद्य सामग्रीको व्यवस्था गरिएको छ । हाल सो क्षेत्रमा नेपाल प्रहरी र ससस्त्र प्रहरी र स्थानीयले उद्वारका काम जारी राखेका थिए भने थप सहयोगका लागि नेपाली सेनको एउटा टुकडी हेलीकप्टरमार्फत सो क्षेत्रमा पु-याएको छ ।
मुख्यमन्त्री पौडेलले तत्काल अस्थाई बासस्थान राहत र क्षतिपूर्ति उपलब्ध गराउने बताउनुभयो । सो स्थान बस्तीको लागि उपयुक्त नभएको स्थानीयले मुख्यमन्त्रीलाई जानकारी गराएका छन् । मुख्यमन्त्री पौडेलले स्थानीयको मागअनुसार बस्ती स्थानान्तरण गरीने बताउनुभयो । सिन्धुपाल्चोकका बस्तीहरु नै मानिसको बसोबास गर्न नमिल्ने, असुरक्षित रहेको बताउनुभयो । यहाँका बस्ती स्थानान्तरणका लागि उपयुक्त जमिनको खोजी गरी सकेसम्म छिटो अगाडि बढाईने उहाँले बताउनु भयो ।
सुरक्षित ठाउँमा स्थानान्तरण गर्नुको अरु केहि विकल्प पनि नभएको उहाँले बताउनुभयो । ‘हामी स्थानान्तरण मात्र हैन, जिविको पार्जन गर्न रोजगारी हुने गरी स्थानान्तरण गर्नुपर्छ’ उहाँले भन्नुभयो । स्थानीयहरुलाई परेको विपत्तिमा सरकारले सहयोग गर्ने उहाँले प्रतिबद्धता जनाउनुभयो । उचित व्यवस्थापन गर्ने सरकारको दायित्व रहेकोले सकारले तत्काल काम थाल्ने उहाँले बताउनुभयो । हालसम्म पनि स्थानियहरु बेपत्ता रहेकोले उद्धार कार्य थप तिव्र बनाइएको पनि उहाँले जानकारी दिनुभायो ।
जिल्लाको पहिरो पीडित सबैको हितको लागि प्रदेशका मन्त्रीहरु, सांसद, जनप्रतिनिधिहरुलगायत अन्य सरोकारवालाहरुसँग प्राविधिकसहितको टोली राखेर छलफल गरेर निकास निकालिने मुख्यमन्त्री पौडेलले बताउनु भयो । शनिबार मुख्यमन्त्री पौडेलसहित उद्योग, पर्यटन, वन तथा वातावरण मन्त्री अरुण नेपाल, सामाजिक विकास मन्त्री युवराज दुलाल, पुर्वमन्त्री शेरबहादुर तामाङ, प्रदेशका अर्थ तथा विकास समिति शरेस नेपाल, प्रदेशका प्रमुख सचिव मानबहादुर विके, मध्यपृतनापति ताराध्वज पाण्डे, बागमती प्रदेश प्रहरी प्रमुख डिआईजी वसन्त लामाको टोली त्यसतर्फ गएको हो । सो क्षेत्रमा अहिले सय ७२ घर धुरी रहेका छन् भने ३६ घरमा पूर्णरुपमा क्षति भएको छ । हाल सम्म १६ जनाको शव फेला परिसकेको छ भने २३ जना अझै बेपत्ता रहेका छन् ।
हामी कति मानवीय….. ?
‘मेरो स्वास्थ राम्रो छ मलाई रुघा, खोकि, ज्वरो, घाटीँको पनि कुनै समस्या छैन् । खाना पनि स्वाद लिई लिई खाईरहेको छु । म सुरक्षित नै छु । मलाई माया गर्नुहुनेलाई धेरै धेरै धन्यवाद । गाली गर्नेलाई यति धेरै माया कि झ्याप्प अङगालो हाल्न मन छ । मेरो कुनै नियोचित योजना छैन र थिएन पनि कि सबलाई सार्दै हिंड्नु पर्छ भनेर । जुन दिनदेखि कन्ट्रयाक ट्रेसिङमा परे त्यस दिनदेखि कसैलाई छोएको पनि छैन सुरक्षित घर मै बसेको छु, कसैको घरभित्र पसेको पनि छैन ….।’
टोलका समान्य सरसफाईमा होस् वा महिलामाथि हुने हिंसा विरुद्धको अभियान, या कारागारमा कैदीबन्दीको जीवन बिताइरहेकाहरुको मावन अधिकारको अवस्था केलाउन होस् वा सामाजिक न्यायका खातिर मानवीयता प्रवर्ध्दनका लागि उभ्याइरहने, एउटा जोशिलो व्यक्ति, आफू खटेर अरुलाई प्रेरणा भर्ने आँट बोकेको सामाजिक व्यक्तित्व । जो सधैं समाजको भलाईको लागि खटिरह्यो, समाजलाई आफ्नो जीवन सम्झेर । उसले आफू कोरोना संक्रमित भएपछि फेसबुक वालमा लेखेको यो स्टाटस पढेर केही बेर सोचमग्न भएँ । आफूलाई नियाल्न मन लाग्यो । कहाँ छौ हामी कति मानवीय छौ हामी ?
स्टाटस थियाे एक जना सामाजिक अभियन्ता सर्मिला श्रेष्ठकाे । जो केही घण्टा अगाडि आफ्नो टोल सफाई तथा कोरोना संक्रमण रहित बनाउनको लागि नेतृत्व गर्दै थिइन्, समाजमा चेतनाको लागि उभिदै थिइन् । आफैंमा कोरोनाको आशंका समेत नगर्दै, शरिरमा कुनै लक्ष्यण बिना नै कोरोना पोजेटिभ देखिएपछि मन बाँधेर कोठामा बसिरहेकी छिन्, उनै बिरुद्ध किन खनिन्छ हाम्रो समाज ?
महामारी सुरु भएयता उनले हजारौंको लागि उद्वार राहतमा आफूलाई खटाइरहिन्, । ‘म सधैँ छिमेकीको सहयोगमा लागिरहेँ, आज मलाई कोरोना देखिएपछि छिमेकी नै गाली गर्न थाले, मनभरी पीडा छ’ उनले भनिन् ।
हेटौँडा–१० राममन्दिर निवासी अधिकारकर्मीमा कोरोना पुष्टि भएपछि संक्रमणले भन्दा सामाजिक व्यवहारले मन पोलेको छ उनको । हेटौँडा–१० स्थित बसपार्क प्रहरी चौकीमा कार्यरत प्रहरीलाई कोरोना देखिएपछि उनको स्वाब पनि परीक्षण गरिएको थियो । रिपोर्ट आयो पोजेटिभ । कोरोना संक्रमण पुष्टि भएपछि उनले छिमेकीबाट ‘गाउँ सखाप पार्न लागेको’ भन्दै अपशब्द बोलेको सुन्न प-यो ।
हेटौंडामा कोरोना महामारी भुसको आगो जसरी फैलदों छ, आज अपशब्द बोल्नेलाई भोली संक्रमणले नभेट्ला भन्ने छैन, तर हामी भित्रको मानवीयताको स्तर किन घर्किदो छ ? भनिन्छ नि अनिकालमा बिउ जोगाउनु, हुलमुलमा जिउ जोगाउनु । हामीले यो महामारीमा माया, प्रेम, हौसला बाँडेर जिउनु पर्छ न कि आपसमा रिस साँधेर । सामाजिक सद्भाव कायम राखेर हामी यो माहामारीमा आफू, आफ्नो समाज र देशवासीलाई बचाउँनु छ ।
कोहि पनि व्यक्ति चाहेर कुनै पनि रोगको संक्रमणमा आफूलाई धकेल्न चाहदैन । समय परिस्थितिले यो अवस्था आउन सक्ने कुरा हो, र संक्रमित हुनु कुनै अपराध गर्नु पनि होईन । त्यसैले दुर्व्यवहार गरेर जो कसैको पनि मनोबल गिराउने कार्य गर्नु मानवीय धर्म हैन । अफ्ठ्यारो पर्दा नै अन्यको सहयोगको अपेक्षा हुन्छ मान्छेलाई । यही अफ्ठ्यारो अवस्थामा आत्मबल गिराउने काम नगरौ ।
अनावश्यक रुपमा रिस पोखेर कसैले फाइदा हैन, हानि छ । धनि र सम्पन्न राष्ट्र नै कोरोना महामारीसँग परास्त भैसकेको यो अवस्थामा हामी आफ्नो घर परिवार र टोल भित्रै किन रुमलिन्छौ ? संक्रमित कमजोर हुँदै गएको अवस्थामा उ भित्र आत्मबल र साहस भर्नाले धेरै हदसम्म उपचारकै काम गर्ने स्वास्थ्यकर्मीहरुले बताइरहेको बेला, न्युनतम मानव अधिकारको समेत ख्याल नगरी निम्नस्तरको व्यवहार गरिनु कदापि हुदैन ।
समाजको भलाईको लागि लड्नेलाई समाजले मनोबल उचो गराइदिनतर्फ सोच्नु समाजको दायित्व हो । कोहि पनि व्यक्ति चाहेर कुनै पनि रोगको संक्रमणमा आफूलाई धकेल्न चाहदैन । समय परिस्थितिले यो अवस्था आउन सक्ने कुरा हो, र संक्रमित हुनु कुनै अपराध गर्नु पनि होईन । त्यसैले दुर्व्यवहार गरेर जो कसैको पनि मनोबल गिराउने कार्य गर्नु मानवीय धर्म हैन । अफ्ठ्यारो पर्दा नै अन्यको सहयोगको अपेक्षा हुन्छ मान्छेलाई । यही अफ्ठ्यारो अवस्थामा आत्मबल गिराउने काम नगरौ ।
र अन्तमा मकवानपुरमा कोरोना संक्रमणको रफ्तार बढ्दो रहेपनि नेतृत्वदायि निकायबाट खासै उल्लेख्य काम, योजनाहरु भएका छैनन् । संक्रमितलाई राख्ने आइसोलेशन कै अभाव छ । संक्रमितलाई घर घरमै आइसोलेशट गर्दा स्वास्थ्य सुरक्षाको मापदण्ड पुगे नपुगेको निगरानी हुन सक्ला र ?
सरकारले उपचार प्रणालीको उचित व्यवस्थापनमा ध्यान दिनुपर्छ । कस्तो बिरामीलाई कहाँ राखेर कसरी उपचार गर्ने स्पष्ट रणनीति र त्यही अनुसारको व्यवस्थापन गर्न सक्नुपर्छ। समूहगत संक्रमण व्यापक हुँदै गएमा त्यसको व्यवस्थापनको लागि प्रयाप्त पुर्वतयारी आवश्यक छ, जुन मकवानपुरमा पटक्कै छैन । कछुवाको गतिमा हुँदै गरेको सुरक्षा तयारीले खरायो गतिमा बढेको संक्रमणलाई थेग्न सक्ला र ?
आफूमा कोरोना संक्रमण भएको आशंकापछि पीसीआर जाँच गराउन जानेहरुलाई हेटौंडा अस्पतालले अनेक बाहानामा रगत पिसाबलगायतको रिपोर्ट अनिवार्य भन्दै झण्झटिलो बाटो देखाउने गरेको छ, जुन अनावश्यक हो । सरकारी तवरबाट कोरोना परीक्षणलाई फराकिलो दायरामा ल्याएर,समुदाय स्तरमा जाँच बढाउनु अनिवार्य छ । यो आपतकालिन अवस्याथामा आपसमा छुटेर, टुटेर हैन जुटेर सामना गर्न तर्फ लाग्नु सबैको हितमा छ । सचेत बन्दै, आफ्नो आनिबानिमा सुधार गरौं, सामाजिक सद्भाव कायम राख्दै कोरोनालाई परास्त गरौं ।
- सम्झना घिमिरे
मकवानपुर /मकवानपुर ग्याँस व्यवसायि संघले भोलि शनिबार देखि एक हप्ताको लागि खुद्र पसलबाट ग्याँस विक्री बन्द गर्ने भएको छ । यो हप्तासम्म सुरक्षाको उचित व्यवस्था गरी ग्यासँ विक्री डिलरहरुबट मात्र ग्याँस सिलिण्डर विक्री वितरण गर्ने भएको हाे ।
यस अघि डिलरहरुले सब डिलरहरुलाई ग्याँस वितरण गर्दै आएको तथा ग्राहकको घरघरमा होमडेलिभरी गर्दै आएकोमा अबकाे एक हप्तासम्मका लागि याे सेवा बन्द गर्दै डिलरबाट मात्र विक्री गरिने तयारी थालिएको ग्याँस व्यवसायी संघका जिल्ला अध्यक्ष दिलिश गोबिन्द जोशिले जानकारी गराउनुभयो । “मकवानपुर जिल्लामा कोरोना भाइरसको संक्रमण व्यापक रुपमा फैलिएको कारण व्यवसायिहरुले हालसम्म सब डिलर तथा खुद्रा पसलहरुबाट समेत विक्री वितरण गरिरहेको कार्यलाई तत्कालका लागि बन्द गर्ने निर्णय गरेको हो” उहाँले भन्नुभयो ।
अबको केही दिन उपभोक्ताहरुको मागलाई आवश्यकताका आधारमा उचित सुरक्षाको सम्पुर्ण मापदण्ड पुरा गरी आउने ग्राहकहरुलाई सेवा सहज रुपमा उपलब्ध गराउने संघका सचिव केशव मुडभरीले बताउनु भयो । मकवानपुर जिल्लामा खाना पकाउने ग्यासको डिलरहरु मात्रै ७२ वटा रहेका छन् । सामान्य अवस्थामा दैनिक १ हजार ३ सय ओटा सिलिण्डर विक्री हुने गरेकोमा लकडाउन तथा निषेधाज्ञाको समयमा घरायसी ग्राहकहरुबाट ग्याँसको माग बढ्ने गरेको तर बढी खपत हुने क्षेत्र होटलहरु बन्द भएको कारण खपत घटेको संघका सचिव मुडभरीले बताउनु भयो ।
“व्यवहार सुधाराैं कोरोना परास्त गराैं ”
Tags: No Comments
मकवानपुर / मकवानपुर जिल्लाको मनहरी गाउँपालिका भारत–काठमाडौं जोड्ने राजमार्गमा अवस्थित छ । बोर्डरमा रहेको यस गाउँपालिकामा चैतदेखि हालसम्म १२ जनालाई कारोना पुष्टि भएको थियो । हाल सबैजना स्वस्थ्य भएर घर फर्केका छन्, यद्यपि कोरोना संक्रमणको संभावना उच्च भएको भन्दै हाल यस गाउँपालिकाको मनहरी बजार र बजार क्षेत्रबाट ५० मिटर दाँयाबाँया निषेधाज्ञा जारी रहेको छ । यस गाउँपालिकाले कोरोना नियन्त्रणको लागि विगतदेखि हालसम्म गरिरहेको प्रयासबारे
प्रमुख कार्यकारी अधिकृत देबराज चौलागाईंसँग गरिएको कुराकानिको सार :
मनहरी गाउँपालिकामा कोरोनाको अवस्था के छ ?
चिनको बुहान शहरबाट गत डिसेम्बर महिनामा शुरुवात भएको कोरोना भाईरस (कोभिड–१९) ले यति बेला विश्व आक्रान्त बनिरहेको छ । महामारीको रुपमा देखापरेको यस रोगको संक्रमण ढिलो गरि भएतापनि हाम्रो मुलुकमा समेत प्रवेश गरिसकेको छ । शुरुमा भारत तथा तेस्रो मुलुकबाट रोजगारी गरि फर्किएका नेपाली दाजुभाई दिदिबहीनीहरुमा फाट्टफुट्ट देखापरेको यसको संक्रमण हाल मुलुकका केही शहरहरुमा समुदायस्तरमा प्रवेश गरेको छ ।
यस संक्रामक रोगको प्रकोपबाट हामी बाँच्नु र हाम्रालाई बचाउनु अहिलेको प्रमुख आवश्यकता हो । संघ, प्रदेश तथा स्थानीय सरकार आ–आफ्नो भूमिकामा लागीपरिरहेको यस जटिल अवस्थामा तीनै तहकै सरकार बिच अझ बढि समन्वय र सहकार्य अपरिहार्य देखिन्छ । जनताको नजिक भएको र प्रत्यक्षरुपमा संग्लन रहनुपर्ने जिम्मेवारीका कारणले स्थानीय सरकारहरु बढि जागरुक र संवेदनशिल बन्नु पर्दछ भन्ने मेरो ठम्याई छ ।
रोग लागेपछि उपचार गर्नु भन्दा पहिला रोग लाग्नै नदिन स्थानीय सरकारहरुको भूमिका महत्वपुर्ण हुन्छ । संक्रमण फैलिरहेको क्षेत्रबाट आएका आफ्ना नागरिकलाई सुरक्षित रुपमा क्वारेन्टाइन गर्ने, आवश्यकता अनुसार परीक्षण गराउने, संक्रमित व्यक्तिलाई आईसोलेशन गर्ने कार्य जति संवेदनशिल भएर गरिन्छ त्यति नै संक्रमणको जोखिम कम हुन जान्छ ।
यस गाउँपालिकाले महामारी नियन्त्रणको लागि के कस्ता प्रयास गर्दै आएको छ ?
यस कार्यमा स्थानीय सरकारहरु शुरुबाट नै सक्रिय रुपमा संग्लन हुनु परेको यथार्थ हाम्रो सामुन्ने छर्लङ्ग छदैछ । मनहरी गाँउपालिका क्षेत्रबाट भारत तथा तेस्रो मुलुकमा रोजगारीका लागी जाने व्यक्तिहरुको संख्या उल्लेख्य रहेको सन्दर्रभमा हामीले शुरुबाटै ९२०७६ चैत्रको अन्तिम हप्ता ० बाट त्यस्ता व्यक्तिहरुको तथ्याङ्क लिन शुरु ग-यौं ।
यहाँका ४६ हजार ८ सय ५३ कुल जनसंख्या मध्ये करिव ३ हजार जना रोजगारीका लागी भारत, तेस्रोमुलुक र देशकै अन्यत्र रहेको संन्र्दभमा हामीले सोही बमोजिम क्वारेन्टाइन निर्माण र सञ्चालनको लागी ५ वटा स्थलहरु छनौट गरी तयारी सुरु ग-यौं । क्वारेन्टाइन निर्माण र सञ्चालन, राहत वितरण, जनचेतना मुलक कार्यक्रम, फेवर ल्किनिक सञ्चालन, स्वास्थ्यकर्मी घरभेट कार्यक्रम सुरुदेखि हालसम्म निरन्तर चलिरहेकै छन् । स्थानीय विपद व्यवस्थापन समितिको नेतृत्वमा सुरक्षाकर्मी, राजनैतिकदलहरु, रेडक्रस,सञ्चारकर्मी, समाजसेवीहरु सबैको सहयोग र समर्थन प्राप्त भईरहेको छ । पालिकाले निर्माण गरेकाे क्वारेण्टाइनहरूमा हाम्रा जनप्रतिनिधि ज्यूहरूले नियमित रेखदेख तथा त्यहाँ रहनुभएकाहरूकाे आत्मबल बढाउनकाे लागि लागिपरिरहनुभयाे ।

क्वारेण्टाइनमा रहेकाहरूसँग भेटघाटपछि तस्विर खिचाउँदै गाउँपालिका उपाध्यक्षा मनिला विष्ट ।
मनहरी गाउँपालिकाले हालसम्म करिव ३ हजार २ सय घरपरिवारलाई बन्दाबन्दिका कारण परेको संकट टार्न राहत वितरण गरिसकेको छ । यसैगरी करिब २ सय ५० जना आफ्ना नागरिकलाई देशका अन्य शहरहरु तथा भारतीय सिमा नाकाबाट उद्वार गरेर ल्याई क्वारेण्टाइन गरेको, करिब ३ सय ५० व्यक्तिको पिसिआर परीक्षण गराएको तथा कोरोना पोजिटिभ देखिएका १२ जना लाई आईसोलेसन पठाईएको छ । पोजेटिभ देखिएका व्यक्तिहरु पनि हाल स्वस्थ भएर घर फर्किसकेका हुंदा हाल मनहरी गाउँपालिकामा सक्रिय सक्रमित रहेका छैनन ।

यस गाउँपालिकाका स्थानीयवासीसँग के अपेक्षा गरेको छ पालिकाले ?
यो सबै कार्यमा जनप्रतिनिधि, राजनैतिक दल, कर्मचारी, सञ्चारकर्मी तथा स्वास्थकर्मीको महत्वपुर्ण साथ र सहयोग प्राप्त भएको छ । नेपाल सरकारको नीति निर्देशन तथा प्रदेश सरकारको समन्वयमा हालसम्म यस मनहरी गाँउपालिकामा कोरोना सक्रमण नियन्त्रण मै रहेको देखिन्छ ।
तर दिनानुदिन यसको जोखिम बढ्दै गईरहेको सन्दर्भमा हामी आमनागरिकहरु पनि थप सचेत र अनुशासित हुनुपर्ने देखिन्छ । व्यक्ति–व्यक्ति बिचको सामाजिक दुरी कायम गर्ने, नियमित साबुन पानीले हात धुने वा सेनिटाईजर प्रयोग गर्ने, अत्यावश्यक काम बाहेक घर बाहीर ननिस्कने तथा निस्कनुपर्दा अनिवार्य रुपमा माक्सको प्रयोग गर्ने गरि हाम्रो ब्यवहार सुधार गर्नुपर्ने देखिन्छं ।
हालसम्म काेराेनाको प्रभावकारी उपचार पद्धति पत्ता नलागेको हुंदा यसको सक्रमण हुनबाट आफूलाई जोगाउनु नै एकमात्र उपाय हो । तसर्थ आफ्ना बानि व्यहोरालाई सुधार गरी आफू र आफ्नालाई बचाउदै कोरोनालाई परास्त गरौं भन्न चाहन्छु ।
केन्द्रीय सरकारबाट कस्तो सहयोग पाइरहनु भएको छ ?
केन्द्रीय सरकारले नीति नियम बनाउने, अफ्ठ्यारा परिस्थितीहरुमा स्थानीय तहहरुलाई हामीले गर्नुपर्ने कामहरुमा सहजिकरण गर्ने, नीति निमय अनुसार काम भएन नभएको अनुगमन गर्ने हो त्यो भैरहेको छ । केन्द्र सरकारको तर्फबाट हुनु पर्ने सहजिकरण भएको छ, हामीले गरेको हेस्टेमा हैंसे भएकै छ ।
कोरोना रोकथामको लागि केन्द्रीय सरकारले चाल्नु पर्ने कदमहरुमा यहाँको केही सुझाव छन् की ?
कोरोना संक्रमणको रफ्तार मकवानपुर जिल्लामा पनि पछिल्लो साता ह्वात्तै बढेको छ । हामी (मनहरीवासी) तराइ र काठमाडौं जोड्ने बोर्डरमा छौ । यहाँका होटल व्यवसायहरुलगायत विभिन्न उद्योगहरु सञ्चालित छन्, । त्यसैले गत सोमबार रातिबाट आगामी साउन ३२ गतेसम्मको लागि यस गाउँपालिकाको मनहरी बजार क्षेत्रमा पनि निषेधाज्ञा जारी गरिएको छ । यो निषेधाज्ञा मात्रै कोरोना रोकथामको उपाय हैन । केन्द्र सरकारसँग यस पालिकाको तर्फबाट एउटै अनुरोध यो छ कि : कोरोना संक्रमण जाँचको लागि पीसीआर परीक्षण बढाउँदै यसलाई सहज बनाउनु प-यो । केन्द्र सरकारले सर्वसाधारण जनताको लागि पनि पीसीआर जाँच गर्ने नीति नियम बनाइदिने हो भने कोरोना फैलने अवस्थामा नियन्त्रणमा ल्याउन सकिने थियो ।
अन्तमा
सबै गाउँपालिकावासीलाइ संयमित भएर, काेराेना विरूद्ध लाग्न अनुराेध गर्दछु । यस पालिकाकाे गतिविधि यहाँकाे सञ्चार माध्यममा स्थान दिनुभइ सचेतना अभिवृद्विमा साथ दिनुभएकाेमा यहाँकाे सञ्चार माध्यमलाइ पनि धेरै धेरै धन्यवाद छ ।