मकवानपुर । मकवानपुरको हेटौंडा उपमहानगरपालिका-९ मास्टर चोकमा यात्रुवाहक बसको ठक्करबाट पैदल यात्रीको मृत्यु भएको छ ।
पूर्वपश्चिम राजमार्गअन्तर्गतको उक्त स्थानमा जनकपुरबाट काठमाडौँ जान आइरहेको बा प्र ०३-००१ ख २६५६ नम्बरको यात्रुवाहक बसले ठक्कर दिँदा पैदलयात्री रुपन्देहीको देवदह नगरपालिका-८ का ३७ वर्षीय रामबहादुर बोहराको उपचारको क्रममा मृत्यु भएको जिल्ला प्रहरी कार्यालय मकवानपुरले जानकारी दिएको छ ।
बसको ठक्करबाट गम्भीर घाइते बोहरालाई उपचारका लागि हेटौंडा अस्पताल लगिएकोमा चिकित्सकले मृत घोषणा गरेका थिए । ठक्कर दिने बस र चालक महोत्तरीको रामगोपालपुर नगरपालिका-६ का ३३ वर्षीय सुजयकुमार सिंहलाई नियन्त्रणमा लिई थप अनुसन्धान भइरहेको प्रहरीले जनाएको छ ।
मकवानपुर । मकवानपुरकाे मकवानपुरगढी गाउँपालिकामा रहेकाे शारदा माध्यमिक विद्यालयले स्थापनाको ५० वर्ष पुगेको स्वर्ण महोत्सव सप्ताहाव्यापी विविध कार्यक्रम गरेर मनाउने भएको छ ।
मकवानपुरगढीकाे वडा नम्बर–५ धादिङमा रहेको विद्यालयले शनिबार हेटौंडामा पत्रकार भेटघाट गरी एक साता सम्म गरिने कार्यक्रमको जानकारी गराइएको हो । आगामी १ मंसिर देखी ७ मंसिरसम्म विभिन्न कार्यक्रमहरुको आयोजना गरि महोत्सव मनाइने प्रधानाध्यापक ईन्द्रबहादुर कार्कीले बताए । एक हप्तासम्म जिल्ला स्तरीय, गाउँपालिका स्तरीय, विद्यालयस्तरमा बिभिन्न कार्यक्रमको आयोजना गरिएको बिद्यालय व्यावस्थापन समिति अध्यक्ष युवराज सापकोटाले जानकारी दिए ।
विद्यालयको स्वर्ण महोत्सवका अवसरमा जिल्ला स्तरीय शिक्षक भलिबल प्रतियोगिता, जिल्ला स्तरीय शिक्षक चेस प्रतियोगिता, मकवानपुरगढी गाउँ पालिका स्तरीय खुल्ला चेस प्रतियोगिता, भूपु विद्यार्थी मित्रमिलन कार्यक्रम, विज्ञान प्रदर्शनी विद्यालय, रक्त दान, निःशुल्क स्वास्थ परीक्षण शिविर, विद्यालयमा वृत चित्र प्रदर्शनी, सांस्कृतिक कार्यक्रम, शिलालेख लेखन, सम्झना पर्खाल प्रदर्शन र प्रदर्शन, स्वर्ण जयन्ती गान वा विद्यालय गान निर्माण, अक्षयकोष छात्रवृत्ति वितरण विद्यालय स्मृति चिन्ह वा स्वर्ण जयन्ती शिला पट्टको अनावरण, अभिभाबक लोकदोहोरी प्रतियोगिता, शिक्षक हाजिरी जवाफ प्रतियोगिता लगायतका ५८ वटा कार्यक्रम गरिने प्रधानध्यापक कार्कीले जानकारी दिए ।
विद्यालयले उत्सवकाे रुपमा मनाउन लागेकाे स्वर्ण महोत्सवमा करिब १५ लाख खर्च हुने अनुमान रहेको विव्यस अध्यक्ष सापकोटाले बताए । विद्यालयले तिहारमा दुई देउसी भैलो कार्यक्रमबाट १३ लाख रुपैयाँ रकम संकलन गरिएको र त्यस रकमबाट केही रकम स्वर्ण महोत्सवका लागि खर्च गरिने बताइएकाे छ । यस्तै बाँकी रकम विद्यार्थी छात्रवृद्धी कोषकाे लागि खर्च गरिने मकवानपुरगढी वडा नम्बर–५ का वडा अध्यक्ष दिपेश दाहालले जानकारी दिए । विद्यालयमा हाल ५ सय १४ जना विद्यालय अध्ययनरत छन् ।
मकवानपुर । नेकपा एमाले मकवानपुरबाट विभिन्न समयमा पार्टी छोडेर गएकाहरुलाई आफ्नो मुल पार्टी फर्कन एमाले मकवानपुरले अपिल गरेको छ ।
पार्टीले अपिल पत्र सार्वजनिक गर्दै भनेको छ “विद्यमान परिस्थितीमा तपाईहरुको योगदानको निरन्तरता, राजनैतिक कृयाशिलता र सुनिश्चित गन्तव्य आफ्नो पुरानो घर नेकपा एमाले नै हुन सक्छ भन्ने हाम्रो विश्वास छ ।”
नेपाली कम्युनिष्ट आन्दोलनको मुल प्रवाह नेकपा एमाले राष्ट्रिय स्वाधिनताको, विकास र समृद्धिको नेतृत्वकर्ता हो भन्ने कुरा तथ्य र परिणामले पुष्टि गरेको विषयहरुले हामीलाई गर्वबोधको अनुभुती भएको उल्लेख गदै पार्टी उपाध्यक्ष हिदम लामाद्धारा हस्ताक्षरित अपिल पत्रमा भनिएको छ “भाद्र २३ र २४ गतेको जेन जी आन्दोलन र त्यस आन्दोलनमा भएको घुसपैठले मच्चाएको विध्वंसपछिको अवस्थालाई विश्लेषण गर्दा पनि एमालेको पार्टी कार्यालय र एमाले नेतृत्वको निवासलाई प्रहारको निशाना बनाएको देखिन्छ ।
नेकपा एमालेलाई कमजोर बनाउदा मात्र नेपालको राष्ट्रिय स्वाधिनताको पक्षलाई धक्का दिन सकिन्छ र समृद्धिका सपनाहरुलाई मुर्छित गर्न सकिन्छ भन्ने देशी विदेशी शक्तिहरुको सोच छर्लङग देखिएको अपिल पत्रमा दाबि गरिएको छ।
यो समय राष्ट्रिय राजनितीमा नयाँ तरङ्गहरु देखा परेको र दलहरुमा गठन पुनर्गठन र विघटनका श्रृङखलाहरु सुरु भएको उल्लेख गरिएको छ ।
अपिल पत्रमा भनिएको छ “हिजो नेकपा एमालेमा आवद्ध भई लामो समय यो पार्टी निर्माणमा रगत पसिना बगाउनु भएका कमरेडहरु मकवानपुरमा पनि पार्टी विभाजनको क्रममा एकिकृत समाजवादीमा आवद्ध हुनु भएको थियो तसर्थ, एकिकृत समाजवादीमा आवद्ध मकवानपुरका सम्पूर्ण कमरेडहरुलाई नेकपा एमाले मकवानपुर आफ्नै घर फर्कन हार्दिक आह्वान गर्दछ ।”
मकवानपुर । राष्ट्रिय स्वतन्त्र पार्टी (रास्वपा) काे केन्द्रीय समितिकाे विस्तारित बैठक शुक्रबारबाट चितवनमा सुरु भएकाे छ । केन्द्रीय समितिको विस्तारित बैठकमा कार्यवाहक सभापति डी.पी. अर्यालद्वारा राजनीतिक प्रतिवेदन प्रस्तुत गरेका छन् ।
प्रस्तुत राजनीतिक प्रतिवेदनमा पार्टीको तत्कालीन सम्पूर्ण ध्यान चुनावमा केन्द्रित हुने उल्लेख छ । राष्ट्रिय स्वतन्त्र पार्टी (रास्वपा) ले आगामी निर्वाचनमा स्पष्ट बहुमत ल्याउने लक्ष्यलाई ‘अर्जुनदृष्टि’ बनाउँदै वैकल्पिक राजनीतिक शक्तिहरूसँग एकता, सहकार्य र मोर्चाबन्दीको नीति अख्तियार गर्ने घोषणा प्रतिवेदनमा उल्लेख गरेको छ।
प्रतिवेदनले पुराना दलहरूको विकल्पमा एक सशक्त शक्ति निर्माण गर्न समान विचार भएका दल, समूह र व्यक्तिहरूसँग एकीकरण गर्ने, सम्भव नभए मोर्चाबन्दी गर्ने र त्यो पनि नभए मुद्दामा आधारित सहकार्य गर्ने रणनीति अघि सारेको छ।
यसैबीत रास्वपाले सङ्गठन विस्तारका क्रममा देखिएका चुनौतीहरूलाई स्वाभाविक भएको बताएका छन् । केन्द्रीय विस्तारित बैठकमा सहभागी जिल्लाका प्रतिनिधिहरूले युवा पुस्ता (जेनजी) को पूर्ण साथ आफूहरूसँग रहेको दाबी गरेकाे छ । पार्टीका विभिन्न तहका नेताहरूले केही प्रभावशाली व्यक्तिहरू बाहिरिँदैमा पार्टीको लक्ष्य र यात्रामा कुनै असर नपर्ने उनीहरुले बताएका छन् ।
पार्टीको आगामी कार्यदिशा र चुनावी रणनीति तय गर्न चितवनको सौराहामा सुरु भएको दुई दिने केन्द्रीय समितिको विस्तारित बैठक शनिबार सकिने छ । बैठकमा आगामी निर्वाचन रणनीति, पार्टी सङ्गठन विस्तार, पार्टीको विचार सिद्धान्तको बारेमा थप स्पष्ट गर्नेबारे छलफल हुने बताइएकाे छ ।
रास्वपाका उपसभापति डा स्वर्णिम वाग्लेले वैधानिकता, एजेन्डा र अपेक्षित परिणामबारे बैठकमा विस्तृत छलफल हुने बताए । वाग्लेका अनुसार पार्टीको विधानले पहिलो महाधिवेशन नहुन्जेलसम्मको सङ्क्रमणकालीन अवस्थामा केन्द्रीय समितिलाई विशेष अधिकार दिएको छ। सोही अधिकार प्रयोग गर्दै र फराकिलो दायरामा छलफल गर्न केन्द्रीय समितिले यो विस्तारित बैठक आयोजना गरिएकाे हाे ।
‘यो बैठक कर्तव्य बोध र उदारताका साथ आयोजना गरिएको हो ।’ विस्तारित बैठकलाई सम्बोधन गर्दै उनले भने, ‘हाम्रो ६० जनाको सामूहिक विवेकभन्दा पनि अझ फराकिलो ढङ्गले राय, विमर्श र चिन्तन गरौँ भन्ने उद्देश्य हो।’
राजनीतिक प्रतिवेदन यहाँबाट हेर्न सकिनेछः
विस्तारित बैठक कार्यवाहक सभापति डीपी अर्यालको राजनीतिक प्रतिवेदन
मकवानपुर । बागमती प्रदेश सरकार सवारी चालक अनुमति पत्र (लाइसेन्स) छपाइको लागि संघीय सरकारकाे अनुमति पर्खेर बसेकाे छ । प्रदेश सरकारले लाइसेन्स छपाइ प्रक्रियाकाे लागि अत्याधुनिक क्षमताका ५ थान मुद्रण मेसिन खरिद गरी स्थापना समेत गरेको छ।
तर, सुरक्षण मुद्रण विभागबाट अनुमति नआएकाले खरिद गरिएका मेसिन सञ्चालनमा आउन सकेको छैन। मुद्रण मेसिन एउटाले प्रतिघन्टा १५० वटा लाइसेन्स छाप्ने क्षमता राख्दछ। सवारी चालक अनुमति पत्रकाे परीक्षा उत्तीर्ण गरेका तथा नविकरणका लागि राजस्व तिरेका हजारौं नागरिक अझै लाइसेन्स पर्खाइमा छन् । आवश्यक राजस्व तिरेर कानुनी प्रक्रिया पूरा गरे पनि लाइसेन्स समयमै नपाउँदा सेवाग्राहीले असुविधा भोग्नुपरेको छ।
प्रदेश सरकारका श्रम, रोजगार तथा यातायात मन्त्रालय मन्त्री जयराम थापाले भने “जेनजी प्रदर्शनका क्रममा मन्त्रालय र जिल्ला स्थित केही कार्यालयहरु क्षति भएपनि हामीसँग प्राविधिक तयारी पूरा भइसकेको छ, तर सुरक्षण मुद्रण विभागको स्वीकृतिबिना कानुनी अड्चनका कारण छपाइ सुरु गर्न सकिएको छैन।” सुरक्षण मुद्रण ऐन २०८१ को दफा ९ को उप दफा ३ मा भएको व्यवस्था बमोजिम प्रदेश सरकारले जनतामुखी सेवा प्रवाहलाई सुदृढ बनाउने लक्ष्यसहित यो पहल अघि बढाएको उनले जानकारी दिए ।
बागमती प्रदेश सरकारले संघीयसरकारलाई आवश्यक स्वीकृतिका लागि पटक–पटक पत्राचार गरे पनि अहिलेसम्म स्पष्ट निर्देशन र निर्णय नआएको मन्त्रालयले जनाएको छ। मन्त्रालयका सचिव वीरेन्द्र देव भारतीले जनताको हितका काममा हामी प्रतिबद्ध रहेकाे बताउँदै आवश्यक अनुमति प्राप्त भए लगत्तै छपाइ प्रक्रिया सुरु गर्ने गरि तयारी गरिएको जानकारी दिए ।
लाइसेन्स प्रदेश तहमै गर्न सकिने व्यवस्था मिलाउन सके जनतालाई सेवा छिटो र सहज हुने अपेक्षा प्रदेश सरकारले गरेको छ। हाल बागमती प्रदेशको १२ लाख र देश भरका १३ लाख गरि २५ लाख सवारी चालक लाइसेन्स छाप्न बाँकी रहेकाे तथ्याङ्कले देखाउँछ । अहिले केन्द्रबाट छपाइ हुनुपर्ने व्यवस्थाका कारण छपाई ढिलो हुने, सामग्री ढुवानी र वितरणमा समय लाग्ने तथा जनताले अनावश्यक दुःख भोग्नु पर्ने अवस्था भने कायम छ।