मकवानपुर । बागमती प्रदेशका स्वास्थ्य मन्त्री निमा लामाले एड्स रोग रोकथामको लागि जनचेतना सबैभन्दा महत्वपूर्ण भएकाे बताएका छन् । विहीबार डिसेम्बर १ तारिख अर्थात विश्व एड्स दिवस २०२२ मा भएकाे प्रभातफेरी पछिकाे काेणसभामा बाेल्दै मन्त्री लामाले भने ‘जनचेतनाको अभावमा यस्ताखाले संक्रमण हुने भएकाेले सरकारले जनचेतनालाई प्राथमिकतामा राखेको छ ।’
दिवसकाे अवसरमा बागमती प्रदेश स्वास्थ्य निर्देशनालयको आयोजनामा “ एड्स अन्त्यका लागि समानताको सुनिश्चितता” भन्ने नाराका साथ हेटौँडामा प्रभातफेरी कार्यक्रम गरिएको छ । हेटौँडा अस्पतालबाट सुरु भएकाे प्रभातफेरी हेटौँडा १० बसपार्कमा कोणसभामा परिणत भएको थियो । कार्यक्रममा स्वास्थ्य राज्यमन्त्री कल्पना नेपाली, बागमती प्रदेश स्वास्थ निर्देशनालयका निर्देशक महेश्वर श्रेष्ठ लगायतले मन्तव्य राखेका थिए । कार्यक्रममा एड्सबारे जनचेतना फैल्याईरहेका विभिन्न संघसस्थाका प्रतिनिधि, प्रहरी तथा आम सर्वसाधरणको सहभागिता रहेको थियो ।

यसैगरी ३५ औं विश्व एड्स दिवसको अवसरमा मदन भण्डारी स्वास्थ्य विज्ञान प्रतिष्ठान हेटौंडाले जनचेतना अभिबृद्धि कार्यक्रम गरेको छ । प्रतिष्ठानले जनचेतनाको लागि र्याली, फल्यास मुभ र एड्स भएकाहरुको अनुभव साटासाट गरेको हो ।
जनचेतनामुलक र्यालीलाई सम्बोधन गर्दै प्रतिष्ठानका उपकुलपति विश्वराज जोशीले एड्स नियन्त्रणमा रहेपनि नसकिएकाले जनचेतनामुलक कार्यक्रमले अझैं चेतना फैलाउन मदत गर्ने बिश्वास व्यक्त गरे । उनले एड्स बारे आम जन समुदायले सही जानकारी पाउनुपर्नेमा जोड समेत दिए ।
हेटौंडा १० टिसिएनमा रहेको प्रतिष्ठानको कार्यालय अगाडिबाट सुरु भएको र्याली बसपार्क, जिल्ला प्रहरी कार्यालय परिसर, राप्ती रोड, बुद्ध चोक, सिमाचोक हुँदै सितलमहल चोक हुँदै हुप्रा चौरमा पुगेर कोणसभामा परिणात भएको र्याली एड्स संक्रमितले अनुभव साटा साट गरे पश्चात समापन भएको हो ।
र्यालीमा सहभागि प्रतिष्ठानमा अध्ययनरत बिद्यार्थीहरुले जनचेतनामूलक प्ले कार्डको प्रर्दशन गर्नुका साथै एड्सबाट बच्न र बचाउन आग्रह गरेका थिए । कार्यक्रममा प्रतिष्ठानका पदाधिकारी, प्राध्यापक, बिद्यार्थी, कर्मचारी लगायतकाको सक्रिय सहभागिता रहेको प्रतिष्ठानका सुबोध आचार्यले जानकारी दिए ।

मकवानपुर । सात महिना अघि स्थानीय तहको निर्वाचन भयो । स्थानीय जनप्रतिनिधि भनेका आमसर्वसाधारणको सबैभन्दा नजिक, सधैं उपलब्ध हुने प्रतिनिधिहरु हुन् । उनीहरुसँग आमसर्वसाधारणले धेरै अपेक्षा राख्नु स्वभाविक हो ।
अहिले देश प्रतिनिधि सभा तथा प्रदेश सभाको निर्वाचन संघारमा छ । निर्वाचनको माहोलमा होमिएका उम्मेदवारहरु घरदैलो कार्यक्रममा लागि परेका छन् । सबै उम्मेदवार व्यक्तिहरुको प्रतिबद्धता पत्र र दलको घोषणापत्रहरु सार्वजनिक भएका छन् ।
तर यस पटक पनि मतदाता तथा सर्वसाधारणहरुले अपेक्षालाई सम्बोधन हुने कार्यक्रम नेतृत्वले अघि सारेको छैन । सबै जसो दल, दलका उम्मेदवार ब्यक्तिहरु र स्वतन्त्र उम्मेदवारहरुले सामाजिक विषयबस्तुलाई कमै छोएका छन् । देखिने विकास निर्माणमा सबैको चासो र चिन्ता रहेको घोषणा पत्रहरुमा उल्लेख छन् । सामाजिक विषयबस्तुहरुलाई कमै प्राथमिकता दिएका दल तथा व्यक्तिहरुले मर्यादित महिनावारीको सवाललाई झनै स्मरण गरेका छैनन् ।
मुख्यगरी प्रतिष्पर्धामा रहने नेपाल कम्युनिष्ट पार्टी एमाले र सक्ताधारी गठबन्धनले सार्वजनिक गरेको घोषणा पत्रहरुमा सामाजिक सवाल नै एकदम थोरै छन् । त्यसमाथि महिला र बालबालिकाको सवालहरु साह्रै न्यून रहेको छ ।
राप्रपाले सार्वजनिक गरेको घोषणा पत्रमा पनि सामाजिक भन्दा भौतिक विकासका एजेण्डाहरु नै बढी छन् । मर्यादित महिनावारीको सवाल महिला वा बालिकाहरुको मात्रै सवाल हैन । यो महिला र बालिकाहरुको लागि मात्रै सम्बोधन, वा फाइदा पु-याउने सवाल हैन । यसबारे नेतृत्वमा कमजोर बुझाइ भएकै कारण यो विषय गौण बन्दै आएको महिला अधिकारकर्मीहरु बताउँछन् ।
महिला तथा बालिका माथि हुने हिंसाको सवालमा महिलावारी विभेदको सवालले सबैभन्दा बढी भूमिका निर्वाह गर्ने गरेको मर्यादित महिनावारी अभियन्ता राधा पौडेल बताउँछिन् ।
“संसारभरमै महिनावारी विभेद अभ्यासमा छ, शक्ति र पितृसक्ताको कारण महिनावारी विभेदको कारण नेतृत्वले पनि यो विषयको महत्व मान्न सकेका छैनन” पौडेलले भनिन् ।
मर्यादित महिनावारीको सवालमा सबैले कुरा बुझ्ने र नेतृत्वले यही अनुसार काम गर्ने हो भने महिलाको सबै प्रकारको हकको रक्षा हुने उनले बताइन् ।
महिनावारी विभेदको कारण नेपालको संविधानले व्यवस्था गरेको सम्मान पूर्वक बाँच्न पाउने हक,समानताको हक, स्वतन्त्रताको हक,छुवाछुत तथा भेदभाव विरुद्धको हक,शिक्षा सम्बन्धि हक, स्वास्थ्य सम्बन्धि हक जस्ता हकहरु हनन भएको हुन्छ ।
महिलाको सवालमा कति हिंसाको उजुरी प¥यो, कति महिला पिटीए, कति बलात्कृत भए, कति बाल विवाह रोकियो जस्ता कुरा मात्रै प्रगति हैनन् ।
“महिनावारीको सवाललाई मर्यादित बनाइनु अपरीहार्य छ” पौडेलले भनिन् “छोरीहरुलाई अग्रसर बनाउन घर नै बाधक बनेको छ, किन छोरीहरु आत्माविश्वास आत्माबल लिएर उठ्न सक्दैनन् भन्ने कुरा मुख्य हो ।”
पछिल्लो समय महिल तथा बालबालिकाको सवालमा जोडिएर महिनावारी प्याड वितरण गर्न थालिएपनि यस्ता कार्यक्रम प्रभावकारी भएका छैनन । विद्यालयहरुमा वितरण गरिने महिनावारी प्याड स्वास्थकर नभएको पौडेलले बताइन् ।
यता आफूहरुको चुनावी घोषणा पत्रमा महिनावारी विभेदको सवाल बारे कुनै एजेण्डा नराखिएको बारे दलका जिम्मेवार नेताहरुले सबै सवाल घोषणापत्रमा अटाउन नसकिए पनि आफूले जितेमा यो क्षेत्रमा पनि काम गर्ने प्रतिक्रिया दिएका छन् ।
महिला र बालिकाको चौतर्फि सवाललाई सम्बोधन गर्न सक्ने महिनावारी विभेदको सवालमा नेपालमा धेरै काम गर्न बाकी रहेको अभियन्ता पौडेले बताउँछिन् । सबै नीतिहरुको नीति राजनीति, र राजनीतिमा नेतृत्वलाई यो सवालको महत्व बुझाउन अझै बाँकी रहेको कारण सम्बोधन हम्मेसी नहुने गरेको उनले बताइन् । महिनावारी विभेद छाउगोठहरुमा मात्रै नभइ हरेक गाउँ र शहरको घरघर र मनमनमा रहेको उनले प्रतिक्रिया दिइन् ।
मकवानपुर । हेटौंडा उपमहानगरपालिका वडा नं. १७ हटियामा भएको निःशुल्क आँखा शिविरमा २ सय १० जनाको आँखा परीक्षण गरिएको छ ।
राधा माधव समिति नेपाल, जगद्गुरुत्तम मन्दिर अध्यात्म केन्द्र र डिभाईन युथ क्लव नेपाल, नेपाल नेत्र ज्योति संघको संयुक्त आयोजनामा भएको आँखा शिविरमा नेत्र रोग बिशेषज्ञ डाक्टरहरुले सेवा दिएका हुन् । प्रस्तावित श्री कृपालु अस्पताल हटिया १७ वडा कार्यालय नजिकै जुरेथुममा भएको शिविरमा नेपाल आँखा अस्पताल सिमराको प्राविधिक सहयोग रहेको थियो ।
नेपाल आँखा अस्पताल सिमराका डाक्टर कल्याण ढुङ्गाना, डाक्टर मुकेश दराई, आँखा स्वास्थ्य सहयोगी साजन प्रसाद यादव, पोखरा स्वास्थ्य विज्ञान प्रतिष्ठानकी स्वास्थ्यकर्मी अस्मिता काफ्ले, भक्तपुर अस्पतालकाकी स्वास्थ्यकर्मी अस्मिता पौडेलद्वारा बिरामीको आँखा परिक्षण गरिनुका साथै निशुल्क औषधि समेत वितरण गरेका थिए । प्रत्येक महिनाको अन्तिम शनिवार निःशुल्क स्वास्थ्य शिविरको आयोजना गरिदै आएको निरोज निरौंलाले जानकारी दिए ।
मकवानपुर । मकवानपुरमा २९ जना डेंगु संक्रमित थपिएका छन । पछिल्लो २४ घण्टामा जिल्लामा २९ जनामा डेंगु संक्रमण पुष्टि भए संगै संक्रमितको संख्या ५ हजार ९ सय ६५ पुगेको स्वास्थ्य कार्यालय मकवानपुरले जनाएको छ ।
कार्यालयका अनुसार उक्त संख्या गत साउन महिनादेखिको हो । संक्रमित मध्ये २ हजार ९ सय ६ जना पुरुष र २ हजार ३ सय ५९ जना महिला रहेका छन् । जिल्लाको १० स्थानीय तहमध्ये सबैभन्दा धेरै डेंगु संक्रमित हेटौंडा उपमहानगरपालिकामा रहेका छन् । उपमहानगरपालिकामा २ हजार २ सय ५२ जना पुरुष र १ हजार ८ सय १६ जना महिला गरी ४ हजार ६८ जनामा डेंगु संक्रमण पुष्टि भएको स्वास्थ्य कार्यालयले जनाएको छ ।
यस्तै, डेंगु संक्रमण पुष्टि हुनेमा मनहरी गाउँपालिकामा ४ सय २२ जना पुरुष र ३ सय ७४ जना महिला गरी ७ सय ९६ जना, थाहानगरपालिकामा १ सय ३ जना पुरुष र ६४ जना महिला गरी १ सय ६७ जना, मकवानपुरगढी गाउँपालिकामा ४३ जना पुरुष र २८ जना महिला गरी ७१ जना, भीमफेदी गाउँपालिकामा १८ जना पुरुष र २२ जना महिला गरी ४० जना रहेका छन् ।
यसैगरी, बकैया गाउँपालिकामा १५ जना पुरुष र २५ जना पुरुष गरी ४० जना, राक्सिराङ गाउँपालिकमा १६ जना पुरुष र ४ जना महिला गरी २० जना, बागमती गाउँपालिकाका ४ जना पुरुष र ३ जना महिला गरी ७, कैलाश गाउँपालिकाका ५ जना पुरुष र ३ जना महिला गरी ८ जना, हाल ठेगाना नखुलेका १४ जना पुरुष र १९ जना महिला गरी २९, अन्य जिल्लाका १२ जना पुरुष र ४ जना महिला गरी १६ जनालाई संक्रमण पुष्टि भएको स्वास्थ्य कार्यालयले जनाएको छ ।
कार्यालयका अनुसार, जिल्लामा संक्रमणका कारण हालसम्म हेटौंडा उपमहानगरपालिकाका १ जनाको मृत्यु भएको छ ।
मकवानपुर । मकवानपुर जिल्लामा सोमबार ८ जनामा डेंगु संक्रमण पुष्टि भएको छ । यो संगै जिल्लामा डेंगु संक्रमितको संख्या ५ हजार नाघेको स्वास्थ्य कार्यालय मकवानपुरले जनाएको छ ।
कार्यालयका अनुसार जिल्लामा हालसम्म २ हजार ८ सय जना पुरुष र २ हजार २ सय ४५ जना महिला गरी ५ हजार ४५ जनामा संक्रमण पुष्टि भइसकेको छ । हेटौंडा उपमहानगरपालिकामा मात्रै हालसम्म ३ हजार ९ सय ५५ जनामा डेंगु संक्रमण पुष्टि भइसकेको छ । हेटौंडामा २ हजार २ सय जना पुरुष र एक हजार ७ सय ५५ जना महिला संक्रमण देखिएको जिल्ला स्वास्थ्य कार्यालय मकवानपुरको तथ्याङ्कमा उल्लेख छ । आइतबार १३ जनामा डेंगु संक्रमण देखिएको थियो । सोमबार जम्मा ८ जनामा डेंगु संक्रमण देखिएको छ । यसले जिल्लामा पछिल्लो २ दिनदेखि डेंगु संक्रमणको संख्या घट्दो रहेको तथ्याङ्कले देखाउँछ ।
सोमबार संक्रमण पुष्टि भएका ८ जना हेटौंडा उपमहानगरपालिका क्षेत्रको रहेको स्वास्थ्य कार्यालयले जनाएको छ ।
