मकवानपुर । मकवानपुरकाे बागमती गाँउपालिकामा सामुदायिक आँखा केन्द्र संचालन हुने भएकाे छ । बागमती गाउँपालिका र हेटौंडा सामुदायिक आँखा अस्पताल बीच आँखा केन्द्र संचालनकाे लागि बुधबार सम्झाैता भएसँगै आँखा केन्द्र संचालन हुने भएकाे हाे ।
सम्झाैताअनुसार आँखा केन्द्र संचालनकाे लागि गाउँपालिकाले २ जना स्वास्थ्यकर्मीकाे पारिश्रमिक रकम अनुदान स्वरूप उपलब्ध गराउने भएकाे छ । यसैगरी केन्द्रकाे स्थान र आवश्यकीय भाैतिक पुर्वाधारकाे व्यवस्था गर्नुपर्ने समेत गाँउपालिकाले गर्ने सम्झाैतामा उल्लेख छ । केन्द्रकाे प्रचारप्रसार गर्ने, सेवा संचालनकाे लागि उपयुक्त वातावरण तयार गर्नुपर्ने, पालिका भित्रका शैक्षिक संस्थामा अध्ययनरत वालवालिका, विपन्न वर्ग, अपांग, एकल महिला , अति विपन्न समुदायकाे लागि विशेष कार्यक्रम संचालन गाँउपालिकाले गर्ने गरी सम्झाैता भएकाे ।
यस्तै केन्द्रकाे लागि आवश्यक बजेट विनियाेजन र अस्पतालकाे तर्फबाट आवश्यक सामाग्री तथा उपकरण , आवश्यकता अनुसारकाे प्राविधिक जनशक्ति उपलब्ध गराउने साथै आवश्यकीय वजेट विनियाेजन गर्ने लगाएतका द्वीपक्षीय सम्झाैता भएकाे छ । सम्झाैता हस्ताक्षर गरेकाे मितिले आगामी पाँच वर्षसम्म कायम रहने सम्झाैतामा उल्लेख छ ।
अत्यन्तै सम्वेदनशील अंग आँखा भएकाेले आँखाकाे समस्याकाे कारण व्यक्ति सक्षम तथा सबल भएपनि कुनै काम गर्न नसक्ने द्वीपक्षीय सम्झाैता हस्तान्तरणमा गाउँपालिका अध्यक्ष सर्केश घलानले बताए । घलानले आँखा सम्बन्धी सानाे समस्याकाे उपचारकाे लागि हेटौंडा धाउनुपर्ने बाध्यता रहेकाेमा आँखा केन्द्र संचालन पछि पालिका स्तरमै सेवा सहज हुने जनाकारी दिए ।
आँखा अस्पतालले स्थानीय निकायहरूकाे सहकार्यमा गरेकाे कार्य अत्यन्तै प्रभाकारी भएकाे हेटौंडा सामुदायिक आँखा अस्पतालका बरिष्ठ प्रशासकीय अधिकृत सुधिर श्रेष्ठले जानकारी दिए ।
आँखा केन्द्रमा आँखा जाँच, चश्मा जाँच, सामन्य शल्यक्रिया, अौषधी सहितकाे सेवा आगामी तीन महिनाभित्र दैनिक रूपमा सेवा प्रदान गरिने बरिष्ठ प्रशासकीय अधिकृत श्रेष्ठले बताए ।
मकवपानपुर । नेपालमा नेपालमा २ हजार ५ सय ६८ जना काेराेना संक्रमित थपिएका छन् । पछिल्लो २४ घण्टामा २ हजार ५ सय ६८ जनामा कोरोना भाइरसको संक्रमण पुष्टि भए सँगै संक्रमित थपिएका हुन् । १२ हजार ६३६ जना मध्य पीसीआर विधिबाट १ हजार ९ सय ८१ जना र एन्टिजेन विधिबाट ५ सय ८७ जनामा संक्रमण पुष्टि भएको स्वास्थ्य तथा जनसंख्या मन्त्रालयले जानकारी दिएकाे छ ।
मन्त्रालयका अनुसार साेही अवधिमा थप २ हजार २० जना संक्रमणमुक्त भएका छन् । याे समेत नेपालमा कुल संक्रमितमध्ये ६ लाख ५६ हजार १ सय ९७ जना संक्रमणमुक्त भइसकेका छन् । सक्रिय संक्रमितमध्ये २८ हजार ६३ जना होमआइसोलेसनमा, ३ हजार २ सय ३५ जना संस्थागत आइसोलेसनमा, ६ सय ७७ जना आईसीयूमा र १ सय ६९ जना भेन्टिलेटरमा उपचाररत रहेकाे स्वास्थ्य मन्त्रालयले जनाएकाे छ ।
पछिल्लो २४ घण्टामा थप १८ जनाको मृत्यु भएको छ । योसँगै नेपालमा ९ हजार ८७५ जनाको मृत्यु भइसकेको छ ।
त्यस्तै, पछिल्लो २४ घण्टामा थप १ लाख ९५ हजार १ सय ३२ जनाले कोभिड–१९ विरुद्धको खोप लगाएका छन् । हालसम्म ४० लाख ६४ हजार २ सय ८८ जनाले पहिलो मात्रा र १८ लाख १३ हजार ४ सय ७१ जनाले पूर्ण मात्रा खोप लगाइसकेकाे मन्त्रायलकाे तथ्याङ्कमा उल्लेख छ ।
मकवानपुरमा थपिए ८८ जना काेराेना संक्रमित
मकवानपुरमा काेराेना संक्रमण पुष्टि हुनेको संख्या बढ्दै गएको छ। जिल्लामा पछिल्लो २४ घण्टामा ८८ जनामा कोरोना पुष्टि भएको छ । ८९ जनामा पीसीआर र ५६ जनामा एन्टीजेन परीक्षण गर्दा क्रमशः ७९ जना र ९ जना गरी ८८ जनामा कोरोना पुष्टि भएको स्वास्थ्य कार्यलय मकवानपुरले जनाएको छ । यो संगै मकवानपुरमा कोरोना पुष्टि हुनेको संख्या १३ हजार ३ सय ७७ पुगेको छ ।
यसैगरि जिल्लामा पछिल्लो २४ घण्टामा १७ जना कोरोना संक्रमण निको भएका छन् । यो संगै जिल्लामा कोरोना निको हुनेको संख्या १२ हजार १ सय ७३ जना पुगेका छन् । जिल्लामा पछिल्लो २४ घण्टामा कोरोनाबाट कसैको पनि मृत्यु नभएको कार्यलयले जनाएको छ । जिल्लामा हालसम्म कोरोनाबाट १ सय ४३ जनाको ज्यान गएको छ ।



मकवानपुर । मकवानपुरमा ४ सय ३२ जना काेराेना संक्रमित थपिएका छन् । पछिल्लो २४ घण्टामा ४ सय ३२ जनामा कोरोना पुष्टि भए सँगै संक्रमितकाे संख्या थपिएकाे हाे । मकवानपुरमा पछिल्ला केही दिनहरुमा कोरोना संक्रमण पुष्टि हुनेको संख्या बढ्दै गएको छ ।
पछिल्लो २४ घण्टामा १ सय ३० जनाको पीसीआर परीक्षणमा ६६ जना र १ हजार १५ जनाको एन्टीजेन परीक्षणमा ३ सय ६६ गरी ४ सय ३२ जनामा कोरोना पुष्टि भएको स्वास्थ्य कार्यलय मकवानपुरले जनाएको छ ।
काेराेना पुष्टि हुनेहरुमा सबैभन्दा बढी भीमफेदी गाउँपालिका भित्रका रहेका छन् । भीमफेदी स्थित भीमफेदी कारागार भित्रका ३ सय ५५ जना कैदी सहित ३ सय ६२ जनामा कोरोना पुष्टि भएको छ । अन्य संक्रमित हेटाैडा सहित गाँउपालिकाका रहेकाे छन् । यो संगै जिल्लामा ९ सय ८० जना सक्रिय संक्रमित पुगेको स्वास्थ्य कार्यलय मकवानपुरले जनाएको छ ।
यसैगरि जिल्लामा पछिल्लो २४ घण्टामा ६३ जना संक्रमित संक्रमण मुक्त भएका छन् । मकवानपुरमा हालसम्म १३ हजार २ सय ६१ जनामा कोरोना पुष्टि हुँदा १२ हजार १ सय संक्रमित निकाे भएका छन् ।
यस्तै जिल्लामा पछिल्लो २४ घण्टामा थप एक संक्रमितको मृत्यु भएको छ । मृत्यु हुनेमा हेटौंडा-१८ की ४८ वर्षीया महिला रहेको हेटौंडा अस्पतालका सूचना अधिकारी राजिव झा ले जानकारी दिए । झाका अनुसार महिलामा दुई दिन अघि साउन १३ गते एन्टीजेन परीक्षणमा कोरोना पुष्टि भएको थियो ।
उनलाई हिजो साउन १४ गते उपचारको लागि हेटौंडा अस्पतालमा भर्ना गरिएकोमा आज बिहान ४ बजे उपचारको क्रममा मृत्यु भएको अधिकारी झाले बताए । यो संगै जिल्लामा जिल्ला भित्रका कोरोनाबाट मृत्यु हुनेको संख्या १ सय ४२ पुगेको छ ।
मकवानपुर । मकवानपुरको बागमती गाउँपालिकामा निर्माण कार्यको शिलशिलामा खनिएको खाल्डोमा जमेको पानीमा डुबेर बालकको मृत्यु भएपछि स्थानीयले निर्माण कम्पनीमा तोडफोड गरेका छन् ।
आक्रोशित स्थानीयहरुले निर्माण कम्पनी कालिका कन्ट्रक्सनमा आगजानी तथा तोडफोड गरेका हुन् । मंगलबार राती स्थानीयले सोही कन्ट्रक्सनको बोलेरोमा आगजनी गरेका थिए । मकवानपुरको बागमती गाउँपालिका वडा ८ स्थित कालिका कन्ट्रक्सन नजिकको खाल्डोमा जमेको पानीमा डुबेर फापरबारी शान्तिपुरका १० वर्षीय सागर सारुको मंगलबार दिउँसो मृत्यु भएको थियो । त्यसपछि स्थानीयले नजिक रहेको कन्ट्रक्सनमा आगजानी गरेको जिल्ला प्रहरी कार्यलय मकवानपुरका प्रहरी प्रवक्ता जयश्वर रिमालले जानकारी दिए ।
स्थानीयले कन्ट्रक्सनले बनाएको पोखरीको कारण बालकको मृत्यु भएको भन्दै गएराति ९ बजे कन्ट्रक्सनको एक बोलेरो सवारीमा आगजानी, जेसिबि र कार्यलय परिसरमा तोडफोड गरेको प्रवक्ता रिमालले बताए । उनका अनुसार आगजानी र ताडफोडमा संलग्न एक जनालाई पक्राउ गरिएको छ । घटनाको आवश्यक थप अनुसन्धान भईरहेको जिल्ला प्रहरी कार्यलय मकवानपुरले जनाएको छ ।
यसैगरी मकवानपुरको बकैया गाउँपालिका ८ स्थित खजिलदमारमा खेत जोत्ने क्रममा ट्याक्टर पल्टिदा चालकको घटनास्थलमै मृत्यु भएको छ ।
खेत जोत्ने क्रममा प्रदेश नं ३–००१ त २५२ नंबरको ट्याक्टर दुर्घटना भइ ट्याक्टरले थिच्दा चालक बकैया–३ का २२ वर्षीय बुद्ध भोलोनको ज्यान गएको जिल्ला प्रहरी कार्यलय मकवानपुरले जनाएको छ ।घटनाको आवश्यक अनुसन्धान भईरहेको जिल्ला प्रहरी कार्यलय मकवानपुर जनाएको छ ।
यस्तै बकैया गाउँपालिकाकै एउटा सामुदायिक वनमा मानव कंकाल भेटिएको प्रहरीले जनाएको छ । बकैया गाउँपालिका ४ को गुराँस सामुदायीक वनमा मानव कंकाल (हड्डी) फेला परेको जिल्ला प्रहरी कार्यलय मकवानपुरका प्रहरी प्रवक्ता रिमालले जानकारी दिए ।
वनमा घाँसदाउरा गर्न गएका स्थानीयले मानव कंकाल देखेपछि प्रहरीलाई खबर गरेका थिए । भेटिएको मानव कंकालमा मानवको कम्मर तलको भाग रहेको र कंकाल नजिकै पुरुषको कपडा पनि फेला परेको हुँदा कंकाल पुरुषको हुन सक्ने प्रवक्ता रिमालले बताए ।
प्रहरी घटनास्थलमा पुगिसकेको र थप अनुसन्धान भईरहेको जिल्ला प्रहरी कार्यलय मकवानपुरले जनाएको छ ।
मकवानपुर । नेपालमा काेराेनाे भाइरस (कोभिड–१९) को डेल्टा प्रजातिको अर्को नयाँ भाइरस भेटिएको पुष्टि भएको स्वास्थ्य तथा जनसंख्या मन्त्रालयले जनाएकाे छ ।
मन्त्रालयले मंगलबार विज्ञप्ति जारी गर्दै परीक्षण गरिएका ४७ नमुनामा डेल्टा भेरिएन्ट पुष्टि भएको जनाएको छ । त्यस मध्य ३ वटामा डेल्टाकै नयाँ म्युटेन्ट पुुष्टि भएको हाे । पुष्टि भएका ३ वटा नयाँ डेल्टा म्युटेन्टको नाम एवाइवान राखिएको छ ।
मन्त्रालयका सह प्रवक्ता समीर अधिकारीले विज्ञप्ति जारी गर्दै जेठ मध्यदेखि असार मसान्तसम्म देशका विभिन्न भाग र उमेर समूहका व्यक्तिबाट संकलित नमुनाको परीक्षण गर्दा म्युटेन्ट पुष्टि भएको जनाएका छन् ।
भेटिएका भेरिएन्ट र म्युटेन्टहरु बढी संक्रामक तथा सबै उमेर समूहका व्यक्तिलाई असर पार्ने देखिएको समेत मन्त्रालयले जनाएको छ । भाइरसको नयाँ स्वरुप भेटिएसंगै जनस्वास्थ्यका मापदण्डलाई कडाइका साथ पालना गर्न समेत मन्त्रालयले आग्रह गरेको छ ।
