मकवानपुर/कोरोना भाइरस (कोभिड–१९) विरुद्धको खोप आज विहीबार नेपाल ल्याइदै छ ।
बागमती प्रदेशको राजधानी हेटौंडाबाट मकवानपुर, चितवन र सिन्धुली तथा प्रदेश २ का ६ वटा जिल्लामा खोप वितरण गरिने छ । खोपको भण्डारण व्यवस्था सबै जिल्लामा नभएकोले हेटौंडा भण्डारणबाट खोप व्यवस्थापन हुने विभागले जनाएको छ ।
हेटौंडामा २ हजार २ सय ५० लिटर भण्डारण क्षमताको चिस्यान भएकाेले साेही मात्रामा भण्डारण गरिनेछ । बागमतीका अन्य १० जिल्लाका लागि भने काठमाडौंको भण्डारणबाट खोप पठाइनेछ ।
प्रदेश १ को विराटनगरस्थित भण्डारमा पठाइएको खोप प्रदेशका सबै जिल्लाका साथै प्रदेश २ को सप्तरी र सिरहामा पनि वितरण गर्नुपर्ने हुन्छ । विभागका अनुसार भ्याक्सिन चिस्यान भण्डारण विराटनगरमा ९ हजार ७ सय लिटर क्षमताको छ । प्रदेश २ मा भण्डार छैन ।
कर्णालीमा पनि आफ्नै चिस्यानयुक्त भण्डारण छैन तर विगतदेखि नेपालगन्जबाट वितरण
गरिँदै आएको छ । नेपालगन्जमा ७ हजार ५ सय लिटर क्षमताको भण्डार छ । गण्डकी प्रदेशको पोखरामा ९ हजार ७ सय भण्डारण क्षमता छ । यहींबाट प्रदेशका सबै जिल्लामा खोप पठाइनेछ । लुम्बिनी प्रदेशको बुटवलमा ११ हजार २ सय लिटर खोप भण्डारण क्षमता छ । त्यहींबाट जिल्ला अस्पतालहरूमा खोप पठाइनेछ। सुदूरपश्चिम प्रदेशको धनगढीमा ९ हजार ७ सय लिटरको भण्डारण क्षमतारहेको विभागले जनाएको छ ।
नेपाल सरकारले सरकारले भारतद्वारा उपलब्ध गराएको खोप पाँच दिनभित्र देशको सबै जिल्लाका भण्डारणसम्म पु-याइसक्ने योजना बनाएको छ । खोप लगाउने दिन भने अझै तय हुन सकेको छैन । ‘कानुनी, प्रशासनिक, आर्थिक र प्राविधिक प्रक्रिया पूरा गरेर खोप लगाउनका लागि सम्पूर्ण तयारी सम्पन्न भएको छ,’ स्वास्थ्यमन्त्री हृदयेश त्रिपाठीले भने, ‘प्राथमिकतामा स्वास्थ्यकर्मी, सरसफाइकर्मी, एम्बुलेन्स चालक, शव व्यवस्थापनमा खटिनेहरू छन्। ‘स्वयंसेविकालाई पनि स्वास्थ्यकर्मीसँगै पहिलो चरणमै खोप लगाइने मन्त्रालयले जनाएको छ । देशभरि ५२ हजार महिला स्वयंसेविकासहित करिब ३ लाख स्वास्थ्यकर्मी रहेको मन्त्रालयको दाबी छ ।
आज विहीबार बिहान ११ः४५ बजे एयर इन्डियाबाट आइपुग्ने खोप त्रिभुवन विमानस्थलबाट सिधै टेकुस्थित केन्द्रीय खोप भण्डारणमा लगिने छ । भारतीय राजदूत विनयमोहन क्वात्राले विमानस्थलबाटै स्वास्थ्य मन्त्रालयलाई खोप हस्तान्तरण गर्ने कार्यक्रम रहेको छ । विमानस्थलबाट टेकुको केन्द्रीय खोप भण्डारणसम्म लैजान तापक्रम कायम गर्न मिल्ने उपकरण जडान गरिएको दुईवटा ट्रक तयारी अवस्थामा राखिएको छ ।
‘कुन प्रदेशमा कति खोप पठाउने भन्ने विवरण तयार भएको छैन’ स्वास्थ्य सेवा विभागका एक कर्मचारीले भने, ‘बिहीबार जिल्ला पठाउने विवरण तयार भयो भने शुक्रबार बिहान खोप प्रदेशको भण्डारण स्थलमा पठाइसक्छौ ।’ जिल्लागत विवरण बिहीबार साँझसम्म तयार भइसक्ने मन्त्री त्रिपाठीले बताए ।
केन्द्रीय भण्डारणबाट दुई दिनभित्र प्रदेशमा र प्रदेशबाट थप दुई दिनभित्र जिल्लास्थित भण्डारण स्थलमा पु-याउने योजना रहेको विभाग स्रोतले जनाएको छ । ‘बढीमा ५ दिनभित्र जिल्लामा खोप पुगिसक्नेछ’ स्रोतले भन्यो । खोप लगाउन खटिने व्यक्तिलाई तालिम दिन भने अझै बाँकी छ । खोप लगाउने स्थानमा पु-याउनुपर्ने आवश्यक सामान पनि पठाइएको छैन ।
यस्तो प्रकृया बाँकी रहेकोले सर्वसाधारणले खोप लगाउने समय भने अझै हप्तादिनबढी समय लाग्ने अनुमान गरिएको छ ।
विभागको खोप शाखा प्रमुख डा. झलक गौतमले माथिल्लो तहका कर्मचारीलाई तालिम चलिरहेको जानकारी दिए । ‘खोप वितरण, ढुवानी, भण्डारण, स्वास्थ्यकर्मीको तालिम र सामग्रीहरू वितरण एकसाथ गर्छौं,’ उनले भने । विभागले बुधबार काठमाडौं उपत्यकाका अस्पताल प्रमुखहरूसँग कसरी व्यवस्थित रूपमा खोप लगाउन सकिन्छ भन्ने छलफल गरेको थियो ।
उनका अनुसार पहिलो चरणमा स्वास्थ्यकर्मी र फ्रन्टलाइनमा खटिनेलाई जिल्ला अस्पतालबाट खोप दिइनेछ । विभागले यसअघि नै स्थानीय तहमार्फत खोप लगाउने स्वास्थ्यकर्मीको तथ्यांक संकलन गरिसकेको छ । यसकै आधारमा मन्त्रालयले खोप पठाउन लागेको हो। जिल्ला अस्पतालमा बुथ राखेर खोप कार्यक्रम सञ्चालन गर्न लागिएको विभागले जनाएको छ ।
उपत्यकाबाहिर जिल्ला अस्पतालमा एउटा बुथ कायम हुने निश्चित भए पनि काठमाडौं, भक्तपुर र ललितपुरमा भने कति बुथ कुन–कुन अस्पतालमा रहने निश्चित नभएको गौतमले बताए । खोप लगाउन आठ हजारभन्दा बढी स्वास्थ्यकर्मी परिचालन हुनेछन् । कुल जनसंख्याको ३ प्रतिशत अर्थात् ९ लाख ११ हजारलाई पहिलो चरणमा खोप दिने योजना रहेको स्वास्थ्य मन्त्रालयका प्रमुख विशेषज्ञ डा. रोशन पोखरेलले बताए । खोप लगाउने स्वास्थ्यकर्मीको तथ्यांक संकलन भइसकेको र सफाइमा खटिने गाउँपालिका र नगरपालिकाका कर्मचारीको तथ्यांक संकलन भइरहेको स्वास्थ्य सेवा विभागले जनाएको छ ।
भारतले अनुदानमा उपलब्ध गराएको खोप एकै पटक लगाउने कि निश्चित समूहलाई दुवै डोज लगाउने भन्ने टुंगो लाग्न बाँकी रहेको डा. पोखरेलले बताए । नेपालको कुल जनसंख्याको ७२ प्रतिशतलाई खोप दिने सरकारको योजना छ । स्वास्थ्यकर्मी, शव व्यवस्थापनमा खटिनेहरू, एम्बुलेन्स चालक र स्वयंसेविकालाई लगाएर बाँकी रहेको खोप निजामती कर्मचारीलाई लगाउने कि वृद्धवृद्धालाई भन्ने निर्णय भइसकेको छैन ।
भन्सार विभागले नेपाल भित्रिने खोपलाई भन्सारमा जाँचपास सहज बनाउन छुट्टै इकाई खडा गर्ने भएको छरु। खोप सामग्रीको जाँचपाससम्बन्धी जानकारीका लागि त्रिभुवन विमानस्थल भन्सार कार्यालयमा छुट्टै इकाई खडा गरी कर्मचारी व्यवस्थापन गर्न लागेको हो । विभागमा समेत तत्काल समस्या समाधान गर्ने कार्यदल रहनेछ।
‘खोप पैठारीपूर्व नै कागजात उपलब्ध भएमा इकाईमार्फत जाँचपासपूर्वको प्रक्रिया मिलाइनेछ,’ विभागले स्वीकृत गरेको खोप सामग्रीहरू शीघ्र भन्सार जाँचपासका लागि अपनाइने प्रक्रियामा भनिएको छ, ‘कागजमा खोपको परिणाम तथा मूल्य नखुलेको पाइएमा स्वास्थ्य मन्त्रालयसँग समन्वय गरी जाँचपास गरिनेछ।’ खोप ल्याउने व्यक्ति वा संस्थाले औषधि व्यवस्था विभागबाट प्राप्त गरेको अनुमति प्रमाणपत्रलगायतका कागज पेस गर्नुपर्ने हुन्छ । कान्तिपुरकाे सहयाेगमा
मकवानपुर/६ महिनापछि बसेको बागमती प्रदेशको प्रदेश सभा बैठक २ दिन बसेर अनिश्चितकालको लागि स्थागित गरिएको छ ।
बागमती प्रदेशको प्रदेशसभाको बैठक अर्को सूचना जारी नभएसम्मका लागि स्थगित गरिएको हो । बुधबार बसेको बैठकमा संसदीय दलका नेताहरुले शुभकामना मन्तव्य व्यक्त गरे लगत्तै अर्को सूचना नभएसम्मका लागि स्थगित गरिएको हो । बैठकमा सभामुख सानुकुमार श्रेष्ठले अर्को सूचना नभएसम्मका लागि स्थगित भएको जानकारी गराएका थिए । यससँगै अब अर्को बैठक कहिले बस्छ भन्ने अन्यैलता जन्मिएको छ ।
प्रदेशको मुख्यमन्त्री डोरमणि पौडेलको अविस्वासको प्रस्ताबमाथि मत विभाजन गर्नुपर्ने प्रचण्ड माधब समुहका सांसदले भन्दै आएपनि हिउँदे अधिवेसन सुरु गरेको पहिलो दिनमानै संसद बैठक अनिश्चित कालका लागि स्थगित गरिएको हो ।
आफ्नै दल नेकपाका सांसदहरुले मुख्यमन्त्री डोरमणि पौडेलविरुद्ध अविश्वासको प्रस्ताव दर्ता गराएसँगै अन्योल बनेको बागमती प्रदेशसभाको बैठकमा उक्त विषयले भने प्रवेश नै पाएको छैन । गत साउन ८ गते चालू आर्थिक वर्ष २०७७÷०७८ को बजेट पारित गरेर स्थगित गरिएको प्रदेशसभा ६ महिनापछि सुरु गरिएको थियो ।
प्रदेशसभा बैठकको सुरुवातमा सदनमा प्रतिनिधित्व गर्ने दलहरुको तर्फबाट बोल्ने संसदीय दलका नेताहरुले प्रधानमन्त्री केपी शर्मा ओलीले असंवैधानिकरुपमा प्रतिनिधिसभाको विघटन गरेकोभन्दै त्यसको विरोध गरेका थिए । उक्त विषयमा मुख्यमन्त्री पौडेलले भने प्रवेश नै गरेनन् । मुख्यमन्त्री डोरमणि पौडेलले छोटो अवधिमा प्रदेश सरकारले समृद्धि र विकासको काम गरेको दाबी गरे ।
बागमती प्रदेशका मुख्यमन्त्री डोरमणि पौडेलले फरकमत, असहमति र अविश्वास गर्नेलाई सम्मान गरिने बताउँदै आएका छन् ।
प्रदेश सभाको सातौं अधिवेसनको पहिलो बैठकमा बोल्दै मुख्यमन्त्री पौडेलले विषम परिस्थितिमा रहेको भन्दै प्रधानमन्त्रीले संसद विघटन गरि निर्वाचान मिति तोकिएको अवस्थामा केहीले सत्ता पक्ष र प्रतिपक्षले विरोध जनाइरहेको प्रति खासै आपत्ति जनाएनन् ।
आफूलाई काम गर्न नदिने अवस्था भएपछि प्रधानमन्त्री ओलीले जनता सामु नयाँ जनादेशको लागि चुनाव रोज्नुपरेको उनले बताए । एउटै विचार अनि पार्टी भएता पनि अविश्वास गरिएको उनले गुनासो
गरे । उनले प्रदेश सरकार शुन्य अवस्थाबाट प्रदेश सरकार अहिलेसम्म धेरै अघि बढेको र विभिन्न नमुनालायक योजनाहरुमा सफल भएको बताए ।
मकवानपुर । बागमती प्रदेश सभाको सातौं अधिवेशन बुधबार ३ बजे बस्ने भएको छ । मंगलबार बसेको कार्यव्यवस्था परामर्श समितिले भोली ३ बजेको लागि आवश्यक सम्भावित कार्यसुचि तयार गर्ने निर्णय गरेका प्रदेश सभा सचिवालयले जानकारी दिएको छ ।
३ घण्टा भन्दा लामो समय बसेको प्रदेशको कार्यव्यवस्था परामर्श समितिमा बागमती प्रदेशका मूख्यमन्त्री डोरमणी पौडेलमाथि परेको अविश्वासको प्रस्तावबारे निर्णय गर्ने कार्यविधिको छलफलमा रस्साकस्सी परेको बताइएकाे छ । परामर्श समितिमा सहभागी नेपाली कांग्रेसका सचेतक छिरिङ दोेर्जे लामाले विधि अनुसार गर्नुपर्ने बताएका छन् । मूख्यमन्त्री पौडेलमाथि परेको अविश्वासको प्रस्तावबारे निर्णय गर्न कार्यविधि समिति गठन भएको छ । मंगलबार बसेको कार्यव्यवस्था परामर्श समितिको बैठकले प्रस्तावबारेको मत विभाजनका लागि कार्यविधि बनाउन ‘अविश्वासको प्रस्ताव कार्यविधि मस्यौदा समिति’ गठन गर्ने निर्णय गरेको हो ।
समितिले बुधबार नै प्रतिवेदन बुझाउने गरी काम गर्ने र जसको लागि आज विहानै बैठक बस्ने कार्यव्यवस्था परामर्श समितिकी सदस्य रिना गुरुङले बताईन् । गुरुङकाअनुसार प्रस्ताव
बारेको मत विभाजनका लागि कार्यविधि बनाउन ‘अविश्वासको प्रस्ताव कार्यविधि मस्यौदा समिति’ गठन गर्ने निर्णय भएको हो । बैठकले नेकपाका मुख्य सचेतक केशव पाण्डे, सचेतक बुद्धिमान माझी, नेपाली कांग्रेस संसदीय दलका सचेतक छिरिङ दोर्जे लामा,सांसद राजेन्द्र पाण्डे, गणेश दुलाल,रिता माझी,रिना गुरुङ, शोभा शाक्य र प्रदेशसभाका सचिव कृष्णहरी खड्का रहेको समिति गठन गरेको छ ।
समितिले दस्तखत सहितको मत विभाजनसम्बन्धी कार्यविधि बनाउने छ । उक्त कार्यविधि संसद बैठकमा स्विकृत भएपछि मात्रै प्रस्ताव माथि छलफल हुनेछ । बुधबारको बैठकमा औपचारिक कार्यतालिका धेरै हुने देखिएको छ । आज बस्ने बैठकमा सभामुखले प्रदेश प्रमुखको कार्यालयबाट प्राप्त अधिवेशन आव्हानसम्बन्धी पत्र पढेर सुनाउने, विधेयक प्रमाणिकरणको पत्र पढेर सुनाउने, प्रदेश प्रमुखले कार्यभार तोकेको पत्र पढेर सुनाउने, सातौं अधिवेशनको अवसरमा प्रत्येक दलका नेताले शुभकामना दिने कार्यसूचिमा सहमति भएको परामर्श समितिका सदस्य समेत रहेका नेपाली कांग्रेस संसदीय दलका सचेतक छिरिङ दोर्जे लामाले बताए ।
मकवानपुर । मकवानपुर प्रहरीले ३ जना फरार प्रतिवादी पक्राउ गरेकाे छ । मकवानपुर जिल्ला अदालतको २०६८ फागुन २९ गतेको फैसलाबाट लागु औषध हिरोइन मुद्दामा कैद ताेकिएकाे व्यक्ति गत माघ ४ गते पक्राउ गरिएकाे जिल्ला प्रहरी कार्यालयले जनाएकाे छ ।
मकवानपुर जिल्ला अदालतले लागु औषध हिरोइन मुद्दामा १० महिना १७ दिन कैद तोकी फरार रहेका प्रतिवादी हेटाैडा उपमहानगरपालिका १ का वर्ष २९ का सुदिप भन्ने सुजित लामालाई हेटाैडा १ स्थित चौकीटोलबाट पक्राउ गरी कैद तथा जरिवाना भुक्तानको लागि मकवानपुर जिल्ला अदालत पठाइएको जिल्ला प्रहरी कार्यालयका प्रवक्ता प्रहरी नायव उपरीक्षक इन्द्र बहादुर रानाले जानकारी दिए।
यसै गरी मकवानपुर जिल्ला अदालतको २०७३ साउन २५ गतेको फैसलाले लागु औषध मुद्दामा २ महिना कैद र २ हजार जरीवाना तोकिएकाेमा फरार रहेका प्रतिवादी हेटाैडा उपमहानगरपालिका १० बस्ने बर्ष २२ को युनिक लामालाई माघ ६ गते मंगलबार हेटाैडा ४ बजार क्षेत्रबाट पक्राउ गरी कैद तथा जरिवाना भुक्तानको लागि मकवानपुर जिल्ला अदालत पठाउने कार्य भइरहेको रानाले बताए।
यस्तै ज्यान मार्ने उद्योगमा फरार अभियुक्त मकवानपुर मनहरी गाँउपालिका ४ मसिने बस्ने वर्ष २० को गोबिन्द तितुङलाई पक्राउ गरी मकवानपुर जिल्ला अदालतमा उपस्थित गराई अदालतको आदेशबाट थुनामा राख्न कारागार कार्यालय भिमफेदी पठाउने कार्य भइरहेको रानाले जानकारी दिए ।
मकवानपुर । नेपाल इन्फ्रास्ट्रक्चर बैंकले सर्वसाधारणकाे लागि खुला गरेकाे ८ अर्ब रुपैयाँ बराबरको आईपीओमा आवेदन दिने आज मंगलबार अन्तिम दिन रहेकाे छ ।
बैंकले जारी पूँजीको ४० प्रतिशतले हुन आउने ८ अर्ब रुपैयाँ बराबरको ८ करोड कित्ता साधारण शेयर गत माघ २ गते शुक्रबारदेखि निष्काशनमा ल्याएको छ। त्यस मध्ये ७ करोड ५८ लाख ४० हजार कित्ता सर्वसाधारणका लागि बिक्री खुला गरिएको हो।
सोमबार साँझ ५ बजेसम्ममा ११ लाख ७७ हजार ९ सय २० वटा आवेदनबाट १४ करोड १९ लाख ९६ हजार ४२० कित्ता शेयर खरिद आवेदन सो बराबरको शेयर माग भएको हो। उक्त आवेदन सर्वसाधारण निष्काशन गरेको ७ करोड ५८ लाख ४० हजार कित्ताको १.८७ गुणा बढी हुन आउछ।
बैंकको आईपीओमा न्यूनतम १० कित्तादेखि अधिकतम २ करोड कित्तासम्मको लागि आवेदन दिन सकिनेछ। नेपाल धितोपत्र बोर्डबाट अनुमति प्राप्त आश्वा सदस्य बैंक तथा वित्तीय संस्थाहरू र मेरोशेयरको वेब तथा एप मार्फत पनि कम्पनीको आईपीओमा आवेदन दिन सकिने व्यवस्था छ।
बैंकले ठूलो संख्यामा शेयर निष्काशन गरेकोले आईपीओमा आवेदन गर्ने सबैले शेयर पाउने पक्का छ। पछिल्लो समय आईपीओमा आवेदन गर्नेको संख्या साढे १२ लाख नाघिसकेको छ। अझै डिम्याट खाता खोल्नेको संख्या पनि दैनिक तिब्र रुपले बढ्दैछ।
हाल बैंकको चुक्ता पूँजी १२ अर्ब रुपैयाँ रहेको छ। ८ अर्ब रुपैयाँ बराबरको आईपीओ बाँडफाँटपश्चात बैंकको चुक्ता पूँजी २० अर्ब पुग्नेछ।
यस्तै बैंकको आइपीओ खुलेको तेस्रो दिन पनि बैंक र क्यापिटलहरुमा भिडभाड उत्तिकै देखिएको छ। बैंकको शेयर खुल्नुभन्दा केहि दिन अघिदेखि नै सुरु भएको यो भिड अझै कम भएको छैन्।
बैंकहरुमा सिआरएन नम्बर लिने र शेयर भर्नेहरु बढी देखिन्छन भने क्यापिटलहरुमा डिम्याट खाता खोल्नेहरुको भिड बढी छ। शेयर खुलेको पहिलो दिन नै बैंकहरुमा शेयर खरिदको लागि आवेदन दिनेहरुको भिड बढेको थियो। डिम्याट खाता खोलेका तर मेरो शेयर लिइनसकेकाहरुले बैंकबाट आवेदन दिँदा बैंकमा भिडभाड बढेको हो।
पछिल्लो समय औसतमा दैनिक १० हजार भन्दा बढीले डिम्याट खोलिरहेको सिडिएससिको तथ्याँकले देखाउछ। सामान्य अवस्थामा बैंकहरुले तत्कालै सिआरएन नम्बर दिने गरेकोमा अहिले भिडभाढ बढी भएकोले केहि बेंकहरुले सिआरएन सम्बर लिन समेत केहि दिन लाग्ने बताउन थालेका छन्।