मकवानपुर । प्रधानमन्त्री केपी शर्मा ओलीले धरहराको उद्घाटन गरेका छन् । शनिवार विशेष कार्यक्रम बीच धरहरामा राखिएको शिलालेख अनावरण गरे प्रधानमन्त्री ओलीले नव निर्मित धरहराकाे उद्घाटन गरेका हुन् धरहराकाे २० औँ तलाको बालकोनीमा पुगेर प्रधानमन्त्री ओलीले पुष्प वृष्टिसमेत गरे ।
कोरोना संक्रमणको जोखिमका कारण उदघाटन समारोहकाे अवलोकनका लागि वैकल्पिक व्यवस्था गरिएको राष्ट्रिय पुनर्निर्माण प्राधिकरणले जनाएको छ । धरहरा पूर्णरुपमा तयार भइ नसकेकोले अवलोकन गर्न भने पाइने छैन ।
वि.सं. २०७४ कात्तिक २७ गते मन्त्रिपरिषद् बैठकले धरहरा पुनःनिर्माणको जिम्मेवारी राष्ट्रिय पुनर्निर्माण प्राधिकरणलाई दिने निर्णय गरेको थियो । विसं. २०७५ असोज १४ गते प्राधिकरणले धरहरा पुनःनिर्माण शुरु गरेको थियो । पहिलोपटक प्रधानमन्त्री बनेका बेला २०७२ फागुन ४ गते केपी शर्मा ओलीले ‘मेरो धरहरा मैं बनाउँछु’ अभियान शुरु गरेका थिए ।
२०७२ साल बैशाख २ गते गोरखाको बारपाक केन्द्रविन्दु भएको भूकम्पले राजधानी काठमाडाैंको सुन्धारामा रहेको धरहरा ढलेको थियो । धरहरा ढल्दा ६० जनाले जीवन गुमाएका थिए । सयौँ मानिस घाइते भएका थिए । उपत्यकाको एक महत्वपूर्ण ऐतिहासिकस्थल भूकम्पले भत्किएपछि पुनःनिर्माण गर्न छ वर्ष लाग्यो । छ वर्षमा भत्किएको धरहरा यथावत् राखी नजिकै अर्को धरहरा बनेको छ ।
राष्ट्रिय पुनर्निर्माण प्राधिकरणले पहिले धरहरा रहेकै स्थानमा २२ तले धरहरा पुनर्निर्माण गरेको छ । धरहरा बाहिरबाट हेर्दा ११ तलाको देखिए पनि भित्र जमिनमुनि दुई तलाको भूमिगत संरचना रहने छ । जमिनमाथि भुइँतल्लासहित २३ तला हुनेछ । समग्रमा धरहरा २५ तलाको हुनेछ । धरहरासहित यस क्षेत्रमा निर्माण हुने संरचनाको कूल लागत रु तीन अर्ब ४८ करोड रहेको छ । पुनर्निर्मित धरहरामा सुनको जलप लगाइएको गजुर राखिएको छ । २२ औं तलामा पुरानो धरहराबाट झिकी सुरक्षित राखिएको शिवलिङ्ग स्थापना गरिएको छ ।

दुईवटा लिफ्ट र रंगरोगनको काम सकिएको छ । हाललाई एउटा मात्र लिफ्ट सन्चालन गरिएको छ । पार्किङ क्षेत्र, बगैंचालगायतको काम जारी छ । धरहरालाई बलियो, आकर्षक र अपांगमैत्री बनाइएको राष्ट्रिय पुनर्निर्माण प्राधिकरणले जनाएको छ । जमिनमाथिबाट गजुरसहित धरहराको उचाइ ८३.८५ मिटर छ । भूमिगत तलासहित ९२.२५ मिटर हुन्छ । धरहराभित्र दुई लिफ्ट राखिएको छ । लिफ्टमा एक पटकमा १० जनाले यात्रा गर्न सक्ने छन् । लिफ्टका कारण वृद्धवृद्धा तथा अपाङ्गता भएकालाई धरहरा चढ्न सहज हुनेछ । धरहरामा फलामको भर्याङसमेत जडान गरिएको छ ।
धरहराबाट उपत्यकाको दृश्यावलोकनका लागि २०औँ तला बाहिर २.५ मिटर चौडाइको बार्दली समेत बनाइएको छ । धरहरामुनिको दुईतले भूमिगत संरचनामा दुईवटा ‘विद्युतीय स्वचालित भर्याङ’ बाट तलमाथि गर्न सकिने गरी संरचना तयार पारिएको छ ।
धरहराको इतिहास
विसं. १८८२ मा महारानी ललिता त्रिपुरासुन्दरीको आज्ञामा नेपालका पहिलो प्रधानमन्त्री भीमसेन थापाले ६१.८८ मिटर अग्लो ११ तल्ले धरहरा बनाउन लगाएको इतिहास छ । विसं. १९१३ मा बज्र (चट्याङ) ले भत्केपछि विसं १९२३ मा धरहराको जीर्णोद्धार गरिएको थियो । विसं. १९९० माघ २ गतेको भूकम्पले भत्किएको धरहरा दुई वर्षपछि तत्कालीन प्रधानमन्त्री जुद्धशमशेरको शासनकालमा पुनःनिर्माण गरिएको थियो । पुनःनिर्माणका क्रममा ११ तले धरहरालाई नौ तलामा सीमित गरिएको थियो ।
यो धरहराभन्दाअघि विसं. १८८१ मा थापाले नै लगनटोलमा आफ्नो नाममा धरहरा निर्माण गरेका थिए । त्यसको नाम पनि भीमसेन स्तम्भ नै राखिएको थियो । विसं १८९० मा भत्किएपछि लगनटोलको धरहरा पुनःनिर्माण नभएको ऐतिहासिक दस्तावेजमा उल्लेख गरिएको छ ।
मकवानपुर । तत्कालिन ७ राजनैतिक दल र नेकपा (माओवादी) ले गरेकाे २०६२/६३ जनआन्दोलन सफल भएर लोकतन्त्र स्थापना भएको सम्झनामा आज लोकतन्त्र दिवस मनाइँदै छ । जनताले जितेको दिन, देशभरका सडकमा गणतन्त्रको नारा लागेको दिन, परिवर्तको नारा लागेको दिनका रूपमा वैशाख ११ लाई हरेक वर्ष नेपाली जनताले विजयी भएको दिनका रुपमा स्मरण गर्छन् ।
तत्कालीन ७ राजनीतिक दल र विद्रोही नेकपा(माओवादी)को संयुक्त आह्वानमा राजतन्त्रको अन्त्य गराउन भूमिका रहेकोले नयाँ नेपालको खाका कोरिएको सुनौलो दिनका रूपमा वैशाख ११ लाई लिने गरिएको छ । सोही दिनको स्मरणमा आज १५औँ लोकतन्त्र दिवस देशभर विभिन्न कार्यक्रमको आयोजना गरी मनाइदैछ ।
विसं २०६२/६३ को ऐतिहासिक जनआन्दोलन उत्कर्षमा पुगेपछि जनताको शक्तिका सामु आजकै दिन निरंकुश राजतन्त्रले घुँडा टेकी तत्कालीन राजा ज्ञानेन्द्र शाहले विघटित प्रतिनिधिसभाको पुनःस्थापना गरेका थिए । पुनःस्थापित संसद्को जेठ ४ गतेको बैठकले राजसंस्थालाई निलम्बन गर्दै कार्यवाहक राष्ट्राध्यक्षको अधिकारसमेत प्रधानमन्त्रीलाई दिएकाे थियाे ।
जनआन्दोलनमा कमाण्ड गरेका नेपाली कांग्रेसका तत्कालीन सभापति गिरिजाप्रसाद कोइरालाको नेतृत्वमा बनेको सर्वदलीय सरकारले २०६४ चैत २८ गते पहिलो संविधानसभाको चुनाव गराएको थियो ।
यसै बीच राष्ट्रिय प्रजातन्त्र पार्टीका अध्यक्ष कमल थापाले ‘ राजनीतिक दलसँग सम्झाैता गरेर हस्तान्तरण गरेकाे सत्ताले राजालाई पाखा लगाएकाे बताएका छन् । १५औं लोकतन्त्र दिवसकाे बिहानै सामाजिक संजाल टुईटरमा टुईट गर्दै अध्यक्ष थापाले आन्दोलनकारी दलहरूले राजालाई धोखा दिएर राजसंस्थालाई पाखा लगाएको आरोप लगाएका छन् ।
२०६३ साल वैशाख ११ राजा र आन्दोलनकारी दलहरूबिच सम्झौता भएर आन्दोलन अन्त भएको थियो । सम्झौता अनुसार राजाले राजनीतिक दलहरूलाई सत्ता हस्तान्तरण गरे। तर,आन्दोलनकारी दलहरूले धोखा दिएर राजसंस्थालाई पाखा लगाए। अहिले लोकतन्त्रको आवरणमा ब्रम्हलुट,धर्मपरिवर्तन, सर्वसत्तावाद हावी भएको छ । कमल थापाकाे टुइटर ह्रयाणडल केटी थापामा टुइटर गरेका छन् ।
वैशाख ११-
— Kamal Thapa (@KTnepal) April 24, 2021
२०६३साल आजकै दिन राजा र आन्दोलनकारी दलहरूबिच सम्झौता भएर आन्दोलन अन्त भएको थियो।सम्झौता अनुसार राजाले राजनीतिक दलहरूलाई सत्ता हस्तान्तरण गरे।तर,आन्दोलनकारी दलहरूले धोखा दिएर राजसंस्थालाई पाखा लगाए।
अहिले लोकतन्त्रको आवरणमा ब्रम्हलुट,धर्मपरिवर्तन,सर्वसत्तावाद हावी भएको छ
मकवानपुर । प्रहरी कर्मचारीहरुको आचरण व्यवहार सुधार एवम सेवा प्रवाह प्रणालीको सुधारको लागि २०७७ असार महिनाबाट शुरुवात गरिएकाे शुद्धिकरणअभियान प्रभावकारी देखिएकाे छ ।
बागमती प्रदेशमा गत असरबाट सुरु गरिएकाे अभियानमा २०७८ काे बैशाखसम्ममा प्रहरी कर्मचारीदेखि प्रहरी निरिक्षक सम्म २८ जना कारबाहीमा परेकाे प्रहरी नायव महानिरिक्षक बसन्त कुमार लामाले बताए । यसबिचमा कार्यसम्पादनमा उत्कृष्ट भुमिका निर्वाह गरेका ३० जनालाई सम्मान गरिएको छ ।
कार्यसम्पादानको लागि प्रहरी अधिकारीको संयोजनमा स्पेशल फोर्स गठन गरेर परिचालन गरेको प्रदेश प्रहरी कार्यालयकी प्रवक्ता वरिष्ठ प्रहरी उपरिक्षक मिरा चौधरीले जानकारी दिईन् । अन्य कारबाहीमा २ सय ३ प्रहरी परेका छन् भने ६ सय ५१ जना प्रहरी कर्मचारीलाई पुरस्कृत गरिएको जानका दिइएको छ । बागमती प्रदेश अन्तर्गतका नेपाल प्रहरीलाई घुस दिन खोज्ने १ हजार ८ सय ७० सवारी कारबाहीमा परेका छन् । प्रहरीले सवारी चालकले दिएको ३ लाख ४५ हजार २ सय ५० रुपैयाँ घुस फिर्ता गरिएकाे छ भने कारवाही गरेर १९ लाख ४५ हजार राजश्व संकलन भएकाे लामाले बताए ।
जबरजस्तीकरणीमा ३०७ मुद्दा
बागमती प्रदेशमा गत २०७७ को बैशाखदेखि चैतसम्मा ४ हजार २सय १८ मुद्दा दर्ता भएका थिए भने १ हजार ४ सय ३९ फछ्यौट र २ हजार ७ सय ७९ बाँकी रहेको छ । जसमा जबरजस्ती करणीको मुद्दा ३ सय ७ वटा परेको छ । जबरजस्ती करणीमा २०७६ मा २ सय ४८ मुद्दा परेको थियो भने २०७५ मा २ सय ३६ मुद्दा दायर भएको थियो । २०७७ मा बागमती प्रदेशमा आत्महत्याको घटना पनि बढेको छ ।
बागमती प्रदेशमा एक वर्षमा १ हजार ९९ जनाले आत्महत्या गरेका छन् जुन अघिल्लो दुई वर्षको तथ्यांक भन्दा धेरै हो । २०७६ मा बागमती प्रदेशमा ८ सय १० र ०७५ मा ५ सय १३ घटना घटेको प्रहरीको तथ्यांक रहेको छ । लागु औषध अपराध भने २०७७ मा थोरै घटेको तथ्यांकमा देखिन्छ । अघिल्लो वर्ष ३ सय २३ रहेको थियो भने ०७७ सालमा २ सय १४ वटा मात्रै मुद्धा रहेको छ ।
याे बिचमा विकृतीका घटनाहरू पनि बढेकाे तथ्याङ्कले देखाएकाे छ । बागमती प्रदेश प्रहरीले दिएको तथ्यांक अनुसार पछिल्ला वर्षमा सामाजिक विकृतीहरु बोक्सीको आरोप, बहुविवाह बढ्दै गएको पाइएको छ । प्रदेशभरी २०७७ मा बोक्सीको आरोपका घटना १२ वटा घटेका छन् । ०७६ र ०७५ मा क्रमशः ७ र १ घटना मात्रै थिए । यस्तै कोरोना भाईरसको कारण लामो समयसम्म लकडाउन तथा स्वास्थ्य निर्देशिकाले रोकिएको विहेहरुको बाबजुद पनि बागमती प्रदेशमा बालविवाह तथा बहुविवाह गरी ८५ घटना दर्ता भएका छन् ।
यस्तै २०७७ सालमा बागमती प्रदेशबाट ६ वटा मानव बेचविखनका घटना भएका छन् । बागमती प्रदेश प्रहरीले एक वर्षमा ५३ वटा मदिरा भट्टी नष्ट गरेको छ भने ६८ हजार ४ सय ८४ लिट तयारी मदिरा समेत नष्ट गरेको छ । कार्यालय मातहतका युनिटबाट खटिएको प्रहरी टोलीले एक वर्षमा ८ सय ६३ विगाहा १५ कठ्ठा गाँजा खेती नष्ट गरेको छ भने १ सय ३ विगाह १६ कठ्ठा अफिम खेती पनि नष्ट गरेको छ ।
याे अवधिमा प्रहरीकाे भाैतिक पक्ष पनि सशक्त बनेका छन् । जनताकाे सुरक्षाकाे लागि खट्ने प्रहरीहरू पहिले सुरक्षित हुने पर्ने धारणा सहित देश सरकारले प्रहरी भवन बनाउने कामलाइ तिव्रता दिएसँगै धमाधम भवन बने । बागमती प्रदेश प्रहरी कार्यालय मातहमा एकै वर्षमा ४८ वटा भवन निर्माण सम्पन्न भएका छन् । प्रदेश प्रहरीको कुल दरबन्दी ७ हजार ९ सय ८० रहेकोमा १ हजार ७ सय २४ दरबन्दी हाल खाली रहेको छ ।
प्रदेश मातहातमा स्थायी प्रहरी ईकाई ३ सय ३३, अस्थायी १ सय २८ रहेका छन् । हाल २१ वटा भवन निर्माणधिन अवस्थामा रहेको छ । प्रदेशमा एक वर्षमा शान्ति सुरक्षाको अवस्था सामान्य रहेको कार्यालयले जनाएको छ । शान्ति सुरक्षामा बागमती प्रदेशमा नेपाल बन्द २ चोटी आमहडताल १ एक चोटी चक्काजाम २४ वटा धर्ना ११ वटा, तालाबन्दी २७ वटा, विरोध -याली ३ सय १०, मशाल जुलुस–२८, आमसभा /कोण सभा ४७ वटा भएका छन् ।
मकवानपुर । नेपाल कम्युनिष्ट पार्टी (एमाले) बागमती प्रदेश सह–इन्चार्जमा मुख्यमन्त्री तथा एमाले केन्द्रीय सदस्य डोरमणी पौडेल चयन भएका छन् ।
नेकपा एमालेले शुक्रबार दशौ राष्ट्रिय महाधिवेशन आयोजक कमिटिका सदस्यरुको कार्यविभाजन गरेकोमा मुख्यमन्त्री पौडेल बागामती प्रदेशको सहइन्चार्ज तथा नगरपालिका महासंघको इन्चार्ज चयन भएका हुन् ।
एमाले मकवानपुर इन्चार्जमा रामेश्वर राना

नेपाल कम्युनिष्ट पार्टी (एमाले) मकवानपुर इन्चार्ज रामेश्वर राना चयन भएका छन् । एमालेले दशौ राष्ट्रिय महाधिवेशन आयोजक कमिटिका सदस्यरुको कार्यविभाजन गर्दा केन्द्रीय सदस्य राना मकवानपुर इन्चार्ज भएका हुन् ।
राना यसअघि मकवानपुरका सहइन्चार्ज थिए । यस अघि इन्चार्ज रहेका केन्द्रीय सदस्य विरोध खतिवडा भने जिम्मेवारी बिहिन भएका छन् । माधव नेपाल पक्षधर केन्द्रीय सदस्यहरूलाई केन्द्रीय कमिटीमा यथावत राखे पनि परिभाषित जिम्मेवारी दिइएको छैन ।
एमालेको स्थायी कमिटी घोषणा
यसैगरी नेकपा एमालेका अध्यक्ष केपी शर्मा ओलीले पार्टीको स्थायी कमिटी पुनर्गठन गरेका छन् । शुक्रबार बसेको दशौं राष्ट्रिय महाधिवेशन आयोजक समितिको बैठकमा अध्यक्ष ओलीले १९ सदस्यीय स्थायी कमिटी गठन गरेका हुन् ।
माधवकुमार नेपाल पक्षको अनुपस्थितिका बीच भएकाे महाधिवेशन आयोजक समितिको बैठकमा अध्यक्ष ओलीले स्थायी कमिटीमा नेपाल पक्षलाई समावेश नगरेका हुन् । एमाले एकता अभियान चलाएका, तर ओलीले बोलाएको बैठकहरुमा अनुपस्थित रहेका वामदेव गौतमलाई भने राखिएको छ । नेकपा एमालेको स्थायी कमिटीबाट माधव नेपाल पक्षधर नेताहरू हटाइएका छन् । साविक नेकपा विभाजनपछि केपी ओली पक्षमा रहेका स्थायी कमिटी सदस्यहरुलाई नै एमालेको स्थायी कमिटीमा रुपान्तरण गरिएको छ ।
एमाले स्थायी कमिटी
१. केपी शर्मा ओली
२. वामदेव गौतम
३. ईश्वर पोखरेल
४. रामबहादुर थापा बादल
५. विष्णु पौडेल
६. सुवास नेम्वाङ
७. शंकर पोखरेल
८. प्रदीप ज्ञवली
९. लेखराज भट्ट
१०. टोपबहादुर रायमाझी
११. सत्यनारायण मण्डल
१२. विष्णु रिमाल
१३. छविलाल विश्वकर्मा
१४. पृथ्वीसुब्बा गुरुङ्ग,
१५. रघुबीर महासेठ
१६. किरण गुरुङ
१७. केशव बडाल
१८. पुष्पराज कडेंल
१९. मणि थापा
मकवानपुर । नेपालमा पछिल्लो २४ घण्टामा थप २ हजार ५ सय ५९ जनामा कोरोना भाइरस संक्रमण पुष्टि भएको स्वास्थ्य तथा जनसंख्या मन्रत्रालयले जनाएकाे छ । ९ हजार ६ सय ६४ नमूना परीक्षणमा पीसीआरबाट ८ हजार ७ सय ९८ जना र एन्टीजेनबाट ८ सय ६६ जना गरी २ हजार ५ सय ५९ जनामा कोरोना संक्रमण पुष्टि भएको हो ।
योसँगै नेपालमा कूल संक्रमितको संख्या २ लाख ९४ हजार ६ सय १ पुगेको छ । पछिल्लो २४ घण्टामा ४ सय १० जना काेराेना संक्रमणमुक्त भएकाे मन्त्रालयले जानकारी दिएकाे छ । याे समेत हालसम्म संक्रमणमुक्त हुनेको संख्या २ लाख ७६ हजार ७ सय ५५ जना पुगेको छ ।
स्वास्थ्य मन्त्रालयका अनुसार पछिल्लो २४ घण्टामा कोरोनाबाट ५ जनाको मृत्यु भएको छ । हालसम्म कोरोना संक्रमणबाट मृत्यु हुनेको संख्या ३ हजार १ सय २२ पुगेको छ । हाल नेपालमा सक्रिय संक्रमितको संख्या १४ हजार ७ सय २४ जना रहेको छ ।