मकवानपुरमा क्रिकेट एकेडेमी
Tags: No Comments
मकवानपुर । मकवानपुरमा क्रिकेट एकेडेमी उद्घाटन गरिएको छ । मंगलबार एक कार्यक्रमका बीच मकवानपुरे क्रिकेट खेलाडी राम नरेश गिरीको अध्यक्षतामा गठन गरिएको मकवानपुर क्रिकेट एकेडेमीको उद्घाटन भएकाे छ । उद्घाटन सँगै क्रिकेट खेलका अन्तर्राष्ट्रिय खेलाडी गिरीको नेतृत्वमा मकवानपुरमा क्रिकेट एकेडेमी स्थापना हुने भएको हाे ।
नेपाल क्रिकेट संघको केन्द्रीय समिति सदस्य करण महत्राले मंगलबार हेटौंडा–४, हुप्रचौरमा एकेडेमीको उद्घाटन गरेका हुन् । एकेडेमीकाे उद्घाटन गर्दै महत्राले एकेडेमीलाई व्यावसायिक बनाएर नयाँ खेलाडी उत्पादनमा ध्यान दिनु पर्ने बताए । गिरीले राष्ट्रिय टिममा मकवानपुरका खेलाडीको सहभागिता बढाउन क्रिकेटका सिनियर खेलाडीको सहभागितामा एकेडेमी स्थापना गरिएको जानकारी दिए । ‘उमेर समूहको राष्ट्रिय टिममा मकवानपुरका खेलाडी चयन हुन नसकेको धेरै भइसक्यो । मकवानपुरको खेलाडीको सहभागिता उमेर समूहको राष्ट्रिय टिममा बढाउनकै लागि एकेडेमी स्थापना र सञ्चालन गर्ने निर्णय गरेका छौं ।’ उनले भने ।
एकेडेमीमा अहिले नयाँ र पुराना गरी २५ जना खेलाडी आवद्ध भइसकेको बताइएकाे छ । एकेडेमीले हेटौंडाको हुप्रचौरमा दैनिकरुपमा बिहान र दिउँसो २ घण्टाका दरले प्रशिक्षण सञ्चालन गर्ने भएकाे छ । अहिले पुरुष खेलाडीलाई मात्रै प्रशिक्षण दिन सुरु गरेको एकेडेमीले छिट्टै महिला खेलाडीलाई पनि प्रशिक्षण सञ्चालन गर्ने छ ।
गिरीको अध्यक्षतामा गठन गरिएको मकवानपुर क्रिकेट एकेडेमीको उपाध्यक्षमा सुरेन्द्र अधिकारी, सचिवमा प्रेम क्षेत्री, कोषाध्यक्षमा रविन गुरुङ रहेका छन् । यस्तै सदस्यमा विनोद लामिछाने, मनोज खड्का, विवेक दाहाल, अमित राई र सन्देश ढकाल चयन भएको छन् । एकेडेमी उद्घाटन कार्यक्रममा मकवानपुर जिल्ला क्रिकेट संघका अध्यक्ष बासुलाल श्रेष्ठ, मकवानपुर जिल्ला खेलकुद विकास समितिका पूर्वउपाध्यक्ष दिपेन्द्र ढकाल लगायतकाे उपस्थिति रहेको थियो ।
मकवानपुर । नेपाली कांग्रेस मकवानपुरको सभापतिमा बुद्ध लामा चयन हुने लगभग पक्का भएको छ । पहिलो चरणको मतदान अनिर्णित बनेपछि नेताहरुबीच सभापतिमा लामालाई सर्वसम्मत चयन गर्ने सहमति गर्न लागिएको कांग्रेस मकवानपुरले जनाएकाे छ ।
कांग्रेस केन्द्रीय सहमहामन्त्री महालक्ष्मी उपाध्याय ‘डीना’, बागमती प्रदेश सभापति इन्द्रबहादुर बानियाँ, सभापतिका उम्मेदवार लामा, आनन्दराम पराजुलीसहितको बैठकबाट लामालाई सभापति चयन गर्न लागिएको हो । केहीबेरमै पार्टी कार्यालयमा बुद्ध लामा सभापति भएको घोषणा गर्ने कार्यक्रम रहेको जनाइएको छ ।
सोमबार भएको पहिलो चरणको मतदानमा बुद्ध लामाले ५ सय ९२ मत प्राप्त गरेका थिए । आनन्दराम पराजुलीले ५ सय ४५ मत प्राप्त गरेका थिए । यस्तै अर्का आकांक्षी जयराम लामिछानेले ५ सय ३१ मत प्राप्त गरेका थिए । १ हजार ८ सय ५३ मतदातामध्ये १ हजार ७ सय ७५ प्रतिनिधिले मतदान गरेका थिए ।
पहिलो चरणमा सभापति चयन हुन उम्मेदवारहरुले पर्याप्त मत प्राप्त गर्न नसकेपछि निर्वाचन समितिले दोस्रो चरणको मतदान मंगलबार दिउँसो १ बजेदेखि सुरु हुने सूचना प्रकाशित समेत गरिसकेको थियो ।
मकवानपुर । हिन्दुहरुकाे प्रमुख चाड महाशिवरात्री पर्व आज मनाइदैछ । महाशिवरात्री अथवा शिवरात्री हिन्दुहरूको प्रमुख चाड हो। महाशिवरात्री पर्व मंगलबार भगवान् शिवको स्तुति गर्दै पशुपतिनाथलगायत देशका विभिन्न शिवालयहरूमा धुमधामका साथ मनाइँदैछ । देश तथा विदेशबाट श्रद्धालु तथा साधुसन्त यो मेला भर्न पशुपतिमा आउने गरेका छन् । महाशिवरात्री पर्वमा पशुपतिनाथमा लाग्ने मेला भने विशिष्ट र अन्तर्रा्ष्ट्रिय मेला नै हो ।
यो भगवान शिवको प्रमुख पर्व हो। भगवान शिवको उत्पत्ति भएको रातका नामबाट नामकरण भएको यो पर्व कालरात्री, मोहरात्री, सुखरात्री र शिवरात्री नामक चार प्रमुख रात्रि मध्ये एक पवित्र पर्वका रूपमा पुराणहरूमा वर्णित छ। फाल्गुन कृष्ण चतुर्दशीका दिन मनाइने यस पर्वलाई सम्पूर्ण दीन दुःखी र कष्टपूर्ण अवस्थामा रहेका प्राणीहरूको हृदयमा धर्मको उदय गराउने आशुतोष भगवान् शिवको अति प्यारो दिनका रूपमा पनि लिइने गरिन्छ। व्रत उत्सव मध्ये सर्वोत्तम कहलिएको महाशिवरात्रीका दिन भक्तजनहरूले शुद्ध भई शिव मन्दिरमा पूजा-अर्चना गरी व्रत बस्ने र भगवान् शिवको प्रिय वस्तु दूध, धतुरो र बेलपत्र चढाउने गर्दछन्।
यस पर्वका दिन उपवास गरी ” ॐ नमः शिवाय” मन्त्र जप्ने गरेमा सर्वसिद्धि लाभ भई यमलोक जानु नपर्ने धार्मिक विश्वास रहेको छ। ब्रह्माले रूद्ररूपी शिवजीलाई उत्पन्न गरेको दिन, शिव पार्वतीको विवाहको दिन शिवरात्री पर्व कृष्ण चतुर्दशीमा मनाइन्छ। निर्जल व्रत, रात्री जागरण, चार प्रहरको पूजा, शिवलिंगमा दुधको अभिषेक र शिव महिमा कीर्तन शिवरात्रिको पूजा अर्चनाका मुख्य अङ्ग मानिन्छन्। शिवरात्रि पर्वलाई पर्वको राजा भनिन्छ र शिवरात्रिको पालनाले भोग र मोक्ष दुवैको प्रप्ति हुन्छ भनिन्छ।
शिवरात्री पूजामा व्रतकालमा भगवान शिवको ध्यान, पूजन र जप गरिन्छ भने जागरण कालमा भक्तको सम्पूर्ण सत्ता जागरणबाट शिवमय बन्दछ। पूजन वा शिवार्चनमा इशान मूर्तिलाई दुधले स्नान गराइन्छ। सृष्टिको प्रारम्भमा यसै दिन मध्यरात्री कालमा भगवान् शङ्कर ब्रह्माबाट रुद्रका रूपमा अवतरण भएका थिए भन्ने धार्मिक विश्वास रहेको छ।
मकवानपुर । मकवानपुर प्रहरीले लागुऔषध गाँजा र गाडीसहित ५ जनालाई पक्राउ गरेकाे छ । भीमफेदी गाउँपालिका वडा नं २ भैँसे चेकपोष्टस्थित सडकबाट आइतबार प्रहरीले बा ०३ ००१ च ११४४ नम्बरको टाटा योद्धा गाडीबाट ९ किलो ८ सय ग्राम लागुऔषध गाँजासहित ५ जनालाई पक्राउ गरेको हो ।
फागुन १५ गते आइतबार भैसे प्रहरी चाैकीबाट खटिएकाे प्रहरी टाेलीले भीमफेदीबाट हेटौंडा तर्फ आउँदै गरेको उक्त गाडीलाई रोकी चेकजाँच गर्ने क्रममा ९ किलो ८ सय ग्राम गाँजा फेला परेको जिल्ला प्रहरी कार्यालय मकवानपुरले जनाएको छ । प्रहरीले गाडीमा सवार भीमफेदी गाउँपालिका वडा नं ५ बस्ने ३२ वर्षीय सवीन रिजाल, २५ वर्षीय सोमसिं घलान, ६० वर्षीया जुठीमाया घलान, ६७ वर्षीय मानबहादुर घलान र ५० वर्षीय संचारसिं घलानलाई पक्राउ गरेको छ ।
उनीहरुलाई जिल्ला अदालत मकवानपुरबाट १५ दिनको म्याद लिइ थप अनुसन्धान भैरहेको मकवानपुर प्रहरी प्रवक्ता प्रहरी नायब उपरीक्षक जयश्वर रिमालले जानकारी दिए ।
मकवानपुर । माइती नेपाल मकवानपुरले आगामी १ बर्ष सञ्चालन हुने मानव बेचविखन रोकथाम परियोजना बारे हेटौंडा उपमहानगरपालिकासँग पूर्व सहमति बैठक गरेको छ ।
परियोजना अन्तरगत बेचविखनमा परेका वा बेचबिखनको जोखिममा रहेका, विद्यालय छाडेर बसेका वा छाड्ने अवस्थामा रहेका, जबरजस्ती श्रम गर्न बाध्य तथा यौन हिंसा र दुर्ब्यवहारमा परेका महिला, किशोरीहरुलाई उद्धार गरी आबधिक सेल्टरको सहयोग, सिपमुलक कार्यक्रम तालीम प्रदान गर्ने उदेश्य रहेको माइती नेपाल मकवानपुर प्रमुख माया लामाले बताइन् ।
आगामी १ बर्ष सन्चालन हुने परियोजना मार्फत किशोरीहरुलाई उनीहरुको बौद्धिक क्षमतामा बृद्धि गरी सबै खाले हिंसाको विरुद्धमा महिला अभियानकर्ताको रुपमा स्थापित हुन सहयोग गर्ने, सरकारी तथा गैर सरकारी संस्था, महिला तथा बालबालिकाहरुसँग सम्बन्धित संस्थाहरु र संजालसँग सहकार्य र समन्वय गरी मानव बेचविखन र सबै खाले हिंसा विरुद्ध लड्न एक्यवद्धता गर्ने लामाले बताइन् ।
परियोजना अन्तरगत उद्धार गरिएका तथा जोखिम अवस्थाका ४० जना महिला तथा किशोरीहरुलाई आवासीय सेवा सहित सिलाई कटाई तालिम प्रदान गर्ने, सिलाई कटाई तालिममा सहभागीहुनेहरुको लागि शैक्षिक एक्सपोजर भ्रमण आयोजना गर्ने,
परामर्श प्रदान गरी मानव बेचबिखन बिरुद्धको अभियानकर्ता वा परामर्शकर्ताको रुपमा विकास गर्ने, सहभागी हुने ४० जना महिला तथा किशोरीहरुको लागि नेतृत्व विकास संचार, सामुहिक गतिशीलता र सहजीकरण, महिला तथा किशोरीहरुको अधिकार सम्बन्धी भएका कानुनी प्राबधानहरु र मानब बेचबिखन बिरुद्ध कानुनी ज्ञान सम्बन्धी जानाकारी गराइने छ।
परियोजना संञ्चालित क्षेत्रमा रहेको सरकारी संयन्त्र परियोजना परामर्श समितिसँग वैठक आयोजना गरी कार्यक्रमको गत बर्षको प्रगति विवरण र यस बर्षको योजनाबारे जानाकारी गराई प्राप्त सुझाब र सल्लाहलाई कार्यक्रममा संलग्न गर्ने पनि लामाले बताइन् । सचेतनाको लागि मानब बेचबिखन बिरुद्ध सचेनात्मक रेडियो कार्यक्रम, जिङ्गल निर्माण गर्ने, रेडियोवाट प्रसारित गर्ने र उक्त कार्यक्रम निर्माण गर्दा स्थानिय भाषालाई पहिलो प्राथमिकता दिईने उनले बताइन् ।

विद्यालयमा किशोर तथा किशोरीहरुलाई मानव बेचबिखन र सुरक्षित बसाईसराई बारे जानकारी प्रदान गर्ने, राष्ट्रिय तथा अन्तराष्ट्रिय रुपमा मनाईने विभिन्न दिवस तथा सचेतनात्मक अभियानहरु संञ्चालन गर्ने, विश्व एड्स दिवस,बाल दिवस,मानव बेचविखन तथा ओसारपसार विरुद्धको दिवस, लैगिंक हिंसा विरुद्धको दिवस, अन्तराष्ट्रिय महिला दिवस उद्धार तथा रोकथाम गरिएका महिलाहरुलाई पुर्नमिलनको समयमा परामर्श सेवा प्रदान गर्ने लामाले बताइन् ।
हेटौंडा उपमहानगरपालिका उपप्रमुख मिना कुमारी लामाको अध्यक्षतामा भएको बैठकमा लामाले मानव बेचविखन तथा असुरक्षित बसाइसराई न्यूनिकरण सम्बन्धमा पैरवी कार्यक्रम गर्ने, मानव बेचविखन तथा असुरक्षित बसाइसराई न्यूनिकरण सम्बन्धमा सरोकारवालासंग समन्वय गरेर अगाडी बढ्ने, स्थानीय सरकारसँग समन्वायत्मक बैठक आयोजना गरी मानव बेचविखन तथा ओसारपसार नियन्त्रणमा सहकार्य गरेर अगाडि बढिनेछ।
यसैगरी होटल व्यवसायी र यातायात कर्मीहरुसंग मानव बेचविखन, लैगिंक हिंसा, बाल श्रमशोषण तथा जवरजस्ती श्रमका विरुद्ध सचेतनामुलक गोष्ठीहरु संञ्चालन गरिने छ । यो परियोजनाबाट प्रत्यक्ष रुपमा ४ हजार ५ सय जना र अप्रत्यक्ष रूपमा २४ हजार जना लाभाविन्त हुने लामाले बैठकमा जानकारी दिइन्।
बैठकमा माइती नेपाल मकवानपुरको फिल्ड सुपरभाइजर मन लामा, हेटौंडा उपमहानगरपालिकाका प्रमुख प्रशासकीय अधिकृत शिवराज चौलागाईं, शिक्षा महाशाखा प्रमुख गंगाधर रिमाल, सामाजिक विकास महाशाखा प्रमुख बिष्णुकुमारी लामिछाने, महिला तथा बालबालिका महाशाखा प्रमुख जगन्नाथ सापकोटा, समाज कल्याण शाखा प्रमुख भैरव कुमाल, मानव अधिकार संरक्षण तथा मानव बेचबिखन विरुद्धको जिल्ला सञ्जाल संयोजक आरती पाठक, हिमराईट्स मकवानपुर प्रमुख कुमारी वाईबा, साना हातहरू नेपालका डिकम्बर रुपाचालगायतको उपस्थिति रहेको थियो ।