मकवानपुर । पछिल्लो समय महामारीको रुप लिइरहेको डेंगुको संक्रमणबारे बागमती प्रदेश सरकारले अनुसन्धान एवं निगरानी गर्ने भएको छ । प्रदेश सरकारले डेंगुको अनुसन्धान तथा निगरानीको लागि किटजन्य रोग अनुसन्धान तथा तालिम केन्द्रसँग सहमति गरेको छ ।
बागमती प्रदेश स्वास्थ्य मन्त्रालय र संघीय स्वास्थ्य मन्त्रालय अन्तरगत मकवानपुरको हेटौंडामा रहेको किटजन्य रोग अनुसन्धान तथा तालिम केन्द्रबीच यस्तो सहमति गरीएको हो ।
प्रदेशमा फैलिएको डेंगु रोगको अनुसन्धान एवं निगरानी गर्न मन्त्रालयले विशेष चासे राख्ने छ । स्वास्थ्य मन्त्री निमा लामाको उपस्थितिमा मन्त्रालयका सचिव बद्रीबहादुर खड्का र केन्द्रका निर्देशक डा विश्वबन्धु बगालेबीच सम्झौता पत्रमा हस्ताक्षरण गरिएको हो ।
केन्द्रले डेंगु प्रभावित बागमती प्रदेशका काठमाडौं, ललितपुर, भक्तपुर, चितवन र मकवानपुरमा यसको प्रभाव, संक्रमणको अवस्था, निगरानीका लागि अपनाउनुपर्ने रणनीतिलगायतका क्षेत्रमा अनुसन्धान गरि सुझाव दिने मन्त्रालयका प्रवक्ता दीपक तिवारीले जानकारी दिए ।
अनुसन्धान तथा निगरानीले बागमती प्रदेशमा डेंगु रोग नियन्त्रणका लागि गरिएका प्रयासलाई थप व्यवस्थित गर्न सहयोग पुग्ने उनको भनाई छ ।
बागमती प्रदेशमा अहिलेसम्म ६ हजार ६ सय ५४ जना डेंगुका बिरामी रहेका मन्त्रालयले जनाएको छ । स्वास्थ्य मन्त्रालयका अनुसार ललितपुरमा सबैभन्दा बढि ३ हजार ७९ जना, काठमाडौंमा १ हजार ७ सय ९७ जना, मकवानपुरमा १ हजार ४५ जना, चितवनमा १ सय ७९ जना, भक्तपुरमा १ सय ७० जना, धादिङमा १२१ जना, नुवाकोटमा १४, सिन्धुली ६६ जना, रामेछाप २२ जना, दोलखा १० जना, काभ्रे ४४, सिन्धुपाल्चोकमा ७ जना विरामी रहेका छन् ।
पछिल्लो समय डेंगुको कारण मृत्युहुनेहरुको संख्या पनि बढ्न थालेपछि यसबारे कडा निगरानी अबश्यक ठानिएको मन्त्री लामाले बताए । हेटौंडा उपमहानगरपालिकाले पनि पछिल्लो साता दैनिक लामुखट्टेको लार्भा नष्ट गर्ने अभियान जारी राखेको छ ।
मकवानपुर । मकवानपुर जिल्ला सहित देशैभर डेंगु संक्रमण बढ्दै गएकाे छ । गत साउन महिनादेखि अहिलेसम्म मकवानपुर जिल्लामा ५ सय ५८ जनामा डेंगी संक्रमण पुष्टि भएको स्वास्थ्य कार्यालय मकवानपुरले जनाएको छ । सबैभन्दा बढी संक्रमित जिल्लाको हेटौंडा उपमहानगरपालिका वडा नम्बर ४ र ५ रहेका छन् ।
हेटाैडा उपमहानगरपालिका क्षेत्रमा डेंगु संक्रमण बढ्दै गए पछि उपमहानगरपालिकाले नियन्त्रण अभियान सुरु गरेकाे छ ।स्वास्थ्य कार्यालय मकवानपुरको समन्वयमा उपमहानगरले शनिबार डेंगु नियन्त्रण अभियान सुरु गरेको हो । नगरमा डेंगु रोग फैलाउने लामखुट्टेको लार्भा नष्ट गर्ने अभियान सुरु गरिएकाे हेटाैडा उपमहानगरपालिकाले जनाएकाे छ ।
आज शनिवारबाट ४ दिन लामखुट्टेकाे लार्भा नष्ट गर्ने अभियान सुरु गरिएकाे स्वास्थ्य शाखाका जनस्वास्थ्य निरीक्षक कृष्ण यादवले जानकारी दिए । डेंगु संक्रमण फैलाउने लामखुट्टेले सफा पानीमा फुल पार्ने तथा लार्भा बनाउने भएकाेले सफा पानी जम्ने सवारी साधनका टायर, गमला, पानी जम्ने ठाउँ पहिचान गरी लामखुट्टे नष्ट गर्न स्प्रे गरिने तथा जनचेतना समेत फैलाउन सूचना प्रभाव गरिने उनले बताए । शनिबार हेटाैडा ४ क्षेत्रका माेटर ग्यारेज तथा माेटरसाइकल मर्मत केन्द्रहरुमा रहेका प्रयाेग नआउने टायरहरु नष्ट गरिएकाे उपमहानगरपालिकाले जनाएकाे छ ।
हेटौंडा उपमहानगरपालिकाकाे वडा नम्बर ४ र ५ मा सवारी साधन बनाउने ग्यारेजहरु धेरै रहेको तथा जनघनत्व समेत बढी भएको कारण यहाँ बढी संक्रमितहरु रहेको स्वास्थ्य कार्यालय मकवानपुरका सूचना अधिकारी लक्ष्मण घिमिरेले बताए । डेंगुको कारण हालसम्म मकवानपुरमा कसैको पनि ज्यान नगएको तर अस्पताल र मेडिकलहरुमा डेंगु बिरामीको चाप बढेकाेले उपचारमा समस्या हुँदै गएकाे उनले जानकारी दिए ।
मकवानपुर । लामखुट्टेको टोकाईबाट हुने डेंगु संक्रमण नेपालमा पछिल्लो समय बढ्दो क्रममा देखिएको छ । स्वास्थ्य तथा जनसङ्ख्या मन्त्रालयका अनुसार अहिलेसम्म ७२ जिल्लामा डेंगू संक्रमण देखिएको छ ।
बागमती प्रदेशमा सबै भन्दा बढी
देशभर साउनदेखि यता २ हजार एक सय ७९ जनामा डेंगु पुष्टि भएको स्वास्थ्य मन्त्रालयले जनाएको छ । मन्त्रालयका अनुसार सबैभन्दा बढी संक्रमित बागमती प्रदेशमा देखिएका छन् । हालसम्म बागमती प्रदेशमा १ हजार २ सय ९१ जनामा डेंगू संक्रमण पुष्टि भएको छ ।
यसैगरी, लुम्बिनी प्रदेशमा ५ सय ८३, प्रदेश नम्वर १ मा १ सय ४४, गण्डकी प्रदेशमा ५२, मधेश प्रदेशमा ४८, कर्णाली प्रदेशमा १७ र सुदूपश्चिम प्रदेशमा १४ जनामा संक्रमण पुष्टि भएको छ । देशभर २०७८ पुसदेखि यता ४ हजार १सय ४ जनामा डेंगु पुष्टि भएको मन्त्रालय अन्तर्गतको इपिडिमियोलोजी तथा रोग नियन्त्रण महाशाखाले जनाएको छ ।
हेटौंडामा डेंगु नियन्त्रण अभियान
हेटौँडा उपमहानगरपालिका क्षेत्रमा फैलदै गरेको डेंगु नियन्त्रणका लागि अभियान सुरु गरिएको छ । स्वास्थ्य कार्यालय मकवानपुरको समन्वयमा उपमहानगरले डेंगु नियन्त्रण अभियान सुरु गरेको हो । उपमहानगरपालिकाको जनस्वास्थ्य शाखाले नगरमा डेंगु रोग फैलाउने लामखुट्टेको लार्भा नष्ट गर्ने अभियान शनिबारबाट सञ्चालन गरिने जनाएको छ ।
शुक्रबार हेटौंडा उपमहानगरपालिकाले अभियानबारे अभिमुखिकरण कार्यक्रम गरि जानकारी गराएको हो । शनिवारबाट ४ दिने लार्भा नष्ट गर्ने अभियान सुरु गर्न लागिएको जनस्वास्थ्य निरीक्षक कृष्ण यादवले जानकारी दिए ।
साउन महिनादेखि अहिलेसम्म मकवानपुर जिल्लामा ५ सय ५८ जनामा डेंगी संक्रमण पुष्टि भएको स्वास्थ्य कार्यालय मकवानपुरले जनाएको छ । कार्यालयका सूचना अधिकारी लक्ष्मण घिमिरेका अनुसार सबैभन्दा बढी संक्रमित जिल्लाको हेटौंडा उपमहानगरपालिका–४ र ५ नंबर वडाका रहेका छन्
मकवानपुर । मकवानपुर जिल्लामा डेंगु संक्रिमितको सङ्ख्या ५ सय नाघेको छ । लामखुट्टेको टोकाईबाट हुने डेंगु संक्रमण बढेसँगै अस्पतालमा बिरामीको चाप समेत बढेको छ ।
स्वास्थ्य कार्यालय मकवानपुरका अनुसार मकवानपुर जिल्लामा साउन यता ५ सय ५८ जनामा डेंगु संक्रमण पुष्टि भएको छ । स्वास्थ्य कार्यालय मकवानपुरका सूचना अधिकारी लक्ष्मण घिमिरेले संक्रमितको सङ्ख्या बढीरहेकोले आवश्यक सतर्कता अपनाउन आग्रह गरे । मकवानपुर जिल्लाको हेटौंडा उपमहानगरपालिका–४ र ५ नंबर वडामा सबैभन्दा बढी संक्रमितहरु रहेको स्वास्थ्य कार्यालयले जनाएको छ । विद्यालयहरुको चौरमा समेत झाडी भएको कारण स्कुले बालबालिकाहरुलाई समेत डेंगुको संक्रमण हुने जोखिम बढेको छ ।
गत साउनको तेस्रो सातासम्म २८ जनामा देखिएको डेंगु ज्वरोको संक्रमितहरुको संख्या हाल ५ सय ५८ जना पुगेको छ । हेटौंडाका ४ र ५ नम्बर वडाका बढी ग्यारेजहरु धेरै रहेको तथा जनघनत्व समेत बढी भएको कारण यहाँ बढी संक्रमितहरु रहेको कार्यालयले जनाएको छ ।
डेंगुको कारण कसैको पनि ज्यान नगएको तर अस्पताल र मेडिकलहरुमा डेंगु बिरामीको चाप बढेको घिमिरेले बताए ।
जिल्लाको सरकारी अस्पताल हेटौंडा अस्पतालमा पछिल्लो दिनहरुमा डेंगीका लक्षणसहित ज्वरोका बिरामीहरुको संख्या पनि ह्वात्तै बढेको अस्पतालका मेडिकल सुपेरिटेण्डेन्ट डाक्टर रामचन्द्र सापकोटाले बताए ।
उनले अस्पतालमा दैनिक एक सय माथि ज्वरोका बिरामीहरु उपचारको लागि आउनेमा डेंगु परीक्षणको लागि सिमित किट रहेको बताउँदै डेंगु परीक्षणको लागि बाहिरी मेडिकल पठाउनु परेको समेत बताए । जिल्लामा सरकारी अस्पताल,स्थानीय पालिकाहरु स्थित स्वास्थ्य संस्था तथा बजार क्षेत्रका निजी स्वास्थ्य क्लिनिकहरुमा डेंगु परीक्षण हुँदै आएको छ ।
तर स्थानीय तहले डेंगु नियन्त्रणको लागि खासै पहल कदमी चालेको छैन । एक महिना अघि केही स्थानमा हेटौंडा उपमहानगरपालिकाले लामखुट्टे नष्ट गर्नको लागि स्प्रे गरेको भए पनि हाल नगरपालिकाले त्यसतर्फ चासो नै दिएको छैन । विभिन्न अनावश्यक निर्णय गरेको कारण विवादमा मुछिएको तर स्थानीयवासीको स्वास्थ्य सवालमा भने नगरपालिकाले सरोकार नराखेजस्तो व्यवहार गरेको भन्दै स्थानीयले गुनासो गरेका छन् ।
गएको आर्थिक वर्ष २०७८÷०७९ मा जिल्लामा १९५ जनामा मात्र संक्रमण देखिएको थियो । तर चालु आर्थिक वर्षको दुई महिनामै उक्त संख्या झण्डै तेब्बरले भएको छ । डेंगु संक्रमण फैलाउने लामखुट्टेले दिउँसो टोक्ने भएकोले घर, विद्यालय तथा कार्यालय वरपर लामखुट्टे बस्न झाडीहरु तथा जमेको पानीहरु हटाउन स्वास्थ्यकर्मीहरुले आग्रह गरेका छन् ।
मकवानपुर । नेपालमा पछिल्लो २४ घण्टामा थप ६ सय ५८ जनामा कोरोना सङ्क्रमण पुष्टि भएको छ । स्वास्थ्य तथा जनसंख्या मन्त्रालयका अनुसार सोमबारको भन्दा मगलबारको सङक्रमितको सङ्ख्या बढेको हो ।
सोमबार २ सय ८८ जनामा काेराेना सङ्क्रमण पुष्टि भएको मन्त्रालयकाे तथ्याङ्कले देखाँउछ । पछिल्लो २४ घण्टामा ३ हजार ३ सय ८१ पीसीआर परीक्षणमा ४ सय ५ जना र ३ हजार २ सय ६२ एन्टिजेन परीक्षणमा २ सय ५३ जना गरी ६ सय ५८ जनामा सङ्क्रमण पुष्टि भएको हो ।
त्यस्तै पछिल्लो २४ घण्टामा कोरोनाबाट थप १ जनाको मृत्यु भएको छ । योसँगै नेपालमा कोरोनाबाट मृत्यु हुनेको सङ्ख्या ११ हजार ९ सय ९३ पुगेको छ । अहिले नेपालमा सक्रिय सङ्क्रमितको सङ्ख्या ४ हजार २ सय ९६ पुगेको छ ।