लैङ्गिक हिंसा विरुद्धको अभियानमा विभिन्न कार्यक्रम गरिने
Tags: 2 Comments
मकवानपुर / लैङ्गिक हिंसा विरुद्धको १६ दिने अभियान विभिन्न कार्यक्रम आयोजना गरेर मनाईने तयारी गरिएको छ ।
हरेक वर्ष २५ नोभेम्बरबाट १० डिसेम्बरसम्म १६ दिन मनाइने लैङ्गिक हिंसा विरुद्धको १६ दिने अभियानको तयारी सम्बन्धमा आज आइतबार जिल्ला समन्वय समिति र हेटौंडा उपमहानगरपालिकामा सरोकारवालाहरुको बैठकले विभिन्न निर्णय गरेको छ ।
आइतबार जिल्ला समन्वय समिति मकवानपुरमा लैङ्गिक हिंसा विरुद्धको १६ दिने अभियान मनाउने सन्दर्भमा बसेको बैठकमा जिल्लाका स्थानीय तहहरु र सरोकारवाला संघ संस्थाको सहभागितामा विभिन्न कार्यक्रम गर्ने तयारी गरिएको हो ।
जिल्ला समन्वय समिति मकवानपुरका प्रमुख रघुनाथ खुलालको अध्यक्षतामा बसेको बैठकले जिल्ला स्तरीय र स्थानीयतह स्तरमा विभिन्न कार्यक्रमको आयोजना गरेर दिवस मनाउने निर्णय गरेको छ । बैठकले प्रत्येक स्थानीयतहहरुमा सामाजिक दुरी कायम गरेर कम्तिमा एउटा कार्यक्रम सञ्चालन गर्ने र उक्त कार्यक्रममा सामाजिक संघ संस्थाहरुले सहभागिता जनाउने निर्णय गरेको जिसस प्रमुख खुलालले जानकारी दिए ।
“लैङ्गिक हिंसा अन्त्यको प्रतिवद्धता, व्यक्ति, समाज र सबैको ऐक्यवद्धता” भन्ने नाराका साथ यस वर्ष मनाउन लागिएको १६ दिने अभियानमा पहिलो दिन नोभेम्वर २५ तारिकमा जिल्ला स्तरिय स्कुटर -याली, सेतो रिवन वितरण एवम् दीप प्रज्वलन कार्यक्रम गरिने भएको छ । सोही दिन अभियानको नारा अंकित स्टिकरहरु वितरण कार्यक्रम पनि राखिएको हेटौंडा उपमहानगरपालिका उपप्रमुख मिना कुमारी लामाले बताइन् । नारा अंकित स्टिकरहरु नगरको सबै सरकारी तथा सामाजिक संघसंस्था, निजी तथा सार्वजनिक यातायातहरुमा टाँसेर जनचेतना अभिवृद्धिको लागि अभियान गर्न लागेको उपप्रमुख लामाले बताइन् । “कोरोना प्रकोपको अवस्था छ, तै पनि स्वास्थ्य सजकता अपनाउँदै विभिन्न कार्यक्रम गर्ने तयारी गरेका छौ” उपप्रमुख लामाले भनिन् ।
हेटौंडा उपमहानगरपालिका, मानव अधिकार संरक्षण तथा मानव वेचविखन बिरुद्धको सञ्जाल, जिल्ला समन्वय समिति, अन्तरपार्टी सञ्जाल, सञ्चारिका समूह तथा अन्य सरोकारवाला संघसंस्थाको सहभागीतामा अभियान अन्तरगत विभिन्न कार्यक्रम गरिने तयारी गरिएको सञ्जाल संयोजक आरती पाठकले बताइन् ।
अभियान अन्तरगत हेटौंडा उपमहानगरपालिकाले अपाङ्गता भएका २५ जनालाई निःशुल्क ह्वील चेयर वितरण गर्ने तयारी गरेको छ । यसैगरी अभियान अन्तरगत हिंसा बिरुद्ध रोड व्यानर तयार गरि १६ दिनसम्म व्यानर प्रदर्शन गर्ने, हिंसा बिरुद्ध साहित्यिक कार्यक्रम, रेडीयो संवाद, नगरको विभिन्न वडाहरुमा सचेतना कार्यक्रम तथा अन्तरक्रिया कार्यक्रम गर्ने तयारी भएको हेटौंडा उपमहानगरपालिका महिला विकास अधिकृत विष्णुकुमारी लामिछाने बताइन् ।
यसैगरी मकवानपुरबाट विगत ९ वर्षदेखि निरन्तर प्रकाशित सहीखबर साप्ताहिकले विगतको वर्षहरुमा जस्तै यसवर्ष पनि लैङ्गिक हिंसा विरुद्धको १६ दिने अभियान अन्तरगत रहेर समाचार, लेख, अन्तर्वाता तथा सचेतनामुलक जानकारीहरु समेटेर कम्तिमा १८ पृष्ठको लैङ्गिक हिंसा विरुद्ध १६ दिने अभियान विशेषाङ्क प्रकाशन गर्ने भएको छ ।
यस्तै जिससले अभियान अन्तरगत समिक्षा तथा अन्तरक्रिया कार्यक्रम सञ्चालन तयारी गरेको पुडासैनीले बताइन् । बैठकमा जिल्ला समन्वय अधिकारी आनन्दराज पोखरेल, मकवानपुरगढी गाउँपालिका उपाध्यक्ष हर्कमाया रुम्बा, भीमफेदी गाउँपालिका उपाध्यक्ष पार्बती रानालगायतले सामाजिक सचेतनाको पाटोलाई विशेष ध्यानमा राखेर अभियान जारी राख्नु पर्ने बताए ।

मकवानपुर । मकवानपुर प्रहरीले १ हजार २ सय नाइट्रोभेट ट्याब्लेट र ४ बोतल ओनरेक्ससहित १ जनालाइ पक्राउ गरेकाे छ ।
आइतबार १२ बजे पर्सा जिल्ला पेटर्वासुगौली गाँउपालिका वडा नं ३ सुनबर्सा बैरिया बस्ने वर्ष २४ को अनिल मुखियालाइ उक्त परिमाणकाे लागू औषध सहित पक्राउ गरिएकाे जिल्ला प्रहरी कार्यालयका प्रवक्ता प्रहरी नायव उपरीक्षक इन्द्र बहादुर रानाले बताए ।
हेटौंडा १० स्थित राम मन्दिर चोकको बाईपास रोडमा प्रहरी चौकी भुटनदेवीका प्रहरी हवल्दार डिल्लीराम शिवाकोटीको कमाण्डमा खटिएको प्रहरी चेकिङ टोलीले बिरगंजबाट नारायणघाट तर्फ आइरहेको ना ५ ख ५८६८ नंको बस रोकी चेकजाँच गर्दा मुखिया प्रकाउ परेका हुन् ।
मुखियाले आफ्नो झोलमा लुकाई ल्याएकाे लागू औषध नाइट्रोभेट १ हजार २ सय ट्याबलेट र लागू औषध ओनरेक्स १०० एमएलको ४ बोतल फेला परेकाले उनलाई पक्राउ गरी आवश्यक अनुसन्धान भइरहेको प्रवक्ता रानाले जानकारी दिए ।
मकवानपुर । बागमती प्रदेश अन्तर्गत कार्यरत प्रहरी कर्मचारी र प्रदेश प्रहरी प्रमुख बीच प्रत्यक्ष टेलीफोन संवाद कार्यक्रम आज आइतबारबाट सुरु गरिएकाे छ ।
प्रहरी कर्मचारीलाइ पेशागत रुपमा जिम्मेवार बनाउन तथा तोकिएको जिम्मेवारी उच्च मनोबलका साथ सम्पादन गर्ने वातावरण सृजना गर्ने उद्धेश्यले प्रदेश अन्तर्गत कार्यरत प्रहरी कर्मचारीहरुको गुनासोलाई सम्बोधन गर्न र उचित सुझावहरुलाई कार्यान्वयनमा ल्याउन प्रदेश प्रहरी प्रमुखसंग प्रत्यक्ष टेलीफोन संवाद कार्यक्रम संचालन गरिएको हाे ।
कार्यक्षेत्रमा खटिएका प्रहरी कर्मचारीहरुले आफुले भोगेका समस्या, चुनौती तथा पिरमर्का र गुनासोका साथै प्रहरी सेवालाई थप प्रभावकारी बनाउन राय सुझाव संकलन गरी उचित सम्बोधनको लागि प्रदेश प्रहरी प्रमुखसंग टेलीफोन संवाद कार्यक्रम संचालन गरिएकाे बागमती प्रदेश प्रहरी कार्यालयका प्रवक्ता प्रहरी बरिष्ठ उपरीक्षक सुदिप गिरीले जानकारी दिए। ‘प्रहरी कार्यालय सहयोगी देखी सिनियर प्रहरी अधिकृत सम्मका कर्मचारीहरुलाई निश्चित समय र बार निर्धारण गरी टेलिफोन संवाद कार्यक्रम संचालन गरिएकाे हाे’ गिरीले भने ‘कर्मचारीको क्षमता प्रर्दशनमा मनोबल वा मनस्थितीको प्रमुख भूमिका रहने भएकोले मनोबल वा मनस्थितीलाई सकारात्मक बनाउन समस्याकाे सम्बोधन गर्नु पर्ने देखिएकाेले प्रहरी कर्मचारीहरुले गुनासो व्यक्त गर्ने सहज पहुँच स्थापित गर्न कार्यक्रम संचालन गरिएकाे छ ।’
कार्यक्रमले प्रहरी कर्मचारीहरुको गुनासो वा समस्याको मात्र सम्बोधन नगरी कार्यरत प्रहरी कर्मचारीहरुको कार्य सम्पादनको अवस्थामा सुधारको लागि राय सुझाव समेत संकलन गरिने गिरीले जानकारी दिए । प्रहरी कर्मचारीले दैनिक भोगिरहेका समस्या तथा समाधानको लागि सुझाव समेत प्राप्त हुने भएकाले प्राप्त भएको गुनासो, सल्लाह र सुझाव मार्फत संगठन सुदृढीकरण तथा कार्य सम्पादनको प्रभावकारीतामा अभिबृद्धि गर्न सकिने गिरीले बताए ।
प्रहरी कार्यालय सहयाेगी देखी प्रहरी हबल्दारसम्मका कर्मचारीकाे हप्ताकाे शुक्रबार बिहान ९ बजेदेखी १० बजेसम्म, जुनियर प्रहरी अधिकृत कर्मचारीकाे हप्ताकाे मंगलबार बिहान ९ बजे देखि १० बजेसम्म र सिनियर प्रहरी अधिकृत कर्मचारीका जुनसुकै समयमा गुनासाे सुन्ने गरी व्यवस्था गरिएकाे छ ।
यस्तै बागमती प्रदेश प्रहरी कार्यालयले कार्तिक महिनाको “महिनाको सर्वोत्कृष्ट प्रदेश प्रहरी (Best province Police Of The Month)” घोषणा गरेकाे छ । जिल्ला प्रहरी कार्यालय मकवानपुरमा कार्यरत प्रहरी सहायक निरीक्षक शिवराज गुरुङ कार्तिक महिनाको सर्बोत्कृष्ट प्रहरी घोषणा भएका हुन ।

‘महिनाको उत्कृष्ट प्रहरी छनौट कार्यबिधी २०७७’ मा उल्लेखीत व्यवस्था अनुसार महिनाको सर्वोत्कृष्ट प्रदेश प्रहरी घोषणा गरिएको प्रदेश प्रहरी कार्यालयका प्रवक्ता सुदिप गिरीले बताए । प्रदेश तथा मातहतमा कार्यरत प्रहरी कर्मचारीहरुबाट सम्पादित कार्यको उचित मुल्याङकन गरी कार्यसम्पादनको स्तरमा प्रभावकारीता एवंम् थप हौसला प्रदान गर्ने उद्देश्यले महिनाकाे उत्कष्ट प्रहरी घोषणा गरिएको गिरीले जानकारी दिए । जिल्ला प्रहरी कार्यालय मकवानपुरमा कार्यरत प्रहरी सहायक निरीक्षक शिवराज गुरुङ कार्तिक महिनाको सर्बोत्कृष्ट प्रहरी घोषणा भएका हुन ।
मकवानपुर जिल्लामा भएका बिभिन्न घटनाहरुको अनुसन्धान, लागु औषधको बरामद तथा फरार प्रतिबादी पक्राउ गर्ने कार्यमा उत्कृष्ट कार्य सम्पादन गरेको सुचककाे आधारमा छनौट समितिले गुरुङलाइ सर्वोत्कृष्ट प्रदेश प्रहरी घोषणा गरी नगद पुरस्कार द्वारा पुरस्कृत गरिएको हाे । प्रहरी सहायक निरीक्षक गुरुङ सहित कार्तिक महिनामा उत्कृष्ट कार्य गर्ने १५ जना प्रहरी कर्मचारी पुरस्कृत भएकाे गिरीले जानकारी दिए ।
यसैगरी बागमती प्रदेश अन्तर्गत स्थानीय तहमा प्रहरी कर्मचारीहरुसंग सम्बन्धित गुनासो तथा सुझाव संकलनको राखिएकाे पेटीकामा कार्तिक महिनामा गुनासो तथा सुझाव संकलन गरीएको छ । प्रदेश अन्तर्गतका ३१ वटा स्थानीय तहमा राखिएकाे गुनासो तथा सुझाव संकलन पेटीमा आम नागरिकबाट प्राप्त भएका गुनासो तथा सुझाव संकलन गरि प्रदेश प्रहरी कार्यालय ल्याइएकाे प्रवक्ता गिरीले बताए ।
प्रदेश अन्तर्गतका चितवन जिल्लाको बिभिन्न स्थानीय तहबाट २ वटा र मकवानपुर, दोलखा, सिन्धुली जिल्लाकाे स्थानीय बाट १/१ वटा गरी कार्तिक महिनामा ५ वटा गुनासो तथा सुझाव प्राप्त भएका छन् ।
“गुनासो तथा सुझाव पेटीका संचालन सम्बन्धी योजना २०७७” अनुसार प्रत्येक महिनाको १ गते उजुरी पेटीका खोली प्राप्त भएका गुनासो तथा सल्लाह सुझाव प्रदेश प्रहरी कार्यालयमा ल्याउने गरिएकाे गिरीले जानकारी दिए । गत असोज महिनामा भने मकवानपुर र धादिङमा गरी ६ वटा गुनासो प्राप्त भएकोमा कार्यान्वयन समेत भइ सकेकाे गिरीले बताए ।
बागमती प्रदेश प्रहरी कार्यालयले प्रथम चरणमा सबै महानगरपालीका, उपमहानगरपालीका, नगरपालीका र सदरमुकाम रहेको गाउँपालीका गरी ३१ वटा स्थानीय तहमा गुनासो तथा सुझाव संकलन पेटीका राखीएको थियो । प्रहरी कार्यालयका साथै प्रहरी कर्मचारीहरुबाट सम्पादन भएका कामकारबाहीको सम्बन्धमा आम नागरिकबाट प्राप्त हुने सल्लाह, सुझावका साथै गुनासोलाई उचित सम्बोधन गरी प्राप्त सल्लाह सुझाव अनुरुप प्रहरी सेवालाई परिमार्जन गर्ने उद्देश्यले बागमती प्रदेश प्रहरी कार्यालय हेटौंडाले असोज १ गते स्थानीय तहसंगको सहकार्यमा गुनासो तथा सुझाव संकलन पेटीका राखेको थियो ।
दोस्रो चरणमा ६७ वटा गाउँपालीका र तेस्रो चरणमा प्रदेश भरीका ८७४ वटा वडा कार्यालयहरुमा समेत गुनासो तथा सुझाव संकलन पेटीका राखिने गिरीले बताए ।
मकवानपुर । पछिल्लो २४ घण्टामा थप २ हजार ३ सय २३ जना कोरोना संक्रमणमुक्त भएका छन्। योसँगै नेपालमा कोरोना संक्रमण भएर निको हुनेको संख्या हालसम्म १ लाख ९३ हजार ३ सय २५ पुगेको स्वास्थ्य तथा जनसंख्या मन्त्रालयले जानकारी दिएको छ । शुक्रबार नेपालमा कोरोना संक्रमणमुक्त हुनेको संख्या १ लाख ९१ हजार २ रहेको थियो।
नेपालमा पछिल्लो २४ घण्टामा थप ७ जनाको कोरोना भाइरसको संक्रमणका कारण मृत्यु भएको स्वास्थ्य तथा जनसंख्या मन्त्रालयले पुष्टि गरेको छ। योसँगै नेपालमा कोरोनाले ज्यान गुमाउनेको संख्या १ हजार ३ सय ५ पुगेको छ।
यस्तै पछिल्लो २४ घण्टामा थप १ हजार ६ सय ७४ जनामा कोरोना भाइरस संक्रमण पुष्टि भएको छ । देशभरका प्रयोगशालामा ८ हजार १ सय ४४ जनाकाे स्वाब नमुना परीक्षण गर्दा ६ सय ६१ जना महिला र १ हजार १३ जना पुरुषमा संक्रमण पुष्टि भएको मन्त्रालयले जनाएकाे हो । यससँगै कुल संक्रमितको संख्या २ लाख १८ हजार ६ सय ३९ पुगेको छ ।
हाल देशभर २४ हजार ९ जना काेराेनाका संक्रिय संक्रमित रहेका छन् । उनीहरुमध्ये १७ हजार २ सय ६ जना होम आइसोलेसनमा छन् भने ३ सय ३६ जनाको आईसीयू र ४७ जनाको भेन्टिलेटरमा उपचार भइरहेको स्वास्थ्य मन्त्रालयले जानकारी दिएकाे छ ।
कहाँ कति थपिए संक्रमित ?
स्वास्थ्य मन्त्रालयकाअनुसार काठमाडौं उपत्यकामा ८ सय ९९ जना काेराेना संक्रमित थपिएका छन् । उनीहरुमध्ये काठमाडौंमा ६ सय ८५ जना, ललितपुरमा १ सय ६५ र भक्तपुरका ४९ जना थपिएका हुन् । यससँगै काठमाडौंमा १० हजार १ सय १, भक्तपुरमा ७ सय ९६ र ललितपुरमा २ हजार १ सय १४ जना सक्रिय संक्रमित रहेका छन् ।
यस्तै कास्कीका ७५, चितवनका ६१, झापा र रुपन्देहीका ५७/५७ जना, काभ्रेका ५६, तनहुँका ४४, कैलालीका ४०, बाँकेका ३९, कपिलवस्तु र नवलपरासीका ३३/३३ जना, नवलपुरका २८, मकवानपुरका २५, पाल्पाका १९, धादिङका १८, बर्दियाका १७, धनुषाका ११, दाङका १०, गोरखाका ९ र नुवाकोटका ८ जनामा कोरोना संक्रमण पुष्टि भएको छ ।
यस्तै धनकुटा, सिराहा, सिन्धुपाल्चोक, बाग्लुङ, स्याङ्जा र रोल्पाका ७/७ जना, पर्वत, डडेलधुरा र बझाङका ६/६ जना, सुनसरी, बारा र लमजुङका ५/५ जना, इलाम, सर्लाही, रामेछाप, अर्घाखाँची, गुल्मी, दैलेख र सल्यानका ४/४ जना,महोत्तरी, दोलखा, म्याग्दी, प्युठान, अछाम र कञ्चनपुरका ३/३ जना, उदयपुर, सप्तरी र सिन्धुलीका २/२ जना तथा खोटाङ, भोजपुर, सोलुखुम्बु, रुकुम पूर्व, रुकुम पश्चिम, सुर्खेत, बाजुरा र बैतडीका १/१ जनामा पनि संक्रमण देखिएको मन्त्रालयले जनाएको छ ।
हाल मनाङ र मुगुमा १ जना पनि संक्रमित रहेका छैनन् । यस्तै हाल काठमाडौं उपत्यकासहित झापा, मोरङ, सुनसरी, चितवन, काभ्रे, कास्की, दाङ, रुपन्देही र कैलालीमा ५०० भन्दा बढी सक्रिय संक्रमित रहेका मन्त्रालयले जनाएकाे छ ।
मकवानपुर । छठ पर्वअन्तर्गत व्रतालुले शनिवार विहान देशभर विभिन्न पोखरी, नदी, इनार, कृतिम जलासयलगायतको पानीको स्रोत भएको ठाउँबाट उदाउँदो सूर्यलाई अर्घ दिएर यसपालीकाे छठकाे समापन गरेका छन् । कोरोनाको महामारीका कारण कतिपयले भने यसपालि घरको आँगन तथा खाली स्थानमा कृत्रिम जलाशय बनाएर सूर्यको पूजा आराधना गरेका छन् । कतिपय ठाउँमा भने जलाशयमा नै पुगेर सामूहिक रुपमा नै छठ पर्व मनाएका छन् ।
विशेषतः तराई समुदायको पर्वको रुपमा बुझ्दै आएतापनि पछिल्ला केही वर्षयता पहाडी समुदायको पनि उत्तिकै उपस्थिती देख्ने गरिन्छ यो पर्वमा । पहाडी समुदायले पनि छठ पूजालाई परम्पराकै रुपमा लिन थालेका छन् । यसैले पनि पछिल्लो समय सामाजिक सद्भाव अभिवृद्धि गर्ने पर्वको रुपमा मानिदै आएको छ छठ पर्वलाई । पहिला मिथिलाञ्चलमा मात्र सीमित रहेको छठ पर्व २०६२/०६३ को आन्दोलनपछि पहाडी क्षेत्र र अन्यत्र पनि लोकप्रिय हुँदै गएको छ । २०६४ सालमा छट पर्वकाे लागि काठमाडाैकाे रानीपाेखरी पहिलाे पटक खुला भएकाे थियाे । यस पटक काेराेना प्रभावकाे कारण पहाडी समुदायमा यसकाे राैनक कम देखिएकाे हाे ।

कोरोना भाइरस (कोभिड–१९) को प्रभावको कारण सागरमा भव्य व्यवस्थापनका साथ मनाइने छठ पूजा पनि प्रभावित भएको छ । मकवानपुर जिल्ला प्रशासनले सागरमा भिडभाड गरेर पूजामा सहभागी नहुनको लागि आग्रह गरेपछि पूजा व्यवस्थापन समितिले सागरमा कुनै तयारी गरेको थिएन । प्रतिघरबाट एक जना व्रतालु र एक जना सहयोगी मात्रै आफ्नै व्यवस्थापनमा सागर गएर छठकाे पूजा गरिएकाे छ । हेटाैडाकाे राप्ती तटमा व्रतालुहरूकाे उपस्थिति समेत न्यून देखिएकाे थियाे ।
सागरमा नपुगि छठ पूजाको अर्थ नै नहुने भएकाेले सामुहिक मनाउन नपाउने भए पछी कतिपय व्रतालुले अाफ्नै घरमा कृतिम जलाशयकाे सागर बनाइ पुजा गरेका छन् । शुक्रबार अस्ताउँदो सूर्यलाई अर्घ दिएपछि राति जलाशय, नदी, तलाउ–किनारमा अर्घ दिइएका सामग्रीहरू कतिपयले घरमै ल्याएर फेरि आज बिहान झिसमिसमै घाटमा पुर्याउने गर्छन् भने कतिपयले त्यहीँ राखेर रातभर नाचगान र रमाइलो गर्छन् । आज कात्तिक शुक्ल सप्तमी तिथिका दिन उदाउँदो सूर्यलाई अर्घ दिएपछि छठ पूजा समापन भएको मानिन्छ ।
छठ पर्वको मूल सन्देश भनेकै समन्वय, समावेशी र सादगीपन हो । छठ पर्व महिलाको अगुवाइमा समाज र परिवारको हितका लागि सङ्कल्प गरिन्छ, जो यसको महत्वपूर्ण पक्ष हो । अस्ताउने र उदाउने दुइटै सूर्यलाई अभिनन्दन गर्नुको अर्थ जीवनमा सुख, दुःख, रोदन र हाँसोलाई समानरूपमा र जीवनकै पाटोको रूपमा लिइनु हो । सूर्यको आराधनाबाट चर्मरोग निको हुनुका साथै सन्तान र धन प्राप्ति हुने जनविश्वास छ ।

मूल विधि चतुर्थीदेखि शुरू भई षष्ठीका दिन बेलुकी अस्ताउन लागेको र सप्तमीका दिन उदाउँदो सूर्यलाई अर्घ दिई पूजाअर्चना गरी यो पर्वको समापन गर्ने परम्परा रहेको छ । व्रतालुले पोखरी तथा वनाइएका कृतिम जलासयमा दुवै हत्केलामा पिठार र सिन्दूर लगाई अक्षता, फूल लिई आफ्नो खेतबारीमा उत्पादन भएका सामग्री र घरमा बनाइएको विशेष प्रकारको पकवान सूर्यलाई अर्घ अर्पण गरेका थिए । अर्धमा ठकुवा, कसार, केरा, उखु, मेवा मिष्ठान, गेँडागुडी र विभिन्न वनस्पति, भुसवा, माटोको हात्ती, सूप, कनसुपती, कलशसहितको घैँटो सूर्यलाई अर्पण गर्ने चलन रहेको छ ।
छठमा धनी, गरिब, कथित तल्ला र माथिल्ला जाति एकै ठाउँमा उपस्थित भई पूजा गरिने भएकाेले सबै समान हुने सन्देश दिन्छ । आफ्नै गाउँघरका खेतबारीमा उब्जने कृषि उत्पादनलाई प्रयोग गर्नु यो पर्वको थप मौलिक विशेषता हो । कोरोना सङ्क्रमण त्रासको कारण भीडभाड हुने भएकाेले पाेखरी जलासय वा तलावमा जम्मा भएर छठ नमनाउन प्रशासनले अाग्रह गरेकाे भए पनि भए पनि तराइका जिल्लामा सिङ्गारिएका पोखरी र तलाउमा नवबस्त्रमा सजिएका श्रद्धालुको भीड पनि दर्शनीय रहेको थियो । प्रायः छठका व्रतालुहरू घरमै अस्थायी सागर बनाएर सुर्यकाे उपासना गरी पर्व मनाएका थिए ।
कोरोना महामारीका कारण यसपालि पोहोर परारको जस्तो रौनक नभए पनि व्रतालुले विधि पूर्वक पूजा आराधना गरेका छन् । सहरी क्षेत्रमा सामूहिक रुपमा छठ मनाउनेहरुले केही स्वास्थ्य सुरक्षाका मापदण्ड पालना गरे पनि ग्रामिण क्षेत्रमा मापदण्ड पालना भएको छैन ।