मकवानपुर । सत्तासिन दल जनता समाजवादी पार्टी (जसपा) ले मकवानपुर जिल्लाको १० वटै स्थानीय तहमा ५ दलीय गठबन्धन तोडेर प्रमुख तथा उपप्रमुख सहित वडाध्यक्षहरुमा उम्मेद्वारी दर्ता गरेको छ ।
सोमबार राती ११ बजेसम्म चलेको उम्मेदवारी दर्तामा जसपाले गठबन्धनबाट बाहिरिदै आफ्नो उम्मेदवारी दर्ता गरेको हो ।
जसपा मकवानपुरका सचिवालय सदस्य सुबोध घलानका अनुसार मकवानपुरमा ५ दलीय गठबन्धनले जसपालाई समावेश नगरेपछि १० वटै स्थानीय तहमा उम्मेद्वारी दर्ता गरेको र चुनावी प्रचारप्रसारमा अघि बढेको हो ।
बैशाख १७ गतेसम्म पनि मकवानपुरमा गठबन्धनले जसपालाई चासो नदिएमा जसपा पूर्ण रुपमा गठबन्धनबाट बाहिरिने र सबै दलहरुसंग मितव्ययी रुपमा चुनावी प्रतिस्पर्दामा जाने तयारी रहेको घलानको भनाइ छ ।
यता नेपाली कांग्रेसले पनि जिल्लाको विभिन्न स्थानीय तहमा गठबन्धनबाट बाहिरिदै आफ्नो उम्मेदवारी दर्ता गराएको छ । राती अबेरसम्म मनोनयन दर्ता चलेकोले यसबारे जानकारी संकलनको क्रममा रहेको मुख्य निर्वाचन अधिकृतको कार्यालयले जनाएको छ ।
मकवानपुर । आसन्न स्थानीय तहको निर्वाचनमा मकवानपुरको हेटौंडा उपमहानगरपालिकाको मेयर पदको लागि १७ जनाले मनोनयन दर्ता गरेका छन् ।
जसमा महिला ४ जना छन् । ४ मध्ये ३ जना महिला राजनीतिक दलको तर्फबाट र एक जना महिला स्वतन्त्र रुपमा मेयरको उम्मेदवार बनेकी हुन् ।
विभिन्न राजनीतिक दलबाट ११ जना र स्वतन्त्र ५ जना गरी १६ जनाले उम्मेदवारी दर्ता गराएको निर्वाचन अधिकृतको कार्यालय हेटौंडाले जनाएको छ । निर्वाचन कार्यतालिका अन्तर्गत् आइतबार ७ जनाले मेयरमा मनोनय दर्ता गराएका थिए । आज सोमबार ९ जनाको मेयरको लागि उम्मेदवारी दर्ता भएको हो ।
हेटौंडाको मेयरमा नेकपा एमालेबाट अनन्त पौडेल, सत्तारुढ गठबन्धनको तर्फबाट नेकपा एकीकृत समाजवादीको मीनाकुमारी लामा, नेपालका लागि नेपाली पार्टीबाट मुकुन्द प्रसाद आचार्य, नेपाल कम्युनिस्ट पार्टी मालेबाट केशव घर्ती, जनता समाजवादी पार्टी नेपालबाट दिपा लामा, राप्रपा दिपकबहादुर सिंहले मेयरमा उम्मेदवारी दर्ता गराएका छन् ।
निर्वाचन अधिकृतको कार्यालय अनुसार मेयरमा नेपाल मजदुर किसान पार्टी रमेशमान सिंह, उन्नत लोकतन्त्र पार्टी अयोध्याकुमार भट्टाराई, सचेत नेपाली पार्टी रामप्रसाद गौतम, नेपाल कम्युनिस्ट पार्टी समाजवादी, रोमनाथ भुर्तेल, मौलिक जरोकिलो पार्टी सिर्जना बर्तौला उम्मेदवारी परेको छ ।
स्वतन्त्रबाट कबिराज पाठक, पुरुषोत्तम रुपाखेती, उत्तमकुमार दुलाल, लिलाकुमारी आचार्य र देवराज पौडेलले उम्मेदवारी दर्ता गराएको मुख्य निर्वाचन अधिकृतको कार्यालय हेटौंडाका सहायक निर्वाचन अधिकृत सागर शर्माले जानकारी दिए ।
मकवानपुर । मकवानपुरको बागमती गाउँपालिका अध्यक्षमा सर्केश घलान र उपाध्यक्षमा फणिन्द्र तिमल्सिनाले उम्मेदवारी दिएका छन् । आसन्न बैशाख ३० गते हुने स्थानीय तहको निर्वाचनका लागि गाउँपालिकामा गठबन्धनको तर्फबाट अध्यक्षमा माओवादी केन्द्रका घलान र उपाध्यक्षमा नेपाली कांग्रेसका तिमल्सिनाले उम्मेदवारी दर्ता गराएका हुन् ।
सोमबार बागमती गाउँपालिकाकाे निर्वाचन अधिकृतकाे कार्यालयमा उपस्थित भएर घलान र तिमल्सिनाले उम्मेदवारी दर्ता गराएका छन् । घलान गाउँपालिकाका २०७४ सालमा निर्वाचित अध्यक्ष हुन् भने तिमल्सिना कांग्रेस गाउँपालिका सभापति छन् ।
यसैगरी पालिकाको ९ वटै वडाका वडाध्यक्षहरुले भने आ–आफ्नो पार्टीबाट उम्मेदवारी दर्ता गराएका छन् । नेकपा माओवादी केन्द्रका तर्फबाट बागमती गाउँपालिका वडा नम्बर १ को अध्यक्षमा यहुना राई, २ मा जनक पहरी, ३ मा कमान सिंह पाख्र्रिन, ४ मा किरण माझी, ५ मा विजय भोलन, ६ मा छेवाङ स्याङ्तान, ७ मा टिकालाल श्रेष्ठ, ८ मा पुर्ण बहादुर थिङ र ९ नम्बरमा अशोक न्यासुरले वडाध्यक्षमा उम्मेदवारी दर्ता गराएका छन् ।
यस्तै, नेपाली काङ्ग्रेसको तर्फबाट १ नम्बरमा काजीमान ब्लोन, २ मा छविलाल बोम्जन, ३ मा सरोज योञ्जन, ४ मा सोम घिसिङ, ५ मा तिलक माझी, ६ मा मणिराज राई, ७ नम्बरमा उक्तर भोलन, ८ मा शुक्र पाख्रिन र ९ नम्बर वडामा नरबहादुर पुलामीले उम्मेदवारी दर्ता गराएका छन् ।
मकवानपुर । राष्ट्रिय प्रजातन्त पार्टी नेपाल मकवानपुरले बैशाख ३० गते हुने स्थानीय निर्वाचनमा उम्मेदवारी दिएकाे छैन । केन्द्रीय स्तरमा एमाले र राप्रपा नेपालबीच भएको सहमति अनुसार एमालेको चुनाव चिन्हमा सूर्यमा मतदान गर्न राप्रपा नेपाल मकवानपुरले भनेकाे छ ।
राप्रपा मकवानपुरका जिल्ला अध्यक्ष गुरु प्रसाद सापकोटाले एक प्रेस विज्ञप्ती जारी गर्दै केन्द्रीय स्तरमा एमाले र राप्रपा नेपालबीच भएको सहमति अनुसार एमालेको सूर्य चिन्हमा मतदान गर्न लागिएको बताएका छन् ।
उनले राप्रपाका कार्यकर्ता,शुभेच्छुक र शुभचिन्तकहरुमा सूर्य चिन्हमा मतदान गर्न अपिल गरेका छन् । अध्यक्ष सापकोटाद्वारा जारी विज्ञप्तीमा भनिएकाे छ आसन्न स्थानीय तह सदस्य निर्वाचनका लागि चैत ३० गते भएको सहमति बमोजिम उक्त सहमतिलाई कार्यान्वयन गर्दै सुर्य चिन्हमा मतदान गर्न सम्पुर्ण कार्यकर्ता,शुभेच्छुक,शुभचिन्तकमालाई हार्दिक अपिल गर्दछाैं ।
मकवानपुर । नेकपा एमालेले थाहा नगरपालिकाको मेयर र उपमेयर सहित सवै वडामा उम्मेदवारी दर्ता गरेकाे छ । एमालेले साेमबार नगरपालिका मेयर उपमेयर वडा अध्यक्ष तथा सदस्यहरुमा उम्मेद्वारी दर्ता गराएको हाे ।
अचुतम प्रसाद ढकालले थाहाको मेयरमा नगर ईञ्चार्ज विष्णु प्रसाद ढकालको प्रस्ताव र नगर सह-इञ्चार्ज सुरेन्द्रमान प्रधानको समर्थनमा उम्मेदवारी दर्ता गराएका हुन् । यसैगरी रिता ठकुरीको प्रस्ताव र उत्तम लामिछानेको समर्थनमा कल्पना बलमीले उपमेयरमा उम्मेदवारी दर्ता गराएकी छन् ।
एमालेले र्याली र नाराजुलुस नगरी शान्तपूर्वक उम्मेदवारी दर्ता गर्न प्रस्तावक र समर्थकहरुसहितको उपस्थितिमा निर्वाचन अधिकृतको कार्यालय शिखरकोट पुगेकाे थियाे । एमालेले नगरकाे अधिकांश वडामा युवा उम्मेदवारलाई अघि सारेकाे छ ।
१ नम्बर वडामा प्रदिप प्रधान, २ मा गुप्तबहादुर कार्की, ३ मा सुजन कुमार रायमाझी, ४ मा रामराजा केसी, ५ मा बिष्णु बहादुर गुरुङ र ६ मा मनहरि भट्टले वडाअध्यक्ष पदमा उमेदवारी दर्ता गरेका छन् । यसैगरी वडा नम्बर ७ मा शम्भु बहादुर खत्री, ८ मा हेम थिङ, ९ मा रामकृष्ण बस्नेत, १० मा हिराबहादुर गमाल, ११ मा धनबहादुर गोले र १२ मा युवराज गोलेले उमेदवारी दर्ता गरेका छन् ।
सबै वडाहरुमा १/१ दलित महिला सदस्य, १/१ महिला सदस्य र २ सदस्यसहित कुल ६२ जनाले उमेदवारी दर्ता गराएका छन् ।