मकवानपुर । स्थानीय तह निर्वाचन -२०७९ को लागि उम्मेदवारी दर्ता गरेका ८ जना उम्मेदवार विरुद्ध उजुरी परेको छ । मकवानपुर जिल्लाका १० स्थानीय तहमध्ये ४ स्थानीय तहमा उम्मेदवार विरुद्ध उजुरी परेको हो ।
हेटौंडा उपमहानगरपालिका,मकवानपुरगढी, मनहरी र बकैया गाउँपालिकामा गरी ८ जना उम्मेदवारमा उजुरी परेको निर्वाचन अधिकृतको कार्यालयले जानकारी दिएको छ ।
मकवानपुरगढी गाउँपालिकामा पनि २ जना वडा अध्यक्ष विरुद्ध उजुरी परेकोमा रित नपुगेकोले उजुरी नै खारेज भइसकेको छ ।
अन्य उम्मेदवारको हकमा भने भोलि अन्तिम निर्णय हुनेछ । निर्वाचन अधिकृतको कार्यालयका अनुसार हेटौंडा–१९ मा एमालेको तर्फबाट वडा अध्यक्षमा उम्मेदवारी दर्ता गराएका नरनाथ सुवेदीमाथि करछलीको आरोपमा उजुरी परेको छ ।
मनहरी गाउँपालिका उपाध्यक्ष र मनहरी ३ नम्बर वडा अध्यक्षका उम्मेदवार बिरुद्ध उजुरी परेको छ । उजुरी पर्नेमा नेकपा एकीकृत समाजवादीबाट गाउँपालिकाको उपाध्यक्षमा उम्मेदवारी दर्ता गराएकी मनिला विष्ट विरुद्ध उजुरी परेको छ । उपाध्यक्षको उम्मेदवार विष्टलाई गाउँपालिका भित्र बेरुजु र अख्तियारको मुद्दा छानविन गरी असुल उपर गर्नुपर्ने रकम बाँकी रहेको भन्दै उजुरी परेको हो ।
३ नम्बर वडाका उम्मेदवार नेपाली कांग्रेसका अनन्तप्रसाद अर्यालमाथि विद्यालयको राजीनामा पत्र पेस गर्नुपर्ने मागसहित उजुरी परेको हो । बकैयामा ३ जना उम्मेदवारविरुद्ध उजुरी परेको निर्वाचन अधिकृतको कार्यलयले जानकारी दिएको छ ।
उजुरी पर्नेमा नेपाली कांग्रेसको तर्फबाट उपाध्यक्षका उम्मेदवारी छावा अधिकारी र नेपाल कम्युनिष्ट पार्टी माओवादी केन्द्रका भक्तबहादुर खत्री विरुद्ध उजुरी दर्ता भएको छ । ५ नम्बर वडाका नेपाल कम्युनिष्ट पार्टी माओवादी केन्द्रका उम्मेदवारमा उजुरी दर्ता भएको र १६ गतेसम्म छानविन हुने निर्वाचन अधिकृतको कार्यालयले बताएको छ ।
हेटौंडा उपमहानगरपालिका-४ बाट नेकपा एमालेका वडा अध्यक्षका उम्मेदवार नविन सिग्देल विरुद्ध उजुरी परेको मुख्य निर्वाचन अधिकृतको कार्यालय हेटौंडाका सहायक निर्वाचन अधिकृत सागर शर्माले जानकारी दिए । शर्माका अनुसार सिग्देलविरुद्ध अबैधानिक उपभोक्ता समिति गठन गरी राज्यकोषको पैसा हिनामिना गरेको आरोप छ । आरोप पुष्टि भएको खण्डमा उम्मेदवारको उम्मेदवारी खारेज हुनेछ ।
मकवानपुर । स्थानीय तह निर्वाचनकाे लागि हेटौंडा उपमहानगरपालिका वडा नम्वर–४ मा सत्तारुढ गठबन्धनले संयुक्त वडा भेला गरेकाे छ । संयुक्त वडा भेलामा नेता तथा कार्यकर्ता, शुभेच्छुक र मतदाताहरुसँग साक्षात्कार समेत गरेको छ ।
भेलामा गठबन्धनबाट हेटौंडा उपमहानगरपालिकाको मेयर र उपमेयर पदका उम्मेदवार मिना लामा र राजेश बानियाँले आम मतदाताले गठबन्धनका उम्मेदवारलाई मतदान गरी मुलुकबाट प्रतिगमनकारीहरुको अन्त्य गर्नुपर्ने बताए ।
सबै राजनीतिक दल, नागरिक समाज, पत्रकार एवम् बौद्धिक वर्गहरुसँग छलफल गरी आवश्यक राय, सुझाव संकलन गरी समृद्ध हेटौंडा उपमहानगरपालिका बनाउने दृढ संकल्पसहित आफूहरु चुनावी अभियानमा होमिएको र सबैको सहयोग पाए गठबन्धनकै उम्मेदवारहरुले जित हासिंल गरी जनताको पक्षमा काम गर्नेमा कुनै शंका नभएको उनीहरुको भनाई छ ।
कार्यक्रममा गठबन्धनबाट हेटौंडा–४ को वडा अध्यक्ष पदका उम्मेदवार हरिप्रसाद पौडेलले आफु यसअघि पनि उम्मेदवार भई झिनो मतले पराजित हुनुपरेका कारण जनहितका काम गर्ने योजना अधुरै रहेपनि यस पटक पुरा गर्ने बताए । उनले आफु सेवाभावसहित राजनीतिमा आएको भन्दै वडा अध्यक्ष भएपश्चात राज्यबाट प्राप्त गर्ने सेवा सुविधा सबै आर्थिक विपन्नता भएका गरिब दुखी जनताको लागि खर्च गर्ने प्रतिवद्धता जनाए ।
‘हामी भोलिबाटै घरदैलो अभियानमा जाँदै छौँ । उहाँहरुको मनोभावना अनुरुप नै योजनाहरु बनाउने छौँ । वडा अध्यक्ष भएपछि सोही योजनाहरुलाई कार्यान्वयन गरी समृद्ध वडा निर्माण गर्नुका साथै जनतालाई सहज ढंगबाट सेवा प्रवाह गर्नेछौँ ।’ उनले भने– ‘चुनावी अभियानमा सहयोग/सहकार्य गरी एक पटक सेवा गर्ने मौका प्रदान गरिदिनु हुन अपिल गर्दछु ।’
कार्यक्रममा नेकपा एकीकृत समाजवादी बागमती प्रदेश संसदीय दलकी मुख्य सचेतक मुनु सिग्देल, माओवादी केन्द्रकी केन्द्रीय सदस्य प्रमिला पुलामी, नेपाली कांग्रेसका नेता प्रदिप कोइराला, समाजवादीका नेता ललित बस्नेतलगायतका नेता तथा सत्ता गठबन्धनका आम कार्यकर्ताहरुको उपस्थिति रहेको थियो ।
मकवानपुर । मकवानपुर प्रहरीले हराएको मोटरसाइकल फेला पारी सम्बन्धित धनीलाई बुझाएको छ । प्रहरीले हेटाैडामा हराएकाे २ वटा माेटरसाइकल फेला पारी धनीलाई बुझाएको हाे ।
हेटौंडा १० का ५८ वर्षीय भवनाथ भट्टराईको १३ वैशाखमा आफ्नै घरबाट हराएको ना. ६३ प २१६ नम्बरको मोटरसाइकल हेटौंडा-१ चौकीटोलमा फेला पारी भट्टराईलाई बुझाइएको जिल्ला प्रहरी कार्यालय मकवानपुरले जानकारी दिएकाे छ ।
त्यसैगरी हेटौंडा-१० का ४५ वर्षीय खड्क सिं वाईवाको मोटरसाइकल १३ वैशाखमा हराएको थियो । हेटौंडा- ४ मा पार्किङ गरेर राखेको बा.प्र. ०३–००५ प ३११७ नम्बरको मोटरसाइकल हेटौंडा-२ मा फेला पारी वाईवालाई बुझाइएको मकवानपुर प्रहरीले जनाएको छ ।
मकवानपुर ।मातातिर्थ औंसीको सन्दर्भ पारेर हेटौंडा ७ को किरण चोक आमा समूहले टोलको ज्येष्ठ नागरिक आमाहरुको सम्मानमा विशेष कार्यक्रम गरेको छ ।
टोल विकास संस्थाको आयोजनामा सामुहिक रुपमा आमाको मुख हेर्ने कार्यक्रम गरिएको हो । समूहले प्रत्येक वर्ष आमाको मुख हेर्ने दिनको पूर्वसन्ध्यामा टोलको आमाहरुको सम्मानमा विशेष कार्यक्रम गर्ने गरेमा यसवर्ष पनि १८ जना ज्येष्ठ नागरिक आमाहरुको लागि सम्मान तथा मिष्ठान्न भोजन गराएको हो ।
साथै शिवशक्ति एकादशी भजन समूहले आमाहरुको लागि भजन कार्यक्रमको समेत प्रस्तुती गरेको थियो । समूहको अध्यक्ष साबित्री अधिकारीको अध्यक्षतामा भएको कार्यक्रममा भजन समूहका कोषाध्यक्ष बिष्णु नरालको उपस्थिती रहेको थियो ।

दिव्यसेवा निकेतन संरक्षक सुनिता बाईजीको प्रमुख आथित्यतामा कार्यक्रम गरिएको हो । कार्यक्रममा किरण चोक टोल विकास संस्थाका अध्यक्ष राजु अधिकारी ‘यात्री’ निवर्तमान अध्यक्ष शंकर अर्याल, आमा समूहको संस्थापक अध्यक्ष इश्वरी अर्याल, निवर्तमान अध्यक्ष सुनिताकुमारी थिङ, पुर्व अध्यक्षहरु मुरली पौडेल र पशुपति जमर्कट्टेललगायतको उपस्थिती
रहेको थियो ।
ज्येष्ठ नागरिक आमाहरुलाई मनोरञ्जन प्रदान गर्ने र उहाँहरुको सम्मानमा टोल साथै साथ छ भन्ने आभाष गराउन समूहले यस्तो कार्यक्रम गर्दै आएका अध्यक्ष अधिकारीले बताइन् । कार्यक्रममा लागि समूहका सदस्यहरुले स्वइच्छिक रुपमा फलफूल तथा मिठाइहरु उपलब्ध गराएको उनले बताइन् । यस वर्षको आमाको मुख हेर्ने दिन अर्थात माता तिर्थ औंसी आगामी १७ गते परेको छ ।
मकवानपुर । सात्ताधारी गठबन्धनबाट नेकपा एकीकृत समाजवादीलाई हेटौंडाको मेयर पद प्राप्त हुँदा समेत आफूले मेयरको टिकट नपाएपछि पार्टी जिल्ला अध्यक्ष श्रीधर पोखरेलले पार्टी त्यागेका छन् ।
उनले स्थानीय तहको भागबण्डा गर्न सत्ता गठबन्धन चुकेको आरोप लगाएका छन् । आज हेटौँडामा पत्रकार सम्मेलन गरी अध्यक्ष पोख्रेलले जिल्लास्तरीय गठबन्धन संयन्त्र र टिकट वितरणका विषयमा पार्टीले चालेको कदमको विरोध गर्दै पार्टी परित्यागको घोषणा गरेका हुन् ।
मकवानपुर स्वास्थ्य तथा जनसंख्यामन्त्री विरोध खतिवडाको गृह जिल्ला हो । पोख्रेलले ८ महिनाअघि समाजवादीको नेतृत्व सम्हालेका थिए । आसन्न स्थानीय तहको निर्वाचनमा उनले हेटौंडा उपमहानगरको मेयर पद दाबि गरेका थिए । लामो रस्सकस्सीपछि अन्तिम समयमा बहालवाला उपमेयर तथा पार्टी उपाध्यक्ष मिनाकुमारी लामाले मेयर टिकट पाएपछि उनी थप रुष्ट भएका थिए ।
पोख्रेल तत्कालीन एमालेमा रहँदा ओली निकट नेता हुन् । पूर्वमुख्यमन्त्री डोरमणि पौडेलसँग असन्तुष्ट भएपछि उनी विरोध खतिवडासँग नजिकिएर मेयर पदकै आश्वासनमा समाजवादी रोकेका थिए ।
पोख्रेलसँग पार्टी जिल्ला सचिवालय सदस्य वीरेन्द्र डीसी, देवेन्द्र कोइराला, उत्तम न्यौपाने, गोपालबहादुर स्याङ्तानले सामूहिक रूपमा पार्टी परित्याग गरेका हुन् ।
पोख्रेलले मकवानपुर जिल्लाको मनहरी, राक्सिराङ र कैलाश गाउँपालिकामा पार्टीले गठबन्धन गर्न असफल भएको र परिचित र संगठन निर्माणका काममा लागेकाहरूलाई बाइपास गरेका पनि उल्लेख गरे ।
खतिवडाको व्यक्तिगत इच्छाका कारण पार्टीले गठबन्धनमा अवसर चुकाउन बाध्य भएको गुनासो गरेका पोखरेलले एमालेबाट विद्रोह गरेको ८ महिना नपुग्दै पार्टीभित्र हुर्काउन खोजिएको व्यक्तिवाद प्रवृत्तिको विरुद्धमा आफू रहेको बताए ।

“आजभन्दा ठिक ८ महिना अगाडि नेपाल कम्युनिष्ट पार्टी एमालेबाट बिद्रोह गरि सुशासन, पार्टीलाई बिधि र पद्धती संगत ढंगबाट संचालन, पार्टीका नेता कार्यकर्ताको मुल्यांकन, गुटबन्दिको अन्त्य, नेपालको कम्युनिष्ट आन्दोलनको पुनर्गठन र एक व्यक्ति एक पद लगायतका सुन्दर नारा दिएर भएको विद्रोह ८ महिना नपुग्दै त्यस पार्टी भित्र जबर्जस्त ढंगबाट हुर्काउन खोजियो” उनले विज्ञप्तिमा भनेका छन् ।
“व्यक्तिबाद सरकारमा गएको मन्त्रि र राजकिय ठाउँमा पाएका अवसरमा पठाईएको व्यक्तिमा देखिएको नैतिक आचरणमा ह्रास र भ्रस्टाचारमा लिप्स मनोवृत्ति र दाश बनाउने सोच हाबी हुदै पार्टी नभई केहि व्यक्तिको स्वार्थ पुरा गर्न कार्यकर्ताको समस्यालाई नजर अन्दाज गर्दै प्राइभेट कम्पनीमा रुपान्तरण गर्ने गलत मनसायलाई टुलु टुलु हेरेर बसकिएन ।”
पोखरेल मकवानपुरका पुराना कम्युनिष्ट नेता हुन् । उनले आफू विगत ८ महिना नेकपा एस मकवानपुर जिल्लाको अध्यक्षमा रहदा साथ सहयोग गर्नेहरुलाई धन्यबाद दिदै कम्युनिष्ट आन्दोलनको रक्षाका लागि बिद्रोहमा निस्केको बताए ।