मकवानपुर । हेटाैंडा उपमहानगरपालिका वडा नम्बर १५ स्थित वनदेवी आधारभूत विद्यालयमा निबन्ध प्रतियाेगिता भएकाे छ । आधारभूत तहकाे विद्यार्थीहरु बीच ‘कोरोनाले शिक्षामा पारेको प्रभाव’ विषयमा निबन्ध प्रतियाेगिता भएकाे हाे ।
हेटौंडा उपमहानगरपालिकाको आर्थिक सहयोग तथा वनदेवी आधारभूत विद्यालयको आयोजनामा निवन्ध प्रतियाेगिता साेमबार भएकाे हाे । उपमहानगरपालिकाका ७, ८, १४ र १५ नम्बर वडाका सामुदायिक तथा संस्थागत विद्यालयका कक्षा ६ देखि ८ सम्मका विद्यार्थी बीच ‘कोरोनाले शिक्षामा पारेको प्रभाव’ विषयक स्थलगत निबन्ध प्रतियोगिता भएकाे विद्यालयका प्रधानाध्यापक जयप्रसाद पाेखरेलले बताए ।
४ वडाका १६ वटा विद्यालयका विद्यार्थी सहभागी भएका प्रतियाेगितामा तासिर इङ्लिस बोर्डिङ स्कुलकी सिमोन भट्टराई प्रथम, वनदेवी आभारभूत विद्यालयकी उर्जना घले द्वितीय, नवज्योति माध्यमिक विद्यालयकी प्रमिला थिङ तृतीय भएका थिए । यसैगरी माउन्ट एभरेष्ट इङ्लिस बोर्डिङ स्कुलकी नितिशा बराल र चन्द्रोदय माध्यमिक विद्यालयकी विशाका देउला सान्त्वना पुरस्कार प्राप्त गरेका छन् । प्रतियाेगितामा प्रथम, द्धितीय, तृतीय र सान्त्वना भएका सफल विद्यार्थीहरूले क्रमशः ६ हजार, ४ हजार, २ हजार र १ हजार ५ सय नगद सहित प्रमाणपत्र प्राप्त गरेका छन् ।
निवृत्त शिक्षक ध्रुबकुमार भुजेल , शिक्षकहरू ज्योती न्यौपाने र अनु रोक्का निर्णायक रहेकाे प्रतियोगिता विद्यालय व्यवस्थापन समितिका अध्यक्ष डिलबहादुर घिमिरेको अध्यक्षता तथा हेटाैडा उपमहानगरपालिका शिक्षा विकास महाशाखाका प्रमुख गंगाधर रिमालको प्रमुख आतिथ्यतामा भएकाे हाे ।
प्रतियाेगितामा हेटौंडा १५ का वडा अध्यक्ष सुनिल मोक्तन, शिक्षक महासंघ मकवानपुरका जिल्ला अध्यक्ष जिधराज ढकाल, १५ नं. वडा प्रतिनिधि मेनु विश्वकर्माको उपस्थिति रहेको थियाे ।
मकवानपुर । बागमती प्रदेशको प्रदेश सभा बजेटबाट छलफल नै नगरी स्थगित गरिएको छ ।
नेकपा एमालेको अवरोधका कारण बागमती प्रदेशको प्रदेशसभा बैठक स्थगित गरिएको हो । आगामी आर्थिक बर्षको प्रस्तावित बजेटप्रति असन्तुष्टि जनाउँदै एमाले संसदमा अवरोध गरेका थिए ।
संसद सुचारू भएपछि समय मागेर बोल्दै एमालेका प्रमुख सचेतक दिपक निरौलाले बजेट सत्तापक्ष केन्द्र भएको र मूख्यमन्त्रीले गरेको राजनीतिक सहमति विपरीत बजेट आएको बताएका थिए ।
बजेटमा सिमेन्ट उद्योग माथिको कर हटाउने प्रस्ताव गरिएको प्रति एमालेले आपत्ति जनाएको छ । यो प्रस्ताब हटाउनु माग राखेको एमालेले
राजनीतिक सहमति आवश्यक भएकाले संसद अघि बढाउन नसकिने बताएको छ ।
निरौलाले बोले लगत्तै एमाले सांसदहरू उठेर संसदमा अवरोध गरेका थिए । त्यसपछि सभामुख सानुकुमार श्रेष्ठले बैठक सोमबार विहान ११ बजे बस्ने गरि स्थगित गरेका हुन् ।
मकवानपुर । आजलाई आव्हान गरिएको नगरसभा २ घण्टापछि सुरूहुने भएको छ । १ बजेको लागि बोलाईएको नगरसभामा एमालेबाट निर्वाचित कार्यपालिका सदस्यहरू आज पनि अनुपस्थित जनाउने निर्णय गरेका थिए ।
नेकपा एमाले सम्बद्व ५४ जना बहुमत सदस्यले पेश गरेकाे संसाेधन प्रस्ताव नगरसभापछि कानुनी परामर्श गरि प्रक्रिया अगाडि बढाउने भएको सहमति भएपछि हेटौंडाको एघारौं नगरसभा आजै हुने भएको हो ।
यसैगरी विषयगत समितिहरू सहमतिकाे आधारमा निर्माण गर्ने, बजेट निर्माणमा सामुहिक छलफलबाट टुङ्गाे लगाउने प्रतिबद्वता नगर प्रमुखबाट भएपछि ३ बजे शुरू हुने भएकाे वडा अध्यक्ष नविन सिग्देलले बताए ।
मकवानपुर । वैदेशिक रोजगारको क्रममा भएको ठगी, मृत्यु तथा विदेशी रोजगारदाता कम्पनी वा व्यक्तिसँग असुल गर्न बाँकी २ करोड ५२ लाख ५७ हजार रुपियाँ सम्बन्धित परिवारलाई उपलब्ध गराइएको छ ।
हेल्भिटास नेपालको सहकार्यमा मकवानपुरमा सञ्चालित सुरक्षित आप्रवासन स्रोत केन्द्रले उक्त रकम पीडितलाई फर्काउन सफल भएको हो । पीडितहरुलाई न्यायमा पहुँच वृद्धिको लागि सहयोग गर्ने क्रममा १८ वटा ठगीको, १५ वटा उद्दार तथा २४ वटा मृत्युको घटनामा उक्त रकम दिलाउन सफल भएको सुरक्षित आप्रवासन सामी परियोजना कार्यक्रम संयोजक अन्जिता थापा मगरले बताइन् । लामो समयको पहलपछि उक्त रकम पीडितलाई दिलाउन सफल भएको उनले बताइन् ।
केन्द्रमा ठगीको ५० वटा, उद्दारको २५ वटा तथा मृत्युको २८ वटा केस दर्ता भएकोमा अन्य केसहरुको काम प्रक्रियामा रहेको बताइएको छ ।
विदेश जान चाहनेहरुलाई आवश्यक सूचना तथा परामर्श, विदेशमा रहेकाहरुको परिवारलाई वित्तिय शिक्षा तथा मनोसामाजिक परामर्श, र वैदेशिक रोजगारबाट फर्किएकाहरुबाट सूचना तथा अनुभव आदन प्रदानको लागि यो परियोजनाले समुदायस्तरका काम गर्ने गरेको छ ।
एकीकृत ग्रामिण विकास सेवा संस्थाको साझेदारीमा यो परियोजना स्थानीय तहमार्फत नै सञ्चालन हुदैं आएको छ । केन्द्र मार्फत गतवर्ष ६४ जनालाई मनोसामाजिक परामर्श प्रदान गरिएको थियो भने यो वर्ष ८५ जनालाई यो सेवा प्रदान गरिएको जिल्ला प्रशासन कार्यालय मकवानपुर, सुरक्षित आप्रवासन परियोजना अन्तरगत मनोसामाजिक परामर्शकर्ता पार्वती बिकले बताइन् ।
परियोजनाको वार्षिक समिक्षाको लागि आयोजना गरिएको कार्यक्रममा हेल्भिटास नेपाल कार्यक्रम अधिकृत उमा पौडेलले केही स्थानीय तहहरुले वैदेशिक रोजगारको सवाललाई महत्व दिएको भए पनि धेरै जसो स्थानीय तहहरुले वैदेशिक रोजगारको सवाल आफ्नो सवालको रुपमा नलिएको गुनासो गरिन् ।
“स्थानीय तहहरुले नीति तथा कार्यक्रम ल्याएका छन्, धेरैले वैदेशिक रोजगारको क्रममा हुने समस्या, चुनौती तथा त्यसलाई व्यवस्थित गर्न आवश्यक तयारीबारे कुनै नीति नै लिएका छैनन्” पौडेलले भनिन् ।
कार्यक्रममा हेटौंडा उपमहानगरपालिका सामाजिक विकास महाशाखा प्रमुख विष्णुकुमारी लामिछानेले परिवारलाई समृद्ध, सुमधुर र वित्तिय रुपमा सफल बनाउन यो परियोजनाको महत्वपूर्ण योगदान रहेको बताइन् । विगतका जनप्रतिनिधिहरुले भौतिक विकास निर्माणमा चासो राखेको भएपनि अवका जनप्रतिनिधिहरुले सामाजिक विकासमा ध्यान दिने अपेक्षा आफूले राखेको लामिछानेले बताइन् ।
एकीकृत ग्रामिण विकास संस्थाका सचिव मिनराज पौडेलेको अध्यक्षतामा भएको कार्यक्रममा समुदाय स्तरमा रहेर सेवा प्राप्त गरेका महिलाहरुले आफ्नो विगतको समस्या र सफलताको बारेमा अनुभव आदन प्रदान गरेका थिए ।
मकवानपुर । नेकपा एमालेबाट हेटौंडा उपमहानगरकार्यपालिका सदस्यमा विजयी भएकाहरुको विरोधको कारण ३ दिन अघि स्थगित नगर सभा आज दिउँसो १ बजेलाई बोलाइएको छ ।
एमालेबाट वियजी कार्यपालिका सदस्यहरुले आफूहरुको माग पुरा गर्न दबाब दिंदै नगरसभामा अनुपस्थित भएपछि स्थगित नगरसभा नगर प्रमुख मिनाकुमारी लामाले आजको लागि बोलाएकी छन् ।
कार्यपालिका बैठकमा आफूहरुको माग बेवास्ता गरेको भन्दै नगर सभामा एमालेबाट विजयी सदस्यहरु सहभागी नभएका हुन् । बहुसंङ्ख्य सदस्यहरु अनुपस्थित हुदा गाँउ नगर जिल्ला सभा सन्चालन ऐन २०७५ को दफा ५ को उपदफा १ बमोजिम गणपुरक संख्या नपुगेकोले १० असारमा बोलाइएको नगरसभा स्थगित गरिएको थियो ।
उक्त दफाको उपदफा २ बमोजिम नगर प्रमुखद्धारा अर्को नगरसभा आज आव्हान गरिएको हो । कार्यपालिकाका एमाले सदस्यहरुले कार्यपालिका बैठक सञ्चालन कार्यविधि शंसोधनको माग राख्दौ लगातार बैठकमा अनुपस्थित हुँदै आएका छन्, यता गठबन्धनबाट विजयी मेयर उपमेर र कार्यपालिका सदस्यहरुले कार्यविधि सच्याउनमा चासो देखाएका छैनन् ।
नगरप्रमुख र उपप्रमुखले हठ र घमण्ड गरि बैठक स्थगित गरेको आरोप लगाउँदै आएको नेकपा मकवानपुरले आफूहरुको माग सम्बोधन नभएको कारण आजको सभामा पनि उपस्थित नहुने बताएको छ।
हेटौंडा उपमहानगरपालिकाले आगामी आर्थिक वर्षका लागि नीति तथा कार्यक्रमहरु कार्यान्वयन गर्न २ अर्ब ७१ करोड ७९ लाख बजेट आज १० असारमा सार्वजनिक गर्ने तयारी गरेको छ । नीति तथा कार्यक्रम र बजेटको तयारी गर्दा वडा अध्यक्षहरुसँग कुनै पनि सहकार्य नगरिएको प्रति वडा अध्यक्षहरुले आक्रोस पोखेका छन् ।
१८ जना कार्यपालिका सदस्य रहेको एमालेले बैठक संचालन कार्यविधि–२०७४ को १५(२) र १५(३) मा रहेको ब्यवस्थालाई संसोधन गरिनुपर्ने माग राखेको छ । हेटौँडा उपमहानगरपालिकाको कार्यपालिकामा एमालेबाट १८ जना, कांग्रेसबाट ९ तथा नेकपा एकिकृत समाजवादीबाट २ जना सदस्यहरु रहेका छन् । नगरसभामा पनि नेकपा एमाले ५१ जना सहित पूर्ण बहुमतमा छ । कानुनी व्यवस्था अनुसार असार १० गते सवै स्थानीय तहले नीति तथा कार्यक्रम र बजेट प्रस्तुत गर्नु पर्ने तथा असार मसान्तमा प्रस्तुत नीति तथा कार्यक्रम पारित गर्नु पर्ने हुन्छ ।