मकवानपुर /तीन महिनापछि आज आइतबार बसेको बागमतीको प्रदेशसभा बैठकमा २ वटा बिद्येक पारित भएका छन् ।
बैठकमा सामाजिक विकास मन्त्री कुमारी मोक्तानको तर्फबाट आर्थिक मामिला तथा योजना मन्त्री शालिकराम जम्कट्टेलले प्रतिवेदनसहित प्रस्तुत गरेको प्रदेश उच्च शिक्षा सम्बन्धमा व्यवस्था गर्न बनेको विद्येक पारीत गरिएको छ ।
यसैगरी पर्यटन तथा संस्कृति मन्त्री दिपेन्द्र श्रेष्ठको तर्फबाट उद्योग, बाणिज्य तथा आपूर्ति मन्त्री मिलनबाबु श्रेष्ठले प्रस्तुत गरेको प्रतिवेदन सहितको प्रदेश पर्यटन विकास सम्बन्धमा व्यवस्था गर्न बनेको विद्येक सर्वसम्मतिले पारित भएका छन् ।
आज कै बैठकमा आन्तरिक मामिला तथा कानून मन्त्री कृष्णप्रसाद शर्मा खनालले २ विद्येक पेश गरेका छन् ।
खनालले प्रदेश विपद व्यस्थापन ऐन २०७५ लाई संशोधन गर्न बनेको बिद्येक, प्रदेश संचारमाध्यम व्यवस्थान ऐन २०७५ लाई संशोधन गर्न बनेको विद्येक र प्रदेश अनुसन्धान व्यूरो सेवाको गठन, स्थापना, काम, कर्तव्य र अधिकार सम्बन्धमा व्यवस्था गर्न बनेको बिद्येक पेश गरेका हुन् ।
खनाले पेश गरेको केही प्रदेश ऐन संशोधन गर्न बनेको विद्येक दफावार छलफलका लागि संसदीय समितिमा पठाउने निर्णय भएको सभामुख सानुकुमार श्रेष्ठले बताए ।
मकवानपुर । हेटौंडाका १० जना साइकलयात्री केरुङदेखि ठोरीसम्मकाे साइकल यात्रामा निस्किएका छन् । उनीहरु उत्तरतर्फ चीनसँगको सीमा केरुङदेखि दक्षिण्तर्फ भारतको सीमानाका ठोरीसम्मको साइकल यात्रामा निस्केका छन् ।
हिमालयन राईडर्स सोसाईटीको संयोजकत्वमा आज फागुन २९ गते आइतबारदेखि रसुवाको केरुङ नाकाबाट साइकल यात्रा सुरु गर्न लागिएको हो । सोसाइटीका अध्यक्ष चेतनाथ आचार्यको संयोजकत्वमा १० जनाको टोली शनिबार केरुङतर्फ गएको छ । टोलीमा सोसाइटीका उपाध्यक्ष एवम् नेपाल पत्रकार महासंघ मकवानपुरका पूर्बअध्यक्ष भानुभक्त आचार्य समेत सहभागी रहेका छन् ।
विश्वव्यापी तापमानको वृद्धि, पेट्रोलियम पदार्थको मूल्यबृद्धि, नेपालको चुलिँदो व्यापारघाटा, दैनिक उपभोग्य बस्तुमा तीव्र मिसावटका कारण बिग्रँदो जनस्वास्थ्य आदि कुरामा प्रत्यक्ष वा परोक्ष प्रभाव पार्ने साईकललाई दैनिकी बनाउने अभियानका साथ साइकलयात्रा सुरु गर्न लागिएको टोलीका सदस्य भानुभक्त आचार्यले बताए ।
टाेलीमा सोसाइटीका महासचिव एवम् ईन्जिनियर सागर पन्थी, सचिव राजु राना मगर, कोषाध्यक्ष लक्ष्मीचरण श्रेष्ठ, सदस्यहरु बुद्धिबहादुर आले, बुद्धराम श्रेष्ठ, शैलेश दुतराजलगायत सहभागी रहेका छन् । टोलीमा बारा राइडर्स संघ सिमराका ३ जना साइकल यात्री पनि सहभागी रहेका संयोजक आचार्यले जानकारी दिए । बारा राइडर्स संघका कोषाध्यक्ष रामेश्वर बाँस्कोटा, सदस्य हरेराम आचार्य र रामहरि सुबेदी सहभागी रहेका छन् ।
फागुन २९ गते आइतबार रसुवाको केरुङ नाकाबाट सुरु हुने साइकल यात्रा नुवाकोटको त्रिशुली, धादिङ, चितवनको नारायणगढबाट माडी हुँदै ठोरीसम्म गरिने भएको छ । टोली पर्साको ठोरीबाट बीरगन्ज हुँदै हेटौंडा फर्कने बताइएको छ । करिब ४ सय किलोमिटरको यात्रा ५ दिनमा पूरा गरिने आचार्यले जानकारी दिएका छन् ।
साइकल यात्राकाे समन्वयका लागि मकवानपुर उद्योग वाणिज्य संघले ५ वटै जिल्ला उद्योग वाणिज्य संघलाई पत्राचार गरेको संघका अध्यक्ष कृष्णकुमार गुप्ता अग्रवालले जानकारी दिए ।
मकवानपुर । प्रथम प्रदेश खेलकुद प्रतियोगिताको हेटाैंडामा उद्घाटन गरिएकाे छ । बागमती प्रदेशका मुख्यमन्त्री राजेन्द्र प्रसाद पाण्डेले प्रथम खेलकुद प्रतियोगिताको शनिबार हेटौंडास्थित पिप्ले क्याम्पा रंगशालामा एक समारोहबीच उद्घाटन गरेका हुन् ।
प्रदेश खेलकुद विकास परिषद् बागमती प्रदेशको आयोजना हुने प्रथम खेलकुद प्रतियोगिताको मुख्यमन्त्री पाण्डेलेओलम्पिक टर्च बालेर ओलम्पियन धावक बैकुण्ठ मानन्धर हस्तान्तरण गर्दै प्रतियोगिताको उद्घाटन गरेका हुन् । शनिवार उद्घाटन गरिए पनि प्रतियाेगिता अन्तरगतका खेलहरु फागुन २९ गते आइतबारबाट सुरु हुने भएकाे छ । उद्घाटन कार्यक्रममा नेपाल आर्मी, नेपाल प्रहरीको व्याण्ड सहितको प्रस्तुती, विद्यार्थीहरुद्धारा ड्रिल प्रदर्शन, अतिसबाजी, मार्सल आट्र्स डेमो, विभिन्न तामाङ, नेवाः, थारु समुदायले आफ्नो झाँकी तथा खैजेडी र पञ्चेबाजाको साँस्कृतिक कार्यक्रम भव्य प्रस्तुत तथा प्रदर्शनी गरिएकाे थियो ।
कार्यक्रममा पिप्ले क्याम्पा रंगशाला निर्माणमा योगदान गरेका पूर्व राष्ट्रिय बक्सिङ खेलाडी तथा पिप्ले युवा क्बलका अध्यक्ष सुशील घिमिरेलाई सम्मान गरिएको थियो । कार्यक्रममा राष्ट्रिय तथा स्थानीय कलाकारहरुले आफ्नो गायन तथा नृत्य प्रदर्शन गरेका थिए ।

प्रतियोगिता मकवानपुरसहित चितवन, काभ्रे, काठमाडौं र सिन्धुपाल्चोक गरी ५ जिल्लामा विभिन्न खेलको आयाेजना हुनेछ । मकवानपुरकाे हेटाैडामा फागुन २९ गते आइतबारबाट पुरुष फुटबल, व्याडम्निटन र चैत्र ५ गतेबाट तेक्वान्दो प्रतियोगिता सुरु हुनेछ । त्यस्तै, चितवनमा ३० गतेदेखि भलिबल र क्रिकेट खेल सुरु हुने छन् । प्रतियाेगिता अन्तरगत सिन्धुपाल्चोकमा चैत्र ७ गतेबाट कराँते खेल हुनेछ भने काठमाडौंमा चैत्र ६ गतेदेखि एथलेटिक्सका खेल हुने छ । त्यस्तै, काभ्रेमा चैत्र ७ गतेदेखि महिला फुटबल र ९ गतेदेखी बक्सिङ खेल प्रतियोगिता हुने बताइएकाे छ ।
८ करोड ४ लाख खर्च हुने अनुमान गरिएकाे प्रतियाेगितामा बिभिन्न खेलमा करिब २ हजार भन्दाबढी खेलाडीले सहभागिता जनाउने छन् । १ हजार २ सय पुरुष खेलाडी र ९ सय महिलाले खेलाडीले प्रतियाेगितामा भाग लिने आयाेजकले जानकारी दिएकाे छ । खेलको समापन कार्यक्रम चैत्र १२ गते शनिबार काभ्रेको धुलिखेलमा हुनेछ ।
मकवानपुर । मुक्तककार रेणुका चौलागाईँको मुक्तक संग्रह ‘जीवनजस्तो जीवन’ विमोचन भएको छ । शनिबार काठमाडौंमा नेपाल मुक्तक प्रतिठानको आयोजनामा भएकाे कार्यक्रममा उक्त कृति विमोचन गरिएको हो ।
कार्यक्रमका प्रमुख अतिथि प्रा. डा. कृष्णहरि बराल, मुक्तक प्रतिष्ठानका अध्यक्ष कामकाजी कोणे, कवि गीतकार तथा मुक्तककार प्रतिष्ठानका रमेश पौडेल, प्रा. समालाेचक ज्ञानु अधिकारी, मुक्तकार मीना चौलागाई, यादव चौलागाई, शिक्षक चुहाप्रसाद चौलागाई तथा कृतिकारका माता-पिता लगायतले ‘जीवनजस्तो जीवन’ विमोचन गरेका हुन् ।
विमाेचन कार्यक्रममा प्रमुख अतिथि प्रा. डा. बरालले जीवनजस्तो जीवन मुक्तक संग्रहले नेपाली नारी मनका यावत विषयलाई सशक्त ढंगले उठाएको बताए । कृतिकाे भूमिका लेख्नुहुने बरिष्ठ मुक्तककार रुद्र ज्ञवालीले कृतिकारको मुक्तक शिल्पको चर्चा गर्दै उनीमा प्रचुर संभावना रहेको बताए ।
प्रा. समालोचक डा. अधिकारीले जीवनजस्तो जीवनमा नारी मनका कुण्ठा मात्र हैन, हुँकार समेत रहेको दाबी गरिन् ।कृतिकारका शिक्षक तथा अतिथि चुडा प्रसाद चाैलागाईंले आफ्नाे शिष्यले मुक्तक कृति लिएर आएकोमा हर्षित हुँदै यस्तै प्रतिभाशाली विद्यार्थी आफ्नो जीवनको कमाई भएको बताए । नेपाल मुक्तक प्रतिष्ठानका अध्यक्ष तथा कार्यक्रम सभाध्यक्ष रामकाजी कोनेले अहिले नेपाली साहित्यमा मुक्तकको बहार आएको बताउँदै कृतिकारकारलाई शुभकामना दिएका थिए ।
प्रतिष्ठानका महासचिव रमेश पौडेलले समकालिन नेपाली साहित्यमा नारी हस्ताक्षरको विश्वव्यापी रूपमै दर्विलो उपस्थिति रहेको बताए जिकिर गरे । प्रष्ठिानका सदस्य तथा मुक्तककार यादव भट्टराईले कृति मुक्तकको रचना विधान मुताविक शैली शिल्पले सिंगारिएको बताए । काभ्रेली साहित्यकार तथा मुक्तककार मीना चौलागाईँले जीवनजस्तो जीवनकी सर्जकको चिनारी दिँदै मुक्तकका विषयले हरेक विषयलाई समेटेको जानकारी दिइन् ।
कृतिकार रेणुका चौलागाईँले मुक्तक प्रतिष्ठानको ब्यानरमा माता पिताको उपस्थितिमा कृति विमोचन गर्न पाउँदा गौरवको अनुभूति भएको बताइन् । कृतिकारकी सुपुत्रीद्वय सुजिता र अनुषा चौलागाईँले आमालाई बधाई दिँदै कृति आगमनले पूरै परिवार नै गौरवान्वित भएको बताएका थिए ।
मुक्तक, कविता, गजल, कोपिला, हाईकु जस्ता साहित्य विधामा कलम चलाउने रेणुकाकाे ‘जीवनजस्तो जीवन’ पहिलाे कृति हाे । स्थायी ठेगाना काभ्रे रही हाल काठमाडाैमा बसाेबास गर्दै आएकी मुक्तककार सानै देखि साहित्यमा कलम चलाउँदै आएकाे भए पनि पछिल्लाे समय करिब ३ बर्षबाट निरन्तर साहित्य रचना गर्दै आएकाे बताउँछिन । रेणुकाका जीवनसाथी यादवप्रसाद चौलागाई प्रकाशक रहेको उक्त कृतिमा २ सय ८२ वटा मुक्तक समावेश रहेका छन् ।
मकवानपुर । नेवार समुदायको साझा संस्था नेवा देय् दबुको बागमती प्रदेश अध्यक्षमा विष्णुगोपाल महर्जन निर्वाचित भएका छन् । शनिबार हेटौंडामा सम्पन्न प्रथम अधिवेशनबाट मकवानपुरका महर्जनको अध्यक्षतामा २७ सदस्यीय समिति सर्वसम्मत निर्वाचित भएको हो ।
यसैगरी दबुको वरिष्ठ उपाध्यक्ष चन्द्रलाल मानन्धर (रामेछाप), उपाध्यक्ष उपेन्द्र प्रधान (दाेलखा) र सुशीला श्रेष्ठ (सिन्धुली), प्रमुख सचिव बद्रिमान श्रेष्ठ (चितवन), सचिव दिलकुमारी श्रेष्ठ (चितवन) र गणेश कुमार श्रेष्ठ ( मकवानपुर), कोषाध्यक्ष विजयराज बज्राचार्य (मकवानपुर) चयन भएका छन् ।
यस्तै सदस्य बाबुराज श्रेष्ठ, सुशीला श्रेष्ठ, सिर्जना श्रेष्ठ (दोलखा), हर्षबहादुर श्रेष्ठ र कालिदास श्रेष्ठ (सिन्धुली), विष्णुनारायण श्रेष्ठ, बाबुकृष्ण श्रेष्ठ, भरतकुमार श्रेष्ठ र सन्जु श्रेष्ठ (धादिङ) सर्वसम्मत चयन भएका छन् । यसैगरी तिलमाया श्रेष्ठ, दल बहादुर श्रेष्ठ (रामेछाप), निराजन गोपाली (मकवानपुर), राजेन्द्र महाजु (काभ्रे), सरिता श्रेष्ठ, गोविन्दकृष्ण श्रेष्ठ (चितवन), ज्ञानेन्द्र श्रेष्ठ, शुक्रकुमार श्रेष्ठ, रामकृष्ण श्रेष्ठ र दिलिप कुमार श्रेष्ठ (सिन्धुपाल्चोक) प्रदेश समितिको सदस्य चयन भएका छन् ।
शनिबार बागमती प्रदेशका सभामुख सानुकुमार श्रेष्ठले अधिवेशनको उद्घाटन गरेका थिए । अधिवेशन उद्घाटन गर्दै श्रेष्ठले भाषाकाे संरक्षण र प्रयोग गर्न समुदाय सचेत हुनुपर्ने बताए । संयुक्त राष्ट्रसंघको सदस्यता लिने क्रममा नेपालले मौलिक भाषाको रुपमा नेवारी भाषा र मौलिक लिपीको रुपमा रञ्जना लिपीलाई स्वीकार गरिसकेकोले नेवारी भाषा र लिपीको संरक्षण गर्नु अझ महत्वपूर्ण भएको उनले बताए ।

नेवा देय दवु बागमती प्रदेश समितिका अध्यक्ष उमेश स्थापितको अध्यक्षतामा भएकाे अधिवेशनमा बागमती प्रदेशका १० जिल्लाका प्रतिनिधिको सहभागिता रहेकाे थियाे । अधिवेशनको अवसर मै शनिबार बिहान नेवारी बाजा, लाखे नाचसहित प्रभातफेरी गरिएको थियो । हेटौंडा–२ स्थित मन्त्र रेष्टुरेन्टबाट निस्किएको प्रभातफेरी संगमचोक, हरिकुञ्जरोड, कान्तिराजपथ, पारिजातपथ, स्कूलरोड, टिसिएनरोड, बसपार्क, राप्तीरोड, बुद्धचोक, मेनरोड, पिपलबोट चोकहुँदै पुनः अधिवेशन आयोजनास्थल मन्त्र रेष्टुरेन्टमा पुगेर समापन गरिएको थियो ।
अधिवेशनको उद्घाटन कार्यक्रममा नेकपा एमाले मकवानपुरका अध्यक्ष एकालाल श्रेष्ठ, नेपाली कांग्रेस मकवानपुरका सभापति बुद्ध लामा लगायतकाे उपस्थिति रहेको थियो ।