मकवानपुर । राष्ट्रिय जनसाँस्कृतिक महासंघ मकवानपुरले चियापान कार्यक्रम गरेकाे छ । नेपालीहरूकाे महान चाड बडादशैं लगायतका चाडपर्वहरूको अवसर पारेर महासंघले चियापान कार्यक्रम आयोजना गरेकाे हाे ।
चियापान कार्यक्रम बागमती प्रदेशका निवर्तमान मुख्यमन्त्री तथा नेकपा एमाले प्रदेश कमीटी ईन्चार्ज डोरमणी पौडेलकाे प्रमुख आतिथ्यतामा भएकाे हाे । कार्यक्रममा राष्ट्रिय जनसाँस्कृतिक महासंघ मकवानपुरका ईन्चार्ज आशाकाजी श्रेष्ठ, कलाकारहरु रविन्द्र चेपाङ, पेमा थापा, पम्फा मगर, घनश्याम ढकाल, किसु थापा, चन्द्रा देवी लामा, अनिल लामाले गायनकला प्रस्तुत गरेका थिए । त्यस्तै रचनात्मक प्रस्तुति तर्फ ह्याग्रीव आचार्य, छवि अनित्य लगायत अन्य कलाकारको प्रस्तुति रहेको थियो।
कार्यक्रममा नेकपा एमाले बागमती प्रदेश सदस्य तथा सामाजिक विकास राज्यमन्त्री जुनेली श्रेष्ठ, जिल्ला समन्वय समितिका प्रमुख रघुनाथ खुलाल, नेकपा एमाले पार्टी जिल्ला अध्यक्ष बद्री लम्साल, उपाध्यक्ष गोपाल श्रेष्ठ, सचिव एकलाल श्रेष्ठ, नेकपा एमाले जिल्ला सचिवालय सदस्य नवीन सिग्देल, सचिवालय सदस्य फुर्वा दोर्जे लामा, नेकपा एमाले जिल्ला कमिटी सदस्य सुनिल मुक्तान लगायतकाे उपस्थिति रहेकाे थियाे ।

यसैगरी राष्ट्रिय खेलकुद महासंघका केन्द्रीय प्रतिनिधि धर्म लामा, मदन भन्डारी स्वास्थ्य विज्ञान प्रतिष्ठान सदस्य रमिला घलान, जिल्ला खेलकुद महासंघका अध्यक्ष सबिन मुक्तान, नगर खेलकुद विकास समिति अध्यक्ष चन्द्र शाही, अखिल फोर्स मकवानपुरका प्रमुख मनिष मान श्रेष्ठ, मकवानपुरका वरीष्ठ संङ्गीत्कार परमेन्द्र महर्जन, साहित्यकार काल ज्यामी र राष्ट्रिय जनसाँस्कृतिक महासंघ मकवानपुरका सहईन्चार्ज मेम्वर लो लगायतको सहभागिता रहेकाे थियाे
कार्यक्रम रास्ट्रिय जनसाँस्कृतिक महासंघ मकवानपुरका अध्यक्ष राजु राम राउतको सभाध्यक्षतामा सम्पन्न कार्यक्रममा महासंघका सचिव रेश्मी कार्कीले स्वागत मन्तव्य व्यक्त गरेका थिए । कार्यक्रम रास्ट्रिय जनसाँस्कृतिक महासंघका केन्द्रीय सदस्य मसान उपासकले सन्चालन गरेका हुन् ।
मकवानपुर । मकवानपुरको भीमफेदी कारागारका कैदीबन्दीलाई दशैं मनाउन खसी तथा खाद्यान्न सहयोग गरिएकाे छ । नेपाली कांग्रेस बागमती प्रदेश संसदीय दलका नेता एवं मकवानपुर सभापति इन्द्रबहादुर बानियाँ र राक्सिराङ गाउँपालिकाले कारागारका कैदीबन्दीलाई दशैं मनाउन खसी र खाद्यान्न सहयोग गरेका हुन् ।
कारागारमा राक्सिराङ गाउँपालिकाका मात्रै ४१ जना रहेकाले पालिकाले आफ्नै खर्चमा दशैंमा खाद्यान्न लगायतका सामग्री वितरण गर्दै आएको छ । कारागारमा रहेकाहरुलाई प्रदेशसभा सदस्य बानियाँले व्यक्तिगत ६० हजार रुपैंया प्रदान गरेका छन् । सामाजिक एवं मानवीय भावनाको आधारमा कारागारमा रहेका कैदीबन्दीको दशैं सुखद बनाउन सहयोग गरेको बानियाँले बताए ।
जीउने आधार र विकल्प नभएर गाँजा खेती गर्नुपर्ने अवस्थाका व्यक्तिहरु जेलमा रहेको राक्सिराङ गाउँपालिकाका अध्यक्ष राजकुमार मल्लले बताए । गाउँपालिका सबैको अभिभावक भएकाले पालिकाका बासिन्दाको केही व्यक्ति कारागारमा रहँदा दशैं खल्लो नहोस् भनेर केही राहत दिएको उनले बताए । कार्यक्रममा पालिका उपाध्यक्ष निर्मला हिम्डुङ, कांग्रेस मनहरी गाउँपालिका सभापति प्रकाश वर्तौला, नेताहरु रञ्जन कालाखेती, विदुर थापा लगायतको उपस्थिति रहेको थियो ।
भीमफेदी कारागारमा लागूऔषध मुद्दामा मकवानपुरको हेटौंडा उपमहानगरका ४४, राक्सिराङका ४१, कैलाशका १४, बकैयाका ३, भीमफेदीका ३, मनहरीका १६ र थाहानगरपालिकाका २ जना गरी १ सय २३ जनाले जेल जीवन बिताईरहेका छन् ।
मकवानपुर । जेसीआई हेटौंडा लेडी जेसीजले बडादशैंको अवसरमा मकवानपुरका विभिन्न बालगृहमा आश्रित बालबालिकालाई मासु र चिउरा सहयोग गरेको छ । जेसीआई हेटौंडा लेडीले आइतबार भीमफेदी गाउँपालिकास्थित भीमफेदी बालगृह किताब राख्ने ३ थान दराजसहित ३० केजी कुखुराको मासु र २०केजी चिउरा सहयोग गरेको हो ।
यस्तै, सोमबार हेटौंडा–११ स्थित मामाघर नेपालमा २५ केजी मासु र २० केजी चिउरा तथा हेटौंडा–५ स्थित हाम्रो घर बालगृहमा ३५ केजी मासु र २० केजी चिउरा सहयोग गरेको छ । कार्यक्रममा भीमफेदी गाउँपालिकाका अध्यक्ष हिदम लामा, उपाध्यक्ष पार्वती राना, प्रमुख प्रशासकीय अधिकृत जीवन कुँवर, नेपाल बाल संगठन मकवानपुरका सभापति अशोक सारु मगर, जेसीआई हेटौंडा लेडीकी अध्यक्ष प्रतिमा श्रेष्ठको उपस्थिति रहेको थियो ।
जेसीआई हेटौंडा लेडीका पदाधिकारी तथा सदस्य एवम् गैरजेसीजमार्फत सहयोग संकलन गरी कुल ६२ हजार ७ सय रुपैयाँ बराबरको सामग्री सहयोग गरिएको जेसीआई हेटौंडा लेडीकी अध्यक्ष प्रतिमा श्रेष्ठले जानकारी दिईन् । भीमफेदी बालगृहमा ३१ जना, मामाघर नेपालमा २२ जना र हाम्रो घरमा २७ जना बालबालिका आश्रित छन् ।
‘मेरो दशैं खर्च बालबालिकालाई’ भन्ने अवधारणासहित बालगृहमा आश्रित बालबालिकालाई सहयोग गरिएको जेसीआई हेटौंडा लेडीकी अध्यक्ष प्रतिमा श्रेष्ठले बताइन ।
मकवानपुर । मकवानपुरमा दशैंकाे लागि पिङ बनाउँदै गर्दा १ जनाकाे मृत्यु भएकाे छ । दशैँको पिङ बनाउने क्रममा लडेर मकवानपुरको भीमफेदी गाउँपालिका-६ माण्डुका प्रेम लामाकाे मृत्यु भएको हाे मकवानपुर प्रहरीले जनाएकाे छ ।
सोमबार भीमफेदी ६ माण्डुमा दशैँको लागि लिङ्गे पिङ बनाउँदै गर्दा ५३ बर्षिय लामा लडेका थिए । पिङको लठ्ठा बाध्ने क्रममा पिङबाट खसेर घाइते भएका लामालाई तत्काल उद्धार गरी अस्पताल लगिएकोमा उपचारका क्रममा सोमबार राती हेटौँडा अस्पतालमा मृत्यु भएको प्रहरीले जनाइएको छ।
मकवानपुर । स्वास्थ्य मन्त्री बिरोध खतिवडाले हेटौंडा अस्पतालको अवलोकन तथा निरीक्षण गरेका छन् । मकवानपुरको १ मात्र सरकारी अस्पताल हेटौंडा अस्पतालको उनले निरीक्षण गरेका हुन् । सोमबार मन्त्री खतिवडाले मदन भण्डारी स्वास्थ्य विज्ञान प्रतिष्ठानद्वारा संचालित हेटौंडा अस्पतालको आइसियू कक्ष, कोभिड–१९ वार्डको समेत स्थलगत निरीक्षण गरेका हुन् ।
मन्त्री खतिवडालाई अस्पतालका प्रमुख मेडिकल सुपरिटेण्डेण्ड डा राचन्द्र सापकोटाले अस्पतालको बिषयमा जानकारी गराएका थिए । निरीक्षण पछी अस्पतालको सुधारका लागि आफुले सहयोग गर्न तयार रहेको मन्त्री खतिवडाले बताए ।
नेकपा एकिकृत समाजवादीकाे चियापान तथा शुभकामना कार्यक्रमकाे लागि गृह जिल्ला मकवानपुर आएका मन्त्री खतिवडाले ‘विगतको पार्टीमा जनताले विश्वास गरेर निर्वाचित गर्दा पनि ठूला भन्नेहरुले पेल्ने र ठेल्ने काम गरेको बताए ।’ जनताको मत र पार्टीको निर्देशनलाई आत्मसाथ गरेर काम गर्ने उनले बताएका छन् ।
यस्तै मन्त्री खतिवडालाई सोमबार हेटौंडामा मकवानपुरका २१ वटा क्रियाशील संस्थाले स्वागत एवम् सम्मान गरेको छ । मकवानपुरको विकासमा महत्वपूर्ण योगदान पु¥यएको भन्दै ती संस्थाहरुले संयुक्त कार्यक्रम आयोजना गर्दै मन्त्री खतिवडालाई स्वागत एवम् सम्मान गरेको हो ।
उक्त कार्यक्रममा मन्त्री खतिवडाले समग्र देशको स्वास्थ्य क्षेत्रको विकास सरकारको प्राथमिकतामा रहेको बताए । उनले मकवानपुर मात्र नभइ देशभरको ७७ वटै जिल्लाको स्वास्थ्य क्षेत्रको विकास आफ्नो जिम्मेवारी भएको बताए । उनले कोरोनाका कारण बालबालिकाहरु निकै नै जोखिम रहेकाले आगामी केही समयमा नै बालबालिकाहरुका लागि कोरोनाविरुद्धको खोपको व्यवस्था गर्ने गरी सरकारले काम गरिहेको जानकारी दिए । उनले बालबालिकाका लागि कोरोना विरुद्धको ४० लाख डोज खोप सम्झौता भइसकेको र थप ६० लाख डोज खोप भित्राउने प्रक्रिया जारी रहेको बताए ।