काठमाडौं । निर्वाचन आयोगले जनता समाजवादी पार्टीभित्र देखिएको विवाद र त्यसपछि आयोगमा आएको एकअर्कामाथिको कारबाही पत्र विषयमा मुख खोलेको छ । आयोगले जसपा अध्यक्ष महन्थ ठाकुर र उपेन्द्र यादवले एकअर्का समूहमाथि कारबाही गरेर पठाएको ‘पत्र विवरण नमिलेको’ भन्दै बुधबार ‘अनूसूची १८ बमोजिमको ढाँचामा विवरण मिलाएर पत्र पठाउन’ भनेको छ ।
एकले अर्को समूहमाथि कारबाही माग गर्दै पत्र दिएपछि आयोगले दुवै अध्यक्षले पठाएको कारबाहीसम्बन्धी विवरण नमिलेकाले पुनः आवश्यक कागजात पठाउन पत्राचार गरेको हो । आयोगको पत्रमा दुवै पक्षबाट आएका कारबाही पत्र नियमावली अनुसूची ढाँचाअनुसार नमिलेको उल्लेख छ । ठाकुर र यादवले एकअर्कालाई पार्टीबाट निष्कासन गर्दै कारबाही गरेको पत्र निर्वाचन आयोग पठाएका थिए ।
आयोगले ठाकुर पक्षसँग केन्द्रीय समितिको निर्णयको हस्ताक्षरसहित र अनुसूचीअनुसारको ढाँचामा निवेदन मागेको छ । ठाकुरले अर्का ‘अध्यक्ष यादवलाई पार्टीबाट निष्कासन गरेको’ जानकारी आयोगलाई गराउँदै ‘पार्टी दर्ता किताबबाट यादवको नाम हटाउन’ पत्र दिएका थिए ।
ठाकुर पक्षलाई केन्द्रीय समितिको निर्णयको हस्ताक्षरसहित राजनीतिक दल दर्तासम्बन्धी उपनियमावली अनुसूची १८ को ढाँचा पठाउन पत्र पठाएको आयोग प्रवक्ता राजकुमार श्रेष्ठले जानकारी दिएका छन् । उनका अनुसार यादव पक्षलाई भने राजनीतिक दलसम्बन्धी नियमावली अनुसूचीअनुसार निवेदन दिन पत्र पठाइएको छ ।
यादव पक्षले केन्द्रीय सदस्यको हस्ताक्षर प्रतिलिपिसहितको निर्णय भने आयोगमा पठाएको प्रवक्ता श्रेष्ठले जानकारी दिए । तर, ठाकुर समूहले भने केन्द्रीय समितिको निर्णय पठाएको छैन ।
उच्च स्रोतका अनुसार आयोगमा बुझाइएको जसपा विधानमा दुई अध्यक्ष रहने उल्लेख छ । सो विधानमा पहिलो अध्यक्ष ठाकुर र दोस्रो अध्यक्ष यादव तोकिएका छन् । तर, ‘कुन अध्यक्षको हस्ताक्षर चल्ने भन्ने स्पष्ट खुलाइएको छैन । ‘पार्टी अनुशासन उल्लंघन हुँदा कसले कसरी कारबाही गर्ने भन्ने विषयसमेत जसपा विधानमा उल्लेख छैन ।
‘पहिलो कुरा त उहाँहरूको विधान नै अस्पष्ट छ, दोस्रो कुरा उहाँहरूले कारबाही गरेको विषय नै राजनीतिक दलसम्बन्धी नियमावलीको अनूसूचीसँग मिल्दैन,’ उच्च स्रोतले बुधबार राजधानीस“ग भन्यो, ‘आधिकारिक हस्ताक्षर कसको चल्ने भन्ने पनि विधानमा स्पष्ट छैन ।’ आयोगमा बुझाइएको विवरणमा जसपाको ५३ सदस्यीय केन्द्रीय कार्यकारिणी समिति रहने उल्लेख छ ।
त्यसमध्ये दुई जना मनोनित गर्न बाँकी नै छ । सो संख्यामध्ये कार्यकारिणी समितिमा यादव पक्षको बहुमत छ । यादव समूहले ‘कार्यकारिणी समितिमा ७ सय ७९ सदस्यीय बनाइएको’ भन्दै ‘अभिलेखीकरण गरिदिन’ आयोगमा पत्र पठाएको थियो । आयोगले भने एकतर्फी देखेर त्यसलाई उपचार गरिसकेको छैन । आयोगले जसपाको एकले अर्को पक्षलाई एकपछि अर्को गर्दै कारबाही गरेपछि कानुनी आधारमा निर्णय गर्नेगरी अघि बढिएको छ ।
सो विषयमा आवश्यक अध्ययन र जाँचबुझ गरेर निर्वाचन ऐन आधार मान्ने आयोगले जनाएको छ । जसपा यादव पक्षले अध्यक्ष ठाकुर, राजेन्द्र महतो, लक्ष्मणलाल कर्ण र सर्वेन्द्रनाथ शुक्ललाई पार्टी साधारण सदस्यबाटै निष्कासन गरेको थियो । यो जानकारी आयोगमा पठाउँदै दर्ता किताबबाट नाम हटाउन आग्रह गरिएको थियो ।
त्यसको ‘काउन्टर’मा ठाकुर पक्षले यादवलाई पनि पार्टीबाट निष्कासन गर्दै उस्तै बेहोरा आयोगमा जानकारी दिएको थियो । याे समाचार राजधानी दैनिकबाट साभार गरिएकाे हाे ।
मकवानपुर । मकवानपुर उद्योग वाणिज्य संघको पहलमा आइसोलेसन बुधबारबाट सञ्चालनमा आएकाे छ । संघको नेतृत्वमा विभिन्न संघसंस्थाहरुको सहकार्यमा गठित कोभिड हेल्प डेस्क मकवानपुरले पल्पसा आइसोलेशन सेन्टर संचालनमा ल्याएको हाे ।
हेटौंडामा कोरोना संक्रमितको लागि आइसोलेसनको अभाव हुन नदिन जिल्ला प्रशासन कार्यालय मकवानपुरले स्वीकृति दिए पछि बुधबारबाट आइसोलेसन सञ्चालनमा ल्याइएको हो । बुधबार बागमती प्रदेशका नेपाली कांग्रेस संसदीय दलका नेता इन्द्र बहादुर बानियाँले पल्पसा आइसोलेशनको उद्घाटन गरेका हुन् ।
उद्घाटनमा नेता बानियाँले सरकार पद र सत्ताको लागि परेकाे बताए । ‘अहिलेकाे काेराेना सक्रमणबाट जनतालाई जोगाउनु पर्ने समयमा सरकार आफु बच्न लागि रहेकाे छ’ बानियाले भने । उनले ३ महिना भित्र सबै जनतालाई खोप लगाउनकाे लागि सरकारलाई खबरदारी गरेका छन् ।
आइसोलेसनमा अक्सिजन सहित पूरुषको लागि २० वटा र महिलाको लागि १० वटा छुट्टाछुट्टै वेडको व्यवस्था गरिएको छ। डेक्सले एम्बुलेन्स सेवा समेत सञ्चालन गर्दै आइरहेको छ । आइसोलेशनको लागि झुल, तकिया, टेलिभिजन, इन्टरनेटसहित नुहाउनको लागि चिसोपानी, तातोपानीसम्मको व्यवस्था गरिएको पल्पसा आइसोलेशन सेन्टरका संयोजक भुवनलाल श्रेष्ठले बताए । अब ईच्छुक संक्रमित आउन वा संक्रमितको परिवारले पल्पसा आइसोलेशनमा संक्रमितहरुलाई ल्याउन सक्ने श्रेष्ठले जनाकारी दिए ।

कार्यक्रममा प्रदेश सभा सदस्य प्रेम बहादुर पुलामी, मुनु सिग्देल, हेटौंडा अस्पतालका अध्यक्ष राजेश प्रसाई, नारायणी संघका अध्यक्ष हिरालाल श्रेष्ठ, जिल्ला प्रहरी कार्यालयका प्रमुख सोमेन्द्र सिं राठौर, हेल्प डेस्कका पदाधिकारी, मउवा संघका पदाधिकारी, जनप्रतिनिधि, स्वास्थ्यकर्मी तथा सञ्चारकर्मीहरुको उपस्थिती रहेको थियो ।
जिल्ला जनस्वास्थ्य कार्यालयका प्रमुख, हेटौंडा उपमहानगरपालिकाको स्वास्थ्य शाखाका प्रमुखले पल्पसा आइसोलेशन सेन्टरकाे मंगलबार अवलोकन गरेका थिए । कोभिड हेल्प डेस्क मकवानपुरका स्वास्थ्यकर्मीसहितको टिमले पल्पसा आइसोलेशन सेन्टर प्रभावकारीरुपमा संचालन गर्न मंगलबार गौरीटार आइसोलेशनको अवलोकन समेत गरेको थियाे ।
मकवानपुर उद्योग वाणिज्य संघका कार्यसमिति सदस्य रुपकराज दहालले कोभिड हेल्प डेस्क मकवानपुरलाई अक्सिजन सिलिण्डरको लागि दुईथान रेगुलेटर सहयोग गरेका छन् । कोभिड हेल्प डेक्स सचिवालयबाट दैनिक फोन सम्पर्कमार्फत काेराेना संक्रमितहरुको स्वास्थ्य अवस्था बुझ्ने कार्य भइरहेकाे छ ।
मकवानपुर । आज जेठ १९ गते नारायणहिटी दरबार हत्याकाण्ड भएकोकाे दिन । २०५८ जेठ १९ गते साँझ दरबार हत्याकाण्ड भएकाे आज २० वर्ष पूरा भएको छ ।
हत्याकाण्डमा तत्कालीन राजा वीरेन्द्र विरविक्रम शाह, रानी ऐश्वर्य, युवराज दिपेन्द्र, राजकुमार निराजन, राजकुमारी श्रुतीसहितको हत्या भएको थियो । साथै राजकुमार धिरेन्द्र, राजकुमारी जयन्ती, राजकुमारी शान्ती, राजकुमारी शारदा, कुमार खड्ग विक्रम र अन्य राजपरिवारका सदस्यहरूको पनि हत्या भएको थियो ।
अत्यन्तै संवेदनशिल र उच्च सुरक्षा घेराभित्र रहेको राजदरबारमा भएको हत्याकाण्ड अहिले सम्म रहस्यमै रहेकाे छ । पारिवारिक भाेजमा भनाभन हुँदा युवराज दिपेन्द्रले परिवारका सदस्यहरुलाई गोली प्रहार गरेपछि आफैलाई गोली हानेको तत्कालिन छानविन समितिकाे प्रतिवेदनमा सार्वजनिक गरिएपनि त्यसको विश्वसनियतामा शंका गर्ने गरिन्छ ।
मुलुकमा राजतन्त्र हटेर संघिय लोकतान्त्रिक गणतन्त्र स्थापना भइसके पनि तत्कालीन राजपरिवारको वंश नाश भएको जेठ १९ को छाप अहिले पनि नेपालीको मनबाट मेटिएको छैन ।
मकवानपुर । केही दिन देखि भइरहेकाे वर्षामा कमी अाइ देशका पहाडी भु-भागमा आंशिक बदली, अन्य भू-भागहरु मौसम सफा रहने छ जल तथा माैसम विज्ञान विभाग माैसम पूर्वानुमान महाशाखाले जनाएकाे छ ।
हाल देशमा पश्चिमी वायु, स्थानीय वायु र भारतको पश्चिम बंगाल तथा यसको आसपास बनेको न्यून चापीय क्षेत्रको (Cyclonic Circulation) सामान्य प्रभाव रहेकाेले प्रदेश १ लगायत पहाडी भु-भागमा आंशिक बदली र देशका अन्य भू-भागहरुमा मौसम सामान्यतया सफा रहने महाशाखाले जनाएकाे छ ।
देशका पहाडी भू-भागका थोरै स्थानहरू र तराई भु-भागका १/२ ठाँउमा मेघगर्जन / चट्याङ्ग सहित हल्का वर्षाको समेत सम्भावना रहेकोले आवश्यक सतर्कता अपनाउन महाशाखाले अनुराेध समेत गरेकाे छ ।
मकवानपुर । मकवानपुर जिल्लामा कोरोना संक्रमणमुक्त हुनेकाे संख्या बढ्दै गएको छ । मंगलबार आज थप १ सय ५१ जना कोरोना संक्रमणमुक्त भएका छन् । यो संगै जिल्लामा संक्रमणमुक्त हुनेकाे संख्या ६ हजार ४ सय ७६ पुगेको छ ।
यस्तै मकवानपुरमा पछिल्लो २४ घण्टामा थप १ सय ४४ जनामा कोरोना भाइरस संक्रमण पुष्टि भएको छ । ३ सय ४३ जनामा गरिएको पीसीआर र एन्टीजेन परीक्षणमा थप १ सय ४४ जनामा कोरोना पुष्टि भएको हाे । यो संगै मकवानपुरमा हालसम्म कोरोना पुष्टि हुनेहरुको संख्या ८ हजार ७ सय ८९ पुगेको स्वास्थ्य कार्यलय मकवानपुरले जनाएको छ ।
जिल्लामा हाल २ हजार २ सय १२ जना सक्रिय संक्रमित रहेका छन् । संक्रमितमा २ हजार ९७ जना घरमै र १ सय १५ जना संस्थागत आइसोलेसनमा उपचारत रहेका छन् ।
यसैगरी जिल्लामा पछिल्लो २४ घण्टामा थप २ जना संक्रमितको मृत्यु भएको छ । मृत्यु हुने दुबै जना हेटौंडा उपमहानगरपालिकाका रहेका छन् । उनीहरुको उपचारको क्रममा हेटौंडा अस्पतालमा मृत्यु भएको हो ।
मृत्यु हुनेमा हेटौंडा-८ की ७५ वर्षीया महिला र हेटौंडा-११ की ७८ वर्षीया महिला रहेका छन् । यो संगै मकवानपुरमा कोरोनाबाट मृत्यु हुनेको संख्या ९४ जना पुगेको छ ।
देशभर ६ हजार ८ सय ९८ जना काेराेना मुक्त
देशैभर पछिल्लो २४ घण्टामा थप ६ हजार ८ सय ९८ जना काेराेना संक्रमणमुक्त भएका छन् । याेसँगै काेराेना निको हुनेको कुल संख्या ४ लाख ५४ हजार ३ सय ४४ पुगेको छ ।
६ हजार ८५ जनामा कोरोना सक्रमण पुष्टि हुँदा ६ हाजर ८ सय ९८ जना काेराेना निकाे भएकाे स्वास्थ्य तथा जनसंख्या मन्त्रालयले जनाएकाे छ । मन्त्रालयका अनुसार २० हजार १ सय ६५ जनामा कोरोना परीक्षण गर्दा ६ हजार ८५ जनामा संक्रमण पुष्टि भएको हो । याेसँगै संक्रमितको कुल संख्या ५ लाख ६६ हजार ५ सय ८७ पुगेको छ ।
सोही अवधिमा ६८ जनाको मृत्यु भएको छ । यससँगै देशभर कोरोनाबाट ज्यान गुमाउनेको कुल संख्या ७ हजार ४ सय ५४ पुगेको छ ।
यस्तै हाल देशभर १ लाख ४ हजार ७ सय ८९ सक्रिय संक्रमित रहेका छन् ।