मकवानपुर/फेमकोल एकेडेमीको आयोजना तथा सिटिएफ नेपालको समंन्वयमा गुणस्तरीय सिकाइ तथा संस्कारबारे एक दिने परामर्श कार्यक्रम गरेको छ ।
यसै एकोडेमीका ३० जना शिक्षकहरु पनि यसबारेकोे तालिममा सहभागी भएका छन् । गुणस्तरीय शिक्षाको लागि सिटिएफ नेपालले मन्टेश्वरी तालीम, विद्यार्थी परामर्श, अभिभावक शिक्षा शिक्षक तालिम सन्चालन गर्दै आएको सहजकर्ता डिल्ली निरौलाले बताए । शैक्षिक गुणस्तर सुधार कार्यक्रम अन्तरगत सीप संस्कार र प्रबिधि सहितको शिक्षामा सिटिएफ नेपालले कार्यक्रम सन्चालन गर्दै आएको निरौलाले बताए । छात्राछात्रहरुलाई नैतिकवान बनाउन परामर्श कक्ष प्रभावकारी हुने उनले बताए ।
यस कार्यक्रम अन्तरगत छात्रछात्रालाई बिगतमा आफूबाट भएको कमजोर सम्झने, आन्तरिक क्षमता खोज्ने तथा आगामी दिनमा चेन्ज हुने भन्ने बारे परामर्श गर्ने गरिएको उत्प्रेणाकर्ता रबि किरणले बताए । ‘साथिहरुको लहैलहैमा लागेर गलतमा लागेकाहरुले अबको सही बाटो पत्ता लगाउने, आन्तरिक शक्तिलाई बाहिर ल्याउन प्रेरित गर्ने गर्दछ’ उनले भने ।

छात्र छात्रालाई शिक्षक अभिभावकको भूमिका पहिचान गराउन समेत मनोसामाजिक परामर्श कक्ष प्रभावकारी हुने गरेको उनले बताए । सबै सामुदायिक स्कुलमा आवश्यक महसुस गरिएको उनले बताए । बालबालिकाहरुको मनोसामाजिक समस्या पहिचान गर्ने, समाधान गर्ने, बालबालिका त अभिभावक बिचको कमजोरि हटाउन सवालम यो कार्यक्रमले धेरै सकारात्मक भूमिका निर्वाह गर्ने एकेडेमीका प्रिन्सिपल केशबप्रसाद मुडभरीले बताए ।

कार्यक्रममा हेटौंडा १२ का वडा अध्यक्ष ललित घलान, वडा १३ का अध्यक्ष मनोजकुमार वाइबा, महिला मिलन बचत तथा ऋण सहकारी संस्था अध्यक्ष बिष्णु माया लामा, सिटु सामुदायिक वन उपभोक्ता समिति अध्यक्ष कृष्णबहादुर कार्की, समाजसेवी तारा स्याङ्बोलगायतको सहभागिता रहेको एकेडेमीका प्रिन्सिपल मुडभरिले बताए ।
मकवानपुर / हेटौंडानगर भित्रका महिलाहरुलाई व्यवसायीक बनाउने उदेश्यसहित आयोजना गरिएको ब्युटिपार्लर सम्बन्धि एक महिने तालिम समापन गरिएको छ ।
हेटौंडा उपमहानगरपालिकाको आर्थिक सहयोग तथा महिला बालबालिका तथा असहाय कल्याण समुहको आयोजनामा भएको तालिम शुक्रबार समापन गरिएको हो । समापन कार्यक्रममा तालिममा सहभागी २० जना महिला र प्रशिक्षक इन्दिरा गुरागाईंलाई प्रमाणपत्र प्रदान गरिएको थियो। उनीहरुलाई हेटौंडा उपमहानगरपालिकाका मेयर हरिबहादुर महतले प्रमाणपत्र प्रदान गरेका थिए ।
तालिम समापन कार्यक्रम बोल्दै उपमहानगरपालिकाका मेयर महतले महिलाहरु जबसम्म आर्थिक रुपले सबल हुदैनन् तबसम्म महिला हिंसामा कमि नआउने बताए । महिलाहरु जन्मेदेखी बृद्धअवस्थासम्म अरुमा निर्भर बन्नुपर्ने अवस्था भएको उनले बताए । ‘महिलाहरुलाई तालिम दिएर व्यवसायिक बनाई आर्थिक रुपले सबल बनाउन उपमहानगरपालिका हरदम तयार छ’ उनले भने । यस्तै मेयर महतले महिलाहरुलाई आवश्यक पर्ने सेनेटरी प्याड निर्माण गर्न समेत आग्रह गरे । बजारमा पाईने सेनेटरी प्याडहरुमा केमिकल प्रयोग हुने हुँदा महिलाहरुलाई त्यसले असर गर्ने बताउदै समुहमार्फत सेनेटरी प्याड उत्पादन गर्न सुझाव दिदै उपमहानगरपालिकाले आर्थिक सहयोग गर्ने समेत बताए ।
कार्यक्रममा वेपा ग्रुप नेपालकी अध्यक्ष इन्दिरा न्यौपानेले विभिन्न निकायबाट दिइने तालिमहरुलाई छुट्टाछुट्टै भन्दापनी सबैसङ्ग समन्वय गरेर दक्ष जनशक्ति उत्पादन गर्नेतर्फ ध्यान दिन आग्रह गरिन । उनले छुट्टाछुट्टै व्यक्तिलाई तालिम दिनुभन्दापनी एउटै व्यक्तिलाई सामान्यदेखी एडभान्स तालिमसम्म प्रदान गरि व्यवसायिक बन्नसक्ने सम्मको सहयोग गर्नुपर्ने बताइन् ।
यस्तै सन्जिवनी बचत तथा ऋण सहकारी संस्थाकि अध्यक्ष जानकी चौधरीले एड्भान्स तालिम लिएका इच्छुक महिलाहरुलाई व्यवसाय स्थापना गर्न ऋण सहयोग गर्ने बताइन् ।
कार्यक्रममा महिला बालबालिका तथा असहाय कल्याण समुहकी अध्यक्ष अम्बिका खतिवडाले महिलाहरुको आर्थिक आयाअर्जन वृद्धिका लागि संस्थाले सिपमुलक र आयमुलक तालिमको आयोजना गर्दै आएको बताईन ।
मकवानपुर । लैङ्गिक समानताको लागि पुरुष सहभागिता संजाल मकबानपुरले अन्तरक्रिया गरेकाे छ । लैङ्गिक हिंसा अन्त्य र लैङ्गिक समानताको लागि ममवानपुरका स्थानिय जनप्रतिनिधिहरुसँग अन्तरक्रिया गरिएकाे हाे । मकबानपुर जिल्लाको मकबानपुरगढी गाँउपालिका, बागमति गाँउपालिका र राक्सिाराङ्ग गाँउपालिकाको जनप्रतिनिधिहरुसँग लैङ्गिक समानताको लागि कार्यक्रम गरेकाे थियो ।
लैङ्गिक समानताको लागि पुरुष सहभागिता संजाल मकबानपुरका संयोजक प्रकाश खतिवडाको सभाध्यक्षतामा भएको कार्यक्रममा उनले मेन ईगेज एलायन्सले सामाजिक न्याय को बकालत गर्दै महिलालाई अग्रभागमा राखेर महिलाको हिंसा अन्त्य तथा संबिधानमा उल्लेखित महिला अधिकार स्थापितका लागि कृयाशिल हुने कार्य गर्ने बताए ।
यसका साथै यौनिक तथा लैङ्गिक अल्पसंख्यक को अधिकार स्थापित, अपाङ्गता भएकाहरुको समाजिक सुरक्षाको प्रत्याभूती दिलाउन र तमाम लैङ्गिक असमानता हटाउन स्थानिय सरकार संचालन ऐन अनुरुप पालिकाले गर्न सक्ने भूमिकाको बारेमा बताउँदै खतिवडाले लोकतान्त्रीक नेपालमा पालिकाका जनप्रतिनिधिहरुको कर्तब्यको बारेमा बोध समेत गराएका थिए ।
यौनिक तथा लैङ्गिक अल्पसंख्यकको अधिकारमा कार्यरत फ्रेन्डस हेटौडाका प्रतिनिधि एबं एलायन्सका सदस्य किरण थापाले यौनिक तथा लैङ्गिक अल्पसंख्यकले भोगिरहेको अपमान र हेलाका साथै बिभिन्न समस्याहरु बाट ग्रसित हुदै स्थीति भयाबह हुदै गएकोले सरकारले बेलैमा समाधान गर्न आग्रह गरे ।

नारि सिप सृजना केन्द्रका कार्यकारी निर्देशक एबं एलायन्सका सदस्य चिरन्जीबि पौडेलले लैङ्गिक समानताको लागि पुरुष सहभागिताको औचित्यको बारेमा, पत्रकार एबं एलायन्सका सदस्य सुरेश श्रेष्टले लैङ्गिक समानताको लागि पत्रकार गर्न सक्ने योगदानको चर्चा गरेका थिए। यसैगरि एस्थर बेन्जामिनका प्रतिनिधि एबं एलायन्सका सदस्य बुद्ध लामाले सिमान्तकृत किशोरिहरुको शिक्षाको अबस्था खस्कीरहेको अबस्थाको बारेमा चित्रण गरेका थिए ।
कार्यक्रममा राक्सिराङ्ग गाउपालिकाको सदस्य सुरेश घलान, बागमति गाँउपालिकाका सदस्य मठु पुलामी मगर , गढि गाँउपालिकाका सदस्य गणेशमान गोले न्यायिक समतिका अधिबक्ता रामशरण लामिछाने , हेटौडा उपमहानगरपालिका कार्यपालिकाको सदस्य कल्पना बिश्वकर्मा लगायतले अब पालिका पालिकाहरुले लैङ्गिक समानता र समाजिक न्यायको लागि मिहिन ढंगले लाग्नु पर्ने औल्याउदै यस तर्फ पालिकाको कार्ययोजना र बजेट बिनियोजन गर्न क्रियाशील हुने प्रतिबद्धता जाहेर गरेका थिए ।
नारी सीप सृजना केन्द्रकी अध्यक्ष सरस्वती बर्तौलाले लैङ्गिक समानताको लागि संजाल गठन हुनु र संजालले कार्य प्रारम्भ गर्नु सकारात्मक कार्य भएकोले सस्थाले संजाललाई कार्यक्रम संचालन र अन्य सहयोग, समन्वय र सहकार्य गर्ने बताइन ।
कार्यक्रममा महिलाजागरण समुहनगर सदस्य दुर्गा नेपाल,र राधिकाचौलागाई लगायतको उपस्थिति रहेको थियो ।
मकवानपुर । ग्रामीण महिला सेवा केन्द्र र प्लान इन्टरनेसनल नेपालको संयुक्त साझेदारीमा बागमती गाउँपालिका वडा नम्बर ६ फापरबारीमा युवा सञ्जालका किशोर किशोरीहरुका लागि २ दिने वकालत र पैरवी सिप विकाश तथा योजना निर्माणका चरण सम्बन्धी तालिम सम्पन्न भएको छ ।
ग्रामीण महिला सेवा केन्द्र र प्लान इन्टरनेसनल नेपालद्वारा सञ्चालित lead and Decide कार्यक्रम अन्तर्गत वकालत र पैरवी सिप विकाश तथा योजना निर्माणका चरण सम्बन्धी तालिम गरिएकाे हाे । तालिममा बागमती गाउँपालिका वडा नम्बर ६,७ र ८ का गरी २८ जना किशोर किशोरीहरूको उपस्थिति रहेको ग्रामीण महिला सेवा केन्द्रकी बागमती गाउँपालिकाकी सामाजिक परिचालक रमा प्रजापतिले जानकारी दिइन्।
“हामीले यो सिक्ने पर्ने तालिम रहेछ योजना निर्माणमा हाम्रो भूमिका हुँदैन झैँ लाग्दथ्यो यो योजना निर्माणका बेलामा बस्ती स्तर वडास्तरमा त हामीले सक्रिय रुपमा सहभागी भई आफ्ना योजना राख्न पाइने रहेछ थाहा थिएन अब भने बस्ती र वडा स्तर मा हुने योजना निर्माणमा आफूसहित आफ्ना साथीहरुलाई उपस्थित हुन भन्नेछु” तालिममा सहभागी भए मध्येकी १ रुबिना श्रेष्ठले बताइन्। सो तालिमको सहजीकरण प्रकाश खतिवडाले गरेका थिए ।

यस्तै ग्रामीण महिला सेवा केन्द्र र प्लान इन्टरनेसनल नेपालको संयुक्त साझेदारीमा सञ्चालन भइरहेको Lead and Decide कार्यक्रमअन्तर्गत मकवानपुरगढी २ शिखरकटेरी र हेटौंडा १५ रातोमाटेमा कचहरी नाटक प्रदर्शन गरिएको छ । प्रजनन स्वास्थ्य, बालबिबाह, लैङ्गिक समानता, परिवार योजना जस्ता महत्वपूर्ण शीर्षकमा जनचेतनामुलक नाटक प्रदर्शन गरिएको ग्रामीण महिला सेवा केन्द्रका सामाजिक व्यवहार परिवर्तन संचार सहजकर्ता अमिर दहालले जानकारी दिए । कार्यक्रममा ग्रामीण महिला सेवा केन्द्रकी कार्यसमिती सदस्य देवकी चौलागाई तथा सोही संस्थाका कार्यक्रम संयोजक दिपक न्यौपाने दिपको उपस्थिति रहेको थियो।
मकवानपुर । राष्ट्रिय कविता वाचन प्रतियोगितामा आधुनिक राष्ट्रिय माविका छात्रा वर्षा महतो विजेता बनेकी छन् । अन्तर्राष्ट्रिय महिला दिवसको उपलक्ष्यमा ८ मार्चका दिन भर्चुअल माध्यमबाट आयोजित कविता वाचन प्रतियोगितामा सहभागी सातै प्रदेशका अन्य प्रतिस्पर्धीलाई पछि पार्दै वर्षाले उपाधि हात पारेकी हुन् ।
“नेतृत्वमा महिलाः कोभिड–१९ पछिको विश्वमा समान अवसर” भन्ने विषयमा प्रतियोगिता आयोजना गरिएको हो । प्रतियोगितामा महिलाको संघर्ष, महिला नेतृत्व, कोभिड–१९ को विपदमा महिलाले खेलेको भूमिका आदि विषयमा विद्यार्थीहरुले कविता वाचन गरेका थिए । प्रस्तुत कवितामा मूल्यांकन गर्दै आधुनिककी महतोलाई निर्णायकहरुको टोलीले बिजेता घोषित गरेको हो । निर्णायकहरुमा चर्चित कवि योगेन्द्र यादव, बिमला तुम्खेवा र दीपक रौनियार थिए । महतोको कविता “नारी नई छै केक्रो पर भारि”ले महिलाहरुलाई बोझ होइन बरु सशक्तिकरणको रुपमा चित्रित गरेको निर्णायकको ठहर छ ।
यस्तै जन नमुना माध्यमिक विद्यालय कर्णाली प्रदेशकी पूजा पाठकले महिलाको सुरक्षा, सम्मान र रोजगरः समृद्ध नेपालको आधार” शिर्षकको कविताबाट द्वितीय स्थान हासिल गरिन् । अमर माध्यमिक विद्यालय गण्डकी प्रदेशकी सृजना सापकोटा “नेतृत्व हो नारी को” र दमकदा नवदीप माध्यमिक विद्यालय लुम्बिनी प्रदेशकी सपना भण्डारीले “नेपाल र नारी” शिर्षकको कविताका लागि तेस्रो पुरस्कार हात पारे । शीर्ष तीन विजेताहरुका लागि रचनात्मक क्षमता बृद्धि गराउन कार्यशालामा सहभागी गराइने आयोजकले जनाएको छ ।
कार्यक्रममा मन्तव्य दिँदै यूएनडीपीका आवासीय प्रतिनिधि आयनी मेडागोंगोदा लेबले भने, “हामी रातो बंगाला फाउण्डेशनका साथ युवा कविहरुलाई रचनात्मक क्षमतामा प्रोत्साहित गर्न र लैंगिक समानता सहित समाजको मानसिकता परिवर्तनका लागि प्रोत्साहित गर्न पाउँदा खुसी छौं ।” त्यसैगरी रातो बंगला फाउण्डेशनका अध्यक्ष शान्ता दीक्षितले बाल्यकालको विकासको आवश्यकता र बालबालिकालाई शुरुवाती चरणदेखि नै लैंगिक समानताको बारेमा शिक्षित गराउनुपर्नेमा जोड दिए ।
प्रदेश १ अन्तर्गत जलकल्याण माध्यमिक विद्यालयकी यसोदा सुवेदी र जनता माध्यमिक विद्यालयका नागेन्द्र धिमाल, प्रदेश २ अन्तर्गत जनता मोडल टेक्निकल माध्यमिक विद्यालयका प्रीति ठाकुर र महुन्यल माध्यमिक विद्यालय सुदुरपश्चिम प्रदशकी ललिता जोशी प्रतियोगिताको फाइनलमा पुगेका थिए । विद्यार्थीहरुलाई कविता मार्फत रचनात्मक रुपले आफ्नो विचार व्यक्त गर्न र लैंगिक समानतामा चेतना जगाउन प्रोत्साहित गर्ने उद्देश्यका साथ युएनडिपी र रातो बंगला फाउण्डेशनले प्रतियोगिताको आयोजना गरेको हो । प्रतियोगितामा सातै प्रदेशका विद्यार्थीहरुले भाग लिएका थिए ।